Read Pinyin Ɨ̀fàʼà 7 Bible Online

Ɨ̀fàʼà 7 - Pinyin bible

Ɨ̀fàʼà 7

¹Lenəla, àtwuə̀ pɨ̀fò màʼà Nẅùə̀ a pyiitə̀ Stifə̀nə̀ lo, “Lə̌ tsaʼnə a pənə?”

²Stifə̀nə̀ a kẅùə̀ ambo pobə lo, “Pɨlyimə ɨ̀pâ pɨ mbyàŋnə̀ pobə pɨ̀tǎ ɨ̀pâ, Nẅùə̀ wa nɨ à wa ngɨ̀rə̀ mɨ̀nwùə̀ mɨ kə̀ʼnə̀nə la, à lə̀ tô ambo tǎ ɨ̀wə̀ənə̀ ghù ntsàambyə̀ Abràhamə̀ nkwùə̀ nɨ à lə̀ pirə̀nə mmə nchyə̂ a Mesopotamyà zaʼà mbòŋə̀ tô mə chyə̂ a Harànə̀,

³nshwəŋə̀ ambo ze lo ‘Furə̀ mmyàʼtə̀ àlaʼà o pobə pə̀ənə̀ ɨ̀pô, ndèrə̀ amwuə alyiʼə àtse nɨ mbɨ nèrə̀ o.’

⁴Lenəla, à lə̀ furə̀ amwuə àlaʼà pɨ̀Chaldean ndèrə̀ ngə̀ mmə nchyə̂ a Harànə̀. Nkwùə̀ nɨ tǎ ɨghobə à lə̀ kwɨghə̀nə, Nẅùə̀ à lə̀ lòo e nfurə̀ nɨ ze alyiʼə ghu ndòo e ndèrə̀ amwuə àlaʼà nɨ nɨ̀ pə nchyə̂ a ghu tɨ̀tsòŋə̀ lə.

⁵Ka Nẅùə̀ a lə̀ ŋâ e a ye nɨ alyiʼə alyiʼə ghu nɨ a pənə tyìʼə̀ tsaʼa taʼà ntàamə̀. La nkaʼà a nɨ ŋâ ambo ze farə ambo ɨ̀poonə̀ ɨ̀pe. A lə̀ kɨ pə nkwùə̀ ghu nɨ Nẅùə̀ à lə̀ kàʼnə la, Abràhamə̀ a pirə̀ e nɨ moonə̀ tɨ pə.

⁶Nẅùə̀ a shwəŋə̀ ambo ze lo, ‘Ɨ̀poonə̀ ɨ̀pô ghǎ chyə̂ amwuə àlaʼà nɨ ka a pə e àzobə pə̀ŋə̀ tyiʼə̀ ɨ̀pùʼù zəənə̀ ngəʼə̀ aŋunə nguʼu nkɨrə nɨ̀kwàa.

⁷La mbɨ chyâ ɨ̀sàʼa aŋunə àlaʼà za nɨ pobə pa nfàʼà ambo pobə la. Nkwùə̀ kɨ làŋə̀, pobə furə̀ ntô mbìʼnə̀ a nɨ ghuʼtə̀ mə̀ a nɨ̀ghə̂.’

⁸Nẅùə̀ a shwəŋə̀ ambo Abràhamə̀ lo â pìʼnə̀ a nɨ zə̀ərə̀ ɨ̀poonə̀ ɨ̀pe, njiilo a pə tsaʼa àlènə̀ aŋunə ɨ̀kàanə̀ ɨ̀ghobə. Lenəla, Abràhamə̀ à lə̀ zə̀ərə̀ a Isàkə̀, nɨ à lə̀ pənə tsaʼa tàʼà ngàbə̀ a àpô; Isàkə̀ a zə̀ərə̀ moonə̀ e Yàkobə̀; Yàkobə̀ a tyiʼə̀ ndzə̀ərə̀ ɨ̀poonə̀ ɨ̀pe ntsòbə̀ ɨpaa.

⁹“Ɨ̀poonə̀ pɨ Yàkobə̀ lə̀ pìʼnə̀ a nɨ ghə̀ʼnə̀ a Jòsebə̀, nshwùunə̀ e tsaʼa àpùʼù amwuə àlaʼà Egypt. La Nẅùə̀ a lə̀ pə pobə ze,

¹⁰ndòo e nfurə̀ amwuə ngəʼə̀ za ntsùmə̀. Nkwùə̀ nɨ Jòsebə̀ à lə̀ tônə a mbyə̀ Ferò nɨ à lə̀ pənə ɨ̀fò àlaʼà Egypt, Nẅùə̀ à lə̀ ŋâ e nɨ àzhìʼtə̀ yè noʼnə, nkɨ nchi ngɨ̀rə̀ lo Ferò a kòŋə̀ e. Ferò à lə̀ tə̂ a Jòsebə̀ àtwuə̀ àlaʼà farə amwuə ntoʼò.

¹¹A lə̀ kɨ pə nkwùə̀ ɨ̀tse ndzàŋə̀ ɨ̀ kwuunə̀ amwuə àlaʼà Egypt ngə̀ mbyàa a Kanàanə̀. Ànwùə̀ zə a lə̀ lòo ngəʼə̀ yɨ̀noʼnə ntô nɨ zèrə; ka pɨ̀tǎ pə̀ənə̀ chi mbə e nɨ mɨ̀zɨghə̀ nɨ mbə̀ʼə pobə zɨghə̀.

¹²Nkwùə̀ nɨ Jòsebə̀ à lə̀ zuʼnə lo nkẅùə̀ zhyə̀ àlaʼà Egypt, à lə̀ twuumə̀ ɨ̀poonə̀ ɨ̀pe nɨ lə̀ pənə pɨ̀tǎ ɨ̀pə̀ənə̀ lo pobə̂ lèrə̀ àlaʼà Egypt aŋunə ntsàambyə̀ nkwùə̀ ɨzobə.

¹³Nkwùə̀ nɨ pobə kẅirə̀nə ngə̀ a Egypt, Jòsebə̀ à lə̀ ghɨ̀rə̀ pobə zhyə̂ e tsaʼa ndyimə ɨghobə; Ferò a kɨ nfurə̀ aŋunə nzhyə̂ ngẅàrə̀ Jòsebə̀.

¹⁴Jòsebə̀ à lə̀ tsàa ntwuumə̀ lo tǎ ɨghobə Yàkobə̀ â tô pobə ngẅàrə̀ e ntsùmə̀. Pànə̀ mɨ̀ghumə̀ sàmbaa ntsòbə̀ ɨtaanə̀ lə̀ kwuunə̀ amwuə àlaʼà Egypt.

¹⁵Lə̌ tsaʼnə Yàkobə̀ à lə̀ shwuʼnə ndèrə̀ àlaʼà Egypt nkwɨghə̀ ghu pobə pɨ̀tǎ ɨ̀pəənə̀.

¹⁶Tsaʼnə pobə lə̀ kwɨghə̀nə, pɨ lə̀ lòo ɨ̀kwuə̀ ɨ̀pobə ngə̀ ntẅəŋə̀ a Shechèmə̀ amwuə nɨ̀shyə̀ nɨ Abràhamə̀ à lə̀ zwuunə̀nə ambo ɨ̀poonə̀ pɨ Hamòrə̀.

¹⁷“La tsaʼnə nkwùə̀ ɨ̀ lə̀ kɨnə nkùʼnə̀ ambo Nẅùə̀ a nɨ ghɨ̀rə̀ ànwùə̀ nɨ à lə̀ kàʼnə pobə Abràhamə̀, ngẅàrə̀ e ɨ̀ lə̀ kẅuə̀ nnoʼò amwuə àlaʼà Egypt,

¹⁸tə mbyàa nkwùə̀ nɨ ɨ̀fò ghù nyàanə nɨ ka à lə̀ zhyə̂ e a Jòsebə̀ à lə̀ zɨghə̀nə aləŋə.

¹⁹Ɨ̀fò wə̀ à lə̀ mə ŋŋâ ngəʼə̀, nfuukə̀ pə̀ənə̀ ɨ̀pə̀ənə̀, nnyìimə̀ pɨ̀tǎ pɨ̀tǎ ɨ̀pə̀ənə̀ lo pobə̂ lyàa ɨ̀poonə̀ mmàʼtə̀ a àpyìinə mbə̀ʼə pèrə kwɨkə̀.

²⁰Lə lə̀ pə nkwùə̀ nɨ pɨ lə̀ pyə̂nə Mǔsî, a pə moonə̀ mbòŋə̀ a mbyə̀ Nẅùə̀, pɨ nyoŋə̀ e a ndâ tǎ ɨghobə aŋunə ŋwɨgrə̀ ɨtarə.

²¹Nkwùə̀ nɨ pɨ lə̀ kɨnə ngwaʼà e a àpyìinə, moonə̀ Ferò ghu mə̀ngyə̌ à lə̀ lòo e tsaʼa moonə̀ e, ntwuʼtə̀ e à tyiʼə̀ nfaŋə̀ pobə ze.

²²Mǔsî à lə̀ lanə̀ pɨ̀mbòomə pɨ Egypt pɨ̀tsùmə̀, nkɨ mbə ŋònə̀ ntɨ̀ŋnə̀ aŋunə mɨ̀nwùə̀ nɨ a lə̀ mənə nshwəŋə̀ nkɨ mmə ngɨ̀rə̀.

²³“Nkwùə̀ nɨ Mǔsî à lə̀ pənə nguʼu mɨ̀ghumə̀ nɨ̀kwàa, àkwàŋə̀ e a lə̀ nèrə̀ lo â ghə̀ nkarə̀ pɨlyimə ɨ̀pe pànə̀ pɨ Israel.

²⁴À lə̀ zəənə̀ tsaʼnə ŋwùə̀ Egypt à lə̀ pənə mbuʼù a taʼà ndyimə e ghùtse. Lenəla, a zùŋə̀ nkwuunə̀ amwuə mɨ̀làʼà mɨ̀ghu nzhwuutə̀ a ŋwùə̀ Egypt ghu a nɨ kẅuə̀ ànwùə̀ nɨ à tənə ngɨ̀rə̀ aŋunə ndyimə e.

²⁵Mǔsî à lə̀ pə nkwàŋə̀ lo pɨlyimə ɨ̀pe zhyə̂ lo Nẅùə̀ à wə̀ ntàʼà lo fuukə̀ a ghobə amwuə ngəʼə̀, la ka pobə zhyə̂ a ghobə.

²⁶Njyə̂ ɨ lə̀ laanə̀ Mǔsî a tô ntsirə̀ mbyàŋnə̀ Israel ɨpaa pobə mə ndzòŋnə̀, a tàʼà a nɨ shwàatə̀ a ghobə nshwəŋə̀ lo, ‘Pɨghə la pɨlyimə; a ghɨ̀rə̀ àkə nɨ̀ tyiʼə̀ mmə ndzòŋnə̀ ɨ̀pɨ̀ŋmə̀ ɨ̀zɨghə?’

²⁷“La ŋònə̀ nɨ à lə̀ pənə ntàʼà ɨ̀sàʼa aŋunə ndyimə e a tinə̀ a Mǔsî ntsàa a nɨ̀pwùnə, mbyiitə̀ ambo ze lo, ‘A tsoʼò ɨ̀wə̌ ntsoʼò o lo wə̀ pə àtwuə̀ pəə nnaŋə̀ ɨ̀sàʼa ɨ̀wəə.

²⁸Wə̀ tàʼà zhwuutə̀ mə̀ tsaʼnə wə̀ lə̀ zhwuutə̀nə a ŋwùə̀ Egypt wa ɨ̀zòonə la?’

²⁹Tsaʼnə Mǔsî à lə̀ zuʼnə a lenə la, à lə̀ kɨ̀ɨrə̀ ndèrə̀ ngə̀ mmə nchyə̂ a Midian aŋunə nkwùə̀ ɨ̀tse nɨ à lə̀ tyiʼnə mbə tǎ pɨ ɨ̀poonə̀ pɨpaa.

³⁰“Nguʼu mɨ̀ghumə̀ nɨ̀kwàa lə̀ làŋə̀, angèrə̀ a tô ambo Mǔsî amwuə ɨ̀mǔ nɨ ɨ lə̀ pənə nkɨrə̀ amwuə mbyiinə̀ alyiʼə waakə a nɨ̀pwùnə mbarə̀ Sinai.

³¹Nkwùə̀ nɨ Mǔsî a lə̀ zəənə̀nə a lenə la, ànwùə̀ ghu a lə̀ kə̀ʼnə̀ e, a ghə̀ mbaatə̀ lo tsùŋə̀ zəənə̀, ndzuʼù ngyə̀ Ndòʼnə̀mbyə̂ ɨ̀ shwəŋə̀ lo,

³²‘A mɨ̀ŋə̀ Nẅùə̀ pɨ̀tǎ ɨ̀pô, Nẅùə̀ Abràhamə̀ nɨ Isàkə̀ pobə Yàkobə̀.’ Mǔsî à lə̀ pə nɨ àkẅàrə̀ ntyiʼə̀ mmə ngwùrə̀ ka chi pə e nɨ ɨ̀tɨ̀ŋnə̀ a nɨ naŋə̀.

³³Ndòʼnə̀mbyə̂ a shwəŋə̀ ambo ze lo, ‘Tsoʼtə̀ ɨtabə ɨ̀pô, ntiinə alyiʼə nɨ wə̀ təəmə̀nə ghu la alyiʼə yè laanə̀nə.

³⁴Ǹnaŋə̀ ndzəənə̀ nkǔŋə nkuŋə tsaʼnə pə̀ənə̀ ɨ̀pâ pyə̀ ndzəənə̀ ngəʼə̀ a àlaʼà Egypt, nkɨ ndzuʼù tsaʼnə pobə pyə̀ nchwùunə̀, ntyiʼə̀ nshwuʼə̀ ntô a nɨ fuukə̀ a ghobə amwuə ngəʼə̀. Njiilo wə̀ tô n̂twuumə̀ o a Egypt.’

³⁵“Lə̌ Mǔsî wa nɨ pobə lə̀ twuunə̀nə mbyiitə̀ e lo, ‘A ghò a tsoʼò ɨ̀wə̌ lo wə̀ tô mbə àtwuə̀ pəə nsaʼà mɨ̀sàʼa ɨ̀məə?’ La ze nɨ Nẅùə̀ à tsàanə lo â tô mbə àtwuə̀ pə̀ənə̀ ɨ̀pe nfuukə̀ a ghobə amwuə ngəʼə̀, tsaʼnə angèrə̀ à lə̀ shwəŋə̀nə amwuə mbyiinə̀ nɨ ɨ̀ lə̀ mənə nkɨrə̀.

³⁶Mǔsî à lə̀ fuukə̀ a ghobə amwuə àlaʼà Egypt. À lə̀ ghɨ̀rə̀ mɨ̀nwùə̀ mɨ̀kə̀ʼnə̀nə amwuə àlaʼà Egypt ghobə nchyə ghu nɨŋnə̀nə yɨ̀ pàŋə̀nə farə amwuə alyiʼə waakə aŋunə nguʼu mɨ̀ghumə̀ nɨ̀kwàa.

³⁷Lə̌ Mǔsî wa nɨ à lə̀ shwəŋə̀nə ambo pànə̀ pɨ Israel lo Nẅùə̀ à ghǎ tsàa wɨghə nɨ ngàŋə̀ ntwuumə̀ e ghùtse nɨ à pənə ndyimə ɨwɨghə tsaʼnə à tsàanə mə̀ lə.

³⁸Lə̌ ze wa nɨ à lə̀ pənə pobə pànə̀ pɨ Israel, pobə pɨ pobə shwatə̀ alyiʼə waakə mbə alyiʼə ghu pobə pɨ̀tǎ pɨ̀tǎ ɨ̀pə̀ənə̀ nɨ angèrə̀ wa nɨ à lə̀ shwəŋə̀nə ambo ze aŋunə mbarə̀ Sinai, a tyiʼə̀ nkẅiirə̀ ntwuumə̀ Nẅùə̀ wa nɨ ɨ ghoŋə̀nə nɨ nkuŋə̀ la ntô ŋŋâ ambo pəə.

³⁹“La pɨ̀tǎ pɨ̀tǎ ɨ̀pəənə̀ ntwuunə̀ a ghobə a nɨ zuʼnə̀ e, ntinə̀ e ntsàa a nɨ̀pwùnə ntyiʼə̀ nkòŋə̀ a nɨ kẅirə̀ ndèrə̀ a ghobə àlaʼà Egypt.

⁴⁰Lenəla, nshwəŋə̀ ambo Erònə̀ lo, ‘Tsùŋə̀ a wəə nɨ pɨ̀nẅùə̀ pɨ̀tse nɨ pɨ̌ lòo a wəə nɨ àlàŋə. Ka pəə zhyə̂ wəə ànwùə̀ nɨ a ghɨ̀rə̀nə a Mǔsî wa nɨ à lə̀ fuukə̀nə a wəə amwuə àlaʼà Egypt.’

⁴¹Lə lə̀ pə nkwùə̀ nɨ pobə lə̀ tsùŋə̀nə a tɨtoo a shwuə̀ moonə̀ nyàamə̀, ntyiʼə̀ mbìʼnə̀ a nɨ ghaʼà aŋunə àzwuumə̀ nɨ pobə tsùŋə̀nə nɨ mbô ɨ̀mobə.

⁴²La Nẅùə̀ à lə̀ tumə̀ ndzùmə̀ e ŋŋâ ambo pobə, myàʼtə̀ a ghobə lo pobə tyiʼə̀ nguʼtə̀ pɨsaŋə a nɨ̀pwuurə̀ tsaʼnə pɨ ŋwàʼnə̀nə amwuə àŋwàʼnə̀ ngàŋə̀ ntwuumə̀ Nẅùə̀ lo: ‘Pànə̀ pɨ àlaʼà Israel! ka a lə̀ pə e la ambo mɨ̀ŋə̀ nɨ nɨ̀ lə̀ wàrə̀nə mə̀ mɨ̀nyàamə̀ mmàʼà ɨ̀shyə̂ ghu amwuə àlaʼà waakə.

⁴³Nɨ̀ lə̀ pìʼì la àzuŋə̀ Nẅùə̀ Molèkə̀ pobə saŋə nẅùə̀ ɨwɨghə Refànə̀; à lə̀ pə pɨ̀tɨtoo ɨ̀pɨghə nɨ nɨ̀ lə̀ tsùŋə̀nə a nɨ ghuʼtə̀. Lenəla, mbɨ kantə̀ wɨghə nɨ̀ yìinə̀ tə ndàŋə̀ a Babilònə̀.’

⁴⁴“Pɨ̀tǎ pɨ̀tǎ ɨ̀pə̀ənə̀ lə̀ pə nɨ àzuŋə̀ nɨ a lə̀ mənə nkẅempə̀ a ghobə lo Nẅùə̀ à wə̀ pobə pɨ pobə alyiʼə waakə. Pobə lə̀ tsùŋə̀ a zèrə amwuə ndwuumə̀ nɨ Nẅùə̀ à lə̀ tiitə̀nə a Mǔsî lo â tsùŋə̀.

⁴⁵Nkwùə̀ lə̀ kɨ làŋə̀, pɨ̀tǎ pɨ̀tǎ ɨ̀pəənə̀ kẅiirə̀ àzuŋə̀ zə̀ ambo pɨ̀tǎ ɨ̀pobə, mbìʼì a zèrə nkwùə̀ nɨ pobə lə̀ pənə ngyìinə̀ pobə pɨ Joshua, mmə nkẅiirə̀ ɨlyiʼə ɨ̀shyə̂ ambo ɨ̀laʼà nɨ Nẅùə̀ à lə̀ mənə nkantə̀ tsaʼnə pobə lə̀ pənə ntô. Lenəla, àzuŋə̀ ghu a ghoŋə̀ ambo pobə tə mbyàa nkwùə̀ ɨ̀fò Dàfirə̀.

⁴⁶Dàfirə̀ a lə̀ kẅiirə̀ mborə̀ Nẅùə̀, ntyiʼə̀ mbyiitə̀ a Nẅùə̀ Yàkobə̀.

⁴⁷La ndâ Nẅùə̀ ghu a lə̀ tô nkorə̀ Solomònə̀.

⁴⁸“La ka Nẅùə̀ Àkoʼntsirə̀ a chyə̂ e amwuə ndâ nɨ ŋwùə̀ mɨsoŋə a korə̀nə, tsaʼnə àŋwàʼnə̀ Nẅùə̀ a shwəŋə̀nə lo:

⁴⁹‘Ndòʼnə̀mbyə̂ à shwəŋə̀ lo, alyiʼə nɨ̀fò mə̀ a chyə̂ a nɨ̀pwuurə̀. Àtwuə̀ ɨ̀shyə̂ a tyiʼə̀ mbə alyiʼə nɨ ǹtə̂nə mɨ̀kwùə̀ ɨ̀mâ ghu. A zèrə mbuurə̀ ndâ nɨ mbə̀ʼə nɨ̀ korə̀ ambo mɨ̀ŋə̀? Alyiʼə nɨ mbə̀ʼə nchyə̂ ghu a chyə̂ alyiʼə àkə?

⁵⁰Ka la tsùŋə̀ e mɨ̀ŋə̀ tsùŋə̀ ɨ̀pwuumə̀ pə̀ ntsùmə̀?’

⁵¹“Pɨghə ngàŋə àtɨ̀ŋnə̀ àtwuə̀, nɨ mɨ̀ntɨŋmə̀ nɨ mèrə ma ka kẅiirə̀ e ntwuumə̀ Nẅùə̀, pobə mɨtugrə nɨ mèrə ma ka zuʼù e ntwuumə̀ Nẅùə̀! Nɨ̀ kɨ mbə pə tsaʼa pɨ̀tǎ ɨ̀pɨghə mmə ntwuunə̀ a wɨghə Àzhwùə̀ Nẅùə̀!

⁵²Ngàŋə̀ ntwuumə̀ Nẅùə̀ ghùtse à lə̀ pə ghu nɨ ka pɨ̀tǎ pɨ̀tǎ ɨ̀pɨghə lə̀ ŋâ e a ye nɨ ngəʼə̀? Pobə lə̀ zhwuutə̀ ngàŋə ntwuumə̀ Nẅùə̀ za nɨ lə̀ zàamə̀ nshwəŋə̀ lo, ẅùə̀ wa nɨ ngɨ̀rə̀ ɨ̀nwùə̀ ɨ̀ze təəmə̀nə la a wə̀ ntô. Nɨ̀ kùmə̀ shwùunə̀ e nkɨ nzhwuutə̀ e.

⁵³A chyə̂ pɨghə nɨ mbòomə Nẅùə̀ nɨ pəngèrə̀ lə̀ tônə ŋŋâ, la ka mə nùŋə̀ a wɨghə a ẅèrə!”

⁵⁴Ngàŋə̀ Kansèrə̀ lə̀ zuʼù ànwùə̀ nɨ Stifə̀nə̀ à lə̀ shwəŋə̀nə la a zaŋə̀ a ghobə ka mɨ̀zùŋə, pobə tyiʼə̀ nkwurə̀ mɨsoŋə ɨ̀mobə mbə̀ʼə e.

⁵⁵La Stifə̀nə̀ nɨ ntɨŋmə̀ e ɨ lə̀ lẅenə̀nə nɨ Àzhwùə̀, à lə̀ pə̀ʼkə̀ àtwuə̀ e nnaŋə̀ nɨ̀pwuurə̀ ndzəənə̀ a nɨ̀faŋə̀ Nẅùə̀, nkɨ ndzəənə̀ a Yěsû a təəmə̀ a pàa àpô Nẅùə̀ yè zɨghə̀nə.

⁵⁶Stifə̀nə̀ a zəənə̀ a lenə la, ntyiʼə̀ nshwəŋə̀ lo, “Nɨ̀ zəənə̀, ǹdzəənə̀ nɨ̀pwuurə̀ nɨ pə tsɨ̀ nyaʼkə̀nə, nkɨ ndzəənə̀ a Moonə̀ Ŋwùə̀ a təəmə̀ a pàa àpô Nẅùə̀ yè zɨghə̀nə!”

⁵⁷Nkwùə̀ nɨ pobə lə̀ zuʼnə ànwùə̀ zə la, pobə lə̀ kyiinə̀ nɨ ɨ̀tɨ̀ŋnə̀ ndòo mbô ɨ̀mobə ngwùʼtə̀ mɨtugrə ɨ̀mobə nkɨ̀ɨrə̀ ngə̀ ndzuŋə̀ aŋunə ze,

⁵⁸nsùŋə̀ e nfurə̀ amwuə àlaʼà gha ntyiʼə̀ ntumpə̀ e nɨ mɨ̀ghòorə nzhwuutə̀. Pànə̀ pɨ̀ghu nɨ pɨ lə̀ pənə alyiʼə ghu lə̀ sòtə̀ ɨtsəʼə ɨ̀pobə nnùŋə̀ a mbyə̀ môngwàswùumə̀ nɨ pɨ lə̀ mənə nfuŋə̀ nɨ Saul.

⁵⁹Tsaʼnə pobə lə̀ pənə ntumpə̀ a Stifə̀nə̀, à lə̀ chàʼtə̀ a Nẅùə̀ nshwəŋə̀ lo, “Ndòʼnə̀mbyə̂ Yěsû, lòo ntɨŋmə̀ mə̀.”

⁶⁰Nkẅiʼtə̀ a ɨ̀shyə̂ nkyiinə̀ nɨ ngyə̀ ntɨ̀ŋnə̀ nshwəŋə̀ lo, “Ndòʼnə̀mbyə̂, kò wə̀ ghɨ̀rə̀ a tɨ̀pòŋə̀ wə̀ a pə àtwuə̀ pobə.” Tsaʼnə à lə̀ shwəŋə̀nə a lenə la, à lə̀ zùŋə̀ nkwɨghə̀.