Read Pinyin Roman 11 Bible Online

Roman 11 - Pinyin bible

Roman 11

¹Ǹtyiʼə̀ mbyiitə̀ lo, “Ka zhyə̂ lo Nẅùə̀ à lə̀ twuunə̀ ɨ̀pe pə̀ənə̀?” Ka a pə e a lenə! Mɨ̀ŋə̀ àtwuə̀ ɨ̀pɨ̀ŋmə̀ mə̀ a ŋwùə̀ Israel, mbə ŋwùə̀ ngẅàrə̀ Abràhamə̀, nfurə̀ amwuə àlaʼà Benjàminə̀.

²Ka Nẅùə̀ a twuunə̀ e pə̀ənə̀ ɨ̀pe nɨ a lə̀ pyə̀ mə ntsoʼò. Nɨ̀ zhyə̂ ànwùə̀ nɨ àŋwàʼnə̀ Nẅùə̀ a zə nshwəŋə̀ aŋunə alyiʼə za nɨ Elijah à lə̀ pənə mbuʼù mbô lo Nẅùə̀ a chyâ ɨ̀sàʼa àtwuə̀ pànə̀ pɨ Israel ntii mbòomə tɨ̀pòŋə̀ ɨghobə.

³À lə̀ yìi nshwəŋə̀ lo, “Ndòʼnə̀mbyə̂, pɨ zhwuutə̀ mə ngàŋə ntwuumə̀ ɨ̀zô ɨ̀tsùmə̀, nshàʼtə̀ ɨlyiʼə mɨ̀shwàʼà ɨ̀pô ɨ̀tsùmə̀, a tyiʼə̀ ngoŋə̀ mɨ̀ŋə̀ nɨ mɨ̀ŋə̀ nɨ pobə pə nkɨ mmə ntàʼà zhwuutə̀.”

⁴La Nẅùə̀ à lə̀ kẅùə̀ ambo ze lo àkə? À lə shwəŋə̀ ambo ze lo, “Ǹnùŋə̀ mə pə̀ənə̀ nkaamə̀ sàmbaa nɨ pɨ pirə̀ mə a ghobə tɨ kẅiʼtə̀ a mbyə̀ Baalə̀.”

⁵A kɨ mbə tyìʼə̀ ndəŋə ndəŋə amwuə nkwùə̀ tɨ̀tsòŋə̀ nɨ àpwùʼə̀ pə̀ənə̀ a zə ghu, mbə zhyə̀ nɨ Nẅùə̀ a lə̀ tsoʼnə ndàŋə̀ a ndzùmə̀ àpòŋə̀ ntɨŋmə̀ e.

⁶Nɨ̀tsoʼò pə̀ənə̀ ɨ̀pe a chyə̂ pə aŋunə àpòŋə̀ ntɨŋmə̀ e ka pə e pə aŋunə ɨ̀fàʼà ɨ̀pobə. Ntiinə nɨ̀tsoʼò pə̀ənə̀ a lə̀ pəla mmə ndzùŋə̀ la ɨ̀fàʼà ɨ̀pobə, yi ka a chyə̂ mbə e la àpòŋə̀ ntɨŋmə̀.

⁷A nèrə̀ lə lo ka pànə̀ pɨ Israel lə̀ zəənə̀ a ghobə àzwuumə̀ nɨ pobə lə̀ pənə ntàʼà? A tyìʼə̀ nkǔŋə nkuŋə, à lə̀ zəənə̀ tyìʼə̀ pɨ̀mɨlyiʼə pɨ pə̀ənə̀ ndzəənə̀ àzwuumə̀ a ghu, àpwùʼə̀ pə̀ənə̀ a nàanə̀ mɨ̀ntɨŋmə̀ ɨ̀mobə.

⁸Tsaʼnə pɨ lə̀ ŋwàʼnə̀nə lo, “Nẅùə̀ à ŋâ ghobə nɨ Àzhwùə̀ nɨ a ghɨ̀rə̀nə pobə fompə̀ nnwuunə̀ tsaʼa pɨ̀pəŋə Ŋŋâ ghobə nɨ ɨ̀myə̂ nɨ ka mɨ mə ndzəənə̀ e, nɨ mɨtugrə nɨ ka mɨ mə ndzuʼù e tə mbyàa sìnə̀ wə̀.”

⁹Dàfirə̀ a kɨ nshwəŋə̀ lo, “Ɨlyiʼə mɨ̀zɨghə̀ ɨ̀pobə pə̀ŋə̀ ntyiʼə̀ ɨ̀zə̀ʼə̀ nɨ pɨ lə̀ʼnə lo pobə̂ kwuunə̀ amwuə, pobə̂ kunə̀ pɨ̀ chyâ ɨ̀sàʼa aŋunə pobə.

¹⁰Ndzùmə ɨ̂ nàanə ɨ̀myə̂ ɨ̀mobə mbə̀ʼə pobə kaŋə zəənə̀ ɨlyiʼə, ngəʼə̀ ɨ̂ ghɨ̀rə̀ mɨnkunə furə̀ a nkàʼtə̀ pobə.”

¹¹Ǹchi mbyiitə̀ lo, pobə kòntə̀ nkunə̀ lə mbə chi pə̀ʼkə̀ a ghobə apə̀? Ngaŋə! Ka a pə e a lenə. La tsaʼnə pobə fàntə̀nə la, a ghɨ̀rə̀ lo Nẅùə̀ à chwarə̀ pànə̀ nɨ ka pobə pə ghobə pɨ̀Jew mbə̀ʼə pànə̀ pɨ Israel pə nɨ àghə̀ʼnə̀.

¹²A tə pə lo àfàntə̀ ànwùə̀ àzobə a tô nɨ àfùʼù ambo àtwuə̀ ɨ̀shyə̂; alyiʼə nɨ pobə kunə̀nə ghu a pə àfùʼù ambo pànə̀ nɨ ka pobə pə ghobə pɨ̀Jew. Ǎ ka tyiʼə̀ pə e lə ànwùə̀ yè ẅùunə mbə̀ʼə pɨ̀Jew pɨ̀tsùmə̀ chi nkẅìʼnə̀?

¹³Ǹtyiʼə̀ nshwəŋə̀ lə ambo pɨghə pànə̀ pa nɨ ka nɨ̀ pə wɨghə pɨ̀Jew. Tyìʼə̀ tsaʼnə m̀bənə ngàŋə̀ ntwuumə̀ Kristù ambo pànə̀ nɨ ka pobə pə ghobə pɨ̀Jew la, mbɨ ŋaŋə̀ a àfàʼà mə̀ a àtɨ̀ghə,

¹⁴mbə̀ʼə pɨlyimə ɨ̀pâ pɨ̀Jew tə ngə̀ʼnə̀ njiilo nchwarə̀ a ghobə pɨ̀tse.

¹⁵A tə pə lo nɨ̀twuunə̀ a ghobə a lə̀ kẅirə̀ mbwuutə̀ a Nẅùə̀ pobə pɨ àtwuə̀ ɨ̀shyə̂, Nẅùə̀ a nɨ chi nkẅiirə̀ a ghobə a ka tyiʼə̀ pə e tsaʼa à chwarə̀ a ghobə aŋunə nɨ̀wɨghə̀?

¹⁶Pɨ tə ŋâ a ntsàambyə̀ àtùmə àpaanə̀ ambo Nẅùə̀, yi àpaanə̀ yèghu àtsùmə̀ a yè Nẅùə̀. Pɨ kɨ ŋŋâ mɨŋaŋə mɨ àtɨ̀ghə ambo Nẅùə̀, yi mɨ̀fàa a kɨ mbə ɨ̀me.

¹⁷Pɨ tsoʼò mɨ̀fàa mɨ àtɨ̀ghə mɨ olìvə̀ àtse nɨ a pənə amwuə ɨ̀swùumə, Nẅùə̀ a tyiʼə̀ mbarəkə̀ a wɨghə pànə̀ nɨ ka nɨ̀ pə a wɨghə pɨ̀Jew nɨ nɨ̀ pənə mɨ̀fàa mɨ àtɨ̀ghə mɨ olìvə̀ za nɨ a pənə a mbyiinə̀ aŋunə zhyə̀ nɨ a pənə amwuə ɨ̀swùumə la nkorə̀, mbə̀ʼə nɨ̀ pə nɨ ɨ̀sàanə̀ a nɨ zɨghə̀ mɨ̀zɨghə̀ mɨ̀shìʼnə̀ nɨ mɨ pənə aŋunə àtɨ̀ghə za nɨ a pənə amwuə ɨ̀swùumə la.

¹⁸Lenəla, kò nɨ̀ tə ntsòo pɨ̀ghàŋə̀ pɨghə ambo pànə̀ nɨ pobə pənə mɨ̀fàa ma nɨ pɨ tsoʼnə a ghobə mbarəkə̀ a wɨghə la. Nɨ̀ tə mbəla mmə ntsòo a ghàŋə̀, nɨ̀zhyə̂ lo ka la toomə̀ e pɨghə ntoomə̀ mɨŋaŋə; la toomə̀ mɨŋaŋə ntoomə̀ a wɨghə.

¹⁹La nɨ̀ tyiʼə̀ nshwəŋə̀ lo, “Pɨ lə̀ tsoʼtə̀ mɨ̀fàa ma ngwaʼà la mbə̀ʼə ŋŋâ ɨ̀sàanə̀ ambo pəə.”

²⁰A tyìʼə̀ nkǔŋə nkuŋə pɨ lə̀ tsoʼò a ghobə ngwaʼà ntiinə ka pobə lə̀ pə ghobə nɨ àpyiimə̀ ntɨŋmə̀, la nɨ̀ tyiʼə̀ ntɨ̀ŋnə̀ ntii àpyiimə̀ ntɨŋmə̀ njiilo, kò nɨ̀ kɨ ntsòo a wɨghə a ghàŋə̀ ntii ànwùə̀ ghu, nɨ̀ yìinə̀ mbə nɨ àkẅàrə̀.

²¹Nẅùə̀ à tə pəla ndə̀ ka yìʼtə̀ e pɨ̀Jew nɨ à pənə ngotə mɨ̀fàa mɨ̀ghu, a tyiʼə̀ ngyìʼtə̀ pə a wɨghə?

²²Nɨ̀ naŋə̀ ndzəənə̀ tsaʼnə àpòŋə̀ ntɨŋmə̀ Nẅùə̀ pobə nɨ̀tsə̂ e pənə. À wa ntsə̂ aŋunə pànə̀ nɨ pɨ ghɨ̀rə̀nə a tɨ̀pòŋə̀, la mbə nɨ àpòŋə̀ ntɨŋmə̀ aŋunə pɨghə pa nɨ nɨ̀ lèrə̀nə nɨ mbyə̀ amwuə àpòŋə̀ ntɨŋmə̀ e. La àpòŋə̀ ntɨŋmə̀ zə̀ a ka pə e ghu, a kɨ ntsoʼò a wɨghə ngwaʼà.

²³La ngə̀ aŋunə pɨ̀Jew, pobə tə myàʼtə̀ ànwùə̀ nɨ ka nùŋə̀ a ghobə ntɨŋmə̀ aŋunə Nẅùə̀, yi pɨ kẅirə̀ lòo a ghobə parəkə̀ aŋunə alyiʼə nɨ pobə lə̀ pənə ghu, ntiinə Nẅùə̀ a chyə̂ nɨ ɨ̀tɨ̀ŋnə̀ a nɨ kẅirə̀ mbarəkə̀ a ghobə.

²⁴Pɨghə pànə̀ nɨ ka nɨ̀ pə a wɨghə pɨ̀Jew, nɨ̀ chyə̂ mbə la tsaʼa nɨ̀fàa nɨ àtɨ̀ghə nɨ olìvə̀ nɨ pɨ tsoʼnə amwuə mbyiinə̀. Nẅùə̀ à tə pəla ndòo a wɨghə ntô mbarəkə̀ aŋunə àtɨ̀ghə olìvə̀ nɨ a pənə amwuə ɨ̀swùumə, zhyə̀ nɨ a pənə alyiʼə nɨ ka nɨ̀ pyə̀ mbə pə a wɨghə ghu, ǎ ka tyiʼə̀ pə e mɨlyiʼə ànwùə̀ ambo Nẅùə̀ a nɨ kẅirə̀ mbarəkə̀ mɨ̀fàa ma nɨ mɨ lə̀ furə̀nə aŋunə àtɨ̀ghə olìvə̀ yèghu nɨ a pənə amwuə ɨ̀swùumə, nɨ a pənə alyiʼə nɨ mèrə tənə mbə pə ghu?

²⁵Nkǔŋə nkuŋə ànwùə̀ yè lə̀əmə̀nə àtse a zə̀ ghu nɨ ǹtàʼnə lo nɨ zhyə̂ mbǎ pɨlyimə ɨ̀pâ; zhyə̂nə a pə yèmpə̀ a wɨghə a nɨ ghɨ̀rə̀ lo kò nɨ̀ kwàŋə̀ lo nɨ̀ zhìʼtə̀ tɨsɨŋnə. Ànwùə̀ ghu a pə lo àtɨ̀ŋnə̀ àtwuə̀ pànə̀ pɨ Israel a ghǎ myə̀ amwuə nkwùə̀ za nɨ ndùnə̀ pànə̀ nɨ̀ ka pobə pə ghobə pɨ̀Jew pɨ tônə ambo Nẅùə̀ ndùnə̀ ɨ̀ghobə ɨ kùʼù.

²⁶Amwuə nkwùə̀ ghu, Nẅùə̀ à ghǎ chwarə̀ pànə̀ pɨ Israel pɨ̀tsùmə̀ tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo, “Ngàŋə̀ nchwarə̀ pə̀ənə̀ à ghǎ furə̀ a mbarə̀ Zayònə̀ tô fuukə̀ àtɨ̀ŋnə̀ àtwuə̀ amwuə ngẅàrə̀ Yàkobə̀.

²⁷Ànwùə̀ zèrə zə̀ a pə ɨ̀kàanə̀ nɨ mbɨ wàrə̀ pəə pɨ pobə nkwùə̀ nɨ ǹfuukə̀nə àtɨ̀ŋnə̀ àtwuə̀ àzobə.”

²⁸Pɨ̀Jew pə̀ lə̀ twuunə̀ ntwuumə̀ ghù ɨ̀shìʼnə̀ wa ntyiʼə̀ ngàŋə mbwùunə̀ Nẅùə̀, ntii wɨghə pànə̀ nɨ ka nɨ̀ pə wɨghə pɨ̀Jew. La tsaʼnə Nẅùə̀ à lə̀ tsoʼò mə a ghobə pobə tyiʼə̀ pɨ̀swùə ɨ̀pe ntiinə à lə̀ kàʼà mə nnùŋə̀ ghobə pɨ̀tǎ pɨ̀tǎ ɨ̀pobə.

²⁹Ka Nẅùə̀ â kẅebə̀ e ntɨŋmə̀ e aŋunə ŋònə̀ nɨ à tsoʼò mə nchyâ mborə̀ e aŋunə ze.

³⁰Ngə̀ aŋunə pɨghə pànə̀ nɨ ka nɨ̀ pə wɨghə pɨ̀Jew, nɨ̀ lə̀ tɨ̀ŋnə̀ àtwuə̀ ambo Nẅùə̀ nkwùə̀ ntsàambyə̀, la tɨ̀tsòŋə̀ wə̀ Nẅùə̀ a koorə̀ mɨ̀liŋə̀ ɨ̀mɨghə ntiinə pɨ̀Jew ntɨ̀ŋnə̀ àtwuə̀.

³¹A ndəŋə ndəŋə, pɨ̀Jew lə̀ kɨ ntɨ̀ŋnə̀ àtwuə̀ ambo Nẅùə̀ lo mbə̀ʼə Nẅùə̀ a kɨ koorə̀ mɨ̀liŋə̀ ɨ̀mobə tsaʼnə a lə̀ kɨnə nkoorə̀ ɨ̀mɨghə.

³²Nẅùə̀ a lə̀ ghɨ̀rə̀ lo pànə̀ pɨ̀tsùmə̀ pə ɨ̀pùʼù ambo àtɨ̀ŋnə̀ àtwuə̀ mbə̀ʼə a furə̀ aŋunə nkoorə̀ mɨ̀liŋə̀ mɨ ŋwùə̀ ntsùmə̀.

³³Ɨ̀pwuumə̀ Nẅùə̀ nɨ àzhìʼtə̀ e pobə àzhyə̂ ànwùə̀ e noʼò pə la ghu? Mbə̀ʼə ɨ̀wə̌ a tiitə̀ ndwuumə̀ nɨ Nẅùə̀ à wa ngɨ̀rə̀ mɨ̀nwùə̀ ɨ̀me, kə̀ mbə̀ʼə ɨ̀wə̌ a kɨ nzhyə̂ ɨ̀làŋə nɨ à wa ngɨ̀rə̀ mɨ̀nwùə̀ ɨ̀me?

³⁴Tsaʼnə àŋwàʼnə̀ Nẅùə̀ a shwəŋə̀nə lo: “A zhyə̂ ɨ̀wə̌ nzhyə̂ àkwàŋə̀ Nẅùə̀? Àtəətə̀ ambo ze a ŋâ ɨ̀wə̌?

³⁵A lə̀ pyə̀ mə ŋŋâ ɨ̀wə̌ ŋŋâ àzwuumə̀ ambo Nẅùə̀, nɨ a wə̀ naŋə̀ lo a tô nkẅùə̀ ambo ze?”

³⁶Mbə̀ʼnə àzwuumə̀ àtsùmə̀ la a tsùŋə̀ ze, àzwuumə̀ àtsùmə̀ a furə̀ ambo ze nkɨ mbə ambo ze. Àghuʼtə̀ a pə ambo ze, ngoŋə̀ nɨ nkuŋə̀! Amen.