Read Pinyin 1 Korìntə̀ 1 Bible Online

1 Korìntə̀ 1 - Pinyin bible

1 Korìntə̀ 1

¹A mɨ̀ŋə̀ Pàolò nɨ Nẅùə̀ à lə̀ kòŋə̀nə nfuŋə̀ lo m̂bə ngàŋə̀ ntwuumə̀ ambo Kristù Yěsû. À ŋwàʼnə̀ mɨ̀ŋə̀ pəə ndyimə mə̀ Sòstinə̀.

²Àŋwàʼnə̀ zə̀ a zə ndèrə̀ ambo àshwatə̀ ɨ̀poonə̀ pɨ Kristù nɨ a pənə àlaʼà Korìntə̀, mmə ndèrə̀ ambo pànə̀ pa pɨ̀tsùmə̀ nɨ Nẅùə̀ à fuŋə̀nə a ghobə ndòo a ghobə pobə tyiʼə̀ ɨ̀pe pànə̀ pɨ̀laanə̀nə, ntiinə pobə chyə̂nə mbə taʼà ŋwùə̀ pobə pɨ Kristù Yěsû. A zə nkɨ ndèrə̀ ambo pànə̀ pɨ̀tsùmə̀ alyiʼə àtsùmə̀ nɨ pobə pa nguʼtə̀ nɨ̀linə̀ nɨ ndòʼnə̀mbyə̂ ɨ̀wəənə̀ Yěsû Kristù, nɨ à chyə̂nə mbə Ndòʼnə̀mbyə̂ ɨghobə nkɨ mbə ɨ̀wə̀ənə̀.

³Nẅùə̀ Tǎ ɨwəə pobə Ndòʼnə̀mbyə̂ Yěsû Kristù pobə̂ nèrə̀ a wɨghə nɨ àpòŋə̀ ntɨŋmə̀ ghobə àpotə̀ ntɨŋmə̀.

⁴Ngwa nnoʼò ŋŋâ a mɨyàa ambo Nẅùə̀ ntii a wɨghə. Ngwa ŋŋâ a mɨyàa ambo Nẅùə̀ ntiinə à nèrə̀nə àpòŋə̀ ntɨŋmə̀ e ambo pɨghə ndàŋə̀ a ndzùmə̀ Kristù Yěsû.

⁵Mbə̀ʼnə nɨ̀ chyə̂nə mbə taʼà ŋwùə̀ pɨghə pɨ Yěsû, a ŋâ a wɨghə nɨ mborə̀ amwuə ɨ̀làŋə ɨ̀tsùmə̀. À ŋâ wɨghə nɨ mborə̀ aŋunə ɨ̀shwəŋnə̀ ɨ̀pɨghə farə aŋunə ɨ̀zhìʼtə̀ ɨ̀pɨghə.

⁶Mbə̀ʼnə ntwuumə̀ wa nɨ pəə lə̀ shwəŋə̀nə mbə̀ʼə Kristù lə̀ nèrə̀ amwuə pɨghə,

⁷lo kò nɨ̀ puŋə̀ a wɨghə mɨntyaŋnə mɨ Àzhwùə̀ Nẅùə̀ mɨ̀tse tsaʼnə nɨ̀ pə̀ mbyabə̀ njyə̂ nɨ Nẅùə̀ à ghǎ nèrə̀ a wəənə̀ nɨ Ndòʼnə̀mbyə̂ Yěsû Kristù.

⁸Yěsû à ghǎ nùŋə̀ a wɨghə nɨ̀ tɨ̀ŋnə̀ tə mbyàa a ndẅùutə, njiilo nɨ̀ pə a wɨghə nɨ ànwùə̀ tɨ̀pòŋə̀ àtse apə̀ njyə̂ nɨ Ndòʼnə̀mbyə̂ ɨ̀wə̀ənə̀ Yěsû Kristù a ghǎ tô.

⁹Nẅùə̀ wa nɨ à fuŋə̀nə ze nfuŋə̀ a wəənə̀ lo pə̀ənə̀ tô mbə taʼà ŋwùə̀ pə̀ənə̀ pɨ Moonə̀ e Yěsû Kristù Ndòʼnə̀mbyə̂ wəənə̀ la, a Nẅùə̀ nkǔŋə nkuŋə.

¹⁰Ngwə̀ mbuʼù mbô ambo pɨghə a pɨlyimə ɨ̀pâ, aŋunə nɨ̀linə̀ nɨ Ndòʼnə̀mbyə̂ ɨ̀wə̀ənə̀ Yěsû Kristù, lo nɨ̀ pə ntswùə̀ moʼo. Kò nɨ̀ pə nɨ àghàpə̀ a tɨ̀tɨ̀rə̀ pɨghə. Nɨ̀ pwuutə̀ mbə taʼà ŋwùə̀ amwuə mɨ̀ntɨŋmə̀ ɨ̀mɨghə farə ɨ̀kwàŋə̀ pɨghə.

¹¹Pɨlyimə ɨ̀pâ, pànə̀ pɨ̀tse amwuə ngẅàrə̀ pɨ Chloe shwəŋə̀ ambo mɨ̀ŋə̀ lo nɨ̀ pa nsaʼnə̀ a tɨ̀tɨ̀rə̀ pɨghə.

¹²Ànwùə̀ nɨ̀ ǹtàʼnə a nɨ shwəŋə̀ a chyə̂ lo, ŋònə̀ ɨ̀tse a wa shwəŋə̀ lo, “Mɨ̀ŋə̀ a ŋwùə̀ Pàolò”; ẅùə̀ a shwəŋə̀ a ze lo, “Mɨ̀ŋə̀ a ŋwùə̀ Àpolòsə̀”; ẅùə̀ a shwəŋə̀ a ze lo, “Mɨ̀ŋə̌ ŋwùə̀ Sefàsə̀”; ẅùə̀ a tyiʼə̀ nshwəŋə̀ àze lo, “Mɨ̀ŋə̌ ŋwùə̀ Kristù.”

¹³Mbə̀ʼə pɨ ghàpə̀ a Kristù ɨ̀tùmə ɨ̀tùmə? Pɨ lə̀ kẅùumə̀ a Pàolò aŋunə àtɨ̀ghə pànkə̀nə la ntii wɨghə? Pɨ lə̀ ŋâ a wɨghə nɨ àkẅiirə̀ nchyə la aŋunə nɨ̀linə̀ nɨ Pàolò?

¹⁴Ngwə̀ ŋŋâ a mɨyàa ambo Nẅùə̀ lo amwuə pɨghə, ndə̀ ŋâ àkẅiirə̀ nchyə pə ambo ndàʼà Krispùsə̀ pobə Gayòsə̀, ka chi ŋâ mə̀ àkẅiirə̀ nchyə ambo ŋwùə̀ wɨghə ɨ̀tse

¹⁵nɨ mbə̀ʼə a shwəŋə̀ lo à lə̀ lòo àkẅiirə̀ nchyə la aŋunə nɨ̀linə̀ ɨ̀tsâ.

¹⁶[Ǹchi nkẅempə̀ lo ndə̀ ŋâ àkẅiirə̀ nchyə ambo Stèfanàsə̀ pobə ngẅàrə̀ e, la pə ntsùmə̀ ntsùmə̀. Ka ǹzhyə̂ mə̀ lo ndə̀ chi ŋŋâ àkẅiirə̀ nchyə ambo ŋònə̀ ɨ̀tse].

¹⁷Ka Kristù a lə̀ twuumə̀ e a gha la lo n̂tô ntə ŋŋâ àkẅiirə̀ nchyə. À lə̀ twuumə̀ mə̀ pə lo n̂gə̀ ntə nchwìitə̀ ntwuumə̀ ghù ɨ̀shìʼnə̀, ka pə chwìitə̀ mə̀ a ẅèrə pə nɨ àzhìʼtə̀ pànə̀ pɨ mɨsoŋə, njiilo kò nɨ̀wɨghə̀ Kristù aŋunə àtɨ̀ghə pànkə̀nə a pî e mɨ̀tɨ̀ŋnə̀ ɨ̀me.

¹⁸Ànwùə̀ àtɨ̀ghə pànkə̀nə la àkɨ̀ghə̀ ànwùə̀ ambo pànə̀ nɨ pɨ pînə, la ngə̀ aŋunə pə̀ənə̀ nɨ Nẅùə̀ à fuukə̀nə a wəənə̀ amwuə ngəʼə̀ la, ànwùə̀ ghu a yè mɨ̀tɨ̀ŋnə̀ mɨ Nẅùə̀.

¹⁹Lə̌ tsaʼnə àŋwàʼnə̀ Nẅùə̀ a zə shwəŋə̀: “Ngǎ tsə̀ŋə̀ àzhìʼtə̀ ngàŋə àzhìʼtə̀; kɨ tinə̀ ànwùə̀ za nɨ ngàŋə àŋwàʼnə̀ a zhyə̂nə la tsàa nɨ̀pwùnə.”

²⁰Ngàŋə̀ àzhìʼtə̀ à chyə̂ ɨghə? Ngàŋə̀ àŋwàʼnə̀ kə̀ ŋònə̀ nɨ à zhyə̂nə shwəŋə̀nə àtwuə̀ ɨ̀shyə̂ ghə a pə ɨghə? Ka a ghɨ̀rə̀ Nẅùə̀ lo àzhìʼtə̀ àtwuə̀ ɨ̀shyə̂ ghə â pə̀ŋə̀ ntyiʼə̀ àkɨ̀ghə̀?

²¹Nẅùə̀ à lə̀ ghɨ̀rə̀ nɨ àzhìʼtə̀ e lo mbə̀ʼə pànə̀ lòo a ghobə la àzhìʼtə̀ àzobə a nɨ zhyə̂ e ghu apə̀. Nẅùə̀ à lə̀ ghɨ̀rə̀ àze pə lo a chwarə̀ pə pànə̀ pa nɨ pobə nùŋə̀nə mɨ̀ntɨŋmə̀ ɨ̀mobə aŋunə ze la, ntiinə pobə zuʼnə àkɨ̀ghə̀ ntwuumə̀ za nɨ pəə lə̀ chwìitə̀nə ambo pobə la.

²²Pɨ̀Jew tàʼà pə a nɨ zəənə̀ ɨ̀lènə̀ ɨ̀nwùə̀ pɨ̀yerə̀nə yerə̀nə; pɨ̀Greek pə ntàʼà àzobə pə àzhìʼtə̀.

²³Ngə̀ aŋunə pəə, àzəə chyə̂ pə a nɨ chwìitə̀ lo Kristù a kwɨghə̀ aŋunə àtɨ̀ghə pànkə̀nə, ntwuumə̀ nɨ ɨ wa ngɨ̀rə̀ pɨ̀Jew zaŋə̀ a loŋə, pànə̀ nɨ ka pobə pə ghobə pɨ̀Jew kɨ ndzəənə̀ lo a àkɨ̀ghə̀ àshwəŋnə̀.

²⁴La ngə̀ aŋunə pànə̀ nɨ Nẅùə̀ à fuŋə̀nə amwuə pɨ̀Jew pobə pɨ̀Greek, Kristù la mɨ̀tɨ̀ŋnə̀ mɨ Nẅùə̀, nkɨ nchi mbə àzhìʼtə̀ Nẅùə̀.

²⁵Àzhìʼtə̀ a za amwuə àkɨ̀ghə̀ Nẅùə̀ ntsàarə̀ àzhìʼtə̀ ŋwùə̀ mɨsoŋə, mɨ̀tɨ̀ŋnə̀ kɨ nchi mbə amwuə nɨ̀porə̀ Nẅùə̀ ntsàarə̀ mɨ̀tɨ̀ŋnə̀ ŋwùə̀ mɨsoŋə.

²⁶Pɨlyimə ɨ̀pâ, nɨ̀ kwàŋə̀ tsaʼnə nɨ̀ lə̀ pənə zaʼà Nẅùə̀ â pòŋə̀ nfuŋə̀ a wɨghə. Ka pɨghə pɨ̀noʼnə lə̀ pə a wɨghə nɨ àzhìʼtə̀, kə̀ nɨ mɨ̀tɨ̀ŋnə̀, kə̀ farə nɨ alyiʼə pànə̀ pɨ̀ẅùunə amwuə ndwuumə̀ nɨ ŋwùə̀ mɨsoŋə à wa nkwàŋə̀ àze.

²⁷Nẅùə̀ à lə̀ tsoʼò pə àzwuumə̀ za nɨ pànə̀ pɨ àtwuə̀ ɨ̀shyə̂ pa nnaŋə̀ nfuŋə̀ nɨ àkɨ̀ghə̀ àzwuumə̀ a nɨ lòo nchyâ ɨ̀sɨŋnə̀ àtwuə̀ ngàŋə̀ àzhìʼtə̀; ntsoʼò a zhyə̀ za nɨ pànə̀ pɨ àtwuə̀ ɨ̀shyə̂ naŋə̀nə nfuŋə̀ lo a àporə̀ àzwuumə̀ a nɨ lòo nchyâ ɨ̀sɨŋnə̀ aŋunə pànə̀ nɨ pobə pənə nɨ mɨ̀tɨ̀ŋnə̀.

²⁸Nẅùə̀ à lə̀ tsoʼò pə àzwuumə̀ nɨ pànə̀ pɨ àtwuə̀ ɨ̀shyə̂ naŋə̀nə nfuŋə̀ nɨ àfǐfǐ ngwâ a zèrə ndòo ntsə̀ŋə̀ a zhyə̀ nɨ pànə̀ pɨ àtwuə̀ ɨ̀shyə̂ naŋə̀nə nfuŋə̀ nɨ àzwuumə̀ ɨ̀shìʼnə̀.

²⁹Nẅùə̀ à lə̀ ghɨ̀rə̀ a zèrə zə̀ la a nɨ nèrə̀ lo kò ŋwùə̀ a tə ntsòo e a ghàŋə̀ a mbyə̀ ze.

³⁰A ghɨ̀rə̀ Nẅùə̀ lo nɨ̀ pwuutə̀ mbə taʼà ŋwùə̀ pɨghə pɨ Kristù Yěsû, nkɨ ngɨ̀rə̀ ze lo Kristù a pə àzhìʼtə̀ àzəənə̀. A ghɨ̀rə̀ ze lo pə̀ənə̀ pə pànə̀ pɨ ɨ̀shìʼnə̀ ambo ze, nkɨ mbə pə̀ənə̀ ɨ̀pe pɨ laanə̀nə farə pɨ chwarə̀nə pa.

³¹Lenəla, a nɨ zùŋə̀ tsaʼnə àŋwàʼnə̀ Nẅùə̀ a shwəŋə̀nə lo, “Ŋwùə̀ a pə ntsòo a ghàŋə̀ e, a tsòo pə mbə̀ʼə Ndòʼnə̀mbyə̂.”