Read Pinyin Lukə̀ 22 Bible Online

Lukə̀ 22 - Pinyin bible

Lukə̀ 22

¹Nkwùə̀ Nɨ̀ghaʼà Àpaanə̀ Tɨkoʼò ɨ̀ lə̀ paatə̀, nɨ pɨ lə̀ mənə nfuŋə̀ nɨ Àlàŋə̀ Mmyàʼtə̀.

²Pɨ̀fò màʼà Nẅùə̀ pobə pɨ̀nèrə̀ mbòomə lə̀ mə ntàʼà àlàŋə a nɨ nyaʼtə̀ nzhwuutə̀ Yěsû, ntiinə pobə lə̀ mənə mbô pə̀ənə̀.

³Satàanə̀ à lə̀ kwuunə̀ a ntɨŋmə̀ Yudà Iskaryòtə̀ nɨ à lə̀ pənə taʼà ŋwùə̀ amwuə ɨ̀zùŋə̀ ndzùmə̀ Yěsû pa ntsòbə̀ ɨpaa.

⁴Lenəla, Yudà a ghə̀ mbyantə̀ pobə pɨ̀fò màʼà Nẅùə̀ nɨ pɨ̀mbyabə̀ Ndâ Mɨ̀shwàʼà Nẅùə̀ tsaʼnə ǎ shwùunə̀ Yěsû ambo pobə.

⁵Pobə lə̀ pə nɨ nɨ̀ghaʼà ntyiʼə̀ nkaʼà a nɨ ŋâ e nɨ nkabə̀.

⁶À lə̀ pyiimə̀ pobə pɨ pobə ntyiʼə̀ mmə ntàʼà ɨ̀sàanə̀ a nɨ ŋâ Yěsû ambo pobə nkwùə̀ nɨ ka àpùŋə̀ pə̀ənə̀ a pə pə e alyiʼə ghu.

⁷Njyə̂ nɨ̀ghaʼà a nɨ zɨghə̀ Àpaanə̀ Tɨkoʼò ɨ̀ lə̀ kùʼù, zhyə̂ nɨ pɨ lə̀ mənə nkyiimə̀ mɨ̀mbyə̂ mɨ nɨ̀ghaʼà Àlàŋə̀ Mmyàʼtə̀.

⁸Yěsû a tsàa Pità pobə Jònə, nshwəŋə̀ ambo pobə lo, “Nɨ lèrə̀, ngə̀ ntsùŋə̀ mɨ̀zɨghə̀ mə pobə ɨ̀pwuumə̀ ɨ̀tsùmə̀ ambo pə̀ənə̀ a nɨ zɨghə̀.”

⁹Pobə pyiitə̀ e lo, “Wə̀ tàʼà lo pəə ghə̀ ntsùŋə̀ alyiʼə zə la ɨghə?”

¹⁰A kẅùə̀ lo, “Tsaʼnə nɨ̌ mə nkwuunə̀ a mbòmpə àlaʼà Yèrusalèmə̀ nɨ̌ tsirə̀ a ŋònə̀ nɨ à pìʼnə nɨkɨŋə nɨ nchyə. Nɨ̀ zùŋə̀ e ngə̀ nkwuunə̀ amwuə ndâ nɨ ǎ kwuunə̀.

¹¹Nɨ̀ kwuunə̀ nɨ̀ shwəŋə̀ ambo ngàŋə̀ ndâ lo, ‘Ɨ̀nèrə̀ ɨ̀nwùə̀ à wə̀ mbyiitə̀ o lo, ntaŋə pɨ̀ghɨ̀ɨnə̀ wa nɨ mbə̀ʼə pəə pɨ ɨ̀zùŋə̀ ndzùmə̀ ɨ̀pâ zɨghə̀ mɨ̀zɨghə̀ mɨ Àlàŋə̀ Mmyàʼtə̀ ghu la ɨghə?’

¹²À pɨ nèrə̀ a wɨghə nɨ ntaŋə ghù ẅùunə a àtɨ̀ghə aŋunə ndâ nɨkaŋə nɨ àzwuumə̀ àtsùmə̀ amwuə, nɨ̂ tsùŋə̀ a mèrə alyiʼə ghu.”

¹³Pobə lə̀ lèrə̀ ndzəənə̀ àzwuumə̀ àtsùmə̀ tyìʼə̀ tsaʼnə à lə̀ shwəŋə̀nə a ghobə. Lenəla pobə tyiʼə̀ ntsùŋə̀ mɨ̀zɨghə̀ mɨ Nɨ̀ghaʼà Àlàŋə̀ Mmyàʼtə̀.

¹⁴Nkwùə̀ ɨ̀ lə̀ kùʼù, Yěsû a nwuunə̀ aŋunə tepèrə̀ pobə ngàŋə ntwuumə̀ ɨ̀ze,

¹⁵nshwəŋə̀ ambo pobə lo, “Ǹtàʼà mə a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀ mə pə̀ənə̀ zaʼà pòŋə̀ zəənə̀ ngəʼə̀.

¹⁶Ǹshwəŋə̀ a wɨghə lo, ka m̀bə chi zɨghə̀ mə̀ a mèrə tə pyàa tsaʼnə ànwùə̀ Nɨ̀fò Nẅùə̀ a ghǎ tô.”

¹⁷Lenəla, à lə̀ pìʼì ndoŋə̀ mɨ̀lùʼù, ŋŋâ a mɨyàa ambo Nẅùə̀ nshwəŋə̀ lo, “Nɨ̀ kò nnô nkẅemnə̀.

¹⁸Ka mbə chi nô mə̀ mɨ̀lùʼù mə tə mbyàa nkwùə̀ nɨ ànwùə̀ Nɨ̀fò Nẅùə̀ a ghǎ tô.”

¹⁹À lə̀ piinə̀ àpaanə̀ ŋŋâ a mɨyàa ambo Nẅùə̀ mbiʼtə̀ a zèrə, ŋŋâ ambo pobə, nshwəŋə̀ lo, “Lə̌ mbɨ̀ŋmə̀ mə̀ nɨ ŋ̀ŋânə àtwuə̀ nɨ pɨghə. Nɨ̀ tyiʼə̀ mmə ngɨ̀rə̀ a lenə, a nɨ kẅempə̀ mə̀.”

²⁰Tyìʼə̀ amwuə ndwuumə̀ ghu, a ŋâ ndoŋə̀ ghu ambo pobə nkwùə̀ nɨ pɨ lə̀ zɨghə̀nə mmyàanə̀ la. Nshwəŋə̀ lo, “Ndoŋə̀ zə̀ lə̌ ɨ̀kàanə̀ ghù shwuə̀ nɨ Nẅùə̀ à wàrə̀nə àtwuə̀ nɨ pɨghə nɨ àləəmə̀ mə̀ nɨ a kẅìnə̀nə àtwuə̀ nɨ pɨghə la.

²¹La, nɨ̀ naŋə̀! Ẅùə̀ nɨ à pɨ shwùunə̀ mə̀ a wə̀ aŋunə tepèrə̀ pəə ze.

²²Mɨ̀ŋə̀ moonə̀ ŋwùə̀ mbɨ kwɨghə̀ tsaʼa Nẅùə̀ à lə̀ nùŋə̀nə a lenə. La ngəʼə̀ noʼnə ɨ ghǎ pə aŋunə ŋònə̀ nɨ à shwùunə̀nə e la.”

²³Ɨ̀zùŋə̀ ndzùmə̀ ɨ̀pe pìʼnə̀ a nɨ pyiitə̀ a tɨ̀tɨ̀rə̀ pobə lo lə̌ ɨ̀wə̌ nɨ à pɨ ghɨ̀rə̀ a zə ànwùə̀?

²⁴Àtànkə̀ a lə̀ furə̀ a tɨ̀tɨ̀rə̀ pobə lo, a ghǎ pə ɨ̀wə̌ pə̀ ŋònə̀ ngẅùunə nkwùə̀ nɨ ànwùə̀ Nɨ̀fò Nẅùə̀ a ghǎ tô.

²⁵Yěsû a shwəŋə̀ ambo pobə lo, “Amwuə àtwuə̀ ɨ̀shyə̂ ghə̀, pɨ̀fò pɨ àlaʼà pa nɨ ɨ̀tɨ̀ŋnə̀ nkɨ mmə mbuʼtə̀ pə̀ənə̀ ɨ̀pobə, ɨ̀twuə̀ àlaʼà kɨ nchi mbyiimə̀ nɨ̀linə̀ lo pɨ̀swùə pɨ pə̀ənə̀.”

²⁶La ka pə e a lenə a tɨ̀tɨ̀rə̀ pɨghə, mbòŋə̀ lo, ŋònə̀ ngẅùunə amwuə pɨghə â tyiʼə̀ tsaʼa mɨnkɨ̂. Ŋònə̀ nɨ à pənə àtwuə̀ pɨghə â tyiʼə̀ mbə tsaʼa ngàŋə̀ àfàʼà

²⁷A ɨ̀wə̌ mbə ŋònə̀ ngẅùunə, ẅùə̀ nɨ à nwuunə̀nə lo zɨghə̀ e kə̀ ẅùə̀ nɨ à pɨ ŋâ mɨ̀zɨghə̀? Ka à pə e ẅùə̀ wa nɨ à nwuunə̀nə àtwuə̀ tepèrə̀ la? La ǹkùmə̀ mbə a tɨ̀tɨ̀rə̀ pɨghə la tsaʼa ngàŋə̀ àfàʼà.

²⁸Pɨghə la pànə̀ pa nɨ nɨ̀ lə̀ pənə pə̀ənə̀ amwuə nkwùə̀ ntòmnə̀ mə̀.

²⁹Tsaʼnə Tǎ ɨwəə à lə̀ ŋânə ɨ̀tɨ̀ŋnə̀ ambo mɨ̀ŋə̀ a nɨ puʼtə̀ àtwuə̀ ɨ̀shyə̂ zə̀, mbɨ kɨ ŋâ ɨ̀tɨ̀ŋnə̀ ghu ambo pɨghə,

³⁰mbə̀ʼə nɨ tyiʼə̀ ndzɨghə̀, nnô aŋunə tepèrə̀ amwuə ànwùə̀ nɨ̀fò mə̀, kɨ chi nwuunə̀ aŋunə ɨləŋə nɨ̀fò pa ntsòbə̀ ɨpaa àtwuə̀ mɨ̀ngẅàrə̀ mɨ Israel.

³¹“Shimùnə̀, Shimùnə̀ naŋə̀, Satàanə̀ a loonə̀ mə ɨ̀sàanə̀ a nɨ zhwiʼì a wɨghə fuukə̀ pànə̀ pɨ̀shìʼnə̀ amwuə pɨ tɨ̀pòŋə̀.

³²La, ǹchàʼtə̀ mə Nẅùə̀ àtwuə̀ ghò, Shimùnə̀, lo kò àpyiimə̀ o a porə̀. La nkwùə̀ nɨ wə̀ kẅirə̀nə nkwə̂ o ambo mɨ̀ŋə̀ wə̀ tyiʼə̀ ntaŋnə̀ a nɨ pə̀ʼkə̀ mɨ̀ntɨŋmə̀ mɨ pɨlyimə ɨ̀pô.”

³³Pità a kẅùə̀ lo, “Ndòʼnə̀mbyə̂, ǹchuʼtə̀ mə a nɨ lèrə̀ pùu a ɨ̀tsaŋə̀ kə̀ a nɨ kwɨghə̀ pùu.”

³⁴A kẅùə̀ lo, “Ǹshwəŋə̀ ambo ghò Pità, ankəʼə ǎ kɨ toŋə̀ sìnə̀ wə̀ ghò twuunə̀ mə̀ nkwùə̀ ɨtarə lo ka wə̀ zhyə̂ o a gha.”

³⁵Nkwùə̀ ghu, Yěsû a pyiitə̀ ghobə lo, “Nkwùə̀ nɨ ndə̀ tsàanə a wɨghə àpyìinə tɨ məpàamə̀ kə̀ àpàamə̀, kə̀ ɨtabə, tə nɨ̀ lə̀ puŋə̀ àzwuumə̀ ɨ̀tse?” Pobə kẅùə̀ lo, “Ka pəə lə̀ puŋə̀ a wəə àzwuumə̀ àtse.”

³⁶A shwəŋə̀ ambo pobə lo, “La tɨ̀tsòŋə̀, ŋònə̀ nɨ à pənə nɨ məpàamə̀ â lòo a ẅèrə, farə àpàamə̀. La ŋònə̀ nɨ ka à pə e nɨ mɨnẅuə ntsòo, â shwùunə̀ a atsəʼə e ndzwuunə̀ a taʼà.

³⁷Ngwə̀ nshwəŋə̀ ambo pɨghə lo ànwùə̀ zə̀ nɨ àŋwàʼnə̀ Nẅùə̀ a lə̀ shwəŋə̀nə mbə̀ʼə mə̀ la, a pɨ lòo alyiʼə lo, ‘Pɨ lə̀ shaŋə̀ e aŋunə ngàŋə̀ ngɨ̀rə̀ ɨ̀nwùə̀ tɨ̀pòŋə̀,’ ntii ànwùə̀ nɨ pɨ lə̀ ŋwàʼnə̀nə mbə̀ʼə mə̀ a zə ntô pwùumə̀.”

³⁸Ɨ̀zùŋə̀ ndzùmə̀ ɨ̀pe shwəŋə̀ lo “Zəənə̀! Ndòʼnə̀mbyə̂ Yěsû, pɨ̀mɨnẅuə pɨ ntsòo pɨpaa pə a nɨ̀ghə̂.” A kẅùə̀ ambo pobə lo, “Â kùʼù!”

³⁹Yěsû a furə̀ tsaʼnə à lə̀ pyə̀nə mmə ngɨ̀rə̀, ndèrə̀ aŋunə Mbarə̀ Olìvə̀, ɨ̀zùŋə̀ ndzùmə̀ ɨ̀pe zùŋə̀ e pobə pɨ pobə koʼò ndèrə̀ ghu.

⁴⁰Nkwùə̀ nɨ à lə̀ pyàanə alyiʼə ghu à lə̀ shwəŋə̀ ambo pobə lo nɨ̀ mə nchàʼtə̀ a Nẅùə̀ mbə̀ʼə nɨ̀ kunə̀ amwuə àkwàʼnə̀ Satàanə̀.

⁴¹Lenəla à lə̀ mìntə̀ e a nɨ̀pwùnə pobə, ntə̂ mɨ̀kwìʼtə ɨ̀me a ɨ̀shyə̂ nchàʼtə̀ a Nẅùə̀,

⁴²nshwəŋə̀ lo, “Tǎ, wə̀ tə mbəla nkòŋə̀, wə̀ kẅiirə̀ ndoŋə̀ ngəʼə̀ zə̀ ambo mɨ̀ŋə̀. La a pə amwuə ndwuumə̀ nɨ wə̀ tàʼnə, kò a pə e amwuə ɨ̀ghâ ndwuumə̀.”

⁴³Lenəla angèrə̀ a furə̀ a nɨ̀pwuurə̀ ntô ambo ze mbə̀ʼkə̀ ntɨŋmə̀ e.

⁴⁴Yěsû à lə̀ tyiʼə̀ mbə amwuə àkwàŋə̀ yè noʼnə aŋunə ntòmnə̀ yɨ̀noʼnə nɨ ɨ̀ zə ntô, nkyiitə̀ ndàŋə̀ nɨ mbyə̀ nchàʼtə̀ a Nẅùə̀ nɨ ntɨŋmə̀ e ɨ̀tsùmə̀, àlyìʼnə̀ e a tapə̀ a ɨ̀shyə̂ tsaʼa àləəmə̀.

⁴⁵Nkwùə̀ nɨ à lə̀ lòonə a ɨ̀shyə̂ aŋunə àchàʼtə̀ Nẅùə̀ la, à lə̀ kẅirə̀ ndèrə̀ ambo ɨ̀zùŋə̀ ndzùmə̀ ɨ̀pe, ntsirə̀ a ghobə pobə mə ndyə̂ ntii àsòmnə̀ nɨ a lə̀ pənə amwuə pobə a lə̀ ghɨ̀rə̀ mɨ̀ntɨŋmə̀ ɨ̀mobə porə̀.

⁴⁶Yěsû a pyiitə̀ a ghobə lo, “a ghɨ̀rə̀ àkə nɨ tə ndyə̂? Nɨ̀ lòo a ɨ̀shyə̂ nchàʼtə̀ a Nẅùə̀ mbə̀ʼə nɨ̀ kunə̀ amwuə àkwàʼnə̀ Satàanə̀.”

⁴⁷Tsaʼa Yěsû a pirə̀ mə nshwəŋnə̀ la, àpùŋə̀ pə̀ənə̀ a tô nɨ Yudà a mbyə̀. Mbə taʼà ŋwùə̀ amwuə ɨ̀zùŋə̀ ndzùmə̀ ɨ̀pe ntsòbə̀ ɨpaa. A koʼò ntô ambo Yěsû nnyoŋə̀ mɨ̀ghə̀ʼə̀ ɨ̀me.

⁴⁸Yěsû a shwəŋə̀ ambo ze lo, “Yudà! Wə̀ pɨ shwùunə̀ a moonə̀ ŋwùə̀ la a nɨ nyoŋə̀ mɨ̀ghə̀ʼə̀ ɨ̀me?”

⁴⁹Nkwùə̀ nɨ ɨ̀zùŋə̀ ndzùmə̀ Yěsû lə̀ zəənə̀nə ànwùə̀ nɨ a zə ntô ghɨ̀rə̀, pobə pyiitə̀ lo, “Ndòʼnə̀mbyə̂ pəə zòŋnə̀ nɨ pɨ̀mɨnẅuə pɨ ntsòo ɨ̀pəə?”

⁵⁰Lenəla taʼà ŋwùə̀ ɨghobə a kəʼə̀ àpùʼù àtwuə̀ pɨ̀fò màʼà Nẅùə̀ ndə̂ nɨtugrə ɨ̀tse tsɨ̀ zɨghə̀nə.

⁵¹La Yěsû a shwəŋə̀ lo, “A kùʼù.” Lenəla à lə̀ zùŋə̀ mbarəkə̀ nɨtugrə nɨ ŋònə̀ ghu mbarə̀ e.

⁵²Yěsû a pyiitə̀ ambo pɨ̀fò màʼà Nẅùə̀ pobə pɨ ngàŋə̀ àfàʼà Ndâ Mɨ̀shwàʼà Nẅùə̀ ghobə pɨ̀lɨ̀ŋmə̂ nɨ pɨ tônə lo kô e lo, “Nɨ̀ tô nɨ mɨ̀nẅùə pobə mɨ̀pòrə̀ lo kô mə̀ tsaʼa ɨ̀ndzə̀ərə̀?

⁵³Ndə̀ pə pə̀ənə̀ amwuə Ndâ Mɨ̀shwàʼà Nẅùə̀ njyə̂ ɨ̀tsùmə̀ ka nɨ̀ kô wɨghə gha, la lə̌ nkwùə̀ ɨzɨghə, mbə nkwùə̀ nɨ mɨ̀tɨ̀ŋnə̀ mɨ ndzùmə mə̀ fàʼà.”

⁵⁴Lenəla pànə̀ pə lə̀ kô a Yěsû, ndòo e ngə̀ a ndâ àtwuə̀ pɨ̀fò màʼà Nẅùə̀. Pità à lə̀ mə ndzùŋə̀ a ghobə a ndzùmə̀ ndzùmə̀.

⁵⁵La nkwùə̀ nɨ pɨ lə̀ chwùə̀nə ɨ̀mǔ a tɨ̀tɨ̀rə̀ àtɨ̀taa àtwuə̀ pɨ̀fò màʼà Nẅùə̀ wə̀ lo pànə̂ zô, Pità à lə̀ ghə̀ nnwuunə̀ a ɨ̀shyə̂ pobə pɨ pobə.

⁵⁶Ngàŋə̀ àfàʼà àtwuə̀ pɨ̀fò màʼà Nẅùə̀ nɨ à lə̀ pənə mə̀ngyə̌ a zəənə̀ a Pità a nwuunə̀ a nɨ̀pwùnə ɨ̀mǔ wə̀. A tsùŋə̀ nnaŋə̀ e ɨ̀shìʼnə̀ nshwəŋə̀ lo, “Ŋònə̀ wə̀ à lə̀ pə pobə Yěsû.”

⁵⁷Pità a làʼnə̀ ànwùə̀ ghu nshwəŋə̀ lo, “Mə̀ngyə̌, ka ǹzhyə̂ mə̀ a ye.”

⁵⁸A kɨ pə tyìʼə̀ aŋunə mətùmə nkwùə̀ lə, ŋònə̀ ɨ̀tse a kɨ nchi ndzəənə̀ e, nshwəŋə̀ lo, “Ghò la taʼà ŋwùə̀ amwuə pobə.” Pità a kẅùə̀ lo, “Ndɨ̀ŋmə̂, ka mbə mə̀.”

⁵⁹A kɨ chi pə tyìʼə̀ aŋunə mətùmə nkwùə̀, ghùtse ŋwùə̀ a kẅirə̀ nshwəŋə̀ nɨ ngyə̀ ntɨ̀ŋnə̀ lo, “A nkǔŋə nkuŋə, ŋònə̀ wə̀ à lə̀ pə pobə ze, ntiinə à pənə ŋwùə̀ Galìlyə̂.”

⁶⁰Pità a kẅùə̀ lo, “Tǎ ka ǹzhyə̂ mə̀ ànwùə̀ nɨ wə̀ wə̀ nshwəŋə̀ lə.” Tsaʼnə à lə̀ pirə̀nə mmə nshwəŋnə̀ la, ankəʼə a toŋə̀.

⁶¹Ndòʼnə̀mbyə̂ a pə̀ŋə̀ nnaŋə̀ a Pità. Lenəla a kẅempə̀ àshwəŋnə̀ Ndòʼnə̀mbyə̂ nɨ à lə̀ shwəŋnə̀ ambo ze lo, “Ankəʼə ǎ kɨ toŋə̀ sìnə̀, wə̀ twuunə̀ mə̀ nkwùə̀ ɨtarə.”

⁶²Pità à lə̀ lòo nfurə̀ ngyìi tə nswuʼə̀.

⁶³Pànə̀ nɨ pɨ lə̀ pənə mbyabə̀ Yěsû lə̀ nyèŋə̀ e nkɨ mbuʼù e.

⁶⁴Pɨ lə̀ korə̀ ɨ̀myə̂ ɨ̀me nshwəŋə̀ lo, “Səʼə̀ a ŋònə̀ nɨ a tsòonə o?”

⁶⁵Pɨ lə̀ nshwəŋə̀ mɨ̀nwùə̀ mɨ̀noʼnə ambo ze a nɨ tsə̀ŋə̀ ntɨŋmə̀ e.

⁶⁶Njyə̂ ɨ̀ lə̀ laanə̀, pɨ̀lɨ̀ŋmə̂ pɨ àlaʼà, nɨ pɨ̀fò màʼà Nẅùə̀ pobə pɨ̀nèrə̀ mbòomə shwatə̀, pɨ lòo a Yěsû ntô a mbyə̀ Kansèrə̀.

⁶⁷Pobə shwəŋə̀ lo, “Ghò la Ghù Ndzoʼnə wa? Shwəŋə̀ pəə zuʼù.” Yěsû a kẅùə̀ lo, “Ǹtə mbə lə nshwəŋə̀ a wɨghə nɨ̀ pyiimə̀ a wɨghə apə̀;

⁶⁸Ǹtə nkɨ mbə lə mbyiitə̀ a wɨghə nɨ àpyiitə̀, nɨ̀ kẅùə̀ a wɨghə apə̀.

⁶⁹La a nɨ pìʼnə̀ tɨ̀tsòŋə̀, Moonə̀ Ŋwùə̀ à pɨ nwuunə̀ a pàa àpô Nẅùə̀koʼò yè zɨghə̀nə.”

⁷⁰Pobə pɨ̀tsùmə̀ pyiitə̀ lo, “Ghò lanə nshwəŋə̀ la lo ghǒ Moonə̀ Nẅùə̀?” A kẅùə̀ lo, “Nɨ̀ shwəŋə̀ a lenə.”

⁷¹Pobə shwəŋə̀ lo, “Ka pə̀ənə̀ chi ntàʼà a wəənə̀ pɨ̀ndzəənə̀ zəənə̀nə pɨ̀tse mbə̀ʼə ànwùə̀ zə̀, pə̀ənə̀ zuʼù a ntswùə̀ ze.”