Read Pinyin Jònə 13 Bible Online

Jònə 13 - Pinyin bible

Jònə 13

¹A lə̀ pə njyə̂ nɨ njyə̂ ɨ̌ laanə̀ pɨ̀ zɨghə̀ mɨ̀zɨghə̀ mɨ Nɨ̀ghaʼà Àlàŋə̀ Mmyàʼtə̀, Yěsû à lə̀ zhyə̂ mə lo nkwùə̀ ɨ̀ kùʼù ambo ze a nɨ myàʼtə̀ àtwuə̀ ɨ̀shyə̂ zə̀ kẅirə̀ lèrə̀ ambo Tǎ ɨghobə. Tsaʼnə à lə̀ kòŋə̀nə pə̀ənə̀ ɨ̀pe nɨ pənə àtwuə̀ ɨ̀shyə̂ ghə, à lə̀ kòŋə̀ a ghobə tə mmyàanə̀.

²A lə̀ kɨ pə nkwùə̀ nɨ Yěsû pobə ɨ̀zùŋə̀ ndzùmə̀ ɨ̀pe lə̀ pə ndzɨghə̀ mɨ̀zɨghə̀ mɨ nkwə̌, Satàanə̀ à lə̀ chyâ mə àkwàŋə̀ amwuə ntɨŋmə̀ Yudà Iskaryòtə̀, moonə̀ Shimùnə̀, lo â shwùunə̀ a Yěsû.

³Yěsû à lə̀ zhyə̂ lo Tǎ à ŋâ mə ɨ̀pwuumə̀ ɨ̀tsùmə̀ ambo ze, nkɨ nzhyə̂ lo à lə̀ furə̀ la ambo Nẅùə̀ nkɨ mə ndèrə̀ ambo Nẅùə̀.

⁴Lenəla, à lə̀ lòo alyiʼə mɨ̀zɨghə̀ ghu, ntsoʼtə̀ ɨtsəʼə ɨ̀pe ndòo a tawùrə̀ nkorə̀ a ɨ̀sə̂ ze,

⁵nchyâ nchyə amwuə àkaŋə̀ yè sùunə mbɨ̀ŋmə̀, mbìʼnə̀ a nɨ sùu mɨ̀kwùə̀ mɨ ɨ̀zùŋə̀ ndzùmə̀ ɨ̀pe, ntyiʼə̀ ndòo a tawùrə̀ wa nɨ à lə̀ korə̀nə a ɨ̀sə̂ ze la ndòo ndzə̀ə ghu.

⁶Nkwùə̀ nɨ à lə̀ tônə a nɨ sùu mɨ Shimùnə̀ Pità, Shimùnə̀ Pità à lə̀ pyiitə̀ ambo ze lo, “Ndòʼnə̀mbyə̂, ǎ sùu ghò sùu mɨ̀kwùə̀ ɨ̀mâ?”

⁷Yěsû a kẅùə̀ ambo ze lo, “Ka wə̀ zhyə̂ o ànwùə̀ nɨ ngwə̀ ngɨ̀rə̀ tɨ̀tsòŋə̀, la wə̀ ghǎ zhyə̂.”

⁸Pità a shwəŋə̀ ambo ze lo, “Mbə̀ʼə ka wə̀ laʼa nsùu o mɨ̀kwùə̀ ɨ̀mâ!” Yěsû a kẅùə̀ ambo ze lo, “Ǹtə ngoŋə̀ mə̀ mɨ̀kwùə̀ ɨ̀mô tɨ sùu, wə̀ laʼa mbə o nɨ ànwùə̀ àtse a nɨ ghɨ̀rə̀ pùu apə̀.”

⁹Shimùnə̀ Pità a shwəŋə̀ ambo ze lo, “Ndòʼnə̀mbyə̂, kò wə̀ sùu o pə ndàʼà mɨ̀kwùə̀ ɨ̀mâ, kɨ nsùu mbô ɨ̀mâ pobə àtwuə̀ mə̀.”

¹⁰Yěsû a shwəŋə̀ ambo ze lo, “Ŋònə̀ nɨ à sùu mə mbɨ̀ŋmə̀ e ntsùmə̀, ka à chyə̂ mbə e a nɨ sùu mbɨ̀ŋmə̀. À chyə̂ pə a nɨ sùu ndàʼà mɨ̀kwùə̀ ɨ̀me. La mbɨ̀ŋmə̀ e ntsùmə̀ ɨ̀ laanə̀. Nɨ̀ laanə̀, ndàŋə̀ e taʼà ŋwùə̀ ɨwɨghə.”

¹¹A lə̀ kɨ pə la nɨ à zhyə̂ mə a ŋònə̀ nɨ à shwùunə̀nə e. La ɨ̀sùmə nɨ à lə̀ shwəŋə̀nə lo, “Ka a laanə̀ e pɨghə pɨ̀tsùmə̀.”

¹²À lə̀ myàanə̀ a nɨ sùu mɨ̀kwùə̀ mɨ ɨ̀zùŋə̀ ndzùmə̀ ɨ̀pe pa la, nkẅirə̀ ngẅî a gàanə̀ e nkẅirə̀ nnwuunə̀ aŋunə alyiʼə e, mbyiitə̀ ambo pobə lo, “Nɨ̀ zhyə̂ ɨ̀sùmə ànwùə̀ zə̀ nɨ ǹgɨ̀rə̀nə aŋunə pɨghə la?”

¹³Nshwəŋə̀ ambo pobə lo, “Nɨ̀ wa nfuŋə̀ mə̀ nɨ Ɨ̀nèrə̀, nkɨ mmə nfuŋə̀ mə̀ nɨ Ndòʼnə̀mbyə̂. Nɨ̀ wa nfuŋə̀ a lenə la mmə nshwəŋə̀ tyìʼə̀ nkǔŋə nkuŋə ntiinə ǹchyə̂ mbə la ẅèrə.

¹⁴Ǹtə pəla mbə Ndòʼnə̀mbyə̂ ɨwɨghə nkɨ mbə Ɨ̀nèrə̀ ɨwɨghə, nkɨ nsùu mɨ̀kwùə̀ ɨ̀mɨghə, a kùʼnə̀ lo nɨ̀ kɨ mmə nsùu mɨ̀kwùə̀ mɨ ŋwùə̀ moʼo moʼo.

¹⁵Ǹnèrə̀ a wɨghə la nɨ àlènə̀ ànwùə̀, njiilo nɨ̀ kɨ mmə ngɨ̀rə̀ tsaʼnə ǹgɨ̀rə̀nə aŋunə pɨghə la.

¹⁶Ǹshwəŋə̀ a wɨghə tyìʼə̀ nkǔŋə nkuŋə lo ka ngàŋə̀ àfàʼà a tsàarə̀ e a masàa àfàʼà e. Ka ngàŋə̀ ntwuumə̀ a kɨ ntsàarə̀ e a ŋònə̀ nɨ à twuumə̀nə e.

¹⁷Tsaʼnə nɨ̀ zhyə̂nə ɨ̀nwùə̀ pə la, mborə̀ ɨ̀ za aŋunə pɨghə mbə̀ʼə nɨ̀ pəla mmə ngɨ̀rə̀ a lenə.

¹⁸Ka ǹshwəŋə̀ mə̀ la a wɨghə pɨ̀tsùmə̀; Ǹzhyə̂ mə pə̀ənə̀ pa nɨ ǹtsoʼnə. La zə̀ chyə̂ a nɨ lẅenə̀ ànwùə̀ nɨ àŋwàʼnə̀ Nẅùə̀ a shwəŋə̀ mə lo, ‘Ŋònə̀ wa nɨ à lə̀ zɨghə̀nə àpaanə̀ pəə ze la, à pə̀ŋə̀ ntyiʼə̀ ngàŋə̀ mbwùunə̀ mə̀.’

¹⁹Ngwə̀ nshwəŋə̀ a wɨghə nɨ zə̀ tɨ̀tsòŋə̀ wə̀ zaʼà â pòŋə̀ lòo alyiʼə. Mbə̀ʼə a tənə mbəla ndòo alyiʼə, nɨ̀ pyiimə̀ lo mɨ̀ŋə̌ ŋònə̀ nɨ m̀bənə ẅèrə.

²⁰Ǹshwəŋə̀ tyìʼə̀ nkǔŋə nkuŋə ambo pɨghə lo ŋònə̀ nɨ à kẅiirə̀nə a ŋònə̀ wa nɨ ǹtwuumə̀nə e la à kẅiirə̀ la a gha; ŋònə̀ nɨ à kɨnə nkẅiirə̀ mə̀, à kẅiirə̀ la ẅùə̀ wa nɨ à lə̀ twuumə̀nə mə̀ la.”

²¹Tsaʼnə Yěsû à lə̀ shwəŋə̀nə a lenə la, à lə̀ pə nɨ ntòmnə̀ amwuə ze ka mɨ̀zùŋə, ntyiʼə̀ nshwəŋə̀ a sàŋə̀ sàŋə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo taʼà ŋwùə̀ ɨwɨghə ghùtse ǎ shwùunə̀ mə̀.”

²²Ɨ̀zùŋə̀ ndzùmə̀ ɨ̀pe pə̀ŋə̀ nnaŋə̀ mbɨ̀ŋmə̀ ɨ̀zobə a tyiʼə̀ nkə̀ʼnə̀ a ghobə aŋunə ŋònə̀ nɨ mbə̀ʼə a ghɨ̀rə̀ ntii ànwùə̀ ghu.

²³Taʼà àzùŋə̀ ndzùmə̀ Yěsû nɨ à lə̀ kòŋə̀nə e ka mɨ̀zùŋə a lə̀ nwuunə̀ a nɨ̀pwùnə Yěsû.

²⁴Shimùnə̀ Pità a tyiʼə̀ nkẅàa àzùŋə̀ ndzùmə̀ Yěsû za nshwəŋə̀ ambo ze lo, “Pyiitə̀ e nɨ ŋònə̀ nɨ à wə̀ nshwəŋnə̀ mbə̀ʼə ze la.”

²⁵Tsaʼnə à lə̀ pənə a nɨ̀pwùnə Yěsû la, a tyiʼə̀ mbə̀ŋə̀ mbyiitə̀ a Yěsû lo “Ndòʼnə̀mbyə̂, ŋònə̀ wə̀ nɨ wə̀ wə̀ nshwəŋə̀ lə a ɨ̀wə̌?”

²⁶Yěsû a kẅùə̀ ambo pobə lo, “La ŋònə̀ wa nɨ mbɨ tô tsìnə̀ àpaanə̀ amwuə ɨ̀chyàanə ŋŋâ ambo ze la.” Lenəla, a tsìnə̀ àpaanə̀ amwuə ɨ̀chyàanə ŋŋâ ambo Yudà moonə̀ Shimùnə̀ Iskaryòtə̀.

²⁷Tsaʼnə Yudà à lə̀ kẅiirə̀nə àpaanə̀ za, Satàanə̀ à lə̀ kwuunə̀ a ntɨŋmə̀ ze, Yěsû a shwəŋə̀ ambo ze lo, “Faʼa ngɨ̀rə̀ ànwùə̀ za nɨ wə̀ tàʼnə ghɨ̀rə̀ la.”

²⁸Ka taʼà ŋwùə̀ amwuə àpwùʼə̀ pànə̀ nɨ a lə̀ nwuunə̀nə a ɨ̀shyə̂ mmə ndzɨghə̀ la a lə̀ zhyə̂ e ɨ̀sùmə ànwùə̀ nɨ Yěsû à lə̀ shwəŋə̀nə a lenə la ambo ze.

²⁹Tsaʼnə Yudà à lə̀ pənə ŋònə̀ nɨ à twuʼtə̀nə àpàamə̀ nkabə̀ la, pobə pɨ̀tse lə̀ pə nkwàŋə̀ lo Yěsû à shwəŋə̀ ambo ze pə lo â ghə̀ ndzwuunə̀ ɨ̀pwuumə̀ pɨ̀tse nɨ pobə puŋə̀nə mbə̀ʼə njyə̂ nɨ̀ghaʼà zə̀, kə̀ lo â ghə̀ ŋŋâ ɨ̀pwuumə̀ ambo ngàŋə àfumə̀.

³⁰Yudà a kɨ nkẅiirə̀ àpaanə̀ ghu nkwurə̀, ndzùŋə̀ mmyàʼtə̀ nfurə̀ ndèrə̀ e. Ɨ̀twuʼə̀ sinə̀.

³¹Tsaʼnə Yudà à lə̀ furə̀nə la, Yěsû a shwəŋə̀ ambo pobə lo, “Tɨ̀tsòŋə̀, nɨ̌ zəənə̀ a àghuʼtə̀ Moonə̀ Ŋwùə̀, mbə̀ʼə kɨ làŋə̀ a ndzùmə̀ ze zəənə̀ a àghuʼtə̀ Nẅùə̀

³²Tsaʼnə Nẅùə̀ à pənə nɨ àghuʼtə̀ ndàŋə̀ a ndzùmə̀ Moonə̀ Ŋwùə̀ la, Nẅùə̌ tô lòo e nnùŋə̀ a nɨ̀pwùnə ze, ghuʼtə̀ e nɨ nkuŋə̀.

³³Ɨ̀poonə̀ ɨ̀pâ, ka mbə chi pə mə̀ pə̀ənə̀ aŋunə ntyə̌ sàa. Nɨ̀ ghǎ tyiʼə̀ tàʼà mə̀; la tsaʼnə ndə̀ shwəŋə̀nə ambo pɨ̀Jew la, mbɨ shwəŋə̀ a wɨghə tɨ̀tsòŋə̀ lo, ‘Alyiʼə nɨ ngwə̀ ndèrə̀ ghu, mbə̀ʼə nɨ̀ tô a wɨghə apə̀.’

³⁴Ngwə̀ ŋŋâ a wɨghə nɨ ntə̌ ghù shwuə̀ lo nɨ̀ tə nkòŋə̀ mbɨ̀ŋmə̀ ɨ̀zɨghə. Tsaʼnə ǹkòŋə̀nə a wɨghə la, nɨ̀ tə nkòŋə̀ mbɨ̀ŋmə̀ ɨ̀zɨghə a lenə.

³⁵Nɨ̀ tə mə nkòŋə̀ mbɨ̀ŋmə̀ ɨ̀zɨghə, yi ŋwùə̀ ntsùmə̀ ǎ zhyə̂ lo pɨghə la ɨ̀zùŋə̀ ndzùmə̀ ɨ̀pâ.”

³⁶Tsaʼnə Yěsû à lə̀ myàanə̀nə nshwəŋə̀ a zə ànwùə̀ la, Shimùnə̀ Pità à lə̀ pyiitə̀ ambo ze lo, “Ndòʼnə̀mbyə̂, wə̀ lèrə̀ ɨghə?” Yěsû a kẅùə̀ lo. “Ngwə̀ ndèrə̀ a alyiʼə àtse nɨ mbə̀ʼə wə̀ zùŋə̀ o a gha tɨ̀tsòŋə̀ apə̀. La wə̌ tyiʼə̀ zùŋə̀ mə̀ amwuə yɨ̀tse nkwùə̀.”

³⁷Pità a pyiitə̀ ambo ze lo, “Ndòʼnə̀mbyə̂, mbə̀ʼə ka ǹdzùŋə̀ mə̀ a ghò tɨ̀tsòŋə̀ ntii àkə? A tə mbə pə nɨ̀wɨghə̀ yi mbɨ ŋâ nɨ̀chyə̂mbyə̂ mə̀ mbə̀ʼə o.”

³⁸Yěsû a pyiitə̀ ambo ze lo, “Wə̀ lanə nchwuʼtə̀ mbɨ̀ŋmə̀ a nɨ pî nɨ̀chyə̂mbyə̂ o mbə̀ʼə mə̀? Ǹshwəŋə̀ tyìʼə̀ nkǔŋə nkuŋə ambo ghò lo, ankəʼə à ghǎ kɨ toŋə̀ nɨ ɨ̀twuʼə̀ wə̀ twuunə̀ mə̀ nkwùə̀ ɨtarə.”