Read Pinyin Ɨ̀fàʼà 20 Bible Online

Ɨ̀fàʼà 20 - Pinyin bible

Ɨ̀fàʼà 20

¹Nkwùə̀ nɨ àzhwàʼnə̀ za a lə̀ myə̀nə, Pàolò à lə̀ fuŋə̀ ɨ̀zùŋə̀ ndzùmə̀ Yěsû pa mbə̀ʼkə̀ mɨ̀ntɨŋmə̀ ɨ̀mobə, ndàʼnə̀ a ghobə ntyiʼə̀ ndèrə̀ a Màsèdonyà.

²À lə̀ làŋə̀ amwuə ɨlyiʼə pɨ̀ghu ngyìinə̀ nshwəŋə̀ ɨ̀shwəŋnə̀ pɨ̀noʼnə mbə̀ʼkə̀ mɨ̀ntɨŋmə̀ pə̀ənə̀ ngə̀ nkwuunə̀ àlaʼà Greece,

³alyiʼə nɨ à lə̀ chyə̂nə ghu ŋwɨgrə̀ ɨtarə. Nkwùə̀ nɨ à lə̀ chwuʼtə̀nə mbɨ̀ŋmə̀ lo lèrə̀ a àlaʼà Siryà, à lə̀ zəənə̀ lo pɨ̀Jew taŋə̀ a mɨnaŋə àtwuə̀ e, ntyiʼə̀ nkẅirə̀ nkwə̂ ndàŋə̀ a Màsèdonyà.

⁴Sopatà moonə̀ Pyrrhus nɨ à lə̀ furə̀nə a àlaʼà Berea à lə̀ lèrə̀ pobə ze. Pànə̀ nɨ pobə pɨ pobə lə̀ lèrə̀nə à lə̀ pə Àristakùsə̀ pobə Sekundùsə̀ nɨ pobə lə̀ furə̀nə a Tèsàlonikà, nɨ Gayòsə̀ nɨ à lə̀ furə̀nə a Derbe nɨ Takikùsə̀ pobə Trofimùsə̀ farə Timotì nɨ pobə lə̀ furə̀nə a Asia.

⁵Pobə lə̀ lèrə̀ a mbyə̀ ngə̀ mbyabə̀ a wəə a àlaʼà Troas.

⁶Pəə lə̀ kwuunə̀ àkànwuʼə nfurə̀ a Filipì nkwùə̀ nɨ Nɨ̀ghaʼà nɨ̀zɨghə̀ Àpaanə̀ Tɨkoʼò ɨ̀ lə̀ làŋə̀nə. Njyə̂ làŋə̀ ɨtaanə̀ pəə tsirə̀ a ghobə a Troas alyiʼə nɨ pəə pɨ pobə lə̀ chyə̂nə njyə̂ sàmbaa.

⁷A lə̀ pə aŋunə ntsàambyə̀ njyə̂ aŋunə ngàbə̀, pəə shwatə̀ lo zɨghə̀ mɨ̀zɨghə̀ mɨ ɨ̀kòŋnə̀. Tsaʼnə Pàolò à lə̀ pənə lèrə̀ e a ngẅùʼə, a lə̀ kɨ nshwəŋnə̀ ɨ̀shwəŋnə̀ ambo pə̀ənə̀ tə mbyàa a ntɨ̀ŋnə̀ ɨ̀twuʼə̀.

⁸Pɨ̀làamə̀ pɨ̀noʼnə lə̀ pə amwuə ndâ nɨkaŋə za nɨ pəə lə̀ shwatə̀nə amwuə la.

⁹Môngwàswùumə̀ ɨ̀tse nɨ nɨ̀linə̀ ɨ̀tse lə̀ pənə Eutychus à lə̀ nwuunə̀ a ntswùə̀ ẅindò. Tsaʼnə àshwəŋnə̀ Pàolò a lə̀ sàanə la, Eutychus à lə̀ pìʼnə̀ a nɨ tsə̀grə̀ a pɨlô, ndyə̂ ndə̀ənə̀ mbɨ̀ŋmə̀ e ntyiʼə̀ nfurə̀ amwuə ndâ nɨkaŋə nòmbàa pɨtarə a nɨ koʼò àtɨ̀ghə nkunə̀ a ɨ̀shyə̂. Pɨ lə̀ kɨ tô pə̀ʼkə̀ e nɨ a kwɨghə̀ mə e.

¹⁰La Pàolò à lə̀ shwuʼə̀ nkumnə̀ aŋunə ze nkampə̀ e nshwəŋə̀ lo, “Kò nɨ̀ pô, à pirə̀ ghù ntɨ̀ŋnə̀.”

¹¹À lə̀ kẅirə̀ nkoʼò ndèrə̀ amwuə ndâ nɨkaŋə za mbəʼə̀ àpaanə̀ ndzɨghə̀, ndèrə̀ nɨ mbyə̀ a nɨ shwəŋnə̀ ambo pobə tə mbyàa tsaʼnə njyə̂ ɨ̀ lə̀ laanə̀nə a myàʼtə̀ a ghobə ndèrə̀ e.

¹²Pɨ lə̀ lòo a môngwàswùumə̀ wa nkwə̂ nɨ ẅèrə ghù ntɨ̀ŋnə̀; nɨ̀ghaʼà a tyiʼə̀ ndẅenə̀ mɨ̀ntɨŋmə̀ ɨ̀mobə.

¹³Pəə lə̀ kwuunə̀ àpaŋə̀ ndèrə̀ a mbyə̀ mbyàa a Asos alyiʼə nɨ pəə lə̀ pənə lòo a Pàolò. À lə̀ shwəŋə̀ lo pəə ghə̀ mbyabə̀ e alyiʼə ghu â tyiʼə̀ ngyìinə̀ a ɨ̀shyə̂ ntô.

¹⁴Nkwùə̀ nɨ à lə̀ tônə a Asos, pəə lə̀ lòo e amwuə àpaŋə̀ pəə pɨ pobə lèrə̀ a Mitylene.

¹⁵Pəə lə̀ furə̀ ghu nkwuunə̀ àpaŋə̀ ntyiʼə̀ ngə̀ mbyàa ndə̀nkə̀ Chios tsaʼnə njyə̀ ɨ̀ lə̀ laanə̀nə. À lə̀ kɨ chi pə amwuə njyə̀ nɨ ɨ̀ paatə̀nə, pəə tyiʼə̀ a Samòsə̀; a ghǎ kɨ chi pə zhyə̀ njyə̂ pəə kwuunə̀ a Mìletùsə̀.

¹⁶Pàolò à lə̀ nùŋə̀ a ntɨŋmə̀ ze lo a pɨ kwuunə̀ àpaŋə̀ lèrə̀ a Efesòsə̀ mbə̀ʼə a kaŋə tsə̀ŋə̀ nkwùə̀ a Asia ntiinə a mənə nkɨ̀ɨrə̀ lo pə a Yèrusalèmə̀ amwuə njyə̂ Pentekòsə̀.

¹⁷Pàolò a lə̀ pə a àlaʼà Mìletùsə̀ la ntsàa ntwuumə̀ ambo ɨ̀twuə̀ Àshwatə̀ ɨ̀poonə̀ pɨ Kristù a Efesòsə̀ lo pobə tô ntsirə̀ e.

¹⁸Nkwùə̀ nɨ pobə lə̀ tônə, à lə̀ shwəŋə̀ ambo pobə lo, “Nɨ̀ zhyə̂ tsaʼnə ndə̀ chyə̂nə pə̀ənə̀ nkwùə̀ ɨ̀tsùmə̀ a nɨ furə̀ ntsàambyə̀ njyə̂ nɨ ndə̀ tônə a Asia ghə.

¹⁹Ndə̀ shwuʼkə̀ mbɨ̀ŋmə̀ mə̀, nfàʼà ambo Ndòʼnə̀mbyə̂ tyìʼə̀ tsaʼa ngàŋə̀ àfàʼà e nɨ nchyə a ɨ̀myə̂ mɨ̀ŋə̀. Nkɨ nzhyə̂ ngəʼə̀ mə̀ ntsùmə̀ nɨ ndə̀ zəənə̀nə tsaʼnə pɨ̀Jew lə̀ taŋə̀nə a mɨnaŋə àtwuə̀ mə̀.

²⁰Nɨ̀ zhyə̀ lo ka ndə̀ waʼà mə̀ ànwùə̀ àtse nɨ a lə̀ pənə a nɨ yèmpə̀ a wɨghə tə ghɨ̀rə̀, nnèrə̀ mɨ̀nwùə̀ nkɨ chwìitə̀ ànwùə̀ Nẅùə̀ ambo pɨghə a sàŋə̀ sàŋə̀ farə amwuə mɨmwuə mɨlyiʼə ɨ̀mɨghə.

²¹Ndə̀ shwəŋə̀, nkwàtə̀ pɨ̀Jew pobə pɨ̀Greek lo pobə̂ pə̀ŋə̀ mmyàʼtə̀ ɨ̀nwùə̀ tɨ̀pòŋə̀ ɨ̀pobə ntô ambo Nẅùə̀, mbyiimə̀ a Ndòʼnə̀mbyə̂ Yěsû Kristù.

²²Tɨ̀tsòŋə̀, Àzhwùə̀ Nẅùə̀ a zə ntinə̀ mə̀ mmə ndèrə̀ a Yèrusalèmə̀ ka m̀mə zhyə̂ mə̀ ànwùə̀ nɨ a pɨ ghɨ̀rə̀ mə̀ ghu.

²³Ànwùə̀ nɨ ǹzhyə̂nə a chyə̂ lo Àzhwùə̀ Nẅùə̀ a kwàtə̀ mə mə̀ ntiitə̀ ambo mɨ̀ŋə̀ lo ɨ̀tsaŋə̀ pobə ngəʼə̀ pə mbyabə̀ mə̀ amwuə mɨ̀mbòmpə mɨ ɨ̀laʼà mɨ̀tsùmə̀.

²⁴La ǹdòo a nɨ̀chyə̂mbyə̂ mə̀ aŋunə àfǐfǐ. Ànwùə̀ nɨ ǹtàʼnə lo ghɨ̀rə̀ a chyə̂ pə lo m̂myàanə̀ àfàʼà za zhyə̀ nɨ Ndòʼnə̀mbyə̂ Yěsû à lə̀ ŋânə ambo mɨ̀ŋə̀ lo n̂fàʼà a pə nɨ̀sìimə̀ ntwuumə̀ ghù ɨ̀shìʼnə̀ wa mbə̀ʼə àpòŋə̀ ntɨŋmə̀ Nẅùə̀.

²⁵Tɨ̀tsòŋə̀, ǹzhyə̂ lo ka ŋwùə̀ amwuə pɨghə pɨ̀tsùmə̀ nɨ ǹgyìinə̀ mə nchwìitə̀ ànwùə̀ mbə̀ʼə ànwùə̀ Nɨ̀fò Nẅùə̀ nɨ à ghǎ chi zəənə̀ a mə̀.

²⁶Lenəla ngwə̀ ndanə ntiitə̀ a wɨghə lo ŋwùə̀ wɨghə ɨ̀tse à tə ghǎ mbî, yi ka a pə e ɨ̀sàʼa mə̀.

²⁷Mbə̀ʼnə ka ndə̀ lə̀əmə̀ mə̀ ànwùə̀ àtse nɨ Nẅùə̀ à lə̀ shwəŋə̀nə ambo pɨghə; ndə̀ tiitə̀ tyìʼə̀ àtsùmə̀.

²⁸Njiilo nɨ̀ lâ àtwuə̀ mbyamnə̀ mbɨ̀ŋmə̀ ɨ̀zɨghə nkɨ mbyabə̀ àpùŋə̀ mbyə̂ za zhyə̀ nɨ Àzhwùə̀ Nẅùə̀ a chyânə amwuə mbô ɨ̀mɨghə lo nɨ̀ tə nnaŋə̀ la. Nɨ̀ tə mbyabə̀ a Àshwatə̀ ɨ̀poonə̀ pɨ Kristù Nẅùə̀ wa nɨ a lə̀ zwuunə̀nə nɨ àləəmə̀ moonə̀ e.

²⁹Ǹzhyə̂ lo nkwùə̀ nɨ mbɨ lèrə̀, afuunə yè tsə̂nə a pɨ tô a tɨ̀tɨ̀rə̀ pɨghə, mmyàʼtə̀ e ka àpùŋə̀ mbyə̂ za apə̀.

³⁰Nkwùə̀ ɨ ghǎ tô pànə̀ pɨ̀tse amwuə pɨghə tə nnyìi pɨ̀chwìrə̀ nfɨ̀ghə̀ ɨ̀zùŋə̀ ndzùmə̀ Yěsû pɨ̀tse nsùŋə̀ a ghobə lo pobə̂ zùŋə̀ a ghobə.

³¹Nɨ̀ zhìʼtə̀ a wɨghə nkwùə̀ ghu, nkẅempə̀ lo ka ndə̀ waʼà mə̀ a wɨghə tɨ təətə̀ moʼo moʼo nɨ nchyə a ɨ̀myə̂ mɨ̀ŋə̀ nɨ ɨ̀twuʼə̀ pobə njyə̂ aŋunə nguʼu ɨtarə.

³²“Tɨ̀tsòŋə̀, ǹchyâ a wɨghə amwuə mbô mɨ Nẅùə̀ pobə àshwəŋnə̀ àpòŋə̀ ntɨŋmə̀ e za nɨ mbə̀ʼə a ghɨ̀rə̀ nɨ̀ tɨ̀ŋnə̀, ntyiʼə̀ ŋŋâ ɨ̀pwuumə̀ pa nɨ Nẅùə̀ à nùŋə̀nə ambo pə̀ənə̀ ɨ̀pe.

³³Ka ndə̀ yìi mə̀ a silbà kə̀ a goldə̀ kə̀ ɨtsəʼə ŋònə̀ ɨ̀tse.

³⁴Pɨghə pɨ̀tsùmə̀ zhyə̂ lo ndə̀ fàʼà la nɨ mbô ɨ̀mâ mə a nɨ pə nɨ àzwuumə̀ àtsùmə̀ nɨ pəə pɨ ngàŋə àkwùə̀ nɨ̀yìinə̀ àzâ lə̀ mənə ntàʼà la.

³⁵Ǹnèrə̀ a wɨghə nkwùə̀ noʼnə lo, lə̌ tsaʼnə pə̀ənə̀ chyə̂nə a nɨ fàʼà ngyèmpə̀ pànə̀ pa pyə̀ nɨ pobə porə̀nə la. Nɨ̀ kẅempə̀ tsaʼnə Ndòʼnə̀mbyə̂ Yěsû àtwuə̀ ɨ̀pɨ̀ŋmə̀ e a lə̀ shwəŋə̀nə lo, ‘Ŋònə̀ nɨ a wa ŋâ a wa nɨ mborə̀ ntsàarə̀ a ŋònə̀ nɨ a kẅiirə̀nə.’”

³⁶Nkwùə̀ nɨ Pàolò à lə̀ myàanə̀nə a nɨ shwəŋnə̀, à lə̀ kẅiʼtə̀ a ɨ̀shyə̂ pobə pɨ pobə nchàʼtə̀ a Nẅùə̀.

³⁷Pobə pɨ̀tsùmə̀ lə̀ tyiʼə̀ mmə ngyìi, nkô e nkampə̀, nnyoŋə̀ mɨ̀ghə̀ʼə̀ ɨ̀me nshwəŋə̀ lo â yìinə̀ ɨ̀shìʼnə̀.

³⁸Pobə pɨ̀tsùmə̀ lə̀ lanə nsòmnə̀ tɨsɨŋnə ntiinə à lə̀ shwəŋnə̀ ambo pobə lo ka pobə pə ghǎ chi zəənə̀ a ghobə a ye. Pobə pɨ pobə lə̀ tyiʼə̀ ndèrə̀ a ntswùə̀ àpaŋə̀.