Read Pinyin Roman 7 Bible Online

Roman 7 - Pinyin bible

Roman 7

¹Pɨlyimə ɨ̀pâ, ǹkwàŋə̀ lo nɨ̀ zhyə̂ ànwùə̀ nɨ ǹtàʼnə a nɨ shwəŋə̀ ambo pɨghə, ntiinə pɨghə pɨ̀tsùmə̀ zhyə̂nə a mbòomə. Mbòomə à chyə̂ nɨ mɨ̀tɨ̀ŋnə̀ àtwuə̀ ŋònə̀ la nkwùə̀ nɨ à pirə̀nə ghù ntɨ̀ŋnə̀.

²Mə̀ngyə̌ nɨ à zoʼò mə, mbòomə à korə̀ e pobə ndwuumə̀ e nkwùə̀ nɨ ndwuumə̀ e à pirə̀nə ghù ntɨ̀ŋnə̀; la ndwuumə̀ e wa a kwɨghə̀ e mbòomə wa a chi ngẅìimə̀ e a ye apə̀.

³Lenəla, à tə ndzoʼò a ndwuumə̀ ghu nyàanə nkwùə̀ nɨ ndwuumə̀ e à pirə̀nə ghù ntɨ̀ŋnə̀, pɨ fuŋə̀ e nɨ ngàŋə̀ àfànə̀. La ndwuumə̀ e wa a kwɨghə̀, mbòomə a chi ngẅìimə̀ e a ye apə̀, a kɨ nchi mbə e ngàŋə̀ àfànə̀ apə̀, mbaa pə tsaʼnə à zoʼnə a ghùtse ndwuumə̀ la.

⁴Tsaʼnə a pənə a lenə la nɨ pɨlyimə ɨ̀pâ, nɨ̀ kwɨghə̀ mə ngwaʼà mɨ̀tɨ̀ŋnə̀ mɨ mbòomə ntiinə nɨ̀ tyiʼə̀ mbə taʼà ŋwùə̀ pɨghə pɨ mbɨ̀ŋmə̀ Kristù. Nɨ̀ chyə̂ mbə la ambo ze wa nɨ à lə̀ zhwuumə̀nə a nɨ̀wɨghə̀, njiilo pə̀ənə̀ pìʼnə̀ a nɨ fàʼà àfàʼà Nẅùə̀ ɨ̀shìʼnə̀.

⁵Mbə̀ʼnə nkwùə̀ za nɨ pə̀ənə̀ lə̀ mənə nchyə̂ tsaʼa pànə̀ pɨ mɨsoŋə la, ntoŋə a nɨ ghɨ̀rə̀ ànwùə̀ tɨ̀pòŋə̀ ɨ̀ lə̀ pə amwuə pə̀ənə̀, ntiinə ɨ̀nwùə̀ tɨ̀pòŋə̀ pa nɨ mbòomə à pə̀ʼkə̀nə mbòbə̀ mbɨ̀ŋmə̀ ɨ̀ kɨ mmə ntàʼà la lə̀ pə nfàʼà amwuə pə̀ənə̀, pə̀ənə̀ kɨ ntyiʼə̀ ngɨ̀rə̀ mɨ̀nwùə̀ nɨ mɨ lòonə a nɨ̀wɨghə̀ ndòo ntô nɨ ẅèrə.

⁶La tɨ̀tsòŋə̀, pə̀ənə̀ furə̀ mə amwuə mbòomə wa ntiinə pə̀ənə̀ kwɨghə̀ mə ngwaʼà mɨ̀nwùə̀ ma nɨ pə̀ənə̀ lə̀ pənə ɨ̀pùʼù aŋunə la, ka chi mə ghɨ̀rə̀ a wə̀ənə̀ mɨ̀nwùə̀ zùŋə̀ a mbòomə ghù ndwùnə̀ wa nɨ pɨ ŋwàʼnə̀nə la. Pə̀ənə̀ tyiʼə̀ ngɨ̀rə̀ mɨ̀nwùə̀ ndzùŋə̀ pə nɨ̀chyə̂mbyə̂ yɨ̀ shwuə̀ wa amwuə àzhwùə̀.

⁷Pə̀ənə̀ tyiʼə̀ nshwəŋə̀ lə lo àkə? Lo mbòomə la ànwùə̀ tɨ̀pòŋə̀? Ka a pə e a lenə! La mbòomə à lə̀ pə la ka pə e ghu, yi ka ndə̀ zhyə̂ mə̀ ànwùə̀ tɨ̀pòŋə̀. A nkǔŋə nkuŋə lo ndə̀ pə zhyə̂ mə̀ lo àghə̀ʼnə̀ a ànwùə̀ tɨ̀pòŋə̀ apə̀ mbə̀ʼə mbòomə à lə̀ pəla ngwaʼà e tɨ shwəŋə̀ lo “Kò wə̀ ghə̀ʼnə̀.”

⁸La tɨ̀pòŋə̀ a lòo ɨ̀sàanə̀ ghu nɨ mbòomə à ŋânə ngɨ̀rə̀ lo mbə nɨ ntoŋə a nɨ tàʼà mbuurə̀ àzwuumə̀ àtsùmə̀. Mbòomə à tə ka pə e ghu, yi tɨ̀pòŋə̀ a kwɨghə̀ mə.

⁹A lə̀ pə nkwùə̀ ɨ̀tse mbə ghù ntɨ̀ŋnə̀ tɨ mbòomə, la nkwùə̀ nɨ ntə̌ ɨ lə̀ tônə, tɨ̀pòŋə̀ à lə̀ pə̀ʼkə̀, ǹkwɨghə̀.

¹⁰Ntə̌ wa nɨ ɨ lə̀ pənə a nɨ lòo a nɨ̀chyə̂mbyə̂ ntô ambo mɨ̀ŋə̀, ɨ tyiʼə̀ ntô nɨ nɨ̀wɨghə̀.

¹¹Mbə̀ʼnə tɨ̀pòŋə̀ à lə̀ zəənə̀ ɨ̀sàanə̀ ndàŋə̀ a ndzùmə̀ ntə̌ nfɨ̀kə̀ mə̀ nzhwuutə̀.

¹²Lenəla, mbòomə à laanə̀ mmyàanə̀, ntə̌ ɨ kɨ ndaanə̀, ntəəmə̀ nkɨ mbòŋə̀.

¹³A chyə̂ lə lo zhyə̀ za nɨ a pòŋə̀nə a lə̀ tyiʼə̀ ndòo a nɨ̀wɨghə̀ ntô aŋunə mɨ̀ŋə̀? Ka à pə e a lenə. A gha à lə̀ zhwuutə̀ tɨ̀pòŋə̀. Tɨ̀pòŋə̀ à lə̀ làŋə̀ a ndzùmə̀ àzwuumə̀ yè ɨ̀shìʼnə̀ ndòo nɨ̀wɨghə̀ ntô aŋunə mɨ̀ŋə̀. A lə̀ pə a lenə la mbə̀ʼə ntə̌ ɨ nèrə̀ lo tɨ̀pòŋə̀ a tyìʼə̀ ngotə àzwuumə̀ tɨ̀pòŋə̀.

¹⁴Pə̀ənə̀ zhyə̂ lo Àzhwùə̀ Nẅùə̀ a ŋâ mbòomə, la m̀bə àfǐfǐ ŋwùə̀ nɨ pɨ shwùunə̀nə lo â pə àpùʼù ambo tɨ̀pòŋə̀.

¹⁵Ka ǹdanə nzhyə̂ mə̀ ànwùə̀ nɨ ngwə̀ ngɨ̀rə̀ ntiinə ka ngɨ̀rə̀ mə̀ ànwùə̀ nɨ ǹkòŋə̀nə lo ghɨ̀rə̀, la ǹgɨ̀rə̀ pə ànwùə̀ nɨ m̀bàanə̀nə.

¹⁶A tə mbə zhyə̀ nɨ ngɨ̀rə̀ ànwùə̀ nɨ ka nkòŋə̀ mə̀ lo ghɨ̀rə̀, yi mbyiimə̀ lo mbòomə a pòŋə̀.

¹⁷Njiilo ka ànwùə̀ ghu la a ghɨ̀rə̀ e mɨ̀ŋə̀. A ghɨ̀rə̀ tɨ̀pòŋə̀ nɨ a pənə amwuə mɨ̀ŋə̀ ngɨ̀rə̀ a zèrə.

¹⁸Nzhyə̂ lo ka ànwùə̀ yè ɨ̀shìʼnə̀ àtse a pə e amwuə mɨ̀ŋə̀ farə amwuə mbòbə̀ mbɨ̀ŋmə̀ mə. Mbaa pə tsaʼnə ǹkòŋə̀nə a nɨ ghɨ̀rə̀ ànwùə̀ nɨ a kùʼnə̀nə la, ka mbə mə̀ nɨ ɨ̀tɨ̀ŋnə̀ a nɨ ghɨ̀rə̀ a zèrə.

¹⁹Ka ǹgɨ̀rə̀ mə̀ ànwùə̀ ɨ̀shìʼnə̀ nɨ ǹtənə ntàʼà a nɨ ghɨ̀rə̀; La ǹgɨ̀rə̀ pə tɨ̀pòŋə̀ nɨ ka ǹkòŋə̀ mə̀ a nɨ ghɨ̀rə̀.

²⁰Tɨ̀tsòŋə̀ wə̀, ǹtə ngɨ̀rə̀ ànwùə̀ zhyə̀ nɨ ka ǹkòŋə̀ mə̀ lo ghɨ̀rə̀, yi ka à ghɨ̀rə̀ e mɨ̀ŋə̀. La à ghɨ̀rə̀ e tɨ̀pòŋə̀ wa nɨ à pənə amwuə mɨ̀ŋə̀ ngɨ̀rə̀ a zèrə:

²¹Lenəla, ǹtyiʼə̀ ndzəənə̀ lo la àfàʼà mbòomə lo ǹgə̀ a nɨ ghɨ̀rə̀ ànwùə̀ ɨ̀shìʼnə̀, a tô e pə tɨ̀pòŋə̀ ambo mɨ̀ŋə̀ lo ngɨ̀rə̀.

²²Amwuə ntɨŋmə̀ mə̀, ngwə̀ ngaʼà a nɨ ghɨ̀rə̀ ànwùə̀ nɨ mbòomə Nẅùə̀ a shwəŋə̀nə.

²³La ngwə̀ ndzəənə̀ tsaʼnə mbòomə ghùtse à wə̀ nfàʼà amwuə mbɨ̀ŋmə̀ mə̀, ndzòŋnə̀ a mbòomə nɨ à pənə a ntɨŋmə̀ mɨ̀ŋə̀, ntyiʼə̀ ngɨ̀rə̀ mbə ngàŋə̀ ɨ̀tsaŋə̀ ambo mbòomə tɨ̀pòŋə̀ wa nɨ à pənə nfàʼà amwuə mɨ̀ŋə̀ la.

²⁴Wə̂ ngəʼə̀ mə̀! A gha ǎ fuukə̀ ɨ̀wə̌ amwuə mbɨ̀ŋmə̀ zə̀ nɨ ɨ̀ ghǎ ghɨ̀rə̀ n̂kwɨghə̀ lə?

²⁵Ngwə̀ ŋŋâ a mɨyàa ambo Nẅùə̀ ndàŋə̀ a ndzùmə̀ Yěsû Ndòʼnə̀mbyə̂ ɨ̀wə̀ənə̀. Lenəla, tɨ̀tsòŋə̀ wə̀, amwuə ntɨŋmə̀ mə̀, nchyə̂ mbə la àpùʼù ambo mbòomə Nẅùə̀. La amwuə mbòbə̀ mbɨ̀ŋmə̀ mə̀, mbə àpùʼù ambo mbòomə tɨ̀pòŋə̀.