Read Pinyin Ɨ̀fàʼà 10 Bible Online

Ɨ̀fàʼà 10 - Pinyin bible

Ɨ̀fàʼà 10

¹Ŋònə̀ ɨ̀tse à lə̀ pə a Kàsaryà nɨ̀linə̀ ɨ̀tse pə Kònelyùsə̀. À lə̀ pə àtwuə̀ àpùŋə̀ pɨ̀soyì pɨ̀Roman nɨ pɨ lə̀ mənə nfuŋə̀ nɨ àpùŋə̀ pɨ̀soyì Italy.

²A lə̀ pə ŋònə̀ ɨ̀shìʼnə̀ nɨ pobə pɨ ngẅàrə̀ e ntsùmə̀ lə̀ pônə a Nẅùə̀, mmə ngyèmpə̀ pɨ̀Jew pɨ̀noʼnə nɨ pɨ lə̀ pənə ngàŋə àfumə̀, nkɨ nchàʼtə̀ a Nẅùə̀ nkwùə̀ ɨ̀tsùmə̀.

³A lə̀ pə njyə̂ ɨ̀tse tsaʼa pɨ̀nẅùumə̀ pɨtarə a ndzə̀ŋə̀ nẅùumə̀, Kònelyùsə̀ a mə nchàʼtə̀ a Nẅùə̀, ànǐ a làŋə̀ a ɨ̀myə̂ ze, a zəənə̀ angèrə̀ Nẅùə̀ a fuŋə̀ e lo, “Kònelyùsə̀.”

⁴Kònelyùsə̀ a tyiʼə̀ nnaŋə̀ e nɨ àkẅàrə̀ yè noʼnə amwuə ntɨŋmə̀ e nshwəŋə̀ ambo ze lo, “A àkə Masàa?” Angèrə̀ wa a kẅùə̀ ambo ze lo, “Nẅùə̀ à pyiimə̀ àchàʼtə̀ Nẅùə̀ za pobə ɨ̀pwuumə̀ pa nɨ wə̀ ŋânə ambo ngàŋə àfumə̀ la, nkẅuumə̀ o.

⁵Tsàa ntwuumə̀ nfuŋə̀ a ŋònə̀ ɨ̀tse nɨ à pənə a Jopà nɨ̀linə̀ ɨ̀tse pə Shimùnə̀ Pità.

⁶A ngàŋə̀ nɨ̀ghaanə̀, mmə nchyə̂ pobə ŋònə̀ nɨ à wa ndòo ngòbə̀ ntsùŋə̀ ɨ̀pwuumə̀, nɨ̀linə̀ ɨ̀tse pə Shimùnə̀, ndâ e ɨ̀ pə a ntswùə̀ nchyə ghu nɨŋnə̀nə.”

⁷Angèrə̀ wa à lə̀ shwəŋə̀ a lenə la ndèrə̀, Kònelyùsə̀ a tyiʼə̀ nfuŋə̀ ngàŋə àfàʼà ɨ̀ze ɨpaa nɨ taʼà ŋwùə̀ Soyì nɨ à lə̀ pənə mbyabə̀ e nkɨ mbə nɨ àkẅàrə̀ Nẅùə̀,

⁸ntyiʼə̀ nshwəŋə̀ ànwùə̀ àtsùmə̀ nɨ a làŋə̀nə ambo pobə, ntsàa a ghobə a Jopà.

⁹Njyə̂ ɨ lə̀ làŋə̀ pobə mə ndèrə̀ ngə̀ mmə mbyàa a Jopà, Pità a koʼò ndèrə̀ àtwuə̀ ndâ a nɨ chàʼtə̀ a Nẅùə̀.

¹⁰Tsaʼnə a lə̀ koʼnə mmə nchàʼtə̀ Nẅùə̀, njyə̀ pìʼnə̀ a nɨ zaŋə̀ e a tyiʼə̀ mmə ntàʼà àzwuumə̀ a nɨ zɨghə̀. La nkwùə̀ nɨ pɨ lə̀ pirə̀nə mmə ndaamə̀ mɨ̀zɨghə̀ ma la, ànǐ a làŋə̀ a ɨ̀myə̂ ze,

¹¹a zəənə̀ nɨ̀pwuurə̀ nɨ nyaʼkə̀ pɨ ẅìimə̀ àzwuumə̀ àtse nɨ a pənə tsaʼa àpàa atsəʼə aŋunə mɨ̀lẅuə̀ nɨ̀kwàa, nfurə̀ a nɨ̀pwuurə̀ mmə nshuʼkə̀ a ɨ̀shyə̂.

¹²Mbuurə̀ mɨ̀nyàamə̀ mɨ̀tsùmə̀ nɨ yɨ̀tse mbuurə̀ mɨ̀nyàamə̀ nɨ àləəmə̀ àzobə a za nfî, farə pɨ̀sɨ̀ŋə pɨ̀tsùmə̀ nɨ pèrə pa ntàarə̀ lə̀ pə amwuə.

¹³Ngyə̀ ɨ̀tse ɨ̀ furə̀ a nɨ̀pwuurə̀ nshwəŋə̀ ambo ze lo, “Pità lòo a ɨ̀shyə̂ nzhwuutə̀ nkwurə̀.”

¹⁴La Pità a kẅùə̀ ambo ze lo, “Ndə̀ pirə̀ mə mə̀ tɨ kwurə̀ ɨ̀pwuumə̀ pɨ fînə tsaʼa pèrə pə nɨ ka laanə̀ e.”

¹⁵Ngyə̀ ghu ɨ̀ kẅirə̀ nshwəŋə̀ ambo ze lo, “Kò wə̀ lòo o àzwuumə̀ àtse nɨ Nẅùə̀ a tsùŋə̀nə a laanə̀ ndòo ngɨ̀rə̀ àzwuumə̀ nɨ ka a laanə̀ e ghu.”

¹⁶Ànwùə̀ zə̀ a lə̀ ghɨ̀rə̀ mbyàa nkwùə̀ ɨtarə, pɨ tyiʼə̀ ndòo àpàa atsəʼə ghu nkẅirə̀ nkoʼò a nɨ̀pwuurə̀.

¹⁷Pità à lə̀ pirə̀ mmə nkwàŋə̀ ànǐ zə, la nɨ pànə̀ pa nɨ Kònelyùsə̀ à lə̀ tsàanə la tàʼà mə ndâ Shimùnə̀ ntô ntyiʼə̀ a ghobə a ntswùə̀ nkaʼà.

¹⁸Pobə lə̀ kyiinə̀ nfuŋə̀ mbyiitə̀ lo, “Ngàŋə̀ nɨ̀ghaanə̀ ɨ̀tse à wə̀ nɨ̀ghə̂ nɨ nɨ̀linə̀ ɨ̀tse pənə Shimùnə̀ Pità?”

¹⁹Pità à lə̀ pirə̀ mmə nkwàŋə̀ ànwùə̀ mbə̀ʼə ànǐ zə, Àzhwùə̀ Nẅùə̀ a shwəŋə̀ ambo ze lo, “Mbyàŋnə̀ ɨ̀tse ɨtarə zə ntàʼà o.

²⁰Lòo a ɨ̀shyə̂, kò wə̀ tsə̀ŋə̀ o nkwùə̀, shwuʼə̀ ngə̀ ntsirə̀ a ghobə ntiinə a ghobə la a tsàa mɨ̀ŋə̀.”

²¹Lenəla, Pità a shwuʼə̀ ngə̀ nshwəŋə̀ ambo pànə̀ pa lo, “Lə̌ mɨ̀ŋə̀ wa nɨ nɨ̀ tàʼnə la. Nɨ̀ tô la aŋunə ànwùə̀ àkə?”

²²Pobə kẅùə̀ ambo ze lo, “A wəə la a twuumə̀ Kònelyùsə̀ nɨ a pənə àtwuə̀ pɨ̀soyì, mbə ŋònə̀ wa nɨ mɨ̀nwùə̀ ɨ̀me təəmə̀nə a mbyə̀ Nẅùə̀, a kɨ mmə nguʼtə̀ a Nẅùə̀, nkɨ mbə ŋònə̀ wa nɨ pɨ̀Jew pɨ̀tsùmə̀ ŋânə e nɨ àghuʼtə̀ la. Angèrə̀ Nẅùə̀ a shwəŋə̀ ambo ze lo â fuŋə̀ o lo wə̀ tô a ndâ ze ndzuʼù ànwùə̀ nɨ ǎ shwəŋə̀.”

²³Pità a zùŋə̀ nfuŋə̀ a ghobə amwuə ndâ, pobə pɨ pobə lyə̂. Njyə̂ ɨ̀ lə̀ laanə̀, Pità a lèrə̀ pobə pɨ pobə farə pɨlyimə pɨ̀tse nɨ pɨ furə̀nə a Jopà.

²⁴Njyə̂ ɨ̀ lə̀ kẅirə̀ ndaanə̀, pobə ghə̀ mbyàa a Kàsaryà. Kònelyùsə̀ a shwatə̀ ngẅàrə̀ e pobə pɨ̀swùə ɨ̀pe pɨ̀shìʼnə̀ pobə pɨ pobə nwuunə̀ mmə mbyabə̀ a ghobə.

²⁵Nkwùə̀ nɨ Pità à lə̀ pənə ntô kwuunə̀ a ndâ, Kònelyùsə̀ à lə̀ tô mbwùumə̀ e, ŋŋuʼnə̀ a mbyə̀ ze a nɨ ŋâ e nɨ àghuʼtə̀.

²⁶La Pità a ẅìimə̀ àpô e mbə̀ʼkə̀ e nshwəŋə̀ ambo ze lo, “Lòo a ɨ̀shyə̂. Ǹkɨ mbə àzâ la ŋònə̀ tsaʼa ghò.”

²⁷Tsaʼnə pobə ze lə̀ mənə nshwəŋnə̀ nkwuunə̀ amwuə ndâ, Pità à lə̀ zəənə̀ pànə̀ pɨ̀noʼnə nɨ pɨ shwatə̀nə amwuə ndâ,

²⁸nshwəŋə̀ ambo pobə lo, “Nɨ̀ kɨ nzhyə̂ tsaʼnə ka mbòomə ɨ̀wəənə̀ a pyiimə̀ e lo ŋwùə̀ pɨ̀Jew a pwuutə̀ pobə ŋònə̀ nɨ ka à pə e ŋwùə̀ pɨ̀Jew, kə̀ mbwuutə̀ pobə ze a nɨ ghɨ̀rə̀ ànwùə̀ àtse. La Nẅùə̀ à kùmə̀ nnèrə̀ ambo mɨ̀ŋə̀ lo, kò ǹfuŋə̀ mə̀ a ŋònə̀ ɨ̀tse nɨ àfǐfǐ ŋwùə̀.

²⁹Ka ndə̀ twuunə̀ mə̀ a nɨ tô tsaʼnə pànə̀ pə̀ lə̀ fuŋə̀nə mə̀ la. Ǹkùmə̀ mmə mbyiitə̀ a wɨghə tɨ̀tsòŋə̀ wə̀ lo nɨ̀ tiitə̀ mə̀ nɨ ànwùə̀ nɨ nɨ̀ tàʼnə lo n̂gɨ̀rə̀.”

³⁰Kònelyùsə̀ a kẅùə̀ lo, “Tɨ̀tsòŋə̀ wə̀ a njyə̂ nɨ̀kwàa tsaʼnə ndə̀ mənə nchàʼtə̀ a Nẅùə̀ aŋunə pɨ̀nẅùumə̀ pɨtarə a ndâ mɨ̀ŋə̀, nkɨ wùutə̀ ndzəənə̀ a ŋònə̀ ɨ̀tse a təəmə̀ a mbyə̀ mɨ̀ŋə̀ amwuə ɨtsəʼə pɨ tsèntə̀nə,

³¹nshwəŋə̀ ambo mɨ̀ŋə̀ lo, ‘Kònelyùsə̀! Nẅùə̀ à zuʼù àchàʼtə̀ Nẅùə̀ o, nkɨ mmə nkẅuumə̀ o aŋunə ɨ̀pwuumə̀ nɨ wə̀ wa ŋŋâ a nɨ yèmpə̀ ngàŋə àfumə̀.

³²Njiilo, twuumə̀ a ŋwùə̀ â ghə̀ a Jopà nfuŋə̀ a Shimùnə̀ nɨ pɨ pa nfuŋə̀ e nɨ Pità. À ẅùə̀ nchyə̂ a ndâ ŋònə̀ ɨ̀tse nɨ à wa ntsùŋə̀ ɨ̀pwuumə̀ nɨ ngòbə̀ pɨ mə nfuŋə̀ e nɨ Shimùnə̀, mmə nchyə̂ a nɨ̀pwùnə nɨ nchyə ghu nɨŋnə̀nə.’

³³La ɨ̀sùmə nɨ ǹtwuumə̀nə pànə̀ lo pɨ̀ tô nfuŋə̀ o, wə̀ kɨ ngɨ̀rə̀ ɨ̀shìʼnə̀ a nɨ zùŋə̀ ntô. Pəə pɨ̀tsùmə̀ kùmə̀ nshwatə̀ a nɨ̀ghə̂ a mbyə̀ Nẅùə̀ a nɨ zuʼù ànwùə̀ nɨ Ndòʼnə̀mbyə̂ a twuumə̀nə o aŋunə.”

³⁴Pità a ŋaŋə̀ ntswùə̀ e nshwəŋə̀ lo, “Nzhyə̂ tyiʼə̀ nkǔŋə nkuŋə lo ka Nẅùə̀ a ghɨ̀rə̀ e ànwùə̀ nnèrə̀ nɨ̀lyə̂,

³⁵La ŋwùə̀ a tə mbəla nfurə̀ pə amwuə zèrə ngẅàrə̀ mmə mbô e nkɨ mmə ghɨ̀rə̀ mɨ̀nwùə̀ nɨ mɨ təəmə̀nə, yi a kɨ mbyiimə̀ e.

³⁶Nɨ̀ zhyə̂ àshwəŋnə̀ nɨ Nẅùə̀ à lə̀ tsàanə ambo pànə̀ pɨ Israel, mbə ntwuumə̀ ghù ɨ̀shìʼnə̀ mbə̀ʼə Yěsû Kristù nɨ a pənə tǎ pɨ ŋwùə̀ ntsùmə̀ mmə ngɨ̀rə̀ pànə̀ nwuunə̀ ɨ̀shìʼnə̀,

³⁷nkɨ nchi nzhyə̂ ànwùə̀ ẅùunə nɨ a lə̀ ghɨ̀rə̀nə amwuə àlaʼà Judyà àtsùmə̀ mbìʼnə̀ a Galìlyə̂ amwuə nkwùə̀ za nɨ Jònə à lə̀ mənə nchwìitə̀ lo pànə̀ pə̀ŋə̀ mɨ̀ntɨŋmə̀ ɨ̀mobə nkẅiirə̀ nchyə.

³⁸Nɨ̀ zhyə̂ ànwùə̀ mbə̀ʼə Yěsû ŋwùə̀ Nazarètə̀ nɨ Nẅùə̀ a lə̀ zoʼnə e ŋŋâ e nɨ Àzhwùə̀ e ghobə ɨ̀tɨ̀ŋnə̀ a tyiʼə̀ nkarə̀ ngɨ̀rə̀ mɨ̀nwùə̀ mɨ ɨ̀shìʼnə̀ nkɨ mbarə̀ pɨghoonə pyə̀ nɨ pɨ lə̀ pənə ɨ̀pùʼù a ɨ̀sùmə ɨ̀zhwùə̀ tɨ̀pòŋə̀ ntiinə Nẅùə̀ a lə̀ pənə pobə ze.

³⁹Pəə lə̀ pə pɨ̀ndzəənə̀ zəənə̀nə aŋunə mɨ̀nwùə̀ mɨ̀tsùmə̀ nɨ a lə̀ ghɨ̀rə̀nə amwuə àlaʼà pɨ̀Jew farə a Yèrusalèmə̀. Pobə lə̀ kẅùumə̀ e aŋunə àtɨ̀ghə pànkə̀nə nzhwuutə̀.

⁴⁰La Nẅùə̀ a lə̀ zhwuumə̀ e aŋunə nɨ̀wɨghə̀ aŋunə njyə̂ ɨtarə ngɨ̀rə̀ pànə̀ zəənə̀ e.

⁴¹La ka a lə̀ zəənə̀ e ŋwùə̀ ntsùmə̀ ndzəənə̀ e. A lə̀ kɨ ndzəənə̀ e pə pəə pɨ̀ndzəənə̀ zəənə̀nə nɨ Nẅùə̀ a lə̀ tsoʼnə a wəə nkɨ mbə pəə pa pyə̀ nɨ pəə lə̀ zɨghə̀nə pəə pɨ pobə nkɨ nnô nkwùə̀ nɨ a lə̀ zhwuumə̀nə a nɨ̀wɨghə̀.

⁴²A lə̀ shwəŋə̀ ambo pəə nchwìitə̀ ntwuumə̀ e ambo pə̀ənə̀ a sàŋə̀ sàŋə̀ lo a ndàʼà e nɨ Nẅùə̀ a lə̀ tsoʼnə nnùŋə̀ lo a pə nsaʼà mɨ̀sàʼa ambo pànə̀ pɨ̀tɨ̀ŋnə̀ pobə pɨ̀kwuə̀.

⁴³Ngàŋə ntwuumə̀ Nẅùə̀ lə̀ shwəŋə̀ a sàŋə̀ sàŋə̀ mbə̀ʼə e lo ŋwùə̀ wa ntsùmə̀ nɨ à nùŋə̀nə ntɨŋmə̀ e aŋunə ze, Nẅùə̀ à ghǎ lə̀ənə̀ a tɨ̀pòŋə̀ e a nɨ làŋə̀ aŋunə ɨ̀tɨ̀ŋnə̀ wa nɨ ɨ pənə aŋunə nɨ̀linə̀ ɨ̀tse.”

⁴⁴Tyìʼə̀ nkwùə̀ ghu nɨ Pità à lə̀ pirə̀nə mmə nshwəŋnə̀ la, Àzhwùə̀ Nẅùə̀ a lə̀ shwuʼə̀ aŋunə ŋwùə̀ ntsùmə̀ nɨ à lə̀ pənə alyiʼə ghu mmə nzhwiʼtə̀ ntwuumə̀ nɨ pɨ lə̀ pənə nshwəŋə̀.

⁴⁵A lə̀ pə ànwùə̀ yerə̀nə yerə̀nə ambo pɨ̀Jew pa nɨ pɨ lə̀ nùŋə̀nə ntɨŋmə̀ ɨ̀ghobə aŋunə Yěsû, nfurə̀ a àlaʼà Jopà ndzùŋə̀ Pità a nɨ zəənə̀ lo Nẅùə̀ à kɨ ŋŋâ mɨntyaŋnə mɨ Àzhwùə̀ e ambo pànə̀ nɨ ka pobə pə ghobə pɨ̀Jew.

⁴⁶Mbə̀ʼnə pobə lə̀ zuʼnə pobə tyiʼə̀ nshwəŋnə̀ pə amwuə ɨ̀shwəŋnə̀ pɨ̀nyaanə nguʼtə̀ a Nẅùə̀. Pità a tyiʼə̀ nshwəŋə̀ lo,

⁴⁷“Ŋònə̀ ɨ̀tse à wə̀ ghu nɨ mbə̀ʼə a làʼnə̀ lo kò pɨ ŋâ e àkẅiirə̀ nchyə ambo pànə̀ pə̀, ntiinə pobə kẅiirə̀ mə Àzhwùə̀ Nẅùə̀ tsaʼnə pə̀ənə̀ lə̀ kɨnə nkẅiirə̀ àzəənə̀?”

⁴⁸Lenəla, a tyiʼə̀ ngɨ̀rə̀ pɨ tyiʼə̀ ŋŋâ a ghobə nɨ àkẅiirə̀ nchyə aŋunə nɨ̀linə̀ Yěsû. Àkẅiirə̀ nchyə za a làŋə̀, pobə tyiʼə̀ mbuʼù mbô lo Pità a ghoŋə̀ pobə pɨ pobə aŋunə mɨ̀njyə̂ mɨ̀tse.