Read Pinyin Jònə 6 Bible Online

Jònə 6 - Pinyin bible

Jònə 6

¹Tsaʼnə mɨ̀nwùə̀ mèrə mə lə̀ làŋə̀nə, Yěsû a twuumə̀ atəŋə Galìlyə̂ (nɨ pɨ lə̀ kɨnə mmə nfuŋə̀ nɨ Tìberyàsə̀) ndèrə̀ amwuə zhyə̀ ndzìnə.

²Àpùŋə̀ pànə̀ pɨ̀noʼnə lə̀ zùŋə̀ e ntiinə pobə lə̀ zəənə̀nə ɨ̀lènə̀ ɨ̀nwùə̀ pɨ̀yerə̀nə yerə̀nə nɨ a lə̀ ghɨ̀rə̀nə aŋunə pɨghoonə.

³Yěsû pobə ɨ̀zùŋə̀ ndzùmə̀ ɨ̀pe koʼò ndèrə̀ àtwuə̀ mbarə̀ nnwuunə̀ ghu.

⁴A lə̀ kɨ pə la nɨ nkwùə̀ Nɨ̀ghaʼà Àlàŋə̀ Mmyàʼtə̀ pɨ̀Jew ɨ̀ lə̀ paatə̀.

⁵Yěsû a kɨ pə̀ŋə̀ ɨ̀myə̂ ɨ̀me, ndzəənə̀ àpùŋə̀ pànə̀ pɨ̀noʼnə a pə ntô ambo ze. Lenəla, a pyiitə̀ ambo Filibə̀ lo, “Pə̀ənə̌ zwuunə̀ mɨ̀zɨghə̀ lə ɨghə nɨ mbə̀ʼə mɨ zə̂ pànə̀ pə̀?”

⁶Yěsû à lə̀ shwəŋə̀ a zə la nɨ lòo nzhwiʼì a Filibə̀ ntiinə à lə̀ zhyə̂nə ànwùə̀ nɨ ǎ ghɨ̀rə̀.

⁷Filibə̀ a kẅùə̀ ambo ze lo, “A tə mbə pə nkabə̀ àfàʼà aŋunə pɨ̀ŋwɨgrə̀ ndùnə̀ ɨ̀ kùʼnə̀ e a nɨ lòo ndzwuunə̀ mɨ̀zɨghə̀ nɨ mbə̀ʼə taʼà ŋwùə̀ ɨghobə a zɨghə̀ e tyìʼə̀ a mɨlyiʼə apə̀.”

⁸Taʼà àzùŋə̀ ndzùmə̀ e ghùtse nɨ pɨ lə̀ mənə nfuŋə̀ nɨ Andrù, mbə ndyimə Shimùnə̀ Pità a shwəŋə̀ ambo ze lo,

⁹“Mômbyàŋnə̀ ghùtse à wə̀ a nɨ̀ghə̂ nɨ ntsɨŋə̀ àpaanə̀ barley ɨtaanə̀ nɨ ɨ̀swuə̀ ɨpaa. La mbə̀ʼə zèrə zə ghɨ̀rə̀ lə̀ àkə ambo ndùnə̀ pànə̀ wə̀?”

¹⁰Yěsû a shwəŋə̀ lo, “Nɨ̀ ghɨ̀rə̀ pànə̀ pə nwuunə̀ a ɨ̀shyə̂.” Nɨ̀yìinə à lə̀ noʼò alyiʼə ghu ka mɨ̀zùŋə. Lenəla ɨ̀zùŋə̀ ndzùmə̀ ɨ̀pe ghɨ̀rə̀ ŋwùə̀ ntsùmə̀ a nwuunə̀ a ɨ̀shyə̂. Mbyàŋnə̀ ndàʼà lə̀ pə tsaʼa nkaamə̀ ɨtaanə̀.

¹¹Yěsû a tyiʼə̀ ndòo ntsɨŋə̀ àpaanə̀ za, ŋŋâ a mɨyàa ambo Nẅùə̀, ngàpə̀ a zèrə ambo pànə̀ nɨ pɨ lə̀ nwuunə̀nə a ɨ̀shyə̂. Nkɨ ngɨ̀rə̀ a lenə aŋunə ɨ̀swuə̀. Ŋwùə̀ ntsùmə̀ nɨ à lə̀ nwuunə̀nə a ɨ̀shyə̂ à lə̀ zɨghə̀ tsaʼnə à kòŋə̀nə.

¹²Nkwùə̀ nɨ ŋwùə̀ ntsùmə̀ à lə̀ zɨghə̀nə ndzwurə̀, à lə̀ shwəŋə̀ ambo ɨ̀zùŋə̀ ndzùmə̀ ɨ̀pe lo, “Nɨ̀ shwatə̀ àpwùʼə̀ njiilo kò mɨlyiʼə a lèrə̀ e àfǐfǐ.”

¹³Lenəla pobə lə̀ lyàa ɨ̀chepə̀ ntsɨŋə̀ àpaanə̀ za ɨtaanə̀ nɨ pànə̀ lə̀ zɨghə̀nə ndẅenə̀ mɨnkaamə ntsòbə̀ ɨpaa.

¹⁴Nkwùə̀ nɨ pànə̀ pə lə̀ zəənə̀nə àlènə̀ ànwùə̀ yerə̀nə yerə̀nə zə nɨ Yěsû à lə̀ ghɨ̀rə̀nə la, pobə lə̀ pìʼnə̀ a nɨ shwəŋə̀ lo, “A tyìʼə̀ nkǔŋə nkuŋə lo lə̌ ngàŋə̀ ntwuumə̀ Nẅùə̀ nɨ à lə̀ pənə tô amwuə àtwuə̀ ɨ̀shyə̂!”

¹⁵Tsaʼnə Yěsû à lə̀ zhyə̂nə lo pɨ pə ntàʼà e lo zoʼò aŋunə ɨ̀fò nɨ mɨ̀tɨ̀ŋnə̀, à lə̀ tswurə̀ nchi nkoʼò ndèrə̀ nɨ mbyə̀ àtwuə̀ mbarə̀ gha ze nɨ ze.

¹⁶Nkwùə̀ nkwə̌ ɨ̀ lə̀ kùʼù ɨ̀zùŋə̀ ndzùmə̀ ɨ̀pe shwuʼə̀ ndèrə̀ a ntswùə̀ atəŋə Galìlyə̂,

¹⁷nkwuunə̀ amwuə àkànwuʼə, nchi mmə ntwuumə̀ atəŋə ghu lo lèrə̀ a Kàpenòmə̀. A lə̀ kɨ pə nkwùə̀ ghu ɨlyiʼə sinə̀ la Yěsû a pirə̀ tɨ tô ntsirə̀ a ghobə.

¹⁸Nkɨ wùutə̀ kɨ̀fèrə̀ ntɨ̀ŋnə̀ a pìʼnə̀ a nɨ làŋə̀, ngɨ̀rə̀ nchyə ɨ tyiʼə̀ mmə mbə̀grə̀ nɨ ɨ̀tɨ̀ŋnə̀.

¹⁹Pobə lə̀ yìinə̀ amwuə àkànwuʼə aŋunə ntyə̌ ɨ̀tse tsaʼa pɨ̀kìlometà ntuurə̀, ndzəənə̀ a Yěsû a mə ngyìinə̀ aŋunə nchyə mmə ntô paatə̀ a ghobə, àkẅàrə̀ yè noʼnə a kwuunə̀ a ghobə,

²⁰la Yěsû a shwəŋə̀ ambo pobə lo “A mɨ̀ŋə̀ kò nɨ̀ pô.”

²¹Pobə lə̀ ghaʼà a nɨ lo e amwuə àkànwuʼə a ghu, nkɨ wùutə̀ àkànwuʼə a pyàa mə e alyiʼə nɨ pobə lə̀ pənə ndèrə̀.

²²Njyə̂ lə̀ laanə̀, àpùŋə̀ pànə̀ za nɨ a lə̀ ghoŋə̀nə amwuə zhyə̀ ndzìnə nchyə a zəənə̀ lo ka Yěsû a lə̀ kwuunə̀ e pobə ɨ̀zùŋə̀ ndzùmə̀ ɨ̀pe amwuə ndàʼà taʼà àkànwuʼə nɨ a lə̀ pənə alyiʼə ghu, la ndzəənə̀ lo ɨ̀zùŋə̀ ndzùmə̀ ɨ̀pe lə̀ lèrə̀ pə pobə nɨ pobə.

²³Tyìʼə̀ nkwùə̀ ghu, ɨ̀kànwuʼə pɨ̀tse lə̀ furə̀ a Tìberyàsə̀ ntô ntəəmə̀ mbaatə̀ alyiʼə nɨ Ndòʼnə̀mbyə̂ à lə̀ ŋânə a mɨyàa ambo Nẅùə̀ ŋŋâ àpaanə̀ za pobə kwurə̀ la.

²⁴Nkwùə̀ nɨ ka àpùŋə̀ pànə̀ za a lə̀ zəənə̀ a ghobə a Yěsû, nkɨ ka zəənə̀ a ghobə ɨ̀zùŋə̀ ndzùmə̀ ɨ̀pe, pobə lə̀ kwuunə̀ amwuə ɨ̀kànwuʼə pɨ̀ghu ntwuumə̀ ndèrə̀ a nɨ tàʼà a Yěsû a Kàpenòmə̀.

²⁵Nkwùə̀ nɨ pobə lə̀ zəənə̀nə e a ndzìnə nchyə gha, pobə lə̀ pyiitə̀ ambo ze lo, “Ɨ̀nèrə̀, wə̀ lə̀ tô a nɨ̀ghə̂ nkwùə̀ àkə?”

²⁶Yěsû a kẅùə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ka nɨ̀ tàʼà a wɨghə a gha la ntii ɨ̀lènə̀ ɨ̀nwùə̀ pɨ̀yerə̀nə yerə̀nə nɨ ǹgɨ̀rə̀nə, nɨ̀ tàʼà mə̀ la ntiinə nɨ̀ lə̀ kwurə̀nə àpaanə̀ za ndzwurə̀.

²⁷Kò nɨ̀ kɨ nfàʼà mbuurə̀ àfàʼà zə̀ tɨsɨŋnə pə aŋunə mɨ̀zɨghə̀ nɨ mɨ̌ pɨ̂, nɨ̀ fàʼà pə aŋunə mɨ̀zɨghə̀ ma nɨ mɨ ghoŋə̀nə nɨ nkuŋə̀, kə̀ mɨ̀zɨghə̀ nɨ mɨ ma ŋŋâ a nɨ̀chyə̂mbyə̂. Lə̌ mɨ̀zɨghə̀ nɨ Moonə̀ Ŋwùə̀ à ghǎ ŋâ ambo pɨghə, ntiinə Nẅùə̀ à lènə̀ mə e tsaʼa moonə̀ e.”

²⁸Lenəla pobə pyiitə̀ e lo, “Mbə̀ʼə pəə ghɨ̀rə̀ lə ɨla ntyiʼə̀ nfàʼà àfàʼà nɨ Nẅùə̀ à tàʼnə lo pəə fàʼà?”

²⁹Yěsû a kẅùə̀ ambo pobə lo, “Ànwùə̀ nɨ Nẅùə̀ à tàʼnə lo nɨ̀ ghɨ̀rə̀ a chyə̂ lo nɨ̀ nùŋə̀ mɨ̀ntɨŋmə̀ ɨ̀mɨghə aŋunə ŋònə̀ nɨ à tsàanə la.”

³⁰Pobə chi mbyiitə̀ ambo ze lo, “Àlènə̀ ànwùə̀ nɨ wə̌ nèrə̀ ambo pəə mbə̀ʼə pəə zəənə̀ mbyiimə̀ la a zèrə, wə̌ ghɨ̀rə̀ ànwùə̀ àkə?

³¹Pɨ ŋwàʼnə̀ amwuə àŋwàʼnə̀ Nẅùə̀ lo, pɨ̀tǎ pɨ tǎ pəə lə̀ zɨghə̀ manna amwuə alyiʼə waakə; Pɨ ŋwàʼnə̀ nshwəŋə̀ la lo, ‘A lə̀ ŋâ a ghobə nɨ àpaanə̀ nɨ a furə̀nə a nɨ̀pwuurə̀ lo pobə kwurə̀.’”

³²Yěsû a shwəŋə̀ ambo pobə tyìʼə̀ lo, “Ǹshwəŋə̀ tyìʼə̀ nkǔŋə nkuŋə ambo pɨghə lo, ka a lə̀ ŋâ Mǔsî ŋŋâ àpaanə̀ nɨ a furə̀nə a nɨ̀pwuurə̀ ambo pɨghə, a lə̀ ŋâ Tǎ ɨwəə. La à ŋâ e Tǎ ɨwəə ŋŋâ a wɨghə nɨ àpaanə̀ nkǔŋə nkuŋə za nɨ a furə̀nə a nɨ̀pwuurə̀.

³³Àpaanə̀ za nɨ Nẅùə̀ à wa ŋŋâ la, a zhyə̀ za nɨ a za nfurə̀ a nɨ̀pwuurə̀ nshwuʼə̀ ngɨ̀rə̀ lo pànə̀ pɨ àtwuə̀ ɨ̀shyə̂ chyə̂.”

³⁴Tsaʼnə pobə lə̀ zuʼnə a lenə la, pobə shwəŋə̀ ambo ze lo, “Tǎ, tyiʼə̀ ŋŋâ tyìʼə̀ àpaanə̀ zə ambo pəə nkwùə̀ ɨ̀tsùmə̀.”

³⁵Yěsû a ghɨ̀rə̀ a laanə̀ ambo pobə lo, “Mɨ̀ŋə̌ àpaanə̀ nɨ̀chyə̂mbyə̂, ka njyə̀ ɨ̀ pə ghǎ zaŋə̀ e a ŋwùə̀ wa ntsùmə̀ nɨ à tônə ambo mɨ̀ŋə̀. Njyə̀ nchyə ɨ̂ kɨ ndzaŋə̀ e a ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə mɨ̀ŋə̀ apə̀.

³⁶La tsaʼnə ndə̀ shwəŋə̀ mə ambo pɨghə lo, nɨ̀ zəənə̀ mə mə̀ la ka pyiimə̀ a wɨghə.

³⁷Ŋwùə̀ wa ntsùmə̀ nɨ Tǎ ɨwəə à ŋânə ambo mɨ̀ŋə̀ ǎ tô ambo mɨ̀ŋə̀. Ka mbə kɨ waʼà mə̀ a ŋònə̀ wa nɨ à tônə ambo mɨ̀ŋə̀,

³⁸ntiinə ka ndə̀ furə̀ mə̀ a nɨ̀pwuurə̀ nshwuʼə̀ la a nɨ ghɨ̀rə̀ ànwùə̀ nɨ ǹtàʼnə. Ndə̀ shwuʼə̀ pə a nɨ ghɨ̀rə̀ ànwùə̀ nɨ ẅùə̀ wa nɨ à twuumə̀nə mə̀ à kòŋə̀nə lo ǹgɨ̀rə̀

³⁹Ànwùə̀ nɨ ze wa nɨ à twuumə̀nə mə̀ à tàʼnə lo ǹgɨ̀rə̀ a chyə̂ lo, kò m̀myàʼtə̀ mə̀ a taʼà ŋwùə̀ wə̀ ɨ̀tse nɨ à ŋânə wə̀ lo â pî. Ǹchyə̂ pə a nɨ gha nzhwuumə̀ a ghobə aŋunə nɨ̀wɨghə̀ aŋunə ndẅùutə njyə̂.

⁴⁰Ntiinə ànwùə̀ nɨ Tǎ ɨwəə à tàʼnə a chyə̂ lo ŋwùə̀ wa ntsùmə̀ nɨ à zəənə̀nə a Moonə̀ e nkɨ nnùŋə̀ ntɨŋmə̀ e aŋunə ze, à ghǎ pə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀, n̂gǎ nkɨ nzhwuumə̀ e aŋunə nɨ̀wɨghə̀ aŋunə ndẅùutə njyə̂.”

⁴¹Tsaʼnə à lə̀ shwəŋə̀nə a lenə la, pɨ̀Jew pìʼnə̀ a nɨ lẅùmpə̀ ntiinə à shwəŋə̀nə lo “Ǹchyə̂ mbə la àpaanə̀ za nɨ a furə̀nə a nɨ̀pwuurə̀ nshwuʼə̀”

⁴²Pobə pìʼnə̀ a nɨ pyiitə̀ lo, “Ka lə pə e Yěsû moonə̀ Jòsebə̀. Yi pə̀ənə̀ zhyə̂ a tǎ ɨghobə pobə mǎ e? À tyiʼə̀ ndàŋə̀ ɨla ghu nshwəŋə̀ lo, ‘Ǹfurə̀ a nɨ̀pwuurə̀ nshwuʼə̀?’”

⁴³Yěsû a shwəŋə̀ ambo pobə lo, “Kò nɨ̀ kɨ ndẅùmpə̀ pɨghə nɨ pɨghə aŋunə ànwùə̀ nɨ ǹshwəŋə̀nə.

⁴⁴Mbə̀ʼə ka ŋwùə̀ tô e ambo mɨ̀ŋə̀ tɨghu Tǎ ɨwəə nɨ a lə̀ tsàanə mə̀ à sùŋə̀ e ntô mbaatə̀ mə̀. Ngǎ kɨ zhwuumə̀ e aŋunə nɨ̀wɨghə̀ aŋunə ndẅùutə njyə̂.

⁴⁵Ngàŋə ntwuumə̀ Nẅùə̀ ŋwàʼnə̀ lo, ‘Nẅùə̀ à ghǎ tyiʼə̀ nnèrə̀ a ghobə pɨ̀tsùmə̀.’ Ŋònə̀ wa ntsùmə̀ nɨ à zhwiʼtə̀nə ànwùə̀ nɨ Tǎ ɨwəə à shwəŋnə̀, nkɨ ndanə̀ ambo ze a ghǎ tô ambo mɨ̀ŋə̀.

⁴⁶Ka a pə e pə lo ŋònə̀ ɨ̀tse a zəənə̀ mə a Tǎ; a ye ndàʼà ze wa nɨ à furə̀nə pobə Tǎ nɨ a zəənə̀ mə a Tǎ.

⁴⁷Nshwəŋə̀ tyìʼə̀ a nkǔŋə nkuŋə ambo pɨghə lo ŋònə̀ wa nɨ a nùŋə̀nə ntɨŋmə̀ e aŋunə mɨ̀ŋə̀, à wa nɨ nɨ̀chyə̂mbyə̂ nɨ à ghoŋə̀nə nɨ nkuŋə̀.

⁴⁸Mɨ̀ŋə̀ a àpaanə̀ nɨ̀chyə̂mbyə̂.

⁴⁹Pɨ̀tǎ pɨ̀tǎ ɨ̀pɨghə lə̀ zɨghə̀ a manna amwuə alyiʼə waakə la nkɨ nkwɨghə̀ kwɨghə̀nə.

⁵⁰La àpaanə̀ zə̀ nɨ ǹshwəŋə̀nə mbə̀ʼə zèrə lə la àpaanə̀ nɨ a furə̀nə a nɨ̀pwuurə̀ nshwuʼə̀ mbə zhyə̀ za nɨ ŋwùə̀ à tə nkwurə̀ a zèrə a gha nchi kwɨghə̀ e apə̀.

⁵¹Mɨ̀ŋə̀ a àpaanə̀ mbə zhyə̀ za nɨ a za nchyə̂ nɨ a zə nfurə̀ a nɨ̀pwuurə̀ nshwuʼə̀ la. Ŋònə̀ nɨ à kwurə̀nə àpaanə̀ zèrə zə à ghǎ chyə̂ a nɨ̀chyə̂mbyə̂ wa nɨ à ghoŋə̀nə nɨ nkuŋə̀; àpaanə̀ nɨ mbɨ tô ŋâ ambo pànə̀ pɨ àtwuə̀ ɨ̀shyə̂ kwurə̀ nchyə̂ la mbòbə̀ mbɨ̀ŋmə̀ mə̀.”

⁵²À lə̀ shwəŋə̀ a lenə la, pɨ̀Jew pìʼnə̀ a nɨ tànkə̀ nɨ àzaŋə̀ loŋə pobə nɨ pobə nshwəŋə̀ lo, “Mbə̀ʼə ŋònə̀ wə̀ a tyiʼə̀ ŋŋâ mbòbə̀ mbɨ̀ŋmə̀ e lo pə̀ənə̀ kwurə̀ lə ɨla ghu?”

⁵³Yěsû a shwəŋə̀ ambo pobə lo, “Ǹshwəŋə̀ tyìʼə̀ nkǔŋə nkuŋə ambo pɨghə lo nɨ̀ tə ngoŋə̀ a wɨghə mbòbə̀ mbɨ̀ŋmə̀ Moonə̀ Ŋwùə̀ tɨ kwurə̀, nkɨ nnô àləəmə̀ e, nɨ̀ pə a wɨghə nɨ nɨ̀chyə̂mbyə̂ apə̀.

⁵⁴Ŋònə̀ wa ntsùmə̀ nɨ à kwurə̀nə mbòbə̀ mbɨ̀ŋmə̀ mə̀ nkɨ nnô àləəmə̀ mə̀, à wa nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ngǎ kɨ zhwuumə̀ e aŋunə nɨ̀wɨghə̀ aŋunə ndẅùutə njyə̂,

⁵⁵ntiinə mbòbə̀ mbɨ̀ŋmə̀ mə̀ a ngotə mɨ̀zɨghə̀; àləəmə̀ mə̀ a kɨ mbə a ngotə àzwuumə̀ yè nônə.

⁵⁶Ŋònə̀ wa nɨ à kwurə̀nə mbòbə̀ mbɨ̀ŋmə̀ mə̀ nkɨ nnô àləəmə̀ mə̀ à ghoŋə̀ amwuə mɨ̀ŋə̀, ǹkɨ ngoŋə̀ amwuə ze.

⁵⁷Tǎ nɨ à tsàanə mə̀ a wə̀ nchyə̂, ngwə̀ ǹkɨ mmə nchyə̂ mbə̀ʼə e. A kɨ mbə ndəŋə ndəŋə lo ŋònə̀ nɨ à kwurə̀nə mə̀, ǎ kɨ chyə̂ mbə̀ʼə mə̀.

⁵⁸Mɨ̀ŋə̀ à àpaanə̀ nɨ a lə̀ furə̀nə a nɨ̀pwuurə̀ nshwuʼə̀, ka pə e tsaʼa zhyə̀ za nɨ pɨ̀tǎ pɨ̀tǎ ɨ̀pɨghə lə̀ zɨghə̀nə nkɨ kwɨghə̀ kwɨghə̀nə la. Ŋònə̀ nɨ à zɨghə̀nə àpaanə̀ zèrə zə ǎ pə nɨ nɨ̀chyə̂mbyə̂ nɨ à ghoŋə̀nə nɨ nkuŋə̀. Ka pə kwɨghə̀ e tsaʼnə pɨ̀tǎ pɨ̀tǎ ɨ̀pɨghə lə̀ kwɨghə̀nə la.”

⁵⁹Yěsû à lə̀ shwəŋə̀ a zèrə zə ànwùə̀ amwuə nkwùə̀ za nɨ à lə̀ pə nnèrə̀ a ndâ àshwatə̀ pɨ̀Jew a Kàpenòmə̀.

⁶⁰Ɨ̀zùŋə̀ ndzùmə̀ ɨ̀pe pɨ̀noʼnə lə̀ zuʼù ànwùə̀ zèrə zə̀ mbìʼnə̀ a nɨ shwəŋə̀ lo, “Ànwùə̀ zə̀ nɨ à nèrə̀nə lə a tɨ̀ŋnə̀ tɨsɨŋnə. Mbə̀ʼə lə pyiimə̀ ɨ̀wə̌?”

⁶¹Yěsû à lə̀ zhyə̂ lo ɨ̀zùŋə̀ ndzùmə̀ ɨ̀pe pə ndẅùmpə̀ mbə̀ʼə ànwùə̀ ghu, nshwəŋə̀ ambo pobə lo, “Ànwùə̀ zèrə zə̀ a ghɨ̀rə̀ mɨ̀ntɨŋmə̀ ɨ̀mɨghə zaŋə̀?

⁶²Lenəla, nɨ̀ tə mbəla ngǎ kɨ zəənə̀ Moonə̀ Ŋwùə̀ a kẅirə̀ nkoʼò ndèrə̀ a nɨ̀pwuurə̀ alyiʼə nɨ à lə̀ pyə̀nə mbə ghu nɨ̀ tyiʼə̀ ngɨ̀rə̀ lə ɨla?

⁶³A ŋâ Àzhwùə̀ Nẅùə̀ ŋŋâ a nɨ̀chyə̂mbyə̂. Ka ɨ̀tɨ̀ŋnə̀ ŋwùə̀ mɨsoŋə pə e nɨ ànwùə̀ àtse a nɨ ghɨ̀rə̀. Ɨ̀shwəŋnə̀ pə̀ nɨ ǹshwəŋə̀nə ambo pɨghə la ɨ̀shwəŋnə̀ nɨ pèrə pa ngɨ̀rə̀ Àzhwùə̀ Nẅùə̀ nɨ a za ŋŋâ a nɨ̀chyə̂mbyə̂ la a tô ambo pɨghə.

⁶⁴La pɨghə pɨ̀tse pirə̀ nɨ ka nɨ̀ pyiimə̀ a wɨghə.” Yěsû à lə̀ shwəŋə̀ a lenə ntiinə à lə̀ pyə̀nə nzhyə̂ a ghobə pɨ̀tse nɨ ka pobə pyiimə̀ a ghobə ànwùə̀ nɨ à wə̀ nshwəŋə̀ pobə ẅùə̀ nɨ à ghǎ shwùunə̀ e.

⁶⁵Aŋunə nɨ̀ka pyiimə̀ a ghobə, a làŋə̀ nɨ mbyə̀ nshwəŋə̀ lo, “Lə̌ ɨ̀sùmə ànwùə̀ nɨ a tənə ngɨ̀rə̀ lo n̂shwəŋə̀ ambo pɨghə lo, mbə̀ʼə ŋwùə̀ a tô e ambo mɨ̀ŋə̀ tɨghu Tǎ ɨwəə à ŋâ ɨ̀sàanə̀ apə̀.”

⁶⁶Mɨ̀nwùə̀ mèrə mə lə̀ ghɨ̀rə̀ ɨ̀zùŋə̀ ndzùmə̀ ɨ̀pe pɨ̀noʼnə kɨ̀ɨrə̀ a ghobə ka chi pə yìinə̀ a ghobə pobə pɨ pobə.

⁶⁷Yěsû a chi mbə̀ŋə̀ mbyiitə̀ ambo ɨ̀zùŋə̀ ndzùmə̀ ɨ̀pe pa ntsòbə̀ ɨpaa lo, “ngə̀ aŋunə pɨghə la, nɨ̀ kɨ ntàʼà lèrə̀ àzɨghə?”

⁶⁸Shimùnə̀ Pità a kẅùə̀ ambo ze lo, “Ndòʼnə̀mbyə̂, pəə̌ myàʼtə̀ o tyiʼə̀ lèrə̀ àzəə ambo ɨ̀wə̌? Ghǒ ndàʼà ŋwùə̀ nɨ à wa nɨ àshwəŋnə̀ za nɨ a za ŋŋâ nɨ̀chyə̂mbyə̂ wa nɨ à ghoŋə̀nə nɨ nkuŋə̀.

⁶⁹Tɨ̀tsòŋə̀, pəə pyiimə̀ nkɨ nzhyə̂ lo ghǒ ẅùə̀ wa nɨ à laanə̀nə mmyàanə̀ nfurə̀ ambo Nẅùə̀.”

⁷⁰Yěsû a tyiʼə̀ mbyiitə̀ ambo pobə lo, “Ka la a lə̀ tsoʼò e mɨ̀ŋə̀ ntsoʼò a wɨghə wa ntsòbə̀ ɨpaa? La tàʼà ŋwùə̀ wɨghə ɨ̀tse a devə̀lə̀.”

⁷¹Yěsû à lə̀ shwəŋə̀ a devə̀lə̀ a pə la Yudà moonə̀ Shimùnə̀ Iskaryòtə̀ ntiinə mbaa pə tsaʼnə à lə̀ pənə taʼà ŋwùə̀ amwuə ɨ̀zùŋə̀ ndzùmə̀ ɨ̀pe pa ntsòbə̀ ɨpaa la, à lə̀ pə ghǎ shwùunə̀ e.