Read Pinyin Roman 14 Bible Online

Roman 14 - Pinyin bible

Roman 14

¹Nɨ̀ kẅiirə̀ pànə̀ nɨ àpyiimə̀ ntɨŋmə̀ àzobə a porə̀nə ɨ̀shìʼnə̀, la kò nɨ̀ kɨ ntànkə̀ pɨghə pɨ pobə aŋunə ànwùə̀ nɨ nɨ̀ pyiimə̀nə.

²Àpyiimə̀ ntɨŋmə̀ ŋònə̀ ɨ̀tse a chyə̂ ghɨ̀rə̀ â zɨghə àzwuumə̀ àtsùmə̀ la àpyiimə̀ ntɨŋmə̀ ghùtse ŋwùə̀ a ghɨ̀rə̀ pə lo a kwurə̀ ndàʼà ndzaa.

³Pànə̀ pa nɨ pɨ pa ndzɨghə̀ àzwuumə̀ àtsùmə̀ la kò pobə wâ a ghobə pànə̀ nɨ pɨ kwurə̀nə pə ndzaa kò pànə̀ nɨ pɨ pa nkwurə̀ pə ndzaa kɨ ntsoʼtə̀ e ɨ̀sàʼa ŋwùə̀ nɨ a kwurə̀nə àzwuumə̀ àtsùmə̀ ntiinə Nẅùə̀ a kẅiirə̀ mə e.

⁴Ghǒ ɨ̀wə̌ a nɨ saʼà ɨ̀sàʼa ngàŋə̀ àfàʼà ŋònə̀ nyàanə? A ye tǎ pɨ àfàʼà ŋònə̀ ghu nɨ mbə̀ʼə a shwəŋə̀ lo à fàʼà ɨ̀shìʼnə̀ kə̀ tɨ̀pòŋə̀. Ǎ fàʼà ɨ̀shìʼnə̀ ntiinə Ndòʼnə̀mbyə̂ a chyə̂ nɨ ɨ̀tɨ̀ŋnə̀ a nɨ yèmpə̀ e ghu.

⁵Pànə̀ pɨ̀tse pa ndòo lo ɨ̀tse njyə̂ ɨ təəmə̀ ntsàarə̀ yɨ̀tse njyə̂, pɨ̀tse pànə̀ kɨ ndòo lo njyə̂ ɨ̀tsùmə̀ təəmə̀. Ŋwùə̀ ntsùmə̀ â ghɨ̀rə̀ ànwùə̀ nɨ à wa ngɨ̀rə̀ a laanə̀ a ntɨŋmə̀ ze.

⁶Pànə̀ pa nɨ pɨ nùŋə̀nə njyə̂ ɨ̀tse la, pobə nùŋə̀ la ambo Nẅùə̀. Pànə̀ pa nɨ pobə pa ntyiitə̀ ɨ̀pwuumə̀ a nɨ zɨghə̀, pobə pa ntyiitə̀ la a nɨ ghuʼtə̀ a Nẅùə̀ ntiinə pobə pə ŋŋâ a mɨyàa ambo Nẅùə̀. Ẅùə̀ wa nɨ à zɨghə̀nə ɨ̀pwuumə̀ ɨ̀tsùmə̀ à zɨghə̀ la a nɨ ghuʼtə̀ a Nẅùə̀ ntiinə à wə̀ kɨ mmə ŋŋâ a mɨyàa ambo Nẅùə̀.

⁷Ka ŋwùə̀ wə̀ənə̀ ɨ̀tse a chyə̂ pə àtwuə̀ nɨ ze kə̀ mə nkwɨghə̀ pə àtwuə̀ nɨ ze.

⁸Pə̀ənə̀ tə mbə pɨ̀tɨ̀ŋnə̀ yi pə̀ənə̀ pə pə mbə̀ʼə Ndòʼnə̀mbyə̂. Pə̀ənə̀ kɨ nkwɨghə̀ yi pə̀ənə̀ kwɨghə̀ pə ntii Ndòʼnə̀mbyə̂. Tsaʼnə a pənə a lenə la, pə̀ənə̀ tə kwɨghə̀ kə̀ nchyə̂ yi pə̀ənə̀ la pànə̀ pɨ Ndòʼnə̀mbyə̂.

⁹La ɨ̀sùmə nɨ Kristù à lə̀ kwɨghə̀nə nkẅirə̀ nzhwuumə̀ aŋunə nɨ̀wɨghə̀ mbə̀ʼə pə Ndòʼnə̀mbyə̂ ɨ̀kwuə̀ pə̀ənə̀ pobə pɨ pànə̀ nɨ pɨ pənə pɨ̀tɨ̀ŋnə̀.

¹⁰Wə̀ tyiʼə̀ mbyə̀ mbə lə̀ ɨ̀wə̌ a nɨ chyâ ɨ̀sàʼa aŋunə ndyimə o? Kə̀ wə̀ tyiʼə̀ ngwâ a ndyimə o lə ntii àkə? Ntiinə pə̀ənə̀ pɨ̀tsùmə̀ ghǎ nwuunə̀ aŋunə nɨ̀ghòorə nɨ korə̀ nɨ Nẅùə̀.

¹¹Mbə̀ʼnə pɨ ŋwàʼnə̀ amwuə àŋwàʼnə̀ Nẅùə̀ lo, “Ndòʼnə̀mbyə̂ à shwəŋə̀ lo, tsaʼnə m̀bənə ghù ntɨ̀ŋnə̀ la, ŋwùə̀ ntsùmə̀ à ghǎ kẅiʼtə̀ a mbyə̀ mɨ̀ŋə̀, pànə̀ pɨ̀tsùmə̀ shwəŋə̀ a sàŋə̀ sàŋə̀ lo ǹchyə̂ mbə la Nẅùə̀.”

¹²La a laanə̀ ambo pə̀ənə̀ moʼo moʼo lo ŋwùə̀ ɨ̀tsùmə̀ à ghǎ shankə̀ ànwùə̀ mbə̀ʼə e a mbyə̀ Nẅùə̀.

¹³Lenəla, kò pə̀ənə̀ chi ntsoʼtə̀ a wə̀ənə̀ mbɨ̀ŋmə̀ ɨ̀zəənə̀. Pə̀ənə̀ nùŋə̀ pə lo mbə̀ʼə pə̀ənə̀ twaanə̀ a wəənə̀ àtɨ̀ghə àlàŋə lo ndyimə ɨ̀wə̀ənə̀ a kunə̀ aŋunə apə̀ kə̀ nkɨ ngɨ̀rə̀ a wəənə̀ lo ndyimə ɨ̀wə̀ənə̀ â kunə̀ amwuə tɨ̀pòŋə̀ apə̀.

¹⁴Tsaʼa ngàŋə̀ àfàʼà Ndòʼnə̀mbyə̂ Yěsû, ǹzhyə̂ lo ka mɨ̀zɨghə̀ mɨ̀tse pə e ghu nɨ ka mɨ laanə̀ e a nɨ zùŋə̀ a mbòomə. La ŋònə̀ ɨ̀tse à tə pəla ndòo lo ka mɨ̀zɨghə̀ mɨ̀tse laanə̀ e yi ka mɨ kɨ ndaanə̀ e ambo ze.

¹⁵Wə̀ tə mbəla mmə ndzɨghə̀ àzwuumə̀ nɨ a za ŋŋâ ngəʼə̀ ambo ndyimə o, wə̀ zhyə̂ lo ka wə̀ pirə̀ o la amwuə àkwùə̀ nɨ̀yìinə̀ ɨ̀kòŋnə̀. Kò wə̀ ghɨ̀rə̀ lo àzwuumə̀ nɨ wə̀ mənə ndzɨghə̀ a ŋâ ngəʼə̀ ambo ŋònə̀ nɨ Kristù à lə̀ kwɨghə̀nə ntii e.

¹⁶Kò wə̀ myàʼtə̀ lo pɨ̀ fuŋə̀ ànwùə̀ nɨ wə̀ kwàŋə̀nə lo ànwùə̀ ɨ̀shìʼnə̀ nɨ ànwùə̀ tɨ̀pòŋə̀.

¹⁷Mbə̀ʼnə ànwùə̀ Nɨ̀fò Nẅùə̀ ka a pə e la a nɨ zɨghə̀ nkɨ nô, a chyə̂ mbə la a nɨ ghɨ̀rə̀ mɨ̀nwùə̀ mɨ təəmə̀nə, ànwùə̀ àporə̀porə̀ pobə ànwùə̀ nɨ̀ghaʼà amwuə Àzhwùə̀ Nẅùə̀.

¹⁸Ŋònə̀ nɨ à wa nfàʼà ambo Kristù amwuə ndwuumə̀ wə̀, à kùʼnə̀ ambo Nẅùə̀, pànə̀ kɨ mbyiimə̀ e.

¹⁹Pə̀ənə̀ tə nkyiitə̀ amwuə ɨ̀làŋə ɨ̀tsùmə̀ a nɨ ghɨ̀rə̀ pə mɨ̀nwùə̀ nɨ mèrə ma ndòo àporə̀porə̀ ntô nkɨ mmə ngyèmpə̀ a wəənə̀ moʼo moʼo a nɨ kẅuə̀.

²⁰Kò wə̀ tsə̀ŋə̀ àfàʼà Nẅùə̀ ntii mɨ̀zɨghə̀. Ɨ̀pwuumə̀ ɨ̀tsùmə̀ ɨ laanə̀, la a pə pə ànwùə̀ tɨ̀pòŋə̀ ambo ŋwùə̀ a nɨ ghɨ̀rə̀ lo pànə̀ pɨ̀tse pɨ kunə̀ amwuə tɨ̀pòŋə̀ ntii àzwuumə̀ yè zɨghə̀nə.

²¹A kùʼnə̀ lo kò ŋwùə̀ a kwurə̀ mbòbə̀ kə̀ nnô mɨ̀lùʼù kə̀ ngɨ̀rə̀ ànwùə̀ àtse nɨ mbə̀ʼə ndyimə e a kòntə̀ aŋunə.

²²Nùŋə̀ ànwùə̀ nɨ wə̀ pyiimə̀ mbə̀ʼə ànwùə̀ zèrə zə̀ a tɨ̀tɨ̀rə̀ pɨghə Nẅùə̀. Nɨ̀ghaʼà a chyə̂ ambo ŋònə̀ nɨ à wa ngɨ̀rə̀ ànwùə̀ nɨ ka ntɨŋmə̀ e ɨ mə nsaʼà e a ye aŋunə ànwùə̀ nɨ à kwàŋə̀nə lo a kùʼnə̀.

²³La ŋònə̀ nɨ à pənə nɨ ànǎ aŋunə àzwuumə̀ nɨ à wa ndzɨghə̀, Nẅùə̀ à pɨ chyâ ɨ̀sàʼa aŋunə ze ntii àzwuumə̀ nɨ à zɨghə̀nə, ntiinə ànwùə̀ nɨ a ghɨ̀rə̀nə ka a furə̀ amwuə àpyiimə̀ ntɨŋmə̀. Ànwùə̀ àtsùmə̀ nɨ ka a furə̀ e amwuə àpyiimə̀ ntɨŋmə̀ la ànwùə̀ tɨ̀pòŋə̀.