Read Pinyin Ɨ̀fàʼà 12 Bible Online

Ɨ̀fàʼà 12 - Pinyin bible

Ɨ̀fàʼà 12

¹A lə̀ pə tyìʼə̀ nkwùə̀ ghu, ɨ̀fò Heròdə̀ a kootə̀ pɨ̀tse ɨ̀zùŋə̀ ndzùmə̀ Kristù, ntàʼà a nɨ ŋâ a ghobə nɨ ngəʼə̀.

²À lə̀ zhwuutə̀ a Jemə̀ ntsàambyə̀ Jònə nɨ mɨnẅuə ntsòo.

³À lə̀ zəənə̀ lo ànwùə̀ ghu a pòŋə̀ pɨ̀Jew, ntyiʼə̀ ndàŋə̀ nɨ mbyə̀ nkɨ nkô a Pità. (Ànwùə̀ zə̀ a lə̀ lòo alyiʼə la nkwùə̀ Nɨ̀ghaʼà Àlàŋə̀ Mmyàʼtə̀.)

⁴À lə̀ kô a Pità la, nchyâ e a ndâ ɨ̀tsaŋə̀, nnùŋə̀ pɨ̀soyì ɨ̀kẅìrə nɨ̀kwàa lo pobə̂ mə mbyabə̀ e, ntiinə à lə̀ pənə ntàʼà a nɨ lòo e tô a mbyə̀ pə̀ənə̀ lo pɨ̀ saʼà ɨ̀sàʼa e nkwùə̀ nɨ Nɨ̀ghaʼà Àlàŋə̀ Mmyàʼtə̀ à làŋə̀nə.

⁵Lenəla, pɨ lə̀ chyâ Pità a ndâ ɨ̀tsaŋə̀, ɨ̀poonə̀ pɨ Kristù tyiʼə̀ mbə a ndzùmə̀ ntə̂ àtwuə̀ nchàʼtə̀ a Nẅùə̀ aŋunə ze tɨ kaanə̀.

⁶A lə̀ pə nɨ ɨ̀twuʼə̀ nɨ njyə̂ ɨ̌ laanə̀ lo Heròdə̀ â lòo Pità ntô a mbyə̀ pə̀ənə̀ lo saʼà ɨ̀sàʼa e la, Pità à lə̀ pə ndyə̂ a tɨ̀tɨ̀rə̀ pɨ̀soyì pɨpaa, pɨ korə̀ e nɨ mɨ̀tsaŋə̀ mɨmbaa. Pɨ̀soyì pɨ̀tse pɨpaa lə̀ kɨ mbə a ntswùə̀ nkaʼà ɨ̀tsaŋə̀ ghu mmə mbyabə̀.

⁷Angèrə̀ Nẅùə̀ à lə̀ zùŋə̀ ntəəmə̀ a ndâ ɨ̀tsaŋə̀ gha, ɨlyiʼə laanə̀ nɨ ẅirə. Lenəla, nnə̀ʼə̀ Pità aŋunə nɨ̀ghə̌ nshwəŋə̀ ambo ze lo, “Faʼa ndòo a ɨ̀shyə̂!”Mɨ̀tsaŋə̀ ma zùŋə̀ nkyàatə̀ a mbô ze nkẅìnə̀ a ɨ̀shyə̂.

⁸Angèrə̀ wa a tyiʼə̀ nshwəŋə̀ ambo ze lo, “Korə̀ ɨ̀kòbə̀ o ngẅî ɨtabə ɨ̀pô.” A ghɨ̀rə̀ a lenə. Angèrə̀ wa a chi nshwəŋə̀ lo, “Ẅî atsəʼə ndzùŋə̀ mə̀.”

⁹Pità à lə̀ zùŋə̀ a angèrə̀ wa nfurə̀ a àpyìinə ka zhyə̂ e lo ànwùə̀ nɨ a lòonə alyiʼə lə a nkǔŋə nkuŋə, mmə nkwàŋə̀ àze pə lo ndzə̀əmə̀ ɨ̀ làŋə̀ a ɨ̀myə̂ ze.

¹⁰Pobə lə̀ làŋə̀ a ntsàambyə̀ soyì nɨ à lə̀ mənə mbyabə̀ ntswùə̀ àpùʼù àtɨ̀ŋnə nɨ ɨ lə̀ furə̀nə ndèrə̀ amwuə àlaʼà. Ntswùə̀ àpùʼù wə̀ nyaʼkə̀ ẅèrə nɨ ẅèrə ŋŋâ àlàŋə pobə làŋə̀ nfurə̀, ntyiʼə̀ mmə ngyìinə̀ nshwuʼə̀ àlàŋə, angèrə̀ wa a wùutə̀ mmyàʼtə̀ a Pità.

¹¹Nkwùə̀ nɨ angèrə̀ à lə̀ myàʼtə̀nə a Pità la, àtwuə̀ e a lə̀ laanə̀ a shwəŋə̀ lo, “Ǹzhyə̂ nkǔŋə nkuŋə tɨ̀tsòŋə̀ lo, Ndòʼnə̀mbyə̂ à tə ntwuumə̀ angèrə̀ e a tô nkẅiirə̀ mə̀ amwuə mbô mɨ Heròdə̀, nfuukə̀ mə̀ amwuə ngəʼə̀ nɨ pɨ̀Jew lə̀ mənə ntàʼà ŋâ ambo mɨ̀ŋə̀.”

¹²Tsaʼnə Pità à lə̀ zhyə̂nə ànwùə̀ nɨ a lə̀ ghɨ̀rə̀nə la, à lə̀ lèrə̀ a ndâ Màriyà mǎ pɨ Jònə ẅùə̀ nɨ pɨ lə̀ mənə nfuŋə̀ e mbyàʼtə̀ nɨ Mark. Pànə̀ pɨ̀noʼnə lə̀ shwatə̀ ghu mmə nchàʼtə̀ a Nẅùə̀.

¹³Lenəla, Pità a tsòotə̀ ntswùə̀ àpùʼù, mômə̀ngyə̌ nɨ à lə̀ mənə nfàʼà a ɨmwuə alyiʼə ghu pɨ mə nfuŋə̀ e nɨ Rodà a tô ngẅùʼə̀.

¹⁴Nkwùə̀ nɨ à lə̀ zuʼnə ngyə̀ Pità, nɨ̀ghaʼà à lə̀ lẅenə̀ ntɨŋmə̀ e, a kẅirə̀ nkɨ̀ɨrə̀ nkwuunə̀ amwuə ndâ nshwəŋə̀ lo Pità à wə̀ ntəəmə̀ a ntswùə̀ àpùʼù.

¹⁵Pobə zuʼù nshwəŋə̀ ambo ze lo, “Wə̀ paarə̀.” A chi nshwəŋə̀ tyìʼə̀ nɨ ɨ̀tɨ̀ŋnə̀ lo, “A nkǔŋə nkuŋə, a ze.” Pobə shwəŋə̀ lo, “A angèrə̀ e.”

¹⁶Tsaʼnə pobə lə̀ mənə nshwəŋə̀ la, Pità a pə a àpyìinə mmə ntsòotə̀ ntswùə̀ ndâ. Pobə ẅùʼə̀ ndzəənə̀ a pə ze, ànwùə̀ ghu a kə̀ʼnə̀ a ghobə.

¹⁷Pità a ŋaŋə̀ àpô e nnèrə̀ àchyə̌chyə̂ lo pobə zhwemnə̀, ntyiʼə̀ ntiitə̀ a ghobə tsaʼnə Ndòʼnə̀mbyə̂ à lə̀ tsàanə a angèrə̀ a tô fuukə̀ e a ndâ ɨ̀tsaŋə̀ gha. A lə̀ shwəŋə̀ ambo pobə lo, “Nɨ̀ tyiʼə̀ ngə̀ shwəŋə̀ ambo Jemə̀ pobə pyə̀ pɨ̀lɨ̀ŋmə̂,” lenəla ntyiʼə̀ mmyàʼtə̀ a ghobə ndèrə̀ e alyiʼə nyaanə.

¹⁸Njyə̂ ɨ̀ lə̀ laanə̀ ɨ̀twuə̀ pɨ̀soyì tsànkə̀ pobə tyiʼə̀ mbyiitə̀ lo Pità wa à lèrə̀ lə ɨghə?

¹⁹Heròdə̀ a shwəŋə̀ lo pɨ tàʼà a Pità, la pɨ tàʼà ka zəənə̀ e a ye. Lenəla à lə̀ ghɨ̀rə̀ pɨ zhwuutə̀ a ghobə pɨ̀tsùmə̀. Tsaʼnə ànwùə̀ zèrə zə̀ a lə̀ làŋə̀nə la, Heròdə̀ à lə̀ shwuʼə̀ ndèrə̀ a Kàsaryà ngə̀ mbə ghu aŋunə nkwùə̀ ɨ̀tse.

²⁰Ntɨŋmə̀ Heròdə̀ ɨ lə̀ pə ndzaŋə̀ mbə̀ʼə pànə̀ pɨ Tayə̀ ghobə Sidònə̀, lenəla pobə tyiʼə̀ nshwatə̀ lo ghə̀ zəənə̀ e. Pobə lə̀ zàamə̀ mbə̀ŋə̀ àtwuə̀ Blastus nɨ à lə̀ pənə ntsɨ̀ntoʼò ngẅùunə ambo Heròdə̀ lo â tyiʼə̀ nkòŋə̀ a ghobə. Pobə lə̀ tyiʼə̀ ndèrə̀ ambo ɨ̀fò Heròdə̀ mbuʼù mbô lo pobə pɨ pobə nwuunə̀ nɨ àporə̀porə̀ ntiinə mɨ̀zɨghə̀ ɨ̀mobə lə̀ furə̀nə la àlaʼà ze.

²¹Pobə lə̀ tyiʼə̀ nkàʼà njyə̂ ɨ̀tse nɨ ɨ̀fò Heròdə̀ à ẅînə ɨtsəʼə nɨ̀fò ɨ̀pe ŋŋaanə̀ aŋunə aləŋə nɨ̀fò e mmə nshwəŋnə̀ ambo pə̀ənə̀ ɨ̀pe.

²²Tsaʼnə à lə̀ mənə nshwəŋnə̀ la, pobə lə̀ chə̀pə̀ àshwəŋnə̀ e nkyiinə̀ nɨ ɨ̀tɨ̀ŋnə̀ lo, “Ka lə pə e ngyə̀ ŋwùə̀ mɨsoŋə, a ngyə̀ nẅùə̀ ɨ̀tse.”

²³Angèrə̀ Nẅùə̀ a zùŋə̀ mbòrə̀ e mmàʼà a ɨ̀shyə̂, ntiinə ka à lə̀ ŋâ e àghuʼtə̀ ambo Nẅùə̀. Pɨ̀mənẅaŋnə tyiʼə̀ nkwuunə̀ a mbɨ̀ŋmə̀ ze nkwurə̀ e a kwɨghə̀.

²⁴Àshwəŋnə̀ Nẅùə̀ a lə̀ kẅùə̀ nsìimə̀.

²⁵Barnabas pobə Saul lə̀ myàanə̀ àfàʼà àzobə ntyiʼə̀ ndòo Jònə Mark pobə furə̀ a Yèrusalèmə̀ nkwə̂ a ghobə.