Read Pinyin Jònə 4 Bible Online

Jònə 4 - Pinyin bible

Jònə 4

¹Yěsû à lə̀ zhyə̂ lo pɨ̀Farìsî zuʼù mə lo ze Yěsû à wə̀ ngɨ̀rə̀ pànə̀ pɨ̀noʼnə pə ndzuʼù ànwùə̀ e, nkɨ mmə ŋŋâ àkẅiirə̀ nchyə ntsàarə̀ tsaʼnə Jònə à lə̀ mənə ŋŋâ.

²(A nɨ shwəŋə̀ a nkǔŋə nkuŋə, ka Yěsû àtwuə̀ ɨ̀pɨ̀ŋmə̀ e a lə̀ mə ŋŋâ e àkẅiirə̀ nchyə, à lə̀ mə ŋŋâ ɨ̀zùŋə̀ ndzùmə̀ ɨ̀pe.)

³Nkwùə̀ nɨ Ndòʼnə̀mbyə̂ à lə̀ zuʼnə a lenə la, à lə̀ myàʼtə̀ a Judyà nkẅirə̀ ndèrə̀ e a Galìlyə̂.

⁴À lə̀ pə làŋə̀ la àlaʼà Sàmariyà lèrə̀ ghu.

⁵Tsaʼnə à lə̀ mənə ndàŋə̀ àlaʼà Sàmariyà, à lə̀ kwuunə̀ amwuə mbòmpə àlaʼà nɨ pɨ lə̀ mənə nfuŋə̀ nɨ Sikàa, ɨ̀ paatə̀ àpàbə ɨ̀shyə̂ za nɨ Yàkobə̀ à lə̀ ŋânə ambo moonə̀ e Jòsebə̀ la.

⁶Àghə̀əmə nchyə Yàkobə̀ a lə̀ pə alyiʼə ghu. A kɨ pə a ntɨ̀ŋnə̀ àzhwùunə, Yěsû a kaanə̀ aŋunə àkwùə̀ nɨ̀yìinə̀, nnwuunə̀ a nɨ̀pwùnə àghə̀əmə za mmə nzhwùutə̀.

⁷Mə̀ngyə̌ Sàmariyà ɨ̀tse à lə̀ tô a nɨ tuʼù nchyə, Yěsû a shwəŋə̀ ambo ze lo, “Ŋâ nchyə n̂nô.”

⁸A kɨ pə la nɨ ɨ̀zùŋə̀ ndzùmə̀ ɨ̀pe lèrə̀ mə̀ amwuə mbòmpə àlaʼà a nɨ ghə̀ ndzwuunə̀ mɨ̀zɨghə̀.

⁹Mə̀ngyə̌ Sàmariyà wa a pyiitə̀ ambo ze lo, “Ghǒ ŋwùə̀ pɨ̀Jew, m̀bə ŋwùə̀ Sàmariyà, wə̀ tyiʼə̀ nshwəŋə̀ lo ŋ̂ŋâ o nɨ nchyə lə ɨla?” À lə̀ shwəŋə̀ a lenə la ntiinə ka pɨ̀Jew pobə pànə̀ pɨ Sàmariyà lə̀ pə a ghobə nɨ ànwùə̀ àtse a nɨ ghɨ̀rə̀.

¹⁰Yěsû a kẅùə̀ ambo ze lo, “Wə̀ tə mbəla nzhyə̂ a àzwuumə̀ nɨ Nẅùə̀ à wa ŋŋâ, nkɨ nzhyə̂ a ŋònə̀ nɨ à mənə mbyiitə̀ o nɨ nchyə lə, yi wə̌ pyiitə̀ e, a kɨ ŋŋâ o nɨ nchyə wa nɨ ẅèrə wa ŋŋâ a nɨ̀chyə̂mbyə̂ la.”

¹¹Mə̀ngyə̌ wa a kẅùə̀ ambo ze lo, “Tǎ, ka wə̀ pə o nɨ àtəəmə̀ a nɨ tuʼù nchyə amwuə, la àghə̀əmə nchyə zə a mìnə̀ ka mɨ̀zùŋə. Wə̌ tyiʼə̀ lòo nchyə nɨ ɨ wa ŋŋâ a nɨ̀chyə̂mbyə̂ la ɨghə?

¹²Wə̀ tsàarə̀ pə a tǎ ɨwəə Yàkobə̀ nɨ à lə̀ pyə̀nə nnô amwuə àghə̀əmə nchyə zə pobə mɨ̀nyàamə̀ ɨ̀me mbòŋə̀ ŋŋâ ambo pəə?”

¹³Yěsû a kẅùə̀ ambo ze lo, “Ŋònə̀ nɨ à nônə nchyə wə̀, njyə̀ nchyə ɨ̌ kẅirə̀ zaŋə̀ e,

¹⁴la ŋònə̀ nɨ ǎ nô nchyə nɨ mbɨ ŋâ ambo ze, ka njyə̀ nchyə ɨ pə ghǎ chi zaŋə̀ e a ye. Nchyə wa nɨ mbɨ ŋâ ambo ze ɨ̌ pə̀ŋə̀ tyiʼə̀ nɨ̀mwurə̀ ɨ̀shyə̂ amwuə ze tyiʼə̀ ŋâ e nɨ nchyə nɨ ɨ wa ŋŋâ a nɨ̀chyə̂mbyə̂ wa nɨ à ghoŋə̀nə nɨ nkuŋə̀.”

¹⁵Mə̀ngyə̌ wa a shwəŋə̀ ambo ze lo, “Tǎ, ŋâ mə̀ nɨ nchyə ghu mbə̀ʼə njyə̀ nchyə ɨ̀ tə ndzaŋə̀ a mə̀, ǹkɨ nchi ntô mə̀ a nɨ̀ghə̂ a nɨ tuʼù nchyə apə̀.”

¹⁶Yěsû a shwəŋə̀ ambo ze lo, “Ghə̀ nfuŋə̀ a ndwuumə̀ o pɨghə ze tô a nɨ̀ghə̂.”

¹⁷Mə̀ngyə̌ wa a shwəŋə̀ lo, “Ka ndwuumə̀ mə̀ a pə e ghu.” Yěsû a shwəŋə̀ ambo ze lo, “Wə̀ shwəŋə̀ tyìʼə̀ a nkǔŋə nkuŋə lo ka wə̀ pə o nɨ ndwuumə̀,

¹⁸ntiinə wə̀ pə mə nɨ pɨ̀lwuumə̀ pɨtaanə̀; ŋònə̀ nɨ ghò wə̀ pɨghə ze tɨ̀tsòŋə̀ wə̀ ka à pə e ndwuumə̀ o. Njiilo wə̀ shwəŋə̀ tyìʼə̀ a nkǔŋə nkuŋə.”

¹⁹Mə̀ngyə̌ wa a shwəŋə̀ ambo ze lo, “Masàa, ǹdzəənə̀ lo ghǒ ngàŋə̀ ntwuumə̀ Nẅùə̀.

²⁰Pɨ̀tǎ ɨ̀pəə lə̀ chàʼtə̀ a Nẅùə̀ àtwuə̀ mbarə̀ ghə, la pɨghə pɨ̀Jew shwəŋə̀ àzɨghə pə lo alyiʼə yè ghuʼtə̀nə a Nẅùə̀ a kùʼnə̀ pə a Yèrusalèmə̀.”

²¹Yěsû a shwəŋə̀ ambo mə̀ngyə̌ wa lo, “Pyiimə̀ ànwùə̀ nɨ ngwə̀ shwəŋə̀ lə mbǎ mǎ, nkwùə̀ ɨ̀ zə ntô nɨ ka nɨ̀ pə ghǎ chi səəkə̀ a wɨghə a Tǎ àtwuə̀ mbarə̀ ghə kə̀ a Yèrusalèmə̀.

²²Pɨghə pànə̀ pɨ Sàmariyà nɨ̀ səəkə̀ la Nẅùə̀ nɨ ka nɨ̀ zhyə̂ a wɨghə, la pəə pɨ̀Jew mə nsəəkə̀ a Nẅùə̀ nɨ pəə zhyə̂nə, ntiinə Nẅùə̀ à wa ndàŋə̀ pə a ndzùmə̀ pɨ̀Jew nchwarə̀ pə̀ənə̀.

²³La nkwùə̀ ɨ̀ zə nkùʼù, ɨ̀ pyə̀ mə nkùʼù, nɨ pànə̀ nɨ pobə pa nsəəkə̀ a Nẅùə̀ nɨ nkǔŋə nkuŋə ghǎ səəkə̀ a Tǎ amwuə Àzhwùə̀ nɨ nkǔŋə nkuŋə, ntiinə la mbuurə̀ pànə̀ zhyə̀ nɨ Tǎ à tàʼnə lo pɨ̀ səəkə̀ e.

²⁴Nẅùə̀ la Àzhwùə̀, lenəla pànə̀ nɨ pɨ pa nsəəkə̀ e chyə̂ a nɨ səəkə̀ e amwuə Àzhwùə̀ nɨ nkǔŋə nkuŋə.”

²⁵Mə̀ngyə̌ wa a shwəŋə̀ lo, “Ǹzhyə̂ lo Ghù Ndzoʼnə wa à wə̀ ntô, nɨ pɨ fuŋə̀nə nɨ Kristù la. Nkwùə̀ nɨ à ghǎ tô, à ghǎ tiitə̀ a wəə nɨ mɨ̀nwùə̀ mɨ̀tsùmə̀.”

²⁶Yěsû a shwəŋə̀ ambo ze lo, “Mɨ̀ŋə̀ nɨ ngwə̀ nshwəŋnə̀ ambo ghò lə a ze.”

²⁷Tyìʼə̀ nkwùə̀ ghu, ɨ̀zùŋə̀ ndzùmə̀ Yěsû tô ntsirə̀ e a pə nshwəŋnə̀ pobə mə̀ngyə̌, ànwùə̀ ghu a kə̀ʼnə̀ a ghobə ka mɨ̀zùŋə. La ka ŋwùə̀ ɨghobə ɨ̀tse a pyiitə̀ e ambo mə̀ngyə̌ wa lo, “Wə̀ tàʼà àkə?” kə̀ ambo Yěsû lo, “Pɨghə ze pə nshwəŋnə̀ lə àkə?”

²⁸Mə̀ngyə̌ wa à lə̀ myàʼtə̀ àtəəmə̀ nchyə e alyiʼə ghu nkẅirə̀ ndèrə̀ amwuə mbòmpə àlaʼà nshwəŋə̀ ambo pànə̀ lo,

²⁹“Nɨ̀ tô ndzəənə̀ a ŋònə̀ nɨ à tiitə̀nə mə̀ nɨ ànwùə̀ àtsùmə̀ nɨ ǹgɨ̀rə̀ mə̀. Lə pə pə Ghù Ndzoʼnə wa?”

³⁰Lenəla pobə lə̀ furə̀ amwuə mbòmpə àlaʼà za ndèrə̀ a nɨ ghə̀ ntsirə̀ e.

³¹A lə̀ pə nkwùə̀ ghu ɨ̀zùŋə̀ ndzùmə̀ ɨ̀pe mə ndəpə̀ e mmə nshwəŋə̀ lo, “Zɨghə̀ àzwuumə̀ àtse.”

³²A shwəŋə̀ ambo pobə lo, “Ngwə̀ nɨ mɨ̀zɨghə̀ nɨ mbɨ zɨghə̀ nɨ ka nɨ̀ zhyə̂ a wɨghə ànwùə̀ àtse mbə̀ʼə mèrə.”

³³Lenəla, ɨ̀zùŋə̀ ndzùmə̀ ɨ̀pe pyiitə̀ a tɨ̀tɨ̀rə̀ pobə lo, “Ŋònə̀ ɨ̀tse a kɨ pəla ntô ŋŋâ e nɨ mɨ̀zɨghə̀?”

³⁴Yěsû a kẅùə̀ ambo pobə lo, “Mɨ̀zɨghə̀ ɨ̀mâ chyə̂ a nɨ fàʼà àfàʼà ẅùə̀ wa nɨ à lə̀ tsàanə mə̀, nkɨ nfàʼà a zèrə tə myàanə̀.

³⁵Yi nɨ̀ wa shwəŋə̀ lo, ‘À pirə̀ mbuŋə̀ ŋwɨgrə̀ nɨ̀kwàa mɨ̀zɨghə̀ tɨ̀ŋnə̀?’ Ngwə̀ shwəŋə̀ a wɨghə lo, nɨ̀ pə̀ʼkə̀ ɨ̀myə̂ ɨ̀mɨghə nnaŋə̀ ndzəənə̀ tsaʼnə mɨ̀zɨghə̀ tɨ̀ŋnə̀nə amwuə ɨ̀swùumə nkùʼù a nɨ fùʼù.

³⁶Pɨ pa ntwuə̀ a ŋònə̀ nɨ à wa nfùʼù la, a kɨ mmə nshwatə̀ mɨ̀ntàamə mə la aŋunə nɨ̀chyə̂mbyə̂ wa nɨ à ghoŋə̀nə nɨ nkuŋə̀. Njiilo ŋònə̀ nɨ à wa mbyə̀ pobə ŋònə̀ nɨ à wa nfùʼù pwuutə̀ mbə nɨ nɨ̀ghaʼà.

³⁷Lenəla àshwəŋnə̀ zə̀ lo, ‘Taʼà ŋwùə̀ à pyə̀, ẅùə̀ a tyiʼə̀ nfùʼù’ a nkǔŋə nkuŋə.

³⁸Ndə̀ tsàa a wɨghə lo nɨ̀ fùʼù amwuə ɨ̀swùumə wa nɨ ka nɨ̀ lə̀ fàʼà a wɨghə amwuə. Pànə̀ pɨ̀tse fàʼà àfàʼà yè tɨ̀ŋnə̀, nɨ̀ tyiʼə̀ fùʼù àpìi àfàʼà àzobə.”

³⁹Ngàŋə àlaʼà Sàmariyà yɨ̀noʼnə lə̀ nùŋə̀ ntɨŋmə̀ aŋunə Yěsû ntii ànwùə̀ nɨ mə̀ngyə̌ wa à lə̀ shwəŋə̀nə mbə̀ʼə Yěsû lo, “A lə̀ tiitə̀ mə̀ nɨ ànwùə̀ àtsùmə̀ nɨ ndə̀ ghɨ̀rə̀ mə̀.”

⁴⁰Tsaʼnə pànə̀ pɨ Sàmariyà lə̀ tônə ambo ze la, pobə lə̀ puʼù mbô lo â chyə̂ pobə pɨ pobə, a kɨ nchyə̂ pobə pɨ pobə aŋunə njyə̂ ɨpaa.

⁴¹Ntii àshwəŋnə̀ e, pànə̀ pɨ̀noʼnə lə̀ kẅìʼnə̀ nnùŋə̀ ntɨŋmə̀ aŋunə ze,

⁴²ntyiʼə̀ nshwəŋə̀ ambo mə̀ngyə̌ wa lo, “Ka pəə nùŋə̀ a wəə ntɨŋmə̀ aŋunə ze ntii ndàʼà ànwùə̀ nɨ wə̀ shwəŋnə̀, pəə nùŋə̀ ntɨŋmə̀ wəə pə ntiinə pəə àtwuə̀ ɨ̀pɨ̀ŋmə̀ àzəə zuʼù ànwùə̀ nɨ à shwəŋə̀nə nkɨ nzhyə̂ lo a ngàŋə̀ nchwarə̀ pə̀ənə̀ a àtwuə̀ ɨ̀shyə̂.”

⁴³Tsaʼnə njyə̂ za ɨpaa lə̀ làŋə̀nə, à lə̀ lèrə̀ a Galìlyə̂,

⁴⁴mbə̀ʼnə Yěsû àtwuə̀ ɨ̀pɨ̀ŋmə̀ e à lə̀ pyə̀ mə nshwəŋə̀ lo pɨ pa ka ghuʼtə̀ e a ngàŋə̀ ntwuumə̀ Nẅùə̀ amwuə àlaʼà àzobə.

⁴⁵Nkwùə̀ nɨ Yěsû à lə̀ kwuunə̀nə a Galìlyə̂, pànə̀ pɨ Galìlyə̂ lə̀ kẅiirə̀ e ntiinə pobə lə̀ pənə àzobə amwuə Nɨ̀ghaʼà Àlàŋə̀ Mmyàʼtə̀ a Yèrusalèmə̀ ndzəənə̀ ànwùə̀ àtsùmə̀ nɨ à lə̀ ghɨ̀rə̀nə.

⁴⁶Yěsû à lə̀ tyiʼə̀ nkẅirə̀ ndèrə̀ a Kanà nɨ à pənə amwuə Galìlyə̂ la, alyiʼə nɨ à lə̀ pə̀ŋə̀nə nchyə ɨ tyiʼə̀ mɨ̀lùʼù. Ngàŋə̀ àfàʼà mɨ̀karə yɨ̀tse à lə̀ pə a Kàpenòmə̀ moonə̀ e ghù mbyàŋnə̀ à mənə ngòonə̀.

⁴⁷Nkwùə̀ nɨ à lə̀ zuʼnə lo Yěsû à furə̀ mə a Judyà ntô a Galìlyə̂, à lə̀ tô mbuʼù mbô ambo ze lo â tô Kàpenòmə̀ mbarə̀ a moonə̀ e ghù mbyàŋnə̀ nɨ à lə̀ pənə ngòonə̀ ntyiʼə̀ mmə ntàʼà kwɨghə̀.

⁴⁸Yěsû à lə̀ shwəŋə̀ ambo zə lo, “Nɨ̀ tə ka zəənə̀ a wɨghə ɨ̀lènə̀ ɨ̀nwùə̀ ghobə mɨ̀nwùə̀ mɨ yerə̀nə yerə̀nə nɨ̀ pyiimə̀ a wɨghə ànwùə̀ mə̀ apə̀.”

⁴⁹Àtwuə̀ ngàŋə̀ àfàʼà mɨ̀karə wa a kẅùə̀ lo, “Tǎ, tô pùu lèrə̀ zaʼà moonə̀ mə̀ â pòŋə̀ kwɨghə̀.”

⁵⁰Yěsû a shwəŋə̀ ambo ze lo, “Lèrə̀ o, moonə̀ o à pɨ tɨ̀ŋnə̀.” Ŋònə̀ wa à lə̀ nùŋə̀ ntɨŋmə̀ e aŋunə ànwùə̀ nɨ Yěsû à lə̀ shwəŋə̀nə ntyiʼə̀ ndèrə̀ e.

⁵¹Tsaʼnə à lə̀ mənə ndèrə̀, ngàŋə àfàʼà ɨ̀ze tô ntsirə̀ e a àlàŋə̀ nshwəŋə̀ lo, “Moonə̀ o wa à fiitə̀.”

⁵²A pyiitə̀ a ghobə nɨ nkwùə̀ nɨ moonə̀ wa à lə̀ fiitə̀nə, pobə kɨ nkẅùə̀ lo, “Fibà wa à lə̀ myàʼtə̀ e ɨ̀zòonə a ndzə̀ŋə̀ nẅùumə̀.”

⁵³Tǎ wa a kẅempə̀ lo lə lə̀ pə nkwùə̀ za nɨ Yěsû à lə̀ shwəŋə̀nə ambo ze lo, “Moonə̀ o à pɨ tɨ̀ŋnə̀.” Lenəla à lə̀ nùŋə̀ ntɨŋmə̀ e aŋunə Yěsû pobə pɨ ngẅàrə̀ e a nɨ furə̀ nkwùə̀ ghu.

⁵⁴Lə lə̀ pə ɨ̀lènə̀ ɨ̀nwùə̀ nɨ pyàanə ɨpaa nɨ Yěsû à lə̀ ghɨ̀rə̀nə nkwùə̀ nɨ à lə̀ furə̀nə Judyà ntô a Galìlyə̂.