Read Pinyin Jònə 21 Bible Online

Jònə 21 - Pinyin bible

Jònə 21

¹Yěsû à lə̀ chi nnèrə̀ mbɨ̀ŋmə̀ e ambo ɨ̀zùŋə̀ ndzùmə̀ ɨ̀pe pɨ̀tse a ntswùə̀ atəŋə Tìberyàsə̀: Lə̌ tsaʼnə à lə̀ nèrə̀nə ɨ̀pɨ̀ŋmə̀ e!

²Shimùnə̀ Pità, nɨ Thomas (nɨ pɨ lə̀ mənə nfuŋə̀ nɨ moonə̀ nɨ̀fâ), nɨ Nàtanèlə̀ (ŋwùə̀ Kanà amwuə àlaʼà Galìlyə̂), nɨ ɨ̀poonə̀ pɨ Zebedì, farə ɨ̀zùŋə̀ ndzùmə̀ Yěsû pɨ̀tse pɨpaa nɨ lə̀ pənə alyiʼə ghu.

³Shimùnə̀ Pità a shwəŋə̀ ambo pobə lo, “Mbɨ lèrə̀ ghə̀ mə kô ɨ̀swuə̀.” Pobə pɨ̀tsùmə̀ shwəŋə̀ ambo ze lo, “Pəə̌ zùŋə̀ o pə̀ənə̀ lèrə̀.” Pobə tyiʼə̀ nfurə̀ nkwuunə̀ amwuə àkànwuʼə ngyìinə̀ amwuə ɨ̀twuʼə̀ ghu ka kô a ghobə àzwuumə̀.

⁴A lə̀ pə a nkòʼò njyə̂, Yěsû a tô ntəəmə̀ a ntswùə̀ atəŋə la ka ɨ̀zùŋə̀ ndzùmə̀ ɨ̀pe pa zhyə̂ a ghobə lo la təəmə̀ ze.

⁵Yěsû a pyiitə̀ ambo pobə lo, “Ɨ̀poonə̀ ɨ̀pâ, ka nɨ̀ kô a wɨghə àzwuumə̀ àtse?” Pobə kẅùə̀ lo, “Ngaŋə.”

⁶Yěsû a shwəŋə̀ ambo pobə lo, “Nɨ̀ màʼà àlàʼà àzɨghə a pàa àpô pɨghə yè zɨghə̀nə nɨ̌ kô ɨ̀swuə̀.” Lenəla pobə lə̀ màʼà a zèrə ntyiʼə̀ nsùŋə̀ a ghobə kɨkaŋə ntiinə ɨ̀swuə̀ lə̀ noʼnə amwuə.

⁷Àzùŋə̀ ndzùmə̀ Yěsû za nɨ à lə̀ kòŋə̀ e ka mɨ̀zùŋə la a shwəŋə̀ ambo Pità lo, “A Ndòʼnə̀mbyə̂ ɨ̀wə̀ənə̀!” Nkwùə̀ nɨ Shimùnə̀ Pità à lə̀ zuʼnə lo la Ndòʼnə̀mbyə̂ la, à lə̀ màʼà ɨtsəʼə ɨ̀pe (ntiinə a lə̀ kɨ pəla nɨ à sòrə̀ mə ɨtsəʼə ɨ̀pe nkwùə̀ nɨ à lə̀ mənə nfàʼà) ndzùŋə̀ nkànə̀ amwuə nchyə.

⁸Pɨ̀tse ɨ̀zùŋə̀ ndzùmə̀ Yěsû lə̀ tô amwuə mɨlyiʼə àkànwuʼə mmə nsùŋə̀ àlàʼà za nɨ a lẅenə̀ mə nɨ ɨ̀swuə̀ la ntiinə ka ntyə̌ ɨ lə̀ pirə̀ nsàa e a nɨ furə̀ a ɨsɨghə. Ntyə̌ ɨ lə̀ pirə̀ tsaʼa ntàamə̀ nkɨrə.

⁹Tsaʼnə pobə lə̀ furə̀nə a ɨsɨghə pobə lə̀ zəənə̀ mɨ̀kyə̌ mɨ ɨ̀mǔ nɨ ɨ̀swuə̀ aŋunə pobə àpaanə̀.

¹⁰Yěsû a shwəŋə̀ ambo pobə lo, “Nɨ̀ lòo ɨ̀swuə̀ za yɨ̀tse nɨ nɨ̀ kônə tɨ̀tsòŋə̀ la ntô.”

¹¹Lenəla, Shimùnə̀ Pità à lə̀ kwuunə̀ amwuə àkànwuʼə nsùŋə̀ àlàʼà za ndòo furə̀ a ɨsɨghə. A lə̀ lẅenə̀ nɨ ɨ̀swuə̀ yɨ̀ ẅùunə nkɨrə nɨ mɨ̀ghumə̀ mɨntaanə̀ ntsòbə̀ ɨtarə; ɨ̀swuə̀ lə̀ patə nnoʼò amwuə àlàʼà zə̀ la, ka a lə̀ sìitə̀ e.

¹²Yěsû a shwəŋə̀ ambo pobə lo, “Nɨ̀ tô ntsàbə̀.” Ka tyìʼə̀ ŋwùə̀ ɨghobə ɨ̀tse a lə̀ pyiitə̀ ambo ze lo, “Ghǒ ɨ̀wə̌?” Ntiinə pobə lə̀ zhyə̂nə lo a Ndòʼnə̀mbyə̂.

¹³Yěsû à lə̀ tô ndòo àpaanə̀ za ŋŋâ ambo pobə nkɨ ŋŋâ ɨ̀swuə̀.

¹⁴Lə lə̀ pə nòmbàa nkwùə̀ ɨtarə nɨ Yěsû a nèrə̀nə ɨ̀pɨ̀ŋmə̀ e ambo ɨ̀zùŋə̀ ndzùmə̀ ɨ̀pe tsaʼnə à lə̀ zhwuumə̀nə a nɨ̀wɨghə̀.

¹⁵Nkwùə̀ nɨ pobə lə̀ myàanə̀nə a nɨ tsàbə̀, Yěsû à lə̀ pyiitə̀ ambo Shimùnə̀ Pità lo, “Shimùnə̀, moonə̀ Jònə, wə̀ kòŋə̀ mə̀ ntsàarə̀ pànə̀ pɨ pɨ̀tsùmə̀ a nɨ̀ghə̂?” A kẅùə̀ ambo ze lo, “Ee, Ndòʼnə̀mbyə̂, wə̀ zhyə̂ lo ǹkòŋə̀ o.” Yěsû a tyìʼə̀ nshwəŋə̀ ambo ze lo, “Tyiʼə̀ mmə ndzə̂ ɨ̀poonə̀ pɨ mbyə̂ ndzìrə̀ ɨ̀zâ.”

¹⁶Yěsû a chi mbyiitə̀ e nkwùə̀ nɨ pyàanə ɨpaa lo, “Shimùnə̀ moonə̀ Jònə, wə̀ kòŋə̀ mə̀?” A kẅùə̀ ambo ze lo, “Ee Ndòʼnə̀mbyə̂, wə̀ zhyə̂ lo ǹkòŋə̀ o.” Yěsû a tyìʼə̀ nshwəŋə̀ ambo ze lo, “Tyiʼə̀ mmə mbyabə̀ mbyə̂ ndzìrə̀ ɨ̀zâ.”

¹⁷Pità à lə̀ pə nɨ àsòmnə̀ ntiinə Yěsû à pyiitə̀nə e mbyàa nkwùə̀ ɨtarə lo, “Wə̀ kòŋə̀ mə̀?” ntyiʼə̀ nshwəŋə̀ ambo ze lo, “Ndòʼnə̀mbyə̂, wə̀ zhyə̂ ànwùə̀ àtsùmə̀, wə̀ zhyə̂ lo ǹkòŋə̀ o.” Yěsû a shwəŋə̀ ambo ze lo, “Tyiʼə̀ mmə mbyabə̀ mbyə̂ ndzìrə̀ za.

¹⁸Ǹshwəŋə̀ tyìʼə̀ nkǔŋə nkuŋə ambo ghò lo, nkwùə̀ nɨ wə̀ lə̀ pirə̀nə mmə nkoʼò, wə̀ lə̀ mə mmàʼà ɨtsəʼə ɨ̀pô ghò nɨ ghò, mmə ndèrə̀ alyiʼə nɨ wə̀ kòŋə̀nə; la nkwùə̀ nɨ wə̀ ghǎ lwùnə̀, wə̀ ghǎ shwùumə̀ mbô ɨ̀mô ŋònə̀ nyàanə a màʼà atsəʼə aŋunə ghò, ndòo o ndèrə̀ alyiʼə nɨ ka wə̀ kòŋə̀ o.”

¹⁹Yěsû à lə̀ shwəŋə̀ a lenə la a nɨ nèrə̀ mbuurə̀ nɨ̀wɨghə̀ nɨ Pità à ghǎ kwɨghə̀ ghɨ̀rə̀ pɨ ghuʼtə̀ a Nẅùə̀. À lə̀ shwəŋə̀ a lenə la nchi shwəŋə̀ ambo ze lo, “Tô ndzùŋə̀ mə̀.”

²⁰Tsaʼnə pobə lə̀ pənə ndèrə̀, Pità a pə̀ŋə̀ nnaŋə̀ ndzùmə̀ ndzəənə̀ àzùŋə̀ ndzùmə̀ Yěsû za zhyə̀ nɨ à lə̀ kòŋə̀nə e ka mɨ̀zùŋə la a pə ndzùŋə̀ a ghobə. La à lə̀ pə ŋònə̀ wa nɨ à lə̀ nwuunə̀nə a nɨ̀pwùnə Yěsû nkwùə̀ nɨ pobə lə̀ mənə ndzɨghə̀ mɨ̀zɨghə̀ mɨ Àlàŋə̀ Mmyàʼtə̀ mɨ ndẅùə̀ndzùmə̀, mbyiitə̀ e lo, “Ndòʼnə̀mbyə̂, ŋònə̀ nɨ ǎ shwùunə̀ o la ɨ̀wə̌?”

²¹Pità a zəənə̀ a ŋònə̀ wə̀ mbyiitə̀ a Yěsû lo, “Ànwùə̀ ŋònə̀ wə̀ a ghǎ pə àze lə ɨla?”

²²Yěsû a kẅùə̀ ambo ze lo, “Ǹtə kòŋə̀ lo â chyə̂ ghù ntɨ̀ŋnə̀ tə mbyàa nkwùə̀ nɨ à ghǎ kẅirə̀ tô, àzô amwuə a pə àkə? Lenəla Yěsû a shwəŋə̀ ambo ze lo, ‘Zùŋə̀ mə̀.’”

²³Àshwəŋnə̀ ghu a lə̀ sìimə̀ amwuə pobə, pobə tyiʼə̀ nshwəŋə̀ lo, ka àzùŋə̀ ndzùmə̀ Yěsû zèrə zə a pə ghǎ kwɨghə̀ e. La ka Yěsû a lə̀ shwəŋə̀ e ambo ze lo ka a pə ghǎ kwɨghə̀ e, à lə̀ shwəŋə̀ pə lo, “Ǹtə kòŋə̀ lo a chyə̂ ghù ntɨ̀ŋnə̀ tə mbyàa nkwùə̀ nɨ à ghǎ kẅirə̀ tô, àzô amwuə a pə àkə?”

²⁴Àzùŋə̀ ndzùmə̀ Yěsû la ẅùə̀ wa nɨ à lə̀ shwəŋə̀nə ɨ̀nwùə̀ pə̀ ɨ̀tsùmə̀ tsaʼa ndzəənə̀ zəənə̀nə. Àŋwàʼnə̀ zə̀ a ŋwàʼnə̀ ɨ̀nwùə̀ pə̀ ɨ̀tsùmə̀, pə̀ənə̀ kɨ nzhyə̂ lo ɨ̀nwùə̀ pə̀ ɨ̀tsùmə̀ nɨ à shwəŋə̀nə la a nkǔŋə nkuŋə.

²⁵Mɨ̀nwùə̀ mɨ̀noʼnə pirə̀ ghu nɨ Yěsû à lə̀ ghɨ̀rə̀nə. Pɨ pəla mmə ntàʼà ŋwàʼnə̀ a mèrə mɨ̀tsùmə̀, yi ǹkwàŋə̀ lo ka àtwuə̀ ɨ̀shyə̂ zə̀ àtsùmə̀ â faŋə̀ e nkùʼnə̀ a nɨ nùŋə̀ ɨ̀ŋwàʼnə̀ pɨ̀ghu amwuə.