Read Pinyin Ɨ̀fàʼà 2 Bible Online

Ɨ̀fàʼà 2 - Pinyin bible

Ɨ̀fàʼà 2

¹Nkwùə̀ nɨ njyə̂ Pentekòsə̀ ɨ̀ lə̀ tônə, ɨ̀zùŋə̀ ndzùmə̀ Yěsû ɨ̀tsùmə̀ lə̀ shwatə̀ a taʼà alyiʼə.

²Lenəla nkɨ wùutə̀ àzòrə̀ a furə̀ a nɨ̀pwuurə̀ ndzòrə̀ tsaʼa fèrə̀ ntɨ̀ŋnə̀ à wə̀ ndàŋə̀, nkwuunə̀ ndẅenə̀ ndâ ntsùmə̀ nɨ pobə lə̀ nwuunə̀nə amwuə.

³Pobə lə̀ tyiʼə̀ ndzəənə̀ ɨ̀pwuumə̀ tsaʼa ɨ̀ləəmə̀ ɨ̀mǔ pyə̀ nɨ lə̀ sìimə̀nə, lenəla, nnòntə̀ aŋunə ŋwùə̀ moʼo moʼo.

⁴Pobə pɨ̀tsùmə̀ lə̀ lẅenə̀ nɨ Àzhwùə̀ Nẅùə̀, lenəla, ndzùŋə̀ mbìʼnə̀ a nɨ shwəŋnə̀ amwuə ɨ̀shwəŋnə̀ pɨ̀nyaanə tsaʼnə Àzhwùə̀ a lə̀ ŋânə a ghobə nɨ ɨ̀shwəŋnə̀.

⁵Nkwùə̀ ghu, pɨ̀Jew nɨ pɨ lə̀ mənə mbô a Nẅùə̀ lə̀ furə̀ amwuə pɨ̀pàa pɨ mbyə̂ pɨ̀tsùmə̀ mmə nchyə̂ a Yèrusalèmə̀.

⁶Nkwùə̀ nɨ pobə lə̀ zuʼnə àzòrə̀ zə̀, àpùŋə̀ pə̀ənə̀ a lə̀ tô nshwatə̀, a tyiʼə̀ nkə̀ʼnə̀ a ghobə, ntiinə ŋwùə̀ moʼo moʼo à lə̀ tyiʼnə ndzuʼù pɨ shwəŋnə̀ amwuə àze àshwəŋnə̀ àlaʼà.

⁷Lenəla, a lə̀ kə̀ʼnə̀ a ghobə, pobə yerə̀, nshwəŋə̀ lo, “Pànə̀ nɨ pɨ pə nshwəŋnə̀ lə ka pobə furə̀ a ghobə la a Galìlyə̂?

⁸Lə tyiʼə̀ ngɨ̀rə̀ àkə pə̀ənə̀ tyiʼə̀ ndzuʼù pobə tyiʼə̀ mmə nshwəŋnə̀ pə ɨ̀shwəŋnə̀ ɨ̀laʼà ɨ̀pə̀ənə̀?

⁹Pə̀ənə̀ furə̀ la a Patyâ, nɨ Medyà, nɨ Elàmə̀; nkɨ nfurə̀ a Mesopotamyà, nɨ Judyà, nɨ Kàpàdosyà; nfurə̀ a Pontùsə̀ pobə Asia,

¹⁰nfurə̀ farə Frijyà pobə Pàmfilyà, nɨ àlaʼà Egypt farə amwuə pàa Libyà mbaatə̀ Sìrenə̀, pə̀ənə̀ pɨ̀tse furə̀ a Romə̀,

¹¹mbə pɨ̀Jew pobə pànə̀ nɨ ka pobə pə ghobə pɨ̀Jew nɨ pɨ lə̀ tyiʼnə mbyiimə̀ ànwùə̀ Nẅùə̀ pɨ̀Jew, lenəla, pànə̀ pɨ̀tse furə̀ a Kretə̀ pobə Àrabyà ntiinə pə̀ənə̀ pɨ̀tsùmə̀ pə̀ ndzuʼù pobə shwəŋnə̀ amwuə ɨ̀shwəŋnə̀ ɨ̀laʼà ɨ̀pə̀ənə̀ mbə̀ʼə mɨ̀nwùə̀ mɨ̀ẅùunə nɨ Nẅùə̀ à ghɨ̀rə̀ mə!”

¹²Zèrə zə̀ a kə̀ʼnə̀ a ghobə, ntsànkə̀ ɨ̀zhìʼtə̀ ɨ̀pobə, pobə làŋə̀ a mbyə̀ a nɨ pyiitə̀ amwuə pobə lo, “Zèrə zə̀ a nèrə̀ lə lo àkə?”

¹³La pobə pɨ̀tse lə̀ mə ngẅìi ɨ̀zùŋə̀ ndzùmə̀ Yěsû nshwəŋə̀ lo, “Pànə̀ pə̀ nô mə mɨ̀lùʼù mɨ̀tɨ̀ŋnə̀.”

¹⁴La Pità à lə̀ lòo ntəəmə̀ àtɨ̀ghə pobə zhyə̀ ngàŋə ntwuumə̀ Kristù ntsòbə̀ moʼo, nshwəŋə̀ nɨ ngyə̀ ntɨ̀ŋnə̀ ambo pobə lo, “Pànə̀ pɨ Judyà pyə̀ nɨ pobə chyə̂nə amwuə Yèrusalèmə̀, nɨ̀ zhyə̂ a zə ɨ̀shìʼnə̀ ndzuʼù mɨ̀nwùə̀ nɨ mbɨ shwəŋə̀.

¹⁵Ka pànə̀ pə̀ paarə̀ a ghobə, tsaʼnə nɨ̀ kwàŋə̀nə. À wə̀ mbirə̀ lə pɨ̀nẅùumə̀ nɨ̀pwùʼə a ngẅùʼə!

¹⁶La, à lə̀ pə ànwùə̀ nɨ ngàŋə̀ ntwuumə̀ Nẅùə̀ Joel à lə̀ shwəŋə̀nə lo,

¹⁷‘Nẅùə̀ à shwəŋə̀ lo, lə̌ ànwùə̀ nɨ ngǎ ghɨ̀rə̀ amwuə mɨ̀njyə̂ mɨ ndzùmə̀: Ngǎ kẅìrə̀ Àzhwùə̀ mə̀ aŋunə ŋwùə̀ ntsùmə̀. Ɨ̀poonə̀ ɨ̀pɨghə pɨ mbyàŋnə̀ pobə pɨ pə̀ngyə̌ ghǎ chwìitə̀ ntwuumə̀ Nẅùə̀; ngwàswùumə̀ ɨ̀zɨghə ghǎ zəənə̀ mɨ̀nwùə̀ nɨ Nẅùə̀ à wə̀ nnèrə̀, pɨ̀lɨ̀ŋmə̂ ɨ̀pɨghə kɨ ndyə̂ mɨ̀ndzə̀əmə̀ aŋunə ànwùə̀ nɨ Nẅùə̀ à wə̀ nnèrə̀.

¹⁸Mbaa pə aŋunə ngàŋə̀ àfàʼà ɨ̀zâ yɨ̀ mbyàŋnə̀ pobə yɨ̀ pə̀ngyə̌, ngǎ kẅìrə̀ Àzhwùə̀ mə̀ amwuə mɨ̀njyə̂ mɨ̀ghu, pobə̂ tyiʼə̀ nshwəŋə̀ mɨ̀nwùə̀ nɨ mɨ ghǎ tô.

¹⁹Ngǎ nèrə̀ mɨ̀nwùə̀ mɨ yerə̀nə yerə̀nə a nɨ̀pwuurə̀ àtɨ̀ghə farə ɨ̀lènə̀ ɨ̀nwùə̀ àtwuə̀ ɨ̀shyə̂ a ɨ̀sùmə ɨ̀shyə̂, àləəmə̀ ghobə ɨ̀mǔ nɨ ndyə̂ ɨ̀mǔ ghǎ pə ghu.

²⁰Nẅùumə̀ à ghǎ pə̀ŋə̀ tyiʼə̀ ndzùmə, lenəla məŋwɨgrə̀ a pə̀ŋə̀ mbàŋə̀ tsaʼa àləəmə̀ zaʼà maa njyə̂ nɨ̀ghaʼà ngẅùunə Ndòʼnə̀mbyə̂ â pòŋə̀ tô.

²¹Lenəla, ŋwùə̀ wa ntsùmə̀ nɨ à wa nfuŋə̀ nɨ̀linə̀ nɨ Ndòʼnə̀mbyə̂ la à ghǎ chwarə̀.’

²²“Pànə̀ pɨ Israel, nɨ̀ zhwiʼtə̀ mɨ̀nwùə̀ nɨ mbɨ shwəŋə̀: Yěsû ŋwùə̀ Nazarètə̀ à lə̀ pə ŋònə̀ nɨ Nẅùə̀ à lə̀ tsoʼnə ambo pɨghə, nɨ̀ zhyə̂ e ndàŋə̀ a ndzùmə̀ mɨ̀nwùə̀ mɨ kə̀ʼnə̀nə pobə ɨ̀lènə̀ ɨ̀nwùə̀ pɨ̀yerə̀nə yerə̀nə pyə̀ nɨ Nẅùə̀ à lə̀ làŋə̀nə a ndzùmə̀ ze ngɨ̀rə̀ nkwùə̀ nɨ à lə̀ pənə a tɨ̀tɨ̀rə̀ pɨghə tsaʼnə nɨ̀ zhyə̂nə la.

²³Nẅùə̀ amwuə ɨye pàa à lə̀ pyə̀ nshankə̀ lo pɨ ghǎ ŋâ a Yěsû ambo pɨghə; nɨ̀ ŋâ e ambo ngàŋə ngɨ̀rə̀ ɨ̀nwùə̀ tɨ̀pòŋə̀, pobə kẅùumə̀ e aŋunə àtɨ̀ghə pànkə̀nə nzhwuutə̀.

²⁴La Nẅùə̀ a zhwuumə̀ e aŋunə nɨ̀wɨghə̀, nfuukə̀ e amwuə mɨ̀tɨ̀ŋnə̀ mɨ nɨ̀wɨghə̀ ntiinə mbə̀ʼə ka nɨ̀wɨghə̀ a lə̀ pə e nɨ ɨ̀tɨ̀ŋnə̀ a nɨ ẅìimə̀ e nnùŋə̀ a ndâ ɨ̀tsaŋə̀.

²⁵Mbə̀ʼnə Dàfirə̀ à lə̀ shwəŋnə̀ mbə̀ʼə e lo, ‘Ndə̀ mə ndzəənə̀ a Ndòʼnə̀mbyə̂ a mbyə̀ mɨ̀ŋə̀ nkwùə̀ ɨ̀tsùmə̀, ntiinə à wə̀ mbaatə̀ mə̀, lenəla ka àzwuumə̀ àtse a pə nə̀ʼə̀ e a gha.

²⁶Ǹzhyə̂ lo ntɨŋmə̀ mə̀ pobə àləəmə̀ mə̀ pə ndẅenə̀ nɨ nɨ̀ghaʼà; lenəla mbɨ̀ŋmə̀ ɨ̂ tyiʼə̀ nchyə̂ amwuə àkwàŋə̀.

²⁷Ntiinə ka wə̀ pə waʼà o a gha amwuə àlaʼà pɨ̀kwuə̀; kɨ myàʼtə̀ o a ngàŋə̀ àfàʼà o ghù ɨ̀shìʼnə̀ â lə̂ amwuə nɨ̀shyə̀ apə̀.

²⁸Wə̀ ghɨ̀rə̀ mə ǹzhyə̂ àlàŋə nɨ̀chyə̂mbyə̂, lenəla, wə̀ ghǎ lẅenə̀ mə̀ nɨ nɨ̀ghaʼà alyiʼə nɨ wə̀ pənə.’

²⁹“Pɨlyimə ɨ̀pâ, mbɨ shwəŋə̀ ambo pɨghə a sàŋə̀ mbə̀ʼə tǎ pɨ̀tǎ ɨ̀pə̀ənə̀ Dàfirə̀ lo, à lə̀ kwɨghə̀ pɨ tẅəŋə̀ e, lenəla, nɨ̀shyə̀ ɨ̀tse tsə̀ a nɨ̀ghə̂ pə̀ənə̀ pɨ pobə mbyàa sìnə̀ wə̀.

³⁰La à lə̀ pə ngàŋə̀ ntwuumə̀, lenəla, à lə̀ zhyə̂ ànwùə̀ nɨ Nẅùə̀ à lə̀ kàʼnə e nɨ zèrə; Nẅùə̀ à lə̀ tsə̀əmə̀ lo, à ghǎ ghɨ̀rə̀ a taʼà ŋwùə̀ ngẅàrə̀ Dàfirə̀ aŋunə ɨ̀fò tsaʼa Dàfirə̀.

³¹Dàfirə̀ à lə̀ zəənə̀ ànwùə̀ nɨ Nẅùə̀ à lə̀ pənə ghǎ ghɨ̀rə̀, lenəla nshwəŋə̀ mbə̀ʼə Ghù Ndzoʼnə wa lo, ‘Ka pɨ lə̀ waʼà e a ye amwuə àlaʼà pɨ̀kwuə̀; ka mbɨ̀ŋmə̀ e ɨ̀ lə̀ lə̂ e amwuə nɨ̀shyə̀.’

³²Nẅùə̀ à zhwuumə̀ mə a Yěsû ẅèrə wə̀ aŋunə nɨ̀wɨghə̀, pə̀ənə̀ pɨ̀tsùmə̀ tyiʼə̀ mbə pɨ̀ndzəənə̀ zəənə̀nə aŋunə ànwùə̀ zèrə zə̀.

³³Tɨ̀tsòŋə̀ Nẅùə̀ à ŋaŋə̀ e a àtɨ̀ghə a alyiʼə nɨ̀fò ze, ntə̂ e a pàa àpô ze yè zɨghə̀nə, ŋŋâ Àzhwùə̀ e za nɨ à lə̀ kàʼnə lo à ghǎ ŋâ ambo ze la. Àzwuumə̀ nɨ nɨ̀ zəənə̀nə nkɨ ndzuʼù a Àzhwùə̀ Nẅùə̀ ghu nɨ Kristù à kẅìrə̀nə aŋunə pə̀ənə̀.

³⁴Mbə̀ʼnə ka Dàfirə̀ àtwuə̀ ɨ̀pɨ̀ŋmə̀ e a lə̀ koʼò ndèrə̀ e a nɨ̀pwuurə̀. La nshwəŋə̀ àze pə lo, ‘Ndòʼnə̀mbyə̂ à shwəŋə̀ ambo Ndòʼnə̀mbyə̂ mə̀ lo, Nwuunə̀ a pàa àpô mɨ̀ŋə̀ yè zɨghə̀nə

³⁵tə mbyàa nkwùə̀ nɨ ǹgǎ nùŋə̀ ngàŋə kɨpaanə ɨ̀zô a ɨ̀shyə̂ wə̀ tə̂ mɨ̀kwùə̀ ɨ̀mô aŋunə pobə.’

³⁶“Lenəla, a pòŋə̀ lo ngẅàrə̀ Israel ntsùmə̀ ɨ̂ tsùŋə̀ nzhyə̂ lo Nẅùə̀ à tə̂ a Yěsû ẅèrə wə̀ nɨ nɨ̀ lə̀ kẅùumə̀nə aŋunə àtɨ̀ghə pànkə̀nə aŋunə Ndòʼnə̀mbyə̂ pobə Ghù Ndzoʼnə wa.”

³⁷Nkwùə̀ nɨ pobə lə̀ zuʼnə àshwəŋnə̀ zə̀ la, a lə̀ sòbə̀ mɨ̀ntɨŋmə̀ ɨ̀mobə, mèrə lẅenə̀ nɨ àsòmnə̀, pobə tyiʼə̀ mbyiitə̀ ambo Pità pobə zhyə̀ ngàŋə ntwuumə̀ Yěsû lo, “Pɨlyimə, mbə̀ʼə pəə tyiʼə̀ ngɨ̀rə̀ lə ɨla?”

³⁸Pità a kẅùə̀ ambo pobə lo, “Nɨ̀ pə̀ŋə̀ mɨ̀ntɨŋmə̀ ɨ̀mɨghə nfurə̀ amwuə tɨ̀pòŋə̀ ɨwɨghə pɨghə pɨ̀tsùmə̀ nkẅiirə̀ nchyə aŋunə nɨ̀linə̀ Yěsû, mbə̀ʼə Nẅùə̀ â lə̀ənə̀ a tɨ̀pòŋə̀ ɨwɨghə nkɨ ntyaŋə̀ a wɨghə nɨ Àzhwùə̀ e.

³⁹Zèrə zə ànwùə̀ la ànwùə̀ nɨ Nẅùə̀ à lə̀ kàʼnə ambo pɨghə pobə ɨ̀poonə̀ ɨ̀pɨghə farə ambo pànə̀ pɨ̀tsùmə̀ nɨ pobə pənə a ndyə̌ sàa pobə ŋwùə̀ ntsùmə̀ nɨ Nẅùə̀ à fuŋə̀nə lo â tô a nɨ̀pwùnə ze.”

⁴⁰Pità à lə̀ chi nshwəŋə̀ mɨ̀nwùə̀ mɨ̀noʼnə ambo pobə tsaʼnə pobə lə̀ zəənə̀nə nkɨ ndzuʼù, nkwàtə̀ a ghobə nshwəŋə̀ lo, “Nɨ̀ kẅiirə̀ ɨ̀twuə̀ ɨ̀pɨghə ambo ɨ̀waanə̀ pànə̀ pɨ tɨ̀tsòŋə̀ nɨ pobə pənə pànə̀ pɨ tɨ̀pòŋə̀!”

⁴¹Pànə̀ pɨ̀noʼnə nɨ pɨ lə̀ zuʼnə ànwùə̀ nɨ Pità à lə̀ shwəŋə̀nə nkɨ mbyiimə̀ la lə̀ kẅiirə̀ nchyə. Ndùnə̀ ɨ̀ghobə nɨ lə̀ kẅiirə̀nə nchyə njyə̂ ghu lə̀ pə pànə̀ nkaamə̀ ɨtarə nɨ lə̀ kẅìʼnə̀nə ɨ̀poonə̀ pɨ Kristù.

⁴²A nɨ furə̀ njyə̂ ghu pobə lə̀ tə̂ àtwuə̀ aŋunə mɨ̀nwùə̀ ma nɨ ngàŋə ntwuumə̀ Kristù za lə̀ mənə nnèrə̀ la, mmə mbwuutə̀ pobə pɨ pobə ngɨ̀rə̀ mɨ̀nwùə̀ a àpô moʼo amwuə ɨ̀shwatə̀, mmə mbiʼtə̀ àpaanə̀ nkwurə̀ nkɨ nchàʼtə̀ a Nẅùə̀ a taʼà alyiʼə.

⁴³Ngàŋə ntwuumə̀ Kristù lə̀ mə ngɨ̀rə̀ mɨ̀nwùə̀ mɨ̀kə̀ʼnə̀nə pobə ɨ̀lènə̀ ɨ̀nwùə̀ pɨ̀yerə̀nə yerə̀nə nɨ lə̀ ghɨ̀rə̀nə àkẅàrə̀ a ẅìimə̀ a ŋwùə̀ ntsùmə̀.

⁴⁴Pànə̀ pɨ̀tsùmə̀ nɨ pɨ lə̀ nùŋə̀nə ntɨŋmə̀ aŋunə Yěsû lə̀ mə mbwuutə̀ a taʼà alyiʼə nkɨ mmə mbwuutə̀ ɨ̀pwuumə̀ pobə, àzwuumə̀ àzobə àtsùmə̀ a pə a moʼo.

⁴⁵Pobə lə̀ shwùunə̀ ɨ̀pàbə ɨ̀shyə̂, pobə ɨ̀pwuumə̀ ɨ̀pobə ndòo nkabə̀ ghu ntô pɨ tyiʼə̀ ngàpə̀ amwuə pobə a nɨ zùŋə̀ ɨ̀pwuumə̀ pyə̀ nɨ ŋwùə̀ à puŋə̀nə.

⁴⁶Pobə pɨ̀tsùmə̀ lə̀ pə ndèrə̀ a Ndâ Mɨ̀shwàʼà Nẅùə̀ njyə̂ ɨ̀tsùmə̀, mbwuutə̀ mbiʼtə̀ àpaanə̀ amwuə mɨ̀ndâ ɨ̀mobə ngàbə̀ mɨ̀zɨghə̀ ndzɨghə̀ nɨ nɨ̀ghaʼà pobə ntɨŋmə̀ ghù laanə̀nə.

⁴⁷Pobə lə̀ mə nguʼtə̀ a Nẅùə̀, mmə nkòŋə̀ mbɨ̀ŋmə̀ ɨ̀zobə. Ndòʼnə̀mbyə̂ a tyiʼə̀ mmə nchwarə̀ a ghobə nkẅìʼnə̀ ndùnə̀ ɨ̀ghobə njyə̂ ɨ̀tsùmə̀.