Read Pinyin Roman 4 Bible Online

Roman 4 - Pinyin bible

Roman 4

¹Pə̀ənə̌ tyiʼə̀ shwəŋə̀ lə lo àkə mbə̀ʼə Abràhamə̀ tǎ pɨ tǎ ɨ̀pə̀ənə̀?

²A tə pə lo Nẅùə̀ à lə̀ pyiimə̀ lo mɨ̀nwùə̀ mɨ Abràhamə̀ təəmə̀ ntii ɨ̀fàʼà nɨ à lə̀ fàʼnə, yi mbə̀ʼə a lə̀ pə e nɨ ànwùə̀ a nɨ tsòo a ghàŋə̀ aŋunə apə̀. La ka a pə e a lenə a mbyə̀ Nẅùə̀.

³Àŋwàʼnə̀ Nẅùə̀ a shwəŋə̀ la lo àkə? A shwəŋə̀ la lo “Abràhamə̀ à lə̀ nùŋə̀ ntɨŋmə̀ e aŋunə Nẅùə̀, Nẅùə̀ a tyiʼə̀ ndòo àpyiimə̀ ntɨŋmə̀ e ghu aŋunə mɨ̀nwùə̀ nɨ à ghɨ̀rə̀nə mɨ təəmə̀.”

⁴Ŋwùə̀ à fàʼà la pɨ twuə̀ e. Ka nkabə̀ àfàʼà e pə e pə tsaʼa àzwuumə̀ nɨ pɨ ŋânə ambo ze àfǐfǐ; a àzwuumə̀ nɨ a pənə àze.

⁵La ngə̀ aŋunə ŋònə̀ nɨ ka à tə̂ e àtwuə̀ e pə aŋunə àfàʼà, la nnùŋə̀ ntɨŋmə̀ e aŋunə Nẅùə̀ wa nɨ à wa ngɨ̀rə̀ mɨ̀nwùə̀ mɨ pànə̀ pɨ tɨ̀pòŋə̀ təəmə̀ la, la àpyiimə̀ ntɨŋmə̀ e nɨ a ghɨ̀rə̀nə Nẅùə̀ à naŋə̀ e tsaʼa ŋònə̀ nɨ mɨ̀nwùə̀ ɨ̀me təəmə̀nə.

⁶Lə̌ tsaʼnə Dàfirə̀ à lə̀ shwəŋə̀nə lo mborə̀ ɨ̀ chyə̂ ambo ŋònə̀ wa nɨ Nẅùə̀ à lòonə e tsaʼa ŋònə̀ nɨ mɨ̀nwùə̀ ɨ̀me təəmə̀nə ka pə e pə lo à ghɨ̀rə̀ mɨ̀nwùə̀ mɨ təəmə̀nə. À lə̀ shwəŋə̀ lo,

⁷“Mborə̀ ɨ̀ chyə̂ ambo ŋònə̀ wa nɨ Nẅùə̀ à lə̀ənə̀nə ɨ̀fàntə̀ ɨ̀nwùə̀ ɨ̀pe, nkɨ nkẅupə̀ ɨ̀nwùə̀ tɨ̀pòŋə̀ ɨ̀pe la.

⁸Mborə̀ ɨ̀ chyə̂ ambo ŋònə̀ wa nɨ ka Nẅùə̀ a shaŋə̀ e ɨ̀nwùə̀ tɨ̀pòŋə̀ ɨ̀pe nnùŋə̀ la.”

⁹A chyə̂ lə̀ lo, mborə̀ zə̀ ɨ̀ chyə̂ e la pə ambo pànə̀ nɨ pɨ zə̀ərə̀nə a ghobə, kə̀ farə ambo pànə̀ nɨ ka pɨ zə̀ərə̀ e a ghobə? Pə̀ənə̀ lə̀ pə nshwəŋə̀ lo, Abràhamə̀ à lə̀ nùŋə̀ ntɨŋmə̀ e aŋunə Nẅùə̀. Lenəla, Nẅùə̀ a tyiʼə̀ ndòo e tsaʼa ŋònə̀ nɨ mɨ̀nwùə̀ ɨ̀me təəmə̀nə.

¹⁰À lə̀ ghɨ̀rə̀ àkə lo Nẅùə̀ a lòo Abràhamə̀ tsaʼa ŋònə̀ nɨ mɨ̀nwùə̀ ɨ̀me təəmə̀nə? A lə̀ pə nkwùə̀ nɨ pɨ lə̀ zə̀ərə̀ mə e kə̀ nkwùə̀ nɨ pɨ lə̀ pirə̀nə e a ye tɨ zə̀ərə̀? Ka a lə̀ pə e nkwùə̀ nɨ pɨ lə̀ zə̀ərə̀ mə e, a lə̀ pə nkwùə̀ nɨ pɨ lə̀ pirə̀nə e a ye tɨ zə̀ərə̀.

¹¹Pɨ lə̀ zə̀ərə̀ e tsaʼa àlènə̀ a nɨ nèrə̀ lo Nẅùə̀ à lòo e tsaʼa ŋònə̀ nɨ mɨ̀nwùə̀ ɨ̀me təəmə̀nə, ntiinə à lə̀ pyə̀ nnùŋə̀ ntɨŋmə̀ aŋunə Nẅùə̀ zaʼà pɨ pòŋə̀ zə̀ərə̀ e. À lə̀ pə nɨ ndwuumə̀ wə̀ mbə̀ʼə Abràhamə̀ a pə tǎ pɨ pànə̀ pyə̀ nɨ pobə nùŋə̀nə ntɨŋmə̀ ɨ̀ghobə aŋunə Nẅùə̀ zaʼà pɨ pòŋə̀ zə̀ərə̀ a ghobə. Lenəla, Nẅùə̀ a tyiʼə̀ ndòo a ghobə tsaʼa pànə̀ nɨ mɨ̀nwùə̀ ɨ̀mobə təəmə̀nə.

¹²À kɨ mbə tǎ pɨ pànə̀ nɨ pɨ zə̀ərə̀ mə a ghobə; ka pə e pə ndàʼà lo pɨ zə̀ərə̀ a ghobə, a chyə̂ pə lo pobə pə ndzùŋə̀ mbòbə̀ mɨ̀nkwùə̀ mɨ tǎ ɨ̀wəənə̀ Abràhamə̀ aŋunə àpyiimə̀ ntɨŋmə̀ zaʼà pɨ pòŋə̀ ghǎ zə̀ərə̀ a ghobə.

¹³Ka nkàʼnə za nɨ Nẅùə̀ à lə̀ kàʼnə ambo Abràhamə̀ pobə pɨ ngẅàrə̀ e lo àtwuə̀ ɨ̀shyə̂ a ghǎ pə àzobə la ɨ lə̀ pə e la ntii nɨ̀zuʼnə̀ mbòomə. Ɨ̀ lə̀ pə pə ntiinə à lə̀ nùŋə̀nə ntɨŋmə̀ e aŋunə Nẅùə̀, mɨ̀nwùə̀ ɨ̀me tyiʼə̀ ntəəmə̀.

¹⁴A tə pə lo pɨ̀zɨghə̀ pɨ ndâ ghǎ pə la pànə̀ nɨ pobə pa nnùŋə̀ a mbòomə, yi àpyiimə̀ ntɨŋmə̀ a àfǐfǐ, nkàʼnə Nẅùə̀ ɨ̀ kɨ mbə e àzwuumə̀ àtse apə̀,

¹⁵ntiinə mbòomə à lòonə pə àzaŋə̀ ntɨŋmə̀ Nẅùə̀ ntô nɨ zèrə. La mbòomə à tə mbəla ka pə e ghu, yi ka pànə̀ pə kɨ fàntə̀ a ghobə mbòomə.

¹⁶Nkàʼnə ghu ɨ̀ lə̀ pə la ntii àpyiimə̀ ntɨŋmə̀ mbə̀ʼə a tsùŋə̀ ndaanə̀ lo nkàʼnə zèrə zə̀ ɨ̀ lə̀ pə la mɨntyaŋnə mɨ Nẅùə̀, ndzùŋə̀ a ndzùmə̀ àpòŋə̀ ntɨŋmə̀ e a ŋâ mɨntyaŋnə mèrə mə ambo Abràhamə̀ pobə pɨ ngẅàrə̀ e, ka pə e pə ambo pànə̀ nɨ pobə pa nnùŋə̀ pə a mbòomə ndàʼà. À lə̀ kɨ ŋŋâ ambo pànə̀ nɨ pobə pənə nɨ àpyiimə̀ ntɨŋmə̀ tsaʼa Abràhamə̀ ntiinə à pənə tǎ ɨ̀wə̀ənə̀ pɨ̀tsùmə̀ amwuə àzhwùə̀.

¹⁷Pɨ ŋwàʼnə̀ amwuə àŋwàʼnə̀ Nẅùə̀ lo, “Ǹgɨ̀rə̀ wə̀ tyiʼə̀ tǎ pɨ ɨ̀laʼà pɨ̀noʼnə.” Njiilo nkàʼnə zèrə zə̀ ɨ̀ lə̀ pòŋə̀ a mbyə̀ Nẅùə̀ wa nɨ Abràhamə̀ à nùŋə̀nə ntɨŋmə̀ aŋunə, nkɨ mbə Nẅùə̀ wa nɨ à wa nzhwuumə̀ ɨ̀kwuə̀ pə̀ənə̀, nkɨ mbə Nẅùə̀ wa nɨ à wa ngɨ̀rə̀ mɨ̀nwùə̀ furə̀ a alyiʼə nɨ ka mɨ tə mbə furə̀ e.

¹⁸Abràhamə̀ à lə̀ pyiimə̀ nkɨ mmə mbyabə̀ lo ghǎ pə tǎ pɨ ɨ̀laʼà pɨ̀noʼnə mbaa pə tsaʼnə ka à lə̀ pə e nɨ ɨ̀sùmə ɨ̀tse a nɨ pyabə̀. À lə̀ pyiimə̀ tyìʼə̀ tsaʼnə Àŋwàʼnə̀ Nẅùə̀ a shwəŋə̀nə lo, “Ngẅàrə̀ o ɨ̀ ghǎ noʼò.”

¹⁹A lə̀ kɨ pə nkwùə̀ ghu mbə tsaʼa nguʼu nkɨrə la ka àpyiimə̀ ntɨŋmə̀ e a porə̀ e, mbaa pə tsaʼnə à lə̀ tyiʼnə mmə nnaŋə̀ mbɨ̀ŋmə̀ e tsaʼa lo à lwùnə̀ a nɨ pyə̂ nkɨ mmə ndzəənə̀ lo mbə̀ʼə Sarah a pòŋə̀ pyə̂ e apə̀.

²⁰Ka àpyiimə̀ ntɨŋmə̀ e a lə̀ nə̀ʼnə̀ e, ka kɨ pə e nɨ mɨnkə aŋunə nkàʼnə Nẅùə̀. Àpyiimə̀ ntɨŋmə̀ e a lə̀ ŋâ e nɨ ɨ̀tɨ̀ŋnə̀ a tyiʼə̀ nguʼtə̀ a Nẅùə̀.

²¹À lə̀ lanə nzhyə̂ nkǔŋə nkuŋə lo mbə̀ʼə Nẅùə̀ a waʼà e tɨ ghɨ̀rə̀ ànwùə̀ nɨ à kàʼnə lo ghɨ̀rə̀ apə̀.

²²Lə̌ ɨ̀sùmə ànwùə̀ nɨ Nẅùə̀ à lə̀ lòonə Abràhamə̀ tsaʼa ŋònə̀ nɨ mɨ̀nwùə̀ ɨ̀me təəmə̀nə ndàŋə̀ a ndzùmə̀ àpyiimə̀ ntɨŋmə̀ e.

²³Ka pɨ lə̀ ŋwàʼnə̀ e àshwəŋnə̀ zə̀ lo, “Nẅùə̀ à lə̀ lòo e tsaʼa ŋònə̀ nɨ mɨ̀nwùə̀ ɨ̀me təəmə̀nə” la ambo ze nɨ ze.

²⁴Pɨ lə̀ kɨ ŋŋwàʼnə̀ la ambo pə̀ənə̀ pa nɨ Nẅùə̀ à lòonə a wəənə̀ lo mɨ̀nwùə̀ ɨ̀məənə̀ təəmə̀, pə̀ənə̀ kɨ nchi mmə nnùŋə̀ ntɨŋmə̀ aŋunə ze wa nɨ à lə̀ zhwuumə̀nə a Yěsû Ndòʼnə̀mbyə̂ ɨ̀wə̀ənə̀ aŋunə nɨ̀wɨghə̀ la.

²⁵Pɨ lə̀ ŋâ e lo pɨ zhwuutə̀ mbə̀ʼə ɨ̀nwùə̀ tɨ̀pòŋə̀ ɨ̀pə̀ənə̀, Nẅùə̀ a kɨ nchi nzhwuumə̀ e aŋunə nɨ̀wɨghə̀ mbə̀ʼə ghɨ̀rə̀ mɨ̀nwùə̀ ɨ̀məənə̀ təəmə̀ a mbyə̀ ze.