Read Pinyin Lukə̀ 19 Bible Online

Lukə̀ 19 - Pinyin bible

Lukə̀ 19

¹Yěsû à lə̀ kwuunə̀ mə ndàŋə̀ amwuə àlaʼà Jèrikò.

²Àtwuə̀ ngàŋə̀ nkẅiirə̀ pɨ̀taghə̀ ghùtse à lə̀ pə ghu, nɨ̀linə̀ ɨ̀tse pə Sàkyâ nkɨ mbə ngàŋə̀ nkabə̀.

³À lə̀ mə ntàʼà a nɨ zəənə̀ ŋònə̀ nɨ Yěsû à lə̀ pənə ẅèrə, la mbə mətùmə ŋwùə̀, àpùŋə̀ pə̀ənə̀ a nàanə̀ e.

⁴À lə̀ làŋə̀ nkɨ̀ɨrə̀ ndèrə̀ a mbyə̀ nkoʼò àtwuə̀ àtɨ̀ghə sàa mbə̀ʼə zəənə̀ a Yěsû wə̀, ntiinə à lə̀ pənə làŋə̀ a nɨ̀pwùnə alyiʼə ghu.

⁵Nkwùə̀ nɨ Yěsû à lə̀ tônə mbyàa alyiʼə ghu, à lə̀ naŋə̀ àtɨ̀ghə nshwəŋə̀ ambo Sàkyâ lo, “Sàkyâ, faʼa nshwuʼə̀ àtwuə̀ àtɨ̀ghə za ntiinə mbɨ lyə̂ la a ndâ ghò sìnə̀ wə̀.”

⁶Sàkyâ à lə̀ tyiʼə̀ nkɨ̀ɨrə̀ nfurə̀ àtwuə̀ àtɨ̀ghə nshwuʼə̀, nkẅiirə̀ a Yěsû nɨ nɨ̀ghaʼà.

⁷Pànə̀ pɨ̀tsùmə̀ nɨ pɨ̀ lə̀ zəənə̀nə lə̀ pìʼnə̀ a nɨ lẅùmpə̀ nshwəŋə̀ lo, “À ghə̀ nkwuunə̀ a ndâ ngàŋə̀ ngɨ̀rə̀ ɨ̀nwùə̀ tɨ̀pòŋə̀ wə̀ lo kɨ ghaanə̀ e?”

⁸Sàkyâ à lə̀ tyiʼə̀ ndòo a ɨ̀shyə̂ nshwəŋə̀ ambo Ndòʼnə̀mbyə̂ lo, “Naŋə̀ mbǎ Ndòʼnə̀mbyə̂! Mbɨ ghàbə̀ ɨ̀pwuumə̀ ɨ̀pâ ŋŋâ taʼà àpàa ambo ngàŋə̀ àfumə̀, a pə lo ndə̀ ghɨ̀rə̀ mə nkòbə̀ aŋunə ŋwùə̀ nkẅiirə̀ àzwuumə̀ e, yi mbɨ kẅuə̀ zèrə nkwùə̀ nɨ̀kwàa.”

⁹Yěsû a tyiʼə̀ nshwəŋə̀ ambo ze lo, “Pànə̀ pɨ ndâ ghə̀ chwarə̀ ntiinə ŋònə̀ wə̀ à kɨ mbə la tyìʼə̀ moonə̀ ngẅàrə̀ Abràhamə̀.

¹⁰Mbə̀ʼnə Moonə̀ Ŋwùə̀ à lə̀ tô la a nɨ tàʼà pànə̀ pyə̀ nɨ pɨ pînə chwarə̀ a ghobə.”

¹¹Tsaʼnə pànə̀ lə̀ mənə nzhwiʼtə̀ ɨ̀nwùə̀ pèrə pə la, à lə̀ tyiʼə̀ nshwəŋə̀ àshwəŋnə̀ nàanə nàanə ambo pobə ntiinə a lə̀ kɨ pəla nɨ à lèrə̀ mə ntyiʼə̀ mmə nkwuunə̀ a Yèrusalèmə̀, pànə̀ tyiʼə̀ nkwàŋə̀ lo Nẅùə̀ à pìʼnə̀ a nɨ puʼtə̀ pə̀ənə̀ ɨ̀pe tyìʼə̀ nkwùə̀ ghu.

¹²Lenəla a shwəŋə̀ lo, “Nkùmə ɨ̀tse à lə̀ lèrə̀ àlaʼà a ndyə̌ sàa ɨ̀tse, pɨ̀ zoʼò e tsaʼa ɨ̀fò â pòŋə̀ kẅirə̀ kwə̂.

¹³À lə̀ kɨ furə̀ la mbyə̀ nfuŋə̀ ngàŋə àfàʼà ɨ̀ze nɨ̀ghumə̀, ŋŋâ ghobə nɨ taʼà taʼà nkabə̀ nshwəŋə̀ ambo pobə lo, ‘Nɨ̀ ghə̀ ntaŋə̀ a mɨ̀tàanə nɨ nkabə̀ zə̀ mbyàa njyə̂ nɨ mbɨ kẅirə̀ kwə̂.’

¹⁴La ngàŋə àlaʼà ɨ̀ze za lə̀ mə mbàanə̀ e, a furə̀ ndèrə̀ pobə tyiʼə̀ ntsàa pə̀ənə̀ lo pɨ̀ zùŋə̀ e nshwəŋə̀ ambo ze lo, ‘Ka pəə kòŋə̀ a wəə lo ŋònə̀ wə̀ a pə ɨ̀fò ɨwəə.’

¹⁵“La pɨ lə̀ zoʼò a ŋònə̀ wa tsaʼa ɨ̀fò a kẅirə̀ nkwə̂. Tsaʼnə à lə̀ kẅirə̀nə nkwə̂ la, à lə̀ tyiʼə̀ ngɨ̀rə̀ pɨ fuŋə̀ ngàŋə àfàʼà ɨ̀ze za nɨ à lə̀ ŋânə nkabə̀ ambo pobə la mbə̀ʼə zhyə̂ àpìi nɨ pobə taŋə̀nə a mɨ̀tàanə mbə nɨ zèrə.

¹⁶Ghù ntsàambyə̀ a tô nshwəŋə̀ ambo ze lo, ‘Tǎ, ǹtaŋə̀ a mɨ̀tàanə wa mbə nɨ àpìi nkabə̀ nɨ̀ghumə̀ nkẅìʼnə̀ aŋunə maa mɨ̀tàanə wa.’

¹⁷“A shwəŋə̀ ambo ze lo, ‘Wə̀ ghɨ̀rə̀ ɨ̀shìʼnə̀ mbǎ ngàŋə̀ àfàʼà ɨ̀shìʼnə̀! Tsaʼnə wə̀ fàʼnə nɨ ntɨŋmə̀ o ɨ̀tsùmə̀ nɨ mɨlyiʼə nkabə̀ la, mbɨ ghɨ̀rə̀ wə̀ puʼtə̀ mɨ̀mbòmpə mɨ ɨ̀laʼà mɨ̀ẅùunə nɨ̀ghumə̀.’

¹⁸Àpaatə̀ ngàŋə̀ àfàʼà wa a tô nshwəŋə̀ ambo ze lo, ‘Tǎ, ǹtaŋə̀ a mɨ̀tàanə nɨ nkabə̀ za nɨ wə̀ lə̀ ŋânə la mbə nɨ nkabə̀ ɨtaanə̀.’

¹⁹A shwəŋə̀ ambo ze lo, ‘Wə̌ puʼtə̀ mɨ̀mbòmpə mɨ ɨ̀laʼà mɨ̀ẅùunə mɨntaanə̀.’

²⁰“Àpaatə̀ ngàŋə̀ àfàʼà nɨ a lə̀ pənə nòmbàa pɨtarə a tô nshwəŋə̀ lo, ‘Nkabə̀ o za ɨ̀ zə̀, ndə̀ nkẅiirə̀ a zèrə la nkorə̀ amwuə àpàa atsəʼə ntsùŋə̀ ndòʼnə̀.

²¹Ndə̀ mə mbô mə̀ a ghò, ntiinə wə̀ wa ntsə̂ tɨsɨŋnə. Wə̀ wa ndyàa ɨ̀pwuumə̀ nɨ ka wə̀ nùŋə̀ o, mmə nfùʼù mɨ̀zɨghə̀ nɨ ka wə̀ pyə̀ o.

²²Ngàŋə̀ àfàʼà tɨ̀pòŋə̀! Mbɨ lòo la tyìʼə̀ ɨ̀shwəŋnə̀ nɨ furə̀nə a ntswùə̀ ghò chyâ ngəʼə̀ àtwuə̀ ghò. Wə̀ zhyə̂ lo ngwa ntsə̂, ndòo ɨ̀pwuumə̀ alyiʼə nɨ ka nnùŋə̀ mə̀, nkɨ nfùʼù mɨ̀zɨghə̀ alyiʼə nɨ ka mbyə̀ mə̀.

²³A lə̀ ghɨ̀rə̀ àkə wə̀ ka ghə̀ lòʼnə̀ o nkabə̀ mə̀ amwuə ndâ nɨ pɨ pa ndòʼnə̀ nkabə̀ amwuə mbə̀ʼə n̂tô kwə̂ nkẅiirə̀ a zèrə nɨ àpìi?’

²⁴“A tyiʼə̀ nshwəŋə̀ ambo pànə̀ nɨ pɨ lə̀ təəmə̀nə alyiʼə ghu lo, ‘Nɨ̀ kẅiirə̀ nkabə̀ za ambo ze ŋŋâ ambo ŋònə̀ nɨ à twuʼtə̀nə nkabə̀ nɨ̀ghumə̀ la.’

²⁵Pobə shwəŋə̀ ambo ze lo, ‘Tǎ, à tyiʼə̀ mə nɨ nkabə̀ nɨ̀ghumə̀!’

²⁶A kẅùə̀ ambo pobə lo, ‘Ǹshwəŋə̀ ambo pɨghə lo, ŋònə̀ nɨ à pənə nɨ ɨ̀pwuumə̀ pɨ̀noʼnə, pɨ̌ kẅìʼnə̀, la ŋònə̀ nɨ ka à pə e nɨ àzwuumə̀, pɨ̌ myàanə̀ farə pə mɨlyiʼə nɨ a pənə ambo ze kẅiirə̀.

²⁷La aŋunə ngàŋə kɨpaanə ɨ̀zâ zə̀, nɨ ka pobə lə̀ mə ntàʼà a ghobə lo mbə ɨ̀fò ɨghobə la, nɨ̀ lòo a ghobə ntô nzhwuutə̀ a mbyə̀ mɨ̀ŋə̀.’”

²⁸Tsaʼnə Yěsû à lə̀ shwəŋə̀nə la à lə̀ làŋə̀ nɨ mbyə̀ nkoʼò ndèrə̀ Yèrusalèmə̀.

²⁹Tsaʼnə à lə̀ paatə̀nə àlaʼà Bethphage ghobə Betanì a Mbarə̀ Olìvə̀ la à lə̀ ntsàa ɨ̀zùŋə̀ ndzùmə̀ ɨ̀pe pa a mbyə̀,

³⁰nshwəŋə̀ ambo pobə lo, “Nɨ̀ lèrə̀ amwuə àlaʼà zhyə̀ nɨ a pənə a mbyə̀ la, nɨ̌ mə kwuunə̀ zəənə̀ a moonə̀ ndzàkɨshyə̀ nɨ pɨ tɨ̀ŋnə̀nə, a pə zhyə̀ nɨ ŋwùə̀ laʼa mə koʼò e apə̀, nɨ̀ kyàa ntô nɨ ẅèrə.

³¹Ŋònə̀ ɨ̀tse a pəla mbyiitə̀ a wɨghə lo, ‘Nɨ̀ kyàa moonə̀ ndzàkɨshyə̀ wə̀ ntii àkə?’ Nɨ shwəŋə̀ ambo ze lo, ‘Ndòʼnə̀mbyə̂ à tàʼnə ẅèrə.’”

³²Pobə pa pyə̀ nɨ à lə̀ twuumə̀nə a ghobə la lə̀ lèrə̀ nkɨ ndzəənə̀ mɨ̀nwùə̀ mɨ furə̀ tyìʼə̀ tsaʼnə à lə̀ shwəŋə̀nə ghobə.

³³Tsaʼnə pobə lə̀ mənə nkyàa moonə̀ ndzàkɨshyə̀ wa la, ngàŋə̀ ndzàkɨshyə̀ wa a tô mbyiitə̀ ghobə lo, “Nɨ̀ kyàa moonə̀ ndzàkɨshyə̀ wə̀ ntii àkə?”

³⁴Pobə kẅùə̀ lo “Ndòʼnə̀mbyə̂ à tàʼnə a ẅèrə.”

³⁵Pobə lə̀ lòo a ẅèrə ntô ambo Yěsû, nnùŋə̀ pɨ̀kutə̀ ɨ̀pobə a nkàʼtə̀ moonə̀ ndzàkɨshyə̀ wa, ngɨ̀rə̀ Yěsû a koʼò nnwuunə̀ aŋunə.

³⁶Tsaʼnə à lə̀ mənə ndèrə̀ pànə̀ lə̀ tyiʼə̀ nshànkə̀ ɨtsəʼə ɨ̀pobə a àlàŋə.

³⁷Nkwùə̀ nɨ à lə̀ mənə mbaatə̀ a Yèrusalèmə̀, alyiʼə nɨ àlàŋə a shwuʼnə aŋunə Mbarə̀ Olìvə̀ ntô mbòmpə̀ la, àpùŋə̀ ɨ̀zùŋə̀ ndzùmə̀ ɨ̀pe pa pìʼnə̀ a nɨ ghaʼà, nkyiinə̀ nguʼtə̀ a Nẅùə̀ ntii mɨ̀nwùə̀ mɨ̀yerə̀nə yerə̀nə nɨ à lə̀ ghɨ̀rə̀nə pobə zəənə̀ la.

³⁸Pobə lə̀ mə nkyiinə̀ nshwəŋə̀ lo, “Mborə̀ ɨ̀ chyə̂ ambo ɨ̀fò nɨ à wə̀ ntô aŋunə nɨ̀linə̀ nɨ Ndòʼnə̀mbyə̂ la! Àporə̀porə̀ â pə a nɨ̀pwuurə̀, àghuʼtə̀ â pə ambo Nẅùə̀ Àkoʼntsirə̀.”

³⁹Pɨ̀Farìsî pɨ̀tse nɨ pɨ lə̀ pənə amwuə àpùŋə̀ pə̀ənə̀ za shwəŋə̀ ambo ze lo, “Ɨ̀nèrə̀ ɨ̀nwùə̀, saʼà ɨ̀zùŋə̀ ndzùmə̀ ɨ̀pô pə̀ lo pobə̂ zhwemnə̀.”

⁴⁰A kẅùə̀ ambo pobə lo, “Ǹshwəŋə̀ a wɨghə lo pobə tə nzhwemnə̀, mɨ̀ghòorə tyiʼə̀ nkyiinə̀ nguʼtə̀ a Nẅùə̀.”

⁴¹Nkwùə̀ nɨ à lə̀ tônə mbaatə̀, ndzəənə̀ mbòmpə àlaʼà Yèrusalèmə̀, à lə̀ yìi mbə̀ʼə zèrə,

⁴²nshwəŋə̀ lo, “Nɨ̀ pəla nzhyə̂ àzwuumə̀ nɨ mbə̀ʼə a lòo àporə̀porə̀ ntô nɨ zèrə sìnə̀ wə̀! La tɨ̀tsòŋə̀ pɨ lə̀əmə̀ a zèrə ambo pɨghə.

⁴³Nkwùə̀ ɨ̀ ghǎ tô nɨ ngàŋə kɨpaanə ɨ̀zɨghə ghǎ korə̀ nkaʼà kamnə̀ a wɨghə nnàanə̀ a wɨghə pɨ̀pàa pɨ̀tsùmə̀.

⁴⁴Pobə ghǎ zhwuutə̀ a wɨghə pɨghə pɨ ɨ̀poonə̀ ɨ̀pɨghə amwuə mɨ̀ndâ ɨ̀mɨghə, myàʼtə̀ e nɨ̀ghòorə nɨ nwuunə̀ àtwuə̀ tsɨ̀tse apə̀, ntiinə ka nɨ̀ lə̀ zhyə̂ a wɨghə nkwùə̀ nɨ Nẅùə̀ à lə̀ tônə a nɨ chwarə̀ a wɨghə.”

⁴⁵Yěsû à lə̀ tyiʼə̀ nkwuunə̀ a ndâ Mɨ̀shwàʼà Nẅùə̀ mbìʼnə̀ a nɨ kantə̀ pànə̀ nɨ pɨ lə̀ mənə nshwùunə̀ ɨ̀pwuumə̀ ghu,

⁴⁶nshwəŋə̀ ambo pobə lo, “Pɨ ŋwàʼnə̀ amwuə àŋwàʼnə̀ Nẅùə̀ la lo, ‘Ndâ Mɨ̀shwàʼà mə̀ ɨ̀ ghǎ pə la ndâ àchàʼtə̀ Nẅùə̀.’ La nɨ̀ ghɨ̀rə̀ mə ɨ̀ tyiʼə̀ alyiʼə a nɨ lə̀əmə̀ pɨ̀zə̀ərə̀.”

⁴⁷Yěsû à lə̀ tyiʼə̀ nnèrə̀ ànwùə̀ Nẅùə̀ amwuə Ndâ Mɨ̀shwàʼà Nẅùə̀ za njyə̂ ɨ̀tsùmə̀. La pɨ̀fò màʼà Nẅùə̀ ghobə pɨ̀nèrə̀ mbòomə nɨ pɨ̀lɨ̀ŋmə̂ lə̀ mə̀ ntàʼà àlàŋə a nɨ zhwuutə̀ e.

⁴⁸La ka zəənə̀ a ghobə àlàŋə ntiinə pànə̀ pɨ̀noʼnə lə̀ pə ndzùŋə̀ e ntàʼà a nɨ zuʼù mɨ̀nwùə̀ nɨ a lə̀ mənə nshwəŋə̀.