Read Pinyin Lukə̀ 17 Bible Online

Lukə̀ 17 - Pinyin bible

Lukə̀ 17

¹Yěsû à lə̀ chi nshwəŋə̀ ambo ɨ̀zùŋə̀ ndzùmə̀ ɨ̀pe lo, “Ɨ̀nwùə̀ pa nɨ pèrə pa nkwàʼnə̀ pə̀ənə̀ lo pobə̂ ghɨ̀rə̀ a tɨ̀pòŋə̀ la chyə̂ a nɨ tô. La ngəʼə̀ yɨ̀noʼnə ɨ̌ pə aŋunə ŋònə̀ nɨ ɨ̀ làŋə̀nə a ndzùmə̀ ze ntô.

²A pòŋə̀ lo mbə̀ʼə pɨ korə̀ nɨ̀ghòorə a loŋə ze, mmàʼà e amwuə nchyə ghù ẅùunə, ntsàarə̀ amwuə mbuurə̀ nɨ mbə̀ʼə pɨ myàʼtə̀ e a ghɨ̀rə̀ moonə̀ nkɨ̂ wə̀ ɨ̀tse a ghɨ̀rə̀ a tɨ̀pòŋə̀.

³Lenəla, nɨ̀ zhìʼtə̀ a wɨghə! Mbə̀ʼə momaa o a fàntə̀ ànwùə̀ ambo ghò, wə̀ saʼà e, a pə̀ŋə̀ ntɨŋmə̀ e wə̀ lə̀ənə̀ a tɨ̀pòŋə̀ e.

⁴A pə la nfàntə̀ ànwùə̀ ambo ghò nkwùə̀ sàmbaa aŋunə taʼà njyə̂ nkɨ mmə ntô tyìʼə̀ nkwùə̀ ɨ̀tsùmə̀ nshwəŋə̀ ambo ghò lo, ‘Ǹsòmnə̀, mbɨ kẅebə̀, lə̀ənə̀ ɨ̀fàntə̀ ɨ̀nwùə̀ ɨ̀pâ,’ yi wə̀ chyə̂ a nɨ lə̀ənə̀ ɨ̀fàntə̀ ɨ̀nwùə̀ ɨ̀pe.”

⁵Ngàŋə ntwuumə̀ Ndòʼnə̀mbyə̂ Yěsû za lə̀ shwəŋə̀ ambo ze lo “Ghɨ̀rə̀ pəə tsùŋə̀ nnùŋə̀ ntɨŋmə̀ ɨwəə aŋunə ghò.”

⁶Ndòʼnə̀mbyə̂ a shwəŋə̀ ambo pobə lo, “Nɨ̀ tə mbə nɨ àpyiimə̀ ntɨŋmə̀ yè kɨ̂nə tsaʼa mbyə̀ àloonə̀, yi mbə̀ʼə nɨ shwəŋə̀ ambo àtɨ̀ghə nɨpyə zə̀ lo, ‘Tsoʼnə̀ a nɨ̀ghə̂ ngə̀ ntəəmə̀ amwuə nchyə ghù ẅùunə!’ a pɨ zuʼnə̀ a wɨghə.

⁷“Ŋwùə̀ wɨghə ghùtse à tə mbə nɨ ngàŋə̀ àfàʼà e nɨ à mənə ndyiʼə̀ mɨ̀swùumə kə̀ mbyabə̀ mɨ̀mbyə̂, a pəla nfurə̀ a atwurə nkwə̂, mbə̀ʼə ghò masàa e wa wə̀ shwəŋə̀ lo, ‘Faʼa ntô nwuunə̀ a ɨ̀shyə̂ ndzɨghə̀ mɨ̀zɨghə̀ ɨ̀mô?’

⁸Ka wə̀ pə shwəŋə̀ o pə lo, ‘Faʼa ndaamə̀ mɨ̀zɨghə̀, ngẅî ɨtsəʼə àfàʼà ɨ̀pô ntə̂ mɨ̀zɨghə̀ ɨ̀mâ mbə̀ʼə n̂dzɨghə̀ nkɨ nnô, wə̀ pòŋə̀ zɨghə̀ kɨ nô àzô?’

⁹Wə̀ kwàŋə̀ lo mbə̀ʼə a ŋâ a mɨyàa ambo ngàŋə̀ àfàʼà wa ntiinə à zuʼnə̀nə e ngɨ̀rə̀ ànwùə̀ àtsùmə̀ nɨ à shwəŋnə̀?

¹⁰A kɨ mbə tyìʼə̀ a lenə ambo pɨghə, nɨ̀ tə mə ngɨ̀rə̀ ànwùə̀ àtsùmə̀ nɨ pɨ shwəŋə̀nə lo nɨ̀ ghɨ̀rə̀, nɨ̀ shwəŋə̀ pə lo, ‘Pəə pə mbə wəə la ndàʼà ngàŋə àfàʼà; pəə ghɨ̀rə̀ pə ànwùə̀ nɨ pəə pyə̀nə mbə ghɨ̀rə̀.’”

¹¹Nkwùə̀ nɨ Yěsû a lə̀ mənə nkoʼò ndèrə̀ Yèrusalèmə̀ la, a lə̀ làŋə̀ amwuə àndànə̀ Sàmariyà ghobə Galìlyə̂,

¹²ngə̀ mmə nkwuunə̀ amwuə àlaʼà àtse, ngàŋə àkɨ̀kẅinə nɨ̀ghumə̀ tô ntsirə̀ e ntəəmə̀ a ndyə̌ sàa,

¹³nkyiinə̀ nshwəŋə̀ lo, “Ndòʼnə̀mbyə̂, Yěsû, koorə̀ mɨ̀lɨŋə̀ ɨ̀məə!”

¹⁴Nkwùə̀ nɨ à lə̀ zəənə̀nə a ghobə, à lə̀ shwəŋə̀ ambo pobə lo, “Nɨ̀ ghə̀ nnèrə̀ mbɨ̀ŋmə̀ ɨ̀zɨghə ambo ngàŋə màʼà Nẅùə̀.” Nkwùə̀ nɨ Pobə lə̀ mənə ndèrə̀, àkɨ̀kẅinə àzobə a lə̀ zùŋə̀ myə̀.

¹⁵Taʼà ŋwùə̀ amwuə pobə a zəənə̀ lo mbɨ̀ŋmə̀ e ɨ̀ laanə̀, mbə̀ŋə̀ nkwə̂ ntyiʼə̀ mmə nkyiinə̀ ngyetə̀ a Nẅùə̀.

¹⁶Mmàʼà mbɨ̀ŋmə̀ e a mɨ̀kwùə̀ Yěsû ŋŋâ a mɨyàa ambo ze. Ŋònə̀ ẅèrə wə̀ a lə̀ pə ŋwùə̀ Sàmariyà.

¹⁷Yěsû a zəənə̀ e, mbyiitə̀ e lo, “Yi pɨ tô mbarə̀ la a wɨghə nɨ̀ghumə̀? Pɨ̀nɨ̀pwùʼə ghə?

¹⁸A ghɨ̀rə̀ àkə lo a kɨ ntô e pə ŋwùə̀ àtwuumə̀ wə̀ lo ŋâ a mɨyàa ambo Nẅùə̀?”

¹⁹Yěsû à lə̀ chi nshwəŋə̀ ambo ŋwùə̀ àtwuumə̀ wa lo, “Lòo a ɨ̀shyə̂ ndèrə̀ o, àpyiimə̀ o ghɨ̀rə̀ mə̀ wə̀ tɨ̀ŋnə̀.”

²⁰Pɨ̀Farìsî pɨ̀tse lə̀ pyiitə̀ a Yěsû nɨ nkwùə̀ nɨ ànwùə̀ Nɨ̀fò Nẅùə̀ a ghǎ tô. A kẅùə̀ ambo pobə lo, “Ka ànwùə̀ Nɨ̀fò Nẅùə̀ a pə ghǎ tô e pɨ̀ mə ndzəənə̀.

²¹Ka ŋònə̀ ɨ̀tse a pə ghǎ shwəŋə̀ e lo, ‘Zəənə̀, zèrə a zə̀!’ kə̀, ‘Zèrə a zhyə̀!’ ntiinə Nẅùə̀ à wə̀ pɨghə pɨ pobə.”

²²Yěsû a chi shwəŋə̀ ambo ɨ̀zùŋə̀ ndzùmə̀ ɨ̀pe pa lo, “nkwùə̀ ɨ̀ zə̀ ntô nɨ nɨ̌ yìi a nɨ zəənə̀ Moonə̀ Ŋwùə̀ aŋunə mətùmə nkwùə̀ la zəənə̀ a wɨghə apə̀.

²³Pànə̀ pə̀ ghu nɨ pɨ ghǎ tyiʼə̀ shwəŋə̀ ambo pɨghə lo, ‘Zəənə̀, à wə̀ a nɨ̀ghə̂! Kə̀ zəənə̀, à ẅùə̀ a nɨ̀yî!’ La, kò nɨ̀ zùŋə̀ a ghobə lo ghə̀ zəənə̀.

²⁴Ǹshwəŋə̀ lə ntiinə; tsaʼnə mbə̀ŋə̀ ɨ̀ za ŋŋwàŋə̀ nfurə̀ a pàa ghə mbyàa a pàa yì, la tsaʼnə Moonə̀ Ŋwùə̀ à ghǎ pə amwuə njyə̂ nɨ à ghǎ kẅirə̀ tô.

²⁵La à chyə̂ a nɨ zəənə̀ ngəʼə̀ noʼnə zaʼà, mbə̀ʼə ɨ̀waanə̀ pə̀ənə̀ pə̀ twuunə̀ e.

²⁶Tsaʼnə a lə̀ pənə amwuə nkwùə̀ Noà la, ǎ tsaʼnə a ghǎ kɨ pə amwuə nkwùə̀ Moonə̀ Ŋwùə̀.

²⁷A lə̀ pə amwuə mɨ̀njyə̂ mɨ̀ghu la, pànə̀ mə ndzɨghə̀, nnô, ndzoʼò, ŋŋâ ɨ̀poonə̀ amwuə mɨ̀ndâ mɨ nɨ̀zoʼò tə mbyàa amwuə njyə̂ nɨ Noà à lə̀ kwuunə̀nə amwuə àpaŋə̀, mbə̀ŋə̀ ntɨ̀ŋnə̀ ɨ̀ tyiʼə̀ ndô, nchyə ɨ koʼò mbyaatə̀ a ghobə pɨ̀tsùmə̀.

²⁸A lə̀ kɨ mbə la tyìʼə̀ a lenə amwuə nkwùə̀ Lot; pànə̀ lə̀ pə ndzɨghə̀, nnô, nshwùunə̀, ndzwuunə̀, mmə mbyə̀, nkɨ mənə nkorə̀ mɨ̀ndâ.

²⁹La njyə̂ nɨ Lot à lə̀ furə̀nə àlaʼà Sodòmə̀, ɨ̀mǔ pobə solfòo lə̀ furə̀ a nɨ̀pwuurə̀ nshwuʼə̀ mbyaatə̀ a ghobə pɨ̀tsùmə̀.

³⁰“A tyìʼə̀ ndwuumə̀ nɨ a ghǎ pə amwuə njyə̂ nɨ Moonə̀ Ŋwùə̀ à ghǎ tô.

³¹À ghǎ pə njyə̂ ghu, ŋònə̀ nɨ à pənə àtwuə̀ ndâ kò a chyə̂ shwuʼə̀ e lo lòo ɨ̀pwuumə̀ ɨ̀pe nɨ pənə amwuə ndâ; ŋònə̀ nɨ a pənə amwuə ɨ̀swùumə a chyə̂ nkwə̂ e a ɨmwuə alyiʼə apə̀.

³²Nɨ kẅempə̀ ànwùə̀ nɨ a lə̀ ghɨ̀rə̀nə a ngẅùə Lot!

³³Ŋònə̀ nɨ à tàʼnə lo pyatə̀ a nɨ̀chyə̂mbyə̂ e, ǎ pî ẅèrə; ŋònə̀ nɨ à pînə a nɨ̀chyə̂mbyə̂ e, à pɨ pə nɨ ẅèrə.

³⁴Ǹshwəŋə̀ a wɨghə lo, A ghǎ pə nɨ ɨ̀twuʼə̀ njyə̂ ghu, pànə̀ pɨpaa nwùunə̀ aŋunə ɨ̀kwùunə pɨ̀ lòo a taʼà ngwaʼà a taʼà.

³⁵Pə̀ngyə̌ pɨpaa pə ghòʼò àpaanə̀ pɨ̀ tô ndòo a taʼà ngwaʼà a taʼà.

³⁶[Mbyàŋnə̀ ɨpaa ghǎ pə amwuə ɨ̀swùumə pɨ̀ tô ndòo a taʼà ngwaʼà a taʼà.]”

³⁷Ɨ̀zùŋə̀ ndzùmə̀ Yěsû pa pyiitə̀ e lo, “Pèrə pə ɨ̀nwùə̀ ghǎ furə̀ la ɨghə, Ndòʼnə̀mbyə̂?” Yěsû a kẅùə̀ lo, “Alyiʼə nɨ àkwuə̀ ŋwùə̀ a nwùunə̀nə ghu la, pɨ̀məsaŋə pa nshwatə̀ alyiʼə ghu.”