Read Pinyin Lukə̀ 5 Bible Online

Lukə̀ 5 - Pinyin bible

Lukə̀ 5

¹A lə̀ pə njyə̂ ɨ̀tse Yěsû a təəmə̀ a nɨ̀pwùnə atəŋə nchyə Gennesaret, pànə̀ tyiʼə̀ mmə ntô nnyoomə̀ aŋunə ze a nɨ zhwiʼtə̀ àshwəŋnə̀ Nẅùə̀.

²À lə̀ zəənə̀ ɨ̀kànwuʼə ɨpaa nɨ pənə a nɨ̀pwùnə atəŋə ghu nɨ pɨ̀nkootə̀ ɨ̀swuə̀ lə̀ myàʼtə̀nə nfurə̀ ndèrə̀ a nɨ sùu ɨ̀làʼà ɨ̀pobə.

³Yěsû a kwuunə̀ amwuə taʼà àkànwuʼə wa yɨ̀tse, nɨ a lə̀ pənə yè Shimùnə̀ nshwəŋə̀ ambo ze lo â tinə̀ zèrə nfurə̀ a nɨ̀pwùnə atəŋə gha mmìntə̀ nkwuunə̀ amwuə atəŋə. Yěsû à lə̀ tyiʼə̀ nnwuunə̀ amwuə àkànwuʼə ntyiʼə̀ mmə nèrə̀ mɨ̀nwùə̀ ambo pànə̀ pa alyiʼə ghu.

⁴Nkwùə̀ nɨ Yěsû à lə̀ myàanə̀nə a nɨ nèrə̀ mɨ̀nwùə̀ mə, à lə̀ shwəŋə̀ ambo Shimùnə̀ lo, “Mìntə̀ ndèrə̀ amwuə alyiʼə yè mìnə̀nə ntsàa àlàʼà o mbə̀ʼə kô ɨ̀swuə̀.”

⁵Shimùnə̀ a kẅùə̀ ambo ze lo, “Masàa, pəə tə mə ntsòo mbɨ̀ŋmə̀ ɨ̀zəə nɨ ɨ̀twuʼə̀ ka kô wəə àzwuumə̀ àtse! La a tyiʼə̀ e zhyə̀ nɨ à shwəŋə̀nə ghò, mbɨ màʼà àlàʼà mə̀.”

⁶Pobə màʼà àlàʼà za amwuə nchyə nkwùə̀ ghu, nkô ɨ̀swuə̀ yɨ̀noʼnə tə àlàʼà za a tyiʼə̀ ntàʼà liitə̀.

⁷Pobə tyiʼə̀ nfuŋə̀ ngàŋə àkwùə̀ nɨ̀yìinə̀ ɨ̀zobə nɨ pobə lə̀ pənə amwuə pyə̀ ɨ̀kànwuʼə lo pobə̂ tô nkẅiirə̀ ghobə. Pobə tô ngyèmpə̀ nshwatə̀ ɨ̀swuə̀ ndẅenə̀ ɨ̀kànwuʼə pa tə pèrə tyiʼə̀ mmə ntàʼà ẅènə̀ pə amwuə nchyə.

⁸Nkwùə̀ nɨ Shimùnə̀ Pità à lə̀ zəənə̀nə ànwùə̀ ghu, à lə̀ kunə̀ aŋunə mɨ̀kẅìʼtə ɨ̀me a mbyə̀ Yěsû nshwəŋə̀ lo, “Lòo a nɨ̀pwùnə mɨ̀ŋə̀ mbǎ Ndòʼnə̀mbyə̂ ntiinə ǹchyə̂ mbə mə̀ la ngàŋə̀ ngɨ̀rə̀ ɨ̀nwùə̀ tɨ̀pòŋə̀!”

⁹À lə̀ shwəŋə̀ a lenə la ntiinə ànwùə̀ a lə̀ tumə̀nə ntswùə̀ e ghobə ngàŋə àkwùə̀ nɨ̀yìinə̀ ɨ̀ze, ntii ndùnə̀ ɨ̀swuə̀ nɨ pobə lə̀ kônə.

¹⁰Ànwùə̀ zèrə zə̀ a lə̀ kɨ ntumə̀ ntswùə̀ Jònə pobə Jemə̀ ɨ̀poonə̀ pɨ Zebedì nɨ pɨ lə̀ pənə ngàŋə àkwùə̀ nɨ̀yìinə̀ Shimùnə̀. Yěsû shwəŋə̀ ambo Shimùnə̀ lo, “Kò wə̀ mbô, a nɨ furə̀ tɨ̀tsòŋə̀ wə̀ wə̌ tyiʼə̀ kô la pə̀ənə̀.”

¹¹Pobə lə̀ sùŋə̀ ɨ̀kànwuʼə pobə pa nfurə̀ a sɨghə, mmyàʼtə̀ àzwuumə̀ àtsùmə̀, ndzùŋə̀ a Yěsû.

¹²A lə̀ pə njyə̂ ɨ̀tse nɨ Yěsû à lə̀ lèrə̀nə amwuə mbòmpə àlaʼà ngẅùunə za ɨ̀tse, ŋònə̀ ɨ̀tse a tô mbə ẅùə̀ nɨ àkɨ̀kẅinə a lə̀ zɨghə̀nə mbɨ̀ŋmə̀ e ntsùmə̀. Nkwùə̀ nɨ à lə̀ zəənə̀nə Yěsû, à lə̀ kunə̀ a mbyə̀ ze àkùbəkubə̀ mbuʼù mbô ambo ze nshwəŋə̀ lo, “Ndòʼnə̀mbyə̂, wə̀ tə nkòŋə̀ yi wə̌ parə̀ a mə̀ mbə̀ʼə mbɨ̀ŋmə̀ mə̀ laanə̀.”

¹³Yěsû a tsàa àpô e mbètə̀ e ghu, nshwəŋə̀ ambo ze lo, “Ǹkòŋə̀, mbɨ̀ŋmə̀ o ɨ̂ laanə̀!” Àkɨ̀kẅinə za a lə̀ zùŋə̀ mmyàʼtə̀ e, mbɨ̀ŋmə̀ e ɨ̀ laanə̀.

¹⁴Yěsû à lə̀ kwàtə̀ e lo, “Kò wə̀ shwəŋə̀ o ambo ŋònə̀ ɨ̀tse, la lèrə̀ ngə̀ nnèrə̀ ɨ̀pɨ̀ŋmə̀ o ambo ngàŋə̀ màʼà Nẅùə̀. Ŋŋâ àzwuumə̀ nɨ̀shwàʼà za a nɨ zùŋə̀ a mbòomə nɨ Mǔsî à lə̀ nùŋə̀nə a nɨ nèrə̀ ambo pànə̀ lo mbɨ̀ŋmə̀ o ɨ̀ laanə̀.”

¹⁵Yěsû à lə̀ patə nshwəŋə̀ pə a lenə la, ànwùə̀ zə mbə̀ʼə e a lə̀ sìimə̀ tə nsìimə̀. Àpùŋə̀ pə̀ənə̀ a tyiʼə̀ ntô a nɨ zhwiʼtə̀ ànwùə̀ nɨ à lə̀ mənə nnèrə̀ la; farə lo â parə̀ a ghobə.

¹⁶La Yěsû à lə̀ noʼò mmyàʼtə̀ pə̀ənə̀ ndèrə̀ alyiʼə nɨ ǎ pə ghu ze nɨ ze a nɨ chàʼtə̀ a Nẅùə̀.

¹⁷A pə njyə̂ ɨ̀tse amwuə mɨ̀njyə̂ mɨ̀ghu, Yěsû a mə nnèrə̀ ànwùə̀ Nẅùə̀, pɨ̀Farìsî pobə pɨ̀nèrə̀ mbòomə nɨ lə̀ furə̀nə amwuə mɨ̀kwurə̀ mɨ̀tsùmə̀ amwuə Galìlyə̂ nɨ Judyà pobə Yèrusalèmə̀ lə̀ pə ghu. Yěsû à lə̀ pə nɨ ɨ̀tɨ̀ŋnə̀ Ndòʼnə̀mbyə̂ a nɨ parə̀ a nɨ̀ghòonə̀.

¹⁸Nkɨ wùutə̀ pànə̀ pɨ̀tse tô ndəŋə̀ ŋwùə̀ aŋunə ɨ̀kwùunə nɨ pàa mbɨ̀ŋmə̀ e ɨ̀tse à lə̀ kwɨghə̀nə. Pobə lə̀ mə ntàʼà àlàŋə nɨ mbə̀ʼə pobə kwuunə̀ a ndâ gha nnùŋə̀ a ŋònə̀ wə̀ a mbyə̀ Yěsû.

¹⁹La pobə lə̀ zəənə̀ lo mɨŋwùə̀ à noʼò ka àlàŋə nɨ mbə̀ʼə pobə làŋə̀ ghu, ntyiʼə̀ nkoʼò àtwuə̀ ndâ nshwùə̀ nɨ̀fə̀ŋə nshwuʼkə̀ a ŋònə̀ wa aŋunə ɨ̀kwùunə e nnùŋə̀ a tɨ̀tɨ̀rə̀ pə̀ənə̀ a mbyə̀ Yěsû.

²⁰Yěsû a zəənə̀ ntii àpyiimə̀ ntɨŋmə̀ nɨ pànə̀ lə̀ pənə nɨ zèrə, nshwəŋə̀ lo, “Ɨ̀swùə mə̀, pɨ lə̀ənə̀ ɨ̀nwùə̀ tɨ̀pòŋə̀ ɨ̀pô.”

²¹Pɨ̀nèrə̀ mbòomə pobə pɨ̀Farìsî pa pìʼnə̀ ntyiʼə̀ mbyiitə̀ amwuə mɨ̀ntɨŋmə̀ ɨ̀mobə lo, “Ẅèrə wə̀ ŋwùə̀ nɨ à wə̀ nshwəŋə̀ ɨ̀shwəŋnə̀ ndzòomə̀ Nẅùə̀ lə a ɨ̀wə̌? A ɨ̀wə̌ ɨ̀tse nɨ à wa ndə̀ənə̀ ɨ̀fàntə̀ ɨ̀nwùə̀ ndàŋə̀ e a Nẅùə̀?”

²²Yěsû à lə̀ zhyə̂ mɨ̀nwùə̀ nɨ pobə lə̀ mənə mbyiitə̀ pobə nɨ pobə la, mbyiitə̀ ambo pobə lo, “Nɨ pyiitə̀ ɨ̀pyiitə̀ pə̀ amwuə pɨghə la ntii àkə?

²³A zàŋə̀ pə a nɨ shwəŋə̀ lo, ‘Pɨ lə̀ənə̀ ɨ̀fànə̀ ɨ̀nwùə̀ pɨghə,’ kə̀ a nɨ shwəŋə̀ lo, ‘Lòo a ɨ̀shyə̂ ngyìinə̀?’

²⁴La mbɨ ghɨ̀rə̀ mbə̀ʼə nɨ̀ zhyə̂ lo Moonə̀ ŋwùə̀ a wa nɨ ɨ̀tɨ̀ŋnə̀ àtwuə̀ ɨ̀shyə̂ ghə̀ a nɨ lə̀ənə̀ ɨ̀fàntə̀ ɨ̀nwùə̀ pə̀ənə̀” Tsaʼa a lə̀ shwəŋə̀ la ntyiʼə̀ nshwəŋə̀ ambo ŋònə̀ nɨ taʼà pàa mbɨ̀ŋmə̀ e a kwɨghə̀nə la lo, “Ǹshwəŋə̀ ambo ghò lo, lòo a ɨ̀shyə̂ mbìʼì ɨ̀kwùunə o wa ndèrə̀ o a ndâ ghò.”

²⁵Ŋònə̀ wə̀ à lə̀ zùŋə̀ ndòo a ɨ̀shyə̂ tyìʼə̀ a mbyə̀ pobə mbìʼì ɨ̀kwùunə e nɨ à lə̀ nwùunə̀nə aŋunə la ntyiʼə̀ mmə ngyìinə̀ nguʼtə̀ a Nẅùə̀ ndèrə̀ e a ndâ ze.

²⁶Ànwùə̀ zə̀ a lə̀ tumə̀ ntswùə̀ ɨ̀ghobə pɨ̀tsùmə̀, pobə tyiʼə̀ mmə nguʼtə̀ a Nẅùə̀. Àkẅàrə̀ a kwuunə̀ a ghobə, pobə tyiʼə̀ mmə nshwəŋə̀ lo, “Pəə zəənə̀ mɨ̀nwùə̀ mɨ yerə̀nə yerə̀nə sìnə̀ wə̀.”

²⁷Zèrə zə ànwùə̀ a lə̀ làŋə̀ la, Yěsû a mə nfurə̀ a àpyìinə ndzəənə̀ a ɨ̀nkẅiirə̀ pɨ̀taghə̀ nɨ nɨ̀linə̀ ɨ̀tse lə̀ pənə Levì a nwuunə̀ alyiʼə nɨ pɨ pa nkẅiirə̀ pɨ̀taghə̀ amwuə. Yěsû a shwəŋə̀ ambo ze lo, “Tô ntyiʼə̀ ndzùŋə̀ mə̀.”

²⁸A lòo a ɨ̀shyə̂ mmyàʼtə̀ àzwuumə̀ àtsùmə̀ ndzùŋə̀ e.

²⁹Levì à lə̀ lèrə̀ ngə̀ ngɨ̀rə̀ a nɨ̀ghaʼà ngẅùunə a ndâ ze ambo Yěsû. Pɨ̀nkẅiirə̀ pɨ̀taghə̀ pɨ̀noʼnə pobə pɨ̀tse pə̀ənə̀ lə̀ kɨ ntô àzobə nnwuunə̀ alyiʼə mɨ̀zɨghə̀ pobə pɨ pobə.

³⁰Pɨ̀Farìsî pobə pɨ̀nèrə̀ mbòomə pìʼnə̀ a nɨ lẅùmpə̀ mbyiitə̀ ɨ̀zùŋə̀ ndzùmə̀ Yěsû lo, “A ghɨ̀rə̀ àkə wə̀ zɨghə̀ nkɨ nnô pɨghə pɨ pɨ̀nkẅiirə̀ pɨ̀taghə̀ pobə ngàŋə ngɨ̀rə̀ ɨ̀nwùə̀ tɨ̀pòŋə̀?”

³¹Yěsû a kẅùə̀ lo, “Ŋònə̀ nɨ ka à mə ngòonə̀ e, ka à tàʼà e a mbarə̀ pə̀ənə̀; à tàʼà e ngoonə ntàʼà a mbarə̀ pə̀ənə̀.

³²Ka ǹtô mə̀ la mbə̀ʼə pànə̀ pa nɨ mɨ̀nwùə̀ ɨ̀mobə təəmə̀nə la, ǹtô mə la mbə̀ʼə ngàŋə ngɨ̀rə̀ ɨ̀nwùə̀ tɨ̀pòŋə̀, mbə̀ʼə pobə̂ pə̀ŋə̀ mɨ̀ntɨŋmə̀ ɨ̀mobə aŋunə tɨ̀pòŋə̀ ɨghobə.”

³³Pɨ̀Farìsî pa shwəŋə̀ ambo Yěsû lo, “Ɨ̀zùŋə̀ ndzùmə̀ Jònə lə̀ mə nnwuunə̀ tɨ zɨghə̀ amwuə àchàʼtə̀ Nẅùə̀, ɨ̀zùŋə̀ ndzùmə̀ pɨ̀Farìsî kɨ mə ngɨ̀rə̀ a lenə, la ɨ̀pô pə ndzɨghə̀, nnô a ghobə.”

³⁴Yěsû a kẅùə̀ ambo pobə lo, “Mbə̀ʼə wə̀ ghɨ̀rə̀ pànə̀ pyə̀ nɨ pɨ tônə alyiʼə nɨ̀zoʼò zwuə̀ tɨ zɨghə̀ amwuə nkwùə̀ nɨ ndwuumə̀ ngɨ̀ɨnə̀ à pənə a pobə pɨ pobə?

³⁵La nkwùə̀ ɨ̀ zə ntô nɨ pɨ̌ lòo a ndwuumə̀ ngɨ̀ɨnə̀ lèrə̀ nɨ ẅèrə, pobə̂ tyiʼə̀ nwuunə̀ tɨ zɨghə̀ nkwùə̀ ghu.”

³⁶À lə̀ lèrə̀ nɨ mbyə̀, nshwəŋə̀ ɨ̀shwəŋnə̀ nàanə nàanə ambo pobə lo, “Mbə̀ʼə ŋwùə̀ a lə̂ e àpàa atsəʼə aŋunə atsəʼə yè shwuə̀ ndzùnkə̀ aŋunə atsəʼə yè lwùnə̀ apə̀. A tə ngɨ̀rə̀ a lenə yi ǎ tsə̀ŋə̀ àpàa atsəʼə yè shwuə̀ za. Yi àpàa atsəʼə yè shwuə̀ za a laʼa ngyìinə̀ e pobə atsəʼə yè lwùnə̀ apə̀.

³⁷Ka ŋwùə̀ a lòo e mɨ̀lùʼù mɨ shwuə̀ nchyâ amwuə kaʼrə mɨ̀lùʼù ndwùnə̀, à tə ngɨ̀rə̀ a lenə mɨ̀lùʼù mɨ shwuə̀ ma saanə̀ a kaʼrə wa, mɨ̀lùʼù ma kẅìnə̀ wə̀ pî a kaʼrə.

³⁸La, Pɨ chyâ mɨ̀lùʼù mɨ shwuə̀ pə amwuə kaʼrə ghù shwuə̀.

³⁹Yètse ànwùə̀ a chi mbə lo ŋònə̀ nɨ à wa nnô mɨ̀lùʼù mɨ lwùnə̀, ka à chi ntàʼà e mɨ̀lùʼù mɨ shwuə̀, ntiinə à wə̀ nshwəŋə̀ lo, ‘Mɨ lwùnə̀ ma pòŋə̀ ntsàarə̀ a mɨ shwuə̀.’”