Read Pinyin Roman 9 Bible Online

Roman 9 - Pinyin bible

Roman 9

¹Ngwə̀ nshwəŋə̀ lə a nkǔŋə nkuŋə ntiinə m̀bənə ŋwùə̀ Kristù ka mə nyìi mə̀ a chwìrə̀. Ntɨŋmə̀ mə̀ nɨ Àzhwùə̀ Nẅùə̀ a puʼtə̀nə ɨ zhyə̂ lo ka ǹnyìi mə̀ lə a chwìrə̀,

²lo ngwə̀ nsòmnə̀ tɨsɨŋnə nkɨ mbə nɨ àndzaŋə tɨ myə̀ amwuə ntɨŋmə̀ mə̀.

³Ntii pɨlyimə ɨ̀pâ pobə ngẅàrə̀ mə̀, nkòŋə̀ lo mbə̀ʼə pɨ chyâ ndòonə̀ aŋunə mɨ̀ŋə̀ ngàpə̀ a wəə pɨ Kristù ntii ghobə.

⁴Pobə la pànə̀ pɨ Israel nɨ Nẅùə̀ a lə̀ lòonə aŋunə ɨ̀poonə̀ ɨ̀pe, nnèrə̀ ɨ̀pòŋə̀ e ambo pobə, ngwàrə̀ ɨ̀kàanə̀ pobə pɨ pobə, ŋŋâ pɨ̀mbòomə ambo pobə, ngɨ̀rə̀ pobə pə nɨ àlàŋə a nɨ ghuʼtə̀ a Nẅùə̀ nɨ a kùʼnə̀nə nkɨ mbə nɨ mɨ̀nkàʼnə mɨ Nẅùə̀.

⁵Pobə lə̀ furə̀ la amwuə ngẅàrə̀ pɨ̀tǎ pɨ̀tǎ ɨ̀pə̀ənə̀, Kristù a tyiʼə̀ nfurə̀ amwuə ngẅàrə̀ ghu tsaʼa ŋwùə̀ mɨsoŋə. Pə̀ənə̀ tə nguʼtə̀ a Nẅùə̀ wa nɨ à pənə Nẅùə̀ wa nɨ à puʼtə̀nə pànə̀ pɨ̀tsùmə̀ nɨ nkuŋə̀. Amen.

⁶La ka m̀mə nshwəŋə̀ mə̀ pə lo àshwəŋnə̀ Nẅùə̀ a làŋə̀ àfǐfǐ, ntiinə ka a pə e ŋwùə̀ ntsùmə̀ nɨ pɨ pyə̂nə amwuə ngẅàrə̀ Israel nɨ à pənə ŋwùə̀ Israel.

⁷Ka à kɨ mbə e ngẅàrə̀ Abràhamə̀ ntsùmə̀ nɨ ɨ̀ pənə ɨ̀poonə̀ pɨ Nẅùə̀. La Nẅùə̀ à lə̀ shwəŋə̀ ambo Abràhamə̀ lo, “Pɨ ghǎ làŋə̀ a ndzùmə̀ Isàkə̀ fuŋə̀ nɨ̀linə̀ nɨ ngẅàrə̀ o.”

⁸Zèrə zə a nèrə̀ la lo ka à pə e ɨ̀poonə̀ pɨ̀tsùmə̀ nɨ pɨ pyə̂nə amwuə ndwuumə̀ nɨ ŋwùə̀ mɨsoŋə à wa mbyə̂ a moonə̀ nɨ Nẅùə̀ à lòonə aŋunə ɨ̀poonə̀ ɨ̀pe, a lòo e la pyə̀ pa nɨ à lə̀ kàʼà mə mbə̀ʼə ghobə la aŋunə ɨ̀poonə̀ ɨ̀pe.

⁹Mbə̀ʼnə Nẅùə̀ à lə̀ kàʼà la lo, “Ngǎ kẅirə̀ tô amwuə nkwùə̀ nɨ ɨ̀ kùʼnə̀nə, Sarah â pyə̂ a mômbyàŋnə̀.”

¹⁰Ka lə pə e ànwùə̀ ghu àtsùmə̀, ɨ̀poonə̀ pɨ Rèbekà pa pɨpaa lə̀ kɨ mbə la taʼà tǎ, a pə tǎ pɨ tǎ ɨ̀wə̀ənə̀ Isàkə̀.

¹¹Mbaa pə tsaʼnə pɨ lə̀ pirə̀nə e ɨ̀poonə̀ pə̀ tɨ pyə̂, pobə kɨ mbirə̀ ghobə ànwùə̀ yè ɨ̀shìʼnə̀ kə̀ yè tɨ̀pòŋə̀ tɨ ghɨ̀rə̀, nɨ̀ghɨ̀rə̀ lo nɨ̀tsoʼò a taʼà mômbyàŋnə̀ a lanə mbə amwuə ndwuumə̀ nɨ Nẅùə̀ a lə̀ nùŋə̀nə amwuə ntɨŋmə̀ e, ka pə e pə tsaʼnə pànə̀ ghɨ̀rə̀nə mɨ̀nwùə̀, mbə pə tsaʼnə Nẅùə̀ a tsoʼnə,

¹²Nẅùə̀ a lə̀ shwəŋə̀ ambo Rèbekà lo, “Ghù ntsàambyə̀ a ghǎ fàʼà ambo àzùŋə̀.”

¹³Tsaʼnə àŋwàʼnə̀ Nẅùə̀ a shwəŋə̀nə lo, “Ndə̀ kòŋə̀ a Yàkobə̀, la mbàanə̀ a Esau.”

¹⁴Mbə̀ʼə pə̀ənə̀ tyiʼə̀ nshwəŋə̀ lə lo àkə? Lo ka Nẅùə̀ a saʼà e ɨ̀sàʼa ɨ̀shìʼnə̀? Ka a pə e a lenə!

¹⁵Mbə̀ʼnə a lə̀ shwəŋə̀ ambo Mǔsî lo, “Mbɨ koorə̀ mɨ̀lɨŋə̀ mɨ ŋònə̀ nɨ ǹkòŋə̀nə a nɨ koorə̀, kɨ sòmnə̀ aŋunə ŋònə̀ nɨ ǹkòŋə̀nə a nɨ sòmnə̀ aŋunə ze.”

¹⁶Njiilo, ka mɨ̀nwùə̀ mèrə mə làŋə̀ e pə a ndzùmə̀ àfàʼà nɨ ŋwùə̀ mɨsoŋə a fàʼnə kə̀ nkòŋə̀. Mɨ làŋə̀ pə a ndzùmə̀ àkoorə̀ mɨ̀lɨŋə̀ Nẅùə̀.

¹⁷Mbə̀ʼnə àŋwàʼnə̀ Nẅùə̀ a shwəŋə̀ ambo Ferò lo, “Ndə̀ ghɨ̀rə̀ wə̀ pə ɨ̀fò la mbə̀ʼə làŋə̀ aŋunə ghò nèrə̀ ɨ̀tɨ̀ŋnə̀ mə̀, kɨ ghɨ̀rə̀ pɨ̀ zhyə̂ nɨ̀linə̀ ɨ̀tsâ amwuə àtwuə̀ ɨ̀shyə̂ àtsùmə̀.”

¹⁸Lenəla Nẅùə̀ à koorə̀ mɨ̀lɨŋə̀ mɨ ŋònə̀ nɨ à kòŋə̀nə a nɨ koorə̀ mɨ̀lɨŋə̀ ɨ̀me, nkɨ nkwùukə̀ ntɨŋmə̀ ŋònə̀ nɨ à kòŋə̀nə a nɨ kwùukə̀.

¹⁹Nɨ̀ pɨ pyiitə̀ ambo mɨ̀ŋə̀ lo, “A tə pəla a lenə, Nẅùə̀ a chi nfèrə̀ a wə̀ənə̀ lə lo àkə? Ɨ̀wə̌ a twuunə̀ ànwùə̀ nɨ Nẅùə̀ a kòŋə̀nə?”

²⁰Ghò ŋwùə̀ mɨsoŋə lə ɨ̀wə̌ a nɨ pyiitə̀ ɨ̀pyiitə̀ ɨ̀shwəŋnə̀ ambo Nẅùə̀? Mbə̀ʼə nɨkɨŋə nɨ àtɨ̀tsaʼa pyiitə̀ ambo ɨ̀mboomə̀ nɨkɨŋə lo, “Wə̀ poomə̀ mə̀ pə lə ntii àkə?”

²¹Ka ɨ̀mboomə̀ mɨkɨŋə wa a pə e nɨ ɨ̀tɨ̀ŋnə̀ a nɨ lòo taʼà ntsɨŋə̀ àpòomə mboomə̀ mɨkɨŋə ghu mɨmbaa, taʼà a pə nɨkɨŋə nɨ tə̀chwìi; chyə̀ pə a nɨ laamə̀ àzwuumə̀ amwuə.

²²A kɨ mbə la ndəŋə ndəŋə tsaʼnə Nẅùə̀ à lə̀ tàʼnə nnèrə̀ àtsə̂ ntɨŋmə̀ e, nkɨ ngɨ̀rə̀ pànə̀ zhyə̂ ɨ̀tɨ̀ŋnə̀ e, la ngẅìimə̀ ntɨŋmə̀ aŋunə pànə̀ nɨ à pənə nɨ àtsə̂ ntɨŋmə̀ aŋunə pobə, pobə kɨ nchwuʼtə̀ mbɨ̀ŋmə̀ ɨzobə a nɨ kwɨghə̀.

²³À lə̀ kɨ ntàʼà nèrə̀ a nɨ̀ghaʼà ghù noʼnə wa nɨ à lə̀ kẅiirə̀nə aŋunə pànə̀ pa nɨ lə̀ nùŋə̀nə lo pobə ghǎ kẅiirə̀ a ẅèrə la,

²⁴mbə̀ʼnə pə̀ənə̀ pa nɨ à lə̀ fuŋə̀nə, ka lə̀ furə̀ e la amwuə ndàʼà pànə̀ nɨ pobə pənə pɨ̀Jew, pɨ lə̀ kɨ furə̀ amwuə pànə̀ nɨ ka pobə pə ghobə pɨ̀Jew.

²⁵Lə̌ tsaʼnə Nẅùə̀ à shwəŋə̀nə amwuə àŋwàʼnə̀ Hosyà lo: “Mbɨ fuŋə̀ pànə̀ pa nɨ ka pobə lə̀ pə ghobə ɨ̀pâ la nɨ ‘pə̀ənə̀ ɨ̀pâ.’ Mbɨ kɨ fuŋə̀ pànə̀ pa nɨ ka ndə̀ kòŋə̀ la nɨ ‘pə̀ənə̀ ɨ̀pâ nɨ ǹkòŋə̀nə.’

²⁶Tyìʼə̀ amwuə alyiʼə nɨ pɨ lə̀ shwəŋə̀nə ambo pobə lo, ‘Ka nɨ̀ pə wɨghə pə̀ənə̀ ɨ̀pâ,’ pɨ ghǎ kɨ fuŋə̀ a ghobə nɨ ɨ̀poonə̀ pɨ Nẅùə̀ ghù ntɨ̀ŋnə̀.”

²⁷Ìsayà a kɨ ngyìi mbə̀ʼə pànə̀ pɨ Israel nshwəŋə̀ lo, “Mbaa pə tsaʼnə pànə̀ pɨ Israel noʼnə tsaʼa waakə a nɨ̀pwùnə nchyə la, a ghǎ chwarə̀ e la ndàʼà ghobə pɨ̀kɨ̂.

²⁸Ntiinə Ndòʼnə̀mbyə̂ à ghǎ zàŋə̀ lə̂ ɨ̀sàʼa e nɨ mɨ̀tɨ̀ŋnə̀ pobə pɨ pànə̀ pɨ àtwuə̀ ɨ̀shyə̂ tɨghu a waʼà ànwùə̀ àtse.”

²⁹A kɨ mbə la tsaʼnə Ìsayà à lə̀ pyə̀ mə nshwəŋə̀ lo, “Mbuʼtə̀ mbyə̂ Ndòʼnə̀mbyə̂ à lə̀ pəla ka waʼà e a wə̀ənə̀ nɨ ngẅàrə̀ ɨ̀tse, yi pə̀ənə̀ pə mə la tsaʼa Sodòmə̀ ghobə Gomorrah.”

³⁰Pə̀ənə̀ tyiʼə̀ nshwəŋə̀ lə lo àkə? Lo pànə̀ nɨ ka pobə lə̀ pə ghobə pɨ̀Jew nɨ ka pobə lə̀ mə nkyiitə̀ a ghobə a nɨ ghɨ̀rə̀ mɨ̀nwùə̀ mɨ təəmə̀nə a mbyə̀ Nẅùə̀, pɨ tyiʼə̀ ngɨ̀rə̀ mɨ̀nwùə̀ ɨ̀mobə təəmə̀ ndàŋə̀ a ndzùmə̀ àpyiimə̀ ntɨŋmə̀ àzobə.

³¹La pànə̀ pɨ Israel nɨ pobə lə̀ pənə nkyiitə̀ a nɨ zùŋə̀ a mbòomə lo mɨ̀nwùə̀ ɨ̀mobə təəmə̀ a mbyə̀ Nẅùə̀, ka mèrə lə̀ təəmə̀ e.

³²A ghɨ̀rə̀ àkə lo kò mɨ̀nwùə̀ ɨ̀mobə təəmə̀? A lə̀ pə ntiinə ka pobə lə̀ nùŋə̀ a ghobə mɨ̀ntɨŋmə̀ ɨ̀mobə aŋunə Nẅùə̀, mmə naŋə̀ pə ngɨ̀rə̀ mɨ̀nwùə̀ ɨ̀zobə. Lenəla, nkòntə̀ aŋunə nɨ̀ghòorə nkunə̀ a ɨ̀shyə̂,

³³Tsaʼnə pɨ ŋwàʼnə̀ amwuə àŋwàʼnə̀ Nẅùə̀ lo, “Nɨ̀ naŋə̀! Ǹnùŋə̀ nɨ̀ghòorə a Zayònə̀ nɨ pànə̀ ghǎ kòntə̀ aŋunə, a pə nɨ̀ghòorə nɨ tsèrə pɨ ghɨ̀rə̀ pobə̂ kẅìntə̀ a ɨ̀shyə̂. La ka pɨ pə ghǎ chyâ e ɨ̀sɨŋnə̀ àtwuə̀ ŋònə̀ wa ntsùmə̀ nɨ à nùŋə̀nə ntɨŋmə̀ e aŋunə ze la.”