Read Pinyin Lukə̀ 18 Bible Online

Lukə̀ 18 - Pinyin bible

Lukə̀ 18

¹Yěsû à lə̀ shwəŋə̀ àshwəŋnə̀ nàanə nàanə ambo ɨ̀zùŋə̀ ndzùmə̀ ɨ̀pe a nɨ nèrə̀ lo pobə chyə̂ a nɨ chàʼtə̀nə Nẅùə̀ tɨ kaanə̀

²À lə̀ shwəŋə̀ ambo pobə lo “Ɨ̀fò korə̀ ghùtse àlaʼà àtwuumə̀ àtse à lə̀ pə ghu nɨ ka à lə̀ mə mbô e Nẅùə̀ nkɨ ka mə lòo e a ŋwùə̀ tsaʼa àzwuumə̀ àtse.

³Nkwùə mə̀ngyə̌ ɨ̀tse à lə̀ kɨ mbə amwuə àlaʼà ghu, mmə ntô ambo ze ngyìi nshwəŋə̀ lo, ‘Kẅiirə̀ mə̀ ambo ngàŋə kɨpaanə ɨ̀zâ.’

⁴Tsaʼnə à lə̀ mənə ntô nshwəŋə̀ la, ka ɨ̀fò korə̀ wa a lə̀ mə nzhwiʼtə̀ e ànwùə̀ nɨ mə̀ngyə̌ wa à lə̀ mənə nshwəŋə̀. La ɨ̀fò korə̀ wa a kɨ lẅùutə̀ nshwəŋə̀ ambo mbɨ̀ŋmə̀ e lo, ‘M̀batə ka pə pô mə̀ Nẅùə̀, nkɨ ka lòo mə̀ a ŋònə̀ tsaʼa àzwuumə̀ àtse la,

⁵mbɨ yèmpə̀ a nkwùə mə̀ngyə̌ wə̀ ntiinə à wə̀ ŋŋâ mə̀ nɨ ngəʼə̀, ǹtə ngoŋə̀ mə̀ tɨ yèmpə̀ e, yi mbɨ chwarə̀ mə̀ a ye apə̀ ntiinə ǎ kɨ tô e tônə.’”

⁶Ndòʼnə̀mbyə̂ a shwəŋə̀ lo, “Nɨ̀ zuʼù ànwùə̀ nɨ ɨ̀fò korə̀ tɨpô Nẅùə̀ wə̀ à shwəŋə̀.

⁷Mbə̀ʼə Nẅùə̀ a ka tyiʼə̀ yèmpə̀ e pə̀ənə̀ ɨ̀pe nɨ à tsoʼò mə nɨ pɨ pa ngyìi ambo ze nɨ njyə̂ pobə ɨ̀twuʼə̀? Mbə̀ʼə a tyiʼə̀ nsùŋə̀ mbɨ̀ŋmə̀ e a nɨ yèmpə̀ a ghobə lə ɨla?

⁸Ǹshwəŋə̀ a wɨghə lo, ǎ fàʼà yèmpə̀ a ghobə. La nkwùə̀ nɨ Moonə̀ Ŋwùə̀ à ghǎ tô, tə à ghǎ zəənə̀ pə̀ənə̀ nɨ pɨ pənə nɨ àpyiimə̀ ntɨŋmə̀ àtwuə̀ ɨ̀shyə̂ ghə̀?”

⁹Yěsû a chi nshwəŋə̀ àshwəŋnə̀ nàanə nàanə zə ambo pànə̀ nɨ pobə pənə amwuə mɨ̀ntɨŋmə̀ ɨ̀mobə mmə nshwəŋə̀ lo pobə chyə̂ mbə pànə̀ nɨ mɨ̀nwùə̀ ɨ̀mobə təəmə̀nə ntsàarə̀ a pɨ̀tse lo,

¹⁰“Pànə̀ pɨ̀tse pɨpaa lə̀ ghə̀ a Ndâ Mɨ̀shwàʼà Nẅùə̀ a nɨ chàʼtə̀ Nẅùə̀, taʼà a pə ŋwùə̀ Farìsî, ẅùə̀ a pə ɨ̀nkẅiirə̀ pɨ̀taghə̀.

¹¹Tsaʼnə pobə lə̀ lèrə̀nə la, ŋwùə̀ Farìsî wa a naŋə̀ alyiʼə ɨ̀shìʼnə̀ ntəəmə̀ ghu, nchàʼtə̀ a Nẅùə̀ nshwəŋə̀ lo, ‘Nẅùə̀, ŋ̀ŋâ a mɨyàa ambo ghò ntiinə ka mbə mə̀ tsaʼa pɨ̀tse pə̀ənə̀ nɨ pɨ pa nfɨ̀ghə̀ pə̀ənə̀ nkẅiirə̀ ɨ̀pwuumə̀ ɨ̀pobə, ka mə shwəŋə̀ a ghobə a nkǔŋə nkuŋə, ngɨ̀rə̀ ɨ̀nwùə̀ ɨ̀fànə̀ kə̀ tsaʼa ɨ̀nkẅiirə̀ pɨ̀taghə̀ ẅùə̀ nɨ à təəmə̀nə lyə̀.

¹²Ngwa nwuunə̀ tɨ zɨghə̀ aŋunə njyə̂ ɨpaa amwuə ngàbə̀, nkɨ ngàpə̀ ɨ̀pwuumə̀ pa ɨlyiʼə nɨ̀ghumə̀ ŋŋâ a taʼà alyiʼə ambo ghò.’

¹³“La nkẅiirə̀ pɨ̀taghə̀ wa à lə̀ təəmə̀ a ndyə̌ sàa mbə ka pə̀ʼkə̀ e ɨ̀myə̂ ɨ̀me naŋə̀ nɨ̀pwuurə̀, la nnùŋə̀ àpô e a ntɨŋmə̀ ze nshwəŋə̀ lo, ‘Nẅùə̀, koorə̀ mɨ̀lɨŋə̀ ɨ̀mâ, mɨ̀ŋə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀.’”

¹⁴Yěsû a tyiʼə̀ nshwəŋə̀ lo, “Ǹshwəŋə̀ ambo pɨghə lo, Nẅùə̀ à lə̀ lòo a wə̀ ŋwùə̀ tsaʼa ŋònə̀ nɨ mɨ̀nwùə̀ ɨ̀me təəmə̀nə ntsàarə̀ a ghù ntsàambyə̀ wa. Ntiinə ŋònə̀ wa nɨ à ŋankə̀nə mbɨ̀ŋmə̀ e la, pɨ̌ shwuʼkə̀ e a ɨ̀shyə̂, ŋònə̀ nɨ à shwuʼkə̀nə mbɨ̀ŋmə̀ e a ɨ̀shyə̂, pɨ̌ ŋaŋə̀ e a àtɨ̀ghə.”

¹⁵Pànə̀ pɨ̀tse lə̀ tô nɨ kɨyii àghòbə lo Yěsû a nùŋə̀ mbô ɨ̀me àtwuə̀ pobə, ɨ̀zùŋə̀ ndzùmə̀ ɨ̀pe zəənə̀, nsaʼà ghobə.

¹⁶La Yěsû a fuŋə̀ a ghobə lo pobə̂ tô nɨ ɨ̀poonə̀ pa ambo ze, nshwəŋə̀ lo, “Nɨ̀ myàʼtə̀ ɨ̀poonə̀ pa pobə̂ tô ambo mɨ̀ŋə̀, kò nɨ̀ nàanə a ghobə, ntiinə ànwùə̀ Nɨ̀fò Nẅùə̀ a chyə̂ la ambo pànə̀ tsaʼa pobə.

¹⁷Ǹshwəŋə̀ tyìʼə̀ nkǔŋə nkuŋə ambo pɨghə lo, ŋònə̀ nɨ ka à kẅiirə̀ e ànwùə̀ Nɨ̀fò Nẅùə̀ tsaʼa mɨnkɨ̂, ka à pə ghǎ kwuunə̀ ghu.”

¹⁸Àtwuə̀ pɨ̀Jew àtse a pyiitə̀ a Yěsû lo, “Ɨ̀nèrə̀ ɨ̀nwùə̀ ghù ɨ̀shìʼnə̀, mbə̀ʼə ǹgɨ̀rə̀ lə ɨla mbòŋə̀ gha zɨghə̀ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ la?”

¹⁹Yěsû a pyiitə̀ ambo ze lo, “Wə̀ fuŋə̀ mə̀ nɨ ŋònə̀ ɨ̀shìʼnə̀ ntii àkə? Ka ŋònə̀ ɨ̀shìʼnə̀ ɨ̀tse a pə e ghu ndàŋə̀ e Nẅùə̀ ze nɨ ze.

²⁰Wə̀ zhyə̂ mɨ̀ntə̌ ma lo: ‘Kò wə̀ kɨ ngɨ̀rə̀ àfànə̀, kò wə̀ zhwuutə̀, kò wə̀ zə̀ərə̀, kò wə̀ zɨghə̀ a mɨnaŋə àtwuə̀ ŋwùə̀, zuʼnə a tǎ ɨwɨghə pobə mǎ ɨwɨghə.’”

²¹A shwəŋə̀ ambo Yěsû lo, “Ndə̀ pìʼnə̀ a nɨ nùŋə̀ mɨ̀ntə̌ mə nkwùə̀ nɨ m̀birə̀nə mɨnkɨ̂.”

²²Yěsû a zuʼù a lenə la, ntyiʼə̀ nshwəŋə̀ ambo ze lo, “Taʼà ànwùə̀ à puŋə̀ ambo ghò. Shwùunə̀ ɨ̀pwuumə̀ ɨ̀tsùmə̀ nɨ wə̀ pənə nɨ pèrə, ngàpə̀ nkabə̀ ghu ambo ngàŋə̀ àfumə̀, yi wə̌ tyiʼə̀ pə nɨ àfùʼù a nɨ̀pwuurə̀. Tô, ndzùŋə̀ mə̀.”

²³A zuʼù a lenə mbɨ̀ŋmə̀ e ɨ̀ pɨ̂ ntiinə à lə̀ pənə ngàŋə̀ nkabə̀ ngẅùunə.

²⁴Yěsû a naŋə̀ e ndzəənə̀ lo à wə̀ nsòmnə̀, nshwəŋə̀ lo, “A tɨ̀ŋnə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀!

²⁵La ndzàŋə̀ ambo ləəmə a nɨ tswurə̀ amwuə ngwɨgrə̀ lyàmnə̀ ntsàarə̀ ambo ngàŋə̀ nkabə̀ a nɨ kwuunə̀ amwuə ànwùə̀ Nɨ̀fò Nẅùə̀.”

²⁶Pànə̀ nɨ pɨ lə̀ zuʼnə ànwùə̀ zèrə̀ zə̀ lə̀ tyiʼə̀ mbyiitə̀ lo, “Ŋònə̀ nɨ mbə̀ʼə a chwarə̀ lə a ɨ̀wə̌?”

²⁷A shwəŋə̀ ambo pobə lo, “Ànwùə̀ nɨ a za ntsàarə̀ pànə̀ pɨ mɨsoŋə, ka a tsàarə̀ e a Nẅùə̀.”

²⁸Pità a shwəŋə̀ ambo ze lo, “Zəənə̀, pəə myàʼtə̀ la mɨmwuə mɨlyiʼə ɨ̀məə ndzùŋə̀ o.”

²⁹Yěsû kẅùə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ŋwùə̀ ntsùmə̀ nɨ à myàʼtə̀nə ɨmwuə alyiʼə e, kə̀ a ngẅùə e, kə̀ pɨ̀momaa ɨ̀pe, nɨ tǎ ɨghobə pobə mǎ e, nɨ ɨ̀poonə̀ ɨ̀pe ntii ànwùə̀ Nɨ̀fò Nẅùə̀ la,

³⁰à ghǎ kẅiirə̀ ɨ̀pwuumə̀ pèrə pə pɨ̀noʼnə pɨ̀noʼnə tsàarə̀ ndùnə̀ nɨ à myàʼtə̀nə la tɨ̀tsòŋə̀, kɨ chi pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ la.”

³¹Yěsû a lòo ɨ̀zùŋə̀ ɨ̀pe pa ntsòbə̀ ɨpaa pobə pɨ pobə mìntə̀, a shwəŋə̀ ambo pobə lo, “Nɨ̀ zhwiʼtə̀! Pə̀ənə̀ pə nkoʼò ndèrə̀ a Yèrusalèmə̀, ɨ̀nwùə̀ ɨ̀tsùmə̀ nɨ ngàŋə ntwuumə̀ Nẅùə̀ lə̀ ŋwàʼnə̀nə mbə̀ʼə Moonə̀ Ŋwùə̀ la furə̀ pwùumə̀.

³²Mbə̀ʼnə pɨ̌ kô e ŋŋâ ambo pànə̀ nɨ ka pobə pə ghobə pɨ̀Jew pɨ tyiʼə̀ ngẅìi e nchyâ ɨ̀sɨŋnə̀ àtwuə̀ ze, ntẅùə̀ mɨ̀tẅuə̀ aŋunə ze.

³³Pɨ̌ kəʼə̀ e, zhwuutə̀ e, la njyə̂ kɨ làŋə̀ ɨtarə â zhwuumə̀ a nɨ̀wɨghə̀.”

³⁴Ɨ̀zùŋə̀ ndzùmə̀ ɨ̀pe lə̀ zuʼù mɨ̀nwùə̀ mèrə mə ka mèrə tsùŋə̀ ndaanə̀ e àtwuə̀ pobə. Pɨ lə̀ lə̀əmə̀ ɨ̀sùmə ɨ̀shwəŋnə̀ pèrə pə̀ ambo pobə, ka pobə zhyə̂ a ghobə ànwùə̀ nɨ Yěsû à lə̀ mənə nshwəŋə̀.

³⁵Yěsû à lə̀ tô ntyiʼə̀ mmə nkwuunə̀ a Jèrikò, ɨ̀fə̀ ɨ̀myə̂ ɨ̀tse a nwuunə̀ a nɨ̀pwùnə àlàŋə mmə ndoonə̀ ɨ̀pwuumə̀.

³⁶Nkwùə̀ nɨ à lə̀ zuʼnə àpùŋə̀ pə̀ənə̀ a mə ndzòrə̀ ndàŋə̀ la, a pyiitə̀ lo, “A ànwùə̀ àkə?”

³⁷Pɨ shwəŋə̀ ambo ze lo, “Yěsû ŋwùə̀ Nazarètə̀ à wə̀ ndàŋə̀.”

³⁸A kyiinə̀ nshwəŋə̀ lo, “Yěsû, moonə̀ Dàfirə̀, koorə̀ mɨ̀lɨŋə̀ ɨ̀mâ!”

³⁹Pànə̀ nɨ pɨ lə̀ pənə alyiʼə ghu, pɨ saʼà e nshwəŋə̀ lo â kẅupə̀ ntswùə̀ e. La a chi nkyiinə̀ ndèrə̀ nɨ mbyə̀ nshwəŋə̀ lo, “Moonə̀ Dàfirə̀ koorə̀ mɨ̀lɨŋə̀ ɨ̀mâ!”

⁴⁰Yěsû a tyiʼə̀ ntəəmə̀, nshwəŋə̀ lo pɨ̀ lòo a ɨ̀fə̀ ɨ̀myə̂ wa ntô. Pɨ tô nɨ ze à pyiitə̀ lo,

⁴¹“Wə̀ tàʼà lo n̂gɨ̀rə̀ la ɨla ambo ghò?” A kẅùə̀ lo, “Ndòʼnə̀mbyə̂, ǹtàʼà chi zəənə̀ ɨlyiʼə.”

⁴²Yěsû a shwəŋə̀ ambo ze lo, “Zəənə̀ ɨlyiʼə! Àpyiimə̀ ntɨŋmə̀ o a ghɨ̀rə̀ wə̀ tɨ̀ŋnə̀.”

⁴³A kɨ ndzùŋə̀ ndzəənə̀ ɨlyiʼə, ntyiʼə̀ ndzùŋə̀ a Yěsû, ngyetə̀ Nẅùə̀. Pànə̀ pɨ̀tsùmə̀ nɨ pɨ lə̀ zəənə̀nə e la, lə̀ ghuʼtə̀ Nẅùə̀.