Read Pinyin Jònə 2 Bible Online

Jònə 2 - Pinyin bible

Jònə 2

¹Njyə̂ lə̀ làŋə̀ ɨpaa ndzòʼo ɨ̀ pə a mbòmpə àlaʼà Kanà amwuə àlaʼà Galìlyə̂. Mǎ pɨ Yěsû à lə̀ pə ghu.

²Pɨ lə̀ kɨ ngwuunə̀ a Yěsû pobə ɨ̀zùŋə̀ ndzùmə̀ ɨ̀pe alyiʼə nɨ̀zoʼò ghu.

³Nkwùə̀ nɨ pɨ lə̀ nônə mɨ̀lùʼù mɨ̀tsùmə̀ alyiʼə nɨ̀zoʼò ghu, mǎ pɨ Yěsû à lə̀ shwəŋə̀ ambo ze lo, “Ka mɨ̀lùʼù pirə̀ e ambo pobə.”

⁴Yěsû a kẅùə̀ lo, “Mə̀ngyə̌, àzâ amwuə a àkə? Nkwùə̀ mə̀ ɨ̀ pirə̀ e tɨ kùʼù.”

⁵Mǎ pɨ Yěsû à lə̀ tyiʼə̀ nshwəŋə̀ ambo ngàŋə àfàʼà lo, “Nɨ̂ ghɨ̀rə̀ ànwùə̀ àtsùmə̀ nɨ à shwəŋə̀nə lo nɨ̀ ghɨ̀rə̀.”

⁶Mɨkɨŋə mɨ nchyə ntuurə̀ nɨ pɨ lə̀ tsùŋə̀nə nɨ mɨ̀ghòorə lə̀ pə alyiʼə ghu (ntiinə à lə̀ pənə mbòomə pɨ̀Jew a nɨ chyâ nchyə amwuə nsùu mbɨ̀ŋmə̀ ɨ̀zobə ghu nkwùə̀ nɨ pobə mənə nchàʼtə̀ a Nẅùə̀). Taʼà nɨkɨŋə à lə̀ mə nkwuunə̀ tsaʼa ɨ̀təəmə̀ mɨ̀ghumə̀ mɨmbaa kə̀ mɨ̀ghumə̀ mɨntarə.

⁷Yěsû à lə̀ shwəŋə̀ ambo ngàŋə àfàʼà za lo, “Nɨ̀ chyâ nchyə ndẅentə̀ mɨkɨŋə mə.” Pobə kɨ nchyâ mɨ lẅentə̀.

⁸A shwəŋə̀ ambo ngàŋə àfàʼà za lo, “Nɨ̀ sə̂ a yɨ̀tse ngə̀ ŋŋâ ambo ŋònə̀ nɨ à mənə ngàbə̀ ɨ̀pwuumə̀.” Pobə lə̀ kɨ nsə̂ ŋŋâ ambo ze.

⁹Ŋònə̀ nɨ à lə̀ mənə ngàbə̀ ɨ̀pwuumə̀ à lə̀ zhwiʼì nchyə wa ɨ tyiʼə̀ mɨ̀lùʼù. La ka à lə̀ zhyə̂ e alyiʼə nɨ mɨ furə̀nə, à lə̀ kɨ nzhyə̂ tyìʼə̀ ngàŋə àfàʼà nɨ pobə lə̀ sə̂nə nchyə ghu. Lenəla ŋònə̀ nɨ à mənə ngàbə̀ ɨ̀pwuumə̀ a tyiʼə̀ nfuŋə̀ a ndwuumə̀ ngɨ̀ɨnə̀,

¹⁰nshwəŋə̀ ambo ze lo, “Ŋwùə̀ ntsùmə̀ à wa mbyə̀ ŋŋâ pə mɨ̀lùʼù mɨ̀shìʼnə̀ pànə̀ nô zaʼà a pòŋə̀ ŋâ a mɨ tɨ̀pòŋə̀; wə̀ kùmə̀ mmyàʼtə̀ pànə̀ nô mɨ̀lùʼù tə mɨ noʼò wə̀ pòŋə̀ tô nɨ mɨ̀lùʼù mɨ̀shìʼnə̀ tɨ̀tsòŋə̀.”

¹¹Lə lə̀ pə ntsàambyə̀ àlènə̀ ànwùə̀ yerə̀nə yerə̀nə nɨ Yěsû à lə̀ ghɨ̀rə̀nə a Kanà amwuə àlaʼà Galìlyə̂. Lenəla a furə̀ aŋunə nnèrə̀ àghuʼtə̀ e, ɨ̀zùŋə̀ ndzùmə̀ ɨ̀pe tyiʼə̀ nnùŋə̀ ntɨŋmə̀ aŋunə ze.

¹²Tsaʼnə zə̀ ànwùə̀ a lə̀ làŋə̀nə, Yěsû à lə̀ shwuʼə̀ ndèrə̀ a Kàpenòmə̀ pobə mǎ e, nɨ pɨlyimə ɨ̀pe pɨ mbyàŋnə̀, farə ɨ̀zùŋə̀ ndzùmə̀ ɨ̀pe, pobə pɨ pobə chyə̂ alyiʼə ghu aŋunə mɨ̀njyə̂ mɨ̀tse.

¹³Nkwùə̀ nɨ njyə̂ Nɨ̀ghaʼà Àlàŋə̀ Mmyàʼtə̀ pɨ̀Jew ɨ̀ lə̀ mənə mbaatə̀, Yěsû à lə̀ koʼò ndèrə̀ a Yèrusalèmə̀.

¹⁴À lə̀ kɨ kwuunə̀ a Ndâ Mɨ̀shwàʼà Nẅùə̀, ndzəənə̀ pə̀ənə̀ amwuə pɨ mə nshwùunə̀ mɨ̀fòŋə̀ nɨ mɨ̀mbyə̂ mɨ ndzìrə̀ pobə ɨ̀lwuʼə̀. Pànə̀ nɨ pobə lə̀ mənə nkyopə̀ nkabə̀ lə̀ kɨ mbə amwuə.

¹⁵À lə̀ lòo nkɨrə mbaʼà ngwàanə̀ ghu, nkantə̀ pànə̀ pɨ̀tsùmə̀ amwuə Ndâ Mɨ̀shwàʼà pobə furə̀ nɨ mɨ̀fòŋə̀ ɨ̀mobə pobə mɨ̀mbyə̂ mɨ ndzìrə̀ ɨ̀mobə. Lenəla mbə̀ŋə̀ pɨ̀tepèrə̀ pɨ nkabə̀ ɨ̀pobə nkumnə̀ a ɨ̀shyə̂, nkabə̀ ɨ̀ tyiʼə̀ ndzaanə̀ amwuə ndâ.

¹⁶À lə̀ shwəŋə̀ ambo pànə̀ nɨ pobə lə̀ pənə nshwèntə̀ ɨ̀lwuʼə̀ lo, “Nɨ̀ lòo a pèrə ndòo furə̀; kò nɨ̀ lòo ndâ Tǎ ɨwəə ngɨ̀rə̀ ndâ mɨ̀tàanə ghu!”

¹⁷Ɨ̀zùŋə̀ ndzùmə̀ ɨ̀pe pa lə̀ zəənə̀ ànwùə̀ nɨ Yěsû à lə̀ ghɨ̀rə̀nə la nkẅempə̀ ànwùə̀ nɨ a pənə amwuə àŋwàʼnə̀ Nẅùə̀ lo, “Tǎ Nẅùə̀, ǹdanə nkòŋə̀ lo ànwùə̀ ndâ o â pə amwuə ntɨŋmə̀ mə̀ nkɨrə̀ tsaʼa ɨ̀mǔ.”

¹⁸Pɨ̀Jew lə̀ pyiitə̀ e lo, “Mbə̀ʼə wə̀ nèrə̀ a zèrə àlènə̀ lo wə̀ chyə̂ nɨ ɨ̀tɨ̀ŋnə̀ a nɨ ghɨ̀rə̀ ànwùə̀ zə?”

¹⁹Yěsû a kẅùə̀ ambo pobə lo, “Nɨ̀ shàʼtə̀ Ndâ Mɨ̀shwàʼà Nẅùə̀ zə, mbɨ lòo njyə̂ ɨtarə korə̀ a zèrə.”

²⁰Pɨ̀Jew pyiitə̀ lo, “Pəə lə̀ lòo nguʼu mɨ̀ghumə̀ nɨ̀kwàa ntsòbə̀ ntuurə̀ a nɨ korə̀ ndâ zə, wə̀ kùmə̀ mbə lòo njyə̂ ɨtarə korə̀ a zèrə?”

²¹À lə̀ mə nshwəŋə̀ Ndâ Mɨ̀shwàʼà Nẅùə̀ nshwəŋə̀ la mbɨ̀ŋmə̀ e.

²²Nkwùə̀ nɨ Yěsû à lə̀ zhwuumə̀nə a nɨ̀wɨghə̀, ɨ̀zùŋə̀ ndzùmə̀ ɨ̀pe kẅempə̀ ànwùə̀ nɨ à lə̀ shwəŋə̀nə; lenəla, ntyiʼə̀ mbyiimə̀ àshwəŋnə̀ Nẅùə̀ pobə àshwəŋnə̀ nɨ Yěsû à lə̀ shwəŋə̀ mə.

²³Tsaʼnə Yěsû à lə̀ pənə a Yèrusalèmə̀ aŋunə njyə̂ Nɨ̀ghaʼà Àlàŋə̀ Mmyàʼtə̀, pànə̀ pɨ̀noʼnə lə̀ nùŋə̀ ntɨŋmə̀ aŋunə ze ntii ɨ̀lènə̀ ɨ̀nwùə̀ nɨ à lə̀ mənə ngɨ̀rə̀.

²⁴La ka Yěsû à lə̀ nùŋə̀ e ntɨŋmə̀ e aŋunə pobə ntiinə à lə̀ zhyə̂nə a ghobə pɨ̀tsùmə̀.

²⁵Ka à lə̀ chi ntàʼà e lo ŋònə̀ ɨ̀tse â tiitə̀ ànwùə̀ mbə̀ʼə ŋwùə̀ ambo ze ntiinə à lə̀ zhyə̂nə ànwùə̀ àtsùmə̀ nɨ a lə̀ pənə amwuə ntɨŋmə̀ ŋwùə̀ ntsùmə̀.