Read Pinyin Jònə 11 Bible Online

Jònə 11 - Pinyin bible

Jònə 11

¹Ŋònə̀ ɨ̀tse nɨ nɨ̀linə̀ ɨ̀tse lə̀ pənə Lazarùsə̀ à lə̀ pə ngòonə̀. À lə̀ pə ŋwùə̀ Betanì nɨ à lə̀ pənə àlaʼà pɨ Màriyà pobə momaa e Marətà.

²Màriyà wə̀ à lə̀ pə ẅùə̀ wa nɨ à lə̀ zoʼnə mɨ̀kwùə̀ mɨ Yěsû nɨ mɨ̀ghurə̀ mɨ tsə̂nə ntyiʼə̀ ndòo ɨ̀nyùŋə̀ àtwuə̀ e ndzə̀ə ghu. Lazarùsə̀ wə̀ nɨ à lə̀ pənə momaa e ghu mbyàŋnə̀ à lə̀ pə ngòonə̀.

³Pɨlyimə ɨ̀pe pɨ pə̀ngyə̌ lə̀ tsàa ntwuumə̀ ambo Yěsû nshwəŋə̀ lo, “Ndòʼnə̀mbyə̂, ɨ̀swùə o wa nɨ wə̀ kòŋə̀nə e la à wə̀ ngòonə̀.”

⁴Nkwùə̀ nɨ Yěsû à lə̀ zuʼnə a nɨ̀ghòonə̀ wə̀ la, à lə̀ shwəŋə̀ lo, “Ka nɨ̀ghòonə̀ wə̀ a pə ghɨ̀rə̀ e lo â kwɨghə̀. Nɨ̀ghòonə̀ wə̀ à chyə̂ pə lo pɨ̀ furə̀ aŋunə nguʼtə̀ a Nẅùə̀ nkɨ nguʼtə̀ a Moonə̀ Nẅùə̀.”

⁵Yěsû à lə̀ kòŋə̀ a Marətà nɨ Màriyà momaa e ghu mə̀ngyə̌ pobə Lazarùsə̀.

⁶Nkwùə̀ nɨ à lə̀ zuʼnə lo Lazarùsə̀ a wə̀ ngòonə̀, a lə̀ chi ndyə̂ alyiʼə ghu njyə̂ ɨpaa.

⁷Tsaʼnə njyə̂ zə̀ ɨpaa lə̀ làŋə̀nə, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Pə̀ənə̀ kẅirə̀ ndèrə̀ a Judyà.”

⁸La ɨ̀zùŋə̀ ndzùmə̀ ɨ̀pe shwəŋə̀ ambo ze lo, “Ɨ̀nèrə̀, ka ntyə̌ ɨ̀ sàa e nɨ pɨ̀Jew lə̀ tàʼnə lo tumpə̀ o nɨ mɨ̀ghòorə, wə̀ kùmə̀ nchi ntàʼà lo ghə̀ ghu?”

⁹Yěsû a kẅùə̀ ambo pobə lo, “Yi nɨ̀pìʼnə̀ a ngẅùʼə ngə̀ mbyàa a ngẅènə̀ nẅùumə̀ la pɨ̀nẅùumə̀ ntsòbə̀ ɨpaa? Ŋwùə̀ à tə mmə ngyìinə̀ nɨ njyə̂ a kòntə̀ nkunə̀ e apə̀ ntiinə à wə̀ ndzəənə̀ nkàʼà àtwuə̀ ɨ̀shyə̂ wə̀.

¹⁰La ŋònə̀ ɨ̀tse à tə mmə ngyìinə̀ nɨ ɨ̀twuʼə̀, yi à pɨ kòntə̀ kunə̀ ntiinə ka nkàʼà ɨ pə e amwuə ze.”

¹¹Yěsû a shwəŋə̀ a lenəla, nchi nshwəŋə̀ ambo pobə lo “Ɨ̀swùə ɨ̀wə̀ənə̀ Lazarùsə̀ à wə̀ ndyə̂ lyə̂nə. La mbɨ zhwemnə̀ e â lòo a ɨ̀shyə̂ aŋunə pɨlô ghu.”

¹²Ɨ̀zùŋə̀ ndzùmə̀ ɨ̀pe shwəŋə̀ ambo ze lo, “À tə pə ndyə̂ lyə̂nə yi à pɨ fiitə̀.”

¹³Yěsû à lə̀ shwəŋə̀ la lo, Lazarùsə̀ a kwɨghə̀. La ɨ̀zùŋə̀ ndzùmə̀ ɨ̀pe zuʼù àzobə nkwàŋə̀ pə lo à wə̀ ndyə̂ lyə̂nə.

¹⁴Lenəla, Yěsû a shwəŋə̀ ambo pobə a sàŋə̀ sàŋə̀ lo, “Lazarùsə̀ à kwɨghə̀.

¹⁵Ǹgaʼà lo ka ndə̀ pə mə̀ alyiʼə ghu ntii wɨghə, njiilo nɨ̀ nùŋə̀ ntɨŋmə̀ ɨ̀wɨghə aŋunə mɨ̀ŋə̀. La pə̀ənə̀ lèrə̀ ngə̀ ndzəənə̀ e.”

¹⁶Thomas (nɨ pɨ lə̀ mənə nfuŋə̀ e nɨ moonə̀ nɨ̀fâ) à lə̀ shwəŋə̀ ambo pyə̀ ɨ̀zùŋə̀ ndzùmə̀ Yěsû lo, “Nɨ̀ ghɨ̀rə̀ pə̀ənə̀ lèrə̀ pə̀ənə̀ pɨ pobə, njiilo pə̀ənə̀ chyə̂ kwɨghə̀ pə̀ənə̀ pɨ pobə.”

¹⁷Nkwùə̀ nɨ Yěsû à lə̀ tônə mbyàa alyiʼə ghu, à lə̀ zəənə̀ lo Lazarùsə̀ à lyə̂ mə amwuə nɨ̀shyə̀ mbyàa njyə̂ nɨ̀kwàa.

¹⁸Ka nɨ̀furə̀ a Betanì ndèrə̀ a Yèrusalèmə̀ a lə̀ sàa e; ntyə̌ lə̀ pə tsaʼa pɨ̀marə̀ pɨpaa,

¹⁹pɨ̀Jew pɨ̀noʼnə lə̀ tô a nɨ chàʼtə̀ Marətà pobə Màriyà aŋunə nɨ̀wɨghə̀ nɨ momaa ɨghobə.

²⁰Nkwùə̀ nɨ Marətà à lə̀ zuʼnə lo Yěsû à wə̀ ntô, à lə̀ furə̀ ndèrə̀ a nɨ ghə̀ mbwùumə̀ e, la Màriyà a nwuunə̀ e amwuə ndâ.

²¹Tsaʼnə Marətà à lə̀ zəənə̀nə a Yěsû la, à lə̀ shwəŋə̀ ambo Yěsû lo, “Ndòʼnə̀mbyə̂, wə̀ tə mbəla mbə a nɨ̀ghə̂, yi ka momaa mə̀ wə̀ a kwɨghə̀ e.

²²La tɨ̀tsòŋə̀ wə̀ ǹzhyə̂ lo, wə̀ tə mbyiitə̀ ànwùə̀ àtsùmə̀ ambo Nẅùə̀ yi ǎ ŋâ ambo ghò.”

²³Lenəla, Yěsû a shwəŋə̀ ambo ze lo, “Momaa o à pɨ zhwuumə̀ a nɨ̀wɨghə̀.”

²⁴Marətà a shwəŋə̀ ambo ze lo, “Ǹzhyə̂ lo à ghǎ zhwuumə̀ a nɨ̀wɨghə̀ aŋunə ndẅùutə njyə̂ nɨ pɨ̀kwuə̀ ghǎ zhwuumə̀ a nɨ̀wɨghə̀.”

²⁵Yěsû a shwəŋə̀ ambo ze lo, “Ǹchyə̂ mbə ŋònə̀ nɨ ngwa nzhwuumə̀ pə̀ənə̀ aŋunə nɨ̀wɨghə̀, nkɨ mmə ŋŋâ a nɨ̀chyə̂mbyə̂ ambo pobə. Ŋònə̀ nɨ à nùŋə̀nə ntɨŋmə̀ e aŋunə mɨ̀ŋə̀ mbaa pə tsaʼnə à ghǎ kwɨghə̀, à ghǎ zhwuumə̀ a nɨ̀wɨghə̀.

²⁶Ŋònə̀ ntsùmə̀ nɨ à pənə ghù ntɨ̀ŋnə̀ nkɨ nnùŋə̀ ntɨŋmə̀ e aŋunə mɨ̀ŋə̀ mbə̀ʼə a laʼa nkwɨghə̀ e apə̀. Wə̀ pyiimə̀ a lenə?”

²⁷A kẅùə̀ ambo ze lo, “Ee Ndòʼnə̀mbyə̂, m̀byiimə̀ lo ghǒ Ghù Ndzoʼnə wa, nkɨ mbə Moonə̀ Nẅùə̀ nɨ à lə̀ pənə tô a àtwuə̀ ɨ̀shyə̂.”

²⁸Nkwùə̀ nɨ Marətà à lə̀ shwəŋə̀nə a lenə la, à lèrə̀ ngə̀ nchwùmpə̀ ambo ndyimə e Màriyà lo, “Ɨ̀nèrə̀ à tô mə, mmə ntàʼà a nɨ zəənə̀ o.”

²⁹Màriyà à lə̀ zuʼù a lenə la, ndòo ɨ̀shyə̂ nɨ mɨ̀tɨ̀ŋnə̀ a nɨ ghə̀ ntsirə̀ a Yěsû.

³⁰A lə̀ kɨ pə nkwùə̀ ghu, Yěsû a pirə̀ e pə alyiʼə nɨ Marətà à lə̀ tônə ntsirə̀ e ghu la, mbirə̀ e tə tô mbyàa amwuə àlaʼà.

³¹Nkwùə̀ nɨ pɨ̀Jew nɨ pobə lə̀ pənə amwuə ndâ mmə ndəpə̀ a Màriyà lə̀ zəənə̀nə tsaʼnə à lòonə a ɨ̀shyə̂ nfurə̀ a àpyìinə nɨ mɨ̀tɨ̀ŋnə̀, pobə lə̀ zùŋə̀ e a àpyìinə mmə nkwàŋə̀ lo à lèrə̀ pə àtwuə̀ nɨ̀shyə̀ ghə̀ nwuunə̀ ghu tə yìi.

³²La tsaʼnə à lə̀ tônə ndzəənə̀ a Yěsû la, à lə̀ kunə̀ a mɨ̀kwùə̀ ze nshwəŋə̀ lo, “Ndòʼnə̀mbyə̂, wə̀ lə pəla mbə a nɨ̀ghə̂, yi ka ndyimə mə̀ a lə̀ kwɨghə̀ e.”

³³Nkwùə̀ nɨ Yěsû à lə̀ zəənə̀nə tsaʼnə Màriyà à lə̀ pənə ngyìi pobə pɨ̀Jew nɨ pobə lə̀ zùŋə̀nə e, ànwùə̀ ghu a lə̀ pètə̀ ntɨŋmə̀ e;

³⁴a tyiʼə̀ mbyiitə̀ a ghobə lo, “Nɨ̀ lòʼnə̀ e alyiʼə àkə?” Pobə shwəŋə̀ ambo ze lo, “Ndòʼnə̀mbyə̂ tô ndzəənə̀.”

³⁵Yěsû à lə̀ yìi.

³⁶Lenəla, pɨ̀Jew pɨ̀ghu tyiʼə̀ nshwəŋə̀ lo, “Nɨ̀ zəənə̀ tsaʼnə à lə̀ kòŋə̀nə e!”

³⁷La pobə pɨ̀tse shwəŋə̀ àzobə lo, “Lə̌ ŋònə̀ nɨ à lə̀ ghɨ̀rə̀nə ɨ̀fə̀ a zəənə̀ ɨlyiʼə. Mbə̀ʼə ka a lə̀ kɨ ngɨ̀rə̀ e lo kò ŋònə̀ wə̀ a kwɨghə̀?”

³⁸Ànwùə̀ ghu a lə̀ chi mbètə̀ ntɨŋmə̀ Yěsû; a lèrə̀ a àtwuə̀ nɨ̀shyə̀ Lazarùsə̀. Nɨ̀shyə̀ tsɨ̀ghu lə̀ pə mbwùʼə̀ nɨ pɨ lə̀ nàanə̀nə ntswùə̀ e nɨ nɨ̀ghòorə.

³⁹Yěsû a shwəŋə̀ ambo pobə lo, “Nɨ̀ tsoʼò nɨ̀ghòorə tsə̀ a ntswùə̀ nɨ̀shyə̀ ghə.” Marətà nɨ à lə̀ pənə momaa nkwùə wa a shwəŋə̀ ambo Yěsû lo, “Ndòʼnə̀mbyə̂, à pìʼnə̀ mə a nɨ nẅuʼù, ntiinə à lyə̂ mə amwuə nɨ̀shyə̀ njyə̂ nɨ̀kwàa.”

⁴⁰Yěsû a tyiʼə̀ nshwəŋə̀ ambo Marətà lo, “Yi ndə̀ shwəŋə̀ ambo ghò lo wə̀ tə mbəla nnùŋə̀ ntɨŋmə̀ o aŋunə mɨ̀ŋə̀, yi wə̀ ghǎ zəənə̀ mɨ̀nwùə̀ mɨ̀tɨ̀ŋnə̀ nɨ Nẅùə̀koʼò ǎ ghɨ̀rə̀.”

⁴¹Lenəla, pɨ tsoʼò nɨ̀ghòorə tsa, Yěsû a pə̀ʼkə̀ ɨ̀myə̂ ɨ̀me nnaŋə̀ àtɨ̀ghə nshwəŋə̀ lo “Tǎ, mɨyàa ambo ghò ntiinə wə̀ wa ndzuʼù ànwùə̀ nɨ ngwa nshwəŋə̀.

⁴²Ngə̀ aŋunə mɨ̀ŋə̀, ǹzhyə̂ lo wə̀ wa mbyə̀ ndzuʼù ànwùə̀ nɨ ngwa nshwəŋə̀ ambo ghò, la ǹkùmə̀ ntyiʼə̀ nshwəŋə̀ zə̀ pə mbə̀ʼə pànə̀ pə̀ nɨ pɨ təəmə̀nə a nɨ̀ghə̂, mbə̀ʼə pobə̂ pyiimə̀ lo wə̀ tsàanə mə̀.”

⁴³Tsaʼnə à lə̀ myàanə̀nə a nɨ shwəŋnə̀ la, à lə̀ kyiinə̀ nɨ ɨ̀tɨ̀ŋnə̀ nshwəŋə̀ lo, “Lazarùsə̀ furə̀ ntô.”

⁴⁴Tsaʼnə Yěsû à lə̀ shwəŋə̀nə la, àkwuə̀ ŋwùə̀ ghu a lə̀ zùŋə̀ nfurə̀, mɨ̀kwùə̀ ɨ̀me ghobə mbô ɨ̀me pə mɨ korə̀nə nɨ ɨ̀pàa ɨtsəʼə, atsəʼə a kɨ nkorə̀ farə ɨ̀sɨghə̀ e. Yěsû a shwəŋə̀ ambo pobə lo, “Nɨ̀ kyàatə̀ e mmyàʼtə̀ â lèrə̀.”

⁴⁵Lenəla, pɨ̀Jew pɨ̀noʼnə nɨ pɨ lə̀ tônə a nɨ chàʼtə̀ a Màriyà lə̀ zəənə̀ ànwùə̀ nɨ Yěsû à ghɨ̀rə̀nə ntyiʼə̀ nnùŋə̀ ntɨŋmə̀ aŋunə ze.

⁴⁶La pɨ̀tse pə̀ənə̀ amwuə pobə lə̀ lèrə̀ ngə̀ ntsirə̀ pɨ̀Farìsî ntiitə̀ a ghobə nɨ ànwùə̀ nɨ Yěsû à ghɨ̀rə̀nə.

⁴⁷Lenəla, pɨ̀fò màʼà Nẅùə̀ pobə pɨ̀Farìsî lə̀ shwatə̀ amwuə Kansèrə̀ nshwəŋə̀ lo, “Pə̀ənə̀ ghɨ̀rə̀ lə ɨla? Nɨ̀ zəənə̀ mbuurə̀ ɨ̀lènə̀ ɨ̀nwùə̀ pɨ̀yerə̀nə yerə̀nə nɨ ŋònə̀ wə̀ à wə̀ ngɨ̀rə̀?

⁴⁸Pə̀ənə̀ tə mmyàʼtə̀ lo â lèrə̀ nɨ mbyə̀ yi pànə̀ pɨ̀tsùmə̀ pyiimə̀ e, lenəla ɨ̀twuə̀ àlaʼà Romə̀ tô nshàʼtə̀ Ndâ Mɨ̀shwàʼà Nẅùə̀ pobə àlaʼà àzəənə̀.”

⁴⁹La taʼà ŋwùə̀ ɨghobə ghùtse nɨ pɨ lə̀ mənə nfuŋə̀ nɨ Kayafàsə̀, nɨ à lə̀ pənə àtwuə̀ pɨ̀fò màʼà Nẅùə̀ amwuə nguʼu ghu, a shwəŋə̀ ambo pobə lo, “Ka nɨ̀ zhyə̂ a wɨghə ànwùə̀ àtse;

⁵⁰ka nɨ̀ zhyə̂ a wɨghə lo a pòŋə̀ ambo pɨghə pə lo taʼà ŋwùə̀ â kwɨghə̀ àtwuə̀ nɨ pə̀ənə̀, ntsàarə̀ lo àlaʼà àtsùmə̀ â kwɨghə̀?”

⁵¹Ka à lə̀ shwəŋə̀ e a lenə la àtwuə̀ nɨ ze, tsaʼnə à lə̀ pənə Àtwuə̀ pɨ̀fò màʼà Nẅùə̀ amwuə nguʼu ghu la, à lə̀ tyiʼə̀ nshwəŋnə̀ la tsaʼa ngàŋə̀ ntwuumə̀ Nẅùə̀ lo Yěsû à ghǎ kwɨghə̀ àtwuə̀ nɨ pɨ̀Jew.

⁵²Ka à lə̀ pə kwɨghə̀ e la pə ndàʼà àtwuə̀ nɨ pɨ̀Jew. À lə̀ kwɨghə̀ pə a nɨ shwatə̀ ɨ̀poonə̀ pɨ Nẅùə̀ nɨ pɨ lə̀ sapə̀nə alyiʼə alyiʼə lo pobə̂ tô mbə alyiʼə moʼo.

⁵³A nɨ pìʼnə̀ njyə̂ ghu, ɨ̀twuə̀ pɨ̀Jew tyiʼə̀ ntàʼà a nɨ zhwuutə̀ a Yěsû.

⁵⁴Lenəla ka Yěsû à chi ngyìinə̀ e sàa sàa amwuə pɨ̀Jew. À lə̀ furə̀ alyiʼə ghu ndèrə̀ amwuə pàa àlaʼà ɨ̀tse a nɨ paatə̀ alyiʼə waakə nɨ pɨ lə̀ mənə nfuŋə̀ nɨ Efrèmə̀ ntyiʼə̀ nchyə̂ alyiʼə ghu pobə ɨ̀zùŋə̀ ndzùmə̀ ɨ̀pe.

⁵⁵Njyə̂ Nɨ̀ghaʼà Àlàŋə̀ Mmyàʼtə̀ ɨ̀ lə̀ paatə̀. Pànə̀ pɨ̀noʼnə furə̀ amwuə àlaʼà nkoʼò ndèrə̀ a Yèrusalèmə̀ a nɨ sùu mbɨ̀ŋmə̀ ɨ̀zobə laanə̀ a nɨ zùŋə̀ a mbòomə ɨghobə zaʼà nkwùə̀ Nɨ̀ghaʼà Àlàŋə̀ Mmyàʼtə̀ ɨ̂ pòŋə̀ tô.

⁵⁶Tsaʼnə pobə lə̀ mənə ntàʼà a Yěsû mmə ntô nshwatə̀ àtɨ̀taa Ndâ Mɨ̀shwàʼà Nẅùə̀ a Yèrusalèmə̀ la, pobə lə̀ tyiʼə̀ mbyiitə̀ pobə nɨ pobə lo, “Nɨ̀ kwàŋə̀ àzɨghə lo àkə, tə ǎ tô amwuə nɨ̀ghaʼà wanə?”

⁵⁷A lə̀ kɨ pə la nɨ pɨ̀fò màʼà Nẅùə̀ pobə pɨ̀Farìsî shwəŋə̀ mə lo, ŋwùə̀ à tə mbəla nzhyə̂ alyiʼə nɨ Yěsû à pənə ghu a tô nshwəŋə̀ ambo pobə mbə̀ʼə pɨ ghə̀ nkô e.