Read Pinyin Roman 15 Bible Online

Roman 15 - Pinyin bible

Roman 15

¹Njiilo pə̀ənə̀ pa nɨ àpyiimə̀ ntɨŋmə̀ àzəənə̀ a tɨ̀ŋnə̀nə, pə̀ənə̀ yèmpə̀ pɨlyimə ɨ̀pə̀ənə̀ pa nɨ àzobə a porə̀nə a nɨ ghɨ̀rə̀ àpyiimə̀ àzobə a kẅuə̀, ntsàarə̀ a nɨ naŋə̀ pə mbɨ̀ŋmə̀ ɨ̀zəənə̀.

²Ŋwùə̀ ntsùmə̀ a zəənə̀ lo mbə̀ʼə a ghɨ̀rə̀ ànwùə̀ ɨ̀shìʼnə̀ ambo ndyimə e, zhyə̀ nɨ ǎ yèmpə̀ e a kẅùə̀ amwuə àpyiimə̀ e.

³Mbə̀ʼnə ka Kristù a lə̀ ghɨ̀rə̀ e ànwùə̀ àtse pə lo a pòŋə̀ pə a ye la a pə amwuə àŋwàʼnə̀ Nẅùə̀ lo “Mɨ̀ndzòomə̀ ma nɨ pɨ lə̀ zòomə̀nə a wɨghə nɨ mèrə la, mɨ lə̀ pə la aŋunə mɨ̀ŋə̀.”

⁴Mɨ̀nwùə̀ mɨ̀tsùmə̀ nɨ pɨ lə̀ ŋwàʼnə̀nə amwuə àŋwàʼnə̀ Nẅùə̀ nkwùə̀ ntsàambyə̀ lə̀ pə la a nɨ yèmpə̀ a wəənə̀ lo pə̀ənə̀ pə nɨ àẅìimə̀ ntɨŋmə̀ pobə ntɨŋmə̀ ghu tɨ̀ŋnə̀ mbə̀ʼə nùŋə̀ àkwàŋə̀ àzəənə̀ aŋunə Nẅùə̀ tə pyabə̀.

⁵Ndoonə̀ ambo Nẅùə̀ wa nɨ à wa ŋŋâ àẅìimə̀ ntɨŋmə̀ pobə ntɨŋmə̀ ghu tɨ̀ŋnə̀ la lo â ŋâ a wɨghə nɨ Àzhwùə̀ a nɨ shwəŋnə̀ ndzuʼnə̀ pɨghə nɨ pɨghə mmɨ̀ŋnə̀ a Kristù Yěsû.

⁶Zèrə zə̀ a pɨ yèmpə̀ a wɨghə a nɨ pwuutə̀ mbə ntswùə̀ moʼo nguʼtə̀ a Nẅùə̀ tǎ pɨ Ndòʼnə̀mbyə̂ ɨ̀wə̀ənə̀ Kristù Yěsû.

⁷Nɨ̀ kẅiirə̀ pɨlyimə ɨ̀pɨghə nɨ nɨ̀ghaʼà tyìʼə̀ tsaʼnə Kristù Yěsû à lə̀ kẅiirə̀nə a wɨghə, mbə̀ʼə ghɨ̀rə̀ pànə̀ ghuʼtə̀ a Nẅùə̀.

⁸Ntiinə ngwə̀ nshwəŋə̀ ambo pɨghə lo Kristù à lə̀ pə̀ŋə̀ ntyiʼə̀ ngàŋə̀ àfàʼà ambo pɨ̀Jew a nɨ nèrə̀ lo Nẅùə̀ a Nẅùə̀ nkǔŋə nkuŋə, nkɨ ngɨ̀rə̀ lo nkàʼnə nɨ à lə̀ kàʼnə ambo pɨ̀tǎ pɨ̀tǎ ɨ̂ furə̀ mbə nkǔŋə nkuŋə.

⁹À wa nkɨ ngɨ̀rə̀ pànə̀ nɨ ka pobə pə ghobə pɨ̀Jew ghuʼtə̀ a Nẅùə̀ ntiinə Nẅùə̀ à wa nkoorə̀ mɨ̀lɨŋə̀ ɨ̀mobə, tsaʼnə àŋwàʼnə̀ Nẅùə̀ a shwəŋə̀nə lo, “Lenəla mbɨ ghuʼtə̀ nɨ̀linə̀ ɨ̀tsô a tɨ̀tɨ̀rə̀ pànə̀ nɨ ka pobə pə ghobə pɨ̀Jew; mbɨ zòbə̀ nchyə a nɨ ghuʼtə̀ nɨ̀linə̀ ɨ̀tsô.”

¹⁰Àŋwàʼnə̀ Nẅùə̀ a chi nshwəŋə̀ lo, “Pɨghə pànə̀ nɨ ka nɨ̀ pə a wɨghə pɨ̀Jew, nɨ̀ pə nɨ nɨ̀ghaʼà pɨghə pɨ pànə̀ pɨ Nẅùə̀.”

¹¹A kɨ nchi shwəŋə̀ lo, “Pɨghə pànə̀ nɨ ka nɨ̀ pə a wɨghə pɨ̀Jew, nɨ̀ ghuʼtə̀ a Ndòʼnə̀mbyə̂; Ŋwùə̀ ntsùmə̀ a ghuʼtə̀ e.”

¹²Ìsayà a chi shwəŋə̀ lo, “Moonə̀ ɨ̀tse amwuə ngẅàrə̀ Jesè ǎ tô. Nẅùə̀ à ghǎ pə̀ʼkə̀ e a tyiʼə̀ mbuʼtə̀ pànə̀ nɨ ka pobə pə ghobə pɨ̀Jew; lenəla, pobə ghǎ nùŋə̀ àkwàŋə̀ àzobə aŋunə ze.”

¹³Nẅùə̀ nɨ à pənə ẅùə̀ wa nɨ à wa ŋŋâ a wəənə̀ nɨ ntɨŋmə̀ a nɨ pyabə̀ àzwuumə̀ nɨ pə̀ənə̀ pa mbyabə̀ la â lẅenə̀ mɨ̀ntɨŋmə̀ ɨ̀məənə̀ nɨ nɨ̀ghaʼà ndàŋə̀ a ndzùmə̀ àpyiimə̀ ntɨŋmə̀ àzəənə̀ aŋunə ze, mbə̀ʼə àkwàŋə̀ àzəənə̀ a làŋə̀ nɨ mbyə̀ nkẅùə̀ amwuə mɨ̀tɨ̀ŋnə̀ mɨ Àzhwùə̀ Nẅùə̀.

¹⁴Pɨlyimə ɨ̀pâ, mɨ̀ŋə̀ àtwuə̀ mbɨ̀ŋmə̀ mə̀, ǹzhyə̂ lo nɨ̀ twuʼtə̀ àpòŋə̀ ntɨŋmə̀ yè noʼnə, nkɨ ntsùŋə̀ nzhyə̂ ànwùə̀ nɨ mbə̀ʼə nɨ ghɨ̀rə̀ nkɨ mbə pànə̀ nɨ mbə̀ʼə nɨ̀ təətə̀ mbɨ̀ŋmə̀ ɨ̀zɨghə pɨghə nɨ pɨghə.

¹⁵La amwuə àŋwàʼnə̀ zə̀ ŋ̀ŋwàʼnə̀ tyìʼə̀ tɨ waʼà ànwùə̀ àtse mbə̀ʼə mɨ̀nwùə̀ mɨ̀tse nɨ ǹtàʼnə lo chi kẅempə̀ a wɨghə nɨ mèrə. Ŋ̀ŋwàʼnə̀ tyìʼə̀ tɨ waʼà ànwùə̀ àtse ntii àpòŋə̀ ntɨŋmə̀ nɨ Nẅùə̀ à ŋânə ambo mɨ̀ŋə̀,

¹⁶lo m̂bə ngàŋə̀ àfàʼà Kristù Yěsû a nɨ fàʼà ambo pànə̀ nɨ ka pobə pə ghobə pɨ̀Jew, nfàʼà tsaʼa ngàŋə̀ àfàʼà Nẅùə̀ a nɨ sìimə̀ ntwuumə̀ ghù ɨ̀shìʼnə̀ nɨ ɨ furə̀nə ambo ze, lo mbə̀ʼə pànə̀ nɨ ka pobə pə ghobə pɨ̀Jew pə ɨ̀pwuumə̀ nchàʼtə Nẅùə̀ ambo Nẅùə̀ nɨ à pyiimə̀nə a pèrə nɨ Àzhwùə̀ Nẅùə̀ a ghɨ̀rə̀nə pèrə laanə̀.

¹⁷Ǹtsòo a ghàŋə̀ mə̀ aŋunə àfàʼà Nẅùə̀ nɨ ngwə̀ fàʼà ntiinə m̀bənə taʼà ŋwùə̀ pə Kristù Yěsû,

¹⁸ka pə shwəŋə̀ mə̀ ànwùə̀ àtse ndàŋə̀ e a zhyə̀ nɨ Kristù à lə̀ làŋə̀nə a ndzùmə̀ mɨ̀ŋə̀ ndòo pànə̀ nɨ ka pobə pə ghobə pɨ̀Jew ntô ambo Nẅùə̀. Pobə lə̀ tô ambo Nẅùə̀ ntii ànwùə̀ nɨ nshwəŋə̀nə nkɨ ngɨ̀rə̀,

¹⁹ntii mɨ̀tɨ̀ŋnə̀ mɨ ɨ̀lènə̀ mɨ̀nwùə̀ ghobə mɨ̀nwùə̀ mɨ yerə̀nə yerə̀nə mɨ̀tɨ̀ŋnə̀ mɨ Àzhwùə̀ Nẅùə̀. Lenəla, ndə̀ chwìitə̀ ntwuumə̀ ghù ɨ̀shìʼnə̀ wə̀ mbə̀ʼə Kristù alyiʼə àtsùmə̀ a nɨ furə̀ a Yèrusalèmə̀ ngə̀ mbyàa a Ìlìrikùmə̀.

²⁰A nɨ̀yìi mə̀ nkwùə̀ ɨ̀tsùmə̀ lo n̂chwìitə̀ ntwuumə̀ ghù ɨ̀shìʼnə̀ wə̀ alyiʼə àtsùmə̀ nɨ pɨ laʼa mə ndzuʼù e nɨ̀linə̀ nɨ Kristù apə̀, ntiinə ka ǹtàʼà mə̀ a nɨ korə̀ ndâ àtwuə̀ àtsirə̀ ndâ nɨ ŋònə̀ nyàanə à tuŋə̀nə kə̀ mbòomə.

²¹Tsaʼnə àŋwàʼnə̀ Nẅùə̀ a shwəŋə̀nə lo, “Pànə̀ pa nɨ pɨ laʼa mə mbirə̀ e ànwùə̀ ambo pobə tɨ shwəŋə̀, pobə ghǎ zəənə̀ e, pyə̀ nɨ ka pobə lə̀ zuʼù a ghobə, pobə̂ zhyə̂.”

²²Lə̌ ɨ̀sùmə ànwùə̀ ghu nɨ pɨ pa nnàanə̀ a mə̀ nkwùə̀ noʼnə lo kò ǹtô mə̀ ambo pɨghə.

²³La tɨ̀tsòŋə̀ nɨ ka ǹchi mbə mə̀ àfàʼà amwuə pɨ̀pàa pɨ àlaʼà pə̀, farə tsaʼnə ndə̀ pyə̀ mə ngyìi a nɨ zəənə̀ a wɨghə aŋunə mɨnguʼu mɨ̀noʼnə la,

²⁴ngwə̀ ntàʼà lo lèrə̀ a Spain, mmə kwàŋə̀ lo làŋə̀ ghaanə̀ a wɨghə tsaʼnə mbɨ mə lèrə̀ ghu la. Mbɨ pə nɨ nɨ̀ghaʼà a nɨ pə pə̀ənə̀ aŋunə mətùmə nkwùə̀, nɨ̀ tyiʼə̀ ngyèmpə̀ mə̀ ndèrə̀ ghu.

²⁵Farə tɨ̀tsòŋə̀, ngwə̀ ndèrə̀ a Yèrusalèmə̀ a nɨ ŋâ àyèmpə̀ ambo pànə̀ pɨ Nẅùə̀ ghu,

²⁶Ɨ̀shwatə̀ ɨ̀poonə̀ pɨ Kristù nɨ pənə a àlaʼà Màsèdonyà pobə Àkayà ŋâ ɨ̀pwuumə̀ nɨ àpòŋə̀ ntɨŋmə̀ àzobə a nɨ yèmpə̀ ngàŋə̀ àfumə̀ nɨ pənə a tɨ̀tɨ̀rə̀ pànə̀ pɨ Nẅùə̀ a Yèrusalèmə̀.

²⁷Pobə ghaʼà a nɨ ghɨ̀rə̀ a lenə, la a nɨ shwəŋə̀ nkǔŋə nkuŋə, pobə chyə̂ a nɨ ghɨ̀rə̀ a lenə ambo pobə, ntiinə tsaʼnə pɨ̀Jew lə̀ ghàbə̀nə mborə̀ Àzhwùə̀ Nẅùə̀ pobə pɨ pobə la, pànə̀ nɨ ka pobə pə ghobə pɨ̀Jew kɨ mbə a nɨ lòo ɨ̀pwuumə̀ nɨ Nẅùə̀ à ŋânə ambo pobə kɨ ngyèmpə̀ pɨ̀Jew ghu.

²⁸Lenəla, nkwùə̀ nɨ m̀myàanə̀nə a nɨ fàʼà àfàʼà zə̀ ǹkɨ ndzəənə̀ lo pobə kẅiirə̀ nkabə̀ zə̀ nɨ pɨ shwatə̀nə a nɨ ŋâ ambo pobə, mbɨ kɨ lèrə̀ a Spain la làŋə̀ zəənə̀ a wɨghə.

²⁹Ǹzhyə̂ lo nkwùə̀ nɨ ǹtônə ambo pɨghə, Kristù a pɨ chyâ mborə̀ aŋunə pɨghə tyìʼə̀ ɨ̀shìʼnə̀.

³⁰M̀buʼù mbô ambo pɨghə pɨlyimə ɨ̀pâ lo, aŋunə nɨ̀linə̀ nɨ Ndòʼnə̀mbyə̂ Yěsû Kristù ɨ̀wə̀ənə̀, farə nɨ ɨ̀kòŋnə̀ nɨ Àzhwùə̀ Nẅùə̀ a za ŋŋâ, nɨ̀ pwuutə̀ pə̀ənə̀ chàʼtə̀ a Nẅùə̀ àtwuə̀ mɨ̀ŋə̀.

³¹Nɨ̀ loonə̀ ambo Nẅùə̀ lo a kẅiirə̀ mə̀ ambo pànə̀ nɨ pɨ pənə a Judyà ka nùŋə̀ a ghobə ntɨŋmə̀ ɨ̀ghobə aŋunə Kristù, nkɨ ngɨ̀rə̀ lo pànə̀ pɨ Nẅùə̀ a Yèrusalèmə̀ kẅiirə̀ ntwuumə̀ nɨ ǹtônə nɨ ẅèrə.

³²Mbɨ tô ambo pɨghə nɨ nɨ̀ghaʼà mbə̀ʼə Nẅùə̀ a pyiimə̀, lenəla, pə̀ənə̀ tyiʼə̀ nnwuunə̀ ɨ̀shìʼnə̀.

³³Nẅùə̀ nɨ a ŋânə àporə̀porə̀ ǎ tyiʼə̀ pə pɨghə pɨ pobə. Amen.