Read Pinyin Jònə 17 Bible Online

Jònə 17 - Pinyin bible

Jònə 17

¹Tsaʼnə Yěsû à lə̀ myàanə̀nə a nɨ təətə̀ ɨ̀zùŋə̀ ndzùmə̀ ɨ̀pe, à lə̀ pə̀ʼkə̀ ɨ̀myə̂ ɨ̀me nnaŋə̀ àtɨ̀ghə, nshwəŋə̀ lo, “Tǎ, nkwùə̀ ɨ̀ kùʼù lo wə̀ ghuʼtə̀ a moonə̀ o mbə̀ʼə moonə̀ o a kɨ nguʼtə̀ o.

²Wə̀ lə̀ ŋâ e nɨ ɨ̀tɨ̀ŋnə̀ àtwuə̀ ŋwùə̀ ntsùmə̀ mbə̀ʼə â ŋâ a nɨ̀chyə̂mbyə̂ wa nɨ à ghoŋə̀nə nɨ nkuŋə̀ ambo pànə̀ pyə̀ nɨ wə̀ ŋânə ambo ze.

³Nɨ̀chyə̂mbyə̂ nɨ à ghoŋə̀nə nɨ nkuŋə̀ à chyə̂ la lo pànə̀ zhyə̂ lo wə̀ la ndàʼà Nẅùə̀ nɨ à pənə nkǔŋə nkuŋə, nkɨ nzhyə̂ a Yěsû Kristù nɨ wə̀ tsàanə.

⁴Ndə̀ ghuʼtə̀ o amwuə àtwuə̀ ɨ̀shyə̂ tsaʼnə ndə̀ myàanə̀nə àfàʼà za nɨ wə̀ lə̀ ŋânə ambo mɨ̀ŋə̀ lo n̂fàʼà la.

⁵Tǎ, ghuʼtə̀ mə̀ tɨ̀tsòŋə̀ a mbyə̀ ghò, n̂tyiʼə̀ mbə nɨ àghuʼtə̀ za nɨ wə̀ lə̀ pyə̀ mə nguʼtə̀ mə̀ nɨ zèrə̀ zaʼà àtwuə̀ ɨ̀shyə̂ zə̀ a pòŋə̀ pə.

⁶Ndə̀ ghɨ̀rə̀ pànə̀ pa nɨ wə̀ lə̀ fuukə̀nə amwuə àtwuə̀ ɨ̀shyə̂ ŋŋâ ambo mɨ̀ŋə̀ la pobə zhyə̂ o. À lə̀ pə pə̀ənə̀ ɨ̀pô, la wə̀ ŋâ a ghobə ambo mɨ̀ŋə̀ pobə kɨ nnùŋə̀ àshwəŋnə̀ o.

⁷Pobə zhyə̂ tɨ̀tsòŋə̀ wə̀ lo àzwuumə̀ àtsùmə̀ nɨ wə̀ ŋânə ambo mɨ̀ŋə̀ a furə̀ la ambo ghò.

⁸Ndə̀ ŋâ ntwuumə̀ nɨ wə̀ lə̀ ŋânə lo ŋ̂ŋâ ambo pobə; pobə kɨ nzhyə̂ nkǔŋə nkuŋə lo ǹfurə̀ a nɨ̀pwùnə ghò, nkɨ mbyiimə̀ lo wə̀ lə̀ tsàa a mə̀.

⁹Ngwa nchàʼtə̀ a Nẅùə̀ àtwuə̀ pobə. Ka mə chàʼtə̀ mə̀ pə mbə̀ʼə pànə̀ pɨ àtwuə̀ ɨ̀shyə̂, ǹchàʼtə̀ pə àtwuə̀ pànə̀ pa nɨ wə̀ lə̀ ŋânə ambo mɨ̀ŋə̀ la ntiinə à pə̀ənə̀ ɨ̀pô.

¹⁰Pə̀ənə̀ ɨ̀pâ la ɨ̀pô, ɨ̀pô kɨ mbə ɨ̀pâ, pɨ tyiʼə̀ ndàŋə̀ a ndzùmə̀ pobə ndzəənə̀ àghuʼtə̀ mə̀.

¹¹Ngwə̀ ntô ambo ghò tɨ̀tsòŋə̀; ka ǹchi mbirə̀ mə̀ amwuə àtwuə̀ ɨ̀shyə̂ zə̀ la pobə pirə̀ amwuə àtwuə̀ ɨ̀shyə̂. Tǎ ghù ndaanə̀nə, pyamnə̀ a ghobə nɨ ɨ̀tɨ̀ŋnə̀ nɨ̀linə̀ ɨ̀tsô nɨ wə̀ lə̀ ŋânə ambo mɨ̀ŋə̀. Wə̀ pyamnə̀ a ghobə njiilo pobə pə taʼà ŋwùə̀ tsaʼnə pùu kɨnə mbə taʼà ŋwùə̀.

¹²Aŋunə nkwùə̀ nɨ ndə̀ pənə pəə pɨ pobə, ndə̀ pyamnə̀ a ghobə nɨ ɨ̀tɨ̀ŋnə̀ ẅùə̀ nɨ ɨ pənə aŋunə nɨ̀linə̀ ɨ̀tsô. Ndə̀ pyamnə̀ a ghobə ka taʼà ŋwùə̀ ɨghobə ɨ̀tse a pî e ndàŋə̀ e taʼà ŋwùə̀ nkɨ mbə ŋònə̀ nɨ à lə̀ pənə pî mbə̀ʼə ànwùə̀ zhyə̀ nɨ pɨ ŋwàʼnə̀nə amwuə àŋwàʼnə̀ Nẅùə̀ a pwùumə̀.

¹³Ngwə̀ ntô tsirə̀ o tɨ̀tsòŋə̀ wə̀, la ǹshwəŋə̀ mɨ̀nwùə̀ mə mbirə̀ àtwuə̀ ɨ̀shyə̂ ghə la mbə̀ʼə nɨ̀ghaʼà mə̀ a lẅenə̀ amwuə mɨ̀ntɨŋmə̀ ɨ̀mobə.

¹⁴Ndə̀ chwìitə̀ ntwuumə̀ o ambo pobə la pànə̀ pɨ àtwuə̀ ɨ̀shyə̂ ghə pàanə̀ a ghobə ntiinə ka pobə pə ghobə pànə̀ pɨ àtwuə̀ ɨ̀shyə̂, tyìʼə̀ tsaʼnə ka ǹkɨ mbə mə̀ ŋwùə̀ àtwuə̀ ɨ̀shyə̂.

¹⁵Ka m̀mə nchàʼtə̀ mə̀ a Nẅùə̀ la lo wə̀ fuukə̀ a ghobə amwuə àtwuə̀ ɨ̀shyə̂ ghə, ngwə̀ ǹchàʼtə̀ la lo wə̀ pyamnə̀ a ghobə mbə̀ʼə ŋònə̀ tɨ̀pòŋə̀ wa a ghɨ̀rə̀ ànwùə̀ aŋunə pobə.

¹⁶Ka pobə pə ghobə pànə̀ pɨ àtwuə̀ ɨ̀shyə̂ ghə, tyìʼə̀ tsaʼnə ka ǹkɨ mbə mə̀ ŋwùə̀ àtwuə̀ ɨ̀shyə̂ ghə.

¹⁷Tsoʼò a ghobə ngɨ̀rə̀ pobə̂ pòŋə̀ ndàŋə̀ a ndzùmə̀ ànwùə̀ nɨ a pòŋə̀nə nzhyə̂ o; àshwəŋnə̀ o â pə nkǔŋə nkuŋə.

¹⁸Tsaʼnə wə̀ lə̀ twuumə̀nə mə̀ ambo pànə̀ pɨ àtwuə̀ ɨ̀shyə̂ ghə la, kɨ ntsàa ghobə ambo pànə̀ pɨ àtwuə̀ ɨ̀shyə̂ ghə.

¹⁹Ŋ̀ŋâ mbɨ̀ŋmə̀ mə̀ a nɨ fàʼà àfàʼà o ntii ghobə njiilo pobə kɨ ŋŋâ mbɨ̀ŋmə̀ ɨ̀zobə a nɨ fàʼà àfàʼà o nɨ nkǔŋə nkuŋə.

²⁰“Ka m̀mə nchàʼtə̀ mə̀ a Nẅùə̀ pə mbə̀ʼə pobə ndàʼà, ngwa nkɨ nchàʼtə̀ a Nẅùə̀ àtwuə̀ pyə̀ pa nɨ pɨ nùŋə̀nə ntɨŋmə̀ ɨ̀ghobə aŋunə mɨ̀ŋə̀ ndàŋə̀ a ndzùmə̀ àshwəŋnə̀ àzobə.

²¹Ngwə̀ ndoonə̀ ambo ghò Tǎ lo, wə̀ ghɨ̀rə̀ pobə̂ pə taʼà ŋwùə̀, tsaʼnə pùu kɨnə mbə taʼà ŋwùə̀. Ghɨ̀rə̀ lo pobə̂ pwuutə̀ mbə taʼà ŋwùə̀ pə̀ənə̀ pɨ pobə mbə̀ʼə pànə̀ pɨ àtwuə̀ ɨ̀shyə̂ pyiimə̀ lo à lə̀ twuumə̀ ghò ntwuumə̀ mə̀.

²²Ndə̀ kɨ ŋŋâ àghuʼtə̀ za nɨ wə̀ lə̀ ŋânə ambo mɨ̀ŋə̀ la ambo pobə lo pobə̂ pə taʼà ŋwùə̀ tsaʼnə pùu kɨnə mbə taʼà ŋwùə̀ la.

²³Ghɨ̀rə̀ lo pobə̂ pwuutə̀ pəə pɨ pobə tsaʼnə ndə̀ kɨnə mbwuutə̀ pùu mbə taʼà ŋwùə̀ mbə̀ʼə pànə̀ pɨ àtwuə̀ ɨ̀shyə̂ zəənə̀ lo à lə̀ twuumə̀ ghò ntwuumə̀ mə̀, ntyiʼə̀ nkòŋə̀ a ghobə tsaʼnə wə̀ kòŋə̀nə mə̀.

²⁴“Tǎ! Ǹtàʼà lo pànə̀ pa nɨ wə̀ lə̀ ŋânə ambo mɨ̀ŋə̀ la pobə ghǎ mbə alyiʼə gha nɨ ngǎ pə ghu, mbə̀ʼə pobə̂ zəənə̀ àghuʼtə̀ mə̀; àghuʼtə̀ za nɨ wə̀ lə̀ ŋânə ambo mɨ̀ŋə̀ zaʼà nɨ̀pwuurə̀ ghobə àtwuə̀ ɨ̀shyə̂ pòŋə̀ pìʼnə̀.

²⁵Tǎ nɨ mɨ̀nwùə̀ ɨ̀me təəmə̀nə, ka pànə̀ pɨ àtwuə̀ ɨ̀shyə̂ zhyə̂ a ghobə a ghò la ǹzhyə̂ o. Pànə̀ pə kɨ nzhyə̂ lo à lə̀ twuumə̀ ghò ntwuumə̀ mə̀.

²⁶Ndə̀ ghɨ̀rə̀ pobə zhyə̂ o, mbə kɨ làŋə̀ nɨ mbyə̀ ghɨ̀rə̀ pobə̂ zhyə̂ o, mbə̀ʼə pəə pɨ pobə tyiʼə̀ mbwuutə̀ mbə taʼà ŋwùə̀.”