Read Pinyin Ɨ̀fàʼà 22 Bible Online

Ɨ̀fàʼà 22 - Pinyin bible

Ɨ̀fàʼà 22

¹“Pɨlyimə ɨ̀pâ pobə pɨ̀tǎ ɨ̀pâ, nɨ̀ zhwiʼtə̀ tsaʼnə mbɨ kẅiirə̀ ntàŋə mə̀ ambo pɨghə tɨ̀tsòŋə̀.”

²Tsaʼnə pobə lə̀ zuʼnə a pə nshwəŋnə̀ àshwəŋnə̀ pɨ̀Hibrù la, pobə tsùŋə̀ nchi ntə̂ nzhwiʼtə̀. A shwəŋə̀ lo,

³“Mɨ̀ŋə̌ ŋwùə̀ pɨ̀Jew, nɨtoŋə ɨ̀tsâ pə a Tasùsə̀ amwuə àlaʼà Sìlisyà. La ǹkẅuə̀ mə̀ pə amwuə àlaʼà Yèrusalèmə̀ a nɨ̀ghə̂. Ndə̀ lanə̀ àŋwàʼnə̀ ambo Gamaliel, a lòo mə̀ nkoʼò amwuə pɨ̀mbòomə pɨ tǎ ɨ̀pə̀ənə̀, la ǹtɨ̀ŋnə̀ aŋunə ànwùə̀ Nẅùə̀ tyìʼə̀ tsaʼnə pɨghə pɨ̀tsùmə̀ pə nkɨ mbə sìnə̀ wə̀.

⁴Ndə̀ nyàŋə̀ pə̀ənə̀ nɨ pɨ lə̀ mənə ndzùŋə̀ àlàŋə zə nzhwuutə̀ a ghobə, nkorə̀ mbyàŋnə̀ pobə pə̀ngyə̌ nchyâ a ɨ̀tsaŋə̀.

⁵Mbə̀ʼə àtwuə̀ pɨ̀fò màʼà Nẅùə̀ pobə pɨ̀lɨ̀ŋmə̂ amwuə Kansèrə̀ pə pɨ̀ndzəənə̀ zəənə̀nə ɨ̀pâ. Ndə̀ kẅiirə̀ àŋwàʼnə̀ ambo pobə a nɨ ghə̀ ŋŋâ ambo pɨlyimə ɨ̀pə̀ənə̀ a Dàmaskòsə̀ lo kootə̀ pànə̀ pèrə pə ghu korə̀ lòo kwə̂ a Yèrusalèmə̀ pɨ̀ chyâ ɨ̀sàʼa a àtwuə̀ pobə.

⁶“Ndə̀ pə ngyìinə̀ mmə ntô kwuunə̀ a Dàmaskòsə̀ tsaʼa pɨ ntɨ̀ŋnə̀ àzhwùunə, nkɨ wùutə̀ nkàʼà ghù tsìinə̀nə ɨ̀ furə̀ a nɨ̀pwuurə̀ ŋŋwàŋə̀ a ɨ̀myə̂ mɨ̀ŋə̀,

⁷nkunə̀ a ɨ̀shyə̂, ndzuʼù ngyə̀ ŋwùə̀ ɨ̀ shwəŋə̀ ambo mɨ̀ŋə̀ lo, ‘Saul, Saul, wə̀ nyàŋə̀ mə̀ lə ntii àkə?’

⁸Nkẅùə̀ ambo ze lo, ‘A ghò ɨ̀wə̌, Ndòʼnə̀mbyə̂?’ A shwəŋə̀ ambo mɨ̀ŋə̀ lo, ‘A mɨ̀ŋə̀ Yə̌sû, ŋwùə̀ Nazarètə̀ wa nɨ wə̀ wa nnyàŋə̀ la.’

⁹Pànə̀ nɨ pəə pɨ pobə lə̀ pənə ngyìinə̀ lə̀ zəənə̀ nkàʼà ghu la ka zuʼù a ghobə ngyə̀ ŋònə̀ nɨ ɨ̀ lə̀ pənə nshwəŋnə̀ ambo mɨ̀ŋə̀.

¹⁰Ǹtyiʼə̀ mbyiitə̀ e lo, ‘N̂gɨ̀rə̀ ɨla, Ndòʼnə̀mbyə̂?’ A shwəŋə̀ ambo mɨ̀ŋə̀ lo, ‘Lòo a ɨ̀shyə̂ ndèrə̀ a Dàmaskòsə̀, pɨ tiitə̀ o nɨ ànwùə̀ àtsùmə̀ nɨ Nẅùə̀ a nùŋə̀nə lo wə̀ ghɨ̀rə̀.’

¹¹Nkàʼà ghu ɨ̀ lə̀ ghɨ̀rə̀ ǹfə̀. Lenəla, pànə̀ nɨ pəə pɨ pobə lə̀ pənə ngyìinə̀ tyiʼə̀ ngẅìimə̀ àpô mə̀ ndòo ngə̀ nkwuunə̀ a Dàmaskòsə̀.

¹²“Ŋònə̀ ɨ̀tse nɨ nɨ̀linə̀ ɨ̀tse lə̀ pənə Ananias à lə̀ pə ghu, ntô a nɨ zəənə̀ mə̀. À lə̀ pə ŋwùə̀ ntə̂ àtwuə̀ a nɨ ghuʼtə̀ a Nẅùə̀, ndzùŋə̀ a mbòomə pɨ̀Jew. Pɨ̀Jew pɨ̀tsùmə̀ a Dàmaskòsə̀ lə̀ kɨ mmə nguʼtə̀ e tyìʼə̀ ɨ̀shìʼnə̀.

¹³À lə̀ tô ntəəmə̀ a nɨ̀pwùnə mɨ̀ŋə̀ nshwəŋə̀ lo, ‘Ndyimə mə̀ Saul, kẅirə̀ ndzəənə̀ ɨlyiʼə!’ Ndzùŋə̀ nkẅirə̀ ndzəənə̀ ɨlyiʼə, ndzəənə̀ e.

¹⁴A shwəŋə̀ lo, ‘Nẅùə̀ pɨ tǎ pə̀ənə̀ à tsoʼò mə o lo wə̀ zhyə̂ ànwùə̀ nɨ a tàʼnə, ndzəənə̀ a ẅùə̀ wa nɨ mɨ̀nwùə̀ ɨ̀me təəmə̀nə, nkɨ ndzuʼù àshwəŋnə̀ nɨ a furə̀nə a ntswùə̀ ze,

¹⁵ntiinə wə̀ ghǎ pə ndzəənə̀ zəənə̀nə e a nɨ tiitə̀ a ŋwùə̀ ntsùmə̀ nɨ ànwùə̀ nɨ wə̀ zəənə̀nə nkɨ ndzuʼù.

¹⁶Wə̀ kùmə̀ nchi mbyabə̀ àkə tɨ̀tsòŋə̀? Lòo a ɨ̀shyə̂ nkẅiirə̀ nchyə, mbə̀ʼə Nẅùə̀ a sùu a tɨ̀pòŋə̀ o amwuə ndwuumə̀ nɨ wə̌ fuŋə̀ nɨ̀linə̀ ɨ̀tse.’

¹⁷“Nkwùə̀ nɨ ndə̀ pənə nchàʼtə̀ a Nẅùə̀ amwuə Ndâ Mɨ̀shwàʼà Nẅùə̀ a Yèrusalèmə̀, ndzə̀əmə̀ ɨ̀ lə̀ làŋə̀ a ɨ̀myə̂ mɨ̀ŋə̀,

¹⁸ǹdzəənə̀ a Ndòʼnə̀mbyə̂ a shwəŋə̀ ambo mɨ̀ŋə̀ lo, ‘Faʼa nfurə̀ a Yèrusalèmə̀ nɨ mɨ̀tɨ̀ŋnə̀, ntiinə ka pànə̀ pə̀ a nɨ̀ghə̂ pə pyiimə̀ a ghobə ànwùə̀ nɨ wə̀ wa nshwəŋə̀ mbə̀ʼə mə̀.’

¹⁹Ǹkẅùə̀ lo, ‘Ndòʼnə̀mbyə̂, pobə zhyə̂ tyìʼə̀ ɨ̀shìʼnə̀ lo ndə̀ karə̀ amwuə mɨ̀ndâ mɨ àshwatə̀ mɨ pɨ̀Jew nkootə̀ pànə̀ nɨ pɨ nùŋə̀nə mɨ̀ntɨŋmə̀ ɨ̀mobə aŋunə ghò nchyâ a ndâ ɨ̀tsaŋə̀ nkəʼə̀.

²⁰Ndə̀ kɨ mbə alyiʼə nɨ pɨ lə̀ mənə nzhwuutə̀ a Stifə̀nə̀ ngàŋə̀ ntwuumə̀ o mbyiimə̀ lo pɨ zhwuutə̀ e, ntyiʼə̀ ntəəmə̀ mmə mbyabə̀ ɨtsəʼə pànə̀ nɨ pɨ lə̀ mənə nzhwuutə̀ e.’

²¹Ndòʼnə̀mbyə̂ a tyiʼə̀ nshwəŋə̀ ambo mɨ̀ŋə̀ lo, ‘Lèrə̀, ntiinə mbɨ twuumə̀ o a ndyə̌ sàa ambo pànə̀ nɨ ka pobə pə ghobə pɨ̀Jew.’”

²²Pànə̀ pɨ̀ghu lə̀ pə nzhwiʼtə̀ ànwùə̀ nɨ Pàolò à lə̀ mənə nshwəŋə̀ tyìʼə̀ ɨ̀shìʼnə̀. La nkwùə̀ nɨ à lə̀ shwəŋə̀nə a zə̀ ànwùə̀, pobə lə̀ ŋaŋə̀ mɨ̀ngyə̀ ɨ̀mobə nkyiinə̀ nshwəŋə̀ lo, “Nɨ̀ furə̀ nɨ ze, nzhwuutə̀ e ntiinə ka a pə e ŋònə̀ nɨ mbə̀ʼə a chyə̂.”

²³Tsaʼnə pobə lə̀ mənə nkyiinə̀ la, pobə lə̀ sòtə̀ ɨtsəʼə ɨ̀pobə mmyə̀ a àtɨ̀ghə, mmə nchwaʼà àpùbə mmàʼà a àtɨ̀ghə.

²⁴Àtwuə̀ pɨ̀soyì pɨ̀Roman a lə̀ shwəŋə̀ ambo pɨ̀soyì ɨ̀pe lo pobə̂ lòo a Pàolò ndèrə̀ a nkaʼà pobə, nkəʼə̀ e, mbyiitə̀ e nɨ ɨ̀sùmə nɨ pɨ pə nkyiinə̀ àtwuə̀ ze nɨ ndwuumə̀ wə̀.

²⁵La nkwùə̀ nɨ pobə lə̀ korə̀nə e lo kəʼə̀, à lə̀ pyiitə̀ ambo àtwuə̀ pɨ̀soyì yè kɨ̂ àtse nɨ a lə̀ təəmə̀nə a alyiʼə ghu lo, “Mbòomə a pyiimə̀ lo mbə̀ʼə pɨ kəʼə̀ a ŋwùə̀ Romə̀ tɨghu pɨ naŋə̀ ɨ̀sàʼa e ndzəənə̀ àwɨ̀ghə̀ ànwùə̀ e?”

²⁶Nkwùə̀ nɨ àtwuə̀ pɨ̀soyì yè kɨ̂ za a lə̀ zuʼnə ànwùə̀ zə la, a lə̀ lèrə̀ ngə̀ ntiitə̀ àtwuə̀ pɨ̀soyì yè ẅùunə lo, “Wə̌ ghɨ̀rə̀ lə ɨla? Ŋònə̀ wa la ŋwùə̀ Romə̀.”

²⁷Lenəla, àtwuə̀ pɨ̀soyì yè ẅùunə za a lèrə̀ ghə̀ mbyiitə̀ Pàolò lo, “Tiitə̀ mə̀, ghò la ŋwùə̀ Romə̀?” Pàolò a kẅùə̀ lo, “Ee.”

²⁸Àtwuə̀ pɨ̀soyì yè ẅùunə za a kẅùə̀ ambo ze lo, “ndə̀ twuə̀ nkabə̀ noʼnə zaʼà mbòŋə̀ pə ŋwùə̀ Romə̀.” La Pàolò a kẅùə̀ lo, “Mɨ̀ŋə̀ a ŋwùə̀ Romə̀ ntiinə mǎ mə̀ pobə tǎ ɨwəə a pɨ̀Roman.”

²⁹Lenəla, pànə̀ nɨ pɨ laʼa mmə ntàʼà pyiitə̀ e nɨ mɨ̀nwùə̀ lə̀ zùŋə̀ mìntə̀ a ghobə a nɨ̀pwùnə ze. Àtwuə̀ pɨ̀soyì yè ẅùunə za a lə̀ pìʼnə̀ a nɨ pô ntiinə à lə̀ zəənə̀nə lo Pàolò a ŋwùə̀ Romə̀ nɨ à korə̀nə e nɨ mɨ̀tsaŋə̀.

³⁰Àtwuə̀ pɨ̀soyì yè ẅùunə za a lə̀ mə ntàʼà zhyə̂ ànwùə̀ nɨ a ghɨ̀rə̀nə lo pɨ̀Jew fuŋə̀ a Pàolò nɨ ŋònə̀ tɨ̀pòŋə̀. Njyə̂ lə̀ laanə̀, a kyàatə̀ mɨ̀tsaŋə̀ ma aŋunə Pàolò, nfuŋə̀ pɨ̀fò màʼà Nẅùə̀ pobə pɨ̀ Kansèrə̀ ntsùmə̀ lo pobə pòmpə̀. A tyiʼə̀ ndòo a Pàolò ntô ntə̂ a mbyə̀ pobə.