Read Pinyin Lukə̀ 6 Bible Online

Lukə̀ 6 - Pinyin bible

Lukə̀ 6

¹A lə̀ pə njyə̂ àlaʼà pɨ̀Jew ɨ̀tse, Yěsû pobə ɨ̀zùŋə̀ ndzùmə̀ ɨ̀pe mə ndàŋə̀ amwuə ɨ̀swùumə mɨ̀sàŋə, ɨ̀zùŋə̀ ndzùmə̀ ɨ̀pe pìʼnə̀ a nɨ liitə̀ mɨ̀sàŋə ngyìinə̀ nnẅùʼə̀ nkwurə̀.

²Pɨ̀Farìsî pɨ̀tse pyiitə̀ a ghobə lo, “Nɨ̀ ghɨ̀rə̀ ànwùə̀ nɨ ka mbòomə a pyiimə̀ e lo nɨ̀ ghɨ̀rə̀ aŋunə njyə̂ àlaʼà pɨ̀Jew lə mbə̀ʼə àkə?”

³Yěsû a kẅùə̀ ambo pobə lo, “Ka nɨ̀ lə̀ fuŋə̀ a wɨghə ànwùə̀ nɨ ɨ̀fò Dàfirə̀ à lə̀ ghɨ̀rə̀nə nkwùə̀ nɨ njyə̀ ɨ̀ lə̀ zaŋə̀nə e pobə ngàŋə àkwùə̀ nɨ̀yìinə̀ ɨ̀ze?

⁴À lə̀ kwuunə̀ a ndâ Nẅùə̀, ndòo àpaanə̀ Nẅùə̀ nkwurə̀ nkɨ ŋâ yètse ambo ngàŋə àkwùə̀ nɨ̀yìinə̀ ɨ̀ze za, la pə̀ənə̀ zhyə̂ lo mbòomə à nèrə̀ lo a kwurə̀ e tyìʼə̀ ngàŋə màʼà Nẅùə̀ nkwurə̀ àpaanə̀ zèrə zə̀.”

⁵Yěsû a tyiʼə̀ nshwəŋə̀ ambo pobə lo, “Moonə̀ ŋwùə̀ à twuʼtə̀ ɨ̀tɨ̀ŋnə̀ a nɨ ghɨ̀rə̀ ànwùə̀ àtsùmə̀ aŋunə njyə̂ àlaʼà.”

⁶A chi mbə taʼà njyə̂ àlaʼà pɨ̀Jew ɨ̀tse, Yěsû a ghə̀ kwuunə̀ a ndâ àshwatə̀ pɨ̀Jew mmə nèrə̀ ànwùə̀ Nẅùə̀ ghu, ŋònə̀ ɨ̀tse a pə̀ ghu nɨ àpô e yè zɨghə̀nə a lə̀ kwɨghə̀nə.

⁷Pɨ̀Farìsî pobə pɨ̀nèrə̀ mbòomə mə nnaŋə̀ lo â parə̀ a ŋònə̀ wə̀ aŋunə njyə̂ àlaʼà zə̀ mbə̀ʼə pobə̂ gerə̀ ànwùə̀ nɨ mbə̀ʼə pobə ẅìimə̀ e aŋunə.

⁸La, à lə̀ zhyə̂ ɨ̀kwàŋə̀ ɨ̀pobə ntyiʼə̀ nshwəŋə̀ ambo ŋònə̀ nɨ àpô e a lə̀ kwɨghə̀nə la lo, “Tô ntəəmə̀ a ɨ̀shyə̂ nɨ̀ghə̂!” A kɨ ndòo a ɨ̀shyə̂ ngə̀ ntəəmə̀.

⁹Yěsû a tyiʼə̀ mbyiitə̀ ghobə lo, “Mbòomə à nèrə̀ la lo pɨ ghɨ̀rə̀ ɨ̀shìʼnə̀ aŋunə njyə̂ àlaʼà kə̀ tɨ̀pòŋə̀? Lo pɨ chwarə̀ a ŋwùə̀ kə̀ pɨ zhwuutə̀ e?”

¹⁰A tyiʼə̀ mbə̀ŋə̀ nnaŋə̀ a ghobə pɨ̀tsùmə̀ nkamnə̀ nshwəŋə̀ ambo ŋònə̀ wa lo, “Shwùumə̀ àpô o.” A ghɨ̀rə̀ tyìʼə̀ a lenə, àpô e za a kẅirə̀ ntɨ̀ŋnə̀ e.

¹¹La, Pobə zəənə̀ a lenə la mɨ̀ntɨŋmə̀ ɨ̀mobə zaŋə̀ pobə tyiʼə̀ nshwəŋnə̀ a tɨ̀tɨ̀rə̀ pobə ntyiʼə̀ mmə nkwàŋə̀ ànwùə̀ nɨ mbə̀ʼə pobə ghɨ̀rə̀ aŋunə Yěsû?

¹²A pə njyə̂ ɨ̀tse amwuə mɨ̀njyə̂ mɨ̀ghu, Yěsû a koʼò ndèrə̀ àtwuə̀ kòŋə̀ a nɨ chàʼtə̀ a Nẅùə̀ ndzùŋə̀ ndyə̂ a nɨ chàʼtə̀ a Nẅùə̀.

¹³Tsaʼa Njyə̂ ɨ̀ lə̀ laanə̀nə, à lə̀ fuŋə̀ ɨ̀zùŋə̀ ndzùmə̀ ɨ̀pe, ngə̀ amwuə ntsoʼò a ghobə ntsòbə̀ ɨpaa nfuŋə̀ nɨ ngàŋə ntwuumə̀ ɨ̀ze.

¹⁴À lə̀ tsoʼò la Shimùnə̀ nɨ à lə̀ chwùə̀nə nɨ̀linə̀ ɨ̀tse nɨ Pità, pobə Andrù momaa e, nɨ Jemə̀ pobə Jònə, nɨ Filibə̀ pobə Bartholomew,

¹⁵Nɨ Matyù pobə Thomas, nɨ Jemə̀ ẅùə̀ nɨ a lə̀ pənə moonə̀ Àlfeyùsə̀ nɨ Shimùnə̀ ẅùə̀ nɨ à lə̀ fuŋə̀nə nɨ Zilòtə̀ la,

¹⁶nɨ Yudà moonə̀ Jemə̀, nɨ Yudà Iskaryòtə̀, ẅùə̀ wa nɨ à lə̀ shwùunə̀nə Yěsû la.

¹⁷À lə̀ tyiʼə̀ nshwuʼə̀ pobə pɨ pobə ngə̀ ntəəmə̀ amwuə nɨ̀pàrə pobə àpùŋə̀ ɨ̀zùŋə̀ ndzùmə̀ ɨ̀pe nɨ àpùŋə̀ pànə̀ pɨ̀noʼnə nɨ lə̀ furə̀nə àlaʼà Judyà, nɨ Yèrusalèmə̀ ghobə ɨ̀laʼà nɨ lə̀ pənə a mbwùnə mɨ nchyə mbə Tayə̀ ghobə Sidònə̀. Pànə̀ pèrə pə lə̀ tô la a nɨ zhwiʼtə̀ ànwùə̀ nɨ à lə̀ mənə nshwəŋə̀, a kɨ mbarə̀ ɨghoonə ɨ̀pobə.

¹⁸À lə̀ kɨ nfuukə̀ ɨ̀zhwùə̀ tɨ̀pòŋə̀ amwuə pànə̀ nɨ lə̀ mənə ŋŋâ ngəʼə̀ ambo pobə.

¹⁹Ɨ̀nòonə̀ pànə̀ wa lə̀ mə ndzòŋnə̀ a nɨ pètə̀ e ntiinə mɨ̀tɨ̀ŋnə̀ lə̀ mə nfurə̀ amwuə ze mbarə̀ a ghobə.

²⁰À lə̀ pə̀ʼkə̀ ɨ̀myə̂ ɨ̀me nnaŋə̀ ɨ̀zùŋə̀ ndzùmə̀ ɨ̀pe nshwəŋə̀ lo, “Mborə̀ ɨ̀ chyə̂ ambo pɨghə nɨ nɨ̀ fumə̀nə la, ntiinə ànwùə̀ Nɨ̀fò Nẅùə̀ a chyə̂ la ambo pɨghə.

²¹Mborə̀ chyə̂ ambo pɨghə pa nɨ njyə̀ ɨ̀ zə̀ ndzaŋə̀ wɨghə tɨ̀tsòŋə̀, ntiinə nɨ̀ ghǎ zɨghə̀ zwurə̀; mborə̀ ɨ̀ chyə̂ ambo pɨghə nɨ nɨ̀ wə̀ ngyìi tɨ̀tsòŋə̀, ntiinə nɨ̀ ghǎ tyiʼə̀ ẅìi.

²²Mborə̀ ɨ̀ chyə̂ ambo pɨghə pa nɨ pànə̀ pa mbàanə̀ a wɨghə la, mmə nfuukə̀ a wɨghə a tɨ̀tɨ̀rə̀ pobə nkɨ mmə ndzòomə̀ a wɨghə; mmə ntsə̀ŋə̀ mɨ̀linə̀ ɨ̀mɨghə lo pɨghə la ngàŋə ghɨ̀rə̀ ɨ̀nwùə̀ tɨ̀pòŋə̀ ntii Moonə̀ Ŋwùə̀!

²³“Pɨ mə ngɨ̀rə̀ a lenə aŋunə pɨghə nɨ̀ pənə nɨ̀ghaʼà yɨ̀noʼnə, ntiinə mɨ̀ntsoʼnə̀ mɨ àfàʼà ɨ̀mɨghə ma a nɨ̀pwuurə̀ mɨ̀noʼnə. Lə̌ tsaʼnə pɨ̀tǎ ɨ̀pobə lə̀ ghɨ̀rə̀nə aŋunə ngàŋə̀ ntwuumə̀ Nẅùə̀ la.

²⁴“La ngəʼə̀ ngẅùunə ɨ̀ chyə̂ aŋunə pɨghə pɨ̀ghàŋə pɨ nkabə̀, ntiinə nɨ̀ kẅiirə̀ mə ɨ̀pwuumə̀ pa pyə̀ nɨ pèrə pa ŋŋâ a nɨ̀ghaʼà la.

²⁵Ngəʼə̀ ngẅùunə ɨ̀ chyə̂ ambo pɨghə pànə̀ nɨ pɨ zɨghə̀nə ndzwurə̀ tɨ̀tsòŋə̀ la, ntiinə njyə̀ ɨ̀ ghǎ zaŋə̀ a wɨghə. Ngəʼə̀ ngẅùunə ɨ̀ za aŋunə pɨghə pa nɨ nɨ̀ wə̀ ngẅìi tɨ̀tsòŋə̀ la, ntiinə nɨ̀ ghǎ sòmnə̀, kɨ yìi.

²⁶Ngəʼə̀ ngẅùunə ɨ̀ za aŋunə pɨghə pa nɨ pànə̀ pɨ̀tsùmə̀ pa nshwəŋə̀ ɨ̀nwùə̀ pɨ̀shìʼnə̀ mbə̀ʼə wɨghə, ntiinə lə̌ ndwuumə̀ nɨ pɨ̀tǎ pɨ̀tǎ ɨ̀pɨghə lə̀ ghɨ̀rə̀nə aŋunə ngàŋə ntwuumə̀ Nẅùə̀ pɨ pɨ̀chwìrə̀ la.”

²⁷“La ngwə̀ ntiitə̀ a wɨghə nɨ nɨ̀ wə̀ nzhwiʼtə̀ ambo mɨ̀ŋə̀ tɨ̀tsòŋə̀ la lo: nɨ̀ mə nkòŋə̀ ngàŋə kɨpaanə ɨ̀zɨghə nkɨ ngɨ̀rə̀ ɨ̀shìʼnə̀ aŋunə pànə̀ pa pyə̀ nɨ pɨ pàanə̀nə a wɨghə,

²⁸mmə chyâ mborə̀ aŋunə pyə̀ pa nɨ pɨ chyânə ndòonə̀ àtwuə̀ pɨghə la, nkɨ chàʼtə̀ Nẅùə̀ aŋunə pyə̀ pa nɨ pɨ zòomə̀nə a wɨghə.

²⁹Ŋwùə̀ à tə mbəla ndùbə̀ nɨ̀ghə̀ʼə̀ ɨ̀tsô, wə̀ pə̀ŋə̀ a chyə̀ ŋŋâ ambo ze a chi ndùbə̀. Ŋwùə̀ à tə kẅiirə̀ a kutə̀ o, wə̀ tsoʼò atsəʼə o yè màʼnə nkẅìʼnə̀ ambo ze.

³⁰Ŋâ àzwuumə̀ ambo ŋwùə̀ ntsùmə̀ wa nɨ à loonə̀nə; ŋwùə̀ a pəla nkẅiirə̀ àzwuumə̀ o, kò wə̀ chi mbyiitə̀ o a zèrə.

³¹Nɨ̀ mə ngɨ̀rə̀ mɨ̀nwùə̀ nɨ nɨ̀ kòŋə̀nə lo pɨ ghɨ̀rə̀ aŋunə pɨghə aŋunə pɨ̀tse pə̀ənə̀.

³²Wə̀ tə mə nkòŋə̀ o pə ndàʼà pànə̀ nɨ pɨ kòŋə̀nə o, àpìi a nɨ ghɨ̀rə̀ a lenə a pə àkə? Mbaa pə ngàŋə ngɨ̀rə̀ ɨ̀nwùə̀ tɨ̀pòŋə̀ za kɨ kòŋə̀ pànə̀ nɨ pɨ kòŋə̀nə a ghobə.

³³Wə̀ tə mə ngɨ̀rə̀ ɨ̀shìʼnə̀ pə ndàʼà aŋunə pànə̀ nɨ pɨ ghɨ̀rə̀nə ɨ̀shìʼnə̀ aŋunə ghò, àpìi a nɨ ghɨ̀rə̀ a lenə a pə àkə? Ntiinə ngàŋə a ghɨ̀rə̀ ɨ̀nwùə̀ tɨ̀pòŋə̀ kɨ ghɨ̀rə̀ e la lenə.

³⁴Wə̀ tə mə ntsoʼkə̀ nkabə̀ pə ambo ndàʼà pànə̀ nɨ wə̀ zhyə̂nə lo pɨ ghǎ kẅuə̀ zèrə, àpìi a nɨ ghɨ̀rə̀ a lenə a pə àkə? Tyìʼə̀ ngàŋə ngɨ̀rə̀ ɨ̀nwùə̀ tɨ̀pòŋə̀ tsoʼkə̀ àzobə la ambo pɨ̀tse ngàŋə ngɨ̀rə̀ ɨ̀nwùə̀ tɨ̀pòŋə̀ a nɨ kẅirə̀ nkẅiirə̀ ndwùnə̀ nkabə̀ ghu.

³⁵La, nɨ̀ tyiʼə̀ nkòŋə̀ ngàŋə kɨpaanə ɨ̀zɨghə, ntyiʼə̀ ngɨ̀rə̀ ɨ̀shìʼnə̀ aŋunə pobə. Wə̀ mə ntsoʼkə̀ a ŋwùə̀ nɨ nkabə̀ kò wə̀ kwàŋə̀ lo wə̌ chi kẅiirə̀, mɨ̀ntsoʼnə̀ mɨ àfàʼà ɨ̀mô tyiʼə̀ nnoʼò; nɨ̀ tyiʼə̀ mbə ɨ̀poonə̀ pɨ Nẅùə̀ Àkoʼntsirə̀; ntiinə Nẅùə̀ à wa ngɨ̀rə̀ ɨ̀shìʼnə̀ aŋunə pànə̀ nɨ pobə pa ka ŋâ ghobə a mɨyàa pobə pɨ pànə̀ nɨ mɨ̀ntɨŋmə̀ ɨ̀mobə sinə̀nə.

³⁶Nɨ̀ mə nkoorə̀ mɨ̀lɨŋə̀ mɨ pə̀ənə̀ tyìʼə̀ tsaʼnə Tǎ ɨwɨghə a nɨ̀pwuurə̀ à wa nkoorə̀ mɨ̀lɨŋə̀ mɨ pə̀ənə̀.”

³⁷“Kò nɨ̀ kɨ ntsoʼtə̀ a wɨghə pɨ̀tse pə̀ənə̀ mbə̀ʼə Nẅùə̀ a kɨ ntsoʼtə̀ e a wɨghə apə̀. Kò nɨ̀ kɨ nchyâ a wɨghə ngəʼə̀ aŋunə pə̀ənə̀, mbə̀ʼə Nẅùə̀ a gha nkɨ chyâ e ngəʼə̀ aŋunə pɨghə apə̀. Nɨ̀ mə ndə̀ənə̀ ɨ̀fàntə̀ ɨ̀nwùə̀ pə̀ənə̀ mbə̀ʼə Nẅùə̀ a gha nkɨ ndə̀ənə̀ ɨ̀pɨghə,

³⁸ŋŋâ ɨ̀pwuumə̀ ambo pə̀ənə̀ mbə̀ʼə pɨ kɨ ŋŋâ ambo ghò. Àzwuumə̀ nɨ wə̀ chyânə amwuə la, pɨ̌ chyâ tə chyâ â lẅenə̀ njaʼà. Lenəla, ndwuumə̀ nɨ wə̀ mɨ̀nkə̀nə àzwuumə̀ ŋŋâ ambo pànə̀ a ndwuumə̀ nɨ pɨ̌ kɨ mɨ̀nkə̀ ŋŋâ ambo ghò.”

³⁹À lə̀ chi nshwəŋə̀ àshwəŋnə̀ nàanə nàanə ambo pobə lo, “Mbə̀ʼə ɨ̀fə̀ a nèrə̀ àlàŋə ambo ghùtse ɨ̀fə̀? À tə ghɨ̀rə̀ a lenə yi pobə pɨ̀tsùmə̌ lèrə̀ ghə̀ kwuunə̀ amwuə nɨ̀ntaamə̀.

⁴⁰Mbə̀ʼə mɨnkɨ̂ àŋwàʼnə̀ a laʼa ntsàarə̀ e a ɨ̀nèrə̀ ɨ̀nwùə̀ apə̀. La ŋònə̀ nɨ à lùʼtə̀nə ànwùə̀ ɨ̀shìʼnə̀ la à ghǎ pə tsaʼa ɨ̀nèrə̀ ànwùə̀.

⁴¹“A ghɨ̀rə̀ kə̀ wə̀ zəənə̀ o pə àkɨ̀ghɨ nɨ a pənə a nɨ̀lyə̂ ndyimə o, la ka mə zəənə̀ a maa maa àzwuumə̀ nɨ a pənə a nɨ̀lyə̂ ghò?

⁴²Wə̌ làŋə̀ lə ɨla ghu nshwəŋə̀ ambo ndyimə o lo, ‘Ndyimə mə̀ tyiʼə̀ n̂fuukə̀ àkɨ̀ghɨ zə a nɨ̀lyə̂ ghò,’ la mbə ka mə zəənə̀ o a maa àtɨ̀ghə nɨ à pənə a nɨ̀lyə̂ ghò. Ngàŋə̀ àpə̀grə̀! Pyə̀ ndàŋə̀ nɨ mbyə̀ nfuukə̀ a maa àzwuumə̀ wa a nɨ̀lyə̂ ghò zaʼà mbòŋə̀ tyiʼə̀ zəənə̀ àkɨ̀ghɨ za a nɨ̀lyə̂ ndyimə o fuukə̀.”

⁴³“Ka àtɨ̀ghə ɨ̀shìʼnə̀ â zumə̀ e nɨ̀ntàamə nɨ tɨ̀pòŋə̀, kə̀ yè tɨ̀pòŋə̀ a kɨ ndzumə̀ e nɨ̀ntàamə tsɨ̀ ɨ̀shìʼnə̀ apə̀.

⁴⁴Pɨ làŋə̀ la a ndzùmə̀ nɨ̀ntàamə nzhyə̂ mbuurə̀ àtɨ̀ghə nɨ a pənə zèrə. Mbə̀ʼə wə̀ kabə̀ o a mangòrə̀ aŋunə àtɨ̀ghə pɨ̀kɨkobə apə̀, kə̀ nkɨ nkabə̀ o a laməshyə̀ aŋunə àtɨ̀ghə ɨ̀ẅìnə apə̀.

⁴⁵Ŋònə̀ ɨ̀shìʼnə̀ à wa nfuukə̀ ɨ̀nwùə̀ pɨ̀shìʼnə̀ amwuə ntɨŋmə̀ e wa nɨ ɨ lẅenə̀nə nɨ ɨ̀nwùə̀ pɨ̀shìʼnə̀ la. Ŋònə̀ tɨ̀pòŋə̀, a kɨ mmə nfuukə̀ ɨ̀nwùə̀ tɨ̀pòŋə̀ pa amwuə ntɨŋmə̀ e wa nɨ ɨ lẅenə̀nə nɨ ɨ̀nwùə̀ tɨ̀pòŋə̀ la. Ntiinə ànwùə̀ nɨ a furə̀nə a ntswùə̀ ŋwùə̀ a furə̀ la amwuə ntɨŋmə̀ e.”

⁴⁶“A ghɨ̀rə̀ àkə, nɨ̀ fuŋə̀ mə̀ nɨ ‘Ndòʼnə̀mbyə̂, Ndòʼnə̀mbyə̂,’ la ka pə ghɨ̀rə̀ a wɨghə ànwùə̀ nɨ ǹshwəŋə̀nə ambo pɨghə?

⁴⁷Ŋwùə̀ ntsùmə̀ nɨ à tônə ambo mɨ̀ŋə̀, ndzuʼù àshwəŋnə̀ nkɨ nfàʼà ànwùə̀ nɨ ǹshwəŋə̀nə la, mbɨ nèrə̀ a wɨghə nɨ ŋònə̀ nɨ à pənə ẅèrə.

⁴⁸À chyə̂ la tsaʼa ŋònə̀ nɨ à ghə̀nə a nɨ korə̀ ndâ, ntsùŋə̀ ntuŋə̀ àtsirə̀ ndâ a mìnə̀ ɨ̀shìʼnə̀ mbyàa aŋunə àlàrə̀kə̀ nɨ̀ghòorə. Nkwùə̀ nɨ mbə̀ŋə̀ ɨ̀ lônə, nchyə ɨ zhaʼà ntô ntumə̀ ndâ ghu, ɨ̀ nə̀ʼnə̀ e apə̀, ntiinə à lə̀ poomə̀nə ndâ ghù ɨ̀shìʼnə̀.

⁴⁹La ŋònə̀ ẅùə̀ nɨ à zuʼnə ka mə ghɨ̀rə̀ e ànwùə̀ nɨ ǹshwəŋə̀nə a chyə̂ la tsaʼa ŋònə̀ nɨ à korə̀nə ndâ e tɨ poomə̀ àtsirə̀. Nkwùə̀ nɨ mbə̀ŋə̀ ɨ̀ lônə nnoʼò, nchyə ɨ zhaʼà ntô ntumə̀ a zèrə mmàʼà a ɨ̀shyə̂, nshàʼtə̀ a zèrə ntsùmə̀.”