Read Pinyin Jònə 5 Bible Online

Jònə 5 - Pinyin bible

Jònə 5

¹Nkwùə̀ ɨ̀tse ɨ̀ lə̀ làŋə̀, Yěsû a koʼò ndèrə̀ a Yèrusalèmə̀ amwuə njyə̂ nɨ̀ghaʼà pɨ̀Jew.

²Atəŋə nchyə yètse a pə a Yèrusalèmə̀ mbaatə̀ ntswùə̀ àpùʼù mbyə̂ ndzìrə̀ (nɨ pɨ lə̀ mənə nfuŋə̀ amwuə àshwəŋnə̀ pɨ̀Hibrù lo Bethzatha) nɨ mɨ̀ntswùə̀ mɨ àpùʼù mɨ̀tàanə pənə ghu pɨ poomə̀ nɨ mɨ̀ntoomə̀.

³Àpùŋə̀ pɨghoonə tsaʼa pɨ̀fə̀, nɨ pɨ̀koŋə̀ ɨ̀shyə̂, nɨ pànə̀ nɨ pɨ̀pàa pɨ mbɨ̀ŋmə̀ ɨ̀pobə pɨ̀tse kwɨghə̀nə lə̀ nwuunə̀ amwuə ɨ̀pùʼù pə̀, [mmə mbyabə̀ nkwùə̀ nɨ pɨ̌ tô taanə̀ nchyə ghu,

⁴ntiinə angèrə̀ Ndòʼnə̀mbyə̂ à lə̀ mənə nshwuʼə̀ amwuə mɨ̀nkwùə̀ mɨ̀tse mmə nkwuunə̀ ntaanə̀ atəŋə nchyə zə, ntsàambyə̀ ngoonə nɨ à kwuunə̀nə amwuə atəŋə nchyə nkwùə̀ nɨ pɨ taanə̀nə a zèrə, mbuurə̀ ɨghoonə nɨ pənə aŋunə ze zùŋə̀ myə̀.]

⁵Taʼà ŋònə̀ ɨ̀tse à lə̀ pə alyiʼə ghu nɨ à ghòonə̀ mə aŋunə nguʼu mɨ̀ghumə̀ mɨntarə ntsòbə̀ nɨ̀fàamə̂.

⁶Nkwùə̀ nɨ Yěsû à lə̀ zəənə̀nə e, nzhyə̂ lo à chyə̂ mə aŋunə ntyə̌ sàa nɨ aghoonə ghu, à lə̀ pyiitə̀ e lo, “Wə̀ taʼà lo fiitə̀?”

⁷Ngoonə wa a kẅùə̀ lo, “Tǎ, ka mbə mə̀ nɨ ŋònə̀ nɨ mbə̀ʼə a yèmpə̀ mə̀ nchyâ mə̀ amwuə atəŋə nchyə zə nkwùə̀ nɨ pɨ taanə̀nə nchyə wə̀. Nkwùə̀ nɨ mbɨ mə taŋnə̀ àzâ lo kwuunə̀ amwuə atəŋə zə, ŋònə̀ ɨ̀tse â zàamə̀ nkwuunə̀ e a mbyə̀ mɨ̀ŋə̀.”

⁸Yěsû a shwəŋə̀ ambo ze lo, “Lòo a ɨ̀shyə̂ mbìʼì ɨ̀kwùunə o ngyìinə̀.”

⁹Mbɨ̀ŋmə̀ ŋònə̀ wa ɨ̀ lə̀ zùŋə̀ ntɨ̀ŋnə̀ a taʼà nkwùə̀, a pìʼì ɨ̀kwùunə e ngyìinə̀. Njyə̂ nɨ ànwùə̀ zèrə zə̀ lə̀ ghɨ̀rə̀nə a lə̀ pə njyə̂ àlaʼà,

¹⁰lenəla pɨ̀Jew shwəŋə̀ ambo ŋònə̀ nɨ pɨ lə̀ parə̀nə e la lo, “Lə̌ njyə̂ àlaʼà, ka mbòomə a pyiimə̀ lo wə̀ pìʼì ɨ̀kwùunə o aŋunə njyə̂ zə̀.”

¹¹La ŋònə̀ wa a kẅùə̀ lo, “Ŋònə̀ nɨ à tənə mbarə̀ mə̀ à tə nshwəŋə̀ ambo mɨ̀ŋə̀ lo, ‘Pìʼì ɨ̀kwùunə o ngyìinə̀.’”

¹²Pobə pyiitə̀ ambo ze lo, “Ŋònə̀ nɨ à tənə nshwəŋə̀ ambo ghò lo wə̀ pìʼì ɨ̀kwùunə o ngyìinə̀ la ɨ̀wə̌?”

¹³Ŋònə̀ nɨ pɨ lə̀ parə̀nə la ka à lə̀ zhyə̂ e a ŋònə̀ nɨ à tənə mbə, mbə̀ʼnə Yěsû à tswurə̀ mə amwuə pànə̀ nfurə̀ nkwuunə̀ e amwuə àpùŋə̀ pə̀ənə̀ nɨ a tənə mbə a alyiʼə ghu.

¹⁴Yěsû à lə̀ chi ndzəənə̀ a ŋònə̀ wa a Ndâ Mɨ̀shwàʼà Nẅùə̀ nshwəŋə̀ ambo ze lo, “Zəənə̀, wə̀ fiitə̀ njiilo kò wə̀ chi ngɨ̀rə̀ ànwùə̀ tɨ̀pòŋə̀, yi ànwùə̀ àtse nɨ a pɨ̂nə ntsàarə̀ a zə a chi ghɨ̀rə̀ o.”

¹⁵Ŋònə̀ wa à lə̀ lèrə̀ ngə̀ nshwəŋə̀ ambo pɨ̀Jew lo la lə̀ ghɨ̀rə̀ Yěsû a fiitə̀.

¹⁶Lə̌ ɨ̀sùmə nɨ Pɨ̀Jew lə̀ tyiʼnə ŋŋâ ngəʼə̀ ambo Yěsû ntiinə à parə̀ a ŋwùə̀ amwuə njyə̂ àlaʼà Pɨ̀Jew.

¹⁷La Yěsû a kẅùə̀ ambo pobə lo, “Tǎ ɨwəə à wə̀ mbirə̀ nfàʼà tə mbyàa sìnə̀ wə̀, lenəla ǹkɨ mmə nfàʼà àzâ.”

¹⁸Ka ɨ̀sùmə nɨ pɨ̀Jew lə̀ chinə mmə ntaŋnə̀ a nɨ faʼa nzhwuutə̀ a Yěsû ɨ̀ lə̀ pə e pə ntiinə ɨ̀ lə̀ pənə njyə̂ àlaʼà ndàʼà, ɨ̀ lə̀ kɨ mbə ntiinə à lə̀ fuŋə̀nə a Nẅùə̀ nɨ Tǎ ɨghobə, nkɨ ndòo mbɨ̀ŋmə̀ e tsaʼa Nẅùə̀.

¹⁹Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo mbə̀ʼə ka Moonə̀ a fàʼà e ànwùə̀ àtse àtwuə̀ nɨ ze. Ǎ ghɨ̀rə̀ tyìʼə̀ ànwùə̀ nɨ à zəənə̀nə ambo Tǎ. Ànwùə̀ àtsùmə̀ nɨ Tǎ à ghɨ̀rə̀nə, Moonə̀ à wa nkɨ ngɨ̀rə̀.

²⁰Mbə̀ʼnə Tǎ a kòŋə̀ a moonə̀ la, a nèrə̀ ànwùə̀ àtsùmə̀ nɨ à wa ngɨ̀rə̀ ambo ze. À ghǎ nèrə̀ e nɨ mɨ̀nwùə̀ mɨ̀ẅùunə nɨ mɨ tsàarə̀nə mə, a tyiʼə̀ ngɨ̀rə̀ a mèrə mɨ kə̀ʼnə̀ a wɨghə.

²¹Tsaʼnə Tǎ à wa mbə̀ʼkə̀ ɨ̀kwuə̀ pə̀ənə̀ ŋŋâ a nɨ̀chyə̂mbyə̂ ambo pobə la, a tsaʼnə Moonə̀ ǎ kɨ ŋâ a nɨ̀chyə̂mbyə̂ ambo pànə̀ nɨ à kòŋə̀nə a nɨ ŋâ.

²²Ka Tǎ a pə saʼà e ɨ̀sàʼa ŋònə̀ ɨ̀tse, la à ŋâ mə mɨ̀tɨ̀ŋnə̀ pə ambo Moonə̀ lo a tyiʼə̀ nsaʼà mɨ̀sàʼa mɨ pə̀ənə̀.

²³Njiilo ŋwùə̀ ntsùmə̀ a ghuʼtə̀ a Moonə̀ tsaʼnə à ghuʼtə̀nə a Tǎ. Ŋònə̀ nɨ ka à ghuʼtə̀ e a moonə̀ ka à kɨ mə nguʼtə̀ e a tǎ nɨ a tsàanə a Moonə̀.

²⁴“Ǹshwəŋə̀ tyìʼə̀ nkǔŋə nkuŋə ambo pɨghə lo ŋwùə̀ ntsùmə̀ nɨ à zuʼnə àshwəŋnə̀ mə̀, nnùŋə̀ ntɨŋmə̀ e aŋunə ŋònə̀ nɨ à twuumə̀nə mə̀, ǎ pə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ka mbə ghǎ saʼà mə̀ ɨ̀sàʼa e; à làŋə̀ mə a nɨ̀wɨghə̀ nkwuunə̀ amwuə nɨ̀chyə̂mbyə̂.

²⁵Ǹshwəŋə̀ tyìʼə̀ nkǔŋə nkuŋə ambo pɨghə lo, nkwùə̀ ɨ̀ zə nkùʼù, ɨ̀ pyə̀ mə nkùʼù, nɨ ɨ̀kwuə̀ pə̀ənə̀ zuʼù ngyə̀ Moonə̀ Nẅùə̀; pànə̀ nɨ pobə pɨ zuʼù pobə̌ pə nɨ nɨ̀chyə̂mbyə̂.

²⁶Tsaʼnə Tǎ à pənə nɨ nɨ̀chyə̂mbyə̂ la, à kɨ ngɨ̀rə̀ lo Moonə̀ â pə nɨ nɨ̀chyə̂mbyə̂.

²⁷A ŋâ e nɨ ɨ̀tɨ̀ŋnə̀ a nɨ saʼà mɨ̀sàʼa mə pə̀ənə̀ ntiinə a pənə Moonə̀ Ŋwùə̀.

²⁸Kò zə̀ a kə̀ʼnə̀ e a wɨghə; nkwùə̀ ɨ̀ zə̀ ntô nɨ pànə̀ nɨ pɨ pənə amwuə mɨ̀shyə̀ ghǎ zuʼù ngyə̀ e,

²⁹nfurə̀, pànə̀ pyə̀ nɨ pɨ lə̀ mənə ngɨ̀rə̀ ɨ̀nwùə̀ pɨ̀shìʼnə̀ ghǎ zhwuumə̀ kwuunə̀ amwuə nɨ̀chyə̂mbyə̂, pànə̀ pyə̀ nɨ pɨ lə̀ mənə ngɨ̀rə̀ ɨ̀nwùə̀ tɨ̀pòŋə̀ zhwuumə̀ nkwuunə̀ amwuə ɨ̀sàʼa.

³⁰“Mbə̀ʼə ka ǹgɨ̀rə̀ mə̀ ànwùə̀ àtse àtwuə̀ nɨ mɨ̀ŋə̀; ndə̀ saʼà la tsaʼnə ǹdzuʼnə, nkɨ nsaʼà ɨ̀shìʼnə̀; ntiinə ka ǹtàʼà mə̀ a nɨ ghɨ̀rə̀ ànwùə̀ nɨ a pòŋə̀nə mɨ̀ŋə̀, ǹkɨ tàʼà pə a nɨ ghɨ̀rə̀ ànwùə̀ nɨ ŋònə̀ nɨ à twuumə̀nə mə̀ a shwəŋə̀nə.

³¹“Ǹtə mə nshwəŋə̀ ànwùə̀ mbə̀ʼə ɨ̀pɨ̀ŋmə̀ mə̀, ŋwùə̀ laʼa mbyiimə̀ e lo ǹshwəŋə̀ la a nkǔŋə nkuŋə apə̀,

³²Ŋònə̀ ɨ̀tse à wa ghu nɨ à tiitə̀nə mɨ̀nwùə̀ mbə̀ʼə mə̀, lenəla njiilo ànwùə̀ nɨ à shwəŋə̀nə mbə̀ʼə mə̀ a nkǔŋə nkuŋə.

³³Nɨ̀ lə̀ twuumə̀ pə̀ənə̀ ambo Jònə, la a shwəŋə̀ mɨ̀nwùə̀ mbə̀ʼə nkǔŋə nkuŋə.

³⁴Ka a pə e lo ǹtàʼà a ndzəənə̀ zəənə̀nə nɨ à pənə ŋwùə̀ mɨsoŋə; la ǹshwəŋə̀ a zə pə lo mbə̀ʼə ghɨ̀rə̀ nɨ̀ chwarə̀.

³⁵Jònə à lə̀ pə tsaʼa nkàʼà nɨ pɨ shwuʼnə lo nkɨrə̀ nkyàʼà ɨlyiʼə, lenəla nɨ̀ tsoʼò a nɨ ghaʼà nkàʼà ẅèrə wə̀ pə aŋunə mətùmə nkwùə̀.

³⁶Ǹchyə̂ nɨ ndzəənə̀ zəənə̀nə ẅùə̀ nɨ à tsàarə̀nə ànwùə̀ nɨ Jònə à lə̀ shwəŋə̀nə mbə̀ʼə mə̀. Mbə̀ʼnə ntyə̌ àfàʼà nɨ Tǎ ɨwəə à lə̀ ŋânə lo m̀myàanə̀, zhyə̀ nɨ ngwə̀ nkɨ mmə nfàʼà a nèrə̀ lo Tǎ à lə̀ twuumə̀ mə̀.

³⁷Lenəla Tǎ nɨ à lə̀ twuumə̀nə mə̀, a lə̀ kɨ shwəŋə̀ ànwùə̀ mbə̀ʼə mə̀. Nɨ̀ pirə̀ a wɨghə tɨ zuʼù ngyə̀ e kɨ zəənə̀ e tsaʼnə à pənə,

³⁸ka àshwəŋnə̀ e a pə chyə̂ e amwuə pɨghə ntiinə ka nɨ̀ nùŋə̀ a wɨghə àshwəŋnə̀ e amwuə pɨghə, mbə̀ʼnə ka nɨ̀ nùŋə̀ a wɨghə ntɨŋmə̀ aŋunə ŋònə̀ nɨ à twuumə̀nə mə̀.

³⁹Nɨ̀ wa ntə̂ àtwuə̀ nnaŋə̀ lo zhyə̂ ɨ̀sùmə ànwùə̀ nɨ àŋwàʼnə̀ Nẅùə̀ a za nshwəŋə̀ ntiinə nɨ̀ kwàŋə̀nə lo a àŋwàʼnə̀ zə̀ nɨ a za ŋŋâ a wɨghə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀. La lə̌ àŋwàʼnə̀ nɨ a shwəŋnə̀ mɨ̀nwùə̀ mbə̀ʼə mə̀.

⁴⁰La nɨ̀ twuunə̀ a wɨghə a nɨ tô ambo mɨ̀ŋə̀ kẅiirə̀ a nɨ̀chyə̂mbyə̂.

⁴¹“Ka ntàʼà mə lo pànə̀ ghuʼtə̀ mə̀.

⁴²La ǹzhyə̂ a wɨghə lo ka nɨ̀ kòŋə̀ a wɨghə a Nẅùə̀.

⁴³Ǹtô aŋunə nɨ̀linə̀ nɨ Tǎ ɨwəə la ka nɨ̀ kẅiirə̀ a wɨghə a gha, la nkwùə̀ nɨ ŋònə̀ ɨ̀tse ǎ tô tô aŋunə ɨ̀tse nɨ̀linə̀, nɨ̌ kẅiirə̀ e.

⁴⁴Mbə̀ʼə nɨ̀ tyiʼə̀ nnùŋə̀ ntɨŋmə̀ aŋunə mɨ̀ŋə̀ lə ɨla tsaʼnə àzɨghə chyə̂ mbə pə a nɨ kẅiirə̀ àghuʼtə̀ a pə ambo pɨghə pɨghə la mbə ka tàʼà a wɨghə a nɨ kẅiirə̀ àghuʼtə̀ nɨ a furə̀nə ambo Nẅùə̀ nɨ à pənə e ze nɨ ze ndàʼà?

⁴⁵Kò nɨ̀ kwàŋə̀ a wɨghə lo ngǎ chyâ ɨ̀sàʼa ɨ̀tse aŋunə pɨghə a mbyə̀ Tǎ ɨwəə. Ŋònə̀ nɨ a ghǎ chyâ ɨ̀sàʼa aŋunə pɨghə a Mǔsî nɨ nɨ̀ lə̀ nùŋə̀nə ntɨŋmə̀ wɨghə aŋunə ze.

⁴⁶Nɨ̀ lə̀ pəla mbyiimə̀ àshwəŋnə̀ Mǔsî, yi nɨ̌ pyiimə̀ àzâ àshwəŋnə̀, ntiinə Mǔsî à lə̀ ŋwàʼnə̀ mbə̀ʼə mə̀.

⁴⁷Tsaʼnə ka nɨ̀ pə mbyiimə̀ a wɨghə ànwùə̀ nɨ à lə̀ ŋwàʼnə̀nə la, mbə̀ʼə nɨ̀ tyiʼə̀ mbyiimə̀ àzâ ànwùə̀ nɨ ngwə̀ nshwəŋə̀ lə ɨla?”