Read Pinyin Jònə 9 Bible Online

Jònə 9 - Pinyin bible

Jònə 9

¹Tsaʼnə Yěsû a lə̀ pənə ndàŋə̀, a lə̀ zəənə̀ a ŋònə̀ ɨ̀tse nɨ pɨ lə̀ pyə̂nə e a pə ɨ̀fə̀.

²Ɨ̀zùŋə̀ ndzùmə̀ ɨ̀pe pyiitə̀ e lo, “Masàa, a tɨ̀pòŋə̀ ɨ̀wə̌ nɨ à ghɨ̀rə̀nə lo pɨ̀ pyə̂ a ŋònə̀ wə̀ a pə ɨ̀fə̀? A tɨ̀pòŋə̀ e kə̀ ghu tǎ ɨghobə pobə mǎ e?”

³Yěsû a kẅùə̀ ambo pobə lo, “Ka nɨ̀fə̀ ŋònə̀ wə̀ a pə e nɨ ànwùə̀ àtse a nɨ ghɨ̀rə̀ mbə̀ʼə tɨ̀pòŋə̀ e kə̀ ghu tǎ ɨghobə pobə mǎ e. À lə̀ fə̀ pə lo pɨ̀ ghǎ ndàŋə̀ aŋunə nɨ̀fə̀ e wə̀ ndzəənə̀ mɨ̀tɨ̀ŋnə̀ mɨ Nẅùə̀.

⁴Tsaʼnə njyə̂ ɨ̀ zə̀ mbirə̀ ndaanə̀, a pòŋə̀ lo pə̀ənə̀ pə nfàʼà àfàʼà ŋònə̀ nɨ à twuumə̀nə mə̀ ntiinə ɨ̀twuʼə̀ wə̀ ntô sinə̀ nɨ mbə̀ʼə ŋwùə̀ a fàʼà e apə̀.

⁵Tsaʼnə m̀birə̀nə a àtwuə̀ ɨ̀shyə̂ ghə la, mɨ̀ŋə̀ a nkàʼà àtwuə̀ ɨ̀shyə̂.”

⁶A shwəŋə̀ a lenə la, ntẅùə̀ mɨ̀tẅuə̀ a ɨ̀shyə̂, ntẅapə̀ àtɨ̀tsaʼa ndòo ndzoʼò ɨ̀myə̂ mɨ ŋònə̀ wa ghu,

⁷nshwəŋə̀ ambo ze lo, “Lèrə̀ ngə̀ nsùu ɨ̀sɨghə̀ o amwuə atəŋə Silòmə̀.” (Ɨ̀sùmə pə lo ŋònə̀ nɨ pɨ twuumə̀nə e.) A ghə̀ nsùu ɨ̀sɨghə̀ e amwuə atəŋə za, nkɨ kẅirə̀ nkwə̂ ntyiʼə̀ mmə ndzəənə̀ ɨlyiʼə.

⁸Ngàŋə àpàrə̀ nkaʼà ɨ̀ze pobə pɨ pànə̀ nɨ pobə lə̀ zhyə̂nə e tsaʼa ŋònə̀ nɨ à lə̀ mənə nnwuunə̀ ndoonə̀ tyiʼə̀ mbyiitə̀ lo, “Ka lə̀ pə e ŋònə̀ wa nɨ à lə̀ mənə nnwuunə̀ ndoonə̀ ɨ̀pwuumə̀ la?”

⁹Pɨ̀tse kẅùə̀ lo, “A ze”; pɨ̀tse ghu, “A shwuə̀ e shwuə̀nə.” La a shwəŋə̀ ambo pobə lo, “A mɨ̀ŋə̀ ze.”

¹⁰Pobə pyiitə̀ ambo ze lo, “Ɨ̀myə̂ ɨ̀mô làŋə̀ la ghu nyaʼkə̀?”

¹¹A kẅùə̀ ambo pobə lo, “Ŋònə̀ wa nɨ pɨ pa nfuŋə̀ nɨ Yěsû la à tə ntẅapə̀ àtɨ̀tsaʼa ndòo ndzoʼò ɨ̀myə̂ ɨ̀mâ ghu, nshwəŋə̀ lo ‘N̂gə̀ nsùu ɨ̀myə̂ ɨ̀mâ amwuə atəŋə Silòmə̀.’ Lenəla ndə̀ ghə̀ nsùu ntyiʼə̀ ndzəənə̀ ɨlyiʼə.”

¹²Pobə pyiitə̀ ambo ze lo, “Yěsû ghu à ɨghə?” A kẅùə̀ lo, “Ka ǹzhyə̂ mə̀.”

¹³Pobə lə̀ lòo a ŋònə̀ wa nɨ à lə̀ pyə̀nə mbə ɨ̀fə̀ la ndòo ndèrə̀ a mbyə̀ pɨ̀Farìsî.

¹⁴Njyə̂ nɨ Yěsû à lə̀ tẅapə̀nə àtɨ̀tsaʼa ndòo nyaʼkə̀ ɨ̀myə̂ mɨ ŋònə̀ wa ghu ɨ̀ lə̀ pə njyə̂ àlaʼà pɨ̀Jew.

¹⁵Pɨ̀Farìsî lə̀ chi mbyiitə̀ e nɨ ndwuumə̀ nɨ à làŋə̀nə mbòŋə̀ zəənə̀ ɨlyiʼə. A kẅùə̀ ambo pobə lo, “À tə ndzoʼò ɨ̀myə̂ ɨ̀mâ nɨ àtɨ̀tsaʼa, ǹgə̀ nsùu ndzùŋə̀ mbìʼnə̀ a nɨ zəənə̀ ɨlyiʼə.”

¹⁶Pɨ̀Farìsî pɨ̀tse shwəŋə̀ lo, “Ka ŋònə̀ wə̀ furə̀ e pə ambo Nẅùə̀ ntiinə ka a nùŋə̀ e njyə̂ àlaʼà.” La pɨ̀tse pyiitə̀ lo, “Mbə̀ʼə ŋònə̀ nɨ à wa ngɨ̀rə̀ ɨ̀nwùə̀ tɨ̀pòŋə̀ a ghɨ̀rə̀ a zə mbuurə̀ ɨ̀lènə̀ ɨ̀nwùə̀ pɨ̀yerə̀nə yerə̀nə lə ɨla ghu?” Lenəla, ɨ̀shwəŋnə̀ pə ghɨ̀rə̀ pobə tyiʼə̀ mɨ̀ntswùə̀ mɨ̀ntswùə̀.

¹⁷Pɨ̀Farìsî lə̀ chi mbyiitə̀ ambo ŋònə̀ wa lo, “Wə̀ shwəŋə̀ àzô lo àkə mbə̀ʼə ŋònə̀ wə̀ nɨ a ghɨ̀rə̀nə wə̀ zəənə̀ ɨlyiʼə lə.” A kẅùə̀ lo, “A ngàŋə̀ ntwuumə̀ Nẅùə̀.”

¹⁸Ka pɨ̀Jew lə̀ pyiimə̀ a ghobə lo ŋònə̀ wə̀ à lə̀ pyə̀ mbə ɨ̀fə̀ tə mbyàa nkwùə̀ nɨ pobə lə̀ fuŋə̀nə a tǎ ɨghobə pobə mǎ e.

¹⁹Pobə pyiitə̀ lo, “Lə̌ moonə̀ ɨwɨghə, nɨ̀ shwəŋə̀ lo pɨ lə̀ kɨ pyə̂ e a pə ɨ̀fə̀? A kùmə̀ ndàŋə̀ ɨla ntyiʼə̀ ndzəənə̀ ɨlyiʼə tɨ̀tsòŋə̀?”

²⁰Tǎ ɨghobə pobə mǎ e kẅùə̀ ambo pobə lo, “Pəə zhyə̂ lo lə̌ moonə̀ ɨwəə nɨ pɨ lə̀ pyə̂nə e a pə ɨ̀fə̀.

²¹La ka pəə zhyə̂ a wəə tsaʼnə à làŋə̀nə tɨ̀tsòŋə̀ ntyiʼə̀ mmə ndzəənə̀, ka kɨ zhyə̂ a wəə ŋònə̀ nɨ à nyaʼkə̀nə ɨ̀myə̂ ɨ̀me. À tyiʼə̀ ŋwùə̀, nɨ̀ pyiitə̀ e ǎ shwəŋə̀ ze àtwuə̀ ɨ̀pɨ̀ŋmə̀ e.”

²²Tǎ ɨghobə pobə mǎ e lə̀ shwəŋə̀ a lenə la ntiinə pobə lə̀ pənə mbô pɨ̀Jew, ntiinə a lə̀ kɨnə pə la nɨ pɨ pyantə̀ mə lo ŋwùə̀ à tə mbyiimə̀ lo a Ghù Ndzoʼnə wa, yi pɨ kantə̀ e amwuə ndâ àshwatə̀ pɨ̀Jew.

²³La ɨ̀sùmə nɨ tǎ ɨ̀ghobə pobə mǎ e lə̀ shwəŋə̀nə lo, “À tyiʼə̀ ŋwùə̀; nɨ̀ pyiitə̀ pə a ye.”

²⁴Pobə kẅirə̀ nfuŋə̀ ŋònə̀ wa nɨ à lə̀ pənə ɨ̀fə̀ la, nshwəŋə̀ ambo ze lo, “Ŋâ àghuʼtə̀ ambo Nẅùə̀ nshwəŋə̀ a nkǔŋə nkuŋə o, pəə zhyə̂ lo ŋònə̀ wə̀ a lə ngàŋə̀ a ghɨ̀rə̀ ɨ̀nwùə̀ tɨ̀pòŋə̀.”

²⁵A kẅùə̀ ambo pobə lo, “Kə̀ a pə ngɨ̀rə̀ ɨ̀nwùə̀ tɨ̀pòŋə̀, yi ka ǹzhyə̂ mə̀. Taʼà ànwùə̀ nɨ ǹzhyə̂nə a chyə̂ pə lo: Ǹtə ɨ̀fə̀ ǹkùmə̀ mmə ndzəənə̀ tɨ̀tsòŋə̀.”

²⁶Pobə pyiitə̀ ambo ze lo, “À tô ngɨ̀rə̀ la ɨla nyaʼkə̀ ɨ̀myə̂ ɨ̀mô?”

²⁷A kẅùə̀ lo, “Ǹtô mə nshwəŋə̀ a wɨghə ka nɨ̀ kòŋə̀ a wɨghə lo zuʼù. Ɨ̀sùmə nɨ nɨ̀ tàʼnə chi zuʼù tɨ̀tsòŋə̀ ɨ̀ chyə̂ lə lo àkə? Nɨ̀ tàʼà pə àzɨghə ɨ̀zùŋə̀ ndzùmə̀ ɨ̀pe?”

²⁸Nkwùə̀ nɨ à lə̀ kẅùə̀nə a lenə la, pobə lə̀ zòomə̀ e nshwəŋə̀ lo, “Ghǒ àzùŋə̀ ndzùmə̀ ŋònə̀ wə̀, la pəə pə ɨ̀zùŋə̀ ndzùmə̀ Mǔsî!

²⁹Pəə zhyə̂ lo Nẅùə̀ a lə pə nshwəŋnə̀ ambo Mǔsî, la ngə̀ aŋunə ŋònə̀ wə̀ ka pəə zhyə̂ a wəə alyiʼə nɨ à furə̀nə.”

³⁰Ŋònə̀ wa a kẅùə̀ ambo pobə lo, “Lə̌ ànwùə̀ nɨ a kə̀ʼnə̀nə ntsàarə̀ mə̀. Ka nɨ̀ zhyə̂ a wɨghə alyiʼə nɨ à furə̀nə ghu, la à kùmə̀ nnyaʼkə̀ ɨ̀myə̂ ɨ̀mâ.

³¹Pə̀ənə̀ zhyə̂ tyìʼə̀ nkǔŋə nkuŋə lo, Nẅùə̀ à wa ka zuʼù e ànwùə̀ nɨ ngàŋə̀ ngɨ̀rə̀ ànwùə̀ tɨ̀pòŋə̀ à wa nshwəŋə̀ la; la ŋònə̀ nɨ à wa mbô Nẅùə̀ nkɨ ngɨ̀rə̀ ɨ̀nwùə̀ pyə̀ nɨ à tàʼnə la, Nẅùə̀ à wa ndzuʼù ànwùə̀ e.

³²Tsaʼnə àtwuə̀ ɨ̀shyə̂ a lə̀ pìʼnə̀nə, pɨ pirə̀ mə e tɨ zuʼù lo pɨ nyaʼkə̀ ɨ̀myə̂ mɨ ŋwùə̀ nɨ pɨ lə̀ pyə̂nə e a pə ɨ̀fə̀.

³³Ŋònə̀ wə̀ à lə̀ pə la ka furə̀ e ambo Nẅùə̀, yi mbə̀ʼə ka a ghɨ̀rə̀ e ànwùə̀ àtse tsaʼa zə̀.”

³⁴Pobə kẅùə̀ ambo ze lo, “Pɨ lə̀ pyə̂ o la amwuə ngotə tɨ̀pòŋə̀ la wə̀ kùmə̀ tàʼà tyiʼə̀ pə ɨ̀nèrə̀ ambo pəə?” Nshwəŋə̀ a lenə la, nkantə̀ e amwuə ndâ àshwatə̀ ɨzobə ntsàa a àpyìinə.

³⁵Yěsû à lə̀ zuʼù lo pɨ kantə̀ a ŋònə̀ wa ntsàa a àpyìinə, ntàʼà e tə ndzəənə̀ mbyiitə̀ ambo ze lo, “Wə̀ nùŋə̀ ntɨŋmə̀ o aŋunə Moonə̀ Ŋwùə̀?”

³⁶A kẅùə̀ ambo ze lo “Masàa, tiitə̀ mə̀ nɨ ŋònə̀ nɨ Moonə̀ Ŋwùə̀ à pənə ẅèrə mbə̀ʼə n̂nùŋə̀ ntɨŋmə̀ aŋunə ze.”

³⁷Yěsû a shwəŋə̀ ambo ŋònə̀ wa lo, “Wə̀ zəənə̀ mə e; lə shwəŋnə̀ ze ambo ghò.”

³⁸A kẅùə̀ ambo ze lo, “Masàa, nnùŋə̀ ntɨŋmə̀ mə̀ aŋunə ghò.” Lenəla, nkẅiʼtə̀ a mbyə̀ Yěsû, nguʼtə̀ e.

³⁹Yěsû a shwəŋə̀ ambo ze lo, “Ndə̀ tô a nɨ tsoʼtə̀ pə̀ənə̀ àtwuə̀ ɨ̀shyə̂ ghə, njiilo pɨ̀fə̀ zəənə̀, pànə̀ nɨ pobə lə̀ pənə ndzəənə̀ ɨlyiʼə pobə̂ fə̀.”

⁴⁰Pɨ̀Farìsî pɨ̀tse lə̀ pə alyiʼə ghu ndzuʼù ànwùə̀ nɨ à shwəŋə̀nə, mbyiitə̀ ambo ze lo, “Pəə kɨ mbə àzəə pɨ̀fə̀?”

⁴¹Yěsû a shwəŋə̀ ambo pobə lo, “Nɨ̀ tə mbəla mbə pɨ̀fə̀, yi ka tɨ̀pòŋə̀ a pə e aŋunə pɨghə. La tsaʼnə nɨ̀ wə̀ ntəəmə̀ ntɨ̀ŋnə̀ a wɨghə lo nɨ wə̀ ndzəənə̀ ɨlyiʼə la, tɨ̀pòŋə̀ ɨwɨghə a ghoŋə̀ e aŋunə pɨghə.”