Read Pinyin 1 Korìntə̀ 10 Bible Online

1 Korìntə̀ 10 - Pinyin bible

1 Korìntə̀ 10

¹Pɨlyimə ɨ̀pâ, ǹtàʼà lo nɨ̀ zhyə̂ lo pɨ̀tǎ pɨ̀tǎ ɨ̀pə̀ənə̀ lə̀ zùŋə̀ a Mǔsî ngyìinə̀ a ɨ̀sùmə mbàʼà, nkɨ ntwuumə̀ nchyə ghu nɨŋnə̀nə yɨ̀ pàŋə̀nə wa.

²Tsaʼnə pobə lə̀ zùŋə̀nə a Mǔsî amwuə mbàʼà, ntwuumə̀ nchyə ghu nɨŋnə̀nə yɨ̀ pàŋə̀nə wa la, pobə lə̀ kẅiirə̀ la nchyə a nɨ mə ndzùŋə̀ a Mǔsî kɨ mə zuʼnə̀ e.

³Pobə pɨ̀tsùmə̀ lə̀ zɨghə̀ a taʼà mbuurə̀ mɨ̀zɨghə̀ mɨ Àzhwùə̀,

⁴nkɨ nnô tyìʼə̀ a taʼà mbuurə̀ nchyə Àzhwùə̀. Ntiinə nchyə ghu nɨ pobə lə̀ nônə la, ɨ lə̀ furə̀ la amwuə àlàrə̀kə̀ nɨ̀ghòorə nɨ Àzhwùə̀ nɨ nɨ lə̀ mənə ndzùŋə̀ a ghobə mbə Kristù. Àlàrə̀kə̀ nɨ̀ghòorə za a lə̀ pə Kristù.

⁵Mbaa pə tsaʼnə a lə̀ pənə lə la, pobə pɨ̀noʼnə lə̀ ghɨ̀rə̀ mɨ̀nwùə̀ nɨ ka Nẅùə̀ à lə̀ pə e nɨ nɨ̀ghaʼà aŋunə pobə; la a pə ɨ̀sùmə ànwùə̀ nɨ pobə pɨ̀noʼnə lə̀ kwɨkə̀nə, nsapə̀ amwuə alyiʼə waakə.

⁶Ɨ̀nwùə̀ pèrə pə tyiʼə̀ nkwàtə̀ lə a wəənə̀ lo kò pə̀ənə̀ tə mbə nɨ ntoŋə a nɨ tə ngɨ̀rə̀ a tɨ̀pòŋə̀ tsaʼa pobə.

⁷Kò nɨ̀ kɨ nguʼtə̀ a wɨghə pɨ̀tɨtoo tsaʼnə pobə pɨ̀tse lə̀ pənə nguʼtə̀ la, ntiinə pɨ ŋwàʼnə̀ amwuə àŋwàʼnə̀ Nẅùə̀ lo, “Pànə̀ pɨ̀ghu lə̀ nwuunə̀ a ɨ̀shyə̂ ndzɨghə̀ nkɨ nnô ndòo a ɨ̀shyə̂ mbinə̀.”

⁸Kò pə̀ənə̀ tə ŋŋâ a wəənə̀ mbɨ̀ŋmə̀ ɨ̀zə̀ənə̀ aŋunə mɨ̀nwùə̀ mɨ məghàbə̀ tsaʼnə pobə pɨ̀tse lə̀ ghɨ̀rə̀nə, pobə nkaamə̀ mɨ̀ghumə̀ mɨmbaa ntsòbə̀ ɨtarə kwɨghə̀ a taʼà njyə̂.

⁹Kò pə̀ənə̀ tə nkwàʼnə̀ a Nẅùə̀ tsaʼnə pobə pɨ̀tse lə̀ kwàʼnə̀nə e a tsàa mɨ̀nyoorə̀ mɨ zhwuutə̀ a ghobə.

¹⁰Kò pə̀ənə̀ kɨ ndẅùmpə̀ tsaʼnə pobə pɨ̀tse lə̀ lẅùmpə̀nə, Nẅùə̀ a tsàa angèrə̀ nɨ̀wɨghə̀ a tô nzhwuutə̀ a ghobə la.

¹¹Ɨ̀nwùə̀ pèrə pə ɨ̀tsùmə̀ lə̀ ghɨ̀rə̀ a ghobə mbə̀ʼə kwàtə̀ a àpwùʼə̀ pə̀ənə̀, pɨ kɨ ŋŋwàʼnə̀ mbə̀ʼə təətə̀ a wɨghə. Ntiinə pə̀ənə̀ pə lə amwuə nkwùə̀ nɨ ndẅùutə àtwuə̀ ɨ̀shyə̂ ɨ̀ zə ntyiʼə̀ a mbô.

¹²Lenəla, ŋwùə̀ ntsùmə̀ nɨ à kwàŋə̀nə lo à təəmə̀ ntɨ̀ŋnə̀ amwuə àpyiimə̀ â lâ àtwuə̀ e mbə̀ʼə a kunə̀.

¹³Ka àkwàʼnə̀ àtse a pə e ghu nɨ a kwàʼnə̀ mə a wɨghə nɨ a laʼa mə mbirə̀ e a ŋònə̀ ɨ̀tse tɨ kwàʼnə̀. Nẅùə̀ a Nẅùə̀ nɨ à wa nnùŋə̀ nkàʼnə e nɨ mbə̀ʼə ka a myàʼtə̀ e àkwàʼnə̀ àtse a tsàarə̀ mɨ̀tɨ̀ŋnə̀ ɨ̀mɨghə. Amwuə nkwùə̀ nɨ nɨ̀ pənə amwuə àkwàʼnə̀ ghu, Nẅùə̀ a pɨ ŋâ a wɨghə nɨ àlàŋə a nɨ zhyə̂ ẅìimə̀ ntɨŋmə̀ ɨ kɨ furə̀ amwuə àkwàʼnə̀ ghu.

¹⁴Lenəla nɨ pɨlyimə ɨ̀pâ nɨ ǹkòŋə̀nə, nɨ̀ kɨ̀ɨrə̀ a nɨ tə nguʼtə̀ pɨ̀tɨtoo.

¹⁵Ngwə̀ nshwəŋə̀ ambo pɨghə lə tsaʼa pànə̀ nɨ pɨ zhwuumə̀nə. Nɨ̀ shankə̀ ɨ̀twuə̀ ɨ̀pɨghə ɨ̀shìʼnə̀ aŋunə ànwùə̀ zə̀ nɨ nshwəŋə̀nə lə.

¹⁶Ka ndoŋə̀ mborə̀ za nɨ pə̀ənə̀ nônə, ŋŋâ a mɨyàa ambo Nẅùə̀ la ɨ pwuutə̀ e a wəənə̀ amwuə àləəmə̀ Kristù? Ka àpaanə̀ za nɨ pə̀ənə̀ piʼtə̀nə nkwurə̀ a pwuutə̀ a wəənə̀ amwuə mbɨ̀ŋmə̀ Kristù?

¹⁷Tsaʼnə a pənə e taʼà ntsɨŋə̀ àpaanə̀ la, Pə̀ənə̀ nɨ pə̀ənə̀ noʼnə la, nchi mbə tyìʼə̀ taʼà mbɨ̀ŋmə̀ ntiinə pə̀ənə̀ pɨ̀tsùmə̀ pwuutə̀nə nkwurə̀ a taʼà àpaanə̀ ghu.

¹⁸Nɨ̀ naŋə̀ pànə̀ pɨ Israel: Ka la pə e pànə̀ nɨ pobə zɨghə̀nə mɨ̀zɨghə̀ mɨ pwuutə̀ a ghobə aŋunə nɨ̀chwùə nɨ ɨ̀mǔ nɨ Nẅùə̀?

¹⁹Ǹshwəŋə̀ ànwùə̀ zèrə zə̀ nshwəŋə̀ la lo àkə? Lo mɨ̀zɨghə̀ nɨ pɨ zə̂nə pɨ̀tɨtoo ghu la àzwuumə̀ àtse kə̀ lo pɨ̀tɨtoo pèrə pə nɨ pɨ ghuʼtə̀nə lə chyə̂ mbə la àzwuumə̀ àtse?

²⁰Ngaŋə, ka a pə e a lenə. Ànwùə̀ nɨ ngwə̀ nshwəŋə̀ a chyə̂ la lo pànə̀ nɨ ka pobə pyiimə̀ a ghobə a Nẅùə̀ pa ŋŋâ ɨ̀pwuumə̀ nɨ̀shwàʼà pèrə lèrə̀ la ambo ɨ̀zhyə̂ ka pə e ambo Nẅùə̀. Ka ǹtàʼà mə̀ lo nɨ̀ pwuutə̀ pɨghə pɨ ɨ̀zhyə̂.

²¹Mbə̀ʼə nɨ̀ nô a wɨghə ndoŋə̀ Ndòʼnə̀mbyə̂ nkɨ nchi nnô ndoŋə̀ ɨ̀zhyə̂ apə̀. Mbə̀ʼə nɨ̀ pwuutə̀ a wɨghə tepèrə̀ pɨghə pɨ Ndòʼnə̀mbyə̂ ndzɨghə̀ nkɨ nchi mbwuutə̀ a tepèrə̀ pɨghə pɨ ɨ̀zhyə̂ ndzɨghə̀ apə̀.

²²Pə̀ənə̀ tàʼà ghɨ̀rə̀ lo Ndòʼnə̀mbyə̂ a pə nɨ àghə̀ʼnə̀? Pə̀ənə̀ kwàŋə̀ lo pə̀ənə̀ tɨ̀ŋnə̀ ntsàarə̀ e?

²³Mbə̀ʼə nɨ̀ ghɨ̀rə̀ ànwùə̀ àtsùmə̀, la ka a pə e ànwùə̀ àtsùmə̀ nɨ nɨ̀ ghɨ̀rə̀nə nɨ mbə̀ʼə a yèmpə̀ a wɨghə. Mbə̀ʼə nɨ̀ ghɨ̀rə̀ ànwùə̀ àtsùmə̀ la ka a pə e ànwùə̀ àtsùmə̀ nɨ nɨ̀ ghɨ̀rə̀nə nɨ mbə̀ʼə a poomə̀ a wɨghə, nɨ̀ kẅùə̀ ntɨ̀ŋnə̀ amwuə Ndòʼnə̀mbyə̂.

²⁴Kò ŋwùə̀ a kɨ ntàʼà e pə àze àpìi, â tàʼà pə a zhyə̀ nɨ a pɨ yèmpə̀ a ndyimə e.

²⁵Nɨ̀ zɨghə̀ àzwuumə̀ àtsùmə̀ nɨ pɨ shwùunə̀nə amwuə mɨ̀tàanə mbòbə̀. Kò nɨ̀ kɨ mbyiitə̀ a wɨghə ɨ̀pyiitə̀ pyə̀ nɨ ɨ pɨ ghɨ̀rə̀ mɨ̀ntɨŋmə̀ ɨ̀mɨghə tə saʼà a wɨghə,

²⁶mbə̀ʼnə àtwuə̀ ɨ̀shyə̂ zə̀ pobə ɨ̀pwuumə̀ ɨ̀tsùmə̀ nɨ ɨ pənə amwuə la pɨ Ndòʼnə̀mbyə̂[1].

²⁷Ŋònə̀ nɨ ka à pyiimə̀ e a Nẅùə̀ à tə fuŋə̀ wɨghə lo nɨ̀ tô ndzɨghə̀ a ndâ ze, nɨ̀ pyiimə̀ ndèrə̀ nɨ̀ zɨghə̀ àzwuumə̀ àtsùmə̀, mbyiitə̀ a wɨghə ɨ̀pyiitə̀ pyə̀ nɨ ghɨ̀rə̀ mɨ̀ntɨŋmə̀ ɨ̀mɨghə tə nsaʼà a wɨghə apə̀.

²⁸La ŋònə̀ ɨ̀tse à tə pəla nshwəŋə̀ ambo pɨghə lo, “Mɨ̀zɨghə̀ mə a mɨ̀zɨghə̀ nɨ pɨ màʼnə pɨ̀nẅùə̀ ghu,” kò nɨ̀ zɨghə̀ a wɨghə ntii ŋònə̀ nɨ a shwəŋə̀nə ambo pɨghə, kə̀ mbə̀ʼə ntɨŋmə̀ e tə saʼà a e.

²⁹Ka nshwəŋə̀ mə̀ pə mbə̀ʼə mɨ̀ntɨŋmə̀ ɨ̀mɨghə nshwəŋə̀ pə mbə̀ʼə ntɨŋmə̀ ŋònə̀ wa nɨ à shwəŋə̀nə ànwùə̀ ghu ambo pɨghə la. Ŋònə̀ ɨ̀tse ǎ pyiitə̀ lo, “A ghɨ̀rə̀ àkə lo kò ngɨ̀rə̀ mə̀ ànwùə̀ nɨ ǹkòŋə̀nə a nɨ ghɨ̀rə̀ ntii ŋònə̀ nyàanə nɨ ntɨŋmə̀ e ɨ pɨ saʼà e?

³⁰Ntə mbəla ŋŋâ a mɨyàa ambo Nẅùə̀ aŋunə mɨ̀zɨghə̀ nɨ ǹdzɨghə̀nə, a ghɨ̀rə̀ àkə lo ŋònə̀ ɨ̀tse a shwəŋə̀ lo ka ngɨ̀rə̀ mə̀ ɨ̀shìʼnə̀ a nɨ zɨghə̀ mɨ̀zɨghə̀ ma nɨ ŋ̀ŋânə a mɨyàa aŋunə la?”

³¹Lenəla, kə̀ nɨ̀ zɨghə̀, kə̀ nnô, kə̀ ànwùə̀ àkə nɨ nɨ̀ ghɨ̀rə̀nə, yi nɨ̀ ghɨ̀rə̀ ànwùə̀ àtsùmə̀ pə a nɨ ŋâ àghuʼtə̀ ambo Nẅùə̀.

³²Nɨ̀ chyə̂ a pə amwuə àlàŋə za nɨ mbə̀ʼə ka nɨ̀ ŋâ a wɨghə ngəʼə̀ ambo pɨ̀Jew, kə̀ ambo pànə̀ nɨ ka pɨ pə a ghobə pɨ̀Jew, kə̀ ambo ɨ̀shwatə̀ ɨ̀poonə̀ pɨ Nẅùə̀.

³³Nɨ̀ taŋnə̀ a nɨ ghɨ̀rə̀ tsaʼnə ngwa ngɨ̀rə̀, amwuə ndwuumə̀ nɨ ǹkɨnə mmə nkyiitə̀ nɨ mɨ̀tɨ̀ŋnə̀ lo pànə̀ pɨ̀tsùmə̀ pə nɨ nɨ̀ghaʼà aŋunə ɨ̀nwùə̀ ɨ̀tsùmə̀ nɨ ngwa ngɨ̀rə̀ la, ntiinə ngwa ka ghɨ̀rə̀ mə̀ pə ndàʼà ànwùə̀ nɨ a pòŋə̀nə mə̀. Ngwa ngɨ̀rə̀ pə ɨ̀nwùə̀ pyə̀ nɨ pèrə̌ pòŋə̀ pànə̀ pɨ̀noʼnə mbə̀ʼə pobə̂ chwarə̀.