Read Pinyin Ɨ̀fàʼà 8 Bible Online

Ɨ̀fàʼà 8 - Pinyin bible

Ɨ̀fàʼà 8

¹Saul à lə̀ kɨ mbyiimə̀ àze lo pɨ̀ zhwuutə̀ a Stifə̀nə̀. A nɨ pìʼnə̀ njyə̂ ghu pɨ pìʼnə̀ a nɨ tòmnə̀ àshwatə̀ ɨ̀poonə̀ pɨ Kristù. Pobə pɨ̀tsùmə̀ lə̀ sìimə̀ ndèrə̀ amwuə àlaʼà Judyà pobə Sàmariyà ntyiʼə̀ mmyàʼtə̀ tyìʼə̀ ngàŋə ntwuumə̀ Yěsû.

²Pɨ̀tse pànə̀ nɨ pɨ lə̀ pyiimə̀nə a Nẅùə̀ lə̀ tẅəŋə̀ àkwuə̀ Stifə̀nə̀ ntyiʼə̀ ngyìi nɨ̀wɨghə̀ ɨ̀tse ka mɨ̀zùŋə.

³La Saul à lə̀ tàʼà pə lo kɨ pyaatə̀ àshwatə̀ ɨ̀poonə̀ pɨ Kristù tyìʼə̀ pyaatə̀nə. À lə̀ kwuunə̀ amwuə ndâ nfurə̀ nkwuunə̀ a zhyə̀ nfuukə̀ mbyàŋnə̀ pobə pə̀ngyə̌ ndòo ngə̀ nchyâ a ndâ ɨ̀tsaŋə̀.

⁴Ɨ̀poonə̀ pɨ Kristù pa nɨ pɨ lə̀ sìimə̀nə la lə̀ tyiʼə̀ nchwìitə̀ ntwuumə̀ ghù ɨ̀shìʼnə̀ wə̀ alyiʼə àtsùmə̀ nɨ pobə lə̀ mənə ndèrə̀.

⁵Filibə̀ à lə̀ shwuʼə̀ ndèrə̀ a Sàmariyà ntyiʼə̀ nchwìitə̀ ntwuumə̀ ghù ɨ̀shìʼnə̀ mbə̀ʼə Ghù Ndzoʼnə wa.

⁶Àpùŋə̀ pə̀ənə̀ nɨ a lə̀ pənə alyiʼə ghu a lə̀ zhwiʼtə̀ nkɨ ndzəənə̀ ɨ̀lènə̀ mɨ̀nwùə̀ pɨ̀yerə̀nə yerə̀nə nɨ Filibə̀ à lə̀ ghɨ̀rə̀nə nkɨ mbyiimə̀ ànwùə̀ nɨ à lə̀ shwəŋə̀nə nɨ ntɨŋmə̀ ɨ̀ghobə ɨ̀tsùmə̀

⁷Ɨ̀zhwùə̀ tɨ̀pòŋə̀ nɨ lə̀ pənə amwuə mɨ̀pùmə̀ mɨ pə̀ənə̀ lə̀ tyiʼə̀ nkyiinə̀ nfutə̀. Pànə̀ pɨ̀noʼnə nɨ pɨ̀pàa pɨ mbɨ̀ŋmə̀ ɨ̀pobə kwɨkə̀nə nɨ pɨ̀kɨkə̀ghə lə̀ tɨ̀ŋnə̀.

⁸Lenəla nɨ̀ghaʼà yɨ̀noʼnə à lə̀ pə amwuə àlaʼà Sàmariyà.

⁹Ŋònə̀ ɨ̀tse à lə̀ pə ghu nɨ à lə̀ pyə̀nə mmə nkwabə̀ àngaamə ngɨ̀rə̀ mɨ̀nwùə̀ mɨ kə̀ʼnə̀nə, mbə̀ŋə̀ ɨ̀twuə̀ pànə̀ pɨ̀tsùmə̀ a àlaʼà Sàmariyà nshwəŋə̀ lo, ze la ŋònə̀ ntɨ̀ŋnə̀.

¹⁰Pànə̀ pɨ̀tsùmə̀ amwuə mbòmpə àlaʼà zə̀ a nɨ pìʼnə̀ aŋunə pànə̀ pɨ̀kɨ̂ tə ngə̀ mbyàa aŋunə pànə̀ pɨ̀ẅùunə lə̀ pyiimə̀ ànwùə̀ e nshwəŋə̀ lo, “Ŋònə̀ wə̀ a mɨ̀tɨ̀ŋnə̀ mɨ Nẅùə̀ nɨ pɨ pa nfuŋə̀ nɨ ‘Mɨ̀tɨ̀ŋnə̀ Mɨ̀ẅùunə.’”

¹¹Pobə lə̀ pyiimə̀ ànwùə̀ nɨ à lə̀ mənə nshwəŋə̀ ntiinə à lə̀ pə̀ŋə̀nə ɨ̀twuə̀ ɨ̀pobə aŋunə ntyə̌ sàa nɨ ɨ̀nwùə̀ nɨ̀kàŋə̀ ɨ̀pe.

¹²La nkwùə̀ nɨ pobə lə̀ zuʼnə nkɨ mbyiimə̀ ntwuumə̀ ghù ɨ̀shìʼnə̀ nɨ Filibə̀ a lə̀ pənə nchwìitə̀ mbə̀ʼə ànwùə̀ Nɨ̀fò Nẅùə̀ nɨ nɨ̀linə̀ nɨ Yěsû, pobə pɨ̀tsùmə̀ lə̀ kẅiirə̀ nchyə, mbyàŋnə̀ pobə pə̀ngyə̌.

¹³Shimùnə̀ àtwuə̀ ɨ̀pɨ̀ŋmə̀ e à lə̀ pyiimə̀ ntwuumə̀ ghù ɨ̀shìʼnə̀ wə̀ nkɨ nkẅiirə̀ nchyə. À lə̀ mə ndzùŋə̀ a Filibə̀ alyiʼə àtsùmə̀ nɨ à lə̀ mənə ndèrə̀ ndzəənə̀ ɨ̀lènə̀ ɨ̀nwùə̀ nɨ mɨ̀nwùə̀ mɨ yerə̀nə yerə̀nə nɨ à lə̀ mənə ngɨ̀rə̀ mɨ tyiʼə̀ nkə̀ʼnə̀ e.

¹⁴Nkwùə̀ nɨ ngàŋə ntwuumə̀ Yěsû Kristù a Yèrusalèmə̀ lə̀ zuʼnə lo pànə̀ pɨ Sàmariyà pyiimə̀ àshwəŋnə̀ Nẅùə̀, pobə lə̀ tsàa a Pità pobə Jònə ambo pobə.

¹⁵Tsaʼnə pobə Jònə lə̀ shwuʼnə ghu la, pobə lə̀ chàʼtə̀ a Nẅùə̀ mbə̀ʼə pobə̂ kẅiirə̀ Àzhwùə̀ Nẅùə̀,

¹⁶ntiinə Àzhwùə̀ Nẅùə̀ a lə̀ pirə̀nə e tɨ tô aŋunə pobə, pɨ lə̀ ŋâ a ghobə pə nɨ ndàʼà àkẅiirə̀ nchyə aŋunə nɨ̀linə̀ nɨ Ndòʼnə̀mbyə̂ Yěsû.

¹⁷Pità pobə Jònə lə̀ nùŋə̀ mbô ɨ̀mobə àtwuə̀ pobə, pobə kẅiirə̀ Àzhwùə̀ Nẅùə̀.

¹⁸Shimùnə̀ à lə̀ zəənə̀ lo Àzhwùə̀ Nẅùə̀ a lə̀ tô aŋunə pobə la tsaʼa ngàŋə ntwuumə̀ Yěsû lə̀ nùŋə̀nə mbô ɨ̀mobə aŋunə pobə, ŋŋâ nkabə̀ ambo Pità pobə Jònə,

¹⁹nshwəŋə̀ lo, “Nɨ̀ kɨ ŋŋâ mə̀ nɨ ɨ̀tɨ̀ŋnə̀ wə̀ njiilo ŋònə̀ nɨ ǹnùŋə̀nə mbô ɨ̀mâ àtwuə̀ ze ǎ kẅiirə̀ Àzhwùə̀ Nẅùə̀ zə̀.”

²⁰La Pità a shwəŋə̀ ambo ze lo, “Lèrə̀ ngə̀ nkwɨghə̀ pɨghə pɨ nkabə̀ o! Wə̀ kwàŋə̀ lo mbə̀ʼə wə̀ zwuunə̀ àzwuumə̀ nɨ Nẅùə̀ a ŋânə nɨ nkabə̀?

²¹Ka wə̀ pə o nɨ ànwùə̀ àtse a nɨ ghɨ̀rə̀ amwuə àfàʼà zèrə zə ntiinə ka ntɨŋmə̀ o ɨ laanə̀ e a ɨ̀myə̂ Nẅùə̀.

²²Lenəla, pə̀ŋə̀ ntɨŋmə̀ o ngwaʼà a tɨ̀pòŋə̀ o wə̀, nchàʼtə̀ a Nẅùə̀ ndoonə̀ ambo Ndòʼnə̀mbyə̂ lo mbə̀ʼə â lə̀ənə̀ o aŋunə ànwùə̀ tsaʼa zə̀ nɨ wə̀ kwàŋə̀nə la,

²³ntiinə ǹdzəənə̀nə lo ntɨŋmə̀ o ɨ wə̀ ndẅenə̀ nɨ àghə̀ʼnə̀, ɨ̀nwùə̀ tɨ̀pòŋə̀ ɨ̀pô tyiʼə̀ nkorə̀ o tsaʼa ngàŋə̀ ɨ̀tsaŋə̀.”

²⁴Shimùnə̀ a kẅùə̀ ambo pobə lo, “A pòŋə̀ lo a chàʼtə̀ pɨghə nchàʼtə̀ a Nẅùə̀ àtwuə̀ mɨ̀ŋə̀ lo kò taʼà ànwùə̀ wə̀ ghùtse moʼo nɨ nɨ̀ tənə nshwəŋə̀ la a ẅìimə̀ mə̀.”

²⁵Nkwùə̀ nɨ pobə lə̀ shwəŋə̀nə mɨ̀nwùə̀ mɨ Ndòʼnə̀mbyə̂ nkɨ nchwìitə̀ ntwuumə̀ e, pobə lə̀ kẅirə̀ ndèrə̀ a Yèrusalèmə̀, mmə ngyìinə̀ nchwìitə̀ ntwuumə̀ ghù ɨ̀shìʼnə̀ wə̀ amwuə ɨ̀laʼà Sàmariyà pɨ̀noʼnə.

²⁶Nkwùə̀ nɨ Pità pobə Jònə lə̀ pənə nchwìitə̀ ntwuumə̀ Ndòʼnə̀mbyə̂ amwuə ɨ̀laʼà Sàmariyà la, angèrə̀ Ndòʼnə̀mbyə̂ a lə̀ shwəŋə̀ ambo Filibə̀ lo, “Lòo a ɨ̀shyə̂ nshwuʼə̀ ndèrə̀ amwuə àlàŋə za nɨ a furə̀nə Yèrusalèmə̀ mmə ndèrə̀ a Gaza.” (Àlàŋə zə lə̀ pə àlàŋə nɨ ka pɨ̀ lə̀ pirə̀ mmə ndàŋə̀ e amwuə.)

²⁷Filibə̀ à lə̀ lòo a ɨ̀shyə̂ mmə ndèrə̀, ndzəənə̀ a ŋwùə̀ Ètopyà ɨ̀tse nɨ à lə̀ pənə ntsɨ̀ntoʼò ghù ngẅùunə nkɨ mmə ndòʼnə̀ nkabə̀ ambo ɨ̀fò Ètopyà ghu mə̀ngyə̌ nɨ nɨ̀linə̀ ɨ̀tse lə̀ pənə Kandàsə̀. Ŋònə̀ wə̀ à lə̀ lèrə̀ a Yèrusalèmə̀ a nɨ ghuʼtə̀ a Nẅùə̀,

²⁸ntyiʼə̀ nkẅirə̀ mmə nkwə̂ e, nnwuunə̀ amwuə kalɨgə̀ e mmə nfuŋə̀ àŋwàʼnə̀ ngàŋə̀ ntwuumə̀ Nẅùə̀ Ìsayà.

²⁹Àzhwùə̀ Nẅùə̀ a shwəŋə̀ ambo Filibə̀ lo, “Koʼò ngə̀ mbaatə̀ a kalɨgə̀ wa.”

³⁰Lenəla, Filibə̀ a kɨ̀ɨrə̀ ngə̀ mbaatə̀ ndzuʼù tsaʼnə à mənə nfuŋə̀ àŋwàʼnə̀ ngàŋə̀ ntwuumə̀ Nẅùə̀, mbyiitə̀ e lo, “Wə̀ fuŋə̀ lə mmə nzhyə̂ ànwùə̀ nɨ wə̀ wə̀ nfuŋə̀?”

³¹A kẅùə̀ ambo ze lo, “Ŋònə̀ ɨ̀tse à tə ngoŋə̀ e tɨ tiitə̀ mə̀, ǹtyiʼə̀ nzhyə̂ àzâ la ɨghə?” A shwəŋə̀ a lenə la nfuŋə̀ a Filibə̀ lo â koʼò nnwuunə̀ pobə ze amwuə kalɨgə̀.

³²Alyiʼə àŋwàʼnə̀ Nẅùə̀ nɨ à lə̀ mənə nfuŋə̀ la a lə̀ pə nshwəŋə̀ lo, “À lə̀ pə tsaʼa mbyə̂ ndzìrə̀ nɨ pɨ lòonə ngə̀ nzhwuutə̀, kə̀ tsaʼa mômbyə̂ ndzìrə̀ nɨ pɨ pənə nkoomə̀ mɨ̀nyùŋə̀ ɨ̀me ka à ŋaʼà e ntswùə̀ e mbû. Ka a lə̀ shwəŋə̀ e ànwùə̀ àtse.

³³Pɨ lə̀ lòo e aŋunə àzwuumə̀ àfǐ, ka kɨ pyiimə̀ e a nɨ naŋə̀ ɨ̀sàʼa e ɨ̀shìʼnə̀. Ka ŋònə̀ nɨ mbə̀ʼə a lə̀ shwəŋnə̀ mbə̀ʼə ngẅàrə̀ e, ntiinə nɨ̀chyə̂mbyə̂ e àtwuə̀ ɨ̀shyə̂ ghə̀ à lẅùutə̀ mə.”

³⁴Ntsɨ̀ntoʼò wa pyiitə̀ ambo Filibə̀ lo, “Tiitə̀ mə̀ nɨ ŋònə̀ nɨ ngàŋə̀ ntwuumə̀ Nẅùə̀ à wə̀ nshwəŋnə̀ mbə̀ʼə e. À wə̀ nshwəŋnə̀ lə mbə̀ʼə àtwuə̀ ɨ̀pɨ̀ŋmə̀ e kə̀ mbə̀ʼə ŋònə̀ ɨ̀tse ghù nyàanə?”

³⁵Lenəla Filibə̀ à lə̀ pìʼnə̀ a nɨ shwəŋnə̀, mbìʼnə̀ aŋunə alyiʼə àŋwàʼnə̀ zə̀ a nɨ shwəŋə̀ ntwuumə̀ ghù ɨ̀shìʼnə̀ mbə̀ʼə Yěsû.

³⁶Tsaʼnə pobə lə̀ pənə ngyìinə̀ nshwuʼə̀ àlàŋə gha la, pobə lə̀ ghə̀ mbyàa a ntwuumə̀ nchyə. Ntsɨ̀ntoʼò wa a shwəŋə̀ ambo Filibə̀ lo, “Nchyə ɨ wə̀. Ǎ ghɨ̀rə̀ àkə lo kò wə̀ ŋâ o a gha nɨ àkẅiirə̀ nchyə?”

³⁷[Filibə̀ a kẅùə̀ ambo ze lo, “Mbə̀ʼə ŋ̀ŋâ o nɨ àkẅiirə̀ nchyə mbə̀ʼə wə̀ nùŋə̀ ntɨŋmə̀ o aŋunə Kristù.” A kẅùə̀ lo, “M̀byiimə̀ lo Yěsû Kristù a Moonə̀ Nẅùə̀.”]

³⁸Ntsɨ̀ntoʼò wa a shwəŋə̀ a lenə la ngɨ̀rə̀ kalɨgə̀ wa a təəmə̀. Pobə Filibə̀ shwuʼə̀ nkwuunə̀ amwuə nchyə, Filibə̀ a tyiʼə̀ ŋŋâ e nɨ àkẅiirə̀ nchyə.

³⁹Nkwùə̀ nɨ pobə lə̀ furə̀nə amwuə nchyə ghu, Àzhwùə̀ Nẅùə̀ lə̀ lòo a Filibə̀ ndèrə̀ nɨ ẅèrə, ka ntsɨ̀ntoʼò wa a chi ndzəənə̀ e a ye, lenəla, ntyiʼə̀ ngyìinə̀ ngaʼà ndèrə̀ e.

⁴⁰Filibə̀ à lə̀ tyiʼə̀ ngwùutə̀ ndzəənə̀ ɨ̀pɨ̀ŋmə̀ e a Àzotùsə̀, ntyiʼə̀ ngyìinə̀ nchwìitə̀ ntwuumə̀ ghù ɨ̀shìʼnə̀ amwuə ɨ̀laʼà ɨ̀tsùmə̀ tə ngə̀ mbyàa a Kàsaryà.