Read Pinyin Jònə 7 Bible Online

Jònə 7 - Pinyin bible

Jònə 7

¹Zèrə zə̀ ànwùə̀ a lə̀ làŋə̀, Yěsû a ghə̀ mmə nkarə̀ amwuə ɨlyiʼə pɨ̀tse a Galìlyə̂. Ka à lə̀ tàʼà e a nɨ yìinə̀ amwuə Judyà ntiinə pɨ̀Jew lə̀ pə ntàʼà zhwuutə̀ e.

²Njyə̂ nɨ̀ghaʼà ɨ̀zuŋə̀ pɨ̀Jew[1]ɨ̀ lə̀ paatə̀.

³Lenəla, pɨlyimə pɨ Yěsû shwəŋə̀ ambo ze lo, “Lòo myàʼtə̀ alyiʼə zə ndèrə̀ a Judyà mbə̀ʼə ɨ̀zùŋə̀ ndzùmə̀ ɨ̀pô zəənə̀ ɨ̀nwùə̀ nɨ wə̀ wə̀ nfàʼà.

⁴Ntiinə mbə̀ʼə ka ŋwùə̀ a lə̀əmə̀ e ɨ̀fàʼà ɨ̀pe mbə̀ʼə a mə ntàʼà lo pɨ̀ zhyə̂ e. Tsaʼnə wə̀ ghɨ̀rə̀nə mɨ̀nwùə̀ la, ghɨ̀rə̀ pànə̀ pɨ àtwuə̀ ɨ̀shyə̂ zhyə̂ o.”

⁵Ntiinə tyìʼə̀ pɨlyimə ɨ̀pe lə̀ ka nùŋə̀ a ghobə ntɨŋmə̀ ɨ̀ghobə aŋunə ze.

⁶Yěsû a shwəŋə̀ ambo pobə lo, “Ɨ̀zà nkwùə̀ ɨ̀ pirə̀ tɨ kùʼù, ngə̀ ambo pɨghə nkwùə̀ ntsùmə̀ a nkwùə̀.

⁷Ka pànə̀ pɨ àtwuə̀ ɨ̀shyə̂ pə mbàanə̀ e a wɨghə la mmə mbàanə̀ mə̀ ntiinə ngwa nshwəŋə̀ lo pobə pa ngɨ̀rə̀ mɨ̀nwùə̀ mɨ tɨ̀pòŋə̀.

⁸Nɨ̀ koʼò ndèrə̀ a alyiʼə nɨ̀ghaʼà gha. Ka mbə ghə̀ mə̀ alyiʼə nɨ̀ghaʼà ghə̀, ntiinə ɨ̀zà nkwùə̀ ɨ̀ pirə̀ tɨ kùʼù.”

⁹A lə̀ shwəŋə̀ a lenə la, ngoŋə̀ e a Galìlyə̂.

¹⁰La, tsaʼnə pɨlyimə ɨ̀pe lə̀ lèrə̀nə alyiʼə nɨ̀ghaʼà ghu, Yěsû à lə̀ tyiʼə̀ nnyaʼtə̀ ndèrə̀ àze lo kò pɨ zəənə̀ e a ye.

¹¹Ɨ̀twuə̀ pɨ̀Jew lə̀ pə nga ntàʼà e alyiʼə nɨ̀ghaʼà ghu mmə mbyiitə̀ lo, “À ghə.”

¹²Pànə̀ nɨ pɨ lə̀ pənə alyiʼə ghu lə̀ pə ndẅùmpə̀ mbə̀ʼə e ka mɨ̀zùŋə, pɨ̀tse lə̀ shwəŋə̀ lo, “Ŋònə̀ wə̀ a pòŋə̀,” pɨ̀tse chi nshwəŋə̀ lo, “Ngaŋə, à wa nfɨ̀kə̀ pə̀ənə̀.”

¹³La ka ŋwùə̀ a mə ntəəmə̀ nshwəŋə̀ e ànwùə̀ mbə̀ʼə e a sàŋə̀ sàŋə̀ ntiinə pobə lə̀ mənə mbô pɨ̀Jew.

¹⁴Njyə̂ nɨ̀ghaʼà ghu ɨ̀ lə̀ ghàbrə̀, Yěsû a lèrə̀ a Ndâ Mɨ̀shwàʼà Nẅùə̀ mbìʼnə̀ a nɨ nèrə̀ mɨ̀nwùə̀.

¹⁵Pɨ̀Jew lə̀ yerə̀ ntyiʼə̀ mbyiitə̀ lo, “Ŋònə̀ wə̀ à lòo àzhìʼtə̀ lə ɨghə tɨghu à ghə̀ a ndâ àŋwàʼnə̀?”

¹⁶Yěsû a kẅùə̀ ambo pobə lo, “Ànwùə̀ nɨ ngwə̀ nnèrə̀ ka a pə e àzâ, a furə̀ ambo ŋònə̀ nɨ à twuumə̀nə a mə̀.

¹⁷Ŋònə̀ ɨ̀tse à tə mbəla mmə ntàʼà ghɨ̀rə̀ ànwùə̀ nɨ Nẅùə̀ à tàʼnə, yi ǎ tàʼà a nɨ zhyə̂nə lo ànwùə̀ nɨ ǹshwəŋə̀nə lə a furə̀ pə ambo Nẅùə̀ kə̀ ambo mɨ̀ŋə̀ lo.

¹⁸Ŋònə̀ nɨ à wa nshwəŋnə̀ pə nɨ ɨ̀tɨ̀ŋnə̀ e, à tàʼà la àghuʼtə̀ e; la ŋònə̀ nɨ à wa nshwəŋnə̀ pə nɨ ɨ̀tɨ̀ŋnə̀ ŋònə̀ nɨ à twuumə̀nə e à wa nshwəŋə̀ la nkǔŋə nkuŋə, ka chwìrə̀ a pə e amwuə.

¹⁹Ka la a lə̀ ŋâ Mǔsî ŋŋâ a mbòomə ambo pɨghə? La ka tàʼà ŋwùə̀ wɨghə ɨ̀tse a nùŋə̀ e a mbòomə ghu. Nɨ̀ tyiʼə̀ ntàʼà nzhwuutə̀ mə̀ lo àkə?”

²⁰Pànə̀ pa kẅùə̀ lo, “Àzhyə̂ a zə a nɨ̀pùmə̀ ghò! A ghò tàʼà zhwuutə̀ ɨ̀wə̌?”

²¹Yěsû a kẅùə̀ ambo pobə lo, “Ndə̀ ghɨ̀rə̀ pə a taʼà ànwùə̀ moʼo, pɨghə pɨ̀tsùmə̀ tyiʼə̀ ngyerə̀.

²²Mǔsî à lə̀ ŋâ a wɨghə nɨ mbòomə a nɨ zə̀ərə̀ ɨ̀poonə̀. La ka mbòomə ghu à lə̀ furə̀ e la ambo Mǔsî, à lə̀ furə̀ pə ambo pɨ̀tǎ pɨ̀tǎ. La nɨ̀ kùmə̀ mmə mbirə̀ ndzə̀ərə̀ ɨ̀poonə̀ aŋunə njyə̂ àlaʼà.

²³Pɨ lə̀ pəla mmə ndzə̀ərə̀ a moonə̀ aŋunə njyə̂ àlaʼà ntiinə ka pɨ mə ntàʼà pəʼə̀ e a mbòomə Mǔsî, a tyiʼə̀ ngɨ̀rə̀ àkə nɨ̀ zaŋə̀ a loŋə aŋunə mɨ̀ŋə̀ ntiinə m̀barə̀nə a ŋwùə̀ a fiitə̀ aŋunə njyə̂ àlaʼà?

²⁴Kò nɨ̀ kɨ nsaʼà mɨ̀sàʼa nnaŋə̀ pə tsaʼnə pànə̀ pənə. Nɨ̀ saʼà mɨ̀sàʼa mɨ pə̀ənə̀ ndzùŋə̀ a nkǔŋə nkuŋə.”

²⁵Pànə̀ pɨ̀tse nɨ pobə lə̀ pənə a Yèrusalèmə̀ lə̀ pìʼnə̀ a nɨ pyiitə̀ lo, “Ka lə pə e ŋònə̀ nɨ pɨ lə̀ tàʼnə a nɨ zhwuutə̀ la?

²⁶Lə̌ ze nshwəŋnə̀ e a sàŋə̀ sàŋə̀ la ka ŋònə̀ ɨ̀tse a mə nshwəŋə̀ ànwùə̀ àtse ambo ze. Mbə̀ʼə a pə lə lo pɨ̀kùmə pɨ àlaʼà zhyə̂ nkǔŋə nkuŋə lo ŋònə̀ wə̀ la Ghù Ndzoʼnə wa?

²⁷Pəə zhyə̂ alyiʼə nɨ ŋònə̀ wə̀ à furə̀nə. La nkwùə̀ nɨ Ghù Ndzoʼnə wa à ghǎ tô, ka ŋwùə̀ a pə ghǎ zhyə̂ e alyiʼə nɨ à furə̀nə.”

²⁸Tsaʼnə Yěsû à lə̀ pirə̀nə mmə nnèrə̀ mɨ̀nwùə̀ amwuə Ndâ Mɨ̀shwàʼà Nẅùə̀, à lə̀ kyiinə̀ nɨ mɨ̀tɨ̀ŋnə̀ nshwəŋə̀ lo, “Ee, nɨ̀ zhyə̂ mə̀ nkɨ nzhyə̂ alyiʼə nɨ ǹfurə̀nə. Ka ǹtô mə̀ a nɨ̀ghə̂ la àtwuə̀ nɨ mɨ̀ŋə̀. Ŋònə̀ nɨ à twuumə̀nə mə̀ à chyə̂ nɨ nkǔŋə nkuŋə, la ka nɨ̀ zhyə̂ a wɨghə a ye.

²⁹Ǹzhyə̂ e ntiinə ǹfurə̀nə pəə ze. Lenəla a kɨ ntwuumə̀ mə̀.”

³⁰Pobə lə̀ tàʼà lo kô e, la ka ŋònə̀ nɨ mbə̀ʼə a pètə̀ e nɨ àpô ntiinə nkwùə̀ e lə̀ pirə̀nə tɨ kùʼù.

³¹Pànə̀ pɨ̀noʼnə lə̀ nùŋə̀ ntɨŋmə̀ ɨ̀ghobə aŋunə ze, ntyiʼə̀ mbyiitə̀ e lo, “Nkwùə̀ nɨ Ghù Ndzoʼnə wa à ghǎ tô, à ghǎ ghɨ̀rə̀ ɨ̀lènə̀ mɨ̀nwùə̀ pɨ̀yerə̀nə yerə̀nə tsàarə̀ a ŋònə̀ wanə?”

³²Pɨ̀Farìsî lə̀ zuʼù tsaʼnə àpùŋə̀ pə̀ənə̀ a lə̀ pənə nchùmpə̀ nshwəŋə̀ mɨ̀nwùə̀ mbə̀ʼə Yěsû. Lenəla, pobə pɨ̀fò màʼà Nẅùə̀ twuumə̀ pànə̀ nɨ pobə lə̀ mənə mbyabə̀ Ndâ Mɨ̀shwàʼà Nẅùə̀ lo pobə̂ ghə̀ nkô e.

³³Yěsû a shwəŋə̀ ambo àpùŋə̀ pànə̀ za lo, “Mbɨ pə pə̀ənə̀ tyìʼə̀ aŋunə mətùmə nkwùə̀, lenəla lèrə̀ ambo ŋònə̀ nɨ à lə̀ twuumə̀nə mə̀;

³⁴nɨ̀ ghǎ tàʼà mə̀ la zəənə̀ a wɨghə a gha apə̀, ntiinə mbə̀ʼə nɨ̀ tô a wɨghə alyiʼə nɨ m̀bənə ghu apə̀.”

³⁵Pɨ̀Jew pìʼnə̀ a nɨ shwəŋə̀ a tɨ̀tɨ̀rə̀ pobə lo, “Ŋònə̀ wə̀ à tàʼà lèrə̀ lə ɨghə lo kò pə̀ənə̀ gha nchi ndzəənə̀ a wəənə̀ a ye? À tàʼà lèrə̀ lə àlaʼà àtwuumə̀ nɨ ngàŋə àlaʼà àzəənə̀ chyə̂nə ghu a nɨ nèrə̀ mɨ̀nwùə̀ ambo pànə̀ pɨ àlaʼà ghu?

³⁶Zə ànwùə̀ a chi mbə lə lo àkə ambo ze a nɨ shwəŋə̀ lo, ‘Nɨ̀ ghǎ tàʼà mə̀ la zəənə̀ a wɨghə a gha apə̀, kɨ tô a wɨghə alyiʼə nɨ ngǎ lèrə̀ apə̀?’”

³⁷À lə̀ pə amwuə ndẅùutə njyə̂ nɨ̀ghaʼà nɨ ɨ̀ lə̀ kɨnə mbə njyə̂ ngẅùunə, Yěsû à lə lòo ntəəmə̀ nshwəŋə̀ amwuə ngyə̀ ntɨ̀ŋnə̀ lo, “Njyə̀ nchyə ɨ̀ tə mbəla mmə ndzaŋə̀ a ŋwùə̀, a tô ambo mɨ̀ŋə̀ nnô nchyə.

³⁸Ŋwùə̀ ɨ̀tsùmə̀ wa nɨ à nùŋə̀nə ntɨŋmə̀ e aŋunə mɨ̀ŋə̀, mɨnchyə nɨ mɨ ma ŋŋâ a nɨ̀chyə̂mbyə̂ tyiʼə̀ furə̀ amwuə ze.”

³⁹À lə̀ shwəŋə̀ a lenə nshwəŋə̀ la Àzhwùə̀ Nẅùə̀ zhyə̀ nɨ pànə̀ pyə̀ nɨ pɨ nùŋə̀nə ntɨŋmə̀ aŋunə ze ghǎ kẅiirə̀. A lə̀ kɨ pə nkwùə̀ ghu, Nẅùə̀ a pirə̀ e Àzhwùə̀ ghu tɨ ŋâ ntiinə Yěsû à lə̀ pirə̀nə e tɨ koʼò ndèrə̀ a nɨ̀pwuurə̀ lo kẅiirə̀ àghuʼtə̀ e.

⁴⁰Nkwùə̀ nɨ pobə lə̀ zuʼnə àshwəŋnə̀ Yěsû, pobə pɨ̀tse lə̀ pìʼnə̀ a nɨ shwəŋə̀ lo, “A nkǔŋə nkuŋə, ŋònə̀ wə̀ a ngàŋə̀ ntwuumə̀ Nẅùə̀.”

⁴¹Pɨ̀tse pànə̀ shwəŋə̀ lo, “La Ghù Ndzoʼnə wa.” Pɨ̀tse chi mbyiitə̀ lo, “Mbə̀ʼə Ghù Ndzoʼnə wa a furə̀ a Galìlyə̂?

⁴²Ka àŋwàʼnə̀ Nẅùə̀ a shwəŋə̀ la lo, Ghù Ndzoʼnə wa à ghǎ furə̀ la amwuə ngẅàrə̀ Dàfirə̀, amwuə Bethlehem, amwuə mbòmpə àlaʼà za nɨ Dàfirə̀ à chyə̂nə amwuə la?”

⁴³Lenəla pànə̀ pɨ̀ghu lə̀ ghàpə̀ ntyiʼə̀ a mɨ̀ntswùə̀ mɨ̀ntswùə̀ ntii Yěsû.

⁴⁴Pobə pɨ̀tse lə̀ tàʼà lo kô e, la ka ŋònə̀ nɨ mbə̀ʼə a pètə̀ e.

⁴⁵Pànə̀ pyə̀ nɨ pɨ lə̀ mənə mbyabə̀ Ndâ Mɨ̀shwàʼà Nẅùə̀ lə̀ kẅirə̀ ndèrə̀ ambo pɨ̀fò màʼà Nẅùə̀ pobə pɨ̀Farìsî, pobə pyiitə̀ ambo pobə lo, “A ghɨ̀rə̀ àkə ka nɨ̀ lòo a wɨghə a ye ntô?”

⁴⁶Pànə̀ nɨ pɨ lə̀ mənə mbyabə̀ Ndâ Mɨ̀shwàʼà Nẅùə̀ kẅùə̀ lo, “Pəə pirə̀ mə a wəə tɨ zəənə̀ a ŋònə̀ ɨ̀tse nɨ à wa nshwəŋnə̀ tsaʼa ŋònə̀ wə̀.”

⁴⁷Pɨ̀Farìsî pa kẅùə̀ lo, “Njiilo à kɨ fɨ̀kə̀ a wɨghə?

⁴⁸Àtwuə̀ àtse kə̀ ŋwùə̀ Farìsî ɨ̀tse à nùŋə̀ ntɨŋmə̀ e aŋunə ze?

⁴⁹Ka àpùŋə̀ pànə̀ zə̀ a zhyə̂ a ghobə a mbòomə Mǔsî; Nẅùə̀ à chyâ mə ndòonə̀ àtwuə̀ pobə.”

⁵⁰Nikòdemùsə̀ à lə̀ pə taʼà ŋwùə̀ ɨghobə ɨ̀tse nɨ à lə̀ pyə̀ mə ngə̀ ambo Yěsû, mbyiitə̀ ambo pobə lo,

⁵¹“Mbə̀ʼə ka pə̀ənə̀ chyâ wəənə̀ ɨ̀sàʼa aŋunə ŋwùə̀ tɨghu pə̀ənə̀ pyə̀ ndzuʼù àshwəŋnə̀ e.”

⁵²Pobə kẅùə̀ ambo ze lo, “Wə̀ kɨ nfurə̀ àzô la Galìlyə̂? Naŋə̀ ɨ̀shìʼnə̀, ngàŋə̀ ntwuumə̀ Nẅùə̀ à laʼa mə nfurə̀ e amwuə Galìlyə̂ apə̀.”

⁵³[Lenəla, pobə furə̀ alyiʼə ghu, ŋwùə̀ moʼo moʼo a tyiʼə̀ ndèrə̀ a ndâ ze].