Read Pinyin Jònə 15 Bible Online

Jònə 15 - Pinyin bible

Jònə 15

¹Yěsû a chi ndàŋə̀ nɨ mbyə̀ nshwəŋə̀ lo “Mɨ̀ŋə̌ ngotə àtɨ̀ghə mɨ̀ntàamə mɨ mɨ̀lùʼù, Tǎ ɨwəə a pə ŋònə̀ nɨ à wa nnaŋə̀ mɨ̀tɨ̀ghə mèrə mə.

²À wa ntserə̀ mɨ̀fàa ma aŋunə mɨ̀ŋə̀ nɨ mèrə ma ka zumə̀ e mɨ̀ntàamə ngwaʼà, mmə nshàbə̀ a myə̀ nɨ mèrə ma ndzumə̀ mɨ̀ntàamə njiilo mèrə tsùŋə̀ ndzumə̀ mɨ̀ntàamə mɨ̀noʼnə.

³Àshwəŋnə̀ za nɨ ǹshwəŋə̀nə ambo pɨghə la a ghɨ̀rə̀ mə nɨ̀ laanə̀.

⁴Nɨ̀ ghoŋə̀ mbə taʼà ŋwùə̀ pə̀ənə̀. Mbə̀ʼnə ka nɨ̀fàa nɨ àtɨ̀ghə nɨ zumə̀ e mɨ̀ntàamə tsèrə nɨ tsèrə. Tsèrə chyə̂ zumə̀ mɨ̀ntàamə mbə̀ʼə nɨ ghoŋə̀ aŋunə ma àtɨ̀ghə. Nɨ ndwuumə̀ wə̀, mbə̀ʼə nɨ̀ kɨ ndzùmə̀ a wɨghə mɨ̀ntàamə apə̀, ndàŋə̀ e lo nɨ̀ ghoŋə̀ mbə taʼà ŋwùə̀ pə̀ənə̀.

⁵“Mɨ̀ŋə̌ àtɨ̀ghə mɨ̀ntàamə mɨ mɨ̀lùʼù, nɨ̀ pə mɨ̀fàa. Ŋònə̀ wa nɨ à ghoŋə̀nə mbə taʼà ŋwùə̀ pəə ze la, ǹkɨ ngoŋə̀ mbə taʼà ŋwùə̀ pəə ze, à ghǎ zumə̀ mɨ̀ntàamə mɨ àtɨ̀ghə mɨ̀noʼnə ntiinə à tə pwuə̀ e mɨ̀ŋə̀, nɨ̀ ghɨ̀rə̀ a wɨghə ànwùə̀ àtse apə̀.

⁶Ŋwùə̀ à tə ka ghoŋə̀ e lo pə taʼà ŋwùə̀ pəə ze, Tǎ ɨwəə a waʼà e la tsaʼa nɨ̀fàa nɨ àtɨ̀ghə nɨ pɨ tserə̀nə. Mbuurə̀ mɨ̀fàa za chyə̂ e pə a nɨ shwatə̀ ntòonə̀ lo mɨ sɨghə̀.

⁷Nɨ̀ tɨ ghoŋə̀ mbə taʼà ŋwùə̀ pə̀ənə̀, àshwəŋnə̀ mə̀ a kɨ ngoŋə̀ amwuə pɨghə, yi àzwuumə̀ àtsùmə̀ za nɨ nɨ̀ pyiitə̀nə, nɨ̌ pə nɨ zèrə.

⁸Tǎ ɨwəə à wa mbə nɨ àghuʼtə̀ nkwùə̀ nɨ nɨ̀ zumə̀nə mɨ̀ntàamə mɨ̀noʼnə. Nɨ ndwuumə̀ wə̀, nɨ̌ tyiʼə̀ nèrə̀ ɨ̀pɨ̀ŋmə̀ ɨ̀wɨghə lo pɨghə la ɨ̀zùŋə̀ ndzùmə̀ ɨ̀pâ.

⁹Ǹkòŋə̀ a wɨghə tyìʼə̀ tsaʼnə Tǎ à kòŋə̀nə mə̀. Nɨ̀ ghoŋə̀ amwuə ɨ̀kòŋnə̀ mə̀.

¹⁰Nɨ̀ tə mə ndzuʼnə̀ mɨ̀ntə̌ ɨ̀mâ, yi nɨ̌ ghoŋə̀ amwuə ɨ̀kòŋnə̀ mə̀, tyìʼə̀ tsaʼnə ǹdzuʼnə̀nə mɨ̀ntə̌ mɨ Tǎ ɨwəə nkɨ ngoŋə̀ amwuə ɨ̀kòŋnə̀ e.

¹¹“Ǹshwəŋə̀ a wɨghə nɨ mɨ̀nwùə̀ mə mɨ̀tsùmə̀ la lo nɨ̀ghaʼà mə̀ a pə amwuə pɨghə. Lenəla, nɨ̀ghaʼà ɨwɨghə â lẅenə̀.

¹²Ntə̌ mə̀ ambo pɨghə ɨ chyə̂ la lo nɨ̀ kòŋə̀ mbɨ̀ŋmə̀ ɨ̀zɨghə tyìʼə̀ tsaʼnə ǹkòŋə̀nə a wɨghə.

¹³Ŋwùə̀ à tə pəla mbî a nɨ̀chyə̂mbyə̂ e ntii ɨ̀swùə e, yi zèrə zə a nèrə̀ la lo à kòŋə̀ e ndàŋə̀ àndànə̀ wa nɨ mbə̀ʼə ŋwùə̀ a kòŋə̀ a ghùtse ŋwùə̀.

¹⁴Nɨ̀ chyə̂ mbə la pɨ̀swùə ɨ̀pâ mbə̀ʼə nɨ̀ pəla mmə ngɨ̀rə̀ mɨ̀nwùə̀ nɨ ǹshwəŋə̀nə a wɨghə lo nɨ̀ ghɨ̀rə̀ la.

¹⁵Ka ǹchi mbirə̀ nfuŋə̀ a mə̀ a wɨghə nɨ ngàŋə àfàʼà, ntiinə mbə̀ʼə ka ngàŋə àfàʼà zhyə̂ a ghobə ànwùə̀ za nɨ masàa ɨghobə à wə̀ ngɨ̀rə̀. La m̀mə nfuŋə̀ a wɨghə nɨ pɨ̀swùə ɨ̀pâ, ntiinə ǹshwəŋə̀ mə a wɨghə nɨ mɨ̀nwùə̀ mɨ̀tsùmə̀ nɨ ǹdzuʼnə ambo Tǎ ɨwəə.

¹⁶Ka à lə̀ tsoʼò e pɨghə ntsoʼò mə̀ tsaʼa masàa ɨwɨghə. À lə̀ tsoʼò mɨ̀ŋə̀ ntsoʼò a wɨghə mmə ŋŋâ a wɨghə nɨ àfàʼà lo nɨ̀ lèrə̀ ngə̀ mbìʼnə̀ a nɨ zumə̀ mɨ̀ntàamə; mɨ̀ntàamə nɨ mɨ ghoŋə̀ nɨ nkuŋə̀. Lenəla, Tǎ a ŋâ a wɨghə nɨ àzwuumə̀ àtsùmə̀ nɨ nɨ̀ pyiitə̀nə aŋunə nɨ̀linə̀ ɨ̀tsâ.

¹⁷Lə̌ ànwùə̀ nɨ ǹtàʼnə lo nɨ̀ ghɨ̀rə̀ la: Nɨ̀ kòŋə̀ mbɨ̀ŋmə̀ ɨ̀zɨghə.

¹⁸“Pànə̀ pɨ àtwuə̀ ɨ̀shyə̂ tə pəla mbàanə̀ a wɨghə, nɨ̀ kẅuumə̀ lo pobə lə̀ pyə̀ mbàanə̀ la a gha.

¹⁹Nɨ̀ tə pə tsaʼa pànə̀ pɨ àtwuə̀ ɨ̀shyə̂, yi pànə̀ pɨ àtwuə̀ ɨ̀shyə̂ kòŋə̀ a wɨghə tsaʼa ɨ̀pobə pə̀ənə̀. La ndə̀ tsoʼò mə a wɨghə nfuukə̀ amwuə pànə̀ pɨ àtwuə̀ ɨ̀shyə̂. Ka pobə chi ndòo a ghobə a wɨghə tsaʼa ɨ̀pobə pə̀ənə̀. La ɨ̀sùmə nɨ ka pobə chi nkòŋə̀ a ghobə a wɨghə la.

²⁰Nɨ̀ kẅuumə̀ ànwùə̀ nɨ ndə̀ shwəŋə̀ mə ambo pɨghə: ‘Ka ngàŋə̀ àfàʼà a tsàarə̀ e a masàa e.’ Pobə lə pəla nnyàŋə̀ mə̀, yi pobə ghǎ kɨ nyàŋə̀ a wɨghə. Pobə lə̀ pəla ngɨ̀rə̀ ànwùə̀ nɨ ndə̀ shwəŋə̀nə ambo pobə, yi pobə ghǎ kɨ ghɨ̀rə̀ a zhyə̀ nɨ nɨ̀ shwəŋə̀nə ambo pobə.

²¹La pobə ghǎ ghɨ̀rə̀ mɨ̀nwùə̀ mə mɨ̀tsùmə̀ aŋunə pɨghə ntiinə nɨ̀ pənə pə̀ənə̀ ɨ̀pâ. Pobə ghǎ ghɨ̀rə̀ a lenə ntiinə ka pobə zhyə̂ a ghobə a ŋònə̀ nɨ a lə̀ twuumə̀nə mə̀.

²²Ndə̀ pəla ngwaʼà tɨ tô nshwəŋnə̀ ambo pobə, yi ka pobə lə̀ zhyə̂ a ghobə lo pobə ghɨ̀rə̀ ànwùə̀ tɨ̀pòŋə̀. La tɨ̀tsòŋə̀ wanə, ka àlàŋə a pə e ghu nɨ mbə̀ʼə pobə shwəŋə̀ lo pobə lə̀ mə ngɨ̀rə̀ a tɨ̀pòŋə̀ la ka zhyə̂ a ghobə.

²³Ŋònə̀ wa nɨ à pàanə̀nə mə̀, à kɨ mbàanə̀ a Tǎ ɨwəə.

²⁴Ndə̀ pəla mbirə̀ tɨ tô ngɨ̀rə̀ ànwùə̀ nɨ ŋwùə̀ à pirə̀ mə e tɨ tô ngɨ̀rə̀ a ɨ̀myə̂ pobə, yi ka pobə ghɨ̀rə̀ a ghobə ànwùə̀ tɨ̀pòŋə̀. La tɨ̀tsòŋə̀ wanə, pobə zəənə̀ mə mɨ̀nwùə̀ mə ntyiʼə̀ mbàanə̀ mə̀ pəə Tǎ ɨwəə.

²⁵“La zə̀ chyə̂ a nɨ lẅenə̀ ànwùə̀ nɨ a pənə amwuə àŋwàʼnə̀ mbòomə àzobə lo ‘pobə lə̀ pàanə̀ mə̀ àfǐfǐ.’

²⁶“Ẅùə̀ nɨ ǎ yèmpə̀ a wɨghə à ghǎ tô la nɨ Àzhwùə̀ nɨ a za nnèrə̀ a nkǔŋə nkuŋə, nfurə̀ ambo Tǎ. Mbɨ tsàa e, a furə̀ ambo Tǎ ntô shwəŋnə̀ mbə̀ʼə mə̀.

²⁷Nɨ̌ kɨ pə pànə̀ pyə̀ nɨ nɨ̌ kɨ shwəŋnə̀ àzɨghə mbə̀ʼə mə̀, ntiinə nɨ̀ lə̀ pənə pə̀ənə̀ a nɨ̀pìʼnə̀.”