Read Pinyin Lukə̀ 16 Bible Online

Lukə̀ 16 - Pinyin bible

Lukə̀ 16

¹Yěsû a làŋə̀ nɨ mbyə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Ngàŋə̀ nkabə̀ ghùtse à lə̀ pə ghu mbə nɨ àtwuə̀ ngàŋə̀ àfàʼà nɨ à lə̀ mənə nnaŋə̀ ɨ̀pwuumə̀ ɨ̀pe. Pɨ tô nshwəŋə̀ ambo ngàŋə̀ nkabə̀ wa lo, ‘Àtwuə̀ ngàŋə̀ àfàʼà e wa à wə̀ ntsə̀ŋə̀ ɨ̀pwuumə̀ ɨ̀pe.

²Ngàŋə̀ nkabə̀ wa a fuŋə̀ a ngàŋə̀ àfàʼà e wa mbyiitə̀ e lo, Zèrə̀ zə̀ ànwùə̀ nɨ ngwə̀ ndzuʼù mbə̀ʼə o lə a chyə̂ lə lo àkə? Tô nɨ àŋwàʼnə̀, nnèrə̀ tsaʼnə wə̀ mənə mbyabə̀ ɨ̀pwuumə̀ pə la n̂dzəənə̀, mbə̀ʼnə ka wə̀ pə chi lèrə̀ o nɨ mbyə̀ a nɨ pyabə̀ ɨ̀pwuumə̀ ɨ̀pâ.’

³Àtwuə̀ ngàŋə̀ àfàʼà mbyabə̀ ɨ̀pwuumə̀ wa a shwəŋə̀ amwuə ze lo, ‘Mbɨ ghɨ̀rə̀ lə ɨla tɨ̀tsòŋə̀ tsaʼnə masàa mə̀ à wə̀ ntàʼà a nɨ kẅiirə̀ àfàʼà zə ambo mɨ̀ŋə̀ lə? Ka mbə mə̀ nɨ ɨ̀tɨ̀ŋnə̀ a nɨ tuŋə̀ ɨlyiʼə, nkɨ mbə nɨ ɨ̀sɨŋnə̀ a nɨ karə̀ ndoonə̀ ɨ̀pwuumə̀.

⁴Ǹzhyə̂ ànwùə̀ nɨ mbɨ ghɨ̀rə̀ mbə̀ʼə pànə̀ mə nkẅiirə̀ mə̀ amwuə mɨ̀ndâ ɨ̀mobə mbə̀ʼə pɨ fuukə̀ mə̀ àfàʼà.’

⁵“Lenəla a fuŋə̀ ngàŋə ndzǒ masàa e za tyìʼə̀ moʼo moʼo, mbyiitə̀ ambo ghù ntsàambyə̀ lo, ‘Wə̀ ẅìimə̀ a masàa mə̀ la nɨ ndùnə̀ ɨla?’

⁶A kẅùə̀ lo, ‘Nkàʼà mɨ̀ghurə̀ nkɨrə.’ Ngàŋə̀ àfàʼà wa a shwəŋə̀ ambo ze lo, ‘Faʼa ntô nnwuunə̀ a ɨ̀shyə̂ ntyiʼə̀ ŋŋwàʼnə̀ lo wə̀ ẅìimə̀ e pə nɨ nkàʼà mɨ̀ghurə̀ mɨ̀ghumə̀ mɨntaanə̀.’

⁷À lə̀ tyiʼə̀ ndàŋə̀ nɨ mbyə̀ mbyiitə̀ àpaatə̀ lo ‘Wə̀ ẅìimə̀ a masàa mə̀ la nɨ àkə?’ “A kẅùə̀ lo nɨ ‘Nkàʼà nkẅùə̀ nkaamə̀.’ Ngàŋə̀ àfàʼà wa a shwəŋə̀ ambo ze lo, ‘Tyiʼə̀ ŋŋwàʼnə̀ pə lo wə̀ ẅìimə̀ e pə nɨ nkàʼà nkẅùə̀ nkɨrə nɨ̀fàamə̂.’

⁸“Lenəla masàa wa à lə̀ zəənə̀ àzhìʼtə̀ ngàŋə̀ àfàʼà tɨ̀pòŋə̀ wa aŋunə mɨ̀nwùə̀ nɨ à ghɨ̀rə̀nə. Nɨ̀ zəənə̀ lo pànə̀ pɨ àtwuə̀ ɨ̀shyə̂ ghə̀ chyə̂ nɨ àzhìʼtə̀ a nɨ ghɨ̀rə̀ ɨ̀mobə mɨ̀nwùə̀ ntsàarə̀ pànə̀ nɨ pɨ pa mbô a Nẅùə̀.”

⁹Yěsû a tyiʼə̀ nshwəŋə̀ ambo pobə lo, “Nɨ̀ lòo ɨ̀pwuumə̀ nɨ nɨ̀ pənə nɨ pèrə amwuə àtwuə̀ ɨ̀shyə̂, nkootə̀ pɨ̀swùə ɨ̀pɨghə ghu mbə̀ʼə a ghǎ mbɨ̂ a pàa pɨghə pɨ kẅiirə̀ a wɨghə amwuə àlaʼà za nɨ a ghoŋə̀nə nɨ nkuŋə̀ la.

¹⁰Ŋònə̀ nɨ mbə̀ʼə a pyabə̀ ɨ̀pwuumə̀ pɨ̀kɨ̂ nɨ ntɨŋmə̀ e ɨ̀tsùmə̀ mbə̀ʼə a kɨ mbyabə̀ ɨ̀pwuumə̀ pɨ̀noʼnə nɨ ntɨŋmə̀ e ɨ̀tsùmə̀. Ŋònə̀ nɨ à wa ngɨ̀rə̀ nkòbə̀ aŋunə ɨ̀pwuumə̀ pɨ̀kɨ̂ mbə̀ʼə a kɨ ngɨ̀rə̀ nkòbə̀ aŋunə ɨ̀pwuumə̀ pɨ̀noʼnə.

¹¹Nɨ̀ tə ka kùʼnə̀ a wɨghə a nɨ twuʼtə̀ nkabə̀ nɨ pənə àtwuə̀ ɨ̀shyə̂ ɨ̀shìʼnə̀, nɨ̀ tyiʼə̀ nkùʼnə̀ a nɨ twuʼtə̀ ɨ̀pwuumə̀ nɨ̀pwuurə̀ lə ɨla?

¹²Nɨ̀ tə ka mə naŋə̀ a wɨghə ɨ̀pwuumə̀ ŋònə̀ nyaanə nɨ ntɨŋmə̀ ɨ̀wɨghə ɨ̀tsùmə̀, ŋònə̀ nɨ à pɨ ŋâ a wɨghə nɨ ɨ̀pwuumə̀ nɨ pənə ɨ̀pɨghə la pə ɨ̀wə̌?

¹³“Mbə̀ʼə ngàŋə̀ àfàʼà a laʼa nfàʼà e ambo pɨ̀masàa pɨpaa apə̀; ntiinə ǎ pàanə̀ yɨ̀tse, kòŋə̀ yɨ̀tse, kə̀ ǎ mə fàʼà ambo yɨ̀tse nɨ ntɨŋmə̀ e ɨ̀tsùmə̀ tyiʼə̀ làŋnə̀ e làŋnə̀nə ambo ghùtse. Mbə̀ʼə wə̀ laʼa fàʼà o ambo Nẅùə̀ ghobə nkabə̀ apə̀.”

¹⁴Pɨ̀Farìsî lə̀ zuʼù ànwùə̀ nɨ Yěsû à lə̀ shwəŋə̀nə la ngẅìi ghobə nnyèŋə̀ e ntiinə pɨ̀Farìsî kòŋə̀nə nkabə̀ tɨsɨŋnə.

¹⁵La Yěsû a shwəŋə̀ ambo pobə lo, “Nɨ̀ chyə̂ mbə pànə̀ nɨ nɨ̀ wa nnèrə̀ lo mɨ̀nwùə̀ ɨ̀mɨghə təəmə̀ a ɨ̀myə̂ pə̀ənə̀, la Nẅùə̀koʼò à zhyə̂ mɨ̀ntɨŋmə̀ ɨ̀mɨghə. Mbə̀ʼnə àzwuumə̀ nɨ pànə̀ pɨ mɨsoŋə kwàŋə̀nə lo a àzwuumə̀ yè ẅùunə kə̀ a kɨ mbə àzwuumə̀ nɨ ndùnə̀ ɨ tsə̂nə, a chyə̂ mbə àzwuumə̀ za nɨ Nẅùə̀koʼò à pàanə̀nə.

¹⁶“A lə̀ pə nkwùə̀ ntsàambyə̀ tə mbyàa nkwùə̀ Jònə ngàŋə̀ àŋâ àkẅiirə̀ nchyə, pɨ lə mə nchwìitə̀ la pɨ̀mbòomə pɨ Mǔsî pobə ɨ̀shwəŋnə̀ ngàŋə ntwuumə̀ Nẅùə̀. La tɨ̀tsòŋə̀ pɨ pə nchwìitə̀ pə ntwuumə̀ ghù ɨ̀shìʼnə̀ mbə̀ʼə ànwùə̀ Nɨ̀fò Nẅùə̀, ŋwùə̀ ntsùmə̀ a kɨ mmə nkyiitə̀ nɨ ntɨŋmə̀ e ɨ̀tsùmə̀ a nɨ kwuunə̀ amwuə.

¹⁷La a zàŋə̀ ambo nɨ̀pwuurə̀ ghobə ɨ̀shyə̂ a nɨ làŋə̀, tsàarə̀ a nɨ pyaatə̀ tyìʼə̀ mɨlyiʼə ànwùə̀ amwuə mbòomə.

¹⁸“Ŋònə̀ mbyàŋnə̀ à tə nfuukə̀ a ngẅùə e a ndâ ze nchi ndzoʼò ghù nyàanə yi à ghɨ̀rə̀ la àfànə̀; ŋònə̀ mbyàŋnə̀ ẅùə̀ nɨ à zoʼnə mə̀ngyə̌ wa nɨ ndwuumə̀ e à fuukə̀nə la, à kɨ ngɨ̀rə̀ àfànə̀.”

¹⁹“Ngàŋə̀ nkabə̀ ghùtse à lə̀ pə ghu, ẅùə̀ nɨ à lə̀ ẅînə pɨtogrə pɨ̀tsə̂nə nkɨ mmə ndzɨghə̀ ɨ̀pwuumə̀ pɨ̀shìʼnə̀ njyə̂ ɨ̀tsùmə̀.

²⁰Ngàŋə̀ àfumə̀ ghùtse nɨ ɨ̀lǎ lə̀ lẅenə̀nə aŋunə ze, nɨ̀linə̀ ɨ̀tse pə Lazarùsə̀ à lə̀ mə nnwuunə̀ a ntswùə̀ àpùʼù ngàŋə̀ nkabə̀ wa,

²¹mmə ntàʼà lo lyàa ɨ̀chepə̀ mɨ̀zɨghə̀ pyə̀ nɨ lə̀ kẅìnə̀nə nkwùə̀ nɨ ngàŋə̀ nkabə̀ wa à lə̀ zɨghə̀nə lo zɨghə̀ e. Tsaʼnə a lə̀ pənə a lenə la, mɨ̀ngwɨghə̀ mɨ ngàŋə̀ nkabə̀ wa lə̀ mə ntô ndẅarə̀ ɨ̀lǎ ɨ̀pe pa.

²²Ngàŋə̀ àfumə̀ wa à lə̀ kwɨghə̀ pəngèrə̀ tô ndòo e ndèrə̀ nɨ ze a nɨ̀pwùnə Abràhamə̀. Ngàŋə̀ nkabə̀ wa à lə̀ kɨ nkwɨghə̀ pɨ tẅəŋə̀,

²³a shwuʼə̀ ndèrə̀ àlaʼà pɨ̀kwuə̀ ntyiʼə̀ mmə ndzəənə̀ ngəʼə̀ ghu. Tsaʼnə à lə̀ pənə ghu la à lə̀ ŋaŋə̀ ɨ̀myə̂ ɨ̀me ndzəənə̀ Abràhamə̀ a ndyə̌ sàa, Lazarùsə̀ a nwuunə̀ a nɨ̀pwùnə ze.

²⁴Nkwùə̀ nɨ à lə̀ zəənə̀nə a ghobə, à lə̀ fuŋə̀ nɨ ngyə̀ ntɨ̀ŋnə̀ lo, ‘Tǎ ɨwəə Abràhamə̀, koorə̀ mɨ̀lɨŋə̀ ɨ̀mâ ntsàa a Lazarùsə̀ a tsùbə̀ tyìʼə̀ a shwuə̀ àpô e amwuə nchyə ntô ntsùbə̀ àləəmə̀ mə̀, ntiinə ngwə̀ ndanə mbə tyìʼə̀ amwuə ngəʼə̀ amwuə ɨ̀mǔ wə̀.’

²⁵“La Abràhamə̀ a kẅùə̀ ambo ze lo, ‘Moonə̀ mə̀, wə̀ kwàŋə̀ lo amwuə nɨ̀chyə̂mbyə̂ o, wə̀ lə̀ pə̀ nɨ ɨ̀pwuumə̀ pɨ̀shìʼnə̀ la Lazarùsə̀ a pə ndzəənə̀ ngəʼə̀, la tɨ̀tsòŋə̀, à wə̀ amwuə ɨ̀shìʼnə̀, wə̀ tyiʼə̀ mmə nkwurə̀ mɨsoŋə ɨ̀mô.

²⁶A nɨ kẅìʼnə̀, àkɨɨnə̀ àtse a zə a tɨ̀tɨ̀rə̀ pə̀ənə̀ mmə nnàanə̀ lo kò ŋwùə̀ a furə̀ a nɨ̀ghə̂ ntwuumə̀ a nɨ̀ghâ, kò ŋwùə̀ a kɨ nfurə̀ e a ndzìnə gha ntwuumə̀ mbə a nɨ̀ghə̂.’

²⁷Ngàŋə̀ nkabə̀ wa à lə̀ shwəŋə̀ ambo ze lo, ‘Tǎ ɨwəə, m̀buʼù tyìʼə̀ mbô lo wə̀ tsàa e â ghə̀ a ndâ tǎ ɨwəə,

²⁸ntiinə ngwa nɨ pɨ̀momaa ɨ̀pâ pɨ mbyàŋnə̀ pɨtaanə̀ nɨ mbə̀ʼə a ghə̀ nkwàtə̀ a ghobə mbə̀ʼə pobə gha nkɨ nkwuunə̀ amwuə alyiʼə ngəʼə̀ zə̀ nɨ m̀bənə ghu lə.’

²⁹“La Abràhamə̀ a kẅùə̀ ambo ze lo, ‘Pobə chyə̂ nɨ Mǔsî pobə ngàŋə ntwuumə̀ Nẅùə̀. Njiilo pobə̂ zuʼù ambo pobə.’

³⁰“Ngàŋə̀ nkabə̀ wa a làŋə̀ nɨ mbyə̀ nshwəŋə̀ lo, ‘Ngaŋə mbǎ tǎ Abràhamə̀, ŋwùə̀ à tə nfurə̀ amwuə àlaʼà pɨ̀kwuə̀ ndèrə̀ ambo pobə, yi pobə̌ fàʼà pə̀ŋə̀ mɨ̀ntɨŋmə̀ ɨ̀mobə.’

³¹“Abràhamə̀ a kẅùə̀ ambo ze lo ‘Pobə tə ka mə zuʼù a ghobə ànwùə̀ nɨ Mǔsî pobə ngàŋə ntwuumə̀ Nẅùə̀ lə̀ ŋwàʼnə̀nə la, yi mbə̀ʼə pobə kɨ mbyiimə̀ a ghobə ànwùə̀ nɨ mbə̀ʼə ŋwùə̀ a furə̀ àlaʼà pɨ̀kwuə̀ ntô nshwəŋə̀ ambo pobə apə̀.’”