Read Pinyin Jònə 20 Bible Online

Jònə 20 - Pinyin bible

Jònə 20

¹A lə̀ kɨ pə aŋunə ntsàambyə̀ njyə̂ aŋunə ngàbə̀ nɨ ɨlyiʼə lə̀ pirə̀nə e tɨ kyàatə̀ ɨ̀shìʼnə̀, Màriyà nɨ à lə̀ furə̀nə a Magdalà a ghə̀ a ntswùə̀ nɨ̀shyə̀ ndzəənə̀ lo pɨ pɨgrə̀ mə nɨ̀ghòorə nɨ nɨ lə̀ pənə a ntswùə̀ nɨ̀shyə̀.

²A tyiʼə̀ nkɨ̀ɨrə̀ ngə̀ nshwəŋə̀ ambo Shimùnə̀ Pità pobə àzùŋə̀ ndzùmə̀ Yěsû za nɨ à lə̀ kòŋə̀nə e ka mɨ̀zùŋə la lo, “Pɨ fuukə̀ mə a Ndòʼnə̀mbyə̂ amwuə nɨ̀shyə̀, la ka pəə zhyə̂ a wəə a alyiʼə nɨ pɨ nùŋə̀nə e ghu.”

³Lenəla, Pità pobə àzùŋə̀ ndzùmə̀ Yěsû za zùŋə̀ mmə ndèrə̀ a ntswùə̀ nɨ̀shyə̀ ghu.

⁴Pobə lə̀ pə nkɨ̀ɨrə̀, la àzùŋə̀ ndzùmə̀ Yěsû za a kɨ̀ɨrə̀ ntsàarə̀ a Pità ndzàamə̀ mbyàa a ntswùə̀ nɨ̀shyə̀;

⁵ŋŋuʼnə̀ nnaŋə̀ ɨmwuə nɨ̀shyə̀, ndzəənə̀ ɨtsəʼə pɨ̀fuə pɨ nwùunə̀ amwuə, la ka a kwuunə̀ e amwuə.

⁶Shimùnə̀ Pità a zùŋə̀ ntô mbaatə̀ e ndàŋə̀ nkwuunə̀ amwuə nɨ̀shyə̀ nkɨ ndzəənə̀ pə ɨtsəʼə pɨ̀fuə pa pèrə nwùunə̀ amwuə nɨ̀shyə̀,

⁷pobə atsəʼə nɨ pɨ lə̀ lòonə nkorə̀ àtwuə̀ Yěsû ghu. Ka atsəʼə za a lə̀ pə e pobə ɨtsəʼə pɨ̀fuə pa a taʼà alyiʼə, a lə̀ kyatə̀ nnwùunə̀ àze alyiʼə chwìi.

⁸Àzùŋə̀ ndzùmə̀ Yěsû za nɨ a lə̀ zàamə̀nə mbyàa àtwuə̀ nɨ̀shyə̀ la a pòŋə̀ kwuunə̀ àze, ndzəənə̀ mbyiimə̀.

⁹(A lə̀ kɨ pə nkwùə̀ ghu la, ka pobə zhyə̂ a ghobə ɨ̀sùmə ànwùə̀ nɨ a pənə amwuə àŋwàʼnə̀ Nẅùə̀ lo Yěsû a ghǎ zhwuumə̀ nɨ̀wɨghə̀.)

¹⁰Lenəla, ɨ̀zùŋə̀ ndzùmə̀ Yěsû pa kẅirə̀ ndèrə̀ a ghobə a ɨmwuə alyiʼə ɨ̀pobə.

¹¹Màriyà à lə̀ təəmə̀ a ntswùə̀ nɨ̀shyə̀ mmə ngyìi. Tsaʼnə à lə̀ mənə ngyìi la, à lə̀ ŋuʼnə̀ mmə nnaŋə̀ ɨmwuə nɨ̀shyə̀,

¹²ndzəənə̀ pəngèrə̀ pɨ̀tse pɨpaa amwuə ɨtsəʼə pɨ̀fuə, pobə nwuunə̀ a ɨ̀shyə̂ alyiʼə nɨ àkwuə̀ Yěsû a lə̀ nwùunə̀nə ghu. Taʼà à lə̀ nwuunə̀ alyiʼə nɨ àtwuə̀ e a lə̀ pənə; taʼà a kɨ nnwuunə̀ alyiʼə nɨ mɨ̀kwùə̀ ɨ̀me lə̀ pənə.

¹³Pobə pyiitə̀ ambo Màriyà lo, “Wə̀ yìi àkə mǎ?” A kẅùə̀ ambo pobə lo, “Ǹgyìi ntiinə pɨ lòonə a Ndòʼnə̀mbyə̂ mə̀, ka ǹkɨ nzhyə̂ mə̀ alyiʼə nɨ pɨ nùŋə̀nə e ghu.”

¹⁴Màriyà a shwəŋə̀ a lenə la, nkɨ pə̀ŋə̀ mbɨ̀ŋmə̀ e ndzəənə̀ a Yěsû a təəmə̀ la ka a zhyə̂ e lo la Yěsû.

¹⁵Yěsû a pyiitə̀ ambo ze lo, “Wə̀ yìi àkə? Mmə ntàʼà ɨ̀wə̌?” A kwàŋə̀ lo kə̀nə à pənə ngàŋə̀ ɨ̀swùumə ghu. Ntyiʼə̀ nshwəŋə̀ ambo ze lo, “Masàa, wə̀ tə mbəla ndòo e ndèrə̀ nɨ ẅèrə wə̀ tiitə̀ mə̀ nɨ alyiʼə nɨ wə̀ ghə̀nə nnùŋə̀ e, njiilo ǹgə̀ ndòo e ndèrə̀ nɨ ẅèrə.”

¹⁶Yěsû a fuŋə̀ e lo, “Màriyà!” A pə̀ŋə̀ nshwəŋə̀ amwuə àshwəŋnə̀ Hibrù lo, “Raboni” (nɨ ɨ̀sùmə ɨ̀ pənə lo “Ɨ̀nèrə̀”).

¹⁷Yěsû a shwəŋə̀ ambo ze lo, “Kò wə̀ pètə̀ mə̀ ntiinə mbirə̀ mə mə̀ tɨ koʼò ndèrə̀ ambo Tǎ ɨwəə. La lèrə̀ ngə̀ nshwəŋə̀ ambo pɨlyimə ɨ̀pâ lo ngwə̀ nkoʼò ndèrə̀ ambo Tǎ ɨwəə nɨ à kɨnə mbə Tǎ ɨwɨghə, mbə Nẅùə̀ mə̀ nkɨ mbə Nẅùə̀ ɨwɨghə.”

¹⁸Lenəla, Màriyà nɨ à lə̀ furə̀nə a Magdalà à lə̀ lèrə̀ ngə̀ nshwəŋə̀ ambo ɨ̀zùŋə̀ ndzùmə̀ ɨ̀pe lo, “Ǹdzəənə̀ a Ndòʼnə̀mbyə̂ ɨ̀wə̀ənə̀!” À lə̀ kɨ ntiitə̀ a ghobə nɨ ànwùə̀ àtsùmə̀ nɨ à tənə nshwəŋə̀ ambo ze.

¹⁹A lə̀ pə nkwùə̀ nkwə̌ njyə̂ ghu, ɨ̀zùŋə̀ ndzùmə̀ ɨ̀pe shwatə̀ amwuə ndâ ngẅùunə nfɨ̀ŋnə̀ ntiinə pobə lə̀ mənə mbô ɨ̀twuə̀ pɨ̀Jew. Nkɨ wùutə̀ Yěsû a təəmə̀ a tɨ̀tɨ̀rə̀ pobə nshwəŋə̀ lo, “Àporə̀porə̀ â pə ambo pɨghə.”

²⁰Tsaʼnə à shwəŋə̀nə a lenə la, à lə̀ nèrə̀ mbô ɨ̀me ghobə nɨ̀pwùnə nɨ mbyìinə̀ ɨ̀tse ambo pobə. Ɨ̀zùŋə̀ ndzùmə̀ ɨ̀pe lə̀ pə nɨ nɨ̀ghaʼà tsaʼnə pobə lə̀ zəənə̀nə a Ndòʼnə̀mbyə̂ ɨ̀ghobə.

²¹Yěsû à lə̀ chi nshwəŋə̀ ambo pobə lo, “Àporə̀porə̀ â pə ambo pɨghə! Tsaʼnə Tǎ à twuumə̀nə mə̀ la, ǹkɨ twuumə̀ a wɨghə.”

²²Tsaʼnə à lə̀ shwəŋə̀ a lenə la, à lə̀ zhwùə̀ aŋunə pobə nshwəŋə̀ lo, “Nɨ̀ kẅiirə̀ Àzhwùə̀ Nẅùə̀.

²³Nɨ̀ tə lə̀ənə̀ ɨ̀fàntə̀ ɨ̀nwùə̀ pə̀ənə̀, Nẅùə̀ a kɨ ndə̀ənə̀ a pèrə; nkɨ ngoŋə̀ a wɨghə tɨ lə̀ənə̀, Nẅùə̀ a kɨ ndə̀ənə̀ apə̀.”

²⁴Nkwùə̀ za nɨ Yěsû à lə̀ tônə a nɨ nèrə̀ ɨ̀pɨ̀ŋmə̀ e ambo ɨ̀zùŋə̀ ndzùmə̀ ɨ̀pe pa ntsòbə̀ ɨpaa la, ka taʼà àzùŋə̀ ndzùmə̀ e nɨ pɨ lə̀ mənə nfuŋə̀ nɨ Thomas la a lə̀ pə e a ndâ ghu. (Lə̌ Thomas wa nɨ pɨ lə̀ mənə nfuŋə̀ nɨ Moonə̀ Nɨ̀fâ.)

²⁵Lenəla, pyə̀ ɨ̀zùŋə̀ ndzùmə̀ Yěsû shwəŋə̀ ambo ze lo, “Pəə zəənə̀ a Ndòʼnə̀mbyə̂.” Thomas a shwəŋə̀ ambo pobə lo, “Ǹtə pirə̀ mə̀ tɨ zəənə̀ ɨ̀lènə̀ pa a mbô ze, mbètə̀ ɨlyiʼə pa pɨ lə̀ kẅùumə̀nə nɨ mɨ̀mbaanə̀, nkɨ mbètə̀ nɨ̀pwùnə nɨ mbyìinə̀ ɨ̀tse, mbyiimə̀ mə̀ ànwùə̀ nɨ nɨ̀ wə̀ nshwəŋə̀ apə̀.”

²⁶Taʼà ngàbə̀ a kɨ làŋə̀ ɨ̀zùŋə̀ ndzùmə̀ Yěsû chi nnwuunə̀ a ndâ ngẅùunə pobə pɨ Thomas nkɨ wùutə̀ Yěsû a təəmə̀ a tɨ̀tɨ̀rə̀ pobə nshwəŋə̀ lo, “Àporə̀porə̀ â pə aŋunə pɨghə.”

²⁷A lə̀ làŋə̀ nɨ mbyə̀ nshwəŋə̀ ambo Thomas lo, “Nùŋə̀ a shwuə̀ àpô o a nɨ̀ghə̂, nnaŋə̀ mbô ɨ̀mâ, nkɨ ndòo àpô o nnùŋə̀ a nɨ̀pwùnə nɨ mbyìinə̀ mɨ̀ŋə̀. Kò wə̀ pə o nɨ mɨnkə, nùŋə̀ ntɨŋmə̀ o aŋunə mɨ̀ŋə̀.”

²⁸Thomas a shwəŋə̀ ambo ze lo, “Ndòʼnə̀mbyə̂ Nẅùə̀ mə̀.”

²⁹Lenəla Yěsû a shwəŋə̀ ambo ze lo, “Wə̀ pyiimə̀ ntiinə wə̀ zəənə̀nə mə̀; mborə̀ ɨ̀ chyə̂ ambo pànə̀ pa nɨ ka pobə zəənə̀ a ghobə la mbyiimə̀.”

³⁰Yěsû à lə̀ nèrə̀ ɨ̀lènə̀ ɨ̀nwùə̀ pɨ̀yerə̀nə yerə̀nə pɨ̀noʼnə nkwùə̀ nɨ à lə̀ mənə ngyìinə̀ pobə ɨ̀zùŋə̀ ndzùmə̀ ɨ̀pe nɨ ka pɨ ŋwàʼnə̀ e amwuə àŋwàʼnə̀ zə̀.

³¹La pɨ ŋwàʼnə̀ e pə a pə njiilo nɨ̀ nùŋə̀ ntɨŋmə̀ ɨ̀wɨghə aŋunə Yěsû lo a Ghù Ndzoʼnə wa, nkɨ mbə Moonə̀ Nẅùə̀. Nkwùə̀ nɨ wə̀ nùŋə̀nə ntɨŋmə̀ o aŋunə ze, wə̌ pə nɨ nɨ̀chyə̂mbyə̂ ntii nɨ̀linə̀ ɨ̀tse.