Read Pinyin Lukə̀ 20 Bible Online

Lukə̀ 20 - Pinyin bible

Lukə̀ 20

¹A lə̀ pə njyə̂ ɨ̀tse Yěsû nkwuunə̀ a Ndâ Mɨ̀shwàʼà Nẅùə̀ mmə nnèrə̀ mɨ̀nwùə̀ ambo pə̀ənə̀ nkɨ mə nchwìitə̀ ntwuumə̀ ghù ɨ̀shìʼnə̀, pɨ̀fò màʼà Nẅùə̀, pobə pɨ̀nèrə̀ mbòomə, nɨ pɨ̀lɨ̀ŋmə̂ lə̀ tô mbyiitə̀ e lo,

²Tiitə̀ a wəə! “À ŋâ ɨ̀wə̌ ŋŋâ o nɨ mɨ̀tɨ̀ŋnə̀ mə lo wə̀ ghɨ̀rə̀ mɨ̀nwùə̀ mə? Ɨ̀tɨ̀ŋnə̀ ẅèrə wə̀ ambo ghò la à ŋâ ɨ̀wə̌?”

³A kẅùə̀ ambo pobə lo, “Mbɨ kɨ pyiitə̀ a wɨghə nɨ àpyiitə̀ shwəŋnə̀.

⁴Jònə à lə̀ lòo ɨ̀tɨ̀ŋnə̀ a nɨ ŋâ àkẅiirə̀ nchyə la ambo Nẅùə̀ kə̀ ambo ŋwùə̀ mɨsoŋə?”

⁵Pobə tyiʼə̀ nshwəŋə̀ pobə nɨ pobə lo, “pə̀ənə̀ tə mbə lə̀ nkẅùə̀ lo, à lə lòo la ambo Nẅùə̀ yi a pyiitə̀ a wəənə̀ lo, nɨ̀ lə̀ tyiʼə̀ ka pyiimə̀ a wɨghə ànwùə̀ nɨ à lə̀ shwəŋə̀nə ntii àkə?

⁶La pə̀ənə̀ tə shwəŋə̀ lo, ɨ̀tɨ̀ŋnə̀ e lə furə̀ ambo ŋwùə̀ mɨsoŋə, yi pànə̀ pɨ̀tsùmə̀ a ɨ̀shyə̂ nɨ̀ghə̂ pɨ tumpə̀ a wəənə̀ nɨ mɨ̀ghòorə, ntiinə pobə pɨ̀tsùmə̀ pyiimə̀ lo Jònə à lə̀ pə ngàŋə̀ ntwuumə̀ Nẅùə̀.”

⁷Lenəla pobə tyiʼə̀ nkẅùə̀ lo, “Ka pəə zhyə̂ a wəə alyiʼə nɨ ɨ̀tɨ̀ŋnə̀ e ɨ lə̀ furə̀nə ghu”.

⁸Yěsû a tyiʼə̀ nshwəŋə̀ ambo pobə lo, “Ka mbə kɨ tiitə̀ mə̀ a wɨghə nɨ ŋònə̀ nɨ a ŋânə mə̀ nɨ ɨ̀tɨ̀ŋnə̀ lo ngɨ̀rə̀ mɨ̀nwùə̀ mə̀.”

⁹Yěsû a shwəŋə̀ àshwəŋnə̀ nàanə nàanə ambo pobə lo, “Ŋònə̀ ɨ̀tse à lə pə nɨ mbyiinə̀ mɨ̀ntàamə mɨ mɨ̀lùʼù, ŋŋâ zèrə̀ ambo pànə̀ pɨ̀tse lo pobə̂ fàʼà amwuə nkɨ mmə ŋŋâ ɨ̀ze nkabə̀, nfurə̀ ndèrə̀ e a àtwuumə̀ aŋunə ntyə̌ sàa.

¹⁰Nkwùə̀ ɨ̀ lə̀ kùʼù a nɨ kabə̀ mɨ̀ntàamə mɨ mɨ̀lùʼù, a tsàa a ngàŋə̀ àfàʼà e lo â ghə̀ nkẅiirə̀ mɨ̀ntàamə mɨ mɨ̀lùʼù ma mɨ̀tse ambo pobə, la pobə kô e nkəʼə̀ e ntsàa e mbô nɨ mbô.

¹¹A nkɨ nchi ntsàa a ngàŋə̀ àfàʼà wa ghùtse, pɨ kɨ nchi nkəʼə̀ e ntsàa e a kwə̂ tyìʼə̀ mbô nɨ mbô.

¹²A kɨ nchi ntsàa a ẅùə̀ nɨ à pyàanə nòmbàa pɨtarə, pɨ kô a ẅèrə wə̀ nchyâ ɨ̀lǎ aŋunə ze, mmàʼà e a àpyìinə.

¹³Ngàŋə̀ mbyiinə̀ wa a shwəŋə̀ lo mbɨ tyiʼə̀ ghɨ̀rə̀ lə ɨla tɨ̀tsòŋə̀? Mbɨ tsàa a moonə̀ mə̀ ghu mbyàŋnə̀ wə̀ nɨ ǹkòŋə̀nə e ka mɨ̀zùŋə lə, nkwùə̀ ɨ̀tse pɨ̀ ŋâ e nɨ àghuʼtə̀.

¹⁴La pànə̀ pa zəənə̀ e, nshwəŋə̀ pobə nɨ pobə lo, ‘Lə̌ ɨ̀ndzɨ̀ghə̀ ndâ e, pə̀ənə̀ zhwuutə̀ e mbə̀ʼə ɨ̀pwuumə̀ ɨ̀pe tyiʼə̀ ɨ̀pə̀ənə̀.’

¹⁵Pobə lə̀ tyiʼə̀ nkô e mmàʼà a ndzùmə̀ mbyiinə̀ nzhwuutə̀.” Yěsû a tyiʼə̀ mbyiitə̀ a ghobə lo, “Nɨ ndwuumə̀ wə̀ nɨ̀ kwàŋə̀ lo ngàŋə̀ mbyiinə̀ wə̀ ǎ ghɨ̀rə̀ ɨla nɨ pobə?

¹⁶À ghǎ zhwuutə̀ pànə̀ pə̀ ŋâ mbyiinə̀ e ambo pànə̀ pɨ̀nyaanə.” Nkwùə̀ nɨ pànə̀ pa lə̀ zuʼnə a lenə la, pobə lə̀ tyiʼə̀ nshwəŋə̀ lo, “Mbə̀ʼə Nẅùə̀ a pyiimə̀ e apə̀.”

¹⁷Yěsû a naŋə̀ a ghobə mbyiitə̀ lo, “Àshwəŋnə̀ zə̀ a nèrə̀ lə lo àkə? ‘Nɨ̀ghòorə tsa nɨ pɨ̀mboomə̀ mɨ̀ndâ lə̀ twuunə̀nə la, nɨ pə̀ŋə̀ mə ntyiʼə̀ nɨ̀ghòorə nɨ̀lẅuə̀ nɨ ndâ.’

¹⁸Ŋwùə̀ wa ntsùmə̀ nɨ ǎ kunə̀ aŋunə nɨ̀ghòorə tsə̀ à pɨ piʼtə̀; la nɨ tə nkunə̀ aŋunə ŋwùə̀, nɨ nẅàrə̀kə̀ e.”

¹⁹Pɨ̀nèrə̀ mbòomə pobə pɨ̀fò màʼà Nẅùə̀ lə̀ tàʼà àlàŋə a nɨ kô e nkwùə̀ ghu, la mbô ɨ̀myə̂ mɨ pə̀ənə̀. Pobə lə̀ zhyə̂ lo, à shwəŋə̀ àshwəŋnə̀ nàanə nàanə zə̀ lə̀ aŋunə pobə.

²⁰Pobə lə̀ tyiʼə̀ mmə ntàʼà ɨ̀sàanə̀ a nɨ kô e, ntàʼà pànə̀ ntsàa a ndzùmə̀ ze lo pobə̂ nyaʼa nnyoorə̀ mɨ̀nwùə̀ ambo ze mbə̀ʼə a shwəŋə̀ ànwùə̀ àtse pobə̂ furə̀ aŋunə nkô e ŋŋâ ambo ŋònə̀ ngẅùunə àlaʼà Romə̀ nɨ à pənə nɨ ɨ̀tɨ̀ŋnə̀ àtwuə̀ pobə.

²¹Pànə̀ pa lə̀ tyiʼə̀ mbyiitə̀ e lo, “Ɨ̀nèrə̀ ɨ̀nwùə̀ pəə zhyə̂ lo, ànwùə̀ nɨ wə̀ wa nshwəŋə̀ nkɨ mmə nnèrə̀ a kùʼnə̀, nkɨ nzhyə̂ lo ka wə̀ nèrə̀ o a tə̀chwìi a tɨ̀tɨ̀rə̀ pə̀ənə̀, nkɨ mmə nnèrə̀ o pə ndàʼà àlàŋə za nɨ Nẅùə̀ à tàʼnə lo pànə̀ chyə̂ aŋunə la.

²²A kùʼnə̀ amwuə mbòomə ɨ̀wə̀ənə̀ lo pɨ̀ twuə̀ pɨ̀taghə̀ ambo Kaasà kə̀ ngaŋə?”

²³La Yěsû à lə̀ zhyə̂ a mɨnaŋə ɨghobə, nshwəŋə̀ ambo pobə lo,

²⁴“Nɨ̀ nèrə̀ mə̀ nɨ nkabə̀ silbà n̂dzəənə̀.” A pyiitə̀ ghobə lo, “Lə̌ àtwuə̀ ɨ̀wə̌ nɨ nɨ̀linə̀ ɨ̀wə̌ aŋunə nkabə̀ zə̀?” Pobə kẅùə̀ lo, “A yè Kaasà.”

²⁵Lenəla, a shwəŋə̀ ambo pobə lo, “Njiilo lo nɨ̀ ŋâ ɨ̀pwuumə̀ pyə̀ nɨ pənə pɨ Kaasà ambo Kaasà, nkɨ ŋâ a pyə̀ nɨ pənə pɨ Nẅùə̀ ambo Nẅùə̀.”

²⁶Ka pobə lə̀ zəənə̀ ghobə ndwuumə̀ nɨ mbə̀ʼə pobə làŋə̀ ghu nkô e a ɨ̀myə̂ pə̀ənə̀ ntiinə ànwùə̀ nɨ à lə̀ shwəŋə̀nə la a lə̀ tsàarə̀ a ghobə.

²⁷Pɨ̀Sadducee pɨ̀tse pyə̀ nɨ pobə pa nshwəŋə̀ lo mbə̀ʼə ka ŋwùə̀ a zhwuumə̀ e a nɨ̀wɨghə̀

²⁸lə̀ tô mbyiitə̀ a Yěsû lo, “Ɨ̀nèrə̀ ɨ̀nwùə̀, Mǔsî à lə̀ ŋâ ntə̌ ambo pə̀ənə̀ lo, ndwuumə̀ ŋwùə̀ à tə nkwɨghə̀ tə moonə̀, momaa e a lòo a ngẅùə e mbyə̂ ɨ̀poonə̀ ŋŋâ ambo ndyimə e wa.

²⁹Ɨ̀poonə̀ pɨ mǎ ɨ̀tse lə̀ pə ghu sàmbaa, ghù ntsàambyə̀ a zoʼò mə̀ngyə̌ nkwɨghə̀ tɨ pyə̂ a moonə̀,

³⁰àpaatə̀ a chi ndòo a mə̀ngyə̌ wa, nkɨ nkwɨghə̀ àze tɨ pyə̂ a moonə̀.

³¹Ẅùə̀ nɨ à pənə nòmbàa pɨtarə, a kɨ ndòo mə̀ngyə̌ wa; pobə pa pɨ̀tsùmə̀ sàmbaa lə̀ zoʼò a mə̀ngyə̌ wa nkɨ nkwɨghə̀ a ghobə pɨ̀tsùmə̀ tɨ pyə̂ a moonə̀.

³²Mə̀ngyə̌ wa à lə̀ kɨ ndẅùutə̀ nkwɨghə̀ àze.

³³Tsaʼnə a pənə lə, nkwùə̀ nɨ pɨ ghǎ zhwuumə̀ a nɨ̀wɨghə̀, mə̀ngyə̌ wə̀ à ghǎ tyiʼə̀ pə ngẅùə ɨ̀wə̌? Tsaʼnə pobə pa pɨ̀tsùmə̀ sàmbaa lə̀ zoʼnə e la?”

³⁴Yěsû a kẅùə̀ ambo pobə lo, “Pànə̀ pɨ nguʼu wə̀ pa ndzoʼò nkɨ ŋŋâ ɨ̀pôpə̀ngyə̌ a ndâ nɨ̀zoʼò,

³⁵la pànə̀ nɨ pɨ ghǎ kùʼnə̀ a nɨ zhwuumə̀ a nɨ̀wɨghə̀ amwuə nguʼu mbyə̂ ghù shwuə̀ ghu, ka pɨ pə ghǎ zoʼò a ghobə kɨ ŋâ a ghobə pə̀ngyə̌ a ndâ nɨ̀zoʼò apə̀.

³⁶Pobə ghǎ pə la tsaʼa pəngèrə̀, kwɨkə̀ ghobə apə̀. Pobə Ɨ̀poonə̀ pɨ Nẅùə̀ ntiinə pobə zhwuumə̀ a nɨ̀wɨghə̀.

³⁷La ngə̀ aŋunə nɨ̀zhwuumə̀ a nɨ̀wɨghə̀, Mǔsî à lə̀ nèrə̀ lo pɨ̀kwuə̀ pa nzhwuumə̀ a nɨ̀wɨghə̀, ntii ànwùə̀ nɨ à lə̀ nèrə̀nə a ghobə nɨ alyiʼə àŋwàʼnə̀ za nɨ a shwəŋə̀nə mbə̀ʼə mbyiinə̀ za nɨ ɨ̀mǔ lə̀ pənə nkɨrə̀ amwuə. Mbə̀ʼnə à lə̀ fuŋə̀nə a Ndòʼnə̀mbyə̂ alyiʼə ghu nɨ Nẅùə̀ Abràhamə̀, Nẅùə̀ Isàkə̀, pobə Yàkobə̀.

³⁸Tɨ̀tsòŋə̀ wə̀ ka a pə̀ e Nẅùə̀ pɨ̀kwuə̀, a Nẅùə̀ pànə̀ pɨ̀tɨ̀ŋnə̀. Ntiinə ŋwùə̀ ntsùmə̀ a chyə̂ ghù ntɨ̀ŋnə̀ la ambo ze.”

³⁹Pɨ̀nèrə̀ mbòomə pa pɨ̀tse lə̀ tyiʼə̀ nshwəŋə̀ lo, “Ɨ̀nèrə̀ ɨ̀nwùə̀, wə̀ kẅùə̀ ɨ̀shìʼnə̀!”

⁴⁰Ka ŋònə̀ ɨ̀tse a lə̀ chi mbyiitə̀ e a ye nɨ ànwùə̀ àtse.

⁴¹Yěsû a pyiitə̀ ghobə lo, “Pɨ shwəŋə̀ lo Ghù Ndzoʼnə wa a moonə̀ Dàfirə̀ lə ɨla?

⁴²Mbə̀ʼnə Dàfirə̀ àtwuə̀ ɨ̀pɨ̀ŋmə̀ e, à shwəŋə̀ amwuə àŋwàʼnə̀ Psalms lo, ‘Ndòʼnə̀mbyə̂ à shwəŋə̀ ambo Ndòʼnə̀mbyə̂ mə̀ lo: Nwuunə̀ a pàa àpô mɨ̀ŋə̀ yè zɨghə̀nə,

⁴³mbyàa nkwùə̀ nɨ ngǎ ghɨ̀rə̀ ngàŋə kɨpaanə ɨ̀zô pə a ɨ̀sùmə mɨ̀kwùə̀ ɨ̀mô.’

⁴⁴Nɨ ndwuumə̀ wə̀, Dàfirə̀ a tyiʼə̀ nfuŋə̀ e nɨ ‘Ndòʼnə̀mbyə̂’, a chyə̂ ntyiʼə̀ mbə moonə̀ e lə ɨla?”

⁴⁵Tsaʼnə pànə̀ pɨ̀tsùmə̀ lə̀ pənə nzhwiʼtə̀ ànwùə̀ nɨ a lə̀ mənə nshwəŋə̀ la, Yěsû shwəŋə̀ ambo ɨ̀zùŋə̀ ndzùmə̀ ɨ̀pe lo,

⁴⁶“Nɨ̀ zhìʼtə̀ a wɨghə mbə̀ʼə pɨ̀nèrə̀ mbòomə nɨ pobə pa nkòŋə̀ a nɨ ẅî ɨtsəʼə pɨ̀sàa nkarə̀ nɨ pèrə, nkɨ nkòŋə̀ lo pɨ chàʼtə̀ a ghobə nɨ àghuʼtə̀ alyiʼə mɨ̀tàanə, nkòŋə̀ a nɨ nwuunə̀ aŋunə ɨləŋə pɨ̀shìʼnə̀ amwuə mɨ̀ndâ mɨ àshwatə̀ pɨ̀Jew, nkɨ nkòŋə̀ a nɨ nwuunə̀ amwuə ɨlyiʼə pɨ̀shìʼnə̀ alyiʼə nɨ̀ghaʼà;

⁴⁷Pobə zhiʼə̀ pɨ̀kwùə pə̀ngyə̌, nkẅiirə̀ ɨ̀pwuumə̀ ɨ̀pobə nɨ mɨ̀ndâ ɨ̀mobə, mmə nfɨ̀kə̀ a ghobə nɨ ɨ̀chàʼtə̀ Nẅùə̀ pɨ̀sàa! Ngəʼə̀ nɨ ɨ̀ ghǎ tsirə̀ mbuurə̀ pànə̀ zə̀ ɨ̀ ghǎ tsàarə̀ mbô.”