Read Pinyin Ɨ̀fàʼà 23 Bible Online

Ɨ̀fàʼà 23 - Pinyin bible

Ɨ̀fàʼà 23

¹Tsaʼnə Pàolò a lə̀ təəmə̀nə a mbyə̀ Kansèrə̀ la, a lə̀ tə̂ ɨ̀myə̂ ɨ̀me aŋunə pobə nshwəŋə̀ lo, “Pɨlyimə ɨ̀pâ, nɨ̀chyə̂mbyə̂ mə̀ a mbyə̀ Nẅùə̀ à laanə̀ tə mbyàa sìnə̀ wə̀ tə ka àlùmə a kəʼə̀ e a gha.”

²Àtwuə̀ pɨ̀fò màʼà Nẅùə̀ nɨ nɨ̀linə̀ ɨ̀tse lə̀ pənə Ananias à lə̀ shwəŋə̀ ambo pànə̀ nɨ pɨ lə̀ pənə a nɨ̀pwùnə ze lo pobə kəʼə̀ àpô a ntswùə̀ ze.

³Pàolò a shwəŋə̀ ambo ze lo, “Nẅùə̀ a ghǎ kɨ kəʼə̀ àpô a ntswùə̀ ghò; wə̀ chyə̂ mbə la tsaʼa àsǎ ndâ nɨ pɨ zoʼnə nɨ mbə̀əmə ɨ fuə pə a àpyìinə. Wə̀ nwuunə̀ aŋunə aləŋə ɨ̀nsaʼà mɨ̀sàʼa nshwəŋə̀ lo wə̀ wə̀ nsaʼà ɨ̀sàʼa mə̀, la mmə mbəʼə̀ a mbòomə a nɨ shwəŋə̀ lo pɨ kəʼə̀ àpô a ntswùə̀ mɨ̀ŋə̀.”

⁴Pànə̀ nɨ pɨ lə̀ pənə a nɨ̀pwùnə Pàolò mmə ndzuʼù ànwùə̀ nɨ à lə̀ mənə nshwəŋə̀ lə̀ pyiitə̀ e lo, “Wə̀ zòomə̀ àtwuə̀ pɨ̀fò màʼà Nẅùə̀ tyìʼə̀ lànə̀?”

⁵Pàolò a kẅùə̀ lo, “Pɨlyimə ɨ̀pâ, ka ǹtə nzhyə̂ mə̀ lo la àtwuə̀ pɨ̀fò màʼà Nẅùə̀ ntiinə àŋwàʼnə̀ Nẅùə̀ a shwəŋə̀ lo ‘Kò wə̀ shwəŋə̀ o ànwùə̀ tɨ̀pòŋə̀ aŋunə ŋwùə̀ nɨ à pənə àtwuə̀ pə̀ənə̀.”

⁶Tsaʼnə Pàolò à lə̀ zhyə̂nə lo àpàa pə̀ənə̀ ghu àtse la pɨ̀Sadducee, pɨ̀tse pə pɨ̀Farìsî la, à lə̀ kyiinə̀ amwuə Kansèrə̀ nshwəŋə̀ lo, “Pɨlyimə ɨ̀pâ, mɨ̀ŋə̀ a ŋwùə̀ pɨ̀Farìsî, mbə tsɨ̀kə̀ moonə̀ ŋwùə̀ Farìsî. Ǹkwuunə̀ ɨ̀sàʼa lə ntiinə ǹnùŋə̀nə a ntɨŋmə̀ mɨ̀ŋə̀ lo pɨ̀kwuə̀ ghǎ zhwuumə̀ a nɨ̀wɨghə̀.”

⁷Nkwùə̀ nɨ a lə̀ shwəŋə̀nə a lenə la, ɨ̀sàʼa lə̀ furə̀ a tɨ̀tɨ̀rə̀ pɨ̀Farìsî pobə pɨ̀Sadducee, pobə ghàbə̀ ɨ̀pàa ɨpaa,

⁸ntiinə pɨ̀Sadducee lə̀ pə shwəŋə̀ lo ka pànə̀ pə ghǎ zhwuumə̀ a ghobə a nɨ̀wɨghə̀ nkɨ mmə nshwəŋə̀ lo ka pəngèrə̀ nɨ Àzhwùə̀ pə e ghu. La pɨ̀Farìsî pə pyiimə̀ ɨ̀nwùə̀ pə ɨ̀tsùmə̀.

⁹Lenəla Pobə lə̀ chi nkẅìʼnə̀ nkyiinə̀ nɨ ɨ̀tɨ̀ŋnə̀. Pɨ̀nèrə̀ mbòomə pɨ̀tse nɨ pɨ lə̀ pənə pɨ̀Farìsî nyiinə̀ a ɨ̀shyə̂ nshwəŋə̀ lo, “Ka pəə zəənə̀ a wəə ànwùə̀ tɨ̀pòŋə̀ àtse nɨ ŋònə̀ wə̀ à ghɨ̀rə̀nə. Nkwùə̀ ɨ̀tse à lə̀ shwəŋnə̀ Àzhwùə̀ kə̀ angèrə̀ ɨ̀tse ambo ze, njiilo kò pə̀ənə̀ zòŋnə̀ a wəənə̀ a Nẅùə̀.”

¹⁰Nkwùə̀ nɨ ɨ̀sàʼa wa ɨ lə̀ mənə ntɨ̀ŋnə̀ ndèrə̀ nɨ mbyə̀, àtwuə̀ pɨ̀soyì yè ẅùunə a lə̀ pə nɨ àkẅàrə̀ lo pɨ sìitə̀ a Pàolò, ntyiʼə̀ nshwəŋə̀ ambo pɨ̀soyì ɨ̀pe lo pɨ shwuʼə̀ ndòo e nɨ mɨ̀tɨ̀ŋnə̀ ndèrə̀ a nkaʼà pɨ̀soyì.

¹¹A pə nɨ ɨ̀twuʼə̀ nɨ ɨ paatə̀nə, Ndòʼnə̀mbyə̂ a təəmə̀ a nɨ̀pwùnə Pàolò nshwəŋə̀ ambo ze lo, “Ẅìimə̀ ntɨŋmə̀! Tsaʼnə wə̀ shwəŋə̀nə mbə̀ʼə mə̀ a Yèrusalèmə̀ la, wə̌ kɨ lèrə̀ a àlaʼà Romə̀ kɨ shwəŋə̀ tyìʼə̀ a lenə.”

¹²Njyə̂ ɨ̀ lə̀ laanə̀ pɨ̀Jew pɨ̀tse pòmpə̀ a taʼà alyiʼə ndòo àkwàŋə̀ ntsə̀əmə̀ lo mbə̀ʼə pobə zɨghə̀ kə̀ nnô a ghobə àzwuumə̀ àtse apə̀ tə mbyàa njyə̂ nɨ pobə zhwuutə̀nə a Pàolò.

¹³Ngàŋə nchumə zə lə̀ làŋə̀ pànə̀ mɨ̀ghumə̀ nɨ̀kwàa.

¹⁴Pobə lə̀ lèrə̀ ambo pɨ̀fò màʼà Nẅùə̀ pobə pɨ̀lɨ̀ŋmə̂ nshwəŋə̀ lo, “Pəə tsə̀əmə̀ lo ka pəə pə zɨghə̀ a wəə àzwuumə̀ àtse tə pyàa njyə̂ nɨ pəə̌ zhwuutə̀ a Pàolò.”

¹⁵Njiilo pɨghə pɨ Kansèrə̀ tsàa ntwuumə̀ ambo àtwuə̀ pɨ̀soyì yè ẅùunə lo â kẅirə̀ ndòo a Pàolò nshwuʼə̀ ntô nɨ̀ pə̀grə̀ tsaʼa nɨ̀ tàʼà chi tsùŋə̀ zhyə̂ mɨ̀nwùə̀ mbə̀ʼə e. La pəə pə chwuʼtə̀ mbɨ̀ŋmə̀ a nɨ zhwuutə̀ e â pòŋə̀ tô pyàa a nɨ̀ghə̂.

¹⁶La moonə̀ ndyimə Pàolò yi mə̀ngyə̌ yɨ̀ mbyàŋnə̀ à lə̀ zuʼù a mɨnaŋə ghu ngə̀ ntyiʼə̀ nkwuunə̀ amwuə nkaʼà pɨ̀soyì ghu ntiitə̀ a Pàolò.

¹⁷Pàolò à lə̀ tyiʼə̀ nfuŋə̀ a taʼà àtwuə̀ pɨ̀soyì nshwəŋə̀ ambo ze lo, “Lòo a môngwàswùumə̀ wə̀ ndèrə̀ ambo àtwuə̀ pɨ̀soyì yè ẅùunə, a wə̀ nɨ ànwùə̀ àtse nɨ à pɨ tiitə̀ e.”

¹⁸Lenəla, a lòo e ndèrə̀ ambo àtwuə̀ pɨ̀soyì yè ẅùunə za, nshwəŋə̀ ambo ze lo, “Pàolò ngàŋə̀ ɨ̀tsaŋə̀ wa a tɨ nfuŋə̀ mə̀ mbuʼù mbô lo ndòo a môngwàswùumə̀ wə̀ ntô tsirə̀ o ntiinə a wə̀ nɨ ànwùə̀ àtse a nɨ shwəŋə̀ ambo ghò.”

¹⁹Àtwuə̀ pɨ̀soyì a ẅìimə̀ àpô e pobə ze shwùʼtə̀ ndèrə̀ nɨ ndzùmə̀, a pyiitə̀ ambo ze lo, “A ànwùə̀ àkə nɨ wə̀ tàʼnə a nɨ shwəŋə̀ ambo mɨ̀ŋə̀?”

²⁰A kẅùə̀ ambo ze lo, “Pɨ̀Jew pyantə̀ lo pobə̌ ghɨ̀rə̀ wə̀ lòo a Pàolò a ngẅùʼə nkẅirə̀ nshwuʼə̀ tô a Kansèrə̀. Pobə̌ ghɨ̀rə̀ a lenə la pə̀grə̀ pə tsaʼa pobə tàʼà tsùŋə̀ zhyə̂ ànwùə̀ mbə̀ʼə Pàolò.

²¹La kò wə̀ zuʼù o ànwùə̀ nɨ pobə pə nshwəŋə̀ ntiinə pànə̀ pɨ̀tse amwuə pobə ndàŋə̀ mɨ̀ghumə̀ nɨ̀kwàa pə̀ mbanə̀ mmə mbyabə̀ e. Pobə lə̀ tsə̀əmə̀ mə lo mbə̀ʼə pobə zɨghə̀ a ghobə kə̀ nnô a ghobə àzwuumə̀ àtse apə̀ tə mbyàa njyə̂ nɨ pobə ghǎ zhwuutə̀ a Pàolò. Pobə chwuʼtə̀ mbɨ̀ŋmə̀ ɨ̀zobə ntyiʼə̀ mbyabə̀ lo wə̀ pyiimə̀.”

²²Àtwuə̀ pɨ̀soyì za a lə̀ tsàa a môngwàswùumə̀ wa lo a lèrə̀, la nkwàtə̀ e lo, “Kò wə̀ shwəŋə̀ ambo ŋònə̀ ɨ̀tse lo wə̀ shwəŋə̀ ànwùə̀ zə̀ ambo mɨ̀ŋə̀.”

²³A lə̀ tyiʼə̀ nfuŋə̀ ɨ̀twuə̀ pɨ̀soyì ɨ̀pe ɨpaa nshwəŋə̀ ambo pobə lo, “Nɨ̀ chwuʼtə̀ pɨ̀soyì nkɨrə ɨpaa, nɨ pɨ̀soyì nɨ pobə pa nkoʼò pɨləəmə mɨ̀ghumə̀ sàmbaa, nɨ pɨ̀soyì nɨ pobə pa mmàʼà mɨkoŋə nkɨrə ɨpaa. A kɨ pə aŋunə pɨ̀nẅùumə̀ nɨ̀pwùʼə nɨ ɨ̀twuʼə̀, nɨ̀ lèrə̀ a Kàsaryà.

²⁴Nɨ̀ ŋâ pɨləəmə ambo Pàolò a koʼò, nɨ̀ pyabə̀ e tyìʼə̀ ɨ̀shìʼnə̀ ndòo ngə̀ ŋŋâ ambo Felix nɨ a pənə govɨnò.”

²⁵Àtwuə̀ pɨ̀soyì yè ẅùunə za a tyiʼə̀ ŋŋwàʼnə̀ àŋwàʼnə̀ ambo govɨnò Felix lo,

²⁶“Àŋwàʼnə̀ zə a furə̀ ambo mɨ̀ŋə̀ Kladyùsə̀ Lysias, mmə ntô ambo ghò, àtsàarə̀ pɨ̀fò Felix. Ngwə̀ nchàʼtə̀ o

²⁷Pɨ̀Jew lə̀ kô a ŋònə̀ wə̀ mmə ntàʼà zhwuutə̀, la pəə pɨ̀soyì ɨ̀pâ tô nkẅiirə̀ e ntiinə ndə̀ zuʼnə lo a ŋwùə̀ Romə̀.

²⁸Ndə̀ mə ntàʼà zhyə̂ ànwùə̀ nɨ pɨ ẅìimə̀nə e aŋunə ndòo e nshwuʼə̀ ndèrə̀ amwuə Kansèrə̀ ghobə.

²⁹Ndə̀ zəənə̀ lo ànwùə̀ nɨ pɨ lə̀ ẅìimə̀nə e aŋunə a lə̀ pə mbə̀ʼə mbòomə àlaʼà ghobə ka pə e ànwùə̀ nɨ mbə̀ʼə pɨ zhwuutə̀ e kə̀ ntsàa e a ndâ ɨ̀tsaŋə̀.

³⁰La tsaʼnə ndə̀ zuʼnə lo pɨ nùŋə̀ ndzòŋə̀ lo kô e, ndə̀ tyiʼə̀ ntsàa e ambo ghò, nkɨ ntsàa pànə̀ nɨ pobə lə̀ ẅìimə̀nə e nɨ ànwùə̀ nshwəŋə̀ ambo pobə lo pobə tô nshwəŋə̀ ànwùə̀ ghu a mbyə̀ ghò.”

³¹Pɨ̀soyì pa lə̀ ghɨ̀rə̀ tyìʼə̀ tsaʼnə àtwuə̀ àzobə a lə̀ shwəŋə̀nə lo pobə̂ ghɨ̀rə̀, ndòo a Pàolò nɨ ɨ̀twuʼə̀ ghu pobə pɨ pobə lèrə̀ tə mbyàa a Antipatrìsə̀.

³²Njyə̂ ɨ̀ lə̀ laanə̀, pɨ̀soyì nɨ pɨ lə̀ mənə ngyìinə̀ nɨ mɨ̀kwùə̀ kẅirə̀ nkwə̂ mmyàʼtə̀ e ambo pyə̀ nɨ pɨ koʼnə pɨləəmə la lo pobə̂ tyiʼə̀ ndòo e ndòo ndèrə̀ nɨ ẅèrə.

³³Nkwùə̀ nɨ pobə lə̀ pyàanə a Kàsaryà, pobə lə̀ ŋâ a Pàolò pobə àŋwàʼnə̀ ghu ambo govɨnò ghu.

³⁴A fuŋə̀ àŋwàʼnə̀ ghu mbyiitə̀ ambo Pàolò lo, “Wə̀ furə̀ la amwuə ẅèrə pàa àlaʼà?” Tsaʼnə a lə̀ zəənə̀nə lo a furə̀ a Sìlisyà,

³⁵a shwəŋə̀ ambo ze lo, “Ngǎ naŋə̀ ànwùə̀ o nkwùə̀ nɨ pànə̀ nɨ pɨ ẅìimə̀nə o nɨ ànwùə̀ ghǎ tô.” À lə̀ chi nshwəŋə̀ lo pɨ nùŋə̀ e amwuə ntoʼò Heròdə̀ mmə mbyabə̀ e.