Read Pinyin Ɨ̀fàʼà 16 Bible Online

Ɨ̀fàʼà 16 - Pinyin bible

Ɨ̀fàʼà 16

¹Pàolò à lə̀ pyàa a Derbe pobə Lystra ntsirə̀ a àzùŋə̀ ndzùmə̀ Kristù nɨ pɨ lə̀ mənə nfuŋə̀ e nɨ Timotì. Mǎ e à lə̀ pə ŋwùə̀ pɨ̀Jew nɨ à lə̀ nùŋə̀nə ntɨŋmə̀ e aŋunə Yěsû, la tǎ ɨghobə a pə ŋwùə̀ pɨ̀Greek.

²Pɨlyimə pɨ̀tsùmə̀ a ndzùmə̀ Yěsû Kristù lə̀ mə nshwəŋnə̀ ɨ̀shìʼnə̀ mbə̀ʼə mbòomə Timotì.

³Pàolò à lə̀ mə ntàʼà a nɨ lòo a Timotì pobə pɨ pobə lèrə̀, lenəla ndzàamə̀ ndzə̀ərə̀ e zaʼà. À lə̀ ghɨ̀rə̀ a lenə la ntiinə pɨ̀Jew nɨ pɨ lə̀ mənə nchyə̂ alyiʼə ghu lə̀ zhyə̂ lo tǎ pɨ Timotì a ŋwùə̀ pɨ̀Greek.

⁴Tsaʼnə pobə lə̀ yìinə̀nə ndàŋə̀ amwuə mɨ̀mbòmpə mɨ ɨ̀laʼà, pobə lə̀ mə ngyìinə̀ ntiitə̀ mɨ̀nwùə̀ nɨ ngàŋə ntwuumə̀ Yěsû pobə pɨ̀lɨ̀ŋmə̂ a Yèrusalèmə̀ lə̀ nwuunə̀nə mbyiimə̀ lo pɨ̀ tyiʼə̀ ngɨ̀rə̀.

⁵Lenəla ɨ̀shwatə̀ ɨ̀poonə̀ pɨ Kristù lə̀ làŋə̀ nɨ mbyə̀ ntyiʼə̀ nnùŋə̀ mɨ̀ntɨŋmə̀ ɨ̀mobə aŋunə Yěsû. Pànə̀ pɨ̀noʼnə tyiʼə̀ nkẅìʼnə̀ amwuə ɨ̀shwatə̀ ɨ̀poonə̀ pɨ Kristù, ɨ̀shwatə̀ pɨ̀ghu tyiʼə̀ nkẅùə̀ njyə̂ ɨ̀tsùmə̀.

⁶Pobə lə̀ làŋə̀ alyiʼə àtsùmə̀ a Frijyà pobə Galatia, ka shwəŋə̀ a ghobə ànwùə̀ àtse ntiinə Àzhwùə̀ Nẅùə̀ a lə̀ nàanə̀ lo kò pobə shwəŋə̀ a ghobə ànwùə̀ àtse amwuə àlaʼà Asia.

⁷Nkwùə̀ nɨ pobə lə̀ làŋə̀nə a Mysia, pobə lə̀ tàʼà a nɨ kwuunə̀ a Bithynia, la Àzhwùə̀ a Yěsû ka a pyiimə̀ e.

⁸Lenəla, pobə tyiʼə̀ ndàŋə̀ a nɨ̀pwùnə Mysia nshwuʼə̀ ndèrə̀ a Troas.

⁹A pə amwuə ɨ̀twuʼə̀ ghu, ndzə̀əmə̀ ɨ̀ làŋə̀ a ɨ̀myə̂ Pàolò a zəənə̀ a ŋwùə̀ Màsèdonyà a təəmə̀ mmə ndoonə̀ e nshwəŋə̀ ambo ze lo, “Twuumə̀ ntô a Màsèdonyà ngyèmpə̀ a wəə.”

¹⁰Tsaʼnə ndzə̀əmə̀ zə̀ ɨ̀ lə̀ làŋə̀nə a ɨ̀myə̂ Pàolò la, pəə lə̀ zùŋə̀ nchwuʼtə̀ mbɨ̀ŋmə̀ ɨ̀zəə a nɨ lèrə̀ a Màsèdonyà ntiinə pəə lə̀ zəənə̀ lo Nẅùə̀ à fuŋə̀ a wəə lo pəə tô nchwìitə̀ ntwuumə̀ ghù ɨ̀shìʼnə̀ ambo pànə̀ nɨ pɨ pənə ghu.

¹¹Pəə lə̀ furə̀ a Troas nkwuunə̀ àpaŋə̀ ndèrə̀ a Samotrèsə̀. Njyə̂ ɨ̀ tyiʼə̀ ndaanə̀ pəə lèrə̀ a Napolìsə̀,

¹²nfurə̀ alyiʼə ghu ndèrə̀ a Filipì nɨ à lə̀ pənə ntsàambyə̀ mbòmpə àlaʼà ngẅùunə amwuə Màsèdonyà. Pɨ̀Roman lə̀ mə mbuʼtə̀ mbòmpə àlaʼà zə̀. Pəə lə̀ chyə̂ amwuə mbòmpə àlaʼà ngẅùunə zə̀ aŋunə mɨ̀njyə̂ mɨ̀tse.

¹³A pə njyə̂ àlaʼà, pəə furə̀ a ntswùə̀ àpùʼù mbòmpə àlaʼà ngẅùunə za ndèrə̀ a ntswùə̀ nchyə, alyiʼə nɨ pəə lə̀ mənə nzhyə̂ lo pəə pɨ zəənə̀ alyiʼə yè chàʼtə̀nə a Nẅùə̀. Lenəla pəə nwuunə̀ a ɨ̀shyə̂ mbìʼnə̀ a nɨ shwəŋnə̀ ambo pə̀ngyə̌ pɨ̀tse nɨ lə̀ shwatə̀nə alyiʼə ghu.

¹⁴Taʼà mə̀ngyə̌ ɨ̀tse nɨ a lə̀ pənə nzhwiʼtə̀ ànwùə̀ nɨ pəə lə̀ mənə nshwəŋə̀ a lə̀ pə Lydia, nfurə̀ a Tyatirà, mmə shwùunə̀ ɨtsəʼə pɨ̀pùgrə̀nə, nkɨ mmə nsəəkə̀ a Nẅùə̀.

¹⁵Nkwùə̀ nɨ pobə pɨ ngẅàrə̀ ndâ e lə̀ kẅiirə̀nə nchyə, à lə̀ fuŋə̀ a wəə a ndâ ze nshwəŋə̀ lo, “Nɨ̀ tô nchyə̂ a ndâ mɨ̀ŋə̀ mbə̀ʼə nɨ pəla ndzəənə̀ lo ǹnùŋə̀ ntɨŋmə̀ mə̀ aŋunə Ndòʼnə̀mbyə̂.” Lenəla, mbuʼù mbô lo pəə tô.

¹⁶A lə̀ pə njyə̂ ɨ̀tse pəə mə ndèrə̀ alyiʼə yè chàʼtə̀nə a Nẅùə̀, ntsirə̀ a mômə̀ngyə̌ ɨ̀tse nɨ à lə̀ pənə àpùʼù, mmə nkwabə̀ àngaamə nkɨ mmə ntiitə̀ mɨ̀nwùə̀ nɨ mɨ tô ghɨ̀rə̀. À lə̀ fùʼù nkabə̀ yɨ̀noʼnə ambo pànə̀ nɨ pɨ lə̀ twuʼtə̀nə e.

¹⁷Mômə̀ngyə̌ wə̀ à lə̀ zùŋə̀ a wəə pɨ Pàolò nkyiinə̀ nshwəŋə̀ lo, “Pànə̀ pə a ngàŋə àfàʼà Nẅùə̀ Àkoʼntsirə̀ nɨ pobə tiitə̀ a wɨghə nɨ àlàŋə nɨ mbə̀ʼə nɨ̀ làŋə̀ ghu nchwarə̀.”

¹⁸A lə̀ ghɨ̀rə̀ ànwùə̀ zə aŋunə mɨ̀njyə̂ mɨ̀noʼnə tə ntɨŋmə̀ Pàolò ɨ zaŋə̀, a pə̀ŋə̀ nshwəŋə̀ ambo Àzhwùə̀ za lo, “nshwəŋə̀ ambo ghò lo wə̀ furə̀ amwuə mômə̀ngyə̌ wə̀ aŋunə nɨ̀linə̀ nɨ Yěsû Kristù!” Tyiʼə̀ nkwùə̀ ghu, Àzhwùə̀ za a zùŋə̀ nfurə̀.

¹⁹Nkwùə̀ nɨ pànə̀ nɨ mômə̀ngyə̌ wə̀ a lə̀ fàʼnə àpùʼù ambo pobə lə̀ zəənə̀nə lo ka mômə̀ngyə̌ wə̀ a pirə̀ mmə nfùʼù e nkabə̀ ŋŋâ ambo pobə, pobə lə̀ kô Pàolò pobə Salàsə̀ nsùŋə̀ a ghobə ndèrə̀ a mbyə̀ pɨ̀tǎ pɨ àlaʼà alyiʼə mɨ̀tàanə.

²⁰Nkwùə̀ nɨ pɨ lòonə a ghobə ntô a mbyə̀ pɨ̀saʼà mɨ̀sàʼa, pobə lə̀ shwəŋə̀ lo, “Pànə̀ pə̀ a pɨ̀Jew. Pobə pə mmàʼà àzhwàʼà amwuə mbòmpə àlaʼà yɨ̀ ngẅùunə zə.

²¹Pobə pə ntàʼà lo pəə ghɨ̀rə̀ mɨ̀nwùə̀ nɨ ka pəə pànə̀ pɨ Romə̀ ghɨ̀rə̀ a wəə.”

²²Àpùŋə̀ pə̀ənə̀ a lə̀ pwuutə̀ a ghobə a nɨ puʼù a Pàolò pobə Salàsə̀. Lenəla, pɨ̀saʼà mɨ̀sàʼa sìitə̀ ɨtsəʼə Pàolò pobə Salàsə̀ nshwəŋə̀ ambo pobə lo pobə kəʼə̀ a Pàolò pobə Salàsə̀ nɨ mɨ̀ngwàanə̀.

²³Nkwùə̀ nɨ pɨ lə̀ kəʼnə a ghobə ɨ̀shìʼnə̀, pɨ lə̀ chyâ a ghobə a ndâ ɨ̀tsaŋə̀, ntyiʼə̀ nshwəŋə̀ ambo mbyabə̀ ɨ̀tsaŋə̀ lo a fɨ̀ŋnə̀ a ghobə ɨ̀shìʼnə̀.

²⁴Tsaʼnə à lə̀ kẅiirə̀nə ntwuumə̀ wə̀, a lə̀ chyâ a ghobə amwuə ɨ̀tsaŋə̀ nɨ ɨ mìnə̀nə, nchyâ pɨ̀kɨ̀pùʼù a mɨ̀kwùə̀ pobə.

²⁵A lə̀ kɨ pə a ntɨ̀ŋnə̀ ɨ̀twuʼə̀, Pàolò pobə Salàsə̀ mmə nchàʼtə̀ a Nẅùə̀ ndzòbə̀ mɨnchyə, zhyə̀ ngàŋə ɨ̀tsaŋə̀ tyiʼə̀ mmə nzhwiʼtə̀.

²⁶Nkɨ wùutə̀ ɨ̀shyə̂ pìʼnə̀ a nɨ nə̀ʼnə̀, lenəla àtsirə̀ ndâ a kɨ nnə̀ʼnə̀. Mɨ̀ntswùə̀ mɨ ndâ zùŋə̀ ngẅùʼnə̀. Mɨ̀tsaŋə̀ mɨ ŋwùə̀ ntsùmə̀ zùŋə̀ nkyàatə̀.

²⁷Nkwùə̀ nɨ mbyabə̀ ɨ̀tsaŋə̀ a lə̀ lòonə a ɨ̀shyə̂ ndzəənə̀ lo mɨ̀ntswùə̀ mɨ̀ndâ mɨ ɨ̀tsaŋə̀ mɨ̀tsùmə̀ mə mɨ ẅùʼnə, a lə̀ tsoʼò a mɨnẅuə e ntàʼà lo zhwuutə̀ mbɨ̀ŋmə̀ e, mmə nkwàŋə̀ lo ngàŋə ɨ̀tsaŋə̀ ɨ̀tsùmə̀ kɨ̀ɨrə̀.

²⁸La Pàolò a kyiinə̀ nɨ ngyə̀ ntɨ̀ŋnə̀ nshwəŋə̀ lo, “Kò wə̀ zhwuutə̀ mbɨ̀ŋmə̀ o ntiinə pəə pə a nɨ̀ghə̂.”

²⁹Mbyabə̀ ɨ̀tsaŋə̀ wa à lə̀ fuŋə̀ lo pɨ̀ lòo nkàʼà ntô nɨ ẅèrə. Lenəla, a tyiʼə̀ ndòo ẅèrə ngyìinə̀ nkɨ̀ɨrə̀ ngwùrə̀, nkwuunə̀ nkunə̀ a mɨ̀kwùə̀ Pàolò pobə Salàsə̀,

³⁰ndòo a ghobə nfurə̀ a àpyìinə, mbyiitə̀ ambo pobə lo, “Masàa, mbə̀ʼə ngɨ̀rə̀ la ɨla mbòŋə̀ chwarə̀?”

³¹Pobə kẅùə̀ ambo ze lo, “Nùŋə̀ ntɨŋmə̀ o aŋunə Ndòʼnə̀mbyə̂ Yěsû mbə̀ʼə Nẅùə̀ a chwarə̀ o pɨghə pɨ ngẅàrə̀ o.”

³²Pobə tyiʼə̀ nchwìitə̀ ntwuumə̀ Ndòʼnə̀mbyə̂ ambo ze pobə pɨ ngẅàrə̀ e a ndâ ze.

³³Tyìʼə̀ nkwùə̀ ghu, amwuə ɨ̀twuʼə̀ ghu, ɨ̀mbyabə̀ ɨ̀tsaŋə̀ wa a lòo a ghobə nsùu ɨ̀lǎ ɨ̀pobə, ndzùŋə̀ nkẅiirə̀ nchyə pobə pɨ ngẅàrə̀ e.

³⁴À lə̀ lòo a Pàolò pobə Salàsə̀ nkoʼò ndèrə̀ a ndâ ze, ŋŋâ mɨ̀zɨghə̀ ambo pobə lo pobə̂ zɨghə̀. À lə̀ pə nɨ nɨ̀ghaʼà pobə pɨ ngẅàrə̀ e ntiinə pobə lə̀ nùŋə̀nə mɨ̀ntɨŋmə̀ ɨ̀mobə aŋunə Nẅùə̀.

³⁵Njyə̂ ɨ̀ lə̀ laanə̀, pɨ̀fò pɨ korə̀ tsàa pɨ̀pwùrəshyə̀ nɨ ntwuumə̀ ambo mbyabə̀ ɨ̀tsaŋə̀ wa lo a myàʼtə̀ pànə̀ pa pobə lèrə̀.

³⁶Tsaʼnə pobə lə̀ shwəŋə̀nə la, mbyabə̀ ɨ̀tsaŋə̀ wa a shwəŋə̀ ambo Pàolò lo pɨ̀fò pɨ korə̀ shwəŋə̀ lo pɨ myàʼtə̀ a wɨghə nɨ̀ lèrə̀. Njiilo nɨ̀ furə̀ ndèrə̀ àporə̀porə̀.

³⁷La Pàolò a shwəŋə̀ ambo pɨ̀pwùrəshyə̀ pa lo, “Pɨ lə̀ puʼù a wəə a ɨ̀myə̂ pə̀ənə̀ la ka pəə zhyə̂ a wəə ànwùə̀ nɨ pəə wɨ̀ghə̀nə. Mbaa pə tsaʼnə pəə kɨnə mbə àzəə pànə̀ pɨ Romə̀, pɨ chyâ a wəə a ndâ ɨ̀tsaŋə̀. Tɨ̀tsòŋə̀ wə̀ pobə tyiʼə̀ ntàʼà fuukə̀ a wəə pə tɨ ghu pànə̀ zhyə̂? Ngaŋə! Pobə tô pobə nfuukə̀ a wəə.”

³⁸Pɨ̀pwùrəshyə̀ lə̀ ghə̀ nshwəŋə̀ ànwùə̀ zèrə zə ambo pɨ̀fò pɨ korə̀. Lenəla, pobə pô nkwùə̀ nɨ pobə lə̀ zuʼnə lo Pàolò pobə Salàsə̀ kɨ mbəla pànə̀ pɨ Romə̀.

³⁹Pobə lə̀ puʼù mbô ambo Pàolò pobə Salàsə̀ nfuukə̀ a ghobə a ndâ ɨ̀tsaŋə̀ gha, ntyiʼə̀ nshwəŋə̀ lo pobə̂ furə̀ amwuə mbòmpə àlaʼà ngẅùunə za ndèrə̀ a ghobə.

⁴⁰Nkwùə̀ nɨ Pàolò pobə Salàsə̀ lə̀ furə̀nə a ndâ ɨ̀tsaŋə̀, pobə lə̀ lèrə̀ a ndâ Lydia, alyiʼə nɨ pobə lə̀ tsirə̀nə pɨlyimə ɨ̀pobə mborəkə̀ mɨ̀ntɨŋmə̀ ɨ̀mobə ndzùŋə̀ myàʼtə̀ a ghobə ndèrə̀.