Read Pinyin Jònə 1 Bible Online

Jònə 1 - Pinyin bible

Jònə 1

¹A nɨ̀pìʼnə̀nə, Àshwəŋnə̀ a lə̀ pə ghu, Àshwəŋnə̀ ghu a pə pobə Nẅùə̀, Àshwəŋnə̀ ghu a kɨ mbə Nẅùə̀.

²Àshwəŋnə̀ ghu a lə̀ pə pobə Nẅùə̀ a nɨ̀pìʼnə̀.

³Nẅùə̀ à lə̀ làŋə̀ a ndzùmə̀ Àshwəŋnə̀ zèrə zə̀ ntsùŋə̀ àzwuumə̀ àtsùmə̀. Ka Nẅùə̀ à lə̀ tsùŋə̀ e àzwuumə̀ àtse tɨ zèrə.

⁴Nɨ̀chyə̂mbyə̂ à lə̀ furə̀ amwuə Àshwəŋnə̀ zə̀. Nɨ̀chyə̂mbyə̂ wə̀ à lə̀ lòo nkàʼà ntô ambo pànə̀ pɨ mɨsoŋə.

⁵Nkàʼà wə̀ ɨ kɨrə̀ amwuə ndzùmə, la ndzùmə ɨ̀ lə̀ tsàarə̀ mə e a ye apə̀.

⁶Nẅùə̀ à lə̀ twuumə̀ a ŋònə̀ ɨ̀tse nɨ nɨ̀linə̀ ɨ̀tse lə̀ pənə Jònə.

⁷Jònə wə̀ à lə̀ tô tsaʼa ndzəənə̀ zəənə̀nə a nɨ tiitə̀ mɨ̀nwùə̀ mbə̀ʼə nkàʼà wə̀ ambo pə̀ənə̀ mbə̀ʼə ŋwùə̀ ntsùmə̀ zuʼù nkɨ mbyiimə̀.

⁸Ka ze àtwuə̀ ɨ̀pɨ̀ŋmə̀ e a lə̀ pə e nkàʼà wə̀, la ntô tsaʼa ndzəənə̀ zəənə̀nə mbə̀ʼə ẅèrə.

⁹Lə̌ ngotə nkàʼà nɨ ɨ wə̀ ntô kyàʼà a ŋwùə̀ ntsùmə̀ amwuə àtwuə̀ ɨ̀shyə̂ zə̀.

¹⁰Àshwəŋnə̀ zə̀ a lə̀ pə amwuə àtwuə̀ ɨ̀shyə̂. Mbaa pə tsaʼnə Nẅùə̀ à lə̀ tsùŋə̀nə àtwuə̀ ɨ̀shyə̂ pobə àzwuumə̀ àtsùmə̀ ndàŋə̀ a ndzùmə̀ ze la ka pànə̀ pɨ àtwuə̀ ɨ̀shyə̂ lə̀ zhyə̂ a ghobə a ye.

¹¹À lə̀ tô amwuə àze àlaʼà, la ka ɨ̀pe pə̀ənə̀ kẅiirə̀ a ghobə a ye.

¹²La à lə̀ ŋâ ɨ̀tɨ̀ŋnə̀ ambo pànə̀ nɨ pɨ lə̀ kẅiirə̀nə e, nkɨ nnùŋə̀ mɨ̀ntɨŋmə̀ ɨ̀mobə aŋunə nɨ̀linə̀ ɨ̀tse lo pobə̌ pə ɨ̀poonə̀ pɨ Nẅùə̀.

¹³Pyə̀ nɨ ka pobə lə̀ pə ghobə ɨ̀poonə̀ pɨ Nẅùə̀ amwuə ndwuumə̀ nɨ ŋwùə̀ mɨsoŋə à wa mbyə̂ a moonə̀ e, kə̀ amwuə ndwuumə̀ nɨ ŋònə̀ mbyàŋnə̀ à wa nkòŋə̀ a nɨ pyə̂ a moonə̀ e, pobə̌ pə ɨ̀poonə̀ pɨ Nẅùə̀ ntiinə Nẅùə̀ àtwuə̀ ɨ̀pɨ̀ŋmə̀ e à lə̀ kòŋə̀nə lo pobə̂ pə ɨ̀poonə̀ ɨ̀pe.

¹⁴Àshwəŋnə̀ ghu a lə̀ tô mbə̀ŋə̀ ntyiʼə̀ ŋwùə̀ mɨsoŋə nchyə̂ a tɨ̀tɨ̀rə̀ pə̀ənə̀, ndẅenə̀ nɨ ɨ̀pòŋə̀ pobə nkǔŋə nkuŋə. Pəə lə̀ zəənə̀ a àghuʼtə̀ e, nɨ à lə̀ pənə àghuʼtə̀ nɨ à lə̀ kẅiirə̀nə ambo Tǎ tsaʼa ndàʼà moonə̀ e.

¹⁵Jònə à lə̀ pə ndzəənə̀ zəənə̀nə e nshwəŋə̀ mɨ̀nwùə̀ mbə̀ʼə e mmə nkyiinə̀ nɨ mɨ̀tɨ̀ŋnə̀ nshwəŋə̀ lo, “Lə̌ ze wa nɨ ndə̀ shwəŋə̀nə lo, ‘Ŋònə̀ ɨ̀tse à wə̀ ntô a ndzùmə̀ mɨ̀ŋə̀ nɨ à tsàarə̀nə mə̀, ntiinə à lə̀ pyə̀nə mbə ghu zaʼà pɨ pòŋə̀ pyə̂ mə̀.’”

¹⁶A nɨ zùŋə̀ a ndzùmə̀ ɨ̀pòŋə̀ e, à ŋâ a wəənə̀ nɨ mborə̀ nɨ yɨ̀noʼnə.

¹⁷Nẅùə̀ à lə̀ làŋə̀ a ndzùmə̀ Mǔsî ŋŋâ pɨ̀mbòomə ambo pə̀ənə̀. La ɨ̀pòŋə̀ pobə nkǔŋə nkuŋə tyiʼə̀ ndàŋə̀ a ndzùmə̀ Yěsû Kristù ntô ambo pə̀ənə̀.

¹⁸Ka ŋònə̀ ɨ̀tse nɨ à lə̀ zəənə̀ mə a Nẅùə̀. A kɨ mbə pə ndàʼà taʼà Moonə̀ wa nɨ à nwuunə̀nə a nɨ̀pwùnə Tǎ ɨghobə nɨ à ghɨ̀rə̀nə lo pə̀ənə̀ zhyə̂ a Nẅùə̀.

¹⁹Lə̌ ànwùə̀ nɨ Jònə à lə̀ shwəŋə̀nə nkwùə̀ nɨ pɨ̀Jew pɨ Yèrusalèmə̀ lə̀ tsàanə ngàŋə màʼà Nẅùə̀ pobə ɨ̀poonə̀ pɨ Levì lo pobə̂ tô mbyiitə̀ e nɨ mbuurə̀ ŋwùə̀ nɨ à pənə.

²⁰Ka à lə̀ twuunə̀ e a nɨ shwəŋnə̀, la nshwəŋə̀ nɨ ntswùə̀ e lo, “Ka mbə mə̀ la Ghù Ndzoʼnə wa.”

²¹Pobə pyiitə̀ e lo, “Wə̀ tyiʼə̀ mbə ɨ̀wə̌ tɨ̀tsòŋə̀? Ghò la Elijah?” A kẅùə̀ lo, “Ka mbə mə̀ ze.” Ghò la ngàŋə̀ ntwuumə̀ Nẅùə̀? A kẅùə̀ lo, “Ngaŋə.”

²²Pobə lẅùutə̀ mbyiitə̀ e lo, “Ghò la ɨ̀wə̌? Ŋâ a wəə nɨ àpə̀ŋə̀ àshwəŋnə̀ njiilo pəə ghə̀ ŋŋâ ambo pànə̀ nɨ pobə twuumə̀nə a wəə. Mbə̀ʼə wə̀ shwəŋə̀ lo àkə mbə̀ʼə mbɨ̀ŋmə̀ o?”

²³Jònə a kẅùə̀ tsaʼnə ngàŋə̀ ntwuumə̀ Nẅùə̀ Ìsayà a lə̀ shwəŋə̀nə lo: “Ǹchyə̂ mbə la ngyə̀ ŋwùə̀ nɨ ɨ̀ zə nfuŋə̀ amwuə alyiʼə waakə, Nɨ̂ tsùŋə̀ àlàŋə Ndòʼnə̀mbyə̂ â təəmə̀ a nɨ yìinə̀ amwuə.”

²⁴Ngàŋə ntwuumə̀ nɨ pɨ̀Farìsî lə̀ tsàanə la,

²⁵lə̀ tyiʼə̀ mbyiitə̀ a Jònə lo, “À ghɨ̀rə̀ àkə wə̀ ŋâ àkẅiirə̀ nchyə tsaʼnə ka wə̀ pə o Ghù Ndzoʼnə wa, kə̀ Elijah, kə̀ ngàŋə̀ ntwuumə̀ Nẅùə̀?”

²⁶Jònə a kẅùə̀ lo, “Ngwə̀ ŋŋâ àkẅiirə̀ nchyə nɨ nchyə la ŋònə̀ ɨ̀tse à wə̀ a tɨ̀tɨ̀rə̀ pɨghə nɨ ka nɨ̀ zhyə̂ a wɨghə a ye.

²⁷À wə̀ mbə tô a ndzùmə̀ mɨ̀ŋə̀, la ka ǹkùʼnə̀ mə̀ a nɨ ŋuʼnə̀ nkyàa mɨnkɨrə mɨ ɨtabə ɨ̀me.”

²⁸Mɨ̀nwùə̀ mə mɨ̀tsùmə̀ lə̀ lòo alyiʼə amwuə zhyə̀ ndzìnə nchyə Jodànə̀, alyiʼə nɨ Jònə à lə̀ pənə ŋŋâ àkẅiirə̀ nchyə.

²⁹Njyə̂ ɨ̀ lə̀ laanə̀, Jònə a zəənə̀ a Yěsû a pə ntô paatə̀ e, a shwəŋə̀ lo, “Nɨ̀ zəənə̀ a mômbyə̂ ndzìrə̀ Nẅùə̀ wa nɨ à pìʼnə a tɨ̀pòŋə̀ pànə̀ pɨ àtwuə̀ ɨ̀shyə̂ ntsùmə̀ ngwaʼà la.

³⁰Lə̌ ŋònə̀ wa nɨ ndə̀ shwəŋə̀nə ambo pɨghə mbə̀ʼə e lo, ‘Ŋònə̀ ɨ̀tse à wə̀ ntô a ndzùmə̀ mɨ̀ŋə̀ nɨ à tsàarə̀nə mə̀, ntiinə à lə̀ pyə̀nə mbə ghu zaʼà pɨ pòŋə̀ pyə̂ mə̀.’

³¹Ka mɨ̀ŋə̀ àtwuə̀ ɨ̀pɨ̀ŋmə̀ mə̀ ndə̀ zhyə̂ mə a ye; la ɨ̀sùmə nɨ ndə̀ ŋânə àkẅiirə̀ nchyə nɨ nchyə mbə̀ʼə pànə̀ pɨ àlaʼà Israel zhyə̂ e.”

³²Jònə à lə̀ shwəŋə̀ lo, “Ndə̀ zəənə̀ nɨ ɨ̀myə̂ ɨ̀mâ tsaʼnə Àzhwùə̀ Nẅùə̀ a lə̀ shwuʼnə tsaʼa àlwuʼə̀ nfurə̀ a nɨ̀pwuurə̀ ntô ngoŋə̀ aŋunə ze.

³³Ka ndə̀ zhyə̂ mə̀ a ye, la Nẅùə̀ nɨ à lə̀ twuumə̀nə mə̀ lo n̂tô ŋŋâ àkẅiirə̀ nchyə ambo pànə̀ la, à lə̀ shwəŋə̀ ambo mɨ̀ŋə̀ lo, ‘Ŋònə̀ nɨ wə̀ ghǎ zəənə̀ Àzhwùə̀ a shwuʼə̀ nnwuunə̀ aŋunə ze, la ŋònə̀ ghu nɨ à ghǎ ŋâ àkẅiirə̀ nchyə nɨ Àzhwùə̀ Nẅùə̀.’”

³⁴Jònə tyiʼə̀ ndàŋə̀ nɨ mbyə̀ nshwəŋə̀ lo, “Ndzəənə̀ mə, ŋònə̀ wa a Moonə̀ Nẅùə̀.”

³⁵Njyə̂ ɨ̀ lə̀ laanə̀ Jònə a chi mbə alyiʼə ghu pobə ɨ̀zùŋə̀ ndzùmə̀ ɨ̀pe ɨpaa,

³⁶ndzəənə̀ a Yěsû a mə ndàŋə̀ a shwəŋə̀ lo, “Nɨ̀ zəənə̀ a Mômbyə̂ Ndzìrə̀ Nẅùə̀ wa à ẅùə̀ lyə̀!”

³⁷Nkwùə̀ nɨ ɨ̀zùŋə̀ ndzùmə̀ ɨ̀pe pa ɨpaa lə̀ zuʼnə ànwùə̀ nɨ Jònə à lə̀ shwəŋə̀nə la, pobə lə̀ zùŋə̀ a Yěsû.

³⁸Yěsû a pə̀ŋə̀ nnaŋə̀ ndzùmə̀ ndzəənə̀ a ghobə pobə mə ndzùŋə̀ e a pyiitə̀ a ghobə lo, “Nɨ tàʼà àkə?” Pobə kẅùə̀ ambo ze lo, “Rabbi, (nɨ ɨ̀sùmə ɨ̀ pənə lo ɨ̀nèrə̀) Wə̀ chyə̂ ɨghə?”

³⁹Yěsû à lə̀ shwəŋə̀ ambo pobə lo, “Nɨ̀ tô ndzəənə̀.” Lenəla pobə lə̀ lèrə̀ ngə̀ ndzəənə̀ alyiʼə nɨ à lə̀ mənə nchyə̂, ndyə̂ ghu pobə pɨ pobə ntiinə nkwùə̀ ɨ̀ lə̀ làŋə̀nə ntyiʼə̀ tsaʼa pɨ̀nẅùumə̀ nɨ̀kwàa.

⁴⁰Taʼà ŋwùə̀ amwuə pobə pa pɨpaa nɨ pobə lə̀ zuʼnə ànwùə̀ nɨ Jònə à lə̀ shwəŋə̀nə ndzùŋə̀ a Yěsû la, à lə̀ pə Andrù momaa Shimùnə̀ Pità.

⁴¹Andrù à lə̀ tàʼà a ndyimə e Shimùnə̀ Pità nshwəŋə̀ ambo ze lo, “Pəə zəənə̀ a Messiah” nɨ ɨ̀sùmə pənə lo “Ghu ndzoʼnə.” [Pɨ fuŋə̀ a Messiah amwuə àshwəŋnə̀ pɨ̀Greek lo Kristù].

⁴²Tsaʼnə à lə̀ shwəŋə̀nə la, à lə̀ lòo Shimùnə̀ ntô ambo Yěsû. Yěsû a naŋə̀ e nshwəŋə̀ lo, “Ghò la Shimùnə̀ moonə̀ Jònə; pɨ ghǎ tyiʼə̀ fuŋə̀ o nɨ Sefàsə̀.” [Ɨ̀sùmə Sefàsə̀ ɨ̀ pə lo “nɨ̀ghòorə”.]

⁴³Njyə̂ ɨ̀ lə̀ laanə̀ Yěsû a mə ntàʼà lo lèrə̀ a Galìlyə̂, ndzəənə̀ a Filibə̀ nshwəŋə̀ ambo ze lo, “Tô ndzùŋə̀ mə̀.”

⁴⁴Filibə̀ à lə̀ furə̀ a Betsedà nɨ à lə̀ pənə àlaʼà Andrù pobə Pità.

⁴⁵Filibə̀ a zəənə̀ a Nàtanèlə̀ nshwəŋə̀ ambo ze lo, “Pəə zəənə̀ a ŋònə̀ nɨ Mǔsî à lə̀ ŋwàʼnə̀nə amwuə àŋwàʼnə̀ pɨ̀mbòomə nɨ ngàŋə ntwuumə̀ Nẅùə̀ lə̀ kɨnə ŋŋwàʼnə̀ àzobə mbə̀ʼə e. À chyə̂ mbə Yěsû ŋwùə̀ Nazarètə̀, moonə̀ Jòsebə̀.”

⁴⁶Nàtanèlə̀ a pyiitə̀ e lo, “Mbə̀ʼə àzwuumə̀ yè ɨ̀shìʼnə̀ a furə̀ a Nazarètə̀?” Filibə̀ a kẅùə̀ lo, “Tô ndzəənə̀!”

⁴⁷Yěsû a zəənə̀ tsaʼnə Nàtanèlə̀ à pənə ntô nshwəŋə̀ mbə̀ʼə e lo, “Nɨ̀ zəənə̀, lə̌ ngotə ŋwùə̀ Israel nɨ ka pɨ zəənə̀ e àfɨ̀ghə̀ àtse amwuə ze.”

⁴⁸Nàtanèlə̀ a pyiitə̀ e lo, “Wə̀ làŋə̀ ɨla nzhyə̂ mə̀?” Yěsû a Kẅùə̀ lo, “Ǹtə ndzəənə̀ o la nkwùə̀ nɨ wə̀ tənə nnwuunə̀ a ɨ̀sùmə àtɨ̀ghə figə̀ za zaʼà Filibə̀ a pòŋə̀ fuŋə̀ o.”

⁴⁹Nàtanèlə̀ a kẅùə̀ ambo ze lo, “Ɨ̀nèrə̀, ghǒ Moonə̀ Nẅùə̀ nkɨ mbə ɨ̀fò Pɨ̀ Israel!”

⁵⁰Yěsû a kẅùə̀ lo, “Wə̀ pyiimə̀ lə ntiinə ǹshwəŋə̀nə lo ǹtə ndzəənə̀ o wə̀ nwuunə̀ a ɨ̀sùmə àtɨ̀ghə figə̀ la? Wə̌ tô zəənə̀ mɨ̀nwùə̀ mɨ̀ẅùunə nɨ mɨ tsàarə̀nə a mèrə mə.”

⁵¹A chi shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo nɨ̀ ghǎ zəənə̀ nɨ̀pwuurə̀ tsèrə nyaʼkə̀, pəngèrə̀ pɨ Nẅùə̀ mə nkoʼò aŋunə Moonə̀ Ŋwùə̀ nkẅirə̀ nshwuʼə̀.”