Read Pinyin Lukə̀ 9 Bible Online

Lukə̀ 9 - Pinyin bible

Lukə̀ 9

¹Yěsû à lə̀ fuŋə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa a taʼà alyiʼə ŋŋâ a ghobə nɨ mɨ̀tɨ̀ŋnə̀ a nɨ tyiʼə̀ nfuukə̀ ɨ̀zhyə̂ nkɨ mbarə̀ ɨghoonə.

²Ntyiʼə̀ ntwuumə̀ a ghobə lo pobə lèrə̀ ngə̀ mə nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀ nkɨ ntyiʼə̀ mbarə̀ ɨghoonə.

³Tsaʼnə a lə̀ mənə ntwuumə̀ a ghobə la a lə̀ nshwəŋə̀ lo, “Kò nɨ̀ lòo wɨghə àzwuumə̀ àtse; kò nɨ̀ lòo wɨghə mbàŋə̀, kò nɨ̀ lòo wɨghə àpàamə̀, kò nɨ̀ lòo wɨghə mɨ̀zɨghə̀ kə̀ nkabə̀, kò nɨ̀ kɨ nchi ntwuʼtə̀ wɨghə ɨtsəʼə pɨ̀nyaanə.

⁴Nɨ̀ lèrə̀ ngə̀ nkwuunə̀ a ndâ nɨ nɨ̀ kwuunə̀nə la, nɨ̀ ghoŋə̀ ghu mbyàa nkwùə̀ nɨ nɨ̀ ghǎ lèrə̀.

⁵Nɨ̀ tə ngə̀ nkwuunə̀ alyiʼə nɨ ka pɨ kẅiirə̀ e wɨghə, nɨ̀ furə̀ wɨghə, nkwùtə̀ àpùbə nɨ a pənə a mɨ̀kwùə̀ pɨghə a nɨ nèrə̀ lo ka pɨghə pobə pə wɨghə nɨ àzwuumə̀ àtse”

⁶Pobə tyiʼə̀ nfurə̀ ndèrə̀, nkwuunə̀ amwuə zhyə̀ àlaʼà ndèrə̀ amwuə zhyə̀ àlaʼà, nchwìitə̀ ntwuumə̀ ghù ɨ̀shìʼnə̀ wa nkɨ mə mbarə̀ pə̀ənə̀ ɨlyiʼə ɨ̀tsùmə̀.

⁷Tsaʼnə Heròdə̀ ẅùə̀ nɨ à lə̀ pənə ɨ̀fò àlaʼà Galìlyə̂, à lə̀ zuʼnə ɨ̀nwùə̀ pèrə pə la, àtwuə̀ e a lə̀ tsànkə̀, ntiinə pànə̀ pɨ̀tse lə̀ mənə nshwəŋə̀ lo Jònə ngàŋə̀ àŋâ àkẅiirə̀ nchyə à kẅirə̀ nzhwuumə̀ a nɨ̀wɨghə̀.

⁸Pɨ̀tse mə nshwəŋə̀ lo Elijah à kẅirə̀ ntô, pɨ̀tse kɨ nchi mmə nshwəŋə̀ lo ngàŋə̀ ntwuumə̀ Nẅùə̀ ghù ntsàambyə̀ ntsàambyə̀ wa ghùtse à kẅirə̀ nzhwuumə̀ a nɨ̀wɨghə̀.

⁹Heròdə̀ a tyiʼə̀ nshwəŋə̀ lo, “Ndə̀ lə̂ àtwuə̀ Jònə, ẅèrə wə̀ ŋònə̀ nɨ ǹtyiʼnə ndzuʼù ànwùə̀ mbə̀ʼə e lə pə ɨ̀wə̌?” Ntyiʼə̀ nkyiitə̀ lo zəənə̀ e.

¹⁰Nkwùə̀ nɨ ngàŋə ntwuumə̀ ɨ̀ze za lə̀ kẅirə̀nə nkwə̂, pobə lə̀ tiitə̀ ɨ̀nwùə̀ ɨ̀tsùmə̀ nɨ pobə lə̀ ghɨ̀rə̀nə ambo Yěsû. A lòo a ghobə pobə pɨ pobə ndàʼà lèrə̀ àlaʼà Betsedà.

¹¹Nkwùə̀ nɨ ɨ̀pùŋə̀ pə̀ənə̀ lə̀ zuʼnə lo pobə pyə̀ alyiʼə ghu la, pɨ zùŋə̀ e ghu. A kẅiirə̀ a ghobə ntyiʼə̀ nshwəŋə̀ ambo pobə mbə̀ʼə ànwùə̀ Nɨ̀fò Nẅùə̀ nkɨ mbarə̀ pɨghoonə.

¹²A lə̀ pə a ngẅènə̀ nẅùumə̀ ɨ̀zùŋə̀ ndzùmə̀ ɨ̀pe pa ntsòbə̀ ɨpaa ɨ tô ambo ze nshwəŋə̀ lo, “Myàʼtə̀ àpùŋə̀ pànə̀ zə pobə lèrə̀, nkwuunə̀ amwuə ɨ̀laʼà pobə ɨlyiʼə nɨ ɨ paatə̀nə mbə̀ʼə pobə zəənə̀ àzwuumə̀ ndzɨghə̀ kə̀ alyiʼə ndyə̂ ghu, ntiinə alyiʼə zə̀ a alyiʼə nɨ ka pànə̀ mə chyə̂ a ghobə ghu nnoʼò.”

¹³Yěsû a kẅùə̀ ambo pobə lo, “Pɨghə àtwuə̀ mbɨ̀ŋmə̀ ɨ̀zɨghə nɨ̀ ŋâ àzwuumə̀ pobə zɨghə̀.” Pobə shwəŋə̀ ambo ze lo, “Ka pəə pə wəə nɨ àzwuumə̀ àtse ndàŋə̀ e ɨ̀tùmə ɨ̀paanə̀ ɨtaanə̀ nɨ ɨ̀swuə̀ ɨpaa. A tə mbə zhyə̀ nɨ pə̀ənə̌ zə̂ pànə̀ pə pɨ̀tsùmə̀, yi pə̀ənə̌ chi zwuunə̀ mɨ̀zɨghə̀ ambo pobə.”

¹⁴Pànə̀ nɨ pɨ lə̀ pənə ghu lə̀ pə tsaʼa pànə̀ nkaamə̀ ɨtaanə̀. A shwəŋə̀ ambo ɨ̀zùŋə̀ ndzùmə̀ ɨ̀pe pa lo, “Nɨ̀ ghɨ̀rə̀ pobə nwuunə̀ a ɨ̀shyə̂ ɨ̀kẅìrə ɨ̀kẅìrə, taʼà àkẅìrə â pə tsaʼa pànə̀ mɨ̀ghumə̀ mɨntaanə̀”

¹⁵Pobə lə̀ ghɨ̀rə̀ tyìʼə̀ a lenə, pànə̀ pa pɨ̀tsùmə̀ nontə̀ a ɨ̀shyə̂.

¹⁶A piinə̀ ɨ̀tùmə ɨ̀paanə̀ pa ɨtaanə̀ nɨ ɨ̀swuə̀ za ɨpaa, mbə̀ʼkə̀ àtwuə̀ e a àtɨ̀ghə nchàʼtə̀ a Nẅùə̀ ŋŋâ a mɨyàa nchyâ mborə̀ aŋunə mbiʼtə̀ ŋŋâ ambo ɨ̀zùŋə̀ ndzùmə̀ ɨ̀pe pa lo pobə ghàbə̀ ambo pànə̀ pa.

¹⁷Pànə̀ pɨ̀tsùmə̀ lə̀ zɨghə̀ ndzwurə̀ pɨ shwatə̀ ɨ̀chepə̀ pèrə lẅenə̀ mɨnkaamə ntsòbə̀ ɨpaa.

¹⁸A pə njyə̂ ɨ̀tse Yěsû a pə nchàʼtə̀ a Nẅùə̀ tyìʼə̀ ze nɨ ze, ɨ̀zùŋə̀ ndzùmə̀ ɨ̀pe pə a nɨ̀pwùnə ze, a pyiitə̀ a ghobə lo, “Pànə̀ pa nshwəŋə̀ lo ǹchyə̂ mbə la ɨ̀wə̌?”

¹⁹Pobə kẅùə̀ lo, “Pɨ̀tse pa nshwəŋə̀ lo Jònə ngàŋə̀ àŋâ àkẅiirə̀ nchyə. Pɨ̀tse mə nshwəŋə̀ lo Elijah nɨ à kẅirə̀nə nkwə̂. Pɨ̀tse mə nshwəŋə̀ lo a ngàŋə̀ ntwuumə̀ Nẅùə̀ ghù ntsàambyə̀ wa ghùtse nɨ à kẅirə̀nə nzhwuumə̀.”

²⁰La a pyiitə̀ a ghobə lo, “La nɨ̀ pə nshwəŋə̀ àzɨghə lo ǹchyə̂ mbə la ɨ̀wə̌?” Pità a kẅùə̀ lo, “Ẅùə̀ wa nɨ Nẅùə̀ à zoʼnə la.”

²¹Yěsû a kwàtə̀ a ghobə nshwəŋə̀ lo, “Kò pobə shwəŋə̀ a ghobə ambo ŋònə̀ ɨ̀tse.”

²²Nkɨ nshwəŋə̀ ambo pobə lo, “Moonə̀ ŋwùə̀ à ghǎ zəənə̀ mbuurə̀ ngəʼə̀ ntsùmə̀, pɨ̀tǎ pɨ àlaʼà, nɨ pɨ̀fò màʼà Nẅùə̀ nɨ pɨ̀nèrə̀ mbòomə twuunə̀ e, nzhwuutə̀ e a kɨ pə aŋunə njyə̂ ɨtarə a chi nzhwuumə̀ a nɨ̀wɨghə̀.”

²³A shwəŋə̀ ambo pobə pɨ̀tsùmə̀ lo, “Ŋònə̀ ɨ̀tse à tə mə ntàʼà a nɨ zùŋə̀ ndzùmə̀ mə̀ a twuunə̀ ɨ̀pɨ̀ŋmə̀ e mbìʼì àtɨ̀ghə pànkə̀nə e ntyiʼə̀ ndzùŋə̀ mə̀ tyìʼə̀ njyə̂ ɨ̀tsùmə̀,

²⁴ntiinə ŋwùə̀ wa ntsùmə̀ nɨ à tàʼnə lo chwarə̀ ɨ̀pɨ̀ŋmə̀ e la ǎ pî, la ŋwùə̀ wa ntsùmə̀ nɨ à tàʼnə lo kwɨghə̀ ntii mə̀ la ǎ chwarə̀.

²⁵Àpìi o a àkə mbə̀ʼə wə̀ pìʼì àtwuə̀ ɨ̀shyə̂ zə̀ àtsùmə̀ la nga mbî a nɨ̀chyə̂mbyə̂ o pɨghə Nẅùə̀, kə̀ nga ndzəənə̀ ngəʼə̀?

²⁶Ŋwùə̀ à tə mbə nɨ ɨ̀sɨŋnə̀ mbə̀ʼə mə̀ pobə mɨ̀ntə̌ ɨ̀mâ, yi Moonə̀ Ŋwùə̀ à ghǎ pə nɨ ɨ̀sɨŋnə̀ aŋunə ze nkwùə̀ nɨ à ghǎ tô amwuə mɨ̀tɨ̀ŋnə̀ ɨ̀me mɨ ẅùunə nɨ mɨ̀tɨ̀ŋnə̀ mɨ Tǎ pobə pəngèrə̀ pyə̀ nɨ pɨ laanə̀nə la.

²⁷La ǹshwəŋə̀ tyìʼə̀ a nkǔŋə nkuŋə ambo pɨghə lo, pànə̀ pɨ̀tse pyə̀ nɨ pɨ təəmə̀nə a ɨ̀shyə̂ nɨ̀ghə̂ pɨ ghǎ kwɨghə̀ a ghobə apə̀, pyàa nkwùə̀ nɨ pobə ghǎ zəənə̀ ànwùə̀ Nɨ̀fò Nẅùə̀.”

²⁸A lə̀ kɨ pə tsaʼa njyə̂ nɨ̀fàamə̂ tsaʼnə à lə̀ shwəŋə̀nə mɨ̀nwùə̀ mèrə mə̀ la, à lə̀ lòo Pità nɨ Jònə nɨ Jemə̀ pobə pɨ pobə koʼò ndèrə̀ àtwuə̀ mbarə̀ a nɨ chàʼtə̀ a Nẅùə̀.

²⁹Tsaʼnə à lə̀ mənə nchàʼtə̀ a Nẅùə̀ la, ɨ̀sɨghə̀ e ɨ lə̀ kẅebə̀, ɨtsəʼə ɨ̀pe fuə tə ntsèntə̀ tsaʼa mbə̀ŋə̀ nɨ ɨ̀ ŋwàŋə̀nə.

³⁰Pobə kɨ wùutə̀ ndzəənə̀ pànə̀ pɨpaa; Mǔsî pobə Elijah pobə pə nshwəŋnə̀ pobə pɨ Yěsû.

³¹Pànə̀ pə pɨpaa lə̀ tô amwuə nɨ̀ghaʼà ghù nẅìinə̀nə mmə nshwəŋnə̀ pobə pɨ Yěsû amwuə ndwuumə̀ nɨ à ghǎ kwɨghə̀ a Yèrusalèmə̀ a nɨ lẅenə̀ mɨ̀nkàʼnə mɨ Nẅùə̀.

³²Pità pobə pɨ pànə̀ nɨ pɨ lə̀ pənə alyiʼə ghu lə̀ pə ntsə̀grə̀ a pɨlô. La nkwùə̀ nɨ pobə lə̀ zhwèmnə̀nə, pobə lə̀ zəənə̀ a nɨ̀ghaʼà e ghù nẅìinə̀nə wa pobə pànə̀ pa pɨpaa nɨ pobə pɨ pobə lə̀ təəmə̀nə la.

³³Tsaʼnə pànə̀ pa lə̀ mənə mmyàʼtə̀ a Yěsû la, Pità à lə̀ shwəŋə̀ ambo ze lo, “Masàa, a pòŋə̀ lo pə̀ənə̀ ghoŋə̀ a nɨ̀ghə̂. Ghɨ̀rə̀ pəə korə̀ ɨ̀zuŋə̀ ɨtarə, taʼà a pə ambo ghò, taʼà a pə ambo Mǔsî, ɨ taʼà kɨ ntyiʼə̀ mbə ambo Elijah” (ka à lə̀ zhyə̂ ànwùə̀ nɨ à lə̀ mənə nshwəŋə̀.)

³⁴Tyìʼə̀ tsaʼnə à lə̀ pirə̀nə mmə nshwəŋnə̀, mbàʼà ɨ̀ shwuʼə̀ nnàanə̀ a ghobə, àkẅàrə̀ a kwuunə̀ a ghobə.

³⁵Pobə lə̀ zuʼù ngyə̀ ɨ̀ furə̀ amwuə mbàʼà za nshwəŋə̀ lo, “Lə̌ Moonə̀ mə̀ ẅùə̀ nɨ ǹtsoʼò mə; nɨ̀ tyiʼə̀ ndzuʼnə̀ e.”

³⁶Nkwùə̀ nɨ ngyə̀ za ɨ̀ lə̀ zhwemnə̀nə, pobə lə̀ tyiʼə̀ ndzəənə̀ a Yěsû ze nɨ ze. Pobə lə̀ kẅupə̀ mɨ̀ntswùə̀ ɨ̀mobə ka shwəŋə̀ ghobə ànwùə̀ nɨ pobə lə̀ zəənə̀nə ambo ŋònə̀ ɨ̀tse nkwùə̀ ghu.

³⁷Njyə̂ ɨ̀ lə̀ laanə̀, Yěsû pobə ɨ̀zùŋə̀ ndzùmə̀ ɨ̀pe pa shwuʼə̀ àtwuə̀ mbarə̀ gha, àpùŋə̀ pə̀ənə̀ a tô ntsirə̀ e.

³⁸Taʼà ŋònə̀ ɨ̀tse amwuə àpùŋə̀ pànə̀ za, a kyiinə̀ nshwəŋə̀ lo, “Ɨ̀nèrə̀ ɨ̀nwùə̀, m̀buʼù mbô, yèmpə̀ a moonə̀ mə̀ wə̀ ntiinə à pənə ndàʼà moonə̀ mə̀.

³⁹Àzhwùə̀ tɨ̀pòŋə̀ za a kô a moonə̀ wa mmàʼà a ɨ̀shyə̂, a tyiʼə̀ nkyiinə̀ nkunə̀ a ɨ̀shyə̂ àfùʼkə̀ a tyiʼə̀ nfurə̀ a ntswùə̀ ze. Ka fàʼà pyiimə̀ e a nɨ myàʼtə̀ e la mə ntsə̀ŋə̀ e.

⁴⁰Ǹtə mbuʼù mbô ambo ɨ̀zùŋə̀ ndzùmə̀ ɨ̀pô lo pobə̂ fuukə̀ àzhyə̂ zə̀ la pobə fuukə̀ ghobə kɨkaŋə.”

⁴¹Yěsû a shwəŋə̀ lo, “Pànə̀ pɨ tɨ àpyiimə̀; ɨ̀waanə̀ pànə̀ pɨ tɨ̀pòŋə̀! Mbɨ chyə̂ pə̀ənə̀ lə ndwùnə̀ ɨla ghu kɨ ẅìimə̀ ntɨŋmə̀ mə̀ la ghu zaʼà nɨ̀ pòŋə̀ ẅìimə̀ ànwùə̀ mə̀? Tô nɨ moonə̀ o wa a ɨ̀shyə̂ nɨ̀ghə̂.”

⁴²Tsaʼnə à lə̀ mənə ntô nɨ ẅèrə, àzhyə̂ za a chi ntinə̀ e mmàʼà a ɨ̀shyə̂ mmə nnə̀ʼə̀ e. Yěsû a saʼà Àzhwùə̀ tɨ̀pòŋə̀ za, mbarə̀ a moonə̀ wa ŋŋâ ambo tǎ ɨghobə.

⁴³Pànə̀ pɨ̀tsùmə̀ lə̀ yerə̀ amwuə ndwuumə̀ nɨ pobə lə̀ zəənə̀ ɨ̀tɨ̀ŋnə̀ Nẅùə̀. Tsaʼnə pobə lə̀ pirə̀nə mə nkwàŋə̀ mɨ̀nwùə̀ nɨ Yěsû à lə̀ ghɨ̀rə̀nə mɨ mə nkə̀ʼnə̀ e a ghobə la, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo,

⁴⁴“Nɨ̀ tsùŋə̀ nzhwiʼtə̀ àshwəŋnə̀ zə̀ â kwuunə̀ àtwuə̀ pɨghə. Pɨ̌ ŋŋâ a Moonə̀ Ŋwùə̀ ambo pànə̀ pɨ mɨsoŋə.”

⁴⁵Pobə lə̀ zuʼù la ka ànwùə̀ ghu a tsùŋə̀ ndaanə̀ e àtwuə̀ pobə, ntiinə pɨ lə̀ lə̀əmə̀nə lo kò pobə zhyə̂ a ghobə, pobə kɨ mbô a nɨ pyiitə̀ e.

⁴⁶Pobə pìʼnə̀ a nɨ tànkə̀ mbyiitə̀ pobə nɨ pobə lo, ŋònə̀ ngẅùunə amwuə pobə la ɨ̀wə̌?

⁴⁷La Yěsû à lə̀ zhyə̂ ànwùə̀ nɨ pobə lə̀ mənə nkwàŋə̀ amwuə mɨ̀ntɨŋmə̀ ɨ̀mobə, ndòo a mɨlyiʼə mɨnkɨ̂ ntô ntə̂ a nɨ̀pwùnə ze,

⁴⁸nshwəŋə̀ ambo pobə lo, “Ŋwùə̀ ntsùmə̀ nɨ à kẅiirə̀nə mɨlyiʼə mɨnkɨ̂ ntii mə̀ à kẅiirə̀ la gha; ŋwùə̀ ntsùmə̀ nɨ à kẅiirə̀nə mə̀ à kẅiirə̀ la ŋònə̀ nɨ à twuumə̀nə mə̀. Ntiinə ẅùə̀ wa nɨ à kɨ̂nə ndẅùunə̀ amwuə pɨghə la ẅùə̀ nɨ à pənə ŋònə̀ ngẅùunə.”

⁴⁹Jònə a kẅùə̀ lo, “Masàa, pəə tô ndzəənə̀ a ŋònə̀ ɨ̀tse a fuukə̀ ɨ̀zhyə̂ amwuə mɨ̀pùmə̀ mɨ pə̀ənə̀ aŋunə nɨ̀linə̀ ɨ̀tsô, pəə zùŋə̀ e ntiinə ka à pə e ŋwùə̀ àkwùə̀ ɨ̀wə̀ənə̀.”

⁵⁰Yěsû a shwəŋə̀ lo, “Kò nɨ̀ zùŋə̀ e ntiinə ŋònə̀ nɨ ka à twuunə̀ ànwùə̀ zə̀ a chyə̂ la pɨghə pɨ pobə.”

⁵¹Tsaʼnə nkwùə̀ ɨ̀ lə̀ mənə mbaatə̀ lo Yěsû a koʼò ndèrə̀ a nɨ̀pwuurə̀ la, à lə̀ lòo àkwàŋə̀ lo lèrə̀ e pə a Yèrusalèmə̀.

⁵²À lə̀ zàamə̀ ntsàa pə̀ənə̀ a mbyə̀ lo pobə̂ ghə̀ nkwuunə̀ àlaʼà Sàmariyà ntsùnkə̀ àzwuumə̀ àtsùmə̀ zaʼà a pòŋə̀ tô.

⁵³La pànə̀ pa lə̀ twuunə̀ a nɨ kẅiirə̀ e ntiinə pobə lə̀ zhyə̂nə lo, à wə̀ ndàŋə̀ làŋə̀nə ndèrə̀ a Yèrusalèmə̀.

⁵⁴La nkwùə̀ nɨ Jònə pobə Jemə̀ nɨ pobə lə̀ pənə ɨ̀zùŋə̀ ndzùmə̀ ɨ̀pe lə̀ zhyə̂nə a lenə la, pobə lə̀ pyiitə̀ e lo, “Ndòʼnə̀mbyə̂, wə̀ pyiimə̀ lo pəə shwuʼkə̀ ɨ̀mǔ ɨ̂ furə̀ a nɨ̀pwuurə̀ ntô ntòonə̀ a ghobə?”

⁵⁵Yěsû a pə̀ŋə̀ nnaŋə̀, nsaʼà ghobə.

⁵⁶Pobə tyiʼə̀ nfurə̀ ndèrə̀ amwuə àlaʼà yè nyaanə.

⁵⁷Tsaʼnə pobə lə̀ mənə ngyìinə̀ àlàŋə la, ŋònə̀ ɨ̀tse a shwəŋə̀ ambo Yěsû lo, “Mbɨ zùŋə̀ o alyiʼə ntsùmə̀ nɨ wə̀ lèrə̀nə.”

⁵⁸Yěsû a kẅùə̀ lo, “Pəntsobə chyə̂ nɨ mɨ̀mbwùʼə̀ ɨ̀mobə, pɨ̀mɨsɨŋə pə nɨ mɨ̀nkàanə̀ ɨ̀mobə la ka Moonə̀ Ŋwùə̀ a pə e nɨ alyiʼə nɨ mbə̀ʼə a nùŋə̀ àtwuə̀ ghu nzhwùutə̀.”

⁵⁹Yěsû a shwəŋə̀ ambo yɨ̀tse ŋònə̀ lo, “Zùŋə̀ mə̀.” La a shwəŋə̀ ambo ze lo, “Ndòʼnə̀mbyə̂, tyiʼə̀ n̂gə̀ ndzàamə̀ ntẅəŋə̀ a tǎ ɨwəə zaʼà.”

⁶⁰Yěsû a shwəŋə̀ ambo ze lo, “Myàʼtə̀ pànə̀ pyə̀ nɨ pɨ pənə tsaʼa ɨ̀kwuə̀ pə̀ənə̀ pobə̂ tẅəŋə̀ ɨ̀kwuə̀ pə̀ənə̀ pobə. La aŋunə ghò, lèrə̀ ngə̀ nchwìitə̀ ntwuumə̀ mbə̀ʼə ànwùə̀ Nɨ̀fò Nẅùə̀.”

⁶¹Ghùtse ŋwùə̀ a shwəŋə̀ ambo ze lo, “Mbɨ zùŋə̀ o mbǎ Ndòʼnə̀mbyə̂, la tyiʼə̀ n̂gə̀ ndàʼnə̀ pə̀ənə̀ a ɨmwuə alyiʼə zaʼà.”

⁶²Yěsû a shwəŋə̀ ambo ze lo, “ŋònə̀ nɨ a ẅìimə̀nə àsoorə̀ àfàʼà nchi mbə̀ŋə̀ nnaŋə̀ ndzùmə̀ la, ka kùʼnə̀ e a nɨ kwuunə̀ amwuə ànwùə̀ Nɨ̀fò Nẅùə̀.”