Read Pinyin Lukə̀ 2 Bible Online

Lukə̀ 2 - Pinyin bible

Lukə̀ 2

¹Amwuə nkwùə̀ nɨ pɨ lə̀ pyə̂nə a Jònə, Kaasà Ògostùsə̀ nɨ à lə̀ pənə ɨ̀fò ghù ngẅùunə amwuə àlaʼà Romə̀, à lə̀ tsàa ntwuumə̀ lo pɨ̀ shaŋə̀ a ŋwùə̀ ntsùmə̀ amwuə àlaʼà Romə̀ àtsùmə̀.

²Lə lə̀ pə ntsàambyə̀ nkwùə̀ a nɨ shaŋə̀ pə̀ənə̀ tsaʼnə Kẅìrìnùsə̀ à lə̀ pənə ɨ̀fò pàa àlaʼà Romə̀ nɨ pɨ lə̀ mənə nfuŋə̀ nɨ Siryà.

³Lenəla, ŋwùə̀ ntsùmə̀ à lə̀ lèrə̀ amwuə pàa àlaʼà ɨghobə a nɨ ŋwàʼnə̀ nɨ̀linə̀ ɨ̀tse.

⁴Jòsebə̀ a furə̀ a Nazarètə̀ nɨ à pənə amwuə Galìlyə̂ nkoʼò ndèrə̀ a Judyà. À lə̀ kwuunə̀ a Bethlehem nɨ à pənə mbòmpə àlaʼà Dàfirə̀ ntiinə à lə̀ pənə ŋwùə̀ ngẅàrə̀ ndâ Dàfirə̀.

⁵À lə̀ lèrə̀ pobə ngẅùə e Màriyà e nɨ à tsoʼò mə mɨ̀lùʼù àtwuə̀ ze a nɨ ghə̀ ŋŋwàʼnə̀ mɨ̀linə̀ ɨ̀mobə. Màriyà à lə̀ pə nɨ moonə̀.

⁶Tsaʼnə pobə lə̀ pənə ghu, nkwùə̀ ɨ̀ lə̀ kùʼù ambo ze a nɨ pyə̂ a moonə̀ ghu.

⁷Lenəla, à lə̀ pyə̂ a ntsàambyə̀ moonə̀ e a pə mômbyàŋnə̀, a lyibə̀ e amwuə ɨ̀pàa ɨtsəʼə nnùŋə̀ amwuə nɨ̀kwùʼə̀ nɨ mɨ̀nyàamə̀, ntiinə ka alyiʼə a lə̀ pə e ghu ambo pobə a nɨ lyə̂ amwuə ndâ pɨ̀ghɨ̀ɨnə̀.

⁸Pɨ̀mbyabə̀ mɨ̀mbyə̂ mɨ ndzìrə̀ pɨ̀tse lə̀ pə amwuə pàa àlaʼà ghu mmə mbyabə̀ mɨ̀mbyə̂ ɨ̀mobə a kòŋə̀ nɨ ɨ̀twuʼə̀.

⁹Angèrə̀ Ndòʼnə̀mbyə̂ à lə̀ furə̀ a mbyə̀ pobə, nkàʼà Nẅùə̀ ɨ̀ tsìinə̀ aŋunə pobə, àkẅàrə̀ a zùŋə̀ ngẅìimə̀ a ghobə.

¹⁰La angèrə̀ wa à lə̀ shwəŋə̀ ambo pobə lo, “Kò nɨ̀ pô, nɨ̀ zhwiʼtə̀! Ǹtô la nɨ ntwuumə̀ ghù ɨ̀shìʼnə̀ ẅùə̀ nɨ ɨ ŋâ a nɨ̀ghaʼà ghu noʼnə ambo pànə̀ pɨ̀tsùmə̀.

¹¹Pɨ̌ pyə̂ a ngàŋə̀ nchwarə̀ pə̀ənə̀ ambo pɨghə amwuə mbòmpə àlaʼà Dàfirə̀ sìnə̀ wə̀ a pə Kristù Ndòʼnə̀mbyə̂.

¹²Àzwuumə̀ zhyə̀ nɨ a pənə tsaʼa àlènə̀ ambo pɨghə a chyə̂ lo nɨ̌ zəənə̀ a moonə̀ nɨ pɨ lyibə̀nə amwuə ɨ̀pàa ɨtsəʼə nnùŋə̀ amwuə nɨ̀kwùʼə̀ nɨ mɨ̀mbyə̂.”

¹³Pobə lə̀ kɨ wùutə̀ àpùŋə̀ pəngèrə̀ a pwuutə̀ a ẅùə̀, pobə tyiʼə̀ mmə ngyetə̀ a Nẅùə̀ nshwəŋə̀ lo,

¹⁴“Àghuʼtə̀ yè noʼnə a chyə̂ ambo Nẅùə̀koʼò a nɨ̀pwuurə̀. Àporə̀porə̀ â pə àtwuə̀ ɨ̀shyə̂ ghə̀ ambo pànə̀ nɨ à pənə nɨ nɨ̀ghaʼà aŋunə pobə.”

¹⁵Nkwùə̀ nɨ pəngèrə̀ pa lə̀ myàʼtə̀nə a ghobə ndèrə̀ a nɨ̀pwuurə̀, pɨ̀mbyabə̀ mɨ̀mbyə̂ pa lə̀ shwəŋnə̀ pobə nɨ pobə lo; “Nɨ̀ ghɨ̀rə̀ pə̀ənə̀ twuumə̀ ndèrə̀ a Bethlehem ndzəənə̀ ànwùə̀ nɨ a zə ndòo alyiʼə ghu, nɨ Ndòʼnə̀mbyə̂ à ghɨ̀rə̀nə pə̀ənə̀ zhyə̂ la.”

¹⁶Lenəla, pobə lə̀ yìinə̀ nɨ ɨ̀tɨ̀ŋnə̀ ngə̀ ntsirə̀ a Màriyà pobə Jòsebə̀ nɨ moonə̀ wə̀ nɨ à lə̀ nwùunə̀nə amwuə nɨ̀kwùʼə̀ nɨ mɨ̀mbyə̂.

¹⁷Tsaʼnə pobə lə̀ zəənə̀nə a moonə̀ ẅèrə wə̀ la, pobə lə̀ tiitə̀ ànwùə̀ nɨ pəngèrə̀ lə̀ tiitə̀nə a ghobə mbə̀ʼə moonə̀ wə̀.

¹⁸Ànwùə̀ nɨ pɨ̀mbyabə̀ mɨ̀mbyə̂ pèrə pə lə̀ shwəŋə̀nə a lə̀ pə ànwùə̀ yerə̀nə yerə̀nə ambo ŋwùə̀ ntsùmə̀ nɨ à lə̀ zuʼnə.

¹⁹Màriyà à lə̀ shwatə̀ mɨ̀nwùə̀ mə mɨ̀tsùmə̀ ntyiʼə̀ mbə nɨ àkwàŋə̀ yè noʼnə a ntɨŋmə̀ ze.

²⁰Pɨ̀mbyabə̀ mɨ̀mbyə̂ pèrə pə lə̀ kẅirə̀ ndèrə̀, mmə ndzòbə̀ mɨnchyə nguʼtə̀ a Nẅùə̀ aŋunə mɨ̀nwùə̀ nɨ pobə zuʼnə nkɨ ndzəənə̀ a pwùumə̀ ambo pobə tyìʼə̀ tsaʼnə pɨ lə̀ shwəŋə̀nə a ghobə.

²¹Njyə̂ nɨ̀fàamə̂ lə̀ làŋə̀, pɨ zə̀ərə̀ a moonə̀ wə̀ nchwùə̀ nɨ̀linə̀ ɨ̀tse nɨ Yěsû. Lə lə̀ pə nɨ̀linə̀ tsa nɨ angèrə̀ wa à lə̀ ŋânə pɨ pòŋə̀ sùŋə̀ e la.

²²Nkwùə̀ ɨ̀ lə̀ kùʼù lo Jòsebə̀ pobə Màriyà ghɨ̀rə̀ a mbòomə nsùu mbɨ̀ŋmə̀ ɨ̀zobə ndaanə̀ a nɨ zùŋə̀ a mbòomə Mǔsî. Lenəla pobə lə̀ lòo a Yěsû nkoʼò ndèrə̀ a Yèrusalèmə̀ a nɨ ghə̀ nnèrə̀ ambo Ndòʼnə̀mbyə̂,

²³a nɨ zùŋə̀ tsaʼnə pɨ lə̀ ŋwàʼnə̀nə amwuə mbòomə Ndòʼnə̀mbyə̂ lo, “Pɨ ghǎ nùŋə̀ a ntsàambyə̀ moonə̀ mə̀ngyə̌ nɨ à pənə mômbyàŋnə̀ tsaʼa moonə̀ Ndòʼnə̀mbyə̂.”

²⁴Pobə lə̀ kɨ ndèrə̀ a nɨ ghə̀ mmàʼà a Nẅùə̀ nɨ ɨ̀lwuʼə̀ ɨpaa kə̀ nɨ ɨ̀poonə̀ pɨ ɨ̀lwuʼə̀ mɨ̀karə pɨpaa, a nɨ zùŋə̀ ànwùə̀ nɨ mbòomə Nẅùə̀ à lə̀ nèrə̀nə.

²⁵Ŋònə̀ ɨ̀tse à lə̀ pə a Yèrusalèmə̀ nkwùə̀ ghu pɨ mə nfuŋə̀ e nɨ Simyònə̀. À lə̀ pə ŋònə̀ nɨ mɨ̀nwùə̀ ɨ̀me lə̀ təəmə̀nə, a kɨ mbə nɨ àkẅàrə̀ Nẅùə̀. Àzhwùə̀ Nẅùə̀ a lə̀ pə aŋunə ze mmə mbyabə̀ nkwùə̀ nɨ Nẅùə̀ à ghǎ zə̀ə nchyə ɨ̀myə̂ pànə̀ pɨ Israel la.

²⁶La, Àzhwùə̀ Nẅùə̀ a lə̀ nèrə̀ mə lo à ghǎ zəənə̀ a ẅùə̀ nɨ Ndòʼnə̀mbyə̂ à lə̀ tsoʼnə la â pòŋə̀ kwɨghə̀

²⁷Àzhwùə̀ Nẅùə̀ a lə̀ ghɨ̀rə̀ lo â tô a Ndâ Mɨ̀shwàʼà Nẅùə̀ njyə̂ nɨ mǎ pɨ Yěsû pobə tǎ ɨghobə lə̀ lòonə e ntô lo nèrə̀ e a nɨ lẅenə̀ tsaʼnə mbòomə à lə̀ nèrə̀nə.

²⁸Simyònə̀ à lə̀ kẅiirə̀ a moonə̀ wə̀ nkẅaʼà, ŋŋâ a mɨyàa ambo Nẅùə̀, nshwəŋə̀ lo,

²⁹“Tɨ̀tsòŋə̀ wə̀, Ndòʼnə̀mbyə̂, wə̀ nùŋə̀ mə mɨ̀nkàʼnə ɨ̀mô, myàʼtə̀ a ngàŋə̀ àfàʼà o â lèrə̀ nɨ àporə̀porə̀ tsaʼnə wə̀ lə̀ shwəŋə̀nə.

³⁰Mbə̀ʼnə ǹdzəənə̀ mə nɨ̀chwarə̀ o wa nɨ ɨ̀myə̂ ɨ̀mâ,

³¹ẅùə̀ wa nɨ wə̀ lə̀ chwuʼtə̀nə a mbyə̀ ŋwùə̀ ntsùmə̀ la.

³²À ghǎ pə nkàʼà nɨ ɨ̀ ghǎ kyàʼà ɨ̀làŋə ɨ̀pô ambo pànə̀ nɨ ka pobə pə ghobə pɨ̀Jew, kɨ tô nɨ nɨ̀ghaʼà ambo pə̀ənə̀ ɨ̀pô, pànə̀ pɨ Israel.”

³³Tǎ pɨ moonə̀ wə̀ nɨ mǎ e lə̀ yerə̀ ànwùə̀ nɨ pɨ lə̀ shwəŋə̀nə mbə̀ʼə e la.

³⁴Simyònə̀ a tyiʼə̀ nchyâ mborə̀ aŋunə pobə nshwəŋə̀ ambo Màriyà, mǎ e lo, “Zəənə̀! Moonə̀ wə̀ à ghǎ ŋaŋə̀ pànə̀ pɨ̀noʼnə, kɨ shwuʼkə̀ pànə̀ pɨ̀noʼnə amwuə àlaʼà Israel. À ghǎ pə àlènə̀ nɨ pànə̀ ghǎ shwəŋnə̀ mbə̀ʼə e,

³⁵à ghǎ ghɨ̀rə̀ mɨ̀nwùə̀ nɨ pànə̀ pə ghǎ mə kwàŋə̀ amwuə mɨ̀ntɨŋmə̀ ɨ̀mobə furə̀ a sàŋə̀, mɨnẅuə ntsòo â sòbə̀ ntɨŋmə̀ o.”

³⁶Ngàŋə̀ ntwuumə̀ Nẅùə̀ ghu mə̀ngyə̌ ɨ̀tse à lə̀ pə ghu nɨ̀linə̀ ɨ̀tse pə Anà, mbə moonə̀ Fanùèlə̀ nɨ à lə̀ furə̀nə amwuə ngẅàrə̀ Ashà. À lə̀ kɨ pə amwuə zèrə̀ zə̀ nkwùə̀ la ntyiʼə̀ ndwùnə̀ mə̀ngyə̌, ndə̀ zoʼò nchyə̂ nguʼu sàmbaa ndwuumə̀ e a kwɨghə̀.

³⁷A kɨ pə nkwùə̀ ghu mbə nguʼu mɨ̀ghumə̀ nɨ̀fàamə̂ ntsòbə̀ nɨ̀kwàa. Ka à lə̀ mə myàʼtə̀ e Ndâ Mɨ̀shwàʼà Nẅùə̀; à lə̀ mə nsəəkə̀ a Nẅùə̀, mmə nchyə̂ tɨ zɨghə̀ amwuə àchàʼtə̀ Nẅùə̀ nɨ ɨ̀twuʼə̀ pobə njyə̂.

³⁸À lə̀ kɨ ntô tyìʼə̀ nkwùə̀ ghu, ŋŋâ a mɨyàa ambo Nẅùə̀, nshwəŋnə̀ mbə̀ʼə moonə̀ wa ambo pànə̀ pɨ̀tsùmə̀ nɨ pɨ lə̀ mənə mbyabə̀ lo Nẅùə̀ â fuukə̀ pànə̀ pɨ Yèrusalèmə̀ amwuə ngəʼə̀.

³⁹Nkwùə̀ nɨ Jòsebə̀ pobə Màriyà lə̀ myàanə̀nə ɨ̀nwùə̀ ɨ̀tsùmə̀ nɨ mbòomə Ndòʼnə̀mbyə̂ à lə̀ tàʼnə la, pobə lə̀ kẅirə̀ nkwə̂ a Galìlyə̂, ndèrə̀ a nɨ̀kwurə̀ pobə a Nazarètə̀.

⁴⁰Moonə̀ wa à lə̀ tyiʼə̀ nkẅuə̀ mbə nɨ ɨ̀tɨ̀ŋnə̀ nkɨ ndẅenə̀ nɨ àzhìʼtə̀, àpòŋə̀ ntɨŋmə̀ Nẅùə̀ a kɨ mbə aŋunə ze.

⁴¹Tǎ pɨ Yěsû pobə mǎ e lə̀ pə nkoʼò ndèrə̀ a Yèrusalèmə̀ nguʼu ɨ̀tsùmə̀ aŋunə Nɨ̀ghaʼà Àlàŋə̀ Mmyàʼtə̀.

⁴²Nkwùə̀ nɨ à lə̀ pənə nguʼu ntsòbə̀ ɨpaa, pobə pɨ pobə lə̀ lèrə̀ tsaʼnə pobə lə̀ mənə ngɨ̀rə̀.

⁴³Nkwùə̀ nɨ pobə lə̀ myàanə̀nə a nɨ̀ghaʼà wə̀ ntyiʼə̀ mmə nkwə̂, Yěsû à lə̀ ghoŋə̀ e a ndzùmə̀ a Yèrusalèmə̀, la ka tǎ ɨghobə pobə mǎ e zhyə̂ a ghobə.

⁴⁴Pobə lə̀ mə nkwàŋə̀ lo à wə̀ a tɨ̀tɨ̀rə̀ pànə̀ nɨ pobə pɨ pobə lə̀ mənə ngyìinə̀. Lenəla, pobə lə̀ yìinə̀ a nɨ̀yìinə̀ aŋunə taʼà njyə̂ ntyiʼə̀ mbìʼnə̀ a nɨ tàʼà e amwuə ɨlyiʼə pɨ̀swùə ɨ̀pe pobə ngẅàrə̀ ɨzobə.

⁴⁵Pobə lə̀ tàʼà e la ka zəənə̀ a ghobə a ye, nkẅirə̀ ndèrə̀ a Yèrusalèmə̀ a nɨ ghə̀ ntàʼà e ghu.

⁴⁶Njyə̂ ɨtarə lə̀ làŋə̀ pobə zəənə̀ e amwuə Ndâ Mɨ̀shwàʼà Nẅùə̀ a tɨ̀tɨ̀rə̀ pɨ̀nèrə̀ mbòomə, a nwuunə̀ mmə nzhwiʼtə̀ ànwùə̀ nɨ pobə mənə nshwəŋə̀ nkɨ mmə mbyiitə̀ a ghobə nɨ ɨ̀pyiitə̀ ɨ̀shwəŋnə̀.

⁴⁷Pànə̀ pɨ̀tsùmə̀ nɨ pobə lə̀ zuʼnə ɨ̀kẅùə̀ ɨ̀shwəŋnə̀ ɨ̀pe lə̀ yerə̀ ntii àzhìʼtə̀ nɨ à lə̀ pənə nɨ zèrə.

⁴⁸A lə̀ kə̀ʼnə̀ tǎ ɨghobə pobə mǎ e nkwùə̀ nɨ pobə lə̀ zəənə̀nə e. Mǎ e a tyiʼə̀ mbyiitə̀ ambo ze lo, “Moonə̀ mə̀, à tyiʼə̀ ngɨ̀rə̀ àkə wə̀ tsàŋnə̀ a wəə tyìʼə̀ lə? Pəə tǎ ɨwɨghə tàʼà mə o ka mɨ̀zùŋə.”

⁴⁹Yěsû a pyiitə̀ ambo pobə lo, “Nɨ̀ mə ntàʼà mə̀ lo àkə? Ka nɨ̀ zhyə̂ a wɨghə lo ǹtô mbyə̀ mbə a nɨ pə a ndâ Tǎ ɨwəə?”

⁵⁰La ka pobə lə̀ tsùŋə̀ nzhyə̂ a ghobə ànwùə̀ nɨ à lə̀ mənə nshwəŋə̀ ambo pobə.

⁵¹Lenəla, Yěsû à lə̀ lòo a ɨ̀shyə̂ ndzùŋə̀ a ghobə pobə pɨ pobə shwuʼə̀ ndèrə̀ a Nazarètə̀, a tyiʼə̀ mmə ndzuʼnə̀ a ghobə. Mǎ e à lə̀ nùŋə̀ mɨ̀nwùə̀ mèrə mə mɨ̀tsùmə̀ a ntɨŋmə̀ ze.

⁵²Yěsû à lə̀ tyiʼə̀ nkẅuə̀ nɨ àzhìʼtə̀ pobə mbɨ̀ŋmə̀ e ntsùmə̀, Nẅùə̀ pobə pànə̀ tyiʼə̀ nkòŋə̀ e.