Read Pinyin Jònə 3 Bible Online

Jònə 3 - Pinyin bible

Jònə 3

¹Ŋwùə̀ Farìsî ghùtse à lə̀ pə ghu pɨ mə nfuŋə̀ e nɨ Nikòdemùsə̀. À lə̀ pə ŋònə̀ ngẅùunə ambo pɨ̀Jew.

²Nikòdemùsə̀ wə̀ à lə̀ tô ambo Yěsû nɨ ɨ̀twuʼə̀ nshwəŋə̀ ambo ze lo, “Rabbi, pəə zhyə̂ lo ghǒ ɨ̀nèrə̀ nfurə̀ ambo Nẅùə̀ ntiinə mbə̀ʼə ka ŋònə̀ ɨ̀tse a ghɨ̀rə̀ e ɨ̀lènə̀ ɨ̀nwùə̀ pə̀ nɨ wə̀ wə̀ ngɨ̀rə̀ lə tɨghu Nẅùə̀ à wə̀ pobə ze.”

³Yěsû à lə̀ kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo, pɨ tə ghoŋə̀ e tɨ kẅirə̀ mbyə̂ a ŋwùə̀ shwuə̀ shwuə̀, a gha ndzəənə̀ e ànwùə̀ Nɨ̀fò Nẅùə̀ apə̀.”

⁴La Nikòdemùsə̀ a pyiitə̀ e lo, “Mbə̀ʼə pɨ chi nkẅirə̀ mbyə̂ a ndɨ̀ŋmə̂ lə ɨla? Mbə̀ʼə a kẅirə̀ nkwuunə̀ a nɨ̀pùmə̀ mǎ e pɨ chi mbyə̂ e shwuə̀ shwuə̀?”

⁵Yěsû a kẅùə̀ lo, “Ǹshwəŋə̀ tyìʼə̀ nkǔŋə nkuŋə ambo ghò lo pɨ tə ghoŋə̀ e tɨ pyə̂ a ŋwùə̀ nɨ nchyə pobə Àzhwùə̀, a gha nkwuunə̀ e amwuə ànwùə̀ Nɨ̀fò Nẅùə̀ apə̀.

⁶Moonə̀ nɨ mbòbə̀ mbɨ̀ŋmə̀ ɨ̀ za mbyə̂ la mbòbə̀ mbɨ̀ŋmə̀, la moonə̀ nɨ Àzhwùə̀ a za mbyə̂ a kɨ mbə Àzhwùə̀.

⁷Kò a kə̀ʼnə̀ e a ghò lo ǹshwəŋə̀ lo pɨ̌ kẅirə̀ pyə̂ a wɨghə pɨ̀tsùmə̀.

⁸Fèrə̀ à wa ndàŋə̀ ndèrə̀ la alyiʼə nɨ à kòŋə̀nə; A mə ndàŋə̀ wə̀ zuʼù àzòrə̀, ka mə zhyə̂ o alyiʼə nɨ à furə̀nə, kə̀ alyiʼə nɨ à wə̀ ndèrə̀. Lə̌ tsaʼnə a pənə ambo ŋònə̀ wa nɨ Àzhwùə̀ a pyə̂nə.”

⁹Nikòdemùsə̀ a pyiitə̀ e lo, “Mbə̀ʼə zèrə zə̀ ànwùə̀ a tyiʼə̀ ndòo alyiʼə lə ɨla?”

¹⁰Yěsû a kẅùə̀ ambo ze lo, “Ghǒ ɨ̀nèrə̀ ghu ngẅùunə ambo pànə̀ pɨ Israel ka tyiʼə̀ zhyə̂ o mɨ̀nwùə̀ mèrə mə?”

¹¹Ǹshwəŋə̀ tyìʼə̀ nkǔŋə nkuŋə ambo ghò lo, pəə pa nshwəŋə̀ la ànwùə̀ nɨ pəə zhyə̂nə nkɨ mmə ntiitə̀ la ànwùə̀ nɨ pəə pa ndzəənə̀. La ka ŋònə̀ ɨ̀tse amwuə pɨghə a kòŋə̀ e a nɨ zuʼù ànwùə̀ nɨ pəə pa nshwəŋə̀.

¹²Ǹtə pəla ntiitə̀ a wɨghə nɨ mɨ̀nwùə̀ nɨ mɨ pənə àtwuə̀ ɨ̀shyə̂ nɨ̀ ka pyiimə̀ a wɨghə, ǹtyiʼə̀ ntiitə̀ a wɨghə nɨ mɨ̀nwùə̀ nɨ mɨ pənə a nɨ̀pwuurə̀ nɨ̀ tyiʼə̀ mbyiimə̀ lə ɨla?

¹³Ŋònə̀ ɨ̀tse à lə̀ pirə̀ mə e tɨ koʼò ndèrə̀ a nɨ̀pwuurə̀ ndàŋə̀ e Moonə̀ Ŋwùə̀ nɨ à lə̀ furə̀nə a nɨ̀pwuurə̀ nshwuʼə̀ a ɨ̀shyə̂.

¹⁴Tsaʼnə Mǔsî à lə̀ ŋaŋə̀nə ɨ̀nyoorə̀ aŋunə àtɨ̀ghə alyiʼə waakə la, la ndwuumə̀ nɨ pɨ ghǎ kɨ ŋaŋə̀ a Moonə̀ Ŋwùə̀ àtɨ̀ghə,

¹⁵lo ŋwùə̀ ntsùmə̀ wa nɨ à nùŋə̀nə ntɨŋmə̀ e aŋunə ze à ghǎ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀.

¹⁶Mbə̀ʼnə Nẅùə̀ à lə̀ kòŋə̀ pànə̀ pɨ àtwuə̀ ɨ̀shyə̂, ŋŋâ ndàʼà moonə̀ e lo ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə ze à ghǎ kwɨghə̀ e apə̀, la pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀ la.

¹⁷Ka Nẅùə̀ à lə̀ tsàa e a moonə̀ e a àtwuə̀ ɨ̀shyə̂ la lo a tô nsaʼà mɨ̀sàʼa mɨ pànə̀ pɨ àtwuə̀ ɨ̀shyə̂, à lə̀ tsàa e pə lo â tô nchwarə̀ a ghobə.

¹⁸Ka Nẅùə̀ a pə ghǎ chyâ e ngəʼə̀ aŋunə ŋònə̀ wa nɨ à nùŋə̀nə ntɨŋmə̀ e aŋunə ze, la à chyâ mə ngəʼə̀ aŋunə ŋònə̀ wa nɨ ka à nùŋə̀ ntɨŋmə̀ e aŋunə ze ntiinə ka a nùŋə̀ e ntɨŋmə̀ e aŋunə ndàʼà Moonə̀ Nẅùə̀.

¹⁹Lə̌ tsaʼnə Nẅùə̀ à wa nsaʼà mɨ̀sàʼa mɨ pə̀ənə̀: Nẅùə̀ à tsàa mə nkàʼà a àtwuə̀ ɨ̀shyə̂, la pànə̀ kòŋə̀ a ghobə pə ndzùmə ntsàarə̀ nkàʼà, ntiinə ngɨ̀rə̀ mɨ̀nwùə̀ ɨ̀zobə pɨ̂nə.

²⁰Ŋwùə̀ wa ntsùmə̀ nɨ à wa ngɨ̀rə̀ a tɨ̀pòŋə̀ à wa mbàanə̀ nkàʼà ka kɨ furə̀ e a sàŋə̀, ntiinə a wa mbô lo mbə̀ʼə pànə̀ zəənə̀ ngɨ̀rə̀ ɨ̀nwùə̀ ɨ̀ze.

²¹Ŋònə̀ nɨ à wa ngɨ̀rə̀ a nkǔŋə nkuŋə à wa nfurə̀ a sàŋə̀ mbə̀ʼə nkàʼà ghu ɨ̂ kyàʼà mɨ̀nwùə̀ ɨ̀me mɨ̀shìʼnə̀ lo pànə̀ zəənə̀ nzhyə̂ lo mèrə furə̀ ambo Nẅùə̀.

²²Zèrə zə̀ ànwùə̀ a lə̀ làŋə̀, Yěsû pobə ɨ̀zùŋə̀ ndzùmə̀ ɨ̀pe lèrə̀ amwuə àlaʼà Judyà nchyə̂ ghu aŋunə mətùmə nkwùə̀ ntyiʼə̀ mmə ŋŋâ àkẅiirə̀ nchyə.

²³Jònə à lə̀ kɨ mmə ŋŋâ àze àkẅiirə̀ nchyə a àlaʼà Enònə̀ a nɨ̀pwùnə Salìmə̀, ntiinə nchyə ɨ lə̀ pənə ghu nnoʼò, pànə̀ tyiʼə̀ mmə ntô ghu lo â ŋâ a ghobə nɨ àkẅiirə̀ nchyə.

²⁴A lə̀ kɨ pə nkwùə̀ ghu, pɨ pirə̀ e tɨ chyâ a Jònə a ndâ ɨ̀tsaŋə̀.

²⁵Àtànkə̀ àtse a lə̀ furə̀ a tɨ̀tɨ̀rə̀ ɨ̀zùŋə̀ ndzùmə̀ Jònə pobə ŋwùə̀ pɨ̀Jew mbə̀ʼə ànwùə̀ nɨ̀sùu mbɨ̀ŋmə̀ ɨ̀zobə ɨ̂ laanə̀ a nɨ zùŋə̀ a mbòomə ànwùə̀ Nẅùə̀ pɨ̀Jew.

²⁶Pobə lə̀ myàʼtə̀ a ŋwùə̀ pɨ̀Jew wa ngə̀ ntsirə̀ a Jònə nshwəŋə̀ ambo ze lo, “Ɨ̀nèrə̀, ŋònə̀ wa nɨ pɨghə ze lə̀ pənə a ndzìnə nchyə Jodànə̀, wə̀ kɨ nshwəŋə̀ mbə̀ʼə e a sàŋə̀ sàŋə̀, à ẅùə̀ nkɨ ŋŋâ àkẅiirə̀ nchyə, pànə̀ pɨ̀tsùmə̀ tyiʼə̀ mmə ndèrə̀ ambo ze.”

²⁷Jònə a kẅùə̀ lo, “Mbə̀ʼə ŋwùə̀ a laʼa mbə e nɨ àzwuumə̀ tɨghu zèrə furə̀ a nɨ̀pwuurə̀ apə̀.

²⁸Tyìʼə̀ pɨghə a ɨ̀pâ pɨ̀ndzəənə̀ zəənə̀nə tsaʼnə ndə̀ shwəŋə̀nə lo, ‘Ka mbə mə̀ la Ghù Ndzoʼnə wa, ǹchyə̂ mbə mə̀ la ẅùə̀ nɨ Nẅùə̀ à lə̀ tsàanə lo n̂dzàamə̀ ntô.’

²⁹Ngɨ̀ɨnə̀ à chyə̂ ambo ndwuumə̀ ngɨ̀ɨnə̀, la ɨ̀swùə ndwuumə̀ ngɨ̀ɨnə̀ wa nɨ à wa ntəəmə̀ a nɨ̀pwùnə ndwuumə̀ ngɨ̀ɨnə̀ mmə nzhwiʼtə̀ ambo ndwuumə̀ ngɨ̀ɨnə̀ la à wa ndẅenə̀ nɨ nɨ̀ghaʼà nkwùə̀ nɨ à zuʼnə ngyə̀ ndwuumə̀ ngɨ̀ɨnə̀ ghu. Lenəla, nɨ̀ghaʼà mə̀ wə̀ à koʼò mbwùumə̀,

³⁰ntiinə ǎ mə faŋə̀ lèrə̀ nɨ mbyə̀, n̂tyiʼə̀ mmə nshwùʼtə̀ nkwə̂ nɨ ndzùmə̀.”

³¹Ŋònə̀ wa nɨ à furə̀nə a nɨ̀pwuurə̀ nshwuʼə̀ à tsàarə̀ a ŋwùə̀ ntsùmə̀. Ŋònə̀ nɨ à furə̀nə a àtwuə̀ ɨ̀shyə̂ a ŋwùə̀ àtwuə̀ ɨ̀shyə̂ nkɨ mmə nshwəŋnə̀ àshwəŋnə̀ àtwuə̀ ɨ̀shyə̂. La ŋònə̀ nɨ à furə̀nə a nɨ̀pwuurə̀ nshwuʼə̀, à tsàarə̀ a ŋwùə̀ ntsùmə̀.

³²A shwəŋə̀ ɨ̀nwùə̀ nɨ à zəənə̀nə nkɨ ndzuʼù la ka ŋònə̀ ɨ̀tse a kẅiirə̀ ntwuumə̀ e.

³³La ŋònə̀ wa ntsùmə̀ nɨ à pyiimə̀nə ànwùə̀ nɨ à shwəŋə̀nə, à tompə̀ la lo Nẅùə̀ a Nẅùə̀ nkǔŋə nkuŋə,

³⁴mbə̀ʼnə ŋònə̀ wa nɨ Nẅùə̀ à twuumə̀nə e, à wa nshwəŋə̀ la àshwəŋnə̀ Nẅùə̀ ntiinə Nẅùə̀ à wə̀ ndẅenə̀ e nɨ Àzhwùə̀ tɨ àndànə̀.

³⁵Tǎ à kòŋə̀ a moonə̀ e ndə̀ kɨ ŋŋâ ɨ̀pwuumə̀ ɨ̀tsùmə̀ ambo ze.

³⁶Ŋònə̀ nɨ à nùŋə̀nə ntɨŋmə̀ e aŋunə ze, à wa nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀, la ŋònə̀ wa nɨ ka à mə ndzuʼnə̀ e a moonə̀ wə̀, ka à pə ghǎ pə e nɨ nɨ̀chyə̂mbyə̂; la àtsə̂ ntɨŋmə̀ Nẅùə̀ â ghoŋə̀ aŋunə ze.