Read Pinyin Roman 6 Bible Online

Roman 6 - Pinyin bible

Roman 6

¹Pə̀ənə̀ tyiʼə̀ nshwəŋə̀ lə lo àkə? Lo pə̀ənə̀ làŋə̀ nɨ mbyə̀ ntə ngɨ̀rə̀ a tɨ̀pòŋə̀ mbə̀ʼə àpòŋə̀ ntɨŋmə̀ Nẅùə̀ â kẅìʼnə̀ ndèrə̀ nɨ mbyə̀.

²Mbə̀ʼə a pə e a lenə apə̀! Pə̀ənə̀ kwɨghə̀ ngwaʼà a tɨ̀pòŋə̀, mbə̀ʼə pə̀ənə̀ chi ndàŋə̀ nɨ mbyə̀ nchi nchyə̂ amwuə tɨ̀pòŋə̀ lə ɨla?

³Kə̀ ka nɨ̀ zhyə̂ a wɨghə lo pə̀ənə̀ pa pɨ̀tsùmə̀ nɨ pɨ lə̀ ŋânə a wə̀ənə̀ nɨ àkẅiirə̀ nchyə aŋunə nɨ̀linə̀ nɨ Yěsû mbwuutə̀ a wə̀ənə̀ pɨ pobə, pa amwuə nɨ̀wɨghə̀ e?

⁴Lenəla nkwùə̀ nɨ pə̀ənə̀ lə̀ kẅiirə̀nə nchyə, pɨ lə̀ tẅəŋə̀ a wə̀ənə̀ pɨ pobə amwuə nɨ̀wɨghə̀ e. Tyìʼə̀ tsaʼnə pɨ lə̀ pə̀ʼkə̀nə a Kristù aŋunə nɨ̀wɨghə̀ ndàŋə̀ a ndzùmə̀ mɨ̀tɨ̀ŋnə̀ mɨ Tǎ mɨ̀ẅùunə la, mbə̀ʼə pə̀ənə̀ kɨ nchyə̂ a nɨ̀chyə̂mbyə̂ ghù shwuə̀.

⁵Ntiinə pə̀ənə̀ tə kwɨghə̀ tyìʼə̀ tsaʼnə à lə̀ kwɨghə̀nə àze, yi a tyìʼə̀ ndəŋə ndəŋə lo pə̀ənə̀ ghǎ kɨ zhwuumə̀ a nɨ̀wɨghə̀ tyìʼə̀ tsaʼnə à lə̀ zhwuumə̀nə àze.

⁶Pə̀ənə̀ zhyə̂ lo pɨ lə̀ kẅùumə̀ mbɨ̀ŋmə̀ ɨ̀zəənə̀ yɨ̀ ndwùnə̀ aŋunə àtɨ̀ghə pànkə̀nə pə̀ənə̀ pɨ Kristù, ntsə̀ŋə̀ mbɨ̀ŋmə̀ tɨ̀pòŋə̀ za lo mbə̀ʼə pə̀ənə̀ kaŋə chi pə ɨ̀pùʼù ɨ̀nwùə̀ tɨ̀pòŋə̀.

⁷Ntiinə nkwùə̀ nɨ ŋwùə̀ à kwɨghə̀nə la, Nẅùə̀ a kyàatə̀ mɨnkirə mɨ ɨ̀nwùə̀ tɨ̀pòŋə̀ aŋunə ze.

⁸A tə pə lo pə̀ənə̀ kwɨghə̀ pə̀ənə̀ pɨ Kristù, yi pə̀ənə̀ pyiimə̀ lo pə̀ənə̀ ghǎ kɨ chyə̂ pə̀ənə̀ pɨ pobə,

⁹ntiinə pə̀ənə̀ zhyə̂nə lo tsaʼnə Kristù a lə̀ zhwuumə̀ a nɨ̀wɨghə̀ la, mbə̀ʼə a gha nchi nkwɨghə̀ e apə̀; nɨ̀wɨghə̀ a kɨ nchi mbə e nɨ mɨ̀tɨ̀ŋnə̀ mɨ̀tse a mbɨ̀ŋmə̀ ɨ̀ze apə̀.

¹⁰Nɨ̀wɨghə̀ nɨ à lə̀ kwɨghə̀nə la, a lə̀ pə a nɨ tsə̀ŋə̀ a tɨ̀pòŋə̀ nɨ nkuŋə̀. Nɨ̀chyə̂mbyə̂ nɨ a pənə nɨ ẅèrə a pə a nɨ chyə̂ pobə pɨ Nẅùə̀.

¹¹Nɨ ndwuumə̀ wə̀, nɨ̀ shaŋə̀ ɨ̀pɨ̀ŋmə̀ ɨ̀wɨghə lo nɨ kwɨghə̀ mə amwuə tɨ̀pòŋə̀, ntyiʼə̀ nkɨ mbə pɨ̀tɨ̀ŋnə̀ pɨghə pɨ Nẅùə̀ ndàŋə̀ a ndzùmə̀ Kristù Yěsû.

¹²Lenəla, kò nɨ̀ pyiimə̀ a wɨghə lo tɨ̀pòŋə̀ â puʼtə̀ mbòbə̀ mbɨ̀ŋmə̀ za nɨ ɨ̀ ghǎ kwɨghə̀ la mbə̀ʼə nɨ̀ kaŋə tə zùŋə̀ ɨ̀pwuumə̀ tɨ̀pòŋə̀ pa nɨ mbòbə̀ mbɨ̀ŋmə̀ ɨ̀ tàʼnə la.

¹³Kò nɨ̀ myàʼtə̀ a wɨghə alaamə mbɨ̀ŋmə̀ àzɨghə yètse ambo ɨ̀nwùə̀ tɨ̀pòŋə̀ a tyiʼə̀ mbə tsaʼa àzwuumə̀ àfàʼà ntɨŋmə̀ ghù shyə. Nɨ̀ ŋâ mbɨ̀ŋmə̀ ɨ̀zɨghə ambo Nẅùə̀ tsaʼa pànə̀ nɨ pɨ fuukə̀ mə a ghobə amwuə nɨ̀wɨghə̀ pobə kwuunə̀ amwuə nɨ̀chyə̂mbyə̂. Nɨ̀ ŋâ ɨlaamə mbɨ̀ŋmə̀ ɨ̀pɨghə ambo Nẅùə̀ mbə̀ʼə a lòo aŋunə ɨ̀pwuumə̀ àfàʼà mɨ̀nwùə̀ mɨ təəmə̀nə.

¹⁴Mbə̀ʼnə tɨ̀pòŋə̀ a laʼa mbə e nɨ mɨ̀tɨ̀ŋnə̀ a nɨ puʼtə̀ a wɨghə apə̀, ntiinə ka nɨ̀ pə wɨghə a ɨ̀sùmə mbòomə; nɨ̀ chyə̂ pə a ɨ̀sùmə àpòŋə̀ ntɨŋmə̀ Nẅùə̀.

¹⁵Pə̀ənə̌ tyiʼə̀ shwəŋə̀ lə̀ lo àkə? Pə̀ənə̌ tə ghɨ̀rə̀ a tɨ̀pòŋə̀ ntiinə ka pə̀ənə̀ pə a wə̀ənə̀ a ɨ̀sùmə mbòomə la mbə pə a ɨ̀sùmə àpòŋə̀ ntɨŋmə̀ Nẅùə̀? A pə e a lenə apə̀!

¹⁶Ka nɨ̀ zhyə̂ a wɨghə lo nɨ̀ tə ŋâ mbɨ̀ŋmə̀ ɨ̀zɨghə ambo ŋwùə̀ ndzuʼnə̀ e, nɨ̀ tyiʼə̀ la ɨ̀pùʼù ambo ze? Nɨ̀ ŋâ ɨ̀pɨ̀ŋmə̀ ɨ̀wɨghə ambo tɨ̀pòŋə̀ a tô nɨ nɨ̀wɨghə̀, kə̀ ambo nɨ̀zuʼnə̀ a ghɨ̀rə̀ mɨ̀nwùə̀ ɨ̀mɨghə təəmə̀ a mbyə̀ Nẅùə̀.

¹⁷La mɨyàa ambo Nẅùə̀ ntiinə pɨghə pa nɨ nɨ̀ lə̀ pə mə nkwùə̀ ɨ̀tse mbə ɨ̀pùʼù ɨ̀nwùə̀ tɨ̀pòŋə̀ la; nɨ̀ tyiʼə̀ ndzuʼnə̀ ɨ̀nwùə̀ pa nɨ pɨ lə̀ nèrə̀nə a wɨghə la nɨ ntɨŋmə̀ ɨ̀wɨghə ɨ̀tsùmə̀.

¹⁸Lenəla, pɨ kyàatə̀ mə mɨnkɨrə mɨ mɨ̀nwùə̀ mɨ tɨ̀pòŋə̀ aŋunə pɨghə nɨ̀ tyiʼə̀ ɨ̀pùʼù ambo mɨ̀nwùə̀ mɨ təəmə̀nə.

¹⁹Ngwə̀ nshwəŋə̀ lə nɨ ɨ̀shwəŋnə̀ nɨ pànə̀ pa nshwəŋə̀ ntiinə mbòbə̀ mbɨ̀ŋmə̀ ɨ̀zɨghə porə̀nə. A lə̀ pə nkwùə̀ ɨ̀tse nɨ̀ ŋâ mbɨ̀ŋmə̀ ɨ̀zɨghə ambo ntsɨ̀ŋnə, ngɨ̀rə̀ a tɨ̀pòŋə̀ ndèrə̀ pə nɨ mbyə̀. Tɨ̀tsòŋə̀, nɨ̀ ŋâ mbɨ̀ŋmə̀ ɨ̀zɨghə tsaʼa ɨ̀pùʼù ambo mɨ̀nwùə̀ mɨ təəmə̀nə mbə̀ʼə tsùŋə̀ pànə̀ pɨ Nẅùə̀ pyə̀ nɨ pobə pa ngɨ̀rə̀ mɨ̀nwùə̀ mɨ təəmə̀nə.

²⁰Nkwùə̀ nɨ nɨ̀ lə̀ pənə ɨ̀pùʼù ɨ̀nwùə̀ tɨ̀pòŋə̀ la, ka nɨ̀ lə̀ pə wɨghə nɨ ànwùə̀ àtse pɨghə pɨ ɨ̀nwùə̀ pɨ təəmə̀nə.

²¹Àpìi nɨ nɨ̀ lə̀ pənə nɨ zèrə aŋunə ɨ̀nwùə̀ tɨ̀pòŋə̀ nɨ nɨ̀ lə̀ ghɨ̀rə̀nə a lə̀ pə àkə tsaʼnə nɨ̀ wə̀ ntyiʼə̀ mbə nɨ ɨ̀sɨŋnə̀ aŋunə lə? Ɨ̀nwùə̀ pèrə pə pa ndòo la nɨ̀wɨghə̀ ntô nɨ ẅèrə.

²²La tɨ̀tsòŋə̀ nɨ pɨ kyàatə̀ mə mɨnkɨrə mɨ ɨ̀nwùə̀ tɨ̀pòŋə̀ aŋunə pɨghə nɨ̀ tyiʼə̀ ɨ̀pùʼù Nẅùə̀ la, àpìi àzɨghə a pə lo nɨ̀ ghɨ̀rə̀ mɨ̀nwùə̀ mɨ təəmə̀nə, ntyiʼə̀ mbə nɨ nɨ̀chyə̂mbyə̂ wa nɨ à ghoŋə̀nə nɨ nkuŋə̀.

²³Mbə̀ʼnə àpìi ànwùə̀ tɨ̀pòŋə̀ a nɨ̀wɨghə̀, la àzwuumə̀ nɨ Nẅùə̀ à wa ŋŋâ àfǐfǐ a pə nɨ̀chyə̂mbyə̂ wa nɨ à ghoŋə̀nə nɨ nkuŋə̀ ndàŋə̀ a ndzùmə̀ Kristù Yěsû Ndòʼnə̀mbyə̂ ɨ̀wə̀ənə̀.