Read Pinyin Lukə̀ 14 Bible Online

Lukə̀ 14 - Pinyin bible

Lukə̀ 14

¹A lə̀ pə njyə̂ àlaʼà pɨ̀Jew ɨ̀tse, Yěsû a ghə̀ mmə ndzɨghə̀ a ndâ àtwuə̀ pɨ̀Farìsî àtse. Tsaʼnə à lə̀ pənə ghu la, pobə lə̀ mə ndyənkə̀ e tyìʼə̀ ɨ̀shìʼnə̀.

²Nkɨ wùutə̀ ŋònə̀ ɨ̀tse nɨ mɨ̀kwùə̀ pobə mbô lə̀ koʼtə̀nə a nwuunə̀ a mbyə̀ Yěsû.

³A pyiitə̀ ambo pɨ̀Farìsî pobə pɨ̀nèrə̀ mbòomə pyə̀nə pɨ lə̀ pənə ghu lo, “mbòomə wəənə̀ a nèrə̀ lo pɨ parə̀ ŋwùə̀ a njyə̂ àlaʼà, kə̀ ngaŋə?”

⁴La pobə lə̀ zhwemnə̀ ghobə. Yěsû a pètə̀ ŋònə̀ wa mbarə̀ e ngɨ̀rə̀ a lèrə̀ e.

⁵Yěsû a tyiʼə̀ mbyiitə̀ ambo pobə lo, “A ɨ̀wə̌ ɨwɨghə nɨ mbə̀ʼə moonə̀ e kə̀ ɨ̀fòŋə̀ e tə mbəla nkunə̀ amwuə nɨ̀ntaamə̀ nɨ nchyə njyə̂ àlaʼà a ka zùŋə̀ faʼa fuukə̀ e nɨ mɨ̀tɨ̀ŋnə̀ njyə̂ àlaʼà ghu?”

⁶Ka pobə lə̀ pə a ghobə nɨ àkẅùə̀ mbə̀ʼə àpyiitə̀ e yèghu.

⁷Nkwùə̀ nɨ Yěsû à lə̀ zəənə̀nə lo pànə̀ nɨ pɨ lə̀ wuunə̀nə a ghobə lə̀ pə ntàʼà pə ɨləŋə pɨ̀shìʼnə̀ a nɨ nwuunə̀ aŋunə, à lə̀ shwəŋə̀ àshwəŋnə̀ nàanə nàanə zə̀ ambo pobə:

⁸“Ŋwùə̀ à tə wuunə̀ o lo wə̀ tô a nɨ̀ghaʼà nɨ̀zoʼò e; wə̀ tô kò wə̀ nwuunə̀ o alyiʼə ɨ̀shìʼnə̀ mbə̀ʼə nkwùə̀ ɨ̀tse, a lə̀ wuunə̀ a ŋònə̀ nɨ à pənə nɨ àghuʼtə̀ ntsàarə̀ o.

⁹Mbə̀ʼə a pə a lenə, yi ŋònə̀ nɨ à wuunə̀nə a wɨghə pɨ̀tsùmə̀, ǎ tô shwəŋə̀ ambo ghò lo, ‘Lòo o ŋŋâ alyiʼə ambo ŋònə̀ wə̀.’ Lenəla wə̀ tyiʼə̀ ndòo a ɨ̀shyə̂ nɨ ɨ̀sɨŋnə̀ ngə̀ nnwuunə̀ aŋunə aləŋə a ndzùmə̀.

¹⁰La pɨ pəla ngwuunə̀ o, wə̀ nkɨ ntô wə̀ nwuunə̀ aŋunə aləŋə ndzùmə̀ mbə̀ʼə ŋònə̀ nɨ à fuŋə̀nə o a tô, a shwəŋə̀ ambo ghò lo, ‘Ɨ̀swùə mə̀, tô nwuunə̀ aŋunə alyiʼə ɨ̀shìʼnə̀ zə̀.’ Lenəla, àghuʼtə̀ noʼnə a pə ambo ghò a ɨ̀myə̂ pànə̀ nɨ pɨghə pobə nwuunə̀ la.

¹¹Ntiinə ŋònə̀ nɨ à ŋaŋə̀nə mbɨ̀ŋmə̀ e àtɨ̀ghə, pɨ ghǎ shwuʼkə̀ e a ɨ̀shyə̂, ŋònə̀ nɨ à shwuʼkə̀nə mbɨ̀ŋmə̀ e a ɨ̀shyə̂, pɨ ghǎ ŋaŋə̀ e àtɨ̀ghə.”

¹²Yěsû a chi nshwəŋə̀ ambo ngàŋə̀ ndâ wa lo, “Wə̀ mə ngɨ̀rə̀ a nɨ̀ghaʼà, kò wə̀ wuunə̀ pə ndàʼà pɨ̀swùə ɨ̀pô, nɨ pɨlyimə ɨ̀pô, nɨ ngẅàrə̀ o, kə̀ ngàŋə̀ àpàrə̀ nkaʼà ɨ̀zô nɨ pənə pɨ̀ghàŋə pɨ nkabə̀ ntiinə pobə ghǎ kɨ chwìitə̀ o nɨ ɨghobə nɨ̀ghaʼà. Lenəla, kẅuə̀ ànwùə̀ nɨ wə̀ lə̀ ghɨ̀rə̀nə aŋunə pobə.

¹³La wə̀ pə ghɨ̀rə̀ a nɨ̀ghaʼà, wə̀ chwìitə̀ ngàŋə àfumə̀, pɨ̀koŋə̀ ɨ̀shyə̂, nɨ pɨ̀kɨkə̀ghə pobə pɨ̀fə̀.

¹⁴Lenəla, mborə̀ ɨ pə ambo ghò ntiinə mbə̀ʼə pobə ghǎ nkẅuə̀ a ghobə apə̀. Nẅùə̀ a ghǎ tsoʼò àfàʼà o njyə̂ nɨ pànə̀ nɨ mɨ̀nwùə̀ ɨ̀mobə təəmə̀nə ghǎ zhwuumə̀ a nɨ̀wɨghə̀.”

¹⁵Nkwùə̀ nɨ taʼà ŋwùə̀ ɨghobə ɨ̀tse nɨ à lə̀ nwuunə̀nə aŋunə tepèrə̀ pobə pɨ pobə à lə̀ zuʼnə ànwùə̀ nɨ Yěsû à lə̀ shwəŋə̀nə la, à lə̀ shwəŋə̀ ambo ze lo, “Mborə̀ ɨ̀ chyə̂ ambo ŋònə̀ nɨ à ghǎ nwuunə̀ alyiʼə nɨ̀ghaʼà amwuə ànwùə̀ Nɨ̀fò Nẅùə̀.”

¹⁶La Yěsû a shwəŋə̀ ambo ze lo, “Ŋònə̀ ɨ̀tse à lə̀ pə ghu mmə ngɨ̀rə̀ a nɨ̀ghaʼà ghù ngẅùunə, ngwuunə̀ pànə̀ pɨ̀noʼnə.

¹⁷Nkwùə̀ nɨ̀zɨghə̀ a nɨ̀ghaʼà ɨ̀ lə̀ kùʼù a twuumə̀ a ngàŋə̀ àfàʼà e lo â ghə̀ nfuŋə̀ a ŋwùə̀ ntsùmə̀ nɨ pɨ lə̀ chwìitə̀nə e lo, ‘Àzwuumə̀ àtsùmə̀ a tyiʼə̀ a ɨ̀shyə̂.’

¹⁸La pànə̀ nɨ pɨ lə̀ chwìitə̀nə a ghobə la pìʼnə̀ a nɨ tiitə̀ mɨ̀nwùə̀ nɨ mɨ nàanə̀nə lo kò pobə tô, ghù ntsàambyə̀ a shwəŋə̀ ambo ze lo, ‘Ǹdzwuunə̀ alyiʼə ɨ̀shyə̂ mə̀, ǹtàʼà ghə̀ naŋə̀ a zèrə, njiilo, kẅiirə̀ àpuʼù mbô mə̀.’

¹⁹Àpaatə̀ a shwəŋə̀ lo, ‘Ǹdzwuunə̀ mɨ̀fòŋə̀ nɨ̀ghumə̀, ngwə̀ a àlàŋə mmə ngə̀ a nɨ zəənə̀ tsaʼnə mèrə ma nfàʼà; njiilo kẅiirə̀ àpuʼù mbô mə̀.’

²⁰Ghùtse a shwəŋə̀ àze lo, ‘M̀birə̀ ndzoʼò a ngẅùə mə̀, ka mbə tô mə̀.’

²¹“Ngàŋə̀ àfàʼà wa a kwə̂, nkẅirə̀ shwəŋə̀ ɨ̀nwùə̀ pə̀ ɨ̀tsùmə̀ ambo masàa e. Ntɨŋmə̀ masàa e zaŋə̀ a shwəŋə̀ ambo ze lo, ‘Faʼa nfurə̀ ndèrə̀ amwuə ɨ̀twuə̀ ndwuumə̀ ɨ̀tsùmə̀ pobə mɨ̀ntsùrə mɨ̀tsùmə̀ amwuə ghə, nfuŋə̀ ngàŋə àfumə̀, nɨ pɨ̀koŋə̀ ɨ̀shyə̂, nɨ pɨ̀kɨkə̀ghə pobə pɨ̀fə̀.’

²²Ngàŋə̀ àfàʼà wa a ghə̀ nkẅirə̀ nkwə̂, nshwəŋə̀ lo, ‘Tǎ, ànwùə̀ nɨ wə̀ shwəŋnə̀ lo n̂gɨ̀rə̀ la, ǹgɨ̀rə̀ mə. La ɨ̀sàanə̀ ɨ̀ pirə̀ ambo pə̀ənə̀.’

²³“Masàa wa a làŋə̀ nɨ mbyə̀ nshwəŋə̀ ambo ngàŋə̀ àfàʼà e wa lo, ‘Kẅirə̀ ngə̀ amwuə mɨ̀ntsùrə pobə mɨ̀fəərə̀ mɨ̀tsùmə̀ nshwatə̀ pànə̀ pɨ̀tsùmə̀ nɨ wə̀ zəənə̀nə mbə̀ʼə ndâ mə̀ zə ɨ̂ lẅenə̀.

²⁴Ǹshwəŋə̀ ambo ghò lo, mbə̀ʼə taʼà ŋwùə̀ wa ɨ̀tse nɨ ndə̀ pyə̀nə nchwìitə̀ e la a zhwiʼì e àzwuumə̀ àtse amwuə nɨ̀ghaʼà wə̀ apə̀.’”

²⁵Ɨ̀pùŋə̀ pə̀ənə̀ lə̀ mə ndzùŋə̀ a Yěsû, a pə̀ŋə̀ nshwəŋə̀ ambo pobə lo,

²⁶“Ŋònə̀ nɨ à wə̀ ndzùŋə̀ mə̀ ka twuunə̀ e a tǎ ɨghobə pobə mǎ e, nɨ ngẅùə e ghobə ɨ̀poonə̀ ɨ̀pe, nɨ pɨlyimə ɨ̀pe pɨ̀mbyàŋnə̀ pobə pɨ pə̀ngyə̌ tə farə àtwuə̀ ɨ̀pɨ̀ŋmə̀ e, mbə̀ʼə ka à pə e àzùŋə̀ ndzùmə̀ mə̀.

²⁷Ŋònə̀ nɨ mbə̀ʼə ka à pìʼì e a àtɨ̀ghə pànkə̀nə e ndzùŋə̀ mə̀, mbə̀ʼə ka à pə e àzùŋə̀ ndzùmə̀ mə̀.

²⁸“Ntiinə, a ɨ̀wə̌ amwuə pɨghə nɨ à tə mbəla mbə korə̀ a mɨlyiʼə ndâ nɨkaŋə e, a ka nwuunə̀ e a ɨ̀shyə̂ nshankə̀ ndùnə̀ ɨ̀pwuumə̀ nɨ ǎ myàanə̀ ndâ ghu pòŋə̀ pìʼnə̀ àfàʼà?

²⁹À tə mbəla mbyə̀ ka shankə̀ ndùnə̀ ɨ̀pwuumə̀ a nɨ poomə̀ ndâ zə̀ ntyiʼə̀ nkorə̀ àtsirə̀ ka myàanə̀ e ndâ aŋunə, yi ŋònə̀ nɨ ǎ làŋə̀ zəənə̀ ǎ tyiʼə̀ ẅìi,

³⁰shwəŋə̀ lo, ‘Zəənə̀ a ŋònə̀ ɨ̀tse nɨ à pìʼnə̀nə a nɨ̀ghùrə̀ la a tsàarə̀ e a nɨ myàanə̀.’

³¹“Kə̀ ɨ̀fò ɨ̀tse à wa ghu nɨ mbə̀ʼə a mə ngə̀ màʼà ntsòo pobə ẅùə̀, a ka nwuunə̀ e a ɨ̀shyə̂ kwànkə̀ lo tə mbə̀ʼə a lòo ngàŋə màʼà ntsòo ɨ̀ze nkaamə̀ nɨ̀ghumə̀ ngə̀ ndzòŋnə̀ a ẅùə̀ ɨ̀fò nɨ à pənə nɨ ngàŋə màʼà ntsòo ɨ̀ze nkaamə̀ mɨ̀ghumə̀ mɨmbaa?

³²A pəla ndzəənə̀ lo mbə̀ʼə ka à tsàarə̀ e a ẅùə̀, a pòŋə̀ lo a zùŋə̀ ntsàa pə̀ənə̀ nɨ ntwuumə̀ ambo ɨ̀fò wa nɨ à pirə̀nə a ndyə̌ sàa, mbuʼù mbô ndàʼnə̀ ntsòo wa mbə̀ʼə pobə ze nwuunə̀ nɨ àporə̀porə̀.

³³A ndəŋə ndəŋə, ǹkùmə̀ nshwəŋə̀ a wɨghə lo, mbə̀ʼə ŋònə̀ wa ntsùmə̀ nɨ ka à twuunə̀ e ɨ̀pwuumə̀ ɨ̀pe ɨ̀tsùmə̀ a pə e àzùŋə̀ ndzùmə̀ mə̀ apə̀.

³⁴“Ngwaŋə̀ pòŋə̀, la ngwaŋə̀ tɨ ka pə chi lɨ̀ŋmə̀ e, pɨ tyiʼə̀ ngɨ̀rə̀ lə ɨla nɨ mèrə lo mɨ pòŋə̀ lɨ̀ŋmə̀?

³⁵Mɨ tɨ pəla ka chi lɨ̀ŋmə̀ e, yi ka àfàʼà e a pə e ghu. Ka mèrə kɨ nchi nkùʼnə̀ e a nɨ chyâ a ɨ̀shyə̂; mèrə tyiʼə̀ mbə lo pɨ̀ waʼà. “Ŋònə̀ wa nɨ à pənə nɨ mɨtugrə, â zuʼù.”