Read Pinyin Ɨ̀fàʼà 19 Bible Online

Ɨ̀fàʼà 19 - Pinyin bible

Ɨ̀fàʼà 19

¹Nkwùə̀ nɨ Àpolòsə̀ à lə̀ pənə a àlaʼà Korìntə̀, Pàolò à lə̀ làŋə̀ a pàa mɨ̀kòʼnə ntô a àlaʼà Efesòsə̀. À lə̀ zəənə̀ ɨ̀zùŋə̀ ndzùmə̀ Yěsû pɨ̀tse a alyiʼə ghu.

²Mbyiitə̀ ambo pobə lo, “Nɨ̀ lə̀ kẅiirə̀ Àzhwùə̀ Nẅùə̀ amwuə nkwùə̀ nɨ nɨ̀ lə̀ nùŋə̀nə ntɨŋmə̀ aŋunə Yěsû Kristù?” Pobə kẅùə̀ ambo ze lo, “Pəə laʼa mə ndzuʼù a wəə lo Àzhwùə̀ Nẅùə̀ a za ghu apə̀.”

³A chi mbyiitə̀ ambo pobə lo, “Pɨ lə̀ tyiʼə̀ ŋŋâ a wɨghə nɨ zèrə àkẅiirə̀ nchyə?” Pobə kẅùə̀ lo, “Pɨ lə̀ ŋâ a wəə la nɨ àkẅiirə̀ nchyə Jònə.”

⁴Pàolò a kẅùə̀ ambo pobə lo, “Jònə à lə̀ mə ŋŋâ pànə̀ nɨ àkẅiirə̀ nchyə nɨ nchyə, mbə̀ŋə̀ mɨ̀ntɨŋmə̀ ɨ̀mobə nshwəŋə̀ lo pobə pyiimə̀ a ŋònə̀ wa nɨ à pɨ tô a ndzùmə̀ ze, mbə Yěsû.”

⁵Tsaʼnə pobə lə̀ zuʼnə a lenə la, pobə lə̀ lòo àkẅiirə̀ nchyə aŋunə nɨ̀linə̀ nɨ Ndòʼnə̀mbyə̂ Yěsû.

⁶Nkwùə̀ nɨ Pàolò a lə̀ nùŋə̀nə mbô ɨ̀me àtwuə̀ pobə, Àzhwùə̀ Nẅùə̀ a lə̀ shwuʼə̀ nkwuunə̀ aŋunə pobə, pobə tyiʼə̀ nshwəŋnə̀ ɨ̀shwəŋnə̀ pɨ̀nyaanə, nchwìitə̀ ntwuumə̀ Nẅùə̀.

⁷Pobə pɨ̀tsùmə̀ lə̀ pə tsaʼa nɨ̀ghumə̀ ntsòbə̀ ɨpaa.

⁸Pàolò à lə̀ tyiʼə̀ nkwuunə̀ amwuə ndâ àshwatə̀ pɨ̀Jew aŋunə ŋwɨgrə̀ ɨtarə nshwəŋnə̀ tɨ àkẅàrə̀, ntànkə̀ nkɨ ndəpə̀ pànə̀ lo pɨ̀ zhyə̂ lo ànwùə̀ nɨ pɨ shwəŋə̀nə mbə̀ʼə ànwùə̀ Nɨ̀fò Nẅùə̀ a tyìʼə̀ nkǔŋə nkuŋə.

⁹Pɨ̀tse lə̀ tɨ̀ŋnə̀ àtwuə̀ ka pyiimə̀ a ghobə, ntyiʼə̀ nshwəŋə̀ ɨ̀nwùə̀ tɨ̀pòŋə̀ mbə̀ʼə Ndòʼnə̀mbyə̂ a mbyə̀ nkùʼmə̀. Pàolò à lə̀ mìntə̀ aŋunə pobə ndòo ɨ̀zùŋə̀ ndzùmə̀ Yěsû pa pobə pɨ pobə tyiʼə̀ nshwəŋnə̀ àshwəŋnə̀ Nẅùə̀ ambo pànə̀ njyə̂ ɨ̀tsùmə̀ amwuə ndâ àŋwàʼnə̀ a Tiranùsə̀.

¹⁰Zèrə zə ànwùə̀ a lə̀ lèrə̀ nɨ mbyə̀ aŋunə nguʼu ɨpaa. Pànə̀ pɨ̀tsùmə̀ nɨ pɨ lə̀ pənə a pàa àlaʼà Asia lə̀ zuʼù àshwəŋnə̀ Nẅùə̀.

¹¹Nẅùə̀ a lə̀ ghɨ̀rə̀ mɨ̀nwùə̀ mɨ yerə̀nə yerə̀nə ndàŋə̀ a ndzùmə̀ Pàolò.

¹²Lenəla, pànə̀ lə̀ lòo pɨ̀hangàchibə̀ ŋŋâ ambo pɨghoonə, ɨghoonə ɨ̀pobə fiitə̀, ɨ̀zhwùə̀ tɨ̀pòŋə̀ kɨ nfutə̀ amwuə pobə.

¹³Pɨ̀Jew pɨ̀tse nɨ pobə lə̀ pənə nkantə̀ ɨ̀zhwùə̀ tɨ̀pòŋə̀ amwuə pə̀ənə̀ lə̀ pìʼnə̀ a nɨ fuŋə̀ nɨ̀linə̀ nɨ Ndòʼnə̀mbyə̂ Yěsû àtwuə̀ pànə̀ nɨ pobə lə̀ pənə nɨ ɨ̀zhwùə̀ tɨ̀pòŋə̀, nshwəŋə̀ lo, “Ǹshwəŋə̀ ambo ghò aŋunə nɨ̀linə̀ nɨ Yěsû nɨ Pàolò à wa nchwìitə̀ lo wə̀ furə̀.”

¹⁴Ɨ̀poonə̀ sàmbaa nɨ pobə lə̀ pənə ɨ̀poonə̀ pɨ ŋwùə̀ Jew ɨ̀tse nɨ à lə̀ pənə ɨ̀fò màʼà Nẅùə̀, nɨ̀linə̀ ɨ̀tse pə Sevà, lə̀ pə ngɨ̀rə̀ a lenə.

¹⁵La Àzhwùə̀ za a pyiitə̀ ambo pobə lo, “Ǹzhyə̂ a Yěsû nkɨ zhyə̂ a Pàolò. Nɨ̀ pə àzɨghə lə̀ pɨ̀wə̌?”

¹⁶Ŋònə̀ wa nɨ àzhwùə̀ tɨ̀pòŋə̀ za a pənə amwuə ze la, a kunə̀ aŋunə pobə, ɨ̀tɨ̀ŋnə̀ e ɨ tsàarə̀ a ghobə pɨ̀tsùmə̀, a puʼù a ghobə pobə kɨ̀ɨrə̀ nfutə̀ a ndâ ghu ntǔmnə̀ nɨ ɨ̀lǎ.

¹⁷Pɨ̀Jew nɨ pɨ̀Greek pɨ̀tsùmə̀ pyə̀ nɨ pobə lə̀ pənə a àlaʼà Efesòsə̀ lə̀ zuʼù a zèrə zə̀ ànwùə̀, àkẅàrə̀ a kwuunə̀ a ghobə, pobə chi nkẅìʼnə̀ nguʼtə̀ nɨ̀linə̀ nɨ Ndòʼnə̀mbyə̂ Yěsû.

¹⁸Pànə̀ pɨ̀noʼnə nɨ pobə lə̀ nùŋə̀nə ntɨŋmə̀ ɨ̀ghobə aŋunə Kristù lə̀ tô a sàŋə̀ sàŋə̀ mbyiimə̀ ɨ̀wɨ̀ghə̀ ɨ̀nwùə̀ ɨ̀pobə.

¹⁹Pobə pɨ̀noʼnə nɨ pobə lə̀ pənə ngɨ̀rə̀ mɨ̀kàŋə̀ lə̀ shwatə̀ ɨ̀ŋwàʼnə̀ ɨ̀pobə ntô ntòonə̀ a mbyə̀ pə̀ənə̀. Pobə lə̀ naŋə̀ ndzəənə̀ lo ndwùnə̀ nkabə̀ ɨ̀ŋwàʼnə̀ nɨ pɨ lə̀ tòonə̀nə ɨ̀ lə̀ pə nkabə̀ silbà nkaamə̀ mɨ̀ghumə̀ mɨntaanə̀.

²⁰Lenəla, àshwəŋnə̀ Ndòʼnə̀mbyə̂ a lə̀ sìimə̀ nɨ ɨ̀tɨ̀ŋnə̀ ndèrə̀ nɨ̀ mbyə̀.

²¹Pèrə pə ɨ̀nwùə̀ lə̀ làŋə̀, Pàolò a kàʼà amwuə ntɨŋmə̀ e lo ǎ làŋə̀ àlaʼà Màsèdonyà pobə Àkayà lèrə̀ a Yèrusalèmə̀. A shwəŋə̀ lo, “Ǹtə pəla ndèrə̀, ǹkyiitə̀ ngə̀ mbyàa a àlaʼà Romə̀.”

²²À lə̀ twuumə̀ a Timotì pobə Erastus, nɨ à pənə ngàŋə àyèmpə̀ ɨ̀ze ɨpaa a àlaʼà Màsèdonyà. Ze àtwuə̀ mbɨ̀ŋmə̀ e à lə̀ chi nyaʼa nchyə̂ a Asia aŋunə mətùmə nkwùə̀.

²³Nkwùə̀ ghu, ngəʼə̀ noʼnə ɨ̀ lə̀ furə̀ àlaʼà Efesòsə̀ ntii àlàŋə Ndòʼnə̀mbyə̂ za.

²⁴Ɨ̀ntẅuə̀ àlàamə̀ ɨ̀tse nɨ nɨ̀linə̀ ɨ̀tse lə̀ pənə Demetrius à lə mə ntsùŋə̀ pɨ̀tɨtoo pɨ silbà pɨ̀tse nɨ pɨ lə̀ mənə nfuŋə̀ nɨ Atemìsə̀ nshwùunə̀ ambo pànə̀ mbə nɨ àpìi yè noʼnə pobə pɨ ngàŋə àfàʼà ɨ̀ze.

²⁵À lə̀ shwatə̀ ngàŋə àfàʼà ɨ̀ze pobə yɨ̀tse ngàŋə àfàʼà nɨ pobə pa nfàʼà ɨ̀fàʼà pɨ̀nyaanə nshwəŋə̀ ambo pobə lo, “Nɨ̀ zhyə̂ lo pə̀ənə̀ lə̀ fùʼù nkabə̀ ɨ̀zə̀ənə̀ la aŋunə àfàʼà zə.

²⁶Nɨ̀ zəənə̀ nkɨ ndzuʼù lo ka à ghoŋə̀ e pə a Efesòsə̀ a nɨ̀ghə̂. Pàolò wə̀ à karə̀ mə a Asia ntsùmə̀ nfɨ̀kə̀ ɨ̀pùŋə̀ pə̀ənə̀ pɨ̀noʼnə lo pobə̂ pyiimə̀ ànwùə̀ nɨ à wə̀ nshwəŋə̀, mmə nshwəŋə̀ ambo pànə̀ lo pɨ̀nẅùə̀ pyə̀ nɨ pə̀ənə̀ tsùŋə̀nə la ka pèrə pə e la pɨ̀nẅùə̀.

²⁷Ngəʼə̀ nɨ ɨ̀ pənə ghu ɨ̀ pə lo ka à pə tsə̀ŋə̀ e pə ndàʼà àfàʼà àzəənə̀. Pɨ̌ lòo Ndâ Mɨ̀shwàʼà nẅùə̀ mə̀ngyə̌ Atemìsə̀ yɨ̀ ngẅùunə za aŋunə àfǐfǐ. Lenəla, ndwuumə̀ nɨ pànə̀ pɨ Asia pobə àtwuə̀ ɨ̀shyə̂ àtsùmə̀ lə̀ pənə nguʼtə̀ e ɨ̌ myə̀, nɨ̀fò nɨ nɨ̀linə̀ ɨ̀tse kɨ myə̀.”

²⁸Nkwùə̀ nɨ pobə lə̀ zuʼnə a zèrə zə̀ ànwùə̀, mɨ̀ntɨŋmə̀ ɨ̀mobə lə̀ zaŋə̀ pobə tyiʼə̀ nkyiinə̀ lo, “Nɨ̀ghaʼà yɨ̀noʼnə ambo Atemìsə̀ nɨ à pənə nẅùə̀ Efesòsə̀.”

²⁹Àzhwàʼnə̀ ghu a lə̀ kwuunə̀ amwuə mbòmpə àlaʼà ngẅùunə ghu ntsùmə̀. Àpùŋə̀ pə̀ənə̀ za a kô Gayòsə̀ pobə Àristakùsə̀ nɨ pobə lə̀ pənə pànə̀ pɨ Màsèdonyà pyə̀ nɨ pobə pɨ Pàolò lə̀ mənə ngyìinə̀, nsùŋə̀ a ghobə nkɨ̀ɨrə̀ nkwuunə̀ amwuə maa ndâ nɨ pɨ lə̀ mənə ngɨ̀rə̀ ɨ̀chànə̀ amwuə.

³⁰Pàolò à lə̀ mə ntàʼà zùŋə̀ kwuunə̀ amwuə, la ka ɨ̀zùŋə̀ ndzùmə̀ Yěsû pa pyiimə̀ a ghobə lo â lèrə̀.

³¹Pɨ̀tse pànə̀ pɨ̀ẅùunə amwuə pàa àlaʼà nɨ pɨ lə̀ pənə pɨ̀swùə ɨ̀pe lə̀ tsàa ntwuumə̀, mbuʼù mbô ndàʼnə̀ ambo ze lo kò a ghə̀ nkwuunə̀ a ndâ àchànə̀ gha.

³²Pə̀ pànə̀ lə̀ pə nkyiinə̀ nshwəŋə̀ a zə̀ ànwùə̀, pyə̀ pànə̀ mə nkyiinə̀ nshwəŋə̀ a zhyə̀ ànwùə̀. Àzhwàʼnə̀ a lə̀ pə amwuə àpùŋə̀ ghu ntiinə ka pobə pɨ̀noʼnə lə̀ zhyə̂ a ghobə ɨ̀sùmə nɨ pobə lə̀ shwatə̀nə.

³³Pobə pɨ̀tse lə̀ pyiimə̀ lo Àlèzandà à lə̀ zhyə̂ ɨ̀sùmə ntiinə pɨ̀Jew lə̀ ghɨ̀rə̀nə a làŋə̀ a mbyə̀. Àlèzandà à lə̀ nèrə̀ nɨ àpô lo pànə̀ zhwemnə̀ â shwəŋnə̀ ambo pobə ntàŋə̀ àtwuə̀ e.

³⁴La nkwùə̀ nɨ pobə lə̀ zəənə̀nə lo la ŋwùə̀ pɨ̀Jew, pobə lə̀ lòo pəwà pɨpaa nkɨ nkyiinə̀ kyiinə̀nə mmə nshwəŋə̀ a taʼà ànwùə̀ lo, “Àghuʼtə̀ yè noʼnə ambo Atemìsə̀ nẅùə̀ pànə̀ pɨ Efesòsə̀.”

³⁵Nkwùə̀ nɨ tǎ nɨ̀kwurə̀ yɨ̀ ngẅùunə nɨ à lə̀ pənə ɨ̀ŋwàʼnə̀ àŋwàʼnə̀ à lə̀ ghɨ̀rə̀nə pànə̀ zhwemnə̀, à lə̀ shwəŋə̀ ambo pobə lo, “Pɨlyimə ɨ̀pâ ngàŋə àlaʼà Efesòsə̀, a ɨ̀wə̌ ghu nɨ ka à zhyə̂ e lo mbòmpə àlaʼà ngẅùunə Efesòsə̀ ɨ̀ za nɨ ndâ nɨ̀shwàʼà mə̀ngyə̌ Atemìsə̀ nɨ tɨtoo nɨ̀ghòorə wa nɨ à lə̀ furə̀nə a nɨ̀pwuurə̀ nkunə̀ à wə̀ ghu?

³⁶Tsaʼnə mbə̀ʼə ka ŋwùə̀ a làʼnə̀ e ànwùə̀ zə la, nɨ̀ shwuʼkə̀ mɨ̀ntɨŋmə̀ ɨ̀mɨghə, kò nɨ̀ ghɨ̀rə̀ a wɨghə àkɨ̀ghə̀ ànwùə̀,

³⁷ntiinə pànə̀ pə nɨ nɨ̀ lòonə a ghobə ntô a nɨ̀ghə̂ la ka a pə e pyə̀ nɨ̀ pɨ zə̀ərə̀nə ɨ̀pwuumə̀ amwuə mɨ̀ndâ mɨ̀shwàʼà, ka kɨ pə e pyə̀ nɨ pɨ zòomə̀nə a nẅùə̀ Atemìsə̀.

³⁸A tə mbə lo Demetrius pobə ngàŋə àfàʼà ɨ̀ze pə nɨ ànwùə̀ ɨ̀sàʼa mbə̀ʼə ŋònə̀ ɨ̀tse, yi mɨ̀ntswùə̀ mɨ̀ndâ mɨ korə̀ mə təəmə̀ a mɨ̀ghəərə̀, ngàŋə nsaʼà mɨ̀sàʼa kɨ mbə ghu mbə nɨ mɨ̀njyə̂ mɨ korə̀. Mbə̀ʼə pobə ghə̀ mbwuutə̀ a ghobə.

³⁹Ànwùə̀ àtse a tə mbəla mbə ghu nɨ nɨ̀ tàʼnə lo tsùŋə̀ zhyə̂ yi pɨ̌ nùŋə̀ aŋunə njyə̂ nɨ pànə̀ pɨ àlaʼà ghə nùŋə̀nə lo tô shìitə̀ mɨ̀nwùə̀,

⁴⁰ntiinə a nɨ furə̀ aŋunə ànwùə̀ nɨ nɨ̀ ghɨ̀rə̀nə sìnə̀ wə̀, pɨ ŋâ ɨ̀fèrə ɨ̀wəənə̀ lo pə̀ənə̀ tə ntô nkùmə̀ ndumə. La àpyiitə̀ a tə ntô, pə̀ənə̀ pə wəənə̀ nɨ ngotə ɨ̀sùmə a nɨ tiitə̀ mbə̀ʼə ndumə zə apə̀.”

⁴¹A shwəŋə̀ a lenə la ngɨ̀rə̀ pànə̀ pɨ̀tsùmə̀ sìimə̀.