Read Pinyin Jònə 12 Bible Online

Jònə 12 - Pinyin bible

Jònə 12

¹À lə̀ pirə̀ mbuŋə̀ njyə̂ ntuurə̀ njyə̂ Nɨ̀ghaʼà Àlàŋə̀ Mmyàʼtə̀ ɨ̂ tô Yěsû a lèrə̀ a Betanì a alyiʼə nɨ Lazarùsə̀ à lə̀ mənə nchyə̂ ghu, nkɨ mbə ẅùə̀ nɨ à lə̀ zhwuumə̀nə e aŋunə nɨ̀wɨghə̀ la.

²Pɨ lə̀ laamə̀ mɨ̀zɨghə̀ ambo ze alyiʼə ghu. Marətà a yèmpə̀ a nɨ ghàbə̀ a mèrə ambo pobə. Lazarùsə̀ à lə̀ pə taʼà ŋwùə̀ amwuə pànə̀ nɨ pɨ lə̀ nwuunə̀nə a nɨ zɨghə̀ mɨ̀zɨghə̀ mə.

³Tsaʼnə pobə lə̀ pirə̀nə mmə ndzɨghə̀ la, Màriyà a pìʼì ntsəŋə̀ mɨ̀ghurə̀ mɨ àzhyǎ mɨ tsə̂nə nɨ pɨ lə̀ tsùŋə̀nə nɨ ndàʼà nadə̀ ntô nkẅìrə̀ aŋunə mɨ̀kwùə̀ mɨ Yěsû, ntyiʼə̀ ndòo ɨ̀nyùŋə̀ àtwuə̀ e ndzə̀ə ghu. Àzhyǎ mɨ̀ghurə̀ yè ɨ̀shìʼnə̀ zə̀ a lə̀ tyiʼə̀ mmə nnẅuʼù amwuə ndâ ntsùmə̀.

⁴La taʼà àzùŋə̀ ndzùmə̀ Yěsû nɨ pɨ lə̀ mənə nfuŋə̀ nɨ Yudà Iskaryòtə̀, nɨ à lə̀ pənə ŋònə̀ nɨ à lə̀ pənə shwùunə̀ e, a pyiitə̀ lo,

⁵“À lə̀ ghɨ̀rə̀ àkə lo kò pɨ shwùunə̀ e mɨ̀ghurə̀ mə nɨ nkabə̀ silbà nkɨrə ɨtarə, [3] ŋŋâ nkabə̀ ghu ambo ngàŋə àfumə̀?”

⁶Ka à lə̀ shwəŋə̀ e a zə pə ntiinə à twuʼtə̀nə mɨ̀lɨŋə̀ aŋunə ngàŋə àfumə̀. À lə̀ shwəŋə̀ pə ntiinə à lə̀ pənə ɨ̀ndzə̀ərə̀. Àpàamə̀ nkabə̀ a lə̀ pə ambo ze, a tyiʼə̀ mmə ngə̀ amwuə nfuukə̀ nkabə̀ ntsùŋə̀ mɨ̀nwùə̀ ɨ̀me ghu.

⁷La Yěsû a kẅùə̀ lo, “Nɨ̀ myàʼtə̀ e. À lə̀ nùŋə̀ a mèrə a nɨ zoʼò mə̀ la aŋunə njyə̂ nɨ pɨ ghǎ tẅəŋə̀ mə̀.

⁸Ngàŋə àfumə̀ pə e pɨghə pɨ pobə pə nkwùə̀ ɨ̀tsùmə̀, la ka mbə pə mə̀ pə̀ənə̀ nkwùə̀ ɨ̀tsùmə̀.”

⁹Nkwùə̀ nɨ àpùŋə̀ pɨ̀Jew lə̀ zuʼnə lo Yěsû à ẅùə̀ alyiʼə ghu, pobə lə̀ tô, ka tô a ghobə pə a nɨ tô ndzəənə̀ e ndàʼà. Pobə lə̀ kɨ ntô farə a nɨ zəənə̀ a Lazarùsə̀ nɨ à lə̀ zhwuumə̀nə e aŋunə nɨ̀wɨghə̀.

¹⁰Lenəla, pɨ̀fò màʼà Nẅùə̀ lə̀ tyiʼə̀ mmə ntàʼà àlàŋə a nɨ zhwuutə̀ a Lazarùsə̀,

¹¹ntiinə pɨ̀Jew pɨ̀noʼnə lə̀ tyiʼnə mmə mmyàʼtə̀ a ghobə ndzùŋə̀ a Yěsû ntii Lazarùsə̀.

¹²Njyə̂ ɨ̀ lə̀ làŋə̀, àpùŋə̀ pə̀ənə̀ nɨ pobə lə̀ tônə aŋunə Nɨ̀ghaʼà Àlàŋə̀ Mmyàʼtə̀ zuʼù lo Yěsû à wə̀ ntô a Yèrusalèmə̀.

¹³Lenəla, pobə lə̀ liitə̀ ɨ̀zaŋə̀ ndèrə̀ ngə̀ mbwùumə̀ e ntyiʼə̀ nkyiinə̀ nshwəŋə̀ lo, “Hòsanà! Pə̀ənə̀ ghuʼtə̀ a ẅùə̀ wa nɨ à wə̀ ntô aŋunə nɨ̀linə̀ nɨ Ndòʼnə̀mbyə̂ nkɨ mbə ɨ̀fò Israel!”

¹⁴Yěsû à lə̀ zəənə̀ ndzàkɨshyə̀ ndòo a zèrə nkoʼò aŋunə tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo,

¹⁵“Pànə̀ pɨ àlaʼà Zayònə̀, kò nɨ̀ pô; nɨ̀ zəənə̀, ɨ̀fò ɨwɨghə a wə̀ ntô, nkoʼò aŋunə moonə̀ ndzàkɨshyə̀.”[4]

¹⁶Amwuə nkwùə̀ ghu, ka ɨ̀zùŋə̀ ndzùmə̀ Yěsû lə̀ zhyə̂ a ghobə ɨ̀sùmə àshwəŋnə̀ zə̀. La nkwùə̀ nɨ Yěsû à lə̀ zhwuumə̀nə a nɨ̀wɨghə̀, nkoʼò ndèrə̀ a nɨ̀pwuurə̀, pobə lə̀ kẅempə̀ lo àŋwàʼnə̀ Nẅùə̀ a lə̀ shwəŋə̀ mə ànwùə̀ zèrə zə mbə̀ʼə e, nkɨ ntyiʼə̀ nkẅempə̀ tsaʼnə pɨ lə̀ ghɨ̀rə̀nə ànwùə̀ zèrə zə̀ aŋunə ze.

¹⁷Àpùŋə̀ pànə̀ za nɨ pobə lə̀ pənə pobə pɨ Yěsû amwuə nkwùə̀ za nɨ à lə̀ zhwuumə̀nə a Lazarùsə̀ aŋunə nɨ̀wɨghə̀ nfuŋə̀ e a furə̀ amwuə nɨ̀shyə̀ la, lə̀ mə ngyìinə̀ nchwìitə̀ ànwùə̀ nɨ pobə lə̀ zəənə̀nə.

¹⁸Lə̌ ɨ̀sùmə ànwùə̀ nɨ pànə̀ pɨ̀noʼnə lə̀ lèrə̀nə a nɨ ghə̀ mbwùumə̀ e ntiinə pobə lə̀ zuʼnə àlènə̀ ànwùə̀ yerə̀nə yerə̀nə zə̀ nɨ à lə̀ ghɨ̀rə̀nə la.

¹⁹Pɨ̀Farìsî nɨ pɨ lə̀ pənə alyiʼə ghu pìʼnə̀ a nɨ shwəŋnə̀ pobə nɨ pobə lo, “Nɨ̀ zəənə̀ tsaʼnə ànwùə̀ zə̀ a tsàarə̀nə mɨ̀tɨ̀ŋnə̀ ɨ̀məənə̀. Pànə̀ pɨ̀tsùmə̀ pə ntyiʼə̀ ndzùŋə̀ pə a ye!”

²⁰Pɨ̀Greek pɨ̀tse lə̀ pə amwuə pànə̀ pa pyə̀ nɨ pobə lə̀ koʼnə ndèrə̀ a Yèrusalèmə̀ a nɨ ghə̀ nguʼtə̀ a Nẅùə̀ nkwùə̀ Nɨ̀ghaʼà Àlàŋə̀ Mmyàʼtə̀.

²¹Pànə̀ pə̀ lə̀ ghə̀ ntsirə̀ a Filibə̀ nɨ à lə̀ pənə ŋwùə̀ Betsedà amwuə àlaʼà Galìlyə̂, nshwəŋə̀ ambo ze lo, “Pəə tàʼà a nɨ zəənə̀ a Yěsû.”

²²Filibə̀ à lə̀ ghə̀ nshwəŋə̀ ambo Andrù; pobə ze ghə̀ nshwəŋə̀ ambo Yěsû.

²³Yěsû a tyiʼə̀ nshwəŋə̀ ambo pobə lo, “Nkwùə̀ ɨ̀ kùʼù ambo Moonə̀ Ŋwùə̀ a nɨ kẅiirə̀ àghuʼtə̀ e.

²⁴Ǹshwəŋə̀ tyìʼə̀ nkǔŋə nkuŋə ambo pɨghə lo mbùmə̀ nkẅùə̀ ɨ̀ tə ghoŋə̀ e tɨ kwɨghə̀ a ɨ̀shyə̂, ɨ̀ ghoŋə̀ zèrə nɨ zèrə. La ɨ̀ tə mbəla nkwɨghə̀, ɨ̀ ghɨ̀rə̀ ngẅàrə̀ nkẅùə̀ noʼnə.

²⁵Ŋònə̀ nɨ à kòŋə̀nə a nɨ̀chyə̂mbyə̂ e à pɨ pî a ẅèrə. La ŋònə̀ nɨ à pàanə̀nə a nɨ̀chyə̂mbyə̂ e a àtwuə̀ ɨ̀shyə̂ ghə ǎ nùŋə̀ a ẅèrə mbə̀ʼə pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀.

²⁶Ŋwùə̀ à tə mbə fàʼà àfàʼà mə̀, a pòŋə̀ lo a zùŋə̀ mə̀ njiilo, alyiʼə nɨ m̀bənə ghu, a pòŋə̀ lo ngàŋə̀ àfàʼà mə̀ â kɨ mbə alyiʼə ghu. Ŋwùə̀ à tə mbəla mmə nfàʼà àfàʼà mə̀ yi Tǎ à pɨ tyiʼə̀ ghuʼtə̀ e.”

²⁷Yěsû a shwəŋə̀ lo, “Tɨ̀tsòŋə̀ wə̀, ntɨŋmə̀ mə̀ ɨ wə̀ nɨ àsòmnə̀; mbɨ shwəŋə̀ lo, ‘Tǎ â fuukə̀ mə̀ amwuə ngəʼə̀ zanə?’ Ngaŋə! La ɨ̀sùmə nɨ ndə̀ tônə a nɨ làŋə̀ amwuə nkwùə̀ ngəʼə̀ zə̀.

²⁸Tǎ ghɨ̀rə̀ nɨ̀linə̀ ɨ̀tsô pə nɨ àghuʼtə̀.” Tsaʼnə à lə̀ shwəŋnə̀ a lenə la, ngyə̀ ɨ̀tse ɨ̀ lə̀ furə̀ a nɨ̀pwuurə̀ nshwəŋə̀ lo, “Ngɨ̀rə̀ mə nɨ̀linə̀ ɨ̀tsâ nɨ pə nɨ àghuʼtə̀, mbə kẅirə̀ ghɨ̀rə̀ lo tsèrə̂ pə nɨ àghuʼtə̀.”

²⁹Àpùŋə̀ pə̀ənə̀ nɨ a lə̀ təəmə̀nə alyiʼə ghu, a zuʼù ngyə̀ ghu nshwəŋə̀ lo, “Nɨ̀fàŋə̀ kyiinə̀.” Pɨ̀tse shwəŋə̀ lo, “À shwəŋnə̀ angèrə̀ ambo ze.”

³⁰Yěsû a shwəŋə̀ ambo pobə lo, “Ka ngyə̀ zə̀ ɨ tə nshwəŋnə̀ e la mbə̀ʼə mə̀, ɨ̀ tə nshwəŋnə̀ la mbə̀ʼə wɨghə.

³¹Tɨ̀tsòŋə̀ wə̀, pɨ̌ saʼà ɨ̀sàʼa pànə̀ pɨ àtwuə̀ ɨ̀shyə̂; tɨ̀tsòŋə̀ wə̀ pɨ̌ shwuʼkə̀ a ɨ̀fò nɨ à pənə àtwuə̀ pànə̀ pɨ àtwuə̀ ɨ̀shyə̂ aŋunə aləŋə nɨ̀fò e kantə̀ e.

³²Nkwùə̀ nɨ pɨ ghǎ ŋaŋə̀ mə̀ a ɨ̀shyə̂ tsàa àtɨ̀ghə, ngǎ lòo a ŋwùə̀ ntsùmə̀ â tô ambo mɨ̀ŋə̀.”

³³À lə̀ shwəŋə̀ zə̀ pə a nɨ nèrə̀ mbuurə̀ nɨ̀wɨghə̀ nɨ à ghǎ kwɨghə̀ a zèrə.

³⁴Àpùŋə̀ pànə̀ pɨ̀ghu a kẅùə̀ ambo ze lo, “Mbòomə ɨwəə à tiitə̀ a wəə lo ka Ghù Ndzoʼnə wa a pə ghǎ kwɨghə̀ e, la wə̀ shwəŋə̀ àzô pə lo pɨ ghǎ ŋaŋə̀ a Moonə̀ Ŋwùə̀ a ɨ̀shyə̂ tsàa àtɨ̀ghə lə ɨla ghu? Moonə̀ Ŋwùə̀ ẅèrə wə̀ a pə ɨ̀wə̌?”

³⁵Yěsû a kẅùə̀ ambo pobə lo, “Nkàʼà mə̀ ɨ̌ kɨrə̀ ambo pɨghə tyìʼə̀ aŋunə mətùmə nkwùə̀. Nɨ̀ làŋə̀ nɨ mbyə̀ ndèrə̀ alyiʼə nɨ nɨ̀ pənə ndèrə̀ nkàʼà wə̀ ɨ̂ pirə̀ mmə nkɨrə̀, mbə̀ʼə ndzùmə ɨ̀ tô nnàanə̀ a wɨghə. Ŋònə̀ nɨ à wa ngyìinə̀ amwuə ndzùmə ka à zhyə̂ e alyiʼə nɨ à mənə ndèrə̀.

³⁶Nɨ̀ nùŋə̀ ntɨŋmə̀ ɨ̀wɨghə aŋunə nkàʼà wə̀ tsaʼnə ɨ pirə̀nə ambo pɨghə. Lenəla, nɨ̀ tyiʼə̀ mbə pànə̀ pɨ nkàʼà.” Yěsû a shwəŋə̀ a lenə la nfurə̀ ngə̀ ndə̀əmə̀ e lo kò pobə chi ndzəənə̀ a ghobə a ye.

³⁷Yěsû à lə̀ patə ngɨ̀rə̀ pə ɨ̀lènə̀ ɨ̀nwùə̀ pɨ̀yerə̀nə yerə̀nə a ɨ̀myə̂ pɨ̀Jew la, ka pobə lə̀ nùŋə̀ a ghobə ntɨŋmə̀ ɨ̀ghobə aŋunə ze.

³⁸Zèrə zə̀ ànwùə̀ a lə̀ furə̀ a nɨ lẅenə̀ ànwùə̀ nɨ ngàŋə̀ ntwuumə̀ Nẅùə̀ Ìsayà à lə̀ shwəŋə̀nə lo, “Ndòʼnə̀mbyə̂, à lə̀ pyiimə̀ ɨ̀wə̌ mbyiimə̀ ntwuumə̀ nɨ pəə lə̀ mənə nchwìitə̀ la? Tǎ à lə̀ nèrə̀ mɨ̀tɨ̀ŋnə̀ ɨ̀me la ambo ɨ̀wə̌?”

³⁹Lenəla, mbə̀ʼə ka pobə lə̀ chi mbyiimə̀ a ghobə ntiinə tyìʼə̀ tsaʼnə Ìsayà à lə̀ shwəŋə̀nə lo,

⁴⁰“Nẅùə̀ à lə̀ nàanə̀ mə ɨ̀myə̂ ɨ̀mobə, nkɨ nkwùukə̀ mɨ̀ntɨŋmə̀ ɨ̀mobə, mbə̀ʼə ɨ̀myə̂ ɨ̀mobə kaŋə zəənə̀ ɨlyiʼə, ɨ̀twuə̀ ɨ̀pobə kɨ nzhyə̂ e ɨ̀nwùə̀ apə̀, pobə kɨ mbə̀ŋə̀ a ghobə ambo mɨ̀ŋə̀ m̂barə̀ a ghobə apə̀.”[5]

⁴¹Ìsayà à lə̀ shwəŋə̀ a lenə la ntiinə à lə̀ zəənə̀nə àghuʼtə̀ Yěsû, nkɨ nshwəŋnə̀ mbə̀ʼə e.

⁴²A lə̀ pə pə a lenə la, pɨ̀tǎ pɨ àlaʼà lə̀ nùŋə̀ mɨ̀ntɨŋmə̀ ɨ̀mobə aŋunə Yěsû. La ka tiitə̀ e a ghobə pɨ̀tse pə̀ənə̀, ntiinə pobə lə̀ pənə mbô lo pɨ̀Farìsî fuukə̀ a ghobə a ndâ àshwatə̀ pɨ̀Jew.

⁴³Pànə̀ pèrə pə lə̀ kòŋə̀ àghuʼtə̀ ŋwùə̀ mɨsoŋə ntsàarə̀ àghuʼtə̀ Nẅùə̀.

⁴⁴Yěsû à lə̀ kyiinə̀ nshwəŋə̀ lo, “Ŋònə̀ wa nɨ à nùŋə̀nə ntɨŋmə̀ e aŋunə mɨ̀ŋə̀, ka à nùŋə̀ e pə aŋunə mɨ̀ŋə̀ ndàʼà, à kɨ nnùŋə̀ farə aŋunə ŋònə̀ wa nɨ à twuumə̀nə mə̀ la.

⁴⁵Ŋònə̀ wa nɨ à zəənə̀nə mə̀, à kɨ ndzəənə̀ la ẅùə̀ wa nɨ à twuumə̀nə mə̀ la.

⁴⁶Ǹtô àtwuə̀ ɨ̀shyə̂ ghə la tsaʼa nkàʼà, lo ŋònə̀ wa ntsùmə̀ nɨ à nùŋə̀nə ntɨŋmə̀ e aŋunə mɨ̀ŋə̀, ka à ghoŋə̀ e amwuə ndzùmə.

⁴⁷Ŋwùə̀ à tə mbəla ndzuʼù àshwəŋnə̀ mə̀ ka nùŋə̀ e a zèrə, ǹchyâ mə̀ ɨ̀sàʼa aŋunə ze apə̀, ntiinə ka ndə̀ tô mə̀ la a nɨ saʼà mɨ̀sàʼa mɨ pə̀ənə̀. Ndə̀ tô pə a nɨ chwarə̀ àtwuə̀ ɨ̀shyə̂.

⁴⁸Ŋònə̀ wa nɨ à twuunə̀nə mə̀, ka kẅiirə̀ e àshwəŋnə̀ mə̀, à chyə̂ nɨ ŋònə̀ nɨ à ghǎ saʼà ɨ̀sàʼa e. Àshwəŋnə̀ mə̀ a ghǎ saʼà ɨ̀sàʼa e aŋunə ndẅùutə njyə̂.

⁴⁹A chyə̂ a lenə la ntiinə ànwùə̀ nɨ ǹshwəŋə̀nə ka ǹshwəŋə̀ mə̀ la nɨ ɨ̀tɨ̀ŋnə̀ mə̀. À ŋâ Tǎ ɨwəə nɨ à lə̀ tsàanə mə̀ ŋŋâ àzwuumə̀ nɨ ǹchyə̂nə a nɨ shwəŋə̀ a zèrə.

⁵⁰Ǹzhyə̂ lo, ntə̌ e ɨ wa ŋŋâ a nɨ̀chyə̂mbyə̂ nɨ à ghoŋə̀nə nɨ nkuŋə̀. Lenəla, ngwə̀ nshwəŋə̀ la ànwùə̀ nɨ Tǎ ɨwəə à tàʼnə lo n̂shwəŋə̀.”