Read Pinyin Jònə 19 Bible Online

Jònə 19 - Pinyin bible

Jònə 19

¹Lenəla, Palètə̀ à lə̀ lòo a Yěsû ŋŋâ pɨ kəʼə̀ e.

²Pɨ lə̀ lòo mɨ̀fàa mɨ kɨkobə mbaʼà tsaʼa tɨ̀làarə̀ ntuŋə̀ àtwuə̀ ze, ntyiʼə̀ ngẅî atsəʼə yè pàŋə̀nə àtse aŋunə ze,

³mbìʼnə̀ a nɨ nyèŋə̀ e nshwəŋə̀ lo, “Pəə pə nchàʼtə̀ o mbǎ ɨ̀fò pɨ̀Jew!” Pobə shwəŋə̀ a lenə la ntyiʼə̀ ndùbə̀ mɨ̀ghə̀ʼə̀ ɨ̀me.

⁴Palètə̀ a kẅirə̀ nfurə̀ a àpyìinə nshwəŋə̀ ambo àpùŋə̀ pə̀ənə̀ za lo, “Nɨ̀ zəənə̀, mbɨ lòo e furə̀ a àpyìinə a mbyə̀ pɨghə mbə̀ʼnə ka ǹdzəənə̀ a mə ànwùə̀ tɨ̀pòŋə̀ àtse nɨ à ghɨ̀rə̀nə nɨ mbə̀ʼə pɨ zhwuutə̀ e aŋunə.”

⁵Yěsû a tyiʼə̀ nfurə̀ nɨ atsəʼə pàŋə̀nə a mbɨ̀ŋmə̀ ze nɨ tɨ̀làarə̀ pɨ̀kɨkobə àtwuə̀ ze. Palètə̀ a shwəŋə̀ ambo pobə lo “Ŋònə̀ ghu à wə̀ lə!”

⁶Pɨ̀fò màʼà Nẅùə̀ pobə ngàŋə mbyabə̀ ɨlyiʼə àzobə lə̀ zəənə̀ Yěsû la nkyiinə̀ shwəŋə̀ lo, “Kẅùumə̀ e aŋunə àtɨ̀ghə pànkə̀nə!” Palètə̀ a kẅùə̀ ambo pobə lo, “Nɨ̀ lòo e ngə̀ nkẅùumə̀ tyìʼə̀ pɨghə ntiinə ka ǹdzəənə̀ mə̀ ànwùə̀ tɨ̀pòŋə̀ ɨ̀tse nɨ à ghɨ̀rə̀nə nɨ mbə̀ʼə pɨ kẅùumə̀ e aŋunə.”

⁷Pɨ̀Jew pa kẅùə̀ ambo ze nɨ mɨ̀tɨ̀ŋnə̀ lo, “Pəə pa nɨ mbòomə nɨ à nèrə̀nə lo à chyə̂ a nɨ kwɨghə̀, ntiinə à wa nnèrə̀ lo ze la Moonə̀ Nẅùə̀.”

⁸Nkwùə̀ nɨ Palètə̀ à lə̀ zuʼnə ànwùə̀ zə̀, àkẅàrə̀ a lə̀ chi nkwuunə̀ e ka mɨ̀zùŋə,

⁹a kẅirə̀ nkwuunə̀ amwuə ntoʼò mbyiitə̀ a Yěsû lo, “Wə̀ furə̀ àzô la ɨghə?” La ka Yěsû a kẅùə̀ e ànwùə̀ àtse.

¹⁰Palètə̀ a shwəŋə̀ ambo ze lo, “Wə̀ twuunə̀ o a nɨ shwəŋnə̀ ambo mɨ̀ŋə̀? Ka wə̀ zhyə̂ o lo ǹchyə̂ nɨ ɨ̀tɨ̀ŋnə̀ a nɨ ghɨ̀rə̀ pɨ̀ myàʼtə̀ o, nkɨ mbə nɨ ɨ̀tɨ̀ŋnə̀ a nɨ ghɨ̀rə̀ pɨ̀ kẅùumə̀ o aŋunə àtɨ̀ghə pànkə̀nə.”

¹¹Yěsû a kẅùə̀ ambo Palètə̀ lo, “Wə̀ chyə̂ nɨ ɨ̀tɨ̀ŋnə̀ àtwuə̀ mɨ̀ŋə̀ ntiinə Nẅùə̀ à ŋânə a ẅèrə ambo ghò. La ngə̀ aŋunə ànwùə̀ tɨ̀pòŋə̀ ŋònə̀ nɨ à ŋânə mə̀ ambo ghò, àze a pɨ pɨ̂ tsàarə̀.”

¹²Palètə̀ a zuʼù a lenə la ntyiʼə̀ ntàʼà àlàŋə a nɨ myàʼtə̀ a Yěsû. La pɨ̀Jew chi nkyiinə̀ nɨ ɨ̀tɨ̀ŋnə̀ nshwəŋə̀ lo, “Wə̀ tə myàʼtə̀ e, wə̀ chi mbə o ɨ̀swùə Kaasà apə̀. Ŋwùə̀ wa ntsùmə̀ nɨ à shwəŋə̀nə lo ze a ɨ̀fò, à chi mbə la ngàŋə̀ kɨpaanə Kaasà.”

¹³Palètə̀ a zuʼù a lenə la ndòo a Yěsû nfurə̀ nnwuunə̀ aŋunə nɨ̀ghòorə nɨ korə̀. Pɨ lə̀ poomə̀ alyiʼə ghu la nɨ mɨ̀ghòorə, mmə nfuŋə̀ a zèrə amwuə àshwəŋnə̀ Hibrù nɨ Gabbatha.

¹⁴Àzhwùunə a lə̀ tyiʼə̀ mmə ntô tɨ̀ŋnə̀ amwuə njyə̂ nɨ pɨ lə̀ mənə nchwuʼtə̀ mbɨ̀ŋmə̀ a nɨ zɨghə̀ mɨ̀zɨghə̀ mɨ Àlàŋə̀ Mmyàʼtə̀, Palètə̀ a shwəŋə̀ ambo pɨ̀Jew lo, “Lə̌ ɨ̀fò ɨwɨghə.”

¹⁵Pobə chi kyiinə̀ lo, “Zhwuutə̀ e! Zhwuutə̀ e! Nkẅùumə̀ e aŋunə àtɨ̀ghə pànkə̀nə!” Palètə̀ a pyiitə̀ ambo pobə lo “N̂kẅùumə̀ a ɨ̀fò ɨwɨghə aŋunə àtɨ̀ghə pànkə̀nə?” Pɨ̀fò màʼà Nẅùə̀ kẅùə̀ ambo ze lo, “Ka ɨ̀fò ɨwəə ɨ̀tse pə e ghu ndàŋə̀ e Kaasà.”

¹⁶Palètə̀ a tyiʼə̀ ŋŋâ a Yěsû ambo pobə lo pobə̂ ghə̀ kẅùumə̀ e aŋunə àtɨ̀ghə pànkə̀nə.

¹⁷Lenəla, pɨ lə̀ lòo a Yěsû nfurə̀. À lə̀ pìʼì àtɨ̀ghə pànkə̀nə e tyìʼə̀ ze ndèrə̀ alyiʼə nɨ pɨ lə̀ mə nfuŋə̀ nɨ àghòʼrə àtwuə̀ (pɨ mə nfuŋə̀ amwuə àshwəŋnə̀ Hibrù nɨ Golgotà.)

¹⁸Pɨ lə̀ kẅùumə̀ e alyiʼə ghu aŋunə àtɨ̀ghə pànkə̀nə pobə pɨ pànə̀ pɨ̀tse pɨpaa. Taʼà a pə amwuə ẅùə̀ pàa, taʼà a kɨ mbə amwuə ẅùə̀ pàa.

¹⁹Palètə̀ à lə̀ ŋwàʼnə̀ àŋwàʼnə̀ mbaanə̀ àtwuə̀ àtɨ̀ghə pànkə̀nə lo, “Yěsû ŋwùə̀ Nazarètə̀, Ɨ̀fò pɨ̀Jew.”

²⁰Pɨ̀Jew pɨ̀noʼnə lə̀ fuŋə̀ àŋwàʼnə̀ zə̀ ntiinə alyiʼə nɨ pɨ lə̀ kẅùumə̀nə a Yěsû a lə̀ paatə̀ mbòmpə àlaʼà ngẅùunə. Pɨ lə̀ ŋwàʼnə̀ àŋwàʼnə̀ amwuə àshwəŋnə̀ Hibrù, ŋŋwàʼnə̀ amwuə àshwəŋnə̀ Latin, nkɨ ŋŋwàʼnə̀ amwuə àshwəŋnə̀ Greek.

²¹Pɨ̀fò màʼà Nẅùə̀ pobə pɨ̀Jew pa shwəŋə̀ ambo Palètə̀ lo, “Kò wə̀ ŋwàʼnə̀ lo, ‘Ɨ̀fò pɨ̀Jew’, ŋwàʼnə̀ pə lo, ‘À shwəŋə̀ lo ze la ɨ̀fò pɨ̀Jew.’”

²²Palètə̀ a kẅùə̀ lo, “Ànwùə̀ nɨ ŋ̀ŋwàʼnə̀nə, ŋ̀ŋwàʼnə̀ mə.”

²³Nkwùə̀ nɨ pɨ̀soyì pa lə̀ kẅùumə̀nə a Yěsû, pobə lə̀ lòo ɨtsəʼə ɨ̀pe ngàbə̀ ɨ̀pàa nɨ̀kwàa; taʼà ŋwùə̀ a lòo taʼà àpàa, taʼà ŋwùə̀ a lòo taʼà àpàa. Atsəʼə e yè màʼnə nɨ a lə̀ pənə yè sàa nɨ pɨ lə̀ paʼnə, ka alyiʼə yè zùnkə̀nə a pə e aŋunə a lə̀ kɨ mbə ghu.

²⁴Pɨ̀soyì pa shwəŋə̀ pobə nɨ pobə lo ka kùʼnə̀ e lo pə̀ənə̀ sìitə̀ atsəʼə zə̀, pə̀ənə̀ tumə̀ pə ɨpirə ndzəənə̀ a ŋònə̀ nɨ à pɨ zɨghə̀ a zèrə. A lə̀ koʼò mbwùumə̀ aŋunə ànwùə̀ nɨ pɨ lə̀ ŋwàʼnə̀nə amwuə àŋwàʼnə̀ Nẅùə̀ lo, “Pobə lə̀ ghàbə̀ ɨtsəʼə pa a tɨ̀tɨ̀rə̀ pobə, ntumə̀ ɨpirə aŋunə atsəʼə mə̀ yè màʼnə.” Lə̀ kɨ mbə ànwùə̀ nɨ pɨ̀soyì pa lə̀ ghɨ̀rə̀nə.

²⁵Mǎ pɨ Yěsû nɨ ndyimə e yɨ̀ mə̀ngyə̌, nɨ Màriyà ngẅùə Klopàsə̀, nɨ Màriyà nɨ à lə̀ furə̀nə a Magdalà lə̀ təəmə̀ a ɨ̀sùmə àtɨ̀ghə pànkə̀nə nɨ pɨ lə̀ kẅùumə̀nə a Yěsû aŋunə.

²⁶Yěsû a zəənə̀ mǎ e pobə àzùŋə̀ ndzùmə̀ za nɨ à lə̀ kòŋə̀nə la pobə təəmə̀ a ɨ̀sùmə àtɨ̀ghə pànkə̀nə ntyiʼə̀ nshwəŋə̀ ambo mǎ e lo, “Mǎ, lə̌ Moonə̀ o yɨ̀ mbyàŋnə̀.”

²⁷À lə̀ kɨ nshwəŋə̀ ambo àzùŋə̀ ndzùmə̀ e za lo, “Lə̌ mǎ o.” A nɨ furə̀ nkwùə̀ ghu àzùŋə̀ ndzùmə̀ e za a lə̀ lòo e tsaʼa mǎ e pobə ze tyiʼə̀ nchyə̂ a ndâ ze.

²⁸Nkwùə̀ ghu Yěsû a zhyə̂ lo à myàanə̀ mə ànwùə̀ àtsùmə̀ nɨ à lə̀ pənə ghɨ̀rə̀ ntyiʼə̀ nshwəŋə̀ lo “Ntɨŋmə̀ mə̀ ɨ wə̀ ndzwuumə̀.” À lə̀ shwəŋə̀ a nɨ lẅenə̀ ànwùə̀ nɨ àŋwàʼnə̀ Nẅùə̀ a shwəŋə̀nə.

²⁹Tyìirə̀ ɨ̀tse à lə̀ təəmə̀ alyiʼə ghu nɨ mɨ̀lùʼù mɨ ŋwaŋnə̀nə amwuə ndẅenə̀, pobə tyiʼə̀ ntsùbə̀ a kùntsa amwuə mɨ̀lùʼù mɨ ŋwaŋnə̀nə ma ntuŋə̀ aŋunə àtɨ̀ghə ntsàa mbètə̀ ntswùə̀ e ghu.

³⁰Nkwùə̀ nɨ Yěsû à lə̀ nyoŋə̀nə mɨ̀lùʼù mɨ ghu, à lə̀ shwəŋə̀ lo, “A myə̀!” À lə̀ tyiʼə̀ ntsəŋə̀ àtwuə̀ e a ɨ̀shyə̂, àzhwùə̀ e a ləənə̀ a kwɨghə̀.

³¹Pɨ̀Jew pɨ̀tse lə̀ tô ambo Palètə̀ lo pɨ piʼtə̀ mɨ̀kwùə̀ mɨ pànə̀ nɨ pɨ lə̀ kẅùumə̀nə a ghobə aŋunə ɨ̀tɨ̀ghə pɨ̀pànkə̀nə. Pobə lə̀ pyiitə̀ a lenə ntiinə njyə̂ àlaʼà pɨ̀Jew ɨ̀ lə̀ pirə̀ mbwùʼə̀ a taʼà njyə̂, ka pobə kɨ mmə ntàʼà a ghobə lo ɨ̀kwuə̀ pɨ̀ghu ghoŋə̀ aŋunə ɨ̀tɨ̀ghə pɨ̀pànkə̀nə njyə̂ àlaʼà, ntiinə njyə̂ àlaʼà ghu ɨ̀ lə̀ pə nɨ tə̀chwìi.

³²Lenə la, pɨ̀soyì pɨ̀ghu lə̀ tô mbiʼtə̀ mɨ̀kwùə̀ mɨ pɨ̀zə̀ərə̀ nɨ pɨ lə̀ kẅùumə̀nə a ghobə pɨ Yěsû la.

³³La nkwùə̀ nɨ pobə lə̀ pyàanə aŋunə Yěsû, pobə lə̀ zəənə̀ lo à kwɨghə̀ mə e, ka pobə chi mbiʼtə̀ ghobə mɨ̀kwùə̀ ɨ̀me.

³⁴Taʼà soyì wa ghùtse a tyiʼə̀ nsòbə̀ nɨ̀pwùnə nɨ mbyìinə̀ nɨ Yěsû nɨ nɨkoŋə, àləəmə̀ pobə nchyə zùŋə̀ nfurə̀.

³⁵Ŋònə̀ nɨ à lə̀ zəənə̀nə ànwùə̀ zə̀ à shwəŋə̀ a sàŋə̀ sàŋə̀ tsaʼnə à lə̀ zəənə̀nə njiilo nɨ̀ pyiimə̀ ànwùə̀ nɨ à shwəŋə̀nə a nkǔŋə nkuŋə, a kɨ nzhyə̂ lo a shwəŋə̀ a nkǔŋə nkuŋə.

³⁶Mɨ̀nwùə̀ mə lə̀ lòo alyiʼə a nɨ lẅenə̀ ànwùə̀ nɨ a pənə amwuə àŋwàʼnə̀ Nẅùə̀ lo, “Ka pɨ̀ pə ghǎ pəʼə̀ e àkẅìinə àtse a mbɨ̀ŋmə̀ ze.”

³⁷A kɨ nchi mbə amwuə alyiʼə àŋwàʼnə̀ Nẅùə̀ yètse lo, “Pobə ghǎ tyiʼə̀ mmə nnaŋə̀ a ze wa nɨ pobə lə̀ sòbə̀nə la.”

³⁸Tsaʼnə pɨ lə̀ zhwuutə̀nə a Yěsû la, Jòsebə̀ ŋwùə̀ Àrəmàtyâ à lə̀ loonə̀ lo Palètə̀ â myàʼtə̀ e â lòo àkwuə̀ Yěsû ngə̀ ntẅəŋə̀. (Jòsebə̀ wə̀ à lə̀ pə taʼà àzùŋə̀ ndzùmə̀ Yěsû yètse nɨ à lə̀ mənə ngyìinə̀ ndə̀əmə̀ mbɨ̀ŋmə̀ e ambo pɨ̀Jew.) Palètə̀ à lə̀ pyiimə̀ lo â lòo àkwuə̀ ghu ndòo nfurə̀.

³⁹Nikòdemùsə̀ nɨ à laʼa mə ntô ambo Yěsû nɨ ɨ̀twuʼə̀ à lə̀ kɨ mbə àze alyiʼə ghu, nɨ mɨ̀ghurə̀ mɨ myrrh nɨ pɨ nyàamə̀nə ghobə alùsə̀. Mɨ̀ghurə̀ mèrə mə lə̀ lìrə̀ tsaʼa pɨ̀kilù mɨ̀ghumə̀ mɨntarə.

⁴⁰Pànə̀ pɨpaa lə̀ lòo àkwuə̀ Yěsû ndyibə̀ amwuə atsəʼə fuə mbwuutə̀ pobə mɨ̀ghurə̀ ma a nɨ zùŋə̀ a mbòomə pɨ̀Jew tsaʼnə pobə lə̀ mənə ntẅəŋə̀ àkwuə̀ ŋwùə̀.

⁴¹Nkaʼà ɨ̀tse lə̀ pə alyiʼə nɨ pɨ lə̀ kẅùumə̀nə a Yěsû la. Nɨ̀shyə̀ tsɨ̀ shwuə̀ tsɨ̀tse nɨ pɨ laʼa mə ntẅəŋə̀ e a ŋwùə̀ amwuə apə̀ lə̀ pə amwuə nkaʼà ghu.

⁴²Tsaʼnə njyə̂ àlaʼà pɨ̀Jew ɨ̀ lə̀ pirə̀nə mbwùʼə̀ a taʼà njyə̂, nɨ̀shyə̀ tsɨ̀ghu kɨ mbaatə̀ la, pobə lə̀ nùŋə̀ a Yěsû amwuə nɨ̀shyə̀ tsɨ̀ghu.