Read Pinyin Lukə̀ 7 Bible Online

Lukə̀ 7 - Pinyin bible

Lukə̀ 7

¹Nkwùə̀ nɨ Yěsû à lə̀ myàanə̀nə a nɨ shwəŋə̀ ɨ̀nwùə̀ pyə̀ nɨ à lə̀ tàʼnə lo pànə̀ zuʼù tyìʼə̀ ɨ̀tsùmə̀, à lə̀ furə̀ ndèrə̀ a nɨ̀kwurə̀ nɨ Kàpenòmə̀.

²Àtwuə̀ pɨ̀soyì nkɨrə yètse a àlaʼà Romə̀ à lə̀ pə nɨ ngàŋə̀ àfàʼà ẅùə̀ nɨ à lə̀ kòŋə̀nə e ka mɨ̀zùŋə a pə ngòonə̀ tə ntyiʼə̀ a ntswùə̀ nɨ̀wɨghə̀.

³Nkwùə̀ nɨ à lə̀ zuʼnə mɨ̀nwùə̀ nɨ Yěsû à lə̀ ghɨ̀rə̀nə, à lə̀ twuumə̀ pɨ̀lɨ̀ŋmə̂ pɨ̀Jew ambo ze lo pɨ tô nfuŋə̀ e mbə̀ʼə a tô mbarə̀ a ngàŋə̀ àfàʼà e wa.

⁴Pobə tô ambo Yěsû mbuʼù mbô ɨ̀shìʼnə̀ nshwəŋə̀ nɨ ze lo, “Yèmpə̀ a ŋònə̀ wə̀, a ŋònə̀ nɨ à kùʼnə̀nə lo mbə̀ʼə wə̀ yèmpə̀ e,

⁵ntiinə à kòŋə̀nə àlaʼà àzəənə̀; à lə̀ yèmpə̀ a nɨ korə̀ ndâ àshwatə̀ ɨzəə.”

⁶Lenəla Yěsû a zùŋə̀ a ghobə pobə pɨ pobə lèrə̀. Nkwùə̀ nɨ pobə tyiʼnə mmə nkwuunə̀ a ɨmwuə alyiʼə, àtwuə̀ pɨ̀soyì nkɨrə za a tsàa pɨ̀swùə ɨ̀pe lo pobə̂ tô nshwəŋə̀ ambo ze lo, “Ndòʼnə̀mbyə̂, kò wə̀ chi ndzəənə̀ o ngəʼə̀ ntô ntiinə ka ǹkùʼnə̀ mə̀ lo mbə̀ʼə wə̀ tô nkwuunə̀ a ndâ mɨ̀ŋə̀.

⁷Ka ǹkùʼnə̀ mə a nɨ tô a nɨ̀pwùnə ghò; la kɨ shwəŋə̀ pə taʼà ànwùə̀ mbə̀ʼə ngàŋə̀ àfàʼà mə̀ wə̀ a tɨ̀ŋnə̀,

⁸ntiinə ǹchyə̂ mbə la ŋwùə̀, mbə nɨ pànə̀ nɨ pɨ pənə nɨ mɨ̀tɨ̀ŋnə̀ àtwuə̀ mɨ̀ŋə̀, ǹkɨ chi mbə nɨ ɨ̀tɨ̀ŋnə̀ àtwuə̀ pyə̀ pɨ̀soyì. Ngwa nshwəŋə̀ ambo ghùtse lo, ‘lèrə̀’, a lèrə̀ nkɨ nchi nshwəŋə̀ ambo ẅùə̀ lo ‘tô’ a tô, nkɨ nchi nshwəŋə̀ ambo ngàŋə̀ àfàʼà mə̀ lo ‘ghɨ̀rə̀ lo,’ a kɨ ngɨ̀rə̀.”

⁹Yěsû a zuʼù ànwùə̀ nɨ a lə̀ shwəŋə̀nə la ngyerə̀ mbə̀ŋə̀ nshwəŋə̀ ambo àpùŋə̀ pànə̀ za nɨ a lə̀ mənə ndzùŋə̀ e la lo, “Ǹshwəŋə̀ a wɨghə lo, tyìʼə̀ amwuə àlaʼà Israel m̀birə̀ tɨ zəənə̀ mbuurə̀ àpyiimə̀ ntɨŋmə̀ zə̀.”

¹⁰Pànə̀ pa nɨ à lə̀ twuumə̀nə a ghobə la lə̀ kɨ nkẅirə̀ nkwə̂ ntsirə̀ a ngàŋə̀ àfàʼà wa nɨ à fiitə̀ mə e.

¹¹A kɨ pə tyìʼə̀ lə, Yěsû a lèrə̀ amwuə mbòmpə àlaʼà ɨ̀tse nɨ pɨ lə̀ mənə nfuŋə̀ nɨ Nenə̀ pobə ɨ̀zùŋə̀ ndzùmə̀ ɨ̀pe nɨ àpùŋə̀ pànə̀ pɨ̀noʼnə.

¹²Tsaʼnə à lə̀ tyiʼnə mmə mbyàa a ntswùə̀ àpùʼù mbòmpə àlaʼà za, à lə̀ kɨ wùutə̀ ndzəənə̀ pɨ pìʼì àkwuə̀ mômbyàŋnə̀ yɨ̀tse ẅùə̀ nɨ a lə̀ pənə ndàʼà mômbyàŋnə̀ ambo mǎ e nɨ à kɨnə mbə nkwùə mə̀ngyə̌, àpùŋə̀ pə̀ənə̀ nɨ a furə̀nə a mbòmpə àlaʼà ngẅùunə a pə pobə pɨ pobə.

¹³Nkwùə̀ nɨ Ndòʼnə̀mbyə̂ à zəənə̀nə e, à lə̀ koorə̀ mɨ̀lɨŋə̀ ɨ̀me, nshwəŋə̀ ambo ze lo, “Kò wə̀ chi ngyìi.”

¹⁴Lenəla, à lə̀ tyiʼə̀ ntô mbètə̀ nkwùumə̀ nɨ pɨ lə̀ pìʼnə àkwuə̀ za amwuə, pànə̀ nɨ pɨ lə̀ pìʼnə a zèrə tyiʼə̀ ntəəmə̀ nɨ tuʼu, a shwəŋə̀ lo, “Môngwàswùumə̀, ǹshwəŋə̀ ambo ghò lo wə̀ lòo a ɨ̀shyə̂.”

¹⁵Moonə̀ wa nɨ à lə̀ kwɨghə̀nə la a lòo a ɨ̀shyə̂ nnwuunə̀ mbìʼnə̀ a nɨ shwəŋnə̀, Yěsû a lòo e, nkẅirə̀ ŋŋâ e ambo mǎ e.

¹⁶Ànwùə̀ ghu a lə̀ kə̀ʼnə̀ a ghobə pɨ̀tsùmə̀ pobə tyiʼə̀ nguʼtə̀ a Nẅùə̀ nshwəŋə̀ lo, “Ngàŋə̀ ntwuumə̀ ngẅùunə a furə̀ a tɨ̀tɨ̀rə̀ pə̀ənə̀” nkɨ mə nshwəŋə̀ lo “Nẅùə̀koʼò a tô a nɨ yèmpə̀ pə̀ənə̀ ɨ̀pe.”

¹⁷Ànwùə̀ zə̀ nɨ Yěsû a lə̀ ghɨ̀rə̀nə lə a lə̀ sìimə̀ amwuə àlaʼà Judyà àtsùmə̀ farə amwuə ɨ̀laʼà pyə̀ nɨ ɨ paatə̀nə.

¹⁸Ɨ̀zùŋə̀ ndzùmə̀ Jònə lə̀ shwəŋə̀ ɨ̀nwùə̀ pèrə pə̀ ɨ̀tsùmə̀ nɨ lə̀ furə̀nə mbə̀ʼə Yěsû la ambo ze.

¹⁹Jònə à lə̀ fuŋə̀ ɨ̀zùŋə̀ ndzùmə̀ ɨ̀pe ɨpaa ntwuumə̀ a ghobə ambo Ndòʼnə̀mbyə̂ lo pobə ghə̀ mbyiitə̀ e lo, “Ghò la ẅùə̀ wa nɨ à lə̀ pənə tô la, kə̀ pəə pyabə̀ a ghù nyàanə?”

²⁰Ɨ̀zùŋə̀ ndzùmə̀ ɨ̀pe pa ghə̀ ndzəənə̀ a Yěsû nshwəŋə̀ lo, “Jònə ngàŋə̀ àŋâ àkẅiirə̀ nchyə à tsàa a wəə lo pəə tô mbyiitə̀ o lo, ‘ghò la ẅùə̀ wa nɨ à pənə tô la, kə̀ pəə pyabə̀ ghù nyàanə?’”

²¹Tyìʼə̀ nkwùə̀ ghu, Yěsû a parə̀ ɨghoonə pɨ̀noʼnə, nfuukə̀ ɨ̀zhyə̂ amwuə mɨ̀pùmə̀ mɨ pə̀ənə̀ nkɨ nnyaʼkə̀ ɨ̀myə̂ mɨ pɨ̀fə̀.

²²A tyiʼə̀ nkẅùə̀ ambo pobə lo, “Nɨ̀ lèrə̀ ngə̀ ntiitə̀ a Jònə nɨ ànwùə̀ nɨ nɨ̀ zəənə̀nə, nkɨ ndzuʼù; pɨ̀fə̀ zəənə̀ ɨlyiʼə, pɨ̀kòŋə̀ ɨ̀shyə̂ yìinə̀, pɨ parə̀ ngàŋə àkɨ̀kẅinə, ɨ̀puʼkə̀ mɨtugrə zuʼù, ɨ̀kwuə̀ pə̀ənə̀ lòo a ɨ̀shyə̂, pɨ mə nchwìitə̀ ntwuumə̀ ghù ɨ̀shìʼnə̀ ambo ngàŋə àfumə̀.

²³Mborə̀ ɨ̀ chyə̂ ambo ŋònə̀ wa nɨ ka à mɨnkə̀ e a ŋònə̀ nɨ m̀bənə ẅèrə.”

²⁴Nkwùə̀ nɨ ɨ̀zùŋə̀ ndzùmə̀ Jònə lə̀ lèrə̀nə la, Yěsû à lə̀ pìʼnə̀ a nɨ shwəŋnə̀ ambo ɨ̀pùŋə̀ pə̀ənə̀ pa mbə̀ʼə Jònə, “Nɨ̀ laʼa ndèrə̀ amwuə alyiʼə waakə la a nɨ ghə̀ ndzəənə̀ àkə? A àkɨ̀kàʼà zhyə̀ nɨ fèrə̀ à wə̀ nnə̀ʼə̀?

²⁵Nɨ̀ lə̀ furə̀ ndèrə̀ la a nɨ zəənə̀ àkə? A ŋònə̀ nɨ à lə̀ ẅînə ɨtsəʼə pɨ̀shìʼnə̀? Pànə̀ nɨ pɨ ẅînə ɨtsəʼə pɨ̀tsə̂nə nkɨ mə nchyə̂ ɨ̀shìʼnə̀ chyə̂ la amwuə mɨ̀ntoʼò.

²⁶La, nɨ̀ lə̀ lèrə̀ la a nɨ ghə̀ ndzəənə̀ àkə? A nɨ zəənə̀ a ngàŋə̀ ntwuumə̀ Nẅùə̀? Ee! La, ǹshwəŋə̀ a wɨghə lo nɨ̀ zəənə̀ a ŋònə̀ nɨ a tsàarə̀nə a ngàŋə̀ ntwuumə̀ Nẅùə̀.

²⁷Lə̌ ze wa nɨ pɨ lə̀ ŋwàʼnə̀nə mbə̀ʼə e lo, ‘Mbɨ tsàa a ngàŋə̀ ntwuumə̀ mə̀ a mbyə̀ ghò, ẅùə̀ nɨ ǎ lèrə̀ ghə̀ tsùŋə̀ àlàŋə ambo ghò.’

²⁸Ǹshwəŋə̀ a wɨghə lo, ‘Ka ŋònə̀ ɨ̀tse amwuə pànə̀ nɨ mə̀ngyə̌ à pyə̂nə nɨ mbə̀ʼə a tsàarə̀ a Jònə; la ŋònə̀ nɨ à kɨ̂nə ndẅùutə̀ amwuə ànwùə̀ Nɨ̀fò Nẅùə̀ mmyàanə̀, à tsàarə̀ e.’”

²⁹[Nkwùə̀ nɨ Pànə̀ pɨ̀tsùmə̀ farə pɨ̀nkẅiirə̀ pɨ̀taghə̀ lə̀ zuʼnə ànwùə̀ zèrə zə, pobə lə̀ pyiimə̀ lo ànwùə̀ nɨ Nẅùə̀ à lə̀ ghɨ̀rə̀nə a lə̀ təəmə̀, ntiinə àkẅiirə̀ nchyə ambo pobə à lə̀ ŋâ Jònə.

³⁰La pɨ̀Farìsî pobə pɨ̀nèrə̀ mbòomə lə̀ twuunə̀ a ghobə àkwàŋə̀ nɨ Nẅùə̀ à lə̀ twuʼtə̀nə aŋunə pobə, ntwuunə̀ a ghobə lo kò Jònə a ŋâ e àkẅiirə̀ nchyə ambo pobə].

³¹Yěsû a làŋə̀ nɨ mbyə̀ nshwəŋə̀ lo, “Mbə̀ʼə m̀mɨ̀nkə̀ ɨ̀waanə̀ pànə̀ pə lə aŋunə àkə? Pobə lanə mbə lə tsaʼa àkə?

³²Pobə chyə̂ tsaʼa kɨyii àghòbə nɨ pobə nwuunə̀nə amwuə àzàanə mɨ̀tàanə, pyə̀ pə nkyiinə̀ nfuŋə̀ pyə̀ shwəŋə̀ lo, ‘Pəə lə̀ puʼù àpinə̀ nɨ̀zoʼò ambo pɨghə, ka nɨ̀ pinə̀ a wɨghə. Pəə lə̀ zòbə̀ nchyə nɨ̀wɨghə̀, ka nɨ̀ yìi a wɨghə.’

³³Ǹshwəŋə̀ a lenə la ntii lo Jònə ngàŋə̀ àŋâ àkẅiirə̀ nchyə à lə̀ tô ka mə zɨghə̀ e, ka kɨ mə nô e mɨ̀lùʼù, nɨ̀ shwəŋə̀ lo, ‘A wə̀ nɨ àzhyə̂ a nɨ̀pùmə̀ ze.’

³⁴Moonə̀ Ŋwùə̀ à kùmə̀ lə̀ tô mmə ndzɨghə̀ nkɨ mmə nnô, nɨ̀ shwəŋə̀ lo, ‘Nɨ̀ zəənə̀ a noomənkyə̀ pobə àpaarə̀ mɨ̀lùʼù, nkɨ mbə ɨ̀swùə pɨ̀nkẅiirə̀ pɨ̀taghə̀ pobə pɨ ngàŋə ngɨ̀rə̀ ɨ̀nwùə̀ tɨ̀pòŋə̀.

³⁵La Nẅùə̀ à wə̀ nnèrə̀ àzhìʼtə̀ e a nɨ làŋə̀ a ndzùmə̀ ngɨ̀rə̀ mɨ̀nwùə̀ pànə̀ nɨ pɨ pyiimə̀nə e.”

³⁶Ŋwùə̀ Farìsî ɨ̀tse à lə̀ fuŋə̀ a Yěsû lo â tô ndzɨghə̀ a ndâ ze. A lə̀ tô nwuunə̀ àtwuə̀ tepèrə̀ a nɨ zɨghə̀.

³⁷Nkwùə̀ nɨ à lə̀ mənə ndzɨghə̀, mə̀ngyə̌ nɨ̀kwurə̀ ghùtse nɨ à lə̀ pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀ a zuʼù lo Yěsû a wə̀ ndzɨghə̀ a ndâ ŋwùə̀ Farìsî wa, ntyiʼə̀ ntô nɨ mɨ̀ghurə̀ mɨ àzhyǎ amwuə məndzìrə̀ nɨ pɨ tsùŋə̀nə nɨ Àlàbastà.

³⁸Tsaʼnə à lə̀ tônə ntəəmə̀ a ndzùmə̀ Yěsû mbaatə̀ mɨ̀kwùə̀ ɨ̀me mmə ngyìi nkẅìrə̀ nchyə ɨ̀myə̂ aŋunə mɨ̀kwùə̀ mɨ Yěsû. Mmə ndòo ɨ̀nyùŋə̀ àtwuə̀ e ndzə̀ə mɨ̀kwùə̀ ɨ̀me ghu, ntyiʼə̀ mmə nnyòʼtə̀ mɨ̀kwùə̀ ɨ̀me ndzoʼò nɨ mɨ̀ghurə̀ mɨ àzhyǎ ma.

³⁹Ŋwùə̀ Farìsî wa nɨ à tənə nfuŋə̀ a Yěsû la, a zəənə̀ ànwùə̀ nɨ mə̀ngyə̌ wa a lə̀ mənə ngɨ̀rə̀, nshwəŋə̀ amwuə ntɨŋmə̀ e lo, “Ŋònə̀ wə̀ a pə la mbə ngàŋə̀ ntwuumə̀ Nẅùə̀ yi à zhyə̂ a ŋònə̀ nɨ mə̀ngyə̌ wə̀ à pənə ẅèrə, nzhyə̂ mbuurə̀ mə̀ngyə̌ nɨ à pètə̀nə e lə, ntiinə à pənə ngàŋə̀ ngɨ̀rə̀ ɨ̀nwùə̀ tɨ̀pòŋə̀.”

⁴⁰Yěsû a shwəŋə̀ ambo ze lo, “Shimùnə̀, ngwə̀ nɨ ànwùə̀ àtse a nɨ shwəŋə̀ ambo ghò.” A pyiitə̀ e lo, “A pə ànwùə̀ àkə, ɨ̀nèrə̀ ɨ̀nwùə̀?”

⁴¹Yěsû a shwəŋə̀ ambo ze lo, “Ŋònə̀ ɨ̀tse à lə̀ pə ghu mbə ntsoʼkə̀ nkabə̀, mbə nɨ ngàŋə ndzǒ ɨ̀ze ɨpaa, taʼà a ẅìimə̀ e nɨ nkabə̀ silbà nkɨrə ɨtaanə̀, ghùtse a ẅìimə̀ e nɨ nkabə̀ silbà mɨ̀ghumə̀ mɨntaanə̀.

⁴²Tsaʼnə ka pobə lə̀ pə a ghobə nɨ nkabə̀ a nɨ twuə̀ nkabə̀ ghu la, à lə̀ myàʼtə̀ a ghobə pɨ̀tsùmə̀ nshwəŋə̀ lo kò pobə gha nchi ntwuə̀ a ghobə a zèrə. Nɨ̀ kwàŋə̀ lo amwuə pànə̀ pə à lə̀ kòŋə̀ ẅèrə nkòŋə̀ e ntsàarə̀ a ẅùə̀?”

⁴³Shimùnə̀ a kẅùə̀ lo, “Ŋònə̀ wa nɨ ɨze nkabə̀ ɨ̀ lə̀ noʼnə la.” Yěsû a shwəŋə̀ ambo ze lo, “Wə̀ kẅùə̀ tyìʼə̀ ɨ̀shìʼnə̀.”

⁴⁴Ntyiʼə̀ mbə̀ŋə̀ nnaŋə̀ mə̀ngyə̌ wə̀, nshwəŋə̀ ambo Shimùnə̀ lo, “Wə̀ zəənə̀ mə̀ngyə̌ wanə? Nkwùə̀ nɨ ǹtônə nkwuunə̀ a ndâ ghò ka wə̀ tô ŋŋâ o nchyə lo n̂sùu mɨ̀kwùə̀ ɨ̀mâ ghu, la à sùu mə mɨ̀kwùə̀ ɨ̀mâ nɨ nchyə ɨ̀myə̂ ɨ̀ze ndzə̀ə nɨ ɨ̀nyùŋə̀ àtwuə̀ e.

⁴⁵Ka wə̀ tô nnyòʼtə̀ o a gha, la a nɨ pìʼnə̀ nkwùə̀ nɨ ǹtənə nkwuunə̀ a ndâ ghə, à pirə̀ mə e tɨ zhwùutə̀ a nɨ nyòʼtə̀ mɨ̀kwùə̀ ɨ̀mâ.

⁴⁶Ka wə̀ tə ndzoʼò o àtwuə̀ mə̀ nɨ mɨ̀ghurə̀, la à zoʼò mə mɨ̀kwùə̀ ɨ̀mâ nɨ mɨ̀ghurə̀.

⁴⁷Nɨ ndwuumə̀ wə̀, ǹshwəŋə̀ ambo ghò lo ɨ̀nwùə̀ tɨ̀pòŋə̀ ɨ̀pe pa nɨ pèrə noʼnə la, pɨ̌ lə̀ənə̀ mə a pèrə. Ǹshwəŋə̀ ambo ghò lo pɨ̌ lə̀ənə̀ mɨ̀nwùə̀ mɨ tɨ̀pòŋə̀ ɨ̀me mɨ̀noʼnə ma, ntiinə à nèrə̀nə ɨ̀kòŋnə̀ ghù ẅùunə. La ŋònə̀ wa ẅùə̀ nɨ pɨ lə̀ənə̀nə a tɨ̀pòŋə̀ e pɨ̀mɨlyiʼə à kɨ nnèrə̀ la mɨlyiʼə ɨ̀kòŋnə̀.”

⁴⁸Yěsû a tyiʼə̀ mbə̀ŋə̀ nshwəŋə̀ ambo mə̀ngyə̌ wa lo, “Pɨ lə̀ənə̀ ɨ̀fàntə̀ ɨ̀nwùə̀ ɨ̀pô.”

⁴⁹Pànə̀ nɨ pobə pɨ pobə lə̀ mənə ndzɨghə̀ la lə̀ pìʼnə̀ a nɨ shwəŋnə̀ pobə nɨ pobə lo, “Ẅèrə wə̀ ŋwùə̀ la ɨ̀wə̌ nɨ à wa ndə̀ənə̀ ɨ̀fàntə̀ ɨ̀nwùə̀ pə̀ənə̀?”

⁵⁰Yěsû a shwəŋə̀ ambo mə̀ngyə̌ wa lo, “Àpyiimə̀ ntɨŋmə̀ o a chwarə̀ o; lèrə̀ nɨ àporə̀porə̀.”