Read Pinyin Roman 1 Bible Online

Roman 1 - Pinyin bible

Roman 1

¹A mɨ̀ŋə̀ Pàolò ngàŋə̀ àfàʼà Yěsû Kristù nɨ à lə̀ fuŋə̀nə a mə̀ aŋunə ngàŋə̀ ntwuumə̀ e, ntsoʼò mə̀ lo n̂tə nchwìitə̀ ntwuumə̀ Nẅùə̀ ghù ɨ̀shìʼnə̀.

²Ntwuumə̀ Nẅùə̀ wa nɨ à lə̀ kàʼnə nkwùə̀ ntsàambyə̀ ndàŋə̀ a ndzùmə̀ ngàŋə ntwuumə̀ ɨ̀ze, ŋŋwàʼnə̀ amwuə ɨ̀ŋwàʼnə̀ pɨ laanə̀nə.

³Ntwuumə̀ ẅèrə wə̀ ɨ chyə̂ la mbə̀ʼə Yěsû Kristù Ndòʼnə̀mbyə̂ ɨ̀wə̀ənə̀, ẅùə̀ nɨ pɨ lə̀ pyə̂nə e tsaʼa ŋwùə̀ mɨsoŋə amwuə ngẅàrə̀ Dàfirə̀.

⁴La Nẅùə̀ à lə̀ làŋə̀ a ndzùmə̀ Àzhwùə̀ e nnèrə̀ nɨ ɨ̀tɨ̀ŋnə̀ e lo Yěsû la moonə̀ e, tsaʼnə à lə̀ zhwuumə̀nə e aŋunə nɨ̀wɨghə̀ la.

⁵Nẅùə̀ à lə̀ làŋə̀ a ndzùmə̀ ze ŋŋâ a wəənə̀ nɨ ɨ̀sàanə̀ a nɨ kẅiirə̀ àpòŋə̀ ntɨŋmə̀ e, ɨ kɨ pə ngàŋə̀ ntwuumə̀ ɨ̀ze ntii nɨ̀linə̀ nɨ Kristù, mbə̀ʼə tyiʼə̀ fuŋə̀ pə̀ənə̀ amwuə ɨ̀laʼà ɨ̀tsùmə̀ lo pobə tô ntyiʼə̀ ntə ndzuʼnə̀ e.

⁶Pɨghə pa nɨ nɨ̀ pənə a Romə̀, Nẅùə̀ a kɨ nfuŋə̀ a wɨghə lo nɨ̀ tô mbə pànə̀ pɨ Yěsû Kristù.

⁷Lenəla, ǹtyiʼə̀ ŋŋwàʼnə̀ àŋwàʼnə̀ zə̀ ambo pɨghə pɨ̀tsùmə̀ a àlaʼà Romə̀ nɨ Nẅùə̀ à kòŋə̀nə, nfuŋə̀ a wɨghə nɨ̀ pə pə̀ənə̀ ɨ̀pe. Àpòŋə̀ ntɨŋmə̀ Nẅùə̀ pobə àporə̀porə̀ â furə̀ ambo Nẅùə̀koʼò Tǎ ɨ̀wə̀ənə̀ nɨ Ndòʼnə̀mbyə̂ Yěsû Kristù mbə ambo pɨghə.

⁸Mbɨ pyə̀ ŋâ a mɨyàa ambo Nẅùə̀ Tǎ ɨwəə làŋə̀ a ndzùmə̀ Yěsû Kristù mbə̀ʼə a wɨghə pɨ̀tsùmə̀ ntiinə pɨ zuʼù àlyàʼtə̀ àpyiimə̀ ntɨŋmə̀ àzɨghə amwuə àtwuə̀ ɨ̀shyə̂ àtsùmə̀.

⁹Mbə̀ʼnə Nẅùə̀ wa nɨ ngwa nfàʼà ambo ze nɨ ntɨŋmə̀ mə̀ ɨ̀tsùmə̀ tsaʼnə ngwa nchwìitə̀ ntwuumə̀ ghù ɨ̀shìʼnə̀ wa mbə̀ʼə Moonə̀ e la, a ndzəənə̀ zəənə̀nə mə̀ lo ǹshwəŋə̀ la nkǔŋə nkuŋə lo ngwə̀ nkẅempə̀ a wɨghə amwuə ɨ̀chàʼtə̀ Nẅùə̀ ɨ̀pâ nkwùə̀ ɨ̀tsùmə̀ ka kaanə̀ a mə̀.

¹⁰Nkwùə̀ ɨ̀tsùmə̀ nɨ ngwa nchàʼtə̀ a Nẅùə̀, ngwa mbuʼù mbô ndoonə̀ lo a ŋâ ɨ̀sàanə̀ ntô nkarə̀ a wɨghə tɨ̀tsòŋə̀.

¹¹Mbə̀ʼnə ngwə̀ ngyìi ka mɨ̀zùŋə a nɨ zəənə̀ a wɨghə mbə̀ʼə làŋə̀ a ndzùmə̀ mɨntyaŋnə nɨ Nẅùə̀ à tyaŋə̀nə mə̀ nɨ mèrə ghɨ̀rə̀ nɨ̀ chi ntsùŋə̀ ntɨ̀ŋnə̀.

¹²Ànwùə̀ nɨ ngwə̀ nshwəŋə̀ a chyə̂ lo pə̀ənə̀ pɨ yèmpə̀ ɨ̀pɨ̀ŋmə̀ ɨ̀wə̀ənə̀ a taʼà nkwùə̀; Àpyiimə̀ ntɨŋmə̀ àzɨghə a yèmpə̀ mə̀, àzâ a kɨ ngyèmpə̀ a wɨghə.

¹³Pɨlyimə ɨ̀pâ, ǹtàʼà lo nɨ̀ tsùŋə̀ nzhyə̂ lo ǹkwàrə̀ mə nkwùə̀ noʼnə lo tô karə̀ a wɨghə (la àzwuumə̀ àtse a kɨ mmə nnàanə̀ mə̀ tyìʼə̀ nàanə̀nə lo kò ǹtô). Ǹtàʼà lo mbə̀ʼə ǹtô mbə̀ŋə̀ mɨ̀ntɨŋmə̀ mɨ pə̀ənə̀ amwuə pɨghə lo pobə̂ zùŋə̀ a Kristù, tsaʼnə ǹkɨ mə mbə̀ŋə̀ amwuə pɨ̀tse ɨ̀laʼà nɨ ka a pə e pɨ̀Jew la.

¹⁴A alyiʼə ànwùə̀ mə̀ a nɨ fàʼà ambo ŋwùə̀ ntsùmə̀; ambo pànə̀ nɨ pobə zhwuumə̀nə pobə pànə̀ nɨ ka pobə zhwuumə̀ a ghobə; ambo pànə̀ nɨ pobə zhìʼtə̀nə pobə ɨ̀puukə̀.

¹⁵Tsaʼnə a pənə lə la ngwə̀ ndanə ngyìi a nɨ chwìitə̀ ntwuumə̀ ghù ɨ̀shìʼnə̀ wa ambo pɨghə a àlaʼà Romə̀.

¹⁶Ka mbə mə̀ nɨ ɨ̀sɨŋnə̀ mbə̀ʼə ntwuumə̀ ghù ɨ̀shìʼnə̀ ntiinə ɨ chyə̂ mbə la mɨ̀tɨ̀ŋnə̀ mɨ Nẅùə̀ nɨ ɨ wa nchwarə̀ pànə̀ pɨ̀tsùmə̀ pyə̀ nɨ pobə nùŋə̀nə ntɨŋmə̀ aŋunə Kristù; mbìʼnə̀ aŋunə pɨ̀Jew ntyiʼə̀ ndèrə̀ aŋunə pànə̀ nɨ ka pobə pə ghobə pɨ̀Jew.

¹⁷Ntwuumə̀ ghù ɨ̀shìʼnə̀ wa nnèrə̀ àlàŋə nɨ pànə̀ təəmə̀nə ndəŋə ndəŋə a mbyə̀ ze a nɨ pìʼnə̀ aŋunə àpyiimə̀ ntɨŋmə̀ ngə̀ ndẅùunə̀ aŋunə àpyiimə̀ ntɨŋmə̀. Àŋwàʼnə̀ Nẅùə̀ a shwəŋə̀ lo; “Ŋònə̀ nɨ a làŋə̀nə a ndzùmə̀ àpyiimə̀ ntɨŋmə̀ ngɨ̀rə̀ ànwùə̀ yè təəmə̀nə la, a ghǎ chyə̂.”

¹⁸Nẅùə̀ à lanə nnèrə̀ àtsə̂ ntɨŋmə̀ nɨ̀pwuurə̀ aŋunə pànə̀ pɨ̀tsùmə̀ nɨ pobə twuunə̀nə a ghobə ànwùə̀ e ngɨ̀rə̀ mɨ̀nwùə̀ mɨ tɨ̀pòŋə̀; tɨ̀pòŋə̀ ɨ̀ghobə a tyiʼə̀ nnàanə̀ lo kò pànə̀ tə nzhyə̂ a ghobə a nkǔŋə nkuŋə.

¹⁹Mbə̀ʼnə ànwùə̀ nɨ pànə̀ chyə̂nə a nɨ zhyə̂ mbə̀ʼə Nẅùə̀ a laanə̀ ambo pobə ntiinə Nẅùə̀ à lə̀ nèrə̀ mə ambo pobə.

²⁰A nɨ pìʼnə̀ tsaʼnə Nẅùə̀ à lə̀ tsùŋə̀nə àtwuə̀ ɨ̀shyə̂ zə̀ la, mbòomə Nẅùə̀ nɨ ka pɨ mə ndzəənə̀ e pobə mɨ̀tɨ̀ŋnə̀ ɨ̀me nɨ mɨ ghoŋə̀nə nɨ nkuŋə̀, farə tsaʼnə à kɨnə mbə Nẅùə̀ la, a lanə nfurə̀ ndaanə̀ ambo pànə̀ tsaʼnə pobə zəənə̀nə aŋunə ɨ̀pwuumə̀ nɨ Nẅùə̀ àtwuə̀ ɨ̀pɨ̀ŋmə̀ e a tsùŋə̀nə. Ka pobə pə a ghobə nɨ ànwùə̀ àtse yè nyaanə a nɨ shwəŋə̀.

²¹Mbaa pə tsaʼnə pobə lə̀ zhyə̂nə a Nẅùə̀ la, ka pobə lə̀ ghuʼtə̀ a ghobə a ye tsaʼa Nẅùə̀, ka kɨ ŋâ a ghobə mɨyàa ambo ze. Pobə lə̀ kwàŋə̀ pə ɨ̀kɨ̀ghə̀ mɨ̀nwùə̀ amwuə mɨ̀ntɨŋmə̀ ɨ̀mobə, lenəla, ngwùʼnə̀ a mèrə.

²²Pobə lə̀ lòo mbɨ̀ŋmə̀ ɨ̀zobə pə aŋunə ngàŋə àzhìʼtə̀, la mbə ɨ̀puukə̀.

²³Ambo pobə a nɨ ghuʼtə̀ pə a Nẅùə̀ nɨ a ghoŋə̀nə nɨ nkuŋə̀, pobə ghuʼtə̀ pə ɨ̀pwuumə̀ nɨ pèrə shwuə̀nə a ŋwùə̀ mɨsoŋə nɨ à ghǎ kwɨghə̀, kə̀ pɨ̀sɨ̀ŋə nɨ mɨ̀nyàamə̀, kə̀ mɨ̀nyàamə̀ nɨ mɨ shwuə̀nə àngwaŋəngwaŋə mɨ̀ghòorə.

²⁴Lenəla, Nẅùə̀ a waʼà a ghobə lo pobə pî amwuə mɨ̀nwùə̀ mɨ ntsɨ̀ŋnə nɨ mɨ̀ntɨŋmə̀ ɨ̀mobə tàʼnə, ntyiʼə̀ ngɨ̀rə̀ ɨ̀nwùə̀ ɨ̀sɨŋnə̀ a tɨ̀tɨ̀rə̀ pobə.

²⁵Pobə lòo nkǔŋə nkuŋə mbə̀ʼə Nẅùə̀ mbə̀ŋə̀ a tyiʼə̀ pɨ̀chwìrə̀. Pobə pa nguʼtə̀ nkɨ nfàʼà pə ambo ɨ̀pwuumə̀ pyə̀ nɨ Nẅùə̀ a tsùŋə̀nə la ngwaʼà a Nẅùə̀ nɨ à tsùŋə̀nə ɨ̀pwuumə̀ pɨ̀ghu, mbə nɨ àghuʼtə̀ nɨ a ghoŋə̀nə nɨ nkuŋə̀ la! Amen.

²⁶Mbəʼnə ɨ̀pwuumə̀ pèrə pə ɨ ghɨ̀rə̀ Nẅùə̀ a myàʼtə̀ a ghobə lo pobə̂ tə ngɨ̀rə̀ ɨ̀nwùə̀ ɨ̀sɨŋnə̀ pyə̀ nɨ pobə pa ngyìi la. Pə̀ngyə̌ ɨ̀pobə myàʼtə̀ a nɨ lyə̂ pobə pɨ mbyàŋnə̀ ntyiʼə̀ ndyə̂ nɨ pə̀ngyə̌.

²⁷Mbyàŋnə̀ kɨ mmyàʼtə̀ a nɨ lyə̂ nɨ pə̀ngyə̌ ntyiʼə̀ ndyə̂ nɨ yɨ̀tse mbyàŋnə̀. Pobə pə ngɨ̀rə̀ ɨ̀fèrə̀ mɨ̀nwùə̀ pobə yɨ̀tse mbyàŋnə̀ ntyiʼə̀ nchyâ ɨ̀sàʼa Nẅùə̀ aŋunə pobə ntii mɨ̀nwùə̀ mɨ ɨ̀sɨŋnə̀ nɨ pobə ghɨ̀rə̀nə.

²⁸Tsaʼnə pobə lə̀ twuunə̀nə a ghobə a nɨ zùŋə̀ nkǔŋə nkuŋə mbə̀ʼə Nẅùə̀ la, Nẅùə̀ a waʼà a ghobə amwuə ɨ̀nwùə̀ ntsɨ̀ŋnə pobə ɨ̀kwàŋə̀ ɨ̀pobə lo pobə tyiʼə̀ ngɨ̀rə̀ mɨ̀nwùə̀ nɨ ka pobə lə̀ pə ghɨ̀rə̀ a ghobə.

²⁹Pobə lə̀ pə nɨ ntɨŋmə̀ ghù shyə nɨ ɨ lẅenə̀nə nɨ tɨ̀pòŋə̀, nɨ àghə̀ʼə̀ farə ntɨŋmə̀ ghu lẅùə̀nə. Pobə lə̀ noʼò nɨ àghə̀ʼnə̀, nɨ̀zhwuutə̀, àfɨ̀ghə̀, mɨ̀làʼà, mɨnaŋə nɨ àkwə̀əmə̀,

³⁰mbə nɨ àshwəŋnə̀ a ndzùmə̀ ndzùmə̀, mbàanə̀ a Nẅùə̀, ndzòomə̀ pə̀ənə̀, ntèrə̀, nkoʼò mbɨ̀ŋmə̀, ntsùŋə̀ a tɨ̀pòŋə̀, ntɨ̀ŋnə̀ àtwuə̀ ambo pɨ̀tǎ ɨ̀pobə pobə pɨ̀mǎ ɨ̀pobə.

³¹Pobə lə̀ kɨ mbə ɨ̀puukə̀, mbə pànə̀ nɨ ka pobə mə nnùŋə̀ a ghobə nkàʼnə ɨ̀zobə, mbə pɨ̀tɨkoorə̀ mɨ̀lɨŋə̀, nkɨ mmə nshwəŋnə̀ ɨ̀shwəŋnə̀ ntsaa mɨsoŋə.

³²Mbaa pə tsaʼnə pobə zhyə̂nə lo mbòomə Nẅùə̀ a shwəŋə̀ lo ŋwùə̀ a tə mbə nɨ mbuurə̀ nɨ̀chyə̂mbyə̂ zə̀ a kwɨghə̀ la, pobə làŋə̀ nɨ mbyə̀ nkɨ ngɨ̀rə̀ mɨ̀nwùə̀ mɨ̀ghu ghɨ̀rə̀nə, mbyiimə̀ lo pɨ̀tse pànə̀ kɨ ngɨ̀rə̀ àzobə.