Read Pinyin Roman 3 Bible Online

Roman 3 - Pinyin bible

Roman 3

¹Tsaʼnə a pənə lə, pɨ̀Jew tsàarə̀ pànə̀ nɨ ka pobə pə ghobə pɨ̀Jew amwuə zèrə àlàŋə? Kə̀ nɨ̀zə̀ərə̀ a ghobə a yèmpə̀ a ghobə nɨ àkə?

²A nkǔŋə nkuŋə, àpìi yè noʼnə a chyə̂ ghu amwuə ɨ̀làŋə pɨ̀noʼnə. Ntsàambyə̀ ànwùə̀ a pə lo Nẅùə̀ a lə̀ pyə̀ ŋŋâ àshwəŋnə̀ la ambo pobə.

³Pobə pɨ̀tse lə̀ pəla ngoŋə̀ a ghobə tɨ pə nɨ àpyiimə̀ ntɨŋmə̀ yi àkə lə̀ ghɨ̀rə̀? Pobə lə̀ pəla ghoŋə̀ a ghobə tɨ nùŋə̀ ntɨŋmə̀ a nɨ ghɨ̀rə̀ ànwùə̀ nɨ Nẅùə̀ à lə̀ shwəŋə̀nə, yi Nẅùə̀ ǎ ka ghɨ̀rə̀ e ànwùə̀ nɨ à lə̀ shwəŋə̀nə?

⁴Mbə̀ʼə a pə e a lenə apə̀. Pə̀ənə̀ zhyə̂ lo Nẅùə̀ a shwəŋə̀ la nkǔŋə nkuŋə mbaa pə tsaʼnə ŋwùə̀ mɨsoŋə a pənə ngàŋə̀ pɨ̀chwìrə̀. Tsaʼnə pɨ ŋwàʼnə̀nə amwuə àŋwàʼnə̀ Nẅùə̀ lo; “Lenəla pobə zəənə̀ lo àshwəŋnə̀ o a nkǔŋə nkuŋə, Nẅùə̀ a pə saʼà ɨ̀sàʼa o, wə̀ zɨghə̀ a ẅèrə.”

⁵La ɨ̀nwùə̀ tɨ̀pòŋə̀ ɨ̀pə̀ənə̀ tə mə nnèrə̀ tyìʼə̀ ɨ̀shìʼnə̀ lo mɨ̀nwùə̀ mɨ Nẅùə̀ təəmə̀, pə̀ənə̀ tyiʼə̀ shwəŋə̀ lə lo àkə? Lo ka Nẅùə̀ a kùʼnə̀ e a nɨ nèrə̀ àzaŋə̀ ntɨŋmə̀ e aŋunə pə̀ənə̀? (Ngwə̀ shwəŋə̀ lə tsaʼa ŋwùə̀ mɨsoŋə.)

⁶Mbə̀ʼə a pə e a lenə apə̀. A tə pəla mbə a lenə, yi mbə̀ʼə Nẅùə̀ a saʼà mɨ̀sàʼa mɨ pə̀ənə̀ àtwuə̀ ɨ̀shyə̂ ghə̀ lə la ghu?

⁷A tə pə lo nɨ̀ka pə mə̀ nɨ nkǔŋə nkuŋə à yèmpə̀ a nɨ nèrə̀ lo Nẅùə̀ a Nẅùə̀ nkǔŋə nkuŋə ghɨ̀rə̀ pànə̀ tyiʼə̀ nguʼtə̀ nɨ̀linə̀ ɨ̀tse, a tyiʼə̀ ngɨ̀rə̀ àkə lo Nẅùə̀ a chyâ ɨ̀sàʼa aŋunə mɨ̀ŋə̀ tsaʼa ŋònə̀ tɨ̀pòŋə̀?

⁸Mbə̀ʼə pə̀ənə̀ ka tyiʼə̀ shwəŋə̀ a wə̀ənə̀ lo pə̀ənə̀ tə ngɨ̀rə̀ a tɨ̀pòŋə̀ mbə̀ʼə mɨ̀nwùə̀ mɨ̀shìʼnə̀ tô? Pànə̀ pɨ̀tse pə ndzòomə̀ a wəə nshwəŋə̀ lo pəə pə nshwəŋə̀ tyìʼə̀ a lenə nkǔŋə nkuŋə. Lenəla, Nẅùə̀ à ghǎ chyâ ɨ̀sàʼa aŋunə pobə amwuə ndwuumə̀ nɨ ɨ kùʼnə̀nə.

⁹Lenəla, a tyiʼə̀ pə lə lo pə̀ənə̀ pɨ̀Jew pòŋə̀ ntsàarə̀ a pɨ̀tse pə̀ənə̀? A laʼa mbə e a lenə apə̀. Pəə pyə̀ mə nshwəŋə̀ lo pànə̀ pɨ̀tsùmə̀ chyə̂ la amwuə tɨ̀pòŋə̀, kə̀ pɨ̀Jew kə̀ pànə̀ nɨ ka pobə pə ghobə pɨ̀Jew.

¹⁰Pɨ ŋwàʼnə̀ amwuə àŋwàʼnə̀ Nẅùə̀ lo, “Ka ŋònə̀ ɨ̀tse a pə e ghu nɨ mɨ̀nwùə̀ ɨ̀me təəmə̀nə. Tyìʼə̀ taʼà ka a pə e ghu.

¹¹Ka ŋònə̀ ɨ̀tse a pə e ghu nɨ à zhyə̂nə ɨ̀nwùə̀ ɨ̀tsùmə̀. Ka ŋònə̀ ɨ̀tse a kɨ mbə e ghu nɨ a tàʼnə Nẅùə̀.

¹²Pànə̀ pɨ̀tsùmə̀ waʼà mə àlàŋə, ntyiʼə̀ mbwuutə̀ mbə àfǐfǐ; Ka ŋònə̀ nɨ à ghɨ̀rə̀nə mɨ̀nwùə̀ mɨ̀shìʼnə̀ a pə e ghu. Ka tyìʼə̀ taʼà ŋwùə̀ a pə e ghu.

¹³Ɨ̀shwəŋnə̀ nɨ pèrə pa nfurə̀ a ntswùə̀ pobə pɨ̂ ka mɨ̀zùŋə; mbə pɨ̀chwìrə̀, nkɨ mbə tsaʼa ndyiʼə̀ nɨ ɨ̀ furə̀nə a ntswùə̀ ɨ̀nyoorə̀”

¹⁴“Mɨ̀ntswùə̀ ɨ̀mobə lẅenə̀ nɨ mɨ̀ndzòomə̀ pobə mɨ̀ndòonə̀.”

¹⁵“Pobə pa ndzàŋə̀ mbɨ̀ŋmə̀ a nɨ chyâ àlòʼo aŋunə ŋwùə̀ nkɨ nzhwuutə̀.

¹⁶Amwuə alyiʼə àtsùmə̀ nɨ pobə làŋə̀nə, pobə pa nchyâ ɨ̀lòʼo aŋunə pə̀ənə̀ ngɨ̀rə̀ pobə zəənə̀ ngəʼə̀.

¹⁷Ka pobə zhyə̂ a ghobə ndwuumə̀ nɨ mbə̀ʼə pobə ghɨ̀rə̀ mbə nɨ àporə̀porə̀ Nẅùə̀.”

¹⁸“Nkɨ ka kɨ pə a ghobə nɨ àkẅàrə̀ Nẅùə̀.”

¹⁹Tɨ̀tsòŋə̀ pə̀ənə̀ zhyə̂ lo ànwùə̀ za nɨ mbòomə à shwəŋə̀nə, à shwəŋə̀ la ambo pànə̀ pa nɨ pobə pənə a ɨ̀sùmə mbòomə, njiilo kò ŋònə̀ ɨ̀tse a pə e nɨ ànwùə̀ àtse a nɨ shwəŋə̀ a nɨ tàŋə̀ àtwuə̀ e, ntiinə ŋwùə̀ ntsùmə̀ àtwuə̀ ɨ̀shyə̂ ghə̀ a ghǎ təəmə̀ saʼà ɨ̀sàʼa e a mbyə̀ Nẅùə̀.

²⁰Lenəla, ka ŋònə̀ ɨ̀tse a pə e ghu nɨ mɨ̀nwùə̀ ɨ̀me təəmə̀nə a mbyə̀ Nẅùə̀ ntiinə a wə̀ ndzùŋə̀ a mbòomə. Mbòomə a ghɨ̀rə̀ pə lo pə̀ənə̀ zhyə̂ a tɨ̀pòŋə̀.

²¹Tɨ̀tsòŋə̀, Nẅùə̀ a nèrə̀ mə àlàŋə nɨ a ghɨ̀rə̀nə mɨ̀nwùə̀ mɨ pə̀ənə̀ təəmə̀ a mbyə̀ ze, ka pə e pə nɨ ànwùə̀ àtse a nɨ ghɨ̀rə̀ nɨ mbòomə, tsaʼnə àŋwàʼnə̀ mbòomə pobə yè ngàŋə ntwuumə̀ Nẅùə̀ shwəŋə̀nə la.

²²Nẅùə̀ à ghɨ̀rə̀ mɨ̀nwùə̀ pə̀ənə̀ təəmə̀ pə a nɨ làŋə̀ a ndzùmə̀ àpyiimə̀ ntɨŋmə̀ àzobə aŋunə Yěsû Kristù, ntiinə ka tə̀chwìi ɨ̀tse a pə e ghu.

²³Mbəʼnə ŋwùə̀ ntsùmə̀ a ghɨ̀rə̀ mə a tɨ̀pòŋə̀ ntyiʼə̀ mbə a ndyə̌ sàa aŋunə Nẅùə̀ nɨ a wa nchwarə̀.

²⁴La, Nẅùə̀ a lə̀ nèrə̀ àpòŋə̀ ntɨŋmə̀ e aŋunə pobə àfǐfǐ ngɨ̀rə̀ mɨ̀nwùə̀ ɨ̀mobə təəmə̀, ndàŋə̀ a ndzùmə̀ Yěsû Kristù nɨ à lə̀ chwarə̀nə a ghobə.

²⁵Nẅùə̀ à lə̀ ŋâ e tsaʼa mômbyə̂ nɨ̀shwàʼà lo â lòo alyiʼə àzəənə̀, mbə̀ʼə pə̀ənə̀ nùŋə̀ ntɨŋmə̀ aŋunə àləəmə̀ e. Nẅùə̀ à lə̀ ghɨ̀rə̀ a lenə lə a nɨ nèrə̀ tsaʼnə mɨ̀nwùə̀ ɨ̀me təəmə̀nə. À lə̀ ẅìimə̀ mbɨ̀ŋmə̀ e, ngwâ mɨ̀nwùə̀ mɨ tɨ̀pòŋə̀ nɨ pànə̀ lə̀ ghɨ̀rə̀nə nkwùə̀ ntsàambyə̀.

²⁶La tɨ̀tsòŋə̀ wə̀, ka Nẅùə̀ a chi ngwâ e a tɨ̀pòŋə̀ pànə̀ pɨ mɨsoŋə. À wə̀ ntyiʼə̀ nnèrə̀ pə tsaʼnə mbə̀ʼə mɨ̀nwùə̀ mɨ pànə̀ təəmə̀ ndəŋə ndəŋə pobə pɨ pobə.

²⁷La ànwùə̀ nɨ mbə̀ʼə pə̀ənə̀ tsòo a ghàŋə̀ aŋunə a chyə̂ pə lo àkə? Ka ànwùə̀! Ɨ̀sùmə ànwùə̀ ghu ɨ̀ chyə̂ lo àkə? Ɨ̀ chyə̂ pə ntiinə pə̀ənə̀ pa ndzùŋə̀ a mbòomə? Ngàŋə! mbə̀ʼə ɨ̀ kɨ mbə pə ntiinə pə̀ənə̀ nùŋə̀nə ntɨŋmə̀ aŋunə Yěsû.

²⁸Mbəʼnə pə̀ənə̀ pyiimə̀ la lo, mɨ̀nwùə̀ mɨ ŋwùə̀ təəmə̀ a mbyə̀ Nẅùə̀ ndzùŋə̀ la àpyiimə̀ ntɨŋmə̀ e, ka pə e pə ntiinə à ghɨ̀rə̀nə ànwùə̀ nɨ mbòomə à nèrə̀nə.

²⁹Kə̀ Nẅùə̀ à chyə̂ mbə la Nẅùə̀ pɨ̀Jew ndàʼà? Ka à kɨ mbə e la Nẅùə̀ pànə̀ nɨ ka pobə pə ghobə pɨ̀Jew? A ànwùə̀, a kɨ mbə Nẅùə̀ pànə̀ nɨ ka pobə pə ghobə pɨ̀Jew.

³⁰Tsaʼnə Nẅùə̀ à pənə taʼà Nẅùə̀ la, ǎ ghɨ̀rə̀ lo mɨ̀nwùə̀ mɨ pànə̀ nɨ pɨ zə̀ərə̀nə a ghobə təəmə̀ ndzùŋə̀ àpyiimə̀ ntɨŋmə̀ àzobə. Mɨ̀nwùə̀ mɨ pànə̀ nɨ ka pɨ zə̀ərə̀ e a ghobə kɨ təəmə̀ ndzùŋə̀ àpyiimə̀ ntɨŋmə̀ àzobə.

³¹Njiilo zèrə zə a chyə̂ lə lo pə̀ənə̀ waʼà a mbòomə ntii àpyiimə̀ àzəənə̀. Ka a pə e a lenə! Pə̀ənə̀ ẅìimə̀ a mbòomə a tɨ̀ŋnə̀.