Read Pinyin Lukə̀ 23 Bible Online

Lukə̀ 23 - Pinyin bible

Lukə̀ 23

¹Ŋwùə̀ ntsùmə̀ nɨ à lə̀ pənə amwuə Kansèrə̀ à lə̀ lòo a ɨ̀shyə̂, ndòo a Yěsû ndèrə̀ a mbyə̀ Palètə̀.

²Pobə tyiʼə̀ mbìʼnə̀ a nɨ ẅìimə̀ e, nshwəŋə̀ lo, “Pəə kô a ŋònə̀ wə̀ a mə ntsə̀ŋə̀ ɨ̀twuə̀ pə̀ənə̀ amwuə àlaʼà ghə. Ndzòŋə̀ a wəə lo kò pəə twuə̀ pɨ̀taghə̀ ambo Kaasà, nchi mmə nshwəŋə̀ lo à chyə̂ mbə Ghù Ndzoʼnə wa nkɨ mbə ɨ̀fò.”

³Lenəla Palètə̀ a pyiitə̀ e lo, “Ghò la ɨ̀fò pɨ̀Jew?” A kẅùə̀ lo, “Wə̀ shwəŋə̀ a lenə.”

⁴Palètə̀ a tyiʼə̀ nshwəŋə̀ ambo pɨ̀fò màʼà Nẅùə̀ pobə pɨ àpùŋə̀ pə̀ənə̀ lo, “Ka ǹdzəənə̀ mə̀ àwɨ̀ghə̀ ànwùə̀ ŋònə̀ wə̀.”

⁵Pobə tyiʼə̀ nshwəŋə̀ nɨ mɨ̀tɨ̀ŋnə̀ lo, “À pə̀ŋə̀ ɨ̀twuə̀ pə̀ənə̀ amwuə àlaʼà Judyà àtsùmə̀. À lə̀ pìʼnə̀ a Galìlyə̂ tsaʼnə à pyàa mə a nɨ̀ghə̂ lə.”

⁶Nkwùə̀ nɨ Palètə̀ a lə̀ zuʼnə mɨ̀nwùə̀ nɨ Yěsû a lə̀ ghɨ̀rə̀nə la, a pyiitə̀ lo, “Ŋònə̀ wə̀ la ŋwùə̀ Galìlyə̂?”

⁷Tyìʼə̀ tsaʼnə Palètə̀ à lə̀ zhyə̂nə lo à furə̀ a Galìlyə̂ amwuə pàa àlaʼà Heròdə̀ la, à lə̀ tsàa e ambo ze nɨ à lə̀ pənə a Yèrusalèmə̀ nkwùə̀ ghu.

⁸Heròdə̀ à lə̀ ghaʼà ka mɨ̀zùŋə nkwùə̀ nɨ à lə̀ zəənə̀nə a Yěsû, ntiinə à lə̀ pyə̀nə ntàʼà a nɨ zəənə̀ e aŋunə ntyə̌ sàa, ntyiʼə̀ mmə nkwàŋə̀ a nɨ zəənə̀ ɨ̀lènə̀ ɨ̀nwùə̀ pɨ̀tse nɨ ǎ ghɨ̀rə̀ ntiinə à pyə̀ mə ndzuʼù mɨ̀nwùə̀ mbə̀ʼə e.

⁹Lenəla, Heròdə̀ pyiitə̀ Yěsû nɨ mɨ̀nwùə̀ mɨ̀noʼnə; la ka a kẅùə̀ e a yètse.

¹⁰Pɨ̀fò màʼà Nẅùə̀ nɨ pɨ̀nèrə̀ mbòomə lə̀ koʼò ntəəmə̀ a mbyə̀, ntəəmə̀ ntɨ̀ŋnə̀ aŋunə mɨ̀nwùə̀ nɨ pɨ lə̀ ẅìimə̀nə a Yěsû aŋunə la.

¹¹Heròdə̀ pobə pɨ̀soyì ɨ̀pe ẅìi Yěsû ntyiʼə̀ nnyèŋə̀ e. Pobə lə̀ màʼà atsəʼə nɨ̀fò aŋunə ze nkẅirə̀ ntsàa e ambo Palètə̀.

¹²Heròdə̀ pobə Palètə̀ tyiʼə̀ mbə pɨ̀swùunə a nɨ furə̀ njyə̂ ghu ntiinə pobə lə̀ pyə̀nə mbə nɨ kɨpaanə a tɨ̀tɨ̀rə̀ pobə.

¹³Nkwùə̀ nɨ Yěsû à lə̀ kẅirə̀nə ndèrə̀ ambo Palètə̀ la, Palètə̀ a shwatə̀ pɨ̀fò màʼà Nẅùə̀, pànə̀ nɨ pobə pa mbuʼtə̀ ɨ̀laʼà pobə pə̀ənə̀,

¹⁴nshwəŋə̀ ambo pobə lo, “Nɨ̀ tô nɨ ŋònə̀ wə̀ ambo mɨ̀ŋə̀ tsaʼa ŋònə̀ nɨ à mənə ntsə̀ŋə̀ ɨ̀twuə̀ pə̀ənə̀, ǹkùmə̀ nshàrə̀ e ɨ̀shìʼnə̀ a mbyə̀ pɨghə, ka zəənə̀ mə̀ àwɨ̀ghə̀ ànwùə̀ nɨ nɨ̀ wə̀ nshwəŋə̀ mbə̀ʼə e lə.

¹⁵Ka Heròdə̀ à lə̀ kɨ ndzəənə̀ e ànwùə̀ nɨ à wɨ̀ghə̀nə, ntiinə à kẅirə̀nə ntsàa e ambo pə̀ənə̀. Nɨ̀ zəənə̀ ka à ghɨ̀rə̀ e ànwùə̀ àtse nɨ mbə̀ʼə pɨ zhwuutə̀ e.

¹⁶Mbɨ kəʼə̀ e ɨ̀shìʼnə̀ myàʼtə̀ e.”

¹⁷[Amwuə nkwùə̀ Nɨ̀ghaʼà Àlàŋə̀ Mmyàʼtə̀ ntsùmə̀ pɨ̀Jew lə̀ mə ntsoʼò a taʼà ngàŋə̀ ɨ̀tsaŋə̀ ẅùə̀ nɨ Palètə̀ ǎ tyiʼə̀ fuukə̀ mmyàʼtə̀ â lèrə̀.]

¹⁸La pobə pɨ̀tsùmə̀ yìi nɨ ɨ̀tɨ̀ŋnə̀ lo, “Zhwuutə̀ a ŋònə̀ wə̀ nfuukə̀ Barabbas ŋŋâ ambo pəə.”

¹⁹Pɨ lə̀ chyâ a Barabbas amwuə nkaʼà ɨ̀tsaŋə̀ ntiinə à lə̀ kùmə̀nə ndumə amwuə mbòmpə àlaʼà nzhwuutə̀ ŋwùə̀.

²⁰Palètə̀ à lə̀ pə nɨ àkwàŋə̀ a nɨ myàʼtə̀ Yěsû, lenəla nkẅirə̀ ndəpə̀ a ghobə.

²¹La pobə kɨ nkyiinə̀ kyiinə̀nə lo, “Kẅùumə̀ e aŋunə àtɨ̀ghə pànkə̀nə.”

²²Palètə̀ a shwəŋə̀ ambo pobə aŋunə nòmbàa nkwùə̀ ɨtarə lo, “À ghɨ̀rə̀ àkə nɨ a pɨ̂nə? Ka ǹdzəənə̀ mə̀ ɨ̀sùmə nɨ mbə̀ʼə pɨ zhwuutə̀ e aŋunə. Njiilo mbɨ kəʼə̀ e ɨ̀shìʼnə̀ myàʼtə̀ e â lèrə̀.”

²³La pobə kɨ nkyiinə̀ kyiinə̀nə nɨ ngyə̀ ntɨ̀ŋnə̀ mmə nshwəŋə̀ lo pɨ̀ kẅùumə̀ a Yěsû aŋunə àtɨ̀ghə pànkə̀nə. Àzhwùə̀ àzobə a tyiʼə̀ nzhyiʼə̀ a Palètə̀

²⁴Lenəla Palètə̀ a pyiimə̀ ambo pobə lo pobə̂ zhwuutə̀ a Yěsû.

²⁵À lə̀ myàʼtə̀ a Barabbas ŋònə̀ nɨ pɨ lə̀ chyânə a nkaʼà ɨ̀tsaŋə̀ ntiinə à lə̀ kùmə̀nə ndumə nkɨ nzhwuutə̀ a ŋwùə̀ a nɨ zùŋə̀ tsaʼnə pobə lə̀ pyiitə̀nə. La ngə̀ aŋunə Yěsû, a ŋâ e ambo pobə lo fàʼà tsaʼnə pobə tàʼnə.

²⁶Tsaʼnə pɨ̀soyì lə̀ lòonə e mmə ndèrə̀, pobə lə̀ tsirə̀ a Shimùnə̀ ŋwùə̀ Sìrenə̀ nɨ à lə̀ pirə̀nə mmə nkwuunə̀ a Yèrusalèmə̀. Pobə lə̀ kô e ngɨ̀rə̀ a pìʼì àtɨ̀ghə pànkə̀nə ndzùŋə̀ a Yěsû.

²⁷Àpùŋə̀ pànə̀ pɨ̀noʼnə a lə̀ zùŋə̀ e farə pə̀ngyə̌ pyə̀ nɨ pɨ lə̀ mənə nsòmnə̀ ngyìi mbə̀ʼə e.

²⁸La Yěsû a pə̀ŋə̀ nshwəŋə̀ nɨ pobə lo, “Pə̀ngyə̌ pɨ Yèrusalèmə̀ kò nɨ yìi a wɨghə pə a gha, nɨ̀ yìi mbɨ̀ŋmə̀ ɨ̀zɨghə farə ɨ̀poonə̀ pɨghə.

²⁹Mbə̀ʼnə nkwùə̀ ɨ̀ zə̀ ntô nɨ nɨ̌ shwəŋə̀ lo, ‘Mborə̀ ɨ̀ chyə̂ ambo pɨ̀kǐ pə̀ngyə̌, nɨ mɨ̀pùmə̀ nɨ mɨ laʼa mə mbirə̀ e tɨ pyə̂, farə mbɨŋnə̀ nɨ mɨ laʼa mə nnyoŋə̀ e a moonə̀ apə̀.’

³⁰Pànə̀ ghǎ pìʼnə̀ a nɨ shwəŋə̀ ambo mɨ̀mbarə̀ nkwùə̀ ghu lo, ‘Zhiʼə̀ a wəə!’ farə ambo pɨ̀kòŋə̀ lo ‘Kẅupə̀ a wəə.’

³¹Pobə tə pəla ngɨ̀rə̀ mɨ̀nwùə̀ mə nkwùə̀ nɨ àtɨ̀ghə a pirə̀nə yè fî pobə ghǎ ntyiʼə̀ ngɨ̀rə̀ ɨla nkwùə̀ nɨ a zwuumə̀nə?”

³²Pɨ lə̀ kɨ ndòo ngàŋə ngɨ̀rə̀ ɨ̀nwùə̀ tɨ̀pòŋə̀ ɨ̀tse ɨpaa lo ghə̀ zhwuutə̀ pobə pɨ pobə.

³³Nkwùə̀ nɨ Pobə lə̀ tônə mbyàa a alyiʼə nɨ pɨ lə̀ mənə nfuŋə̀ nɨ “Àghòʼrə Àtwuə̀”, pobə lə̀ kẅùumə̀ a Yěsû pobə ngàŋə ngɨ̀rə̀ ɨ̀nwùə̀ tɨ̀pòŋə̀ yɨ̀tse ɨpaa aŋunə ɨ̀tɨ̀ghə pɨ̀pànkə̀nə. Taʼà a pə a pàa àpô Yěsû yè zɨghə̀nə, taʼà a kɨ mbə a pàa àpô yè kẅàbə̀.

³⁴Lenəla Yěsû a shwəŋə̀ lo, “Tǎ lə̀ənə̀ ɨ̀fàntə̀ ɨ̀nwùə̀ ɨ̀pobə, ntiinə ka pobə zhyə̂ a ghobə ànwùə̀ nɨ pobə pə̀ ngɨ̀rə̀”. Pobə màʼà ɨpirə a nɨ zhyə̂ tsaʼnə mbə̀ʼə pobə ghàbə̀ ɨtsəʼə ɨ̀pe.

³⁵Pànə̀ lə̀ təəmə̀ a nɨ̀pwùnə mmə nnaŋə̀, la ɨ̀twuə̀ àlaʼà mə ngẅìi e nshwəŋə̀ lo à lə̀ mə nchwarə̀ pànə̀ pɨ̀tse, â chwarə̀ ɨ̀pɨ̀ŋmə̀ e mbə̀ʼə a pə Ghù Ndzoʼnə wa nɨ Nẅùə̀ à lə̀ tsoʼnə la.

³⁶Pɨ̀soyì lə̀ nkɨ mə nnyèŋə̀ e mmə ŋŋâ mɨ̀lùʼù mɨ̀tɨ̀ŋnə̀ ambo ze,

³⁷mmə nshwəŋə̀ lo, “Wə̀ pə la mbə ɨ̀fò pɨ̀Jew wə̀ chwarə̀ ɨ̀pɨ̀ŋmə̀ o.”

³⁸Pobə lə̀ lòo àpàa àtɨ̀ghə ŋŋwàʼnə̀ aŋunə lo; “LƏ̌ Ɨ̀FÒ PƗ̀JEW” mbaanə̀ aŋunə àtɨ̀ghə pànkə̀nə àtwuə̀ ze.

³⁹Taʼà ngàŋə̀ ngɨ̀rə̀ ɨ̀nwùə̀ tɨ̀pòŋə̀ nɨ pɨ lə̀ kẅùumə̀nə e pobə pɨ pobə la, à lə̀ mə ndzòomə̀ Yěsû mbyiitə̀ lo, “Ka wə̀ pə̀ o la Ghù Ndzoʼnə wa? Chwarə̀ ɨ̀pɨ̀ŋmə̀ o nkɨ nchwarə̀ a wəə.”

⁴⁰La ẅùə̀ ngàŋə̀ ngɨ̀rə̀ ɨ̀nwùə̀ tɨ̀pòŋə̀ a saʼà e nshwəŋə̀ lo, “Ka wə̀ pô o Nẅùə̀ lə ntiinə pɨ zhwuutə̀nə o tsaʼnə pɨ kɨnə nzhwuutə̀ e?

⁴¹La aŋunə pùu nkǔŋə nkuŋə; pùu pə mə nkẅiirə̀ la mɨ̀ntsoʼnə̀ mɨ àfàʼà ɨ̀mû aŋunə ngɨ̀rə̀ mɨ̀nwùə̀ ɨ̀zû. La ŋònə̀ wə̀ ka à fàntə̀ e ànwùə̀ àtse.”

⁴²A shwəŋə̀ ambo Yěsû lo; “Kẅempə̀ mə̀ a Yěsû nkwùə̀ nɨ wə̀ nwuunə̀nə aŋunə aləŋə Nɨ̀fò o.”

⁴³Yěsû shwəŋə̀ ambo ze lo, “Ǹshwəŋə̀ tyìʼə̀ nkǔŋə nkuŋə lo, sìnə̀ wə̀, wə̌ pə pùu a Paradise.”

⁴⁴A lə̀ pə tsaʼa ntɨ̀ŋnə̀ àzhwùunə, ndzùmə ɨ̀ sinə̀ nnàanə̀ àlaʼà àtsùmə̀ tə mbyàa a ndzə̀ŋə̀ nẅùumə̀, atsəʼə za nɨ a lə̀ pənə a tɨ̀tɨ̀rə̀ Ndâ Mɨ̀shwàʼà Nẅùə̀ la, a saanə̀ ɨ̀pàa ɨpaa.

⁴⁵

⁴⁶Yěsû a kyiinə̀ nɨ ngyə̀ ntɨ̀ŋnə̀, nshwəŋə̀ lo, “Tǎ ǹchyâ Àzhwùə̀ mə̀ amwuə mbô ɨ̀mô!” Nkwùə̀ nɨ à lə̀ shwəŋə̀nə la àzhwùə̀ e a ləənə̀.

⁴⁷Nkwùə̀ nɨ Àtwuə̀ pɨ̀soyì nkɨrə̀ a lə̀ zəənə̀nə ànwùə̀ nɨ a lòonə alyiʼə, à lə̀ ghuʼtə̀ a Nẅùə̀; nshwəŋə̀ lo, “A tyìʼə̀ nkǔŋə nkuŋə lo ŋònə̀ wə̀ à lə̀ pəla ŋònə̀ nɨ mɨ̀nwùə̀ ɨ̀me təəmə̀nə.”

⁴⁸Nkwùə̀ nɨ pànə̀ pɨ̀tsùmə̀ nɨ pɨ lə̀ shwatə̀nə a nɨ zəənə̀ ànwùə̀ nɨ a mənə ndàŋə̀, pobə lə̀ kwâ mbô ɨ̀mobə ngẅìimə̀ mɨ̀ntɨŋmə̀ ɨ̀mobə nɨ àsòmnə̀ nkwə̂ ghobə a ɨmwuə alyiʼə ɨ̀pobə.

⁴⁹Pànə̀ pɨ̀tsùmə̀ nɨ pɨ lə̀ zhyə̂nə a Yěsû pobə pə̀ngyə̌ pa nɨ pɨ lə̀ furə̀nə Galìlyə̂ ndzùŋə̀ e la, pobə lə̀ təəmə̀ a ndyə̌ sàa a nɨ zəənə̀ mɨ̀nwùə̀ mèrə mə̀.

⁵⁰Ŋònə̀ ɨ̀tse nɨ pɨ lə̀ mənə nfuŋə̀ nɨ Jòsebə̀ mbə ŋwùə̀ pɨ̀Jew nfurə̀ a Àrəmàtyâ, à lə̀ pə ŋònə̀ ɨ̀shìʼnə̀, mɨ̀nwùə̀ ɨ̀me kɨ ntəəmə̀ a kɨ mbə taʼà ŋwùə̀ Kansèrə̀.

⁵¹Ka a lə̀ pyiimə̀ e ànwùə̀ nɨ pobə lə̀ mənə ntàʼà a nɨ ghɨ̀rə̀ aŋunə Yěsû pobə zhyə̀ nɨ pobə lə̀ ghɨ̀rə̀nə, nkɨ mmə ntàʼà a nɨ zɨghə̀ ànwùə̀ Nɨ̀fò Nẅùə̀

⁵²Ŋònə̀ wə̀ à lə̀ ghə̀ ambo Palètə̀ ndoonə̀ lo mbə̀ʼə a lòo àkwuə̀ Yěsû lo.

⁵³À lə̀ tyiʼə̀ nshwuʼkə̀ àkwuə̀ Yěsû ndyibə̀ amwuə atsəʼə, nnùŋə̀ e amwuə nɨ̀shyə̀ nɨ pɨ tuŋə̀nə aŋunə nɨ̀ghòorə nɨ pɨ lə̀ tẅəŋə̀ mə e a ŋwùə̀ amwuə apə̀.

⁵⁴A lə̀ pə Njyə̂ nɨ pɨ lə̀ mənə ntsùnkə̀ ɨ̀pwuumə̀ njyə̂ ɨ̂ laanə̀ mbə Njyə̂ àlaʼà pɨ̀Jew,

⁵⁵pə̀ngyə̌ nɨ pobə pɨ Yěsû lə̀ furə̀nə a Galìlyə̂ lə̀ zùŋə̀ a Jòsebə̀, ngə̀ ndzəənə̀ nɨ̀shyə̀ nɨ pɨ lə̀ nùŋə̀nə àkwuə̀ e amwuə.

⁵⁶Lenəla, pobə lə̀ kẅirə̀ ndèrə̀ àlaʼà pobə ngə̀ ntsùŋə̀ ɨ̀pwuumə̀ àzhyǎ pɨ̀shìʼnə̀ pobə mɨ̀ghurə̀ mɨ àzhyǎ mɨ̀shìʼnə̀ a nɨ zoʼò àkwuə̀ Yěsû. Pobə lə̀ zhwùutə̀ aŋunə njyə̂ àlaʼà, a nɨ ndzùŋə̀ a mbòomə pɨ̀Jew.